1. Ino nceebonshi Yehova wakalikoshanisha kumushali mwanakashi?

“SA mushali mwanakashi inga waluba mwaana ngwaayamwisha?” Uyu ngomwiipusho Yehova ngwakeepusha muciindi ca mushinshimi Isaya. Alimwi Lesa wakatolelela akwaamba ayi; ‘Ono nabi banakashi aba bamuluba, nebo teshi nkamulubeewo.’ (Isa. 49:15) Liinji Yehova taalikoshanishi kumushali mwanakashi. Nacibi boobo, paciindi ici mbwaakacita. Yehova wakeelanya mbwaalinyumfwa pabasebenshi bakwe kulusuno lucite mushali mwanakashi pabana bakwe. Wakacita boobo mukwiinga wakalinga kusuni basebenshi bakwe kushiba kwaamba ayi alibasuni abuumbi. Nankashi wa liina lya Jasmin wakaamba ayi: “Mushali mwanakashi alaba abushicibusa bulibetele alimwi butamaani amwanaakwe ndyaatookula.” Ncakutatoonsha kwaamba ayi bashali banakashi baanji inga basumina ayi makani aya ngancine.

2. Ino Yehova alalinyumfwa buyani na musebenshi wakwe waboolela mwisule?

² Yehova alashiba na womwi pabana bakwe wacileka kusa kumabungano akwaabanamo lubasu muncito yakushimikila. Aboobo cilyeelete cilamucisa abuumbi na wabona basebenshi bakwe baanji beshikuboolela mwisule * mwaaka amwaaka.

3. Ino Yehova alisuni nshi?

³ Bamakwesu abenankashi baanji bakaboolela mwisule, balaboolela alimwi mulibungano mukuya kwaciindi alimwi tulakondwa abuumbi na bacita boobo! Yehova alisuni kwaamba ayi baboolele, alimwi aswebo ncetusuni. (1 Pita 2:25) Ino inga twacita buyani kwaamba ayi tubacaafwe kuboolela? Katutana kukumbula mwiipusho  uyu, tulyeelete kutaanguna kushiba cipa kwaamba ayi bamwi bacileeke kusa kumabungano alimwi akwaabanamo lubasu muncito yakushimikila.

4. Ino nshiinshi shicitika kubamwi ceebo ca ncito yakumubili?

⁴ Bamwi balasuna bunene incito yakumubili, lyalo akucileka kusebensela Yehova. Mukwesu waliina lya Hung, * ukala kucishi ca Asia wakaamba ayi: “Ndakalinga kusebensa ciindi cilaamfu abuumbi kuncito yakumubili. Ndakalinga kulibeca ayi na nkabe amaali aanji ndyeshi nkanoosebensela kabotu Yehova. Aboobo ndakalinga kusebensa mawoola aanji. Ndakatalika kulofwa kumabungano cakwaamba ayi mukuya kwaciindi ndakacilekela limwi kuyaako. Ndakesa mukubona kwaamba ayi Satana alakusha bantu kuli Lesa paniini paniini kwiinda mukusebensesha cishi cino.”

5. Ino nankashi umwi wakacita buyani ceebo ca mapensho ngaakalinga kwiindaamo?

⁵ Bamakwesu abenankashi bamwi, balaboolela mwisule ceebo cakwiinda mumapensho aanji. Nankashi waliina lya Anne ukala ku Britain ucite baana 5 wakaamba ayi: “Mwanaangu womwi wakashalwa kaali mulema. Mukuya kwaciindi mwanaangu mwanakashi womwi wakakushikwa mulibungano, alimwi uyu umwi musankwa wakaciswa bulwashi bwa kubongo. Ndakalisukama abuumbi cakwaamba ayi ndakacileka kucanika kumabungano akushimikila. Aboobo mukuya kwaciindi ndakaboolela mwisule.” Tulanyumfwa nkumbu abuumbi pamapensho akacitikila nankashi Anne amukwashi wakwe, alimwi tulalinyumfwa cibiibi abuumbi kubamakwesu abenankashi boonse batokwiinda mumapensho mbuli aya!

