1-2. Ino ngamakani nshi Bakamboni Bakwe Yehova ngobabona kuyandika?

KULI makani ayandika abuumbi atootukuma pacecino ciindi. Aya nga makani aweelela kweendelesha akusalashikwa kwa liina lyakwe. Mbuli Bakamboni Bakwe Yehova, tulanyumfwa kabotu kubandika pamakani ayandika aya. Nacibi boobo, bweendeleshi bwakwe Lesa alimwi akusalashikwa kwa liina lyakwe, teshi shintu shobilo shipusene.

² Soonse tulishi kwaamba ayi liina lyakwe Lesa lilyeelete kusalashikwa. Alimwi tulicishi kwaamba ayi tulyeelete kutondesha ayi bweendeleshi bwakwe Yehova bweenkabo mbobwiinditeewo. Aboobo makani oonse obilo aya alayandika abuumbi.

3. Ino liina lyakwe Yehova lileelikaawo nshi?

³ Liina lyakwe Yehova lileelikaawo shoonse pali Lesa wesu, kwiilikaawo ambwaeendelesha. Aboobo na twaamba ayi kusalashikwa kwa liina lyakwe Yehova ngomakani ayandika, nkokwaamba ayi tulyeelete kutondesha ayi akweendelesha kwakwe nkokwiinditeewo. Liina lyakwe Yehova lilicatene abuumbi ambwaeendelesha mbuli Mweendeleshi shinkusu shoonse.​—Amubone kabokosi kacite mutwi utokwaamba ayi “ Ino Nshiinshi Shiilikitwe Mumakani Ayandika Abuumbi?”

4. Ino liina lyakwe Lesa lilasansululwa buyani pa Kulumbaisha 135:13, alimwi ino njimiipusho nshi njeshi tubandike mumutwi uyu?

⁴ Liina lyakwe Yehova lilibetele abuumbi. (Amubelenge Kulumbaisha 135:13.) Ino nceebonshi liina lyakwe Lesa lilayandika abuumbi? Ino lyakabishikwa buyani pakutaanguna? Ino Lesa alacita buyani kwaamba ayi asalashe liina lyakwe? Alimwi ino inga  twacita buyani kwaamba ayi tusalashe liina lyakwe Lesa? Amuleke tubandike shikumbulo kumiipusho iyi.

5. Ino ngumwiipusho nshi bamwi ngweenga beepusha na banyumfwa ayi liina lyakwe Lesa lilyeelete kusalashikwa?

⁵ “Liina lyanu alisalashikwe.” (Mate. 6:9) Yesu wakaamba ayi ici ncecintu ciyandika abuumbi ncotweelete kunoopaililaawo. Ano ino maswi akaamba Yesu alasansulula nshi? Kusalasha cintu cimwi cilaamba kucilengesha kwaamba ayi cibe cisalalite na citacite kampenda. Bamwi inga baliipusha ayi, ‘Sa liina lyakwe Yehova talisalalite kale?’ Kwaamba ayi tucane cikumbulo, tulyeelete kutaanguna kuyeeya shiilikitwe muliswi lyakwaamba ayi liina.

6. Ino nciinshi cipa kwaamba ayi liina libe liyandika?

⁶ Liswi lyakwaamba ayi liina teshi liswi ndyetulembabo palipepa na kwaambabo. Baibo ilaamba ayi: “Ncibotu kuba aliina libotu kwiinda kuba abubile buunji.” (Tus. 22:1; Shiku. 7:1) Ino nceebonshi liina lilayandika abuumbi? Lilayandika abuumbi mukwiinga lileelikaawo mpuwo, nkokwaambayi bamwi nshobayeeya pawooyo ucite liina ilyo. Aboobo liina mbolilembwa nabi mbolyaambwa teshi ncecintu ciyandika abuumbi, cinene ciyandika nshintu bantu nshobayeeya na babona nabi kunyumfwa liina ilyo.

7. Ino bantu balaamba nshi shipa kwaamba ayi bamwi banoyeeya shibiibi pali Lesa?

⁷ Na bantu kabaamba makani akubeca pali Yehova, nkokwaamba ayi balisuni ayi bantu bamwi banooyeeya shibiibi pali nguwe. Na bantu babona shibiibi isho, balatalika kupa milandu Lesa, akwaamba shibiibi paliina lyakwe. Ciindi cakutaanguna umwi ndyaakaamba shibiibi pali Lesa akupa kwaamba ayi bantu banoyeeya shibiibi pali nguwe, mwakalinga mumuunda wa Edeni. Amuleke tubandike nsheenga tweeya kushakacitika.

