1. Ino Defedi wakaamba nshi pa kuliceesha kwakwe Yehova?

SA inga twaamba ayi Yehova alaliceesha? Ee, alaliceesha. Defedi wakaamba ayi: ‘Mwakampa lupulusho lwanu anga ndiyawo, alimwi kuliceesha kwanu kulansumpula.’ (2 Samwe. 22:36; Kulu. 18:35) Mpashi Defedi ndyaakalemba maswi aya wakalinga kwiibaluka bushiku mushinshimi Samwelo ndyaakesa kuŋanda ya baishi Defedi, kwaamba ayi ananike wooyo wakalinga kusa mukuba mwaami wa bene Isilaeli kunembo. Nabi kwaamba ayi Defedi ngowakalinga mwanikebantu pa baana basankwa boonse bali 8, Yehova ngwaakasala kwaamba ayi apyane Mwaami Saulo.​—1 Samwe. 16:1, 10-13.

2. Ino nshiinshi nsheshi tubandike mumutwi uyu?

² Ncakutatoonsha kwaamba ayi Defedi wakalinga kulinyumfwa bweenka mbuli bwakalinga kulinyumfwa wakalemba kulumbaisha uyo wakaamba pali Yehova ayi: “Lakwe ngookotama akulanga panshi ayi abone meculu acishi ca panshi, ngoosumpula bakandu kuswa mulusuko. Akunyamuna bataaku mbobabete . . . akubabika pomwi abanaabaami basankwa.” (Kulu. 113:6-8) Mumutwi uyu, tutotaanguna kwiiya shiiyo shiyandika pamakani akuliceesha kwiinda mukubandika shiindi Yehova ndyaakatondesha mubo wakuliceesha. Lyalo tutobandika nsheenga tweeya kuswa kucakubonenaako ca Mwaami Saulo, mushinshimi Danyelo, alimwi acakwe Yesu pamakani akuliceesha.

3. Ino nshiinshi Yehova nshaacitila bantu batamaninite, alimwi ino ici cilatondesha nshi?

³ Yehova alatondesha ayi alaliceesha kwiinda mushintu nshaacitila bantu batamaninite. Alatambula kupaila kwesu alimwi akusumina  kwaamba ayi tube beshicibusa bakwe. (Kulu. 25:14) Kwaamba ayi tube abushicibusa anguwe, Yehova ngowakataanguna kucitawo comwi kwiinda mukutupa Mwanaakwe mbuli mulambu wakutulubula kuswa kushibiibi shesu. Ncakwiila Yehova wakatutondesha nkumbu akutuyeeyelaako abuumbi!

4. Ino Yehova wakatupa nshi, alimwi ino nceebonshi?

⁴ Amuyeeye nshila imwi Yehova mbwaatondesha kuliceesha. Mbuli Mulengi, naakwiinga wakatulenga munshila yakwaamba ayi lakwe kaatusalila nshaasuni ayi tucite. Sombi taakwe kucita boobo. Wakatulenga mucikoshanyo cakwe akutupa nkusu shakulisalila. Nshetusala kucita shilayandika kuli Yehova, nabi kwaamba ayi ulitwiinditeewo. Alisuni kwaamba ayi tusalewo kumusebensela amyoyo yesu yoonse ceebo cakwaamba ayi tulimusuni alimwi tulishi bubotu mbotucana na katumunyumfwila. (Duto. 10:12; Isa. 48:17, 18) Tulalumba abuumbi kwaamba ayi Yehova alatondesha kuliceesha!

5. Ino Yehova alatwiisha buyani kuba bantu baliceesha? (Amubone cikope cili pa peeji yakutaanguna.)

⁵ Yehova alacita shintu shitondesha ayi alaliceesha mukwiinga alisuni ayi aswebo twiiye kuliceesha kuswa kuli nguwe. Taakuwo wiinda Yehova busongo. Nacibi boobo, alasumina kukutika bamwi mbobatoyeeya. Kucakubonenaako, wakasuminisha Mwanaakwe kumucafwa ndyaakalinga kulenga shintu. (Tus. 8:27-30; Kolo. 1:15, 16) Alimwi nabi kwaamba ayi Yehova ngushinkusu shoonse, alapako bamwi mikuli. Kucakubonenaako,wakasala Yesu kuba Mwaami wa Bwaami bwakwe, alimwi alaakupa coolwe ca kweendelesha kulikoto lyaba 144,000 abo beshibakanookweendelesha pomwi a Yesu. (Luka 12:32) Ncakwiila kwaamba ayi Yehova wakaiisha Yesu kuba Mwaami alimwi Mupailishi Munene. (Ebu. 5:8, 9) Alimwi alaiisha abaabo beshikanookweendelesha pomwi a Yesu kukumanisha mukuli wabo, sombi taabeembeli kwaamba ayi abone mbobatosebensa. Muciindi cakucita boobo,  alashoma ayi balaakucikonsha kucita kweelana akuyanda kwakwe.​—Ciyu. 5:10.

