1. Ino kuloonda Lesa cilaamba nshi, alimwi ino nceebonshi ncokuyandikila kubaabo bamusuni?

BENEKLISTU balimusuni Lesa, alimwi balamuloonda. Ano bamwi inga bakaka akwaamba ayi ino inga twamuloonda buyani Lesa ngotusuni. Nacibi boobo, tatutokwaamba pakuloonda kupa boowa. Tutobandika pakuloonda kulibetele. Bantu beshikuloonda Lesa munshila iyi ilibetele, balamulemeka abuumbi kuswa panshi lya moyo. Tabasuniiwo kukalasha Ishiwabo wakwiculu mukwiinga balisuni kutolelela kuba abushicibusa bubotu anguwe.​—Kulu. 111:10; Tus. 8:13.

2. Kweelana amaswi akaamba Defedi ngotucana pa Kulumbaisha 86:11, ino ngamakani nshi obilo ngweshi tubandike?

² Amubelenge Kulumbaisha 86:11. Na mwayeeya pamaswi ali palilembo ili, inga mwabona kwaamba ayi Mwaami Defedi wakalinga kucishi ncociyandikila kulemeka Yehova, aboobo tutobandika nsheenga twaciita kwaamba ayi tukonkele shakaamba Defedi mumupailo wakwe. Cakutaanguna, tutobandika ncotweelete kutondeshela bulemu abuumbi paliina lyakwe Lesa. Cabili, tutobandika mbweenga twatondesha kwaamba ayi tulalemeka liina lyakwe Lesa, kwiinda mushintu shoonse nshetucita bushiku abushiku.

3. Ino nciinshi cakacitika cakapa kwaamba ayi Mose atolelele kulemeka Yehova abuumbi?

³ Amuyeeyebo Mose mbwaakalinyumfwa ndyaakalinga mu cimfwengo ca libwe lyalo akubona bulemu bwakwe Yehova kabwiinda  mucili anga nciloto. Cilyeelete kwaamba ayi ici cakalinga cintu cilibetele abuumbi citana kubonekawo kale Yesu kaatana kusa pacishi! Lyalo Mose wakanyumfwa liswi lya munjelo ayi: ‘Yehova, Yehova, Lesa uswite lulekelelo a nkuumbu, utafwambaani kukalala, ubonesha lusuno lunene alimwi ushomeka, utondesha lusuno lutamaani ku shuulu ashuulu sha bantu,alimwi ulekelela bantu pa bubi a shibiibi shabo.’ (Kulo. 33:17-23; 34:5-7) Cilyeelete kwaamba ayi na Mose waamba liina lyakwe Yehova wakalinga kwiibaluka cakucitika ici. Alimwi ncecakapa Mose kucenjesha bene Isilaeli ayi “amuloonde liina licite bulemu alimwi liyoosha.”​—Duto. 28:58.

4. Ino nkuyeeya pamibo ili kweenga kwatucafwa kuloonda akulemeka Yehova?

⁴ Na twayeeya paliina lyakwe Yehova, tulyeelete kukutumana akuyeeya mwiine Yehova mbwaabete. Tulyeelete kuyeeya apamibo yakwe mbuli nkusu, busongo, bululami, alimwi alusuno. Kuyeeya bunene pamibo iyi alimwi amibo imwi, kulaakutucafwa kunoomuloonda akumulemeka abuumbi.​—Kulu. 77:11-15.

5-6. (a) Ino liina lyakwe Lesa lilasansulula nshi? (b) Kweelana a Kulonga 3:13, 14 alimwi a Isaya 64:8, ino Yehova alacita buyani kwaamba ayi akumanishe kuyanda kwakwe?

⁵ Ino ngamakani nshi ngotushi paliina lyakwe Lesa ncolyaamba? Bantu baanji bakeeya abuumbi balasumina kwaamba ayi liina lyakwe Yehova mpashi lilasansulula ayi “Alalengesha Shintu Kuba.” Busansulushi ubu bulatwiibalusha kwaamba ayi taakuwo ceenga capa kwaamba ayi Yehova aalilwe kukumanisha kuyanda kwakwe, alimwi inga walengesha shintu kuba. Munshila nshi?

⁶ Yehova alalengesha shintu kuba kwiinda mukuba cili coonse ciyandika kwaamba ayi akumanishe kuyanda kwakwe. (Amubelenge Kulonga 3:13, 14.) Liinji mabuku esu alatuyuminisha kunoyeeya bunene pabusansulushi bubotu abuumbi ubu bwa liina lyakwe Lesa. Alimwi Yehova inga walengesha basebenshi bakwe batasalalite kuba ncaasuni ayi babe kwaamba ayi bakumanishe kuyanda kwakwe. (Amubelenge Isaya 64:8.) Kwiinda munshila ishi, Yehova alapa kwaamba ayi kuyanda kwakwe kukumanishikwe. Taakuwo ceenga capa kwaamba ayi aalilwe kukumanisha kuyanda kwakwe.​—Isa. 46:10, 11.

7. Ino nshiinshi nsheenga twaciita kwaamba ayi tutolelele kutondesha kulumba kuli Ishiwesu wakwiculu?

 ⁷ Inga twatolelela kutondesha ayi tulalumba Ishiwesu, kwiinda mukukutumana kuyeeya pashintu nshaakacita alimwi anshatulengesha kucita. Kucakubonenaako, na twakutumana akuyeeya pashintu shoonse Yehova nshaakalenga, tulalumba abuumbi pa shoonse nshaakacita. (Kulu. 8:3, 4) Alimwi na twakutumana akuyeeya Yehova mbwatucafwa kwaamba ayi tukumanishe kuyanda kwakwe, tulamulemeka abuumbi. Ncakwiila tulyeelete kuloonda liina lyakwe Yehova! Lileelikaawo mibo yoonse icite Ishiwesu, shintu shoonse nshaakacita, alimwi asheesho shoonse nsheshi akacite kunembo.​—Kulu. 89:7, 8.

8. Kweelana a Dutolonomi 32:2, 3 ino Yehova alisuni ayi basebenshi bakwe banoocita buyani paliina lyakwe?

⁸ Bene Isilaeli kabatana kunjila Mucishi Cakashomeshekwa, Yehova wakaiisha Mose lwiimbo. (Duto. 31:19) Lyalo Mose alakwe wakalinga kweelete kwiisha bene Isilaeli boonse. (Amubelenge Dutolonomi 32:2, 3.) Na twakutumana akuyeeya pamaswi ngotucana muvesi 2 alimwi a 3, tutoobona kwaamba ayi Yehova alisuni kwaamba ayi liina lyakwe lishibikwe, alimwi taasuniiwo bantu kunoobona anga tabeelete kwaamba liina lyakwe ceebo cakwaamba ayi lilisalalite. Alisuni kwaamba ayi lishibikwe kumuntu uli woonse! Bene Isilaeli bakakondwa abuumbi Mose ndyaakalinga kubaiisha pali Yehova aliina lyakwe libotu abuumbi! Nshobakeeya shakayumya lushomo lwabo akubayuminisha, bweenka mbuli imfula ya tepetepe mboicafwa shishango kumena kabotu. Ino inga twacita buyani kwaamba ayi tunokwiisha munshila iyuminisha?

9. Ino inga twacita buyani kwaamba ayi tusalashe liina lyakwe Yehova?

⁹ Inga twacaafwa bantu kushiba liina lyakwe Yehova, kwiinda mukubatondesha kuswa mu Baibo ndyetutooshimikila kuŋanda aŋanda, na mumisena mucanika bantu baanji. Inga twabaabila mabuku esu abotu abuumbi, mavidyo, alimwi akubatondesha makani acanika pa webusaiti yesu ayo alemeka Yehova. Inga twaba acoolwe cakushimikila bamwi pali Lesa wesu shilusuno, mpashi ndyetuli kucikolo, kuncito, nabi ndyetuli palweendo. Inga twabalwiitako pashintu shibotu Yehova nsheshi akatucitile pacishi capanshi. Kucita boobo mpashi inga kwabacafwa kushiba ayi Yehova alibasuni. Kulwiita bamwi cancine pali Ishiwesu shilusuno kulapa kwaamba ayi tusalashe liina lyakwe. Tulacafwa bantu kushiba kwaamba ayi shiinji nshobakaiishikwa pali Yehova nshakubeca. Alimwi makani amu Baibo ngotwiisha bantu, ngomakani eenkabo eenga abapa kuba alusangalalo lwancinencine.​—Isa. 65:13, 14.

10. Ino nceebonshi tatweelete kweelabo pakwiisha milawo yakwe Lesa ndyetutoocita shiiyo sha Baibo?

¹⁰ Ndyetutoocita shiiyo sha Baibo, tulisuni kucafwa bantu kushiba akusebensesha liina lyakwe Yehova. Kwiilikaawo, tulisuni akubacafwa kushiba kabotu liina ili ncolyaamba. Ano sa inga twabacafwa kumushiba kabotu Yehova na katuyuminishabo nshobeelete kukonkela, njiisho shakwe Lesa, alimwi amilawo njobeelete kukonkela? Ncakwiila shikwiiya uli kabotu inga wacikonsha kwiiya milawo yakwe Lesa, mpashi akwiisuna. Ano sa alakukonkela milawo yakwe Yehova ceebo cakwaamba ayi alimusuni? Mutaluubi kwaamba ayi, Adamu a Efa bakalinga kushi milawo yakwe Lesa, sombi tabakalinga kucitewo lusuno pali Lesa. (Mata. 3:1-6) Aboobo tatweelete kweelabo pakucafwa bantu kwiiya milawo a njiisho shakwe Lesa shiluleme.

11. Ino inga twacita buyani kwaamba ayi tuteelibo pakwiisha milawo anjiisho shakwe Lesa, sombi tucafwe shikwiiya kusuna Yehova?

¹¹ Milawo anjiisho shakwe Yehova shilatucafwa lyoonse. (Kulu. 119:97, 111, 112) Nacibi boobo, shikwiiya Baibo inga taaboni boobo na kaatacishi ayi Yehova alatupa milawo iyi ceebo cakwaamba ayi alitusuni. Aboobo inga twamwiipusha ayi: “Mutoyeeya buyani, ino nceebonshi Lesa ncaalwiitila basebenshi bakwe kucita boobu  na kuleya kucita ceeci? Ino ici cilatwiisha nshi pali nguwe?” Inga twacikonsha kubashika pamoyo na katubacafwa kuyeeya pali Yehova akusuna bunene liina lyakwe. Ici cilaakupa kwaamba ayi beshikwiiya Baibo basune milawo yakwe Lesa alimwi akusuna Yehova Shikupa milawo. (Kulu. 119:68) Balaakuyuma mulushomo alimwi akucikonsha kuliyumya mumapensho ali oonse ngeenga bacana kunembo.​—1 Koli. 3:12-15.

12. Ino Defedi wakacita nshi ico cakapa kwaamba ayi aalilwe kuba amoyo womwi, alimwi ino nshiinshi shakaswaamo?

¹² Maswi ayandika abuumbi aambwa palilembo lya Kulumbaisha 86:11 ngakwaamba ayi “amumpe kuba amoyo womwi.” Yehova ngowakapa kwaamba ayi Mwaami Defedi alembe maswi aya. Kaatana kufwa, Defedi wakabona mbocibete cuubu kuba amyoyo yobilo. Bushiku bumwi ndyaakalinga kweenda paciluli ca ŋanda yakwe, wakabona mwanakashi muka mwiine kaasamba. Ano sa paciindi ici Defedi wakalinga kucite moyo womwi na myoyo yobilo? Wakalinga kuushi mulawo wakwe Yehova waamba ayi: “Utakuumbwi muka mwiine.” (Kulo. 20:17) Sombi wakatolelela kulangilisha muka mwiine alimwi ici cakapa kwaamba ayi abe amyoyo yobilo. Wakatalika kukumbwa mwanakashi Batisheba, alimwi paciindi comwi wakalinga kusuni kusangalasha Yehova. Nabi kwaamba ayi Defedi wakalinga kuloonda Yehova alimwi wakalinga kumusuni kwa myaaka iinji, kwakalinga ciindi ndyaakasala kulikondelesha. Aboobo wakacita cilubo cinene abuumbi. Nshaakacita shakasebenya liina lyakwe Yehova. Alimwi wakaleta mapensho kubantu bamwi kwiilikaawo amukwashi wakwe.​—2 Samwe. 11:1-5, 14-17; 12:7-12.

13. Ino tulishi buyani ayi Defedi wakaba amoyo womwi alimwi?

¹³ Yehova wakalulika Defedi, lyalo wakaba shicibusa wakwe alimwi. (2 Samwe. 12:13; Kulu. 51:2-4, 17) Defedi wakeebaluka mapensho alimwi a shibiibi shakaswaamo ceebo cakwaalilwa kuba amoyo womwi. Maswi ngaakalemba ayo ngotucana palilembo lya Kulumbaisha 86:11 inga twaalula akwaamba ayi: “Amuncaafwe kutaba amyoyo yobilo.” Ano sa Yehova wakacafwa Defedi kumusebensela amoyo womwi? Ee, mukwiinga Maswi akwe Yehova alaamba pali Defedi ayi ‘moyo wakwe woonse wakalinga kuli Yehova Lesa wakwe.’​—1 Baami 11:4; 15:3.

14. Ino ngumwiipusho nshi ngotweelete kuliipusha alimwi ino nceebonshi?

¹⁴ Makani akacitikila Defedi alayuminisha alimwi akucenjesha. Kubisha Defedi nkwaakacita, ncakubonenaako cakucenjesha kubasebenshi bakwe Lesa munshiku shino. Inga caba ayi twakatalika conoono kusebensela Yehova na mpashi twamusebensela kwa myaaka iinji, soonse tulyeelete kuliipusha ayi, ‘Sa ntokweelesha kukaka  meelesho akwe Satana eenga ampa kuba amyoyo yobilo?’

15. Ino kuloonda Lesa inga kwatucafwa buyani na twabona shikope sheenga shatupa kutalika kuyeeya pashibiibi?

¹⁵ Kucakubonenaako, ino mulacita buyani na mwabona shikope pa TV na pa intaneti sheenga shamupa kuyeeya kucita shintu shibiibi? Mpashi inga mwayeeya ayi ishi shikope na filimu iyi teshi ya shamatakosha. Nacibi boobo, Satana inga wasebensesha shintu mbuli sheesho kupa kwaamba ayi mube amyoyo yobilo. (2 Koli. 2:11) Shikope isho inga twashikoshanisha ku keembe nkeenga muntu wasebensesha kutema cisamu cinene. Pakutaanguna inga woomamobo paniini mucisamu akeembe kakolete. Lyalo na watolelela kutema, cisamu inga cashika pakuwa. Bweenka ubu mbocibete akuli ndiswe na twatolelela kulangilisha shikope sheenga shapa kwaamba ayi tucite shibiibi. Na muntu watolelela kulangilisha pashikope nsheenga kaabona anga shilibo kabotu, sombi sheenga shamupa kuyeeya pakucita shintu shibiibi, inga capa kwaamba ayi abishe kuli Yehova. Aboobo mutasuminishi shintu shibiibi kunjila mumoyo wanu! Amucite nsheenga mwacikonsha kwaamba ayi munooloonda Yehova amoyo wanu woonse!

16. Ino njimiipusho nshi njotweelete kuliipusha na twacaana bweelesho bwakucita shibiibi?

¹⁶ Satana alasebensesha nshila shimwi shiinji kwaamba ayi atuyunge kukucita shintu shibiibi. Ano ino tulacita buyani na tweeleshekwa? Ncuubu kutalika kuyeeya ayi ishi shintu teshi shibiibi. Kucakubonenaako, mpashi inga twatalika kuyeeya ayi: ‘Kucita sheeshi inga takupi kwaamba ayi bankushe mulibungano, aboobo teshi shibiibi abuumbi,’ kuyeeya boobo nkulibeca. Inga cabota kuliipusha ayi: ‘Sa Satana atosebensesha bweelesho ubu kwaamba ayi ampe kuba amyoyo yobilo? Sa kucita sheeshi teshi kusebaanye liina lyakwe Yehova? Sa kucita sheeshi kutoyumya bushicibusa bwangu a Yehova na kuntalamusha kuli nguwe?’ Amukutumane akuyeeya pamiipusho iyi.  Amupaile kwaamba ayi Lesa amucaafwe kukumbula miipusho iyi cakushomeka. (Jemu. 1:5) Kucita boobo kulaakumushitilisha. Inga kwamucafwa kukoma meelesho cakushinisha bweenka mbuli Yesu mbwakakoma meelesho akwe Satana kwiinda mukumwaambila ayi: “Swaawo apa!”​—Mate. 4:10.

17. Ino nceebonshi ncibiibi kuba amyoyo yobilo? Amwaambe cikoshanyo.

¹⁷ Teshi cibotu kuba amyoyo yobilo. Amuyeeye mbweenga caba na bantu bali mutiimu yomwi ya boola tabatoonyumfwana. Bamwi balisuni kucita nshebasuni beene kwaamba ayi bantu banoobalumbaisha, bamwi tabasuni kukonkela milawo alimwi akunyumfwila shitobalwiita mutanjilili wabo. Ncakutatoonsha kwaamba ayi tiimu ili boobo inga taicikoonshi kuwina. Mubupusano, abo bali mutiimu icatene inga bacikonsha kuwina. Moyo wanu inga waba anga ni tiimu ya beshikuuma boola banyumfwana kabotu na nshomuyeeya, nshomusuni, alimwi ambomulinyumfwa shilapa kwaamba ayi munoosebensela Yehova. Mutaluubi kwaamba ayi Satana alisuni ayi munoosebensela Yehova amyoyo yobilo. Alisuni kwaamba ayi munookwaalilwa kucita shintu nshemushi ayi Yehova nshaasuni ayi munoocita, ceebo cakusuna kucita shakulikondelesha. Mulyeelete kuba amoyo womwi kwaamba ayi mucikoonshe kusebensela Yehova. (Mate. 22:36-38) Mutasuminishi Satana kumulengesha kuba amyoyo yobilo!

18. Kweelana a Mika 4:5, ino nshiinshi nshomushinishite kucita?

¹⁸ Amupaile kuli Yehova bweenka mbuli Defedi mbwaakacita ndyaakaamba ayi: “Amumpe kuba amoyo womwi kwaamba ayi noloonda liina lyanu.” Amucite nsheenga mwacikonsha kwaamba ayi munoocita kweelana amupailo uyu. Amube bashinishite bushiku abushiku kwaamba ayi shintu nshemusala shiniini na shinene, shinootondesha kwaamba ayi mulalemeka liina lyakwe Yehova lisalalite. Kucita boobo kulaakupa kwaamba ayi munokwimikaninako kabotu liina lyakwe Lesa mbuli Kamboni wakwe Yehova. (Tus. 27:11) Alimwi ici cilaakupa kwaamba ayi soonse tukacikoonshe kwaamba maswi akaamba mushinshimi Mika ayi: “Tulaakweenda muliina lyakwe Yehova Lesa wesu lyoonse alyoonse.”​—Mika  4:5.