1. Ino ncoolwe nshi ncetucite?

NCOOLWE cinene abuumbi kuba lubasu lwa libungano lyakwe Yehova! Tuli mu paladaiso yakumushimu, muswite luumuno abantu basangalete. Ino mulicite ncito nshi mulibungano?

2. Ino ncikoshanyo nshi mutumwi Paulo ncaakaamba mumakalata akwe apusenepusene ngotucana mu Baibo?

² Inga tweeya shiinji pamakani aya kuswa kucikoshanyo mutumwi Paulo ncakaamba mumakalata aanji ngakalemba kwiinda mukutanjililwa amushimu. Munkalata yomwi ayomwi njaakalemba, Paulo wakakoshanisha libungano kumubili wa muntu. Alimwi wakakoshanisha muntu womwi awomwi mulibungano ku shipansha sha mubili.​—Loma. 12:4-8; 1 Koli. 12:12-27; Efe. 4:16.

3. Ino nshiiyo nshi shotatwe nsheshi twiiye mumutwi uyu?

³ Mumutwi uyu, tutobandika shiiyo shiyandika shotatwe nsheenga tweeya kuswa kucikoshanyo Paulo ncaakaamba. Cakutaanguna, tutokwiiya kwaamba ayi muntu uli woonse alicite lubasu * mulibungano lyakwe Yehova. Cabili, tutokwiiya nsheenga twaciita kwaamba ayi tushibe lubasu ndotucite mulibungano. Alimwi catatu, tutokwiiya ncotweelete kusebensela cankusu kwaamba ayi tukumanishe lubasu lwesu mulibungano lyakwe Lesa.

4. Ino lilembo lya Bene Loma 12:4, 5 lilatwiisha nshi?

⁴ Cakutaanguna nceenga tweeya kuswa kucikoshanyo Paulo ncakaamba ncakwaamba ayi soonse tulicite lubasu luyandika mumukwashi wakwe Yehova. Paulo, wakataanguna kwaamba ayi: “Mubili woonse ulicite shipansha shiinji alimwi shoonse ishi shilicite milimo ipusenepusene, mbweeke ubo, nakubi kwaamba ayi tuli baanji, tuli mubili womwi muli Klistu, aboobo twakacatanishikwa pantu pomwi bweenka mbuli shipansha sha mubili womwi.” (Loma. 12:4, 5) Ino Paulo wakalinga kusansulula nshi? Wakalinga kusansulula ayi nabi kwaamba ayi muntu uli woonse mulibungano alicite lubasu lupusene aumwi, soonse tulayandika.

5. Ino ‘nshipo’ nshi Yehova nshaakatupa mulibungano?

⁵ Na mwayeeya pamakani abacite lubasu mulibungano, mpashi mulayeeyabo pabamanene. (1 Tesa. 5:12; Ebu. 13:17) Ncakwiila kwaamba ayi mulibungano tulicite “shipo mubantu” Yehova nshaakatupa kwiinda muli Klistu. (Efe. 4:8) “Shipo mubantu” ishi shileelikaawo Bamulikoto Litanjilila, beshikucafwilisha Bamulikoto Litanjilila, bamakwesu bali Mukomiti Yamusampi, bamatanjilili balubasu, beshikwiisha mushikolo sha Bwaami, bamanene mulibungano, alimwi abasebenshi bacafwilisha. Bamakwesu boonse aba bakasalwa amushimu usalashi kwaamba ayi balame mbelele shiyandika abuumbi shakwe Yehova akuyumya libungano.​—1 Pita 5:2, 3.

