1. Ino nceebonshi Yehova wakalenga shintu?

KWAKALINGA ciindi Yehova ndyaakalingabo eenka. Sombi taakalinga kuumuninwa. Yehova tayandiki kuba aumwi kwaamba ayi abe alusangalalo. Nacibi boobo, wakalinga kusuni kwaamba ayi bamwi abalo basangalale abuumi. Lusuno lwakapa kwaamba ayi Yehova atalike kulenga shintu.​—Kulu. 36:9; 1 Joni 4:19.

2. Ino Yesu abaanjelo bakalinyumfwa buyani Yehova ndyaakalenga shintu shimwi?

² Yehova wakataanguna kulenga Yesu Mwanaakwe. Lyalo kwiinda mu Mwanaakwe mutaanshi, “wakalenga shoonse” kwiilikaawo amamiliyoni abaanjelo. (Kolo. 1:16) Yesu wakakondwa abuumbi kusebensela pomwi abaIshi. (Tus. 8:30) Baanjelo abalo bakakondwa abuumbi. Mbobakalingaako Yehova a Yesu Musebenshi Ucishi Kabotu Ncito ndyebakalinga kulenga liculu acishi capanshi. Ino bakatondesha buyani ayi bakakondwa? ‘Bakoolobesha cakusangalala’ cishi capanshi ndyecakalengwa, alimwi bakatolelela kucita boobo Yehova ndyaakatolelela kulenga shintu shipusenepusene, kwiilikaawo andyaakalenga muntu mbuli cilengwa cakweelaako ciinditeewo. (Jobo 38:7; Tus. 8:31) Shilengwa shoonse shilatondesha lusuno abusongo bwakwe Yehova.​—Kulu. 104:24; Loma. 1:20.

3. Kweelana a 1 Bene Kolinto 15:21, 22, ino ncoolwe nshi cakesa ceebo ca cilubula cakwe Yesu?

³ Yehova wakalinga kusuni kwaamba ayi bantu banookala buumi butamaani pacishi capanshi cibotu ncaakalenga. Ano Adamu a  Efa ndyebakapondokela Ishiwabo shilusuno, pacishi capanshi pakaba bubi alufu. (Loma. 5:12) Ino Yehova wakacita buyani? Peenkapo wakaamba nsheshi akacite kwaamba ayi alubule bantu. (Mata. 3:15) Yehova wakalinga kusa mukupa cilubula kwiinda mu Mwanaakwe kwaamba ayi alubule bana bakwe Adamu a Efa kuswa kububi alufu. Ici cakalinga kusa mukupa coolwe cakuba abuumi butamaani kumuntu uli woonse wakalinga kusa mukusala kusebensela Lesa.​—Joni 3:16; Loma. 6:23; amubelenge 1 Bene Kolinto 15:21, 22.

4. Ino njimiipusho nshi njeshi tubandike mumutwi uyu?

⁴ Kuli miipusho iinji njeenga tweepusha pamakani a Lesa mbweshi akabushe bantu. Kucakubonenaako, ino citooboneka ayi bantu balaakubushikwa buyani? Sa beshikamukowa na beshicibusa besu bakafwa tulaakucikonsha kubashiba baakubushikwa? Ino bubuke bulaakutupa lusangalalo munshila nshi? Alimwi ino kukutumana akuyeeya pabubuke inga kwatucafwa buyani kulumba Yehova palusuno, busongo alimwi akukalika moyo kwakwe? Amuleke tubandike mwiipusho womwi awomwi.

5. Ino nceebonshi nceenga twalangila ayi bafu boonse teshi bakabushikwe paciindi comwi?

⁵ Tatutoolangila ayi bantu boonse Yehova mbweshi akabushe kwiinda muli Yesu balaakubuka paciindi comwi. Ino nciinshi ncetwaambila boobo? Twaamba boobo mukwiinga na bantu boonse bakabushikwe paciindi comwi, nkokwaamba ayi kulaakuba kupilingana pacishi capanshi. Alimwi bweenka mbotushi kale, Yehova ngu Lesa ucita shintu munshila ibambitwe kabotu. Alicishi kwaamba ayi shintu shilyeelete kubambwa kabotu kwaamba ayi bantu bekale muluumuno. (1 Koli. 14:33) Yehova Lesa mubusongo akukalika moyo, wakasebensa pomwi a Yesu kutaanguna kubamba cishi capanshi kaatana kulenga bantu. Yesu alakwe alaakutondesha busongo  akukalika moyo, mubuleelo bwakwe bwa myaaka 1000, ndyeshi akanoobamba cishi capanshi pomwi abaabo beshibakapuluke Amagedoni, bafu kabatana kubushikwa.

6. Kweelana a Milimo 24:15, ino mbaani bamwi Yehova mbweshi akabushe?

⁶ Nshila iyandika abuumbi beshibakapuluke Amagedoni mbweshi bakacafwe beshibakabushikwe, nkwiinda mukubaiisha sha Bwaami amilawo yakwe Yehova. Ino nceebonshi? Nceebo cakwaamba ayi buunji bwa baabo beshibakabushikwe mbantu “bataluleme.” (Amubelenge Milimo 24:15.) Balaakuyandika kwaalula shiinji mubuumi bwabo kwaamba ayi bakafubileemo mucilubula cakwe Klistu. Amuyeeyebo kukomena kwa ncito yakwiisha bantu baanji batacishiiwo cili coonse pali Yehova. Sa kulaakuba kwiisha muntu womwi awomwi bweenka mbuli mbotucita shiiyo sha Baibo pacecino ciindi? Sa bapya aba balaakubikwa mumabungano akwiishikwa mbweenga baiisha bamwi beshibakabushikwe mwisule lyabo? Tatucishiwo, tulyeelete kulindila. Nacibi boobo, ncotushi ncakwaamba ayi na Buleelo Bwakwe Klistu bwa Myaaka 1000 bukamaane, “cishi coonse cilaakusula alushibo lwakwe Yehova.” (Isa. 11:9) Ncakutatoonsha kwaamba ayi mumyaaka 1000 tulaakuba ashiinji shakucita shisangalasha!

7. Ino nciinshi ceshi cikape kwaamba ayi bantu bakwe Yehova bakanooyeeyelako beshibakabushikwe ndyeshibakanobaiisha?

⁷ Mu Myaaka 1000 ya Buleelo Bwakwe Klistu, bantu bakwe Lesa boonse balaakuyandika kwaalula buumi bwabo kwaamba ayi basangalashe Yehova. Aboobo balaakunooyeeyelaako baabo beshibakabushikwe ndyeshibakanoobacafwa kwaalula buumi bwabo akukonkela njiisho shakwe Yehova. (1 Pita 3:8) Ncakutatoonsha kwaamba ayi abo beshibakabushikwe balaakubona kwaamba ayi ncakwiila bantu bakwe Yehova mbantu baliceesha alimwi abalo bacaalula buumi bwabo kwaamba ayi basangalashe Yehova. Alimwi balisuni kwaamba ayi banoopaila Yehova pomwi ambabo.​—Fili. 2:12.

8. Ino nciinshi nceenga twaambila ayi abo beshibakanootambula beshibakabushikwe, balaakucikonsha kushiba beshikamukowa abeshicibusa babo?

⁸ Kuli shiinji nsheenga twaambila ayi abo beshibakanootambula baabo beshibakabushikwe balaakucikonsha kushiba beshikamukowa abeshicibusa babo. Kucakubonenaako, na twayeeya Yehova mbwaakalinga kubusha bantu kale kale, inga twalangila ayi abo beshibakabushikwe balaakunooboneka, kwaamba, akuyeeya bweenka mbobakalinga kabatana kufwa. Mutaluubi kwaamba ayi Yesu wakakoshanisha lufu kukoona tulo alimwi bubuke mbuli kubuka kuswa mutulo. (Mate. 9:18, 24; Joni 11:11-13) Na muntu wabuka kuswa mutulo, alaboneka, kwaamba, akwiibaluka shintu bweenka mbwalinga kucita kaatana koona. Amuyeeye cakubonenaako cakwe Lasalo. Wakamana nshiku shone kaafwite, aboobo mubili wakwe wakatalika kubola. Nacibi boobo, Yesu ndyaakamubusha, benankashi shakwe bakamushiba, alimwi ncakutatoonsha kwaamba ayi Lasalo alakwe wakabebaluka.​—Joni 11:38-44; 12:1, 2.

