SOONSE tulishomete cakutatoonsha kwaamba ayi Yehova ngototanjilila bantu bakwe ‘munshiku shino shakweelaako,’ akubapa nshebayandika kwaamba ayi babe pafwiifwi anguwe. (2 Timo. 3:1) Aboobo womwi awomwi alicite mukuli wakunyumfwila Yehova. Bukaalo mbotubeteemo pacecino ciindi bulibo bweenka mbuli mbocakalinga bene Isilaeli ndyebakalinga muluyanga. Bakalinga kweelete kucitawo comwi na banyumfwa kulila kwa lupeenga.

Yehova wakalwiita Mose kwaamba ayi apange mapeenga obilo asilifa wakufula, “akunoosebensesha pakubunganya bantu alimwi apakulonga.” (Shakube. 10:2) Bapailishi bakalinga kweelete kulisha mapeenga munshila shipusenepusene kwaamba ayi balwiite bantu shitoyandika kucitwa. (Shakube. 10:3-8) Munshiku shino, bantu bakwe Lesa balatambula butanjilishi bwakwe munshila shipusenepusene. Amuleke tubandike nshila shotatwe isho shitotwiibalusha makani akulisha mapeenga muciindi ca bene Isilaeli. Nshila shotatwe ishi ngamabungano anene, cikolo ca bamanene, alimwi akwaaluka kwa butanjilishi butambula mabungano oonse mulibunga lyakwe Yehova.

Na Yehova alisuni kwaamba ayi “bene Isilaeli boonse” babungane pa mulyaango wa tente ya cipangano, bapailishi bakalinga kulisha mapeenga oonse obilo. (Shakube. 10:3) Mikowa yoonse yakalinga kukala pamusena wakalinga kushingulukite tente yacipangano, yakalinga kunyumfwa kulila kwa mapeenga ayo. Abo bakalinga kukala pafwiifwi amulyango wa tente yacipangano mbobakalinga kufwambaana kushika. Abo bakalinga kukala kulaale, bakalinga kutolako ciindi kwaamba ayi bashike pesule lyakunyumfwa kulila kwa mapeenga. Muli moonse mocakalinga kubeta, Yehova wakalinga kusuni ayi bantu boonse babunganishikwe akufubilaamo.

Nabi kwaamba ayi munshiku shino tatubunganini patente yacipangano, tuleetwa kumabungano anene abantu bakwe Yehova. Kubungana uku kuleelikawo kubungana kunene alimwi amabungano amwi alibetele, uko nkotutambula makani ayandika abuumbi alimwi abutanjilishi. Mushishi shipusenepusene nsengwe yoonse, bantu bakwe Yehova balaiishikwa makani womwi kumabungano anene. Aboobo abo boonse beshikusumina kusa kumabungano aya, balaba lubasu lwa likoto lya bantu bakwe Lesa basangalete. Bamwi baleenda mishinso ilaamfu sombi bamwi balekala pafwiifwi akubeta mabungano aya. Nacibi boobo, boonse beshikucanika kukubungana uku balicishi kwaamba ayi tulafubilaamo abuumbi na twacanikaako.

Ano ino mbuyani abo bekala kulaale abuumbi akumisena kubeta mabungano anene, sa abalo inga bafubilaamo mumabungano aya? Ee! inga bafubilaamo. Munshiku shino, kuli shakupanga panga shipa kwaamba ayi bamakwesu baanji bekala kumisena yakulaale abuumbi abalo bafubileemo mumabungano anene alimwi balalinyumfwabo anga bali kumusena kweenka kubete kubungana. Kucakubonenaako, ndyekwakalinga kubungana kwa kufwakasha kwa shikwiimikaninaako maofesi anene, musampi waku Benin wakatondesha pulogilamu kumusena ucanika muluyanga lwa Sahara Desert wiitwa ayi Arlit, uyo ucanika mucishi ca Niger. Bamakwesu  abenankashi bali 21 kwiilikaawo abantubo bamwi bakacanikaako. Nabi kwaamba ayi bakalinga kumusena wakulaale abuumbi, bakalinyumfwa kuba lubasu lwa likoto lya bamakwesu abenankashi bali 44,131 bakabungana. Mukwesu umwi wakaamba ayi: “Twalumba abuumbi kwaamba ayi aswebo twacikonsha kweebela pulogilamu iyi. Yatucafwa kubona kwaamba ayi anu ncakwiila mulitusuni abuumbi.”

Na mupailishi wa bene Isilaeli walishabo lupeenga lomwi, ‘bamatanjilili ba shipani sha bene Isilaeli’ beenkabo mbobakalinga kubungana kutente yacipangano. (Shakube. 10:4) Mose wakalinga kubaiisha akubalwiita shakucita isho shakalinga kubacafwa kukumanisha mikuli mumikowa yabo. Nimwakalinga womwi wabamatanjilii, sa naakwiinga tamukwe kucita nsheenga mwacikonsha kwaamba ayi mucanikeeko akukutika Mose nshaakalinga kwiisha?

Pacecino ciindi, bamanene mulibungano teshi “bamatanjilili” alimwi tabakakatishi mbelele shakwe Yehova nshebakapekwa kulama. (1 Pita 5:1-3) Sombi balacita nsheenga bacikonsha ndyebatolama mbelele. Aboobo balasumina na beetwa kwaamba ayi baye mukutambula lwiiyo, mbuli ku Cikolo Cancito ya Bwaami. Kucikolo ici, bamanene balaiishikwa mbweenga balama kabotu makani amulibungano. Ici cilapa kwaamba ayi boonse mulibungano bayume lwakumushimu. Nabi kwaamba ayi tamuna kucanikaako kale kucikolo ici, inga mwafubilaamo kwiinda mubaabo bakacanikaako.

Cimwi ciindi bapailishi bene Isilaeli bakalinga kulisha lupeenga munshila ilibetele. Na mupailishi walisha boobo, nkokwaamba ayi Yehova wakalinga kusuni ayi bene Isilaeli boonse balonge pamusena uyo. (Shakube. 10:5, 6) Kwakalinga bubaambo bubotu abuumbi mbobakalinga kukonkela ndyebakalinga kulonga kuswa pamusena womwi akuya kumusena umwi. Sombi bakalinga kweelete kusebensa cankusu kwaamba ayi bacikoonshe kucita boobo. Bene Isilaeli bamwi mpashi bakalinga kuwayawaya kwaamba ayi balonge kuya kumusena umwi. Ino nceebonshi?

Mpashi bamwi bakalinga kulinyumfwa ayi Yehova waciindilisha kubalwiita sha kulonga longa alimwi ayi wakalinga kubalwiita kulonga paciindi ncobatakalinga kulibambite. “Mushiindi shimwi likumbi lyakalinga kubawobo kuswa macolesha kushikila amacuunsa.” Cimwi ciindi pakalinga kwiinda “Inshiku shobilo, mweenshi, nabi kusotokaawo” kwaamba ayi balonge alimwi. (Shakube. 9:21, 22) Ino ngamankanda ongaye bene Isilaeli ngobakalongaawo? Shakubelenga capita 33 ilaamba misena ili 40 bene Isilaeli nkobakakalaawo kale kale.

Cimwi ciindi bamwi bakalinga kucana misena pakalinga cimfule cibotu. Cilyeelete kwaamba ayi bakalinga kunyumfwa kabotu kuyaka misumba pamusena pakalinga cimfule ‘muluyanga lunene alimwi luyoosha.’ (Duto. 1:19) Aboobo bamwi balyeelete bakalinga kuyeeya ayi kulongela kumwi inga kwapa kwaamba ayi baye kumusena utabete kabotu.

Na batalika kulonga, mikowa imwi yakalinga kweelete kutaanguna kulindila kushikila balwiitikwa ayi abalo inga batalika kulonga. Nabi kwaamba ayi boonse bakalinga kunyumfwa na lupeenga lwalila munshila ilibetele, tabakalinga kunyamuka paciindi comwi. Na lupeenga lwalila munshila ilibetele ciindi cakutaanguna, mikowa yakalinga kulubasu lwa kwicwe, nkokwaamba ayi mukowa wa bene Juda, Isaka, alimwi a Sebuluni, mbobakalinga kweelete kutaanguna kulonga. (Shakube. 2:3-7; 10:5, 6) Pesule lyakulonga kwa mikowa iyi, bapailishi bakalinga kulisha lupeenga lulibetele linkanda lyabili kwaamba ayi mikowa yotatwe yakalinga kumalenge italike kulonga. Ubu bweenka bapailishi mbobakalinga kucita kushikila mikowa yoonse yalonga.

Mpashi amwebo cilamuyumina kukonkela na shintu shimwi shaaluka mulibunga lyakwe Yehova. Na mpashi mwakayeeyawo kale ayi shakwaaluka shafula alimwi shesa paciindi ncomwatakalinga kushilangila. Na mpashi kuli bubaambo bumwi bwa kale kale bwakaaluka mbomwakalinga kuyeeya ayi mpashi naakwiinga tabukwe kwaaluka. Mpashi cakamuyumina kukalika moyo kwaamba ayi mukonkele kwaaluka kupya, alimwi mpashi cakatola ciindi kwaamba ayi mushibile bubaambo bupya. Muli moonse mweenga cabeta, kweelesha kukonkela bubaambo na kwaba kwaaluka, kulaakutucafwa kubona bubotu mukuya kwaciindi alimwi akucana shoolwe.

Muciindi cakwe Mose, Yehova wakatanjilila bantu baanji abuumbi basankwa, banakashi, alimwi abaana ndyebakalinga muluyanga. Lyalo bakapuluka mukwiinga wakalinga kubatanjilila alimwi akubabikila maano. Aswebo munshiku shino shakweelaako shiloondesha, Yehova alatucafwa kuyumya lushomo abushicibusa bwesu anguwe. Aboobo atutolelele kuba bantu banyumfwila bweenka mbuli bene Isilaeli bashomeka mbobakalinga kucita na banyumfwa kulila kwa mapeenga!