6. Kweelana a 1 Bene Tesalonika 2:6-8, ino bamakwesu bakasalwa amushimu usalashi baleelesha kucita buyani?

⁶ Bamakwesu bakasalwa amushimu usalashi kwaamba ayi banosebensa mikuli ipusenepusene. Bweenka mbuli shipansha sha mubili shipusenepusene, mbuli maansa alimwi amyeendo mboshicafwa mubili, bamakwesu bakasalwa amushimu usalashi balasebensa cankusu kwaamba ayi bacafwe libungano. Tabasebensi kwaamba ayi bamwi babalumbaishe. Baleelesha cankusu kwaamba ayi bayuminishe bamakwesu abenankashi mulibungano. (Amubelenge 1 Bene Tesalonika 2:6-8.) Tulalumba Yehova kwaamba ayi wakatupa bamakwesu beelela babikila maano kushintu shiyandika bamwi, kuteshibo kusheesho nshebayandika beene!

7. Ino nshoolwe nshi nshobacana abo basebensa muncito yaciindi coonse?

⁷ Bamwi mulibungano balapekwa coolwe cakusebensa mbuli ba mishonali, bapainiya balibetele, na bapainiya baciindi coonse. Alimwi bamakwesu abenankashi baanji nsengwe yoonse, bakasalawo kushimikila akucafwa bantu kuba bashikwiiya kuba ncito yabo yaciindi coonse. Kucita boobo kwapa kwaamba ayi bacikoonshe kucafwa bantu baanji kuba bashikwiiya bakwe Klistu Yesu. Nabi kwaamba ayi bamakwesu bali muncito yaciindi coonse tabacite shiinji lwakumubili, Yehova alabapa shoolwe shiinji. (Maako 10:29, 30) Tulibasuni abuumbi bamakwesu abenankashi aba, alimwi tulikondetwe abuumbi kwaamba ayi tuli abo mulibungano!

8. Ino nceebonshi shikushimikila uli woonse ulayandika kuli Yehova?

⁸ Sa bamakwesu bakasalwa alimwi abaabo basebensa muncito yaciindi coonse mbobeenkabo bacite lubasu mulibungano? Sobwe napaceyi! Shikushimikila uli woonse ulayandika kuli Lesa alimwi amulibungano. (Loma. 10:15; 1 Koli. 3:6-9) Cili boobo mukwiinga incito iyandika abuumbi icite libungano, nkucafwa bantu kuba bashikwiiya bakwe Yesu Klistu. (Mate. 28:19, 20; 1 Timo. 2:4) Abo boonse bacite coolwe cakusebensa pomwi alibungano mbuli beshikushimikila batana kubombekwa alimwi abaabo bakabombekwa, baleelesha cankusu kubika panembo incito iyi mubuumi bwabo.​—Mate. 24:14.

9. Ino nceebonshi benankashi balayandika mulibungano?

⁹ Yehova alatondesha ayi benankashi balayandika mulibungano kwiinda mukubapa  ncito iyandika. Alibasuni abuumbi benankashi beebetwe, bashali banakashi, bamukalubinje, alimwi abateebetwe abo bamusebensela cakushomeka. Baibo ilaamba pa banakashi baanji bakalinga kusebensela Lesa cakushomeka. Banakashi aba bakatondesha ayi bakalinga basongo, bacite lushomo, basebensa cankusu, bataloondi, bacite bwaabi, alimwi bakacita anciito shimwi shibotu. (Luka 8:2, 3; Milimo 16:14, 15; Loma. 16:3, 6; Fili. 4:3; Ebu. 11:11, 31, 35) Tulalumba Yehova abuumbi ceebo cakuba abenankashi mulibungano, abo batondesha mibo ibotu bweenka mbuli banakashi bamuciindi camu Baibo!

10. Ino nceebonshi bacinene tulababona kuyandika?

¹⁰ Tulalumba apacoolwe cakuba abacinene baanji mulibungano. Mumabungano amwi muli bamakwesu abenankashi bacinene basebensela Yehova cakushomeka buumi bwabo boonse. Bacinene bamwi mpashi bakeeya cancine coonoono. Muli moonse mweenga cabeta, bacinene baleenda mumapensho apusenepusene ceebo ca kucembela. Aboobo inga tabacikoonshi kucita shiinji mulibungano alimwi amuncito yakushimikila. Nacibi boobo, bacinene aba balacita nsheenga bacikonsha muncito yakushimikila, alimwi balasebensesha nkusu shabo shoonse kuyuminisha akwiisha bamwi! Alimwi tulafubilaamo mushintu nshobakeeya. Ncakwiila balaboneka kabotu abuumbi kuli Yehova akulindiswe.​—Tus. 16:31.