9. Ino nceebonshi abo beshibakabushikwe teshi bakabushikwe amibili imaninite?

⁹ Yehova wakashomesha ayi mubuleelo bwakwe Klistu taakuwo muntu eshi akaambe ayi: “Ndaciswa.” (Isa. 33:24; Loma. 6:7) Aboobo abo beshibakabushikwe balaakuba amibili icite buumi bubotu. Nacibi boobo, cilaakutola ciindi kwaamba ayi babe bamaninite. Mukwiinga na babushikwa amibili imaninite beshikamukowa babo inga babaluba. Citooboneka kwaamba ayi mu Buleelo Bwakwe Klistu bwa Myaaka 1000, bantu boonse balaakunooya ciba bamaninite paniini paniini. Pesule lya myaaka 1000, Yesu alaakuboosha Bwaami kuli Baishi. Paciindi ici Bwaami bulaakukumanisha shoonse Yehova nshaasuni  ayi bukacite, kwiilikaawo akupa kwaamba ayi bantu bakabe bamaninite.​—1 Koli. 15:24-28; Ciyu. 20:1-3.

10. Ino bubuke bulaakumupa kulinyumfwa buyani?

¹⁰ Amuyeeyebo mbweshi cikabe kutambula beshikamukowa na beshicibusa banu baakubushikwa. Sa mulaakukondwa abuumbi akusangalala na kulosha minsonshi? Sa mulaakukondwa abuumbi cakwaamba ayi mulaakutalika kwiimba nyimbo sha kulumbaisha Yehova? Inga twashoma cakutatoonsha kwaamba ayi cilaakutupa kumusuna abuumbi Ishiwesu utulama alimwi a Mwanaakwe shilusuno, alakwe wakapa kwaamba ayi bubuke bukonsheke.

11. Kweelana amaswi akaamba Yesu ngotucana pa Joni 5:28, 29, ino nshoolwe nshi nsheshi bakacane abo beshibakaalule buumi akukonkela njiisho shakwe Lesa shiluleme?

¹¹ Amuyeeyebo abo beshibakabushikwe mbweshi bakasangalale pesule lya kwaalula buumi bwabo akutalika kukonkela njiisho shakwe Lesa shiluleme. Abo beshibakaalule buumi bwabo balaakuba acoolwe cakuba abuumi butamaani mu Paladaiso. Ano Lesa teshi akasuminishe bantu beshibakakake kwaalula buumi bwabo kutolelela kuba abuumi mu Paladaiso akupilinganya luumuno.​—Isa. 65:20; amubelenge Joni 5:28, 29.

12. Ino nshoolwe nshi Yehova nsheshi akape baabo beshibakabe pacishi capanshi?

¹² Bwaami bwakwe Lesa ndyeshibukanoolela, bantu bakwe Lesa boonse balaakushoma ayi maswi ngotucana palilembo lya Tushimpi 10:22 ngancine ayo aamba ayi: “Shoolwe shiswa kuli Yehova nsheshipa muntu kubila, alimwi taanungiiwo akucisa.” Mushimu wakwe Yehova ulaakucafwa bantu bakwe kuba anga ngu Klistu akunooya ciba bamaninite paniini paniini. (Joni 13:15-17; Efe. 4:23, 24) Buumi bwabo bulaakunooya cibota bushiku abushiku akuba bantu bali kabotu. Cakutatoonsha, buumi bulaakubota abuumbi! (Jobo 33:25) Ano ino kukutumana akuyeeya pabubuke inga kwatucafwa buyani pacecino ciindi?

13. Ino Kulumbaisha 139:1-4 ilatondesha buyani ayi Yehova alitushi kabotu, alimwi ino bubuke bulaakutondesha buyani ayi makani aya ngancine?