6. Ino kutakonkela shaamba Bene Kolose 3:13 inga kwapa buyani muntu kuboolela mwisule?

⁶ Amubelenge Bene Kolose 3:13. Basebenshi bakwe Yehova bamwi bakaboolela mwisule ceebo ca kukalashikwa aumwi mulibungano. Mutumwi Paulo wakaamba ayi ncakwiila cimwi ciindi mukwesu na nankashi inga ‘watukalasha.’ Alimwi mpashi akutucitila shintu shitabete kabotu. Na tatuna kucenjela inga twawita mukoose kakubikila mfundilishi. Kubikila mfundilishi inga kwapa kwaamba ayi muntu atalike kulitalamusha kuswa kubantu bakwe Lesa. Amunyumfwe shakacitikila mukwesu waku South America waliina lya Pablo. Bakamubekesha ayi wacita cilubo alimwi bamanene bakashoma ayi ncakwiila, aboobo bakamululika akumukusha pamikuli njaakalinga kucite mulibungano. Ano ino wakacita buyani? Wakaamba ayi: “Ndakakalala alimwi mukuya kwaciindi, ndakaboolela mwisule.”

7. Ino nshiinshi sheenga shacitika na muntu kapensheshekwa anjeelacaamba?

⁷ Na muntu wakacitawo cilubo cinene kale kale, inga watolelela kulipa mulandu kwaciindi cilaamfu. Mpashi inga kaalinyumfwa ayi Lesa taamusuniiwo. Alimwi nabi kwaamba ayi wakaana lyalo akutondeshekwa nkumbu, inga kaalibona anga taeeleli kuba mulikoto lyakwe Lesa. Ubu mbwaakalinga kulinyumfwa mukwesu waliina lya Francisco. Wakaamba ayi: “Ndakalulikwa ceebo cakucita bulale. Nabi kwaamba ayi pesule lyakululikwa ndakatolelela kucanika kumabungano, ndakalisukama abuumbi cakwaamba ayi ndakatalika kulinyumfwa ayi nsheeleli kuba mulibungano lyakwe Yehova. Njeelacaamba yakalinga kumpensha alimwi ndakalinga kubona anga Yehova taakwe kundekelela. Aboobo mukuya kwaciindi ndakacileka kubungana.” Ino mulalinyumfwa buyani pabamakwesu abenankashi batokwiinda mumapensho mbuli aya ngotwabandikawo? Sa mulalinyumfwa cibiibi pa shakabacitikila? Alimwi ciinditeewo abuumbi, ino Yehova alalinyumfwa buyani?

8. Sa Yehova alabalubaako abo bakaboolela mwisule? Amusansulule.

⁸ Yehova tabalubiiko abo boonse bakaboolela  mwisule. Alimwi talubiiwo ncito nshobakasebensa kabatana kuboolela mwisule. (Ebul. 6:10) Mushinshimi Isaya wakalemba cikoshanyo cibotu abuumbi kwaamba ayi atondeshe Yehova mbwaabikila maano kubantu bakwe. Wakalemba ayi: ‘Ulaakunoolama litanga lyakwe lya mbelele bweenka mbuli mweembeshi. Ulaakufukatila twaana twa mbelele mumaansaakwe; alimwi ulaakutunyamwita pacaamba cakwe.’ (Isa. 40:11) Ino Yehova Mweembeshi Munene alalinyumfwa buyani na womwi wabasebenshi bakwe wacileka kumusebensela? Yesu wakasansulula Yehova mbwaalinyumfwa ndyaakepusha bashikwiiya bakwe ayi: ‘Ino mutoyeeya buyani? Na muntu kaacite mbelele shili 100, ono yomwi yasoweka, sa inga taashiyi sheesho shili 99 mutulundu, akuya mukuyandoola yeeyo yasoweka? Na weecana, ntoomulwiita calushinisho ayi ulakondwa abuumbi pa mbelele yomwi ilya, kwiinda sheesho shili 99 shitakwe kusoweka.’​—Mate. 18:12, 13.

9. Ino beembeshi bali kabotu muciindi camu Baibo bakalinga kulama buyani mbelele shabo? (Amubone cikope cili pa peeji yakutaanguna.)

⁹ Ino nceebonshi nceenga twakoshanisha Yehova ku mweembeshi? Inga twacita boobo mukwiinga muciindi camu Baibo mweembeshi wakalinga kubikila maano abuumbi ku mbelele shakwe. Kucakubonenaako, Defedi wakalwana nkalamu alimwi abeya kwaamba ayi ashitilishe litanga lyakwe. (1 Samwe. 17:34, 35) Mweembeshi mubotu ulashiba na mulitanga mwasoweka mbelele nabibo yomwi. (Joni 10:3, 14) Mweembeshi wa mushobo uyu ulashiya mbelele 99 mucimpati na mumaansa a mweembeshinyina akuya mukulangoola yasoweka. Yesu wakaamba cikoshanyo ici ndyaakalinga kwiisha cancine ciyandika abuumbi. Wakaamba ayi: ‘Bata bali kwiculu tabasuni kwaamba ayi, womwi wa baaba baniini alobe.’​—Mate. 18:14.