11-12. Ino nciinshi cimuyuminisha pabacanike mbomucite mulibungano?

¹¹ Amuyeeye apa bacanike mbotucite mulibungano. Baleenda mumapensho aanji ndyebatookula mucishi cino citokweendeleshekwa a Satana alimwi ciswite bantu bacite miyeeyo ibiibi abuumbi. (1 Joni 5:19) Nacibi boobo, soonse tulayuminishikwa abuumbi na twabona bacanike mbobatokwaabanamo lubasu kumabungano, muncito yakushimikila, alimwi akwiimikanina nshobashoma cakutaloonda. Ncakwiila nobacanike, mulayandika abuumbi mulibungano lyakwe Yehova!​—Kulu. 8:2.

¹² Ano kuli bamakwesu abenankashi bamwi balibona anga taakuwo mbobabete mulibungano. Ino nciinshi ceenga catucafwa soonse kulinyumfwa kwaamba ayi tulayandika mulibungano? Amuleke tubandike mwiipusho uyu.

13-14. Ino nciinshi ceenga capa bamwi kulinyumfwa anga taakuwo mbobabete mulibungano?

¹³ Amuleke tubandike cabili nceenga tweeya kuswa kucikoshanyo Paulo ncakaamba. Wakaamba palipenshi bantu baanji ndyobeendaamo munshiku shino. Baanji balabona anga taakuwo mbobabete mulibungano. Paulo wakalemba ayi: “Na cimpanta caamba ayi, ‘Mboontabete lyaansa, nshibete cipansha ca mubili,’ sa ici inga calengesha kwaamba ayi citabi cipansha ca mubili? Nabi na kutwi kwaamba ayi, ‘Mboontabete liinso nshibete cipansha ca mubili,’ sa ici inga calengesha kwaamba ayi kutabi cipansha ca mubili?” (1 Koli. 12:15, 16) Ino Paulo wakalinga kwiisha nshi?

¹⁴ Na kamulyeelanya kubamwi mulibungano, inga mwatalika kulibona anga taakuwo mbomubete. Bamwi mulibungano balicite cipo cakwiisha kabotu, kubamba kabotu shintu, na kushiba kabotu bwakucita bweembeshi. Mpashi mulalinyumfwa ayi tamushikiiwo pabete bamwi mulibungano. Ici cilatondesha ayi mulaliceesha akulibombya. (Fili. 2:3) Ano mulyeelete kucenjela. Mukwiinga na lyoonse kamulyeelanya kubaabo bacite lushibo kumwiinda, mulaakulefuka. Mpashi inga mwatalika akuyeeya ayi taakuwo mbomubete mulibungano. Ino nciinshi ceenga camucafwa kukoma kulinyumfwa boobo?

15. Kweelana a 1 Bene Kolinto 12:4-11, ino nshiinshi nshotweelete kwiibaluka pamakani ankusu na lushibo ndweenga katucite?

¹⁵ Amuyeeye pacancine ici: Yehova wakapa Beneklistu bamwi bamuciindi ca batumwi nkusu sha mushimu usalashi shakucita shaankamiko, sombi teshi Beneklistu boonse bakatambula nkusu isho. (Amubelenge 1 Bene Kolinto 12:4-11.) Yehova wakabapa shipo shipusenepusene, nacibi boobo, Beneklistu boonse bakalinga kuyandika. Munshiku shino, tatucitewo nkusu sha mushimu usalashi shakucita shaankamiko. Ncakwiila soonse inga tatubi alushibo lucite bamwi, sombi makani ngakwaamba ayi soonse tulayandika kuli Yehova.

16. Ino nkululika kuli mutumwi Paulo nkwaakaamba nkotweelete kukonkela?

¹⁶ Muciindi ca kulyeelanya kubamwi, tulyeelete kukonkela maswi akaamba mutumwi Paulo ayi: ‘Muntu woonse ulyeelete kuyeeya nshaacite  palwakwe mwiine, mpeeke ulaakucana ceebo cakumupa kukondwa palwakwe mwiine, kuteshi ceebo ca kulyeelanya amuntu umwi.’​—Gala. 6:4.

17. Ino kukonkela kululika Paulo nkwaakaamba kulaakutucafwa buyani?

¹⁷ Na twakonkela kululika Paulo nkwaakaamba akulanga nshetucita palweesu, inga catucafwa kutalika kubona kwaamba ayi tulicite lushibo lumwi bamwi ndobataciteewo. Kucakubonenaako, mpashi munene umwi taacite cabupe cakwaamba kabotu na wapekwa likani, sombi mpashi alasebensa kabotu muncito yakwiisha bantu kuba bashikwiiya. Na mpashi taacishiiwo kubamba kabotu shintu mbuli bamanene bamwi mulibungano mwaabete, sombi mpashi bamakwesu bali mushi mbuli mweembeshi utondesha lusuno, beshikushimikila ngobaangulukite kubandika akwe na balicite lipenshi. Na mpashi ulishibikitwe mbuli muntu ucite mushimu wakutambula beensu. (Ebu. 13:2, 16) Na sobeene katucishi kabotu shintu nshetucikonsha kucita kabotu, tulaakulinyumfwa kwaamba ayi aswebo tulicite lubasu mulibungano. Alimwi ici cilaakutucafwa kutanyumfwila munyono bamakwesu bacite lushibo lupusene andotucite.

18. Ino inga twacita buyani kwaamba ayi tunokwiisha kabotu?

¹⁸ Tacicite mulandu alubasu ndotucite mulibungano, soonse tulyeelete kweelesha kuya panembo muncito yesu akutola panembo lushibo ndotucite. Kwaamba ayi tucafwikwe kucita boobo, Yehova alatupa kwiisha kubotu kwiinda mulibunga lyakwe. Kucakubonenaako, kumabungano esu amukati kansondo, tulayiishikwa mbweenga twaiisha kabotu muncito yakushimikila. Sa mutokweeleshaako kukonkela nshetwiiya kumabungano?

19. Ino inga mwacita buyani kwaamba ayi mweelele kucanika ku Cikolo ca Bashimikila sha Bwaami?

¹⁹ Cikolo ca Bashimikila sha Bwaami, ni nshila yomwi ibotu abuumbi Yehova mbwatwiisha. Beelela kucanika kucikolo ici mbamakwesu abenankashi bali muncito yaciindi coonse bacite myaaka kutalika 23 kushika ku 65. Mpashi inga mwayeeya ayi inga nsheeleliiwo kucanika kucikolo ici. Muciindi cakuyeeya pasheesho sheenga shapa kwaamba ayi muteeleli, amulembe mulongo wa sheenga shamupa kusuna kucanika kucikolo ici. Lyalo amubambe nsheenga mwaciita kwaamba ayi mukacikoonshe kweelela kucanika kucikolo ici. Kwiinda mulucafwo lwakwe Yehova akusebensa cankusu kwanu, inga mwacikonsha kucita nshomwakalinga kubona anga inga tamucikoonshi.

20. Ino nshiinshi nshetutokwiiya kuswa kulilembo lya Bene Loma 12:6-8?

²⁰ Catatu nceenga tweeya kucikoshanyo Paulo ncakaamba nceeci ncetucana palilembo lya Bene Loma 12:6-8. (Amubelenge.) Palilembo ili Paulo alimwi wakalinga kwaamba cancine cakwaamba ayi muntu uli woonse mulibungano ulicite cipo cilibetele. Paciindi ici wakalinga kuyuminisha makani akwaamba ayi tulyeelete kusebensesha cipo ncetucite kuyuminisha bamwi mulibungano.

21-22. Ino nshiinshi nsheenga tweeya kuswa ku mukwesu Robert alimwi a mukwesu Felice?

²¹ Amuyeeye shakacitika kumukwesu wa liina lya Robert. Pesule lyakusebensela kucishi cimwi, bakamulwiita kuya mukusebensela pa Bethel kucishi cinemishaabo. Nabi kwaamba ayi bamakwesu bakamuyuminisha ayi taakuwo cibiibi ncaakacita, mukwesu Robert wakaamba ayi: “Nshindakalinga kusangalete kwa myeenshi iinji mukwiinga ndakalinga kulinyumfwa anga ndakaalilwa ncito njendakalinga ndapekwa. Cimwi ciindi ndakalinga kuyeeyabo ayi ncileeke kusebensela pa Bethel.” Ino nciinshi cakamucafwa  kutalika kuba alusangalalo alimwi? Munene umwi wakacafwa mukwesu Robert kwiibaluka kwaamba ayi Yehova alatupa ncito shimwi kwaamba ayi atucaafwe kushiba bwakusebensa kabotu incito njetucite pacecino ciindi. Mukwesu Robert wakesa mukubona kwaamba ayi wakalinga kweelete kucileka kuyeeya bunene pancito njaakalinga kusebensa kale kale, akutalika kubikila maano ku mbweenga wasebensa kabotu incito njaakalinga wapekwa paciindi ico.

²² Mukwesu Felice Episcopo alakwe wakalinga kucite lipenshi lyeenka mbuli lyakalinga kucite mukwesu Robert. Mukwesu anankashi Episcopo bakamanisha cikolo ca Gilyadi mu 1956 alimwi bakasebensa mbuli mutanjilili walubasu mucishi ca Bolivia. Mu 1964 bakaba amwaana. Ba Felice bakaamba ayi: “Cakalinga ciyumu kushiya ncito yesu njetwakalinga kusuni abuumbi. Ndakatola mwaaka womwi kaandinyumfwabo cibiibi. Ano kwiinda mulucafwo lwakwe Yehova, ndakaalula mbondakalinga kubona shintu akutalika kubikila maano kumukuli upya mbuli mushali.” Sa amwebo mulalinyumfwa bweenka mbuli mukwesu Robert na mukwesu Felice? Sa mulalinyumfwa cibiibi mukwiinga pacecino ciindi tamucitewo shoolwe nshomwakalinga kucite kale kale? Na amwebo mbomulinyumfwa, inga mwaba alusangalalo na mwacileka kuyeeya bunene pancito njemwakalinga kucite kale kale, akutalika kubikila maano ku nsheenga mwaciita pacecino ciindi kukusebensela Yehova akucafwa bamakwesu. Amube ashiinji shakucita kwiinda mukusebensesha shipo alimwi alushibo ndomucite kukucafwa bamwi, lyalo mulaakucana lusangalalo ndyemutoyuminisha libungano.

23. Ino nshiinshi nshotweelete kucana ciindi cakukutumana akuyeeyawo, alimwi ino nshiinshi nsheshi tukeeye mumutwi utokonkelaawo?

²³ Muntu uli woonse alayandika abuumbi kuli Yehova. Yehova alisuni kwaamba ayi tube lubasu lwa mukwashi wakwe. Na katucana ciindi cakukutumana akuyeeya nsheenga twaciita kwaamba ayi tuyuminishe bamakwesu abenankashi, lyalo akucita boobo, tulaakulinyumfwa ayi ncakwiila tulicite lubasu mulibungano! Ano ino mbuyani pamakani ambotubona bamwi mulibungano? Ino inga twatondesha buyani ayi tulibasuni alimwi tulabalemeka? Tulaakwiiya makani ayandika aya mumutwi utokonkelaawo.