¹³ Bweenka mbotwabandikawo kale, Yehova alaakubusha bantu munshila yakwaamba ayi balaakuba bweenka mbobakalinga kabatana kufwa. Ano amuyeeyebo ici ncocaamba. Yehova alimusuni abuumbi cakwaamba ayi alabona nshomuyeeya, mbomulinyumfwa, nshomwaamba, alimwi anshemucita. Aboobo na nkumubusha, inga wamubusha bweenka mbuli mbomwakalinga kamutana kufwa. Mwaami Defedi wakalinga kucishi ayi Yehova alitushi kabotu soonse. (Amubelenge Kulumbaisha 139:1-4.) Ino kushiba Yehova mbwaatushi kabotu kulatupa kulinyumfwa buyani?

14. Ino tulyeelete kulinyumfwa buyani na twayeeya Yehova mbwaatushi kabotu?

¹⁴ Kukutumana kuyeeya Yehova mbwaatushi kabotu, kulyeelete kutupa kutalisukama. Ino nceebonshi? Mutaluubi kwaamba ayi Yehova alatubikila maano abuumbi. Alabona ayi womwi awomwi wa ndiswe alicite mibo ilibetele. Alabikila maano kushintu shoonse shitupa kuba mbotubete. Ici cilayuminisha abuumbi! Aboobo tatweelete kulinyumfwa anga tulibo sweenka. Yehova alaba andiswe lyoonse alimwi alisuni kutucafwa.​—2 Maka. 16:9.

15. Ino bubuke bulatondesha buyani ayi Yehova ngu Lesa ucite busongo bwiinditeewo?

¹⁵ Na bantu balicite boowa bwa kufwa, balwani babo inga babakakatisha kucita nshebataciti ceebo cakuloonda kucaikwa. Bantu batanjililwa a Satana balakakatisha bantu kucita shibiibi kubeshicibusa babo na kukaka nshobashoma kwiinda mukubaloondesha ayi  batoobacaya. Nacibi boobo, kuloondeshekwa uku inga takusebensiiwo kuli ndiswe. Mukwiinga tulicishi kwaamba ayi nabi balwani besu batucaya, Yehova alaakutubusha. (Ciyu. 2:10) Tulishomete cakutatoonsha kwaamba ayi taakuwo nceenga bacita ceenga catupa kucileka kusebensela Yehova. (Loma. 8:35-39) Yehova watondesha patuba kwaamba ayi ncakwiila ngu Lesa ucite busongo bwiinditeewo, kwiinda mukutupa bulindilishi bwa bubuke! Aboobo tatuloondiwo na bantu bakwe Satana batuloondesha ayi batotucaya na tukake kucita nshobatulwiita. Alimwi cilatucafwa kutolelela kushomeka kuli Yehova.

16. Ino njimiipusho nshi njomweelete kuliipusha, alimwi ino shikumbulo kumiipusho iyo inga shamucafwa buyani kushiba na mulacinka manungo muli Yehova?

¹⁶ Na balwani bakwe Yehova bamuloondesha ayi batoomucaya, sa mulaakushoma ayi Yehova alaakumubusha? Ino inga mwashiba buyani na mulaakucinka manungo muli Yehova paciindi ico? Nshila yomwi mbweenga mwashiiba, nkwiinda mukuliipusha ayi, ‘Sa nshonsala mutuntu tuniini bushiku abushiku shilatondesha ayi ndashoma muli Yehova?’ (Luka 16:10) Mwiipusho umwi ngweenga twaliipusha ngwakwaamba ayi, ‘Sa mbonsebensesha ciindi amaali shilatondesha ayi ndashoma mucishomesho cakwe Yehova cakwaamba ayi alaakumpa shiyandika lwakumubili na ndabika sha Bwaami panembo?’ (Mate. 6:31-33) Na mwakumbula ayi ee kumiipusho iyi, nkokwaamba ayi mulatondesha ayi mulacinka manungo muli Yehova, alimwi mulakucikonsha kukoma bweelesho buli boonse mbweshi mukacane kunembo.​—Tus. 3:5, 6.

17. (a) Ino bubuke bulatondesha buyani ayi Yehova alakalika moyo? (b) Ino inga twatondesha buyani ayi tulalumba pakukalika moyo kwakwe Yehova?

