Sobwe, taakuwo mu Baibo nabi mumabuku aamba shakale kale mpotucana makani atondesha ayi Beneklistu bakalinga kubombekelwako bafu.

Lilembo ili mbolyakasansululwa muma Baibo aanji cilapa bamwi kuyeeya ayi Beneklistu bamwi muciindi cakwe Paulo bakalinga kubombekelwako bafu. Kucakubonenaako, mu Baibo imwi lilembo ili bakalisansulula ayi: “Na bafu teshi bakabushikwe, ino abo bakabombekwa ceebo ca bafu balaakucita buyani?”—The Bible in Lenje.

Nacibi boobo, amunyumfwe shakaamba bantu bobilo bakeeya shamu Baibo. Ba Dr. Gregory Lockwood bakaamba ayi: “Taakuwo nabi pomwi mu Baibo na mumabuku aamba shakale kale mpotucana makani akwaamba ayi bantu bakalinga kubombekelwako baabo bakafwa.” Ishi nshobakalemba aba Pulofesa Gordon D. Fee. Bakalemba ayi: “Taakuwo makani akale kale na akalembwa mu Baibo aamba ayi kwakalingaawo kubombekwa kwa mushobo uyu. Alimwi taakuwo amakani atondesha kwaamba ayi Beneklistu bakutaanguna nabi abo bakalinga mumaceeci akapangwa pesule lyakufwa kwa batumwi, bakalinga kubombekelwako bafu.”

Baibo ilaamba ayi bashikwiiya bakwe Yesu balyeelete ‘kwiisha bantu ba mishobo yoonse kwaamba ayi babe bashikwiiya, akubabombeka . . . , kubaiisha kukonkela shintu shoonse’ nshaakatulwiita. (Mate. 28:19, 20) Muntu kaatana kuba shikwiiya wakabombekwa, wakalinga kweelete kwiiya pali Yehova, kushoma muli nguwe, akunyumfwila Yehova a Mwanaakwe. Muntu ufwite uli mucuumbwe inga taakonshi kucita sheeshi, nabibo bamwi kumucitilaako.—Shiku. 9:5, 10; Joni 4:1; 1 Koli. 1:14-16.

Ano ino Paulo wakalinga kusansulula nshi?

Bamwi ku Kolinto bakalinga kukaka ayi bafu teshi bakabukeewo. (1 Koli. 15:12) Paulo wakatondesha kwaamba ayi nshobakalinga kwaamba nshakubeca. Nabi kwaamba ayi wakalinga muumi, wakaamba ayi ‘bushiku buli boonse wakalinga kulangana alufu.’ Alimwi nabi kwaamba ayi wakalisukama ayi inga wafwa paciindi cili coonse, wakalinga kushomete ayi na akafwe alaakubushikwa akuba cilengwa camushimu, bweenka mbocakalinga kuli Yesu.—1 Koli. 15:30-32, 42-44.

Bene Kolinto bakalinga kweelete kushiba kwaamba ayi mukwiinga mBeneklistu bananikitwe, bakalinga kusa mukwiinda mumapensho bushiku abushiku, alimwi akufwa lyalo pesule akubushikwa. Aboobo nkokwaamba ayi ‘ndyebakabombekwa muli Klistu Yesu bakabombekwa amulufu lwakwe.’ (Loma. 6:3) Ici cakalinga kusansulula ayi bweenka mbocakalinga kuli Yesu, abalo bakalinga kusa mukwiinda mumapensho lyalo akufwa kwaamba ayi bakabushikwe akuya kwiculu.

Ndipakeenda myaaka iinda pa yobilo kuswa ciindi Yesu ndyaakabombekwa mumaanshi, wakalwiita batumwi bakwe bobilo ayi: “Kubombekwa nkweshi nkabombekwe, amwebo nkweshi mukabombekwe.” (Maako 10:38, 39) Yesu taakalinga kusansulula kubombekwa kwa mumaanshi. Ncakalinga kusansulula ncakwaamba ayi, kutolelela kushomeka kuli Lesa kwakalinga kusa mukupa kwaamba ayi bamucaaye. Paulo wakalemba ayi Beneklistu bananikitwe ‘balaakupenga pomwi a Klistu, kwaamba ayi bakapekwe bulemu pomwi anguwe.’ (Loma. 8:16, 17; 2 Koli. 4:17) Aboobo abalo bakalinga kweelete kufwa kwaamba ayi bakabushikwe akuya kwiculu.

Aboobo maswi Paulo ngakaamba inga asansululwa ayi: “Na teshi sheesho, ino balaakucita buyani bakalinga kubombekelwa kufwa? Na bafu teshi bakabushikwewo, ino nceebonshi ncobakalinga kubombekelwa?”