Ndakashalilwa kumusena wiitwa St. Paul, Minnesota, mucishi ca U.S.A, mu 1954. Bashali bangu tabakalinga babile alimwi tabakalinga bakandu, alimwi bakalinga mba Katolika. Ndime wabili kushalwa alimwi soonse pomwi mumukwashi twakashalwa 5. Ndyendakalinga mwanike ndakalinga kuya kucikolo ca Bakatolika, alimwi ndakalinga kusebensa mukuli ngobeeta ayi kampenga. Nacibi boobo, nshindakalinga kucishiwo makani aanji amu Baibo. Alimwi nabi kwaamba ayi ndakalinga kushoma ayi kulyeelete kuli Lesa wakalenga shintu shoonse, bupailishi bwa Cikatolika nshindakalinga kubushoma.

Ndyendakalinga kwiiya buloya kucikolo ca William Mitchell College of Law, Bakamboni Bakwe Yehova bakamfwakashila paŋanda. Bakacana kancapa, aboobo cabulemu bakaamba ayi balaakusako ciindi cimwi. Ndyebakesa alimwi, ndakalinga kucite miipusho yobilo njendakalinga kusuni kwaamba ayi bankumbule. Ndakabepusha ayi: “Ino nceebonshi bantu bacita shibiibi shintu shilabeendela kabotu mubuumi kwiinda baabo bacita shibotu?” alimwi “Ino muntu inga wacita buyani kwaamba ayi acane lusangalalo lwancinencine?” Ndakatambula libuku lyakalinga kwiitwa ayi The Truth That Leads to Eternal Life alimwi a Baibo ya New World Translation of the Holy Scriptures, iyo yakalinga kuboneka kabotu mumubala wa gilini. Alimwi ndakasumina  akwiiya Baibo. Lyalo meenso angu ndyaakacaluka kwaamba ayi nshibe cancine. Ndakanyumfwa kabotu abuumbi ndyendakeeya kwaamba ayi Bwaami bwakwe Lesa nje mfulumeende yeshi ikacikoonshe kweendelesha bantu pacishi capanshi. Shintu nshendakalinga kubona shakalinga kutondesha patuba kwaamba ayi mfulumeende sha bantu shaalilwa alimwi shaletabo mapensho aanji abuumbi apusenepusene.

Ndakalyaaba akubombekwa mu 1982 pakubungana kunene kwakalinga kucite mutwi wakalinga kwaamba ayi “Cancine ca Bwaami” uko kwakacitikila kumusena wiitwa ayi St. Paul Civic Center. Nsondo yakaboolawo ndakaboolela alimwi ku Minnesota civic center mukulemba meelesho acikolo ca buloya. Kumatalikilo amweenshi wa October, ndakesa mukushiba ayi ndapaasa meelesho, aboobo ndakeelela kusebensa mbuli loya.

Ndyendakalinga kukubungana kunene kulya kwakalinga kucite mutwi wakwaamba ayi “Cancine ca Bwaami,” ndakakumanya mukwesu Mike Richardson, uyo wakalinga kusebensela pa Bethel ku Brooklyn, wakandwiita ayi kumaofesi anene kuli dipatimenti ilanga pa sha milawo ano. Lyalo ndakesa mukwiibaluka maswi akaamba mweendeleshi waku Isopya ayo ngotucana pa Milimo 8:36, aboobo ndakalipusha ayi, ‘Ino nciinshi citoonkasha kusenga kuya mukusebensela ku Dipatimenti Ilanga pa sha Milawo?’ Aboobo ndakalemba foomu ya basuni kusebensela pa Bethel.

Bashali bangu tabakwe kukondwa kwaamba ayi ndakasala kuba Kamboni. Bata bakanjipusha na kusebensela pa Bethel kulaakumpa mpindu ili yoonse muncito yangu ya buloya. Ndakabasansulwiita ayi ntooya mukusebensa ncito ya kuliyandila. Ndakabalwiita ayi ndaakunoopekwa $75 pa mweenshi, maali akulicafwilisha akalinga kupekwa basebensela pa Bethel pa mweenshi.

Mukwiinga ndakalinga ndasumina kale kwaamba ayi ndaakunoosebensa kukooti, nshina kuya ku Bethel peenkapo, ndakatalika kusebensela pa Bethel ku Brooklyn, New York, mu 1984. Ndakapekwa coolwe cakusebensela ku Dipatimenti Ilanga pa sha Milawo. Alimwi ici cakalinga ciindi ceelete mukwiinga kutaanguna kusebensa mukooti kaantana kuya ku Bethel kwakancafwa kulibambila shakalinga kusa kunembo.