¹⁷ Yehova wakasala kale bushiku aciindi ndyeshi akanyonyoole cishi cino cibiibi. (Mate. 24:36) Teshi akaalilwe kukalika moyo akunyonyoola cishi cibiibi cino ciindi ncakabika kacitana kushika. Alakalika moyo nabi kwaamba ayi alisuni abuumbi kubusha baabo bakafwa. (Jobo 14:14, 15) Atoolindila kushikila ciindi ceelete cikashiike kwaamba ayi akababushe. (Joni 5:28) Aboobo tulyeelete kulumba Yehova ceebo cakukalika moyo kwakwe. Amuyeeye paceeci: Mukwiinga Yehova ulakalika moyo, bantu baanji, kwiilikaawo andiswe, ‘bakasanduka kuswa kushibiibi.’ (2 Pita 3:9) Yehova alisuni kupa bantu baanji coolwe cakuba abuumi butamaani. Aboobo atutondeshe kwaamba ayi tulalumba pakukalika moyo kwakwe. Ino inga twatondesha buyani? Inga twatondesha kulumba kwiinda mukusebensa cankusu kulangoola baabo “bacite myoyo ilibambite kutambula buumi  butamaani” alimwi akubacafwa kwiiya kusuna Yehova akumusebensela. (Milimo 13:48) Kucita sheeshi kulaakupa kwaamba ayi abalo bakafubileemo mukukalika moyo kwakwe Yehova, bweenka mbotwafubilaamo.

18. Ino nceebonshi tulyeelete kukalikila moyo bamwi?

¹⁸ Yehova alaakulindila cakukalika moyo kushikila kumamanino amyaaka 1000 kwaamba ayi tukabe bamaninite. Kushikila ciindi ico, Yehova alilibambite kutulekelela shibiibi shesu. Aboobo aswebo tulyeelete kubikila maano kumibo ibotu icite bamwi akubakalikila moyo. Amuyeeye cakubonenaako cakwe nankashi umwi wakalinga kucite beebaye bakatalika kuciswa bulwashi bwa kulisukama abuumbi, alimwi mukuya kwaciindi bakacileka kucanika kumabungano. Wakaamba ayi: “Ici cakancisa kumoyo abuumbi, buumi bwesu bwakaaluka paciindi ciniinibo alimwi twakaalilwa kucita shintu shoonse nshetwakalinga kusuni kucita.” Nacibi boobo, nankashi ucite lusuno uyu wakatolelela kubakalikila moyo beebaye. Wakacinka manungo muli Yehova akutolelela kulangila. Alimwi bweenka mbuli Yehova, wakabikila maano kushintu shibotu shakalinga kucita beebaye. Wakaamba ayi: “Beebangu balicite mibo ibotu, alimwi batoocita nsheenga bacikonsha kwaamba ayi babe kabotu.” Aboobo kukalika moyo mumukwashi na mulibungano kulayandika abuumbi, bunene bunene kubaabo batolwana mapensho!

19. Ino nshiinshi nshotweelete kuba bashinishite kucita?

¹⁹ Yesu abaanjelo bakakondwa cishi capanshi ndyecakalengwa. Ano amuyeeyebo mbweshi bakakondwe ciindi cishi capanshi ndyeshi cikasulebo abantu bamaninite, basuni kusebensela Yehova. Amuyeeyebo abo beshibakaye mukweendelesha pomwi a Yesu Klistu kwiculu mbweshi bakakondwe kubona bantu mbweshi bakanoofubilaamo muncito yabo. (Ciyu. 4:4, 9-11; 5:9, 10) Alimwi amuyeeyebo buumi mbweshi bukabe na minsonshi ya buumba ikaaluke akuba minsonshi ya lusangalalo, ciindi malwashi, kulila, alimwi alufu ndyeshi shikamane kwa muyayaya. (Ciyu. 21:4) Kushikila ciindi ico, amube bashinishite kukonkela lusuno, busongo, alimwi akukalika moyo kwakwe Ishiwesu shilusuno. Na mukacite boobo mulaakutolelela kuba alusangalalo, nabi mucane mapensho ali buyani. (Jemu. 1:2-4) Tulalumba abuumbi ceebo ca cishomesho cakwe Yehova cakwaamba ayi “kulaakuba bubuke”!​—Milimo 24:15.