8. Ino nshiinshi Adamu a Efa nshobakalinga kucishi, alimwi ino njimiipusho nshi njeenga tweepusha?

⁸ Adamu a Efa bakalinga kucishi ayi liina lyakwe Lesa ngu Yehova, alimwi bakalinga kucishi shintu shiinji shiyandika pali nguwe. Bakalinga kucishi ayi ngo Mulengi wabo uyo wakabapa buumi, musena ubotu kwakukala, alimwi abuumi bumaninite. (Mata. 1:26-28; 2:18) Ano sa bakatolelela kuyeeya pashintu shibotu shoonse Yehova nshaakabacitila? Sa  bakatolelela kutola panembo lusuno akulumba kwabo pali Yehova? Cikumbulo cakabonekela patuba ndyebakeeleshekwa amulwani wakwe Lesa.

9. Kweelana a Matalikilo 2:16, 17 alimwi a 3:1-5, ino nshiinshi Lesa nshaakalwiita beebene bakutaanguna, alimwi ino Satana wakaalula buyani cancine Lesa ncakaamba?

⁹ Amubelenge Matalikilo 2:16, 17 alimwi a 3:1-5. Satana wakabandika a Efa kwiinda mukusebensesha nsoka. Wakeepusha Efa ayi: “Sa ncakwiila Lesa wakamukasha kulya shisepo sha cisamu cili coonse mumuunda?” Satana wakeepusha mwiipusho wakalinga kucite makani akubeca pali Lesa, aboobo Efa wakatalika kuyeeya shibiibi pali Lesa. Lesa wakaamba ayi inga balya shisepo sha cisamu cilicoonse, kukushakobo cisamu comwi. Adamu a Efa bakalinga kucite coolwe cakulya shisepo kushisamu shipusenepusene shiinji. (Mata. 2:9) Ncakwiila, Yehova ngushikwaaba. Nacibi boobo, Lesa wakalwiita Adamu a Efa ayi kwakalinga cisamu comwi ncobatakalinga kweelete kulyako shisepo. Aboobo mwiipusho Satana ngwakeepusha wakaalula cancine Lesa ncakaamba. Alimwi wakabapa kuyeeya anga Lesa ngumuunyu. Ici cilyeelete cakapa Efa kuliipusha ayi, ‘Sa kuli cintu cimwi cibotu Lesa ncaatonkasha?’

10. Ino Satana wakacita buyani kwaamba ayi abishe liina lyakwe Lesa, alimwi ino nshiinshi shakaswaamo?

¹⁰ Paciindi ici Efa kaacinyumfwila Yehova. Wakalwiita Satana shoonse Lesa nshaakaamba. Wakeelikawo akwaamba ayi tabakalinga kweelete nabibo kucataako kucisamu. Wakalinga kucishi kwaamba ayi Lesa wakabacenjesha ayi na bakalye balaakufwa. Ano Satana wakakumbula ayi: “Teshi mukafweewo sobwe.” (Mata. 3:2-4) Paciindi ici Satana taakalinga kupabo muyeeyo wakwaamba ayi Lesa wakabeca, sombi wakaansabo kubisha liina lyakwe Lesa kwiinda mukulwiita Efa ayi Yehova ngumubeshi. Aboobo Satana wakaba diabolosi na shikubekesha. Efa wakabecekwa cakumaninina mukwiinga wakashoma nshaakaamba Satana. (1 Timo. 2:14) Wakashoma Satana muciindi cakushoma Yehova. Ici cakapa kwaamba ayi Efa aalilwe kusala kabotu. Wakasalawo kutanyumfwila Yehova. Wakatalika kulya cisepo Yehova ncaakamukasha. Pesule, wakapako Adamu.​—Mata. 3:6.

11. Ino nciinshi bashali besu bakutaanguna ncobakalinga kweelete kucita, sombi bakaalilwa kucita nshi?

¹¹ Amuyeeye Efa mbwaakalinga kweelete kukumbula Satana. Naakwiinga wakakumbula ayi: “Nshikushiiwo, ndishibo Lesa wangu Yehova, alimwi ndimusuni abuumbi akumushoma. Ngowakapa Adamu anebo shintu shoonse nshetucite. Ano ino webo inga wesa mukwaamba buyani shibiibi pali nguwe? Swaawo apa!” Yehova naakwiinga wakasangalala abuumbi kunyumfwa maswi aya kuswa kumwanaakwe ngwaasuni abuumbi! (Tus. 27:11) Sombi Efa taakalinga kucitewo lusuno lutamaani pali Yehova, alimwi ubu mbocakalinga akuli Adamu. Mukwiinga tabakalinga kucitewo lusuno lutamaani pali Ishiwabo, Adamu a Efa bakaalilwa kushitilisha liina lyakwe Lesa kukubekeshekwa.

12. Ino nshiinshi Satana nshaakacita shakapa kwaamba ayi Efa atalike kutoonsha Yehova, alimwi ino Adamu a Efa bakaalilwa kucita nshi?

 ¹² Bweenka mbuli mbotwabandikawo kale, Satana wakatalika kubisha liina lyakwe Yehova kwiinda mukwaamba makani akubeca akapa kwaamba ayi Efa atalike kutoonsha na Yehova ngu Mushali uli kabotu. Lyalo Adamu a Efa bakaalilwa kushitilisha liina lyakwe Yehova kukubekeshekwa. Aboobo ici cakapa kwaamba ayi cibe cuubu kunyumfwila Satana akupondokela Ishiwabo. Amunshiku shino Satana alasebensesha nshila mbuli sheeshi. Alapikisha Yehova kwiinda mukwaamba makani akubeca paliina lyakwe. Bantu bashoma bubeshi bwakwe Satana, balakaka bweendeleshi bwakwe Yehova bululeme.

13. Ino lilembo lyakwe Esekelo 36:23 lilatucafwa buyani kushiba makani anene acanika mu Baibo?

¹³ Sa Yehova alaliyumyabo kukubekeshekwa kwakubula kucitawo comwi? Sobwe! Makani oonse ngotucana mu Baibo alatulwiita Yehova nshaakacita kwaamba ayi atondeshe ayi shakaambwa pali nguwe mumuunda wa Edeni shakalinga shakubeca. (Mata. 3:15) Munshila imwi inga twaamba ayi makani ngotucana mu Baibo, alaamba Yehova mbwasalasha liina lyakwe kwiinda mu Bwaami bweendeleshekwa a Mwanaakwe alimwi akuboosha bululami aluumuno pacishi capanshi. Mu Baibo muli makani atucafwa kushiba akunyumfwishisha Yehova mbwasalasha liina lyakwe.​—Amubelenge Esekelo 36:23.

14. Ino Yehova nshaakacita pesule lyakupondoka kwakacitika mumuunda wa Edeni shakasalasha buyani liina lyakwe?

¹⁴ Satana aleelesha kucita nsheenga wacikonsha kwaamba ayi apilinganye kuyanda kwakwe Yehova, sombi lyoonse alaalilwa. Baibo ilatondesha Yehova nshaacita isho shitondesha patupa kwaamba ayi ncakwiila ngu Mushali shilusuno alimwi Mweendeleshi wiinditeewo. Kupondoka kwakwe Satana abaabo boonse bali kulubasu lwakwe, kulamucisa abuumbi Yehova. (Kulu. 78:40) Nacibi boobo, nshaacita kwaamba ayi alwane kupikisha kwakwe Satana shilatondesha ayi ncakwiila ngumusongo, ulakalika moyo, alimwi ulacita shintu munshila yabululami. Watondesha nkusu shakwe shiindaawo munshila shipusenepusene. Alimwi ciinditeewo,  alatondesha lusuno mushintu shoonse nshaacita. (1 Joni 4:8) Yehova watolelela kusebensa kwaamba ayi asalashe liina lyakwe.

15. Ino Satana watolelela buyani kwaamba shibiibi paliina lyakwe Lesa, alimwi ino nshiinshi shaswaamo?

¹⁵ Satana watolelela kwaamba shibiibi paliina lyakwe Lesa. Ulapa kwaamba ayi bantu batalike kutoonsha na ncakwiila Yehova ngushinkusu, ngumululami, ngumusongo, alimwi na ngushilusuno. Kucakubonenaako, Satana ngoolengesha bantu kushoma ayi Yehova teshi Mulengi. Alimwi na bantu balashoma ayi Lesa nkwaali, Satana alabapa kushoma ayi milawo Yakwe Yehova taibete kabotu alimwi taipi bantu lwaanguluko. Kwiilikaawo alayiisha bantu ayi Lesa ngumuyumu moyo na shilunkutwe utenta bantu mumulilo wa helo. Na bantu bashoma bubeshi ubu, cilaba cuubu kukaka bweendeleshi bwakwe Yehova bululeme. Kushikila ciindi Yehova ndyeshi akamunyonyoole, Satana alaakutolelela kwaamba shibiibi pali Yehova, akweelesha kumuyunga ayi amwebo mukake Yehova. Sa alaakuswitilila?

16. Ino nshiinshi nsheenga mwacikonsha kucita Adamu a Efa nshobakaalilwa?

¹⁶ Yehova alasuminisha bantu batamaninite kwaabanamo lubasu mukusalasha liina lyakwe. Aboobo mulicite coolwe ca kucikonsha kucita shakaalilwa Adamu a Efa. Nabi kwaamba ayi tulekala mucishi muswite bantu baamba shakubeca akucobola liina lyakwe Yehova, mulicite coolwe cakutaloonda kucafwa bantu kushiba cancine cakwaamba ayi Yehova ngu Lesa usalalite, ululeme, uli kabotu, alimwi shilusuno. (Isa. 29:23) Inga mwatondesha kwaamba ayi mulisuni kweendeleshekwa anguwe. Inga mwacikonsha kucafwa bantu kunyumfwishisha kwaamba ayi bweendeleshi bwakwe Yehova bweenkabo, mbobululeme cakumaninina alimwi mbweshi bukalete luumuno alusangalalo kushilengwa shoonse.​—Kulu. 37:9, 37; 146:5, 6, 10.

17. Ino nshiinshi Yesu nshaakacita kwaamba ayi acafwe bantu kushiba liina lya Baishi?

¹⁷ Tulakonkela cakubonenaako cakwe Yesu Klistu, kwiinda mukwiimikaninaako liina lyakwe Yehova. (Joni 17:26) Yesu wakacafwa bantu kushiba liina lya Baishi kwiinda mukwaamba paliina ilyo alimwi akubaiisha Yehova mbwaabete. Kucakubonenaako, wakapikisha ba Falisi abo bakalinga kupa kwaamba ayi bantu banoobona anga Yehova ngu Lesa shilunkutwe, upa milawo iyumu, uli kulaale abantu, alimwi utacite nkumbu. Mubupusano, Yesu wakacafwa bantu  kushiba ayi Baishi balapa milawo yuubu, balakalika moyo, balicite lusuno, alimwi balalekelela. Alimwi wakacafwa bantu kushiba Yehova mbwaabete kwiinda mucakubonenaako cakwe ca mibo njaakalinga kutondesha bushiku abushiku.​—Joni 14:9.

18. Ino inga twacita buyani kwaamba ayi tucafwe bantu kushiba ayi shintu shibiibi shaambwa pali Yehova teshi shancine?

¹⁸ Bweenka mbuli Yesu, aswebo inga twacafwa bamwi kushiba cancine pali Yehova, kwiinda mukubaiisha Yehova mbwaabete Lesa shilusuno alimwi ucite nkumbu. Kucita boobo kulacafwa bantu kushiba ayi shintu shibiibi shaambwa pali Yehova teshi shancine. Alimwi ici cilacafwa kusalasha liina lyakwe Yehova mumiyeeyo amumyoyo ya bantu. Alimwi aswebo inga twakonkela mibo yakwe Yehova. Ici inga cakonsheka nabi kwaamba ayi tatumaninite. (Efe. 5:1, 2) Na katutondesha mibo yakwe Yehova kwiinda mushintu nshetwaamba anshetucita, nkokwaamba ayi tutosalasha liina lyakwe. Tulasalasha liina lyakwe Lesa kwiinda mukucafwa bantu kushiba cancine pali nguwe. Alimwi tulatondesha ayi bantu batamaninite inga bacikonsha kutolelela kushomeka kuli Lesa.​—Jobo 27:5.

19. Ino lilembo lyakwe Isaya 63:7 lilatucafwa buyani kushiba cinene ncotweelete kuyuminisha ndyetutokwiisha?

¹⁹ Kuli ashimwi nsheenga twaciita kwaamba ayi tusalashe liina lyakwe Yehova. Liinji ndyetutokwiisha bantu cancine camu Baibo, tulayuminisha bunene pacancine cakwaamba ayi Lesa ngoweelela kweendelesha alimwi ngoocite nkusu shakweendelesha kabotu kwiculu apacishi capanshi. Nacibi boobo, nabi kwaamba ayi kucafwa bantu kushiba milawo yakwe Lesa kulayandika, cinene ncetusuni nkucafwa bantu kwiiya kusuna Yehova mbuli Ishiwesu, alimwi akutolelela kushomeka kuli nguwe. Aboobo tulyeelete kwaamba bunene pamibo yakwe Yehova kwaamba ayi bantu bamushibe kabotu uyo wiimikaninako mibo iyo. (Amubelenge Isaya 63:7.) Kwiisha munshila iyi kulaakutupa kucafwa bantu kusuna Yehova, akumunyumfwila ceebo cakwaamba ayi balisuni kutolelela kushomeka kuli nguwe.

20. Ino tulaakwiiya nshi mumutwi utokonkelaawo?

²⁰ Ino inga twacita buyani kwaamba ayi tushinishe ayi nshetucita ambotwiisha shicafwe bantu kuyeeya shintu shibotu na banyumfwa liina lyakwe Yehova? Tulaakucana cikumbulo kumwiipusho uyu mumutwi utokonkelaawo.