Musena wa Stanley Theater ucanika mutauni ya Jersey City, ku New Jersey, wakoolwa mu November 1983. Bamakwesu bakalembela ba milawo kwaamba ayi basenge kusuminishikwa kubamba cipya malaiti alimwi asha maanshi. Ndyebakaya ku kanso, bamakwesu bakaya mukusansulula luyaando lwa musena uyu, kwaamba ayi bakalinga kusuni kutalika kuusebensesha mbuli musena wakucitilamo mabungano anene a Bakamboni Bakwe Yehova. Ili lyakaba ndipenshi. Mukwiinga kweelana amilawo yamu tauni iyi, misena yakupaililaamo ilyeelete kucanikabo kulubasu kuyakwa maanda mukala bantu. Ŋanda ya Stanley Theater yakalinga mutauni mwiine, aboobo ba kanso bakakaka kusuminisha. Bamakwesu bakatola makani aya kukooti, sombi ba kooti abalo bakakaka.

 Nsondo yakutaanguna ndyendakaya ku Bethel, libunga lyakoola saimoni pamakani akukaka kusuminishikwa kubamba cipya Ŋanda ya Stanley Theater. Mukwiinga ndakasebensako myaaka yobilo ku kooti yaku St. Paul, Minnesota, ndakalinga kwaashi kabotu makani mbuli aya. Loya wesu umwi wakalwiita ba kooti ayi ŋanda ya Stanley Theater kale kale yakalinga kusebenseshekwa mbuli musena wakucitilamo shakucita sha bantu baanji shipusenepusene mbuli kweebelelamo mafilimu alimwi ashakwiimba. Ano ino inga mwaamba buyani ayi mulawo tosuminishi kucitilamo mabungano akupaila? Ba kooti bakalanga langa pamakani aya akoombolosha ayi ba kanso ya tauni ya New Jersey tabakwe kulemeka nkusu shesu sha lwaanguluko lwakupaila. Aboobo ba kooti bakapa mulawo wakwaamba ayi tusuminishikwe kubamba cipya, alimwi ici cakampa kubona Yehova mbwakacafwa libunga lyakwe kwiinda mukusebensesha bubaambo bwa sha milawo, kwaamba ayi incito yakwe iye panembo. Ndakakondwa abuumbi kwaamba ayi ndakaabanamo lubasu.

Aboobo incito inene abuumbi yakubamba cipya yakatalika, alimwi kubungana kwa bakamanisha cikolo ca Giliyadi kwa kilasi ya namba 79 kwakacitikila mu Jersey City Assembly Hall pabushiku bwa 8 September 1985, mwaaka womwi kootana kwiinda kuswa ciindi kubamba cipya ndyekwakamana. Ndakalinyumfwa kabotu abuumbi kutola panembo incito ya Bwaami kwiinda mulubasu lulanga pamakani asha milawo, alimwi kulinyumfwa kabotu uko kulipusene abuumbi ambondakalinga kulinyumfwa ndyendakalinga kusebensa kukooti kaantana kusa ku Bethel. Nshindakalinga kucishiwo ayi anu Yehova wambikila shoolwe shiinji kunembo.

Mu myaaka yamuma 1980, bamadokota baanji alimwi ashipatela tabakalinga kusumina na Kamboni munene waamba ayi taasuniiwo kubikwa bulowa. Banakashi bakalinga pakati mbobakalinga kupenga bunene mukwiinga liinji boomboloshi bama kooti bakalinga kubona anga tabacite nkusu shakukaka kubikwa bulowa. Boomboloshi aba bakalinga kwaamba ayi na mwanakashi uli pakati wakaka kubikwa bulowa, inga wafwa aboobo mwaana inga wacaala kaatacite banyina.

Pabushiku bwa 29 December 1988, Nankashi Denise Nicoleau wakaswa bulowa buunji abuumbi pesule lyakutumbuka. Mukwiinga bulowa bwakaceya cakwaamba ayi wakalinga kuboneka anga atoofwa, dokota wakaamba ayi alyeelete kubikwa bulowa kwaamba ayi atafwi. Nankashi Nicoleau wakakaka. Bushiku bwakaboolawo macuunsa, bakucipatela bakasenga moomboloshi waku kooti kwaamba ayi abape nkusu shakwaamba ayi bamubike bulowa nankashi uyu. Moomboloshi alakwe wakasuminisha kwaamba ayi nankashi Nicoleau abikwe bulowa kwakubula kumwiipusha na kwiipusha beebaye alimwi tabana kubashibisha akubashibisha kwaamba ayi cipatela capekwa nkusu shakubika nankashi bulowa.

Pacisanu bushiku bwa 30 December , basebenshi bamucipatela bakabika Nankashi Nicoleau bulowa, nabi kwaamba ayi beebaye alimwi abamwi bamumukwashi wakwe bakalingaakwe bakakaka. Bushiku bulya beshikamukowa baanji bakwe nankashi Nicoleau kwiilikaawo amunene womwi na bobilo, bakacatwa pamulandu wakwaamba ayi bakashinguluka pakalinga nankashi Nicoleau kwaamba ayi batamubiiki bulowa. Pacibelu macuunsa  bushiku bwa 31 December makani akucatwa uku akaambilishikwa muma Nyusipepa, pama TV alimwi apa ledio ku New York City amisena imwi.

Pamaande macuunsa, ndakabandika amoomboloshi Milton Mollen waku kooti inene. Ndakamusansulwita mulandu woonse, akwaamba ayi moomboloshi umwi uyu wakasaina cipepa cakupa nkusu cipatela shakubika bulowa, kwakubula kukutika kuli mbabo. Ba Mollen bakandwiita ayi nje mbabone ku ofesi yabo malumwi kwaamba ayi tubandike kabotu makani amulandu uyu alimwi ashaamba mulawo pamilandu ya mushobo uyu. Twakaya pomwi amukwesu Philip Brumley uyo wakalinga mutanjilili ku dipatimenti yesu. Ba Mollen bakeeta a loya wakalinga kwiimikaninaako cipatela. Ndyetwakalinga kubandikishanya ndakakalala abuumbi. Aboobo, Mukwesu Brumley wakanembela kapepa ka kundwiita ayi “kutakalala kalika moyo.” Nshaakaamba shakalinga shancine, mukwiinga ndakakalala abuumbi ndyendakalinga kupikisha shakalinga kwaamba loya wa cipatela.

Pesule lyakubandikishanya kwa woola lyomwi, Moomboloshi Mollen wakaamba ayi mulandu wesu ngweshi ukataangune kubandikwa bushiku bwakalinga kukonkelaawo. Ndyetwakalinga kuswa mu ofesi yakwe, Moomboloshi Mollen wakaamba ayi loya wacipatela “alaakuba anciito iyumu ciilo.” Nkokwaamba ayi cilaakuba ciyumu kutondesha kwaamba ayi cipatela cakalinga kucite nkusu sha kukakatisha nankashi Nicoleau kubikwa bulowa. Ndakalinyumfwa anga Yehova wakalinga kunjuminisha ayi tulaakuwina mulandu uyu. Cakalinga cintu cikankamika kwaamba ayi Yehova wakalinga kukumanisha kuyanda kwakwe kwiinda mukusebensesha ndiswe.

Twakasebensa kushikila mashiku kwaamba ayi tulibambile shakwaamba bushiku bwakaboolawo. Kooti yakalingabo pafwiifwi a Bethel yaku Brooklyn, aboobo baanji mbondakalinga kusebensaabo mu Dipatimenti ya sha Milawo bakeendabo panshi kuya kukooti. Pesule lyakwaamba ayi beshikoombolosha bali 4 banyumfwa nshetwakaamba, bakoombolosha ayi cipatela tacakalinga kweelete kupekwa nkusu shakwaamba ayi cikakatishe nankashi kubikwa bulowa. Twakawina mulandu ulya, alimwi kooti inene yakoombolosha ayi milawo yaamba pankusu sha bantu taisuminishi kusaina cipepala citotondesha nshila muntu mbweenga washilikwa, kwakubula kutaanguna kumwiipusha mwiine.

Tapana kwiinda aciindi cilaamfu, kooti inene yaku New York yakoombolosha ayi Nankashi Nicoleau wakalinga kucite nkusu sha kushilikwa kwakubula kubikwa bulowa. Uyu ngowakalinga mulandu wakutaanguna pamilandu ili 4 ikumite kumakani akubikwa bulowa njendakaabanamo lubasu kwiimikaninako libunga muma kooti anene mumbasu shipusenepusene mucishi ca America. (Amubone kabokosi kacite mutwi utokwaamba ayi “ Milandu Njetwakawina Mumakooti Anene.”)  Alimwi ndakasebenselawo pomwi abamaloya pamilandu ikuma baana abaabo babasunga, kulekana alimwi ayeeyo ikuma bwakusebensesha misena alimwi amaanda amwi.

Ciindi cakutaanguna ndyendakakumanya bakaangu ba Dawn, ndakabacana kabacite baana botatwe kuswa kumusankwa ngobakalekanaakwe. Bakalinga kusebensa akucita bupainiya. Cakubonenaako cabo cakuba bashinishite kusebensela Yehova nabi ndyebakalinga kwiinda mumapensho cakanjuminisha abuumbi. Mu 1992, twakacanika kukubungana kunene kwakalinga kucite mutwi wakalinga kwaamba ayi “Beshikuyumuna Mumuni” uko kwakacitikila mutauni ya New York, ici nceciindi ncetwakatalika kushibana. Ndipakeenda mwaaka womwi twakeebana. Kweeba mwanakashi ubika shakwe Yehova panembo alimwi ucite mushimu wacisangalashi ncipo kuswa kuli Yehova. Twakekala kabotu abuumbi abakaangu ba Dawn mubuumi bwangu boonse.—Tus. 31:12.

Ndyetwakeebana, baana mbondakacanaamo bakalinga kucite myaaka, munene bantu 16, ukonkelawo 13, mwanike bantu 11. Ndakalinga kusuni kubalela kabotu mbuli mushali wabo, aboobo ndakalinga kubelenga cakubikila maano akukonkela makani oonse aamba pakuba mushali wakucanaamo ngondakalinga kucana mumabuku esu. Kwakalinga mapensho ngotwakalinga kwiindaamo, nacibi boobo ndisangalete mukwiinga baana bakansumina mbuli shicibusa wabo ngobashoma alimwi ishiwabo ubasuni. Twakalinga kutambula beshicibusa ba bana besu alimwi twakalinga kunyumfwa kabotu na kabasekana paŋanda ababyaabo.

Mu 2013, nebo aba Dawn twakalongela ku Wisconsin kwaamba ayi tuye tulame bashali babo bakacembela. Ndakakankamana kwaamba ayi ndakatolelela kusebensela pa Bethel. Bakansenga ayi ntolelele kucafwilisha libunga munshila shipusenepusene kumakani asha milawo.

Mu September 2018, ndakabona ayi ndakatalika kukosoka lyoonse kantana kwaamba. Dokota wakampima kwaamba ayi abone citolengesha, sombi taakuwo ncaakacana. Mukuya kwaciindi, dokota umwi wakaamba ayi ndyeelete kubonana a dokota ulanga pamakani aboongo. Mu January 2019, dokota uyo wakaamba ayi citooboneka anga ndicite bulwashi butapukite alimwi bweshi bukanyonyoole mubili woonse bwiitwa ayi progressive supranuclear palsy (PSP).

Ndipakeenda nshiku shotatwe, ndakawa akutyoka lyaansa ndyendakalinga kusekana cisekano ncendakalinga kusuni abuumbi. Ndakatalika kusekana cisekano ici kaancili mwanike alimwi ndakalinga kucishi kabotu abuumbi. Aboobo ndyendakawa, ndakashiba kwaamba ayi mubili wangu watalika kwaalilwa kweendelesha kabotu mishisa. Ndakakankamana kubona bulwashi ubu mbobwakatolelela kuya panembo cakwaamba ayi kwaamba, kweenda, akumina shintu cakaba ciyumu.

Ndikondetwe abuumbi kwaamba ayi ndakalinga kucite coolwe ca kucafwilisha libunga lyakwe Yehova anciito yangu mbuli loya. Alimwi ndikondetwe kwaamba ayi ndakacikonsha kulemba makani aanji amumagazini abelengwa amadokota, ma loya, alimwi aboomboloshi. Alimwi ndakalinga kucite acoolwe cakubandika abantu mumisena ipusenepusene, pamakani ankusu shicite bantu bakwe Yehova shakulisalila kushilikwa kwakubula kusebensesha bulowa. Nacibi boobo, bweenka mbuli Luka uyo wakalinga kucite coolwe ca kulemba Baibo mbwakaamba pa Luka 17:10: ‘Ndi musebenshi uteelete kulumbwa. Mukwiinga ndacitabo mulimo wangu.’