10. Kweelana a Esekelo 34:11-16, ino Yehova wakashomesha ayi alaakucita nshi ku mbelele shakwe shakasoweka?

¹⁰ Yehova alitusuni soonse kwiilikaawo “abaniini” bakaboolela mwisule. Kwiinda mu maswi akaamba mushinshimi Esekelo, Lesa wakashomesha ayi alaakulangoola mbelele shakwe shakasoweka akushicafwa kuyumya bushicibusa anguwe alimwi. Alimwi wakaamba ansheshi akacite kwaamba  ayi apulushe mbelele shakwe, bweenka mbuli bwakalinga kucita mweembeshi wamuciindi ca bene Isilaeli na mbelele yasoweka. (Amubelenge Esekelo 34:11-16.) Cakutaanguna, mweembeshi wakalinga kulangoola mbelele, ico cakalinga kuyandika ciindi alimwi ankusu. Lyalo na waicana, wakalinga kwiibwesa akwiiboosha mulitanga. Kwiilikaawo, na wacana ayi mbelele yakalicisa na mpashi ilifwite nsala, wakalinga kwiilama kabotu kwiinda mukuyanga shilonda, kwiinyamuna, akwisanina. Abamanene mulibungano, beembeshi ba “litanga lyakwe Lesa,” mbobeelete kucita kwaamba ayi bacafwe uli woonse mulibungano wakaboolela mwisule. (1 Pita 5:2, 3) Balalangoola baabo bakaboolela mwisule, kubacafwa kuboolela mulitanga, alimwi akubatondesha lusuno kwiinda mukupa lucafwo lwakumushimu luyandika. *

11. Ino mweembeshi mubotu alashiba nshi?

¹¹ Mweembeshi mubotu alashiba kwaamba ayi mbelele inga yasoweka. Alimwi na mbelele yaswa mulitanga, mweembeshi mubotu taanishi mbelele iyo. Atubandike cakubonenaako cakwe Lesa mbwaakacafwa basebenshi bakwe bakalinga bacileka kumusebensela kwakaciindi.

12. Ino Yehova wakacita buyani Jona ndyaatakwe kumunyumfwila?

¹² Mushinshimi Jona taakwe kunyumfwila Yehova ndyaakamutuma kuya ku Ninife. Nacibi boobo, Yehova taakwe kusuula Jona. Mbuli mweembeshi mubotu, Yehova wakapulusha Jona akumupa kutaloonda nkwakalinga kuyandika kwaamba ayi akumanishe ncito njaakamupa. (Jona 2:7; 3:1, 2) Paciindi cimwi, Lesa wakasebensesha cishango kwaamba ayi acafwe Jona kunyumfwishisha kuyandika kwa buumi bwa muntu womwi awomwi. (Jona 4:10, 11) Ino nciinshi ncetutokwiiyawo? Bamanene tabeelete kusuula baabo bakaboolela mwisule. Sombi balyeelete kweelesha kunyumfwishisha cakapa kwaamba ayi mbelele iswe mulitanga. Alimwi na mbelele yaboolela kuli Yehova, bamanene balyeelete kutolelela kutondesha lusuno akubikila maano.

13. Ino nshiinshi nsheenga tweeya kucakubonenaako cakwe Yehova, mbwaakacita pamakani akaamba wakalemba Kulumbaisha 73?

¹³ Wakalemba Kulumbaisha 73 wakalefuka paciindi cimwi, ndyaakabona bamucita shibiibi kababoneka  anga tabaciteewo mapensho. Wakatalika kutoonsha na kusebensela Yehova kwakalinga kucite mpindu. (Kulu. 73:12, 13, 16) Ino Yehova wakacita buyani? Taakwe kumusuula. Aboobo wakapa kwaamba ayi shakaamba musankwa uyu shilembwe mu Baibo. Mukuya kwaciindi, musankwa uyu wakalemba kulumbaisha wakesa mukushiba kwaamba ayi kuba abushicibusa bubotu a Yehova, ncecintu cicite mpindu kwiinda pashintu shili shoonse muntu nsheenga wabaasho. (Kulu. 73:23, 24, 26, 28) Ino nciinshi ncetutokwiiyawo? Bamanene tabeelete kufwambaana koombolosha baabo batoonsha na kusebensela Yehova kulicite mpindu. Muciindi cakubasuula, bamanene balyeelete kushiba capa kwaamba ayi muntu anoocita na kwaamba shitondesha ayi alatonsha mpindu yakusebensela Yehova. Lyalo ndyeenga bamuyuminisha kwiinda mukusebensesha Malembo eenga amucafwa.

14. Ino nceebonshi Elija wakalinga kuyandika lucafwo, alimwi ino Yehova wakamucafwa buyani?

¹⁴ Mushinshimi Elija wakacica ceebo ca Jesebelo muka mwaami. (1 Baami 19:1-3) Wakalinga kuyeeya ayi wacaalabo eenka mbuli mushinshimi wakwe Yehova, alimwi wakalinga kulinyumfwa anga incito yakwe yakayabo mumaanshi. Elija wakalefuka abuumbi cakwaamba ayi wakalinga kusunibo kufwa. (1 Baami 19:4, 10) Muciindi cakumusuula, Yehova wakacafwa Elija kushiba kwaamba ayi taakalinga eenka, Lesa wakalinga kulibambite kumucafwa, alimwi wakamulwiita ayi kwakalinga ncito shiinji nshaakalinga kweelete kusebensa. Yehova wakakutika cankumbu Elija ndyaakalinga kwaamba pakulisukama kwakwe, lyalo wakamupa ncito shimwi shipya. (1 Baami 19:11-16, 18) Ino nciinshi ncetutokwiiyawo? Soonse tulyeelete kuba ankuumbu ku mbelele shakwe Yehova, bunene bunene bamanene. Inga caba ayi  muntu wakalala na kulinyumfwa ayi Yehova teshi akamulekeleleewo, bamanene balyeelete kukutika ndyaatosansulula mbwaatoolinyumfwa. Lyalo balyeelete kweelesha kumuyuminisha kushiba kwaamba ayi Yehova alimusuni.

15. Kweelana a Joni 6:39, ino Yesu wakalinga kushibona buyani mbelele sha Baishi?

¹⁵ Ino Yehova alisuni ayi tunooshibona buyani mbelele shakwe shakasoweka? Inga tweeya kuswa kucakubonenaako cakwe Yesu. Wakalinga kucishi kwaamba ayi mbelele shoonse shilayandika abuumbi kuli Yehova, aboobo wakacita nsheenga wacikonsha kwaamba ayi acafwe “mbelele shisowekete sha mushobo wa bene Isilaeli” kuboolela kuli Yehova. (Mate. 15:24; Luka 19:9, 10) Mbuli mweembeshi mubotu, Yesu wakacita nsheenga wacikonsha kwaamba ayi mbelele yakwe Yehova nabi yomwi itasoweki.​—Amubelenge Joni 6:39.

16-17. Ino bamanene balyeelete kulinyumfwa buyani pamakani akucafwa baabo bakaboolela mwisule? (Amubone kabokosi kacite mutwi utokwaamba ayi “ Mbweenga Mbelele Yakasoweka Yalinyumfwa.”)

¹⁶ Mutumwi Paulo wakayuminisha bamanene bamulibungano lyaku Efeso kukonkela cakubonenaako cakwe Yesu. Wakaamba ayi, ‘Mulyeelete kucafwa baabo batacite nkusu alimwi lyoonse kamwiibaluka maswi akaamba Mwaami Yesu ayi: ‘Kupa kulaleta lusangalalo kwiinda kupekwa.’’ (Milimo 20:17, 35) Aboobo kweelana ashaamba lilembo ili, bamanene munshiku shino balicite mukuli uyandika abuumbi wakulama kabotu bantu bakwe Yehova. Mukwesu Salvador munene mulibungano ku Spain wakaamba ayi: “Na ndayeeya Yehova mbwaabikila maano ku mbelele shakwe shakasoweka, ndayuminishikwa kucita nsheenga ndacikonsha kwaamba ayi nshicaafwe. Mbuli mweembeshi wakumushimu, ndicishi kwaamba ayi Yehova alisuni ayi nooshibikila maano.”

¹⁷ Bamakwesu abenankashi boonse bakalinga baboolela mwisule mbotwaambawo mumutwi uyu, bakacafwikwa akuboolela kuli Yehova. Alimwi apacecino ciindi kuli baanji bakaboolela mwisule beenga basuna kuboola. Mumutwi utokonkelaawo tulaakubandika nsheenga twaciita kwaamba ayi tubacaafwe kuboolela kuli Yehova.