6-7. Ino nshiinshi nshetutokwiiya kuswa kuli Ishiwesu wakwiculu pamakani akupako bamwi incito?

⁶ Na Ishiwesu wakwiculu utayandiki lucafwo kuswa kumuntu uli woonse alapako bamwi mikuli, nkokwaamba ayi swebo tulyeelete kwiindaawo kuba amushimu wa kupako bamwi mikuli! Kucakubonenaako, sa mulicite mukuli mulibungano, na mumukwashi mbuli mutwi? Amukonkele cakubonenaako cakwe Yehova kwiinda mukupako bamwi mikuli, akuleya kubeembela kwaamba ayi mubone mbobatosebensa. Kukonkela cakubonenaako cakwe Yehova kulaakupa kwaamba ayi incito inokweenda kabotu, mulaakwiishako bamwi, akubacafwa kushoma ayi inga bacikonsha kucita ncito shiinji. (Isa. 41:10) Ino nshiinshi shimwi abo bakapekwa nkusu nsheenga beeya kuswa kucakubonenaako cakwe Yehova?

⁷ Baibo ilatondesha kwaamba ayi Yehova alanyumfwa kabotu kukutika baanjelo mbobatoyeeya. (1 Baami 22:19-22) Nobashali, ino inga mwacita buyani kwaamba ayi mukonkele cakubonenaako cakwe Yehova? Cimwi ciindi, inga mweepusha bana banu mbobatoyeeya pamakani ambweenga shintu shimwi shacitwa. Alimwi na nshobaamba inga shasebensa, amushikonkele.

8. Ino Yehova wakatondesha buyani kukalika moyo kuli Abulaamu a Saala?

⁸ Nshila imwi Yehova mbwatondesha kuliceesha nkwiinda mukukalika moyo. Kucakubonenaako, Yehova alakalika moyo na basebenshi bakwe mubulemu bamwiipusha ncaasalila kucita shintu shimwi. Wakakutika Abulaamu ndyaakaamba ayi wakalinga kubona ayi tacakalinga kweelete kunyonyoola ndabala ya Sodoma a Gomola. (Mata. 18:22-33) Alimwi amwiibaluke mbwakacita kumukaakwe Abulaamu, Saala. Yehova taakwe kukalala Saala ndyaakaseka ciindi ndyaakamushomesha ayi alaakumita nabi wacembela. (Mata. 18:10-14) Muciindi cakucita boobo, Yehova wakacita shakatondesha bulemu kuli Saala.

9. Ino bashali abamanene inga beeya nshi kuswa kucakubonenaako cakwe Yehova?

⁹ Nobashali alimwi anobamanene, ino inga mweeya nshi kuswa kucakubonenaako cakwe Yehova? Ino mulacita buyani na bana banu na bamwi mulibungano tabakwe kusuminisha nshemwasala? Sa mulabalwiitilawo peenkapo ayi nshebaamba tashibete kabotu? Na mpashi mulataanguna kunyumfwa mbobatoyeeya? Ncakutatoonsha kwaamba ayi libungano amikwashi balafubilaamo na abo bakapekwa mukuli wakutanjilila kabakonkela cakubonenaako cakwe Yehova. Kushika waano, twabandika nsheenga tweeya pamakani akuliceesha kuswa kucakubonenaako cakwe Yehova. Ano amuleke tubandike nsheenga tweeya pamakani akulibombya kuswa kushakubonenaako nshetucana mu Maswi akwe Lesa.

10. Ino Yehova alatwiisha nshi kuswa kushakubonenaako shamu Baibo?

¹⁰ Mukwiinga Yehova ngu “Mufundishi wesu Wiinditewo,” alatwiisha kwiinda mukutupa shakubonenaako shibotu mu Maswi akwe. (Isa. 30:20, 21) Tuleeya shiinji kwiinda mukubelenga akukutumana kuyeeya pamakani ngotucana mu Baibo aamba pabantu bakatondesha mibo Yehova njaasuni. Alimwi tuleeya shiinji na katubelenga shakacitikila baabo bakaalilwa kukonkela mibo Lesa njaasuni.​—Kulu. 37:37; 1 Koli. 10:11.

11. Ino cakubonenaako cakwe Saulo cilatwiisha nshi?

¹¹ Amuyeeye shakacitikila Mwaami Saulo. Kaatana kuba Mwaami, Saulo wakalinga musankwa wacanike ulibombya. Wakalinga kucishi kabotu nsheenga wacikonsha kucita ansheenga taacikoonshi, alimwi wakakaka kusumina mikuli imwi inene. (1 Samwe. 9:21; 10:20-22) Ano mukuya kwaciindi, Saulo wakatalika kulinyumfwa akucita shintu nshaatakwe kupekwa nkusu. Wakatalika kucita boobo pesule lyakuba mwaami.  Paciindi cimwi wakaalilwa kukalika moyo ndyaakalinga kulindila mushinshimi Samwelo. Muciindi cakulibombya akucinka manungo muli Yehova kwaamba ayi atoopulusha bantu bakwe, Saulo wakabenga mulambu wakutenta nabi kwaamba ayi taakwe kupekwa nkusu shakucita boobo. Aboobo Yehova wakamukaka alimwi mukuya kwaciindi wakamukusha pa bwaami. (1 Samwe. 13:8-14) Inga cabota kwiiyako ku cakubonenaako ici, akuleya kucita shintu nshetutana kupekwa nkusu.

12. Ino Danyelo wakatondesha buyani kulibombya?

¹² Mubupusano acakubonenaako cakwe Saulo catakalinga kabotu, atubandike cakubonenaako cibotu ca mushinshimi Danyelo. Mubuumi bwakwe boonse, Danyelo wakatolelela kuliceesha akulibombya alimwi lyoonse wakalinga kusenga kuli Lesa kwaamba ayi amupe butanjilishi. Kucakubonenaako, Yehova ndyaakamucafwa kusansulula shiloto shakwe Nebukadinesa, Danyelo taakwe kucita cili coonse cakalinga kweelete kupa kwaamba ayi bantu balumbaishe nguwe. Sombi wakalibombya akupa bulemu akulumbaisha koonse kuli Yehova. (Danye. 2:26-28) Ino tutokwiiyawo nshi? Na bamakwesu balanyumfwa kabotu kukutika mbotwaamba makani nabi na twaswitilila muncito yakushimikila, tulyeelete kwiibaluka kupa kulumbaisha koonse kuli Yehova. Tulyeelete kwiibaluka kwaamba ayi Yehova ngootucafwa kucita kabotu. (Fili. 4:13) Kucita boobo kulatondesha ayi tutokonkela cakubonenaako cibotu cakwe Yesu. Munshila nshi?

13. Ino nshiinshi nshetutokwiiya pali Yesu kweelana a Joni 5:19, 30?

¹³ Yesu wakalinga kucinka manungo muli Yehova nabi kwaamba ayi wakalinga Mwanaakwe Lesa umaninite. (Amubelenge Joni 5:19, 30.) Taakwe kweeleshawo nabi paniini kwaamba ayi anyaye Baishi nkusu. Bene Filipi 2:6 ilaamba ayi Yesu “taakwe kuyeeyawo kubwesa bweendeleshi, nkokwaamba ayi kulyeelanya a Lesa.” Mbuli Mwaana unyumfwila, Yesu wakalinga kucishi nkusu shakwe mposheela alimwi wakatondesha bulemu Baishi ankusu nshebacite.

14. Ino Yesu wakakumbula buyani ndyebakamusenga kucita cintu ncaatakwe kupekwa nkusu shakucita?

¹⁴ Amuyeeye Yesu mbwakakumbula bashikwiiya bakwe bobilo Jemusi a Joni pomwi abanyinawabo, ndyebakamusenga ayi abacitile cintu ncaatakwe kupekwa nkusu shakucita. Kwakubula kwiinda mweela, Yesu peenkapo wakabalwiita ayi Baishi mbobacite nkusu sha kusala weelete kukala kululyo na kucipiko kwa cuuna cakwe ca Bwaami. (Mate. 20:20-23) Yesu  wakatondesha ayi taakalinga kusuni kucita shintu nshaatakwe kupekwa nkusu. Wakalibombya. Taakwe kucitawo cintu nabi comwi Yehova ncaatakwe kumulwiita ayi acite. (Joni 12:49) Ino cakubonenaako cakwe Yesu inga twacikonkela buyani?

15-16. Ino kululika nkotucana pa 1 Bene Kolinto 4:6 inga twakukonkela buyani?

¹⁵ Tulakonkela cakubonenaako cakwe Yesu cakulibombya kwiinda mukukonkela kululika nkotucana palilembo lya 1 Bene Kolinto 4:6, mpotucana maswi akwaamba ayi: “Muteendilili shintu shilembetwe.” Aboobo na bamwi batusenga ayi tubapandeko maano, tatweelete kubakakatisha kukonkela nshetutooyeeya na kutalika kubalwiita shakucita kwakubula kutaanguna kuyeeyawo. Sombi tulyeelete kubatondesha makani ngotucana mu Baibo alimwi amumabuku esu, ayo aamba pamakani ngobasuni ayi tubacaafwe. Kucita boobo kulaakutondesha kwaamba ayi ncakwiila tatucishi shoonse. Alimwi uku nkokulibombya, kutondesha kwaamba ayi tulishi ayi kululika kwakwe Yehova lyoonse kuli kabotu kwiinda maano esu.​—Ciyu. 15:3, 4.

¹⁶ Kwiilika pa kulemeka Yehova, kuli sheebo shimwi sheelete kutupa kuba bantu balibombya. Amuleke tubandike kuliceesha akulibombya mbweenga shapa kwaamba ayi tube alusangalalo akutupa kunyumfwana abamwi.

17. Ino nciinshi cipa kwaamba ayi bantu baliceesha akulibombya babe basangalete?

¹⁷ Kuliceesha akulibombya kulatupa kuba bantu basangalete. Ino nceebonshi? Nceebo cakwaamba ayi na twasumina cancine cakwaamba ayi teshi shintu shoonse nsheenga twacikonsha kucita, tulaba bantu balumba palucafwo luli loonse bamwi ndweenga batupa. Kucakubonenaako, amuyeeye shakacitika Yesu ndyakoolesha beshimanata bali likumi. Womwibo pa basankwa balya ngowakaboolela akuya mukulumba Yesu ceebo ca kumoolesha kubulwashi bubiibi  abuumbi bulya​—muntu mbwatakalinga kucikonsha kulyoolesha mwiine. Aboobo musankwa ulya wakaliceesha akulibombya alimwi akulumba palucafwo ndwaakatambula, lyalo akulumbaisha Lesa.​—Luka 17:11-19.

18. Ino kuliceesha akulibombya kulatucafwa buyani kunyumfwana abamwi? (Bene Loma 12:10)

¹⁸ Bantu baliceesha alimwi balibombya, balanyumfwana kabotu abamwi aboobo cilaba cuubu kuba abeshicibusa. Ino nceebonshi? Balakondwa akusumina cancine cakwaamba ayi kuli abamwi bacite mibo ibotu alimwi balabashoma. Bantu baliceesha akulibombya balakondwa na bamwi baswitilila muncito ili yoonse njeenga bapekwa aboobo balafwambaana kubalumba akubapa bulemu.​—Amubelenge Bene Loma 12:10.

19. Ino nceebonshi tulyeelete kuleya kulinyumfwa na kulisumpula?

¹⁹ Mubupusano, bantu balinyumfwa balaalilwa kulumba bamwi, balisuni kwaamba ayi bantu banoolumbabo balo beenka. Liinji balalyeelanya kubamwi alimwi balisuni kwiinda bamwi. Muciindi cakwiishako bamwi incito akubapako nkusu shakucitako shimwi, balaamba ayi, “Na ulisuni kwaamba ayi incito yeende kabotu taweelete kupa muntu umwi, ulyeelete kwisebensa omwiine.” Balabona anga bamwi inga tabasebensi kweelana anciito mboyeelete kusebenswa. Muntu ulinyumfwa ulisuni kulemekwa kwiinda bamwi alimwi alanyumfwa munyono na bamwi basebensa kabotu kumwiinda. (Gala. 5:26) Bantu bamushobo uyo liinji balaalilwa kuba abeshicibusa. Na twabona kwaamba ayi tulicite lipenshi lya kulisumpula, tulyeelete kupaila cankusu kuli Yehova kwaamba ayi atucaafwe ‘kwaalula miyeeyo yesu’ kwaamba ayi mubo ubiibi uyu utameeni miyaanda mumoyo wesu.​—Loma. 12:2.

20. Ino nceebonshi tulyeelete kuba bantu baliceesha akulibombya?

²⁰ Tulalumba abuumbi kwaamba ayi Yehova wakatutondesha cakubonenaako cibotu! Shintu nshaacitila basebenshi bakwe shilatondesha ayi alaliceesha alimwi tulisuni kukonkela cakubonenaako cakwe. Kwiilikaawo, tulisuni kukonkela shakubonenaako shibotu sha basebenshi bakwe Lesa bakalinga kuliceesha abo baambwa mu Baibo bakalinga kucite coolwe ca kweenda a Lesa. Aboobo atube bashinishite lyoonse kulemeka akulumbaisha Yehova mukwiinga ngoweelela. (Ciyu. 4:11) Lyalo aswebo tulaakweelela kuba beshicibusa bakwe Yehova kwa muyayaya, mukwiinga alisuni bantu baliceesha akulibombya.