1. Ino ngumulawo nshi Yesu ngwakapa bashikwiiya bakwe? (Amubone cikope cili pa peeji yakutaanguna.)

MASHIKU kaatana kucaikwa, Yesu wakapa bashikwiiya bakwe mulawo wakwaamba ayi: “Bweenka mboomusuni nebo, amwebo mulyeelete kusunana.” Wakatolelela akwaamba ayi: “Mukwiinga na kamusunene​—bantu boonse balaakwishiba ayi muli bashikwiiya bangu.”​—Joni 13:34, 35.

2. Ino nceebonshi kusunana ncintu ciyandika abuumbi?

² Yesu wakaamba ayi na bashikwiiya bakwe kabasunene bweenka mbuli mbwaakalinga kubasuni, bantu balaakushiba ayi mbashikwiiya bakwe bancinencine. Ubo mbocakalinga ku Beneklistu bamuciindi ca batumwi alimwi mbocibete amunshiku shino. Aboobo kusunana ncintu ciyandika abuumbi nabi kwaamba ayi teshi cuubu kucita boobo!

3. Ino tutokwiiya nshi mumutwi uyu?

³ Teshi cuubu kutondesha lusuno ku umwi amubye mukwiinga soonse tatumaninite. Nacibi boobo, tulyeelete kweelesha cankusu kukonkela cakubonenaako cakwe Klistu. Mumutwi uyu tutokwiiya lusuno mbweenga lwatucafwa kuba muluumuno, kutasalululana alimwi akutondesha mushimu wakutambula beensu. Ndyetutobandika mutwi uyu, amuliipushe ayi: ‘Ino nshiinshi nsheenga ndeeya kuswa kucakubonenaako ca bamakwesu abenankashi abo batolelela kutondesha lusuno ku umwi amubye nabi ndyebatokwiinda mumapensho?’

4. Kweelana a Mateyo 5:23, 24, ino nceebonshi tulyeelete kunyumfwana amukwesu watubishisha na ngotwabishisha?

⁴ Yesu wakatwiisha kuyandika kwa kunyumfwana amukwesu wakatukalasha na ngotwakakalasha. (Amubelenge Mateyo 5:23, 24.) Wakayuminisha ayi tulyeelete kutolelela kunyumfwana abamwi na  tulisuni kusangalasha Lesa. Yehova alakondwa na katweelesha cankusu kwaamba ayi tube muluumuno abamakwesu. Teshi akatambulewo kupaila kwesu na katubikila bamwi mfundilishi akukaka kubalekelela.​—1 Joni 4:20.

5. Ino nciinshi cakapa kwaamba ayi cibe ciyumu kumukwesu Mark kunyumfwana amukwesu umwi?

⁵ Ino nceebonshi cimwi ciindi nciyumu kuba muluumuno abamwi? Amuleke tubandike shakacitikila mukwesu Mark. * Wakakalashikwa mukwesu umwi ndyakaambakwe cabukali, akwaamba shibiibi pali nguwe kubamwi mulibungano. Ano ino wakacita buyani? Wakaamba ayi: “Ndakaalilwa kulicata aboobo ndakakalala.” Ndipakeenda ciindi, mukwesu Mark wakalinyumfwa cibiibi ceebo ca mbwakalinga wakalala, aboobo wakaya ku mukwesu kwaamba ayi asenge kulekelelwa. Ano mukwesu uyo umwi wakakaka. Mukwesu uyo ndyaakacita boobo, mukwesu Mark wakayeeya ayi, ‘Ancileekebo kweelesha kunyumfwana amukwesu uyu mukwiinga taasuniiwo.’ Nacibi boobo, mutanjilili walubasu wakayuminisha mukwesu Mark ayi taeelete kucileka kweelesha. Ino mukwesu Mark wakacita buyani?

6. (a) Ino mukwesu Mark wakacita buyani kwaamba ayi abe muluumuno? (b) Ino mukwesu Mark wakacita buyani kwaamba ayi akonkele makani ngotucana pa Bene Kolose 3:13, 14?

⁶ Mukwesu Mark ndyaakakala panshi akuyeeya mbwabona shintu, wakesa mukubona ayi cimwi ciindi ulalibona kuba ululeme kwiinda bamwi. Aboobo wakeshiba ayi wakalinga kweelete kwaalula mbwaalibona. (Kolo. 3:8, 9, 12) Wakabolelako kumukwesu alimwi kwaamba ayi asenge kulekelelwa. Wakeelikawo akulemba nkalata ku mukwesu uyo umwi yakusenga kulekelelwa akumulwiita ayi alisuni kwaamba ayi batolelele kuba beshicibusa. Mukwesu Mark wakatolela mukwesu uyo ashipo nshaakalinga kuyeeya ayi mpashi nshaasuni. Ano cakabicaako ncakwaamba ayi mukwesu uyo umwi wakakaka kumulekelela. Nacibi boobo, mukwesu Mark wakatolelela kukonkela mulawo wakaamba Yesu wakwaamba ayi mulyeelete kusunana akulekelelana. (Amubelenge Bene Kolose 3:13, 14.) Na tulisuni bantu bweenka mbuli Yesu mbwakalinga kubasuni, tulaakutolelela kubalekelela  akubapaililaako kwaamba ayi tukatalike kunyumfwana alimwi.​—Mate. 18:21, 22; Gala. 6:9.

7. (a) Ino Yesu wakatuyuminisha kucita nshi? (b) Ino mbukaalo nshi buyumu nankashi umwi mbwakeendaamo?

⁷ Yesu wakayuminisha ayi tulyeelete kucitila bamwi shintu nshetusuni ayi aswebo batucitile. Lyalo wakaamba ayi tatweelete kutondeshabo lusuno kubaabo batusuni. (Luka 6:31-33) Nabi kwaamba ayi liinji tashicitiki, ino inga mwacita buyani na umwi mulibungano taasuniiwo kwaamba andimwe nabibo kumwaansha? Ishi nsheshakacitikila nankashi Lara. Wakaamba ayi: “Nankashi umwi taakalinga kusuniiwo kwaamba andime, alimwi nshindakalinga kucishiwo cakalengesha. Ndakalinyumfwa cibiibi abuumbi cakwaamba ayi nshindakalinga kunyumfwa kabotu kuya kumabungano.” Pakutaanguna, nankashi Lara wakayeeya ayi: ‘Taakuwo ncendakamubishisha. Alimwi bamwi mulibungano balishi ayi nankashi uyu mbwaabete.’

8. Ino nankashi Lara wakacita buyani kwaamba ayi anonyumfwana anankashi umwi, alimwi ino tutokwiiyawo nshi?

⁸ Nankashi Lara wakacitawo comwi kwaamba ayi abe muluumuno a nankashi uyo. Wakapaila kuli Yehova akuya mukubandika a nankashi uyo. Lyalo bakabandikishanya palipenshi ndyebakalinga kucite, bakakumbatana, akutalika kunyumfwana. Aboobo cakaboneka anga lipenshi lyamana. Ano mukuya kwaciindi nankashi Lara wakaamba ayi: “Nankashi ulya wakacileka kuŋambosha alimwi. Ndakalinyumfwa kulefuka abuumbi.” Pakutaanguna, nankashi Lara wakalinyumfwa ayi shintu inga shababo kabotu na nankashi uyo umwi wacinja mibo yakwe. Nacibi boobo, mukuya kwaciindi nankashi Lara wakesa mukubona ayi cintu cibotu nceenga wacita nkutolelela kumutondesha lusuno nankashi uyo ‘akumulekelela’. (Efe. 4:32–5:2) Nankashi Lara wakesa mukwiibaluka cancine cakwaamba ayi lusuno lwa Bwineklistu ‘talubikili mfundilishi. Lulalekelela mushintu shoonse, lulashoma shintu shoonse, lulalangila shintu shoonse, alimwi lulaliyumya mushintu shoonse.’ (1 Koli. 13:5, 7) Nankashi Lara wakacileka kulisukama pamakani aya. Alimwi mukuya kwaciindi nankashi ulya umwi wakacileka nshaakalinga kucita akutalika kunyumfwana a nankashi Lara. Na kamuyuminisha luumuno pakati ka bamakwesu abenankashi akutolelela kubatondesha  lusuno, “Lesa shilusuno alimwi shiluumuno alaakuba andimwe.”​—2 Koli. 13:11, NWT.

9. Kweelana a Milimo 10:34, 35, ino nceebonshi tatweelete kuba akasalulushi?

⁹ Yehova taasalululi. (Amubelenge Milimo 10:34, 35.) lnga twatondesha ayi tuli bana bakwe na aswebo katutasalululi. Tulakonkela mulawo wakusuna babyesu bweenka mbotulisuni, akutolelela kuyuminisha luumuno luli mumukwashi wesu wakumushimu.​—Loma. 12:9, 10; Jemu. 2:8, 9.

10-11. Ino nankashi umwi wakacita buyani kwaamba ayi acileeke kuyeeya shibiibi pabamakwesu bakucishi cimwi?

¹⁰ Teshi cuubu kubamwi kuleya kuba akasalulushi. Kucakubonenaako, atubandike shakacitikila nankashi Ruth. Ndyaakalinga mwanike, muntu umwi wakaswa kucishi cimwi wakamukalasha. Ino ici cakamupa kulinyumfwa buyani? Wakaamba ayi: “Ndakalinga kubapatite bantu boonse bakucishi cilya. Ndakalinga kuyeeya ayi bantu boonse bakucishi cilya balibo comwi comwi, kwiilikaawo abamakwesu abenankashi.” Ino nciinshi cakacafwa nankashi uyu kwaalula mbwaakalinga kuyeeya?

¹¹ Nankashi Ruth wakesa mukushiba kwaamba ayi wakalinga kweelete kusebensa cankusu kwaamba ayi aalule mbwaakalinga kuyeeya. Wakabelenga makani akalinga kwaamba shakucishi uko, kuswa mulibuku lya Yearbook. Lyalo wakaamba ayi: “Ndakeelesha cankusu kwaamba ayi ntalike kuyeeya pashintu shibotu pabantu bakucishi cilya. Alimwi ndakatalika kubona ayi bamakwesu abenankashi bakucishi cilya bakalinga kusebensela Yehova cankusu. Lyalo ndakabona patuba kwaamba ayi abalo ndubasu lwa bamakwesu abenankashi mbotucite nsengwe yoonse.” Mukuya kwaciindi, nankashi Ruth wakesa mukushiba kwaamba ayi wakalinga kweelete kutondesha lusuno. Wakaamba ayi: “Lyoonse na ndakumanya bamakwesu abenankashi bakaswa kucishi cilya, ndakalinga kweelesha cankusu kutondesha bushicibusa. Ndakalinga kubandikaabo kwaamba ayi mbashibe kabotu.” Ino nshiinshi shakaswaamo mukucita boobo? Nankashi Ruth wakaamba ayi: “Mukuya kwaciindi, ndakacileka kuyeeya shibiibi pabamakwesu bakucishi cilya.”

12. Ino ndipenshi nshi nankashi Sarah ndyaakalinga kucite?

¹² Bamwi inga baba akasalulushi balo kwakuteshiba. Kucakubonenaako, nankashi Sarah wakalinga kubona anga taacitewo kasalulushi mukwiinga taakalinga kubona muntu kweelana amushobo, maali ngaacite, na mukuli ngweenga kaacite mulibungano. Nacibi boobo wakaamba ayi: “Ndakatalika kubona ayi anu ndicite kasalulushi.” Ino nciinshi cakatondesha ayi ncakwiila wakalinga kucite kasalulushi? Nankashi Sarah wakakulila mumukwashi wa bantu beeite abo bakalinga kusunibo kucanika a bantu beeite. Bushiku bumwi wakalwiita mubyaakwe ayi: “Nebo ndisuni kucanika abamakwesu abenankashi beeite. Nshisuniiwo kuba pomwi abaabo bateiite.” Cakutatoonsha, nankashi uyu wakalinga kuyandika kwaaluka. Munshila nshi?

13. Ino nshiinshi nshetutokwiiya kucakubonenaako cakwe nankashi Sarah mbwakaaluka?

¹³ Mutanjilili walubasu wakacafwa nankashi Sarah kwaalula mbwabona shintu. Wakaamba ayi: “Wakandumba ceebo cakusebensela Yehova cakushomeka, kukumbula kabotu kumabungano, alimwi akushiba kabotu Malembo. Lyalo wakandwiita ayi lushibo lwesu ndyelutooya panembo, tulyeelete kunooba amibo ya Bwineklistu mbuli kuliceesha, kulibombya, alimwi ankuumbu.” Nankashi Sarah wakacita kweelana amutanjilili walubasu mbwaakamuyuminisha. Wakaamba ayi: “Ndakesa mukushiba kwaamba ayi cintu cinene ciyandika abuumbi nkutondesha lusuno ankuumbu.” Aboobo wakatalika kubona bamakwesu abenankashi munshila ipusene ambwaakalinga kubabona kale kale. Wakaamba ayi: “Ndakatalika kweelesha kulanga pamibo ipa kwaamba ayi Yehova anoobabona ayi balayandika.” Ino nshiinshi nshotutokwiiyawo? Tatweelete kunoolibona ayi tuliindite bamwi ceebo ca lwiiyo ndotucite! Na ‘tulibasuni abuumbi bamakwesu abenankashi  boonse,’ tulaakuleya kuba akasalulushi.​—1 Pita 2:17.

14. Kweelana a Bene Ebulu 13:16, ino Yehova alanyumfwa buyani na katutondesha mushimu wakutabumbula beensu?

¹⁴ Yehova alakondwa na katutondesha mushimu wakutambula beensu. (Amubelenge Bene Ebulu 13:16.) Kucita boobo alakubona kuba lubasu lwakupaila, bunene bunene na twacafwa baabo babulishite. (Jemu. 1:27; 2:14-17) Nceceeco Malembo ncatuyuminishila ayi, ‘kamutambula beensu camaansa obilo.’ (Loma. 12:13) Kutambula beensu kulatupa coolwe cakutondesha ayi tulabikila maano kubamwi, tulibasuni, alimwi tulisuni kuba beshicibusa babo. Yehova alakondwa na twaabilako bamwi shakulya, shakunwa na kucana ciindi cakubaabo pomwi. (1 Pita 4:8-10) Nacibi boobo, kulaba shimwi shipa kwaