Bumboni bulatondesha kwaamba ayi Yesu wakaba Mupailishi Munene ndyaakabombekwa mu 29 C.E. Ino tulishi buyani? Yesu ndyaakabombekwa, wakatondesha kwaamba ayi wakalinga kulibambite kwaaba buumi bwakwe pacipaililo ca cikoshanyo ico cakalinga kwiimikaninaako “kuyanda kwakwe Lesa.” (Gala. 1:4; Ebu. 10:5-10) Mukwiinga cipaililo ca cikoshanyo nkocicili kuswabo ciindi Yesu ndyaakabombekwa, nkokwaamba ayi tempele inene yacikoshanyo—iyo imikaninaako bubaambo bwakwe Yehova bwakupaila kusalalite kwiimfwi pacilubula—cilyeelete kwaamba ayi ayalo nceciindi ndyeyakabaako. Cipaililo ndubasu luyandika abuumbi lwa tempele.—Mate. 3:16, 17; Ebu. 5:4-6.

Tempele inene yacikoshanyo yakalinga kuyandika mupailishi munene. Nceceeco Yehova ncaakananikila Yesu “amushimu usalashi alimwi ankusu.” (Milimo 10:37, 38; Maako 1:9-11) Ano ino inga twashinisha buyani ayi ncakwiila Yesu wakaba Mupailishi Munene kaatana kufwa alimwi akubushikwa? Cakubonenaako cakwe Aloni alimwi abapailishi bakesa mwisule lyakwe citootucafwa kucana cikumbulo kumwiipusho uyu.

Kweelana a Mulawo, mupailishi munene eenkabo ngowakalinga kusuminishikwa kunjila Mumusena Usalalite Wiindaawo mutente alimwi mukuya kwaciindi ngo eenkabo wakalinga kusuminishikwa kunjila mu Musena Usalalite Wiindaawo wamu tempele. Pakati ka musena uyu amusena Usalalite pakalinga cisani cakushitilisha. Mupailishi munene wakalinga kwiindilila cisani Pabushiku Bwakusekelela Kulekelelwa kwa Shibiibi bweenkabo. (Ebu. 9:1-3, 6, 7) Bweenka mbuli Aloni abaabo bakamupyana mbobakasalwa kuba bapailishi banene kabatana “kwiindilila cisani” ca kushitilisha cakalinga mutente, cilyeelete kwaamba ayi Yesu alakwe wakananikwa mbuli Mupailishi Munene kaatana kufwa, lyalo ndyaakeendilila pa cisani camu tente, nkokwaamba ayi ‘mubili wakwe’ akuya kwiculu. (Ebu. 10:20) Paceebo ceeci, mutumwi Paulo wakaamba pali Yesu ayi wakesa mbuli “mupailishi munene” alimwi “wakeenda mutente inene alimwi isalalite itana kupangwa kumaansa, sombi kwiculu kwiine.”—Ebu. 9:11, 24.

Taapuwo bupusano buliiwo pakati ka ciindi cipangano cipya ndyecakasuminishikwa alimwi andyecakatalika kusebensa. Ino nciinshi ncetwaambila boobo? Yesu ndyaakaya kwiculu akupa buumi bwakwe busalalite ceebo ca ndiswe, wakacita shakalinga kweelete kupa kwaamba ayi cipangano cipya cisuminishikwe. Alimwi nsheshakapa kwaamba ayi cipangano ici citalike kusebensa. Ino nshiinshi sheenka isho?

Cakutaanguna, Yesu wakaya mukubonekela kunembo lyakwe Yehova; cabili, wakapa mpindu ya buumi bwakwe kuli Yehova mbuli mulambu; alimwi mukweelaako, Yehova wakasumina mpindu ya mulambu wakwe Yesu kwiinda mubulowa bwakwe mbwaakatila. Cipangano cipya cakatalikabo kusebensa pesule lyakukumanishikwa kwa shintu shotatwe ishi.

Baibo tayaambiwo na ndilili Yehova ndyaakasumina mpindu ya mulambu wakwe Yesu. Aboobo inga tatwaambi mukululama ciindi cipangano cipya ndyecakasuminishikwa akutalika kusebensa. Nacibi boobo, ncotushi ncakwaamba ayi Yesu wakaya kwiculu ndyekwakacalabo nshiku 10 kwaamba ayi bushiku bwa Pentekositi bushike. (Milimo 1:3) Paciindi cimwi muciindi ciniini ceenka cilya, Yesu ndyaakapa mpindu ya mulambu wacilubula kuli Yehova, alimwi wakatambula. (Ebu. 9:12) Tulishomete makani aya ceebo ca shakacitika pabushiku bwa Pentekositi. (Milimo 2:1-4, 32, 33) Cilyeelete kwaamba ayi nceciindi mpashi cipangano cipya ndyecakasuminishikwa akutalika kusebensa.

Mukufwiimpya inga twaamba ayi, cipangano cipya cakasuminishikwa akutalika kusebensa, Yehova ndyaakatambula mpindu ya bulowa bwakwe Yesu bwakatilwa. Aboobo Yesu ngowakesa mukuba Shikwiimikana Pakati wa cipangano cipya alimwi Mupailishi Munene.—Ebu. 7:25; 8:1-3, 6; 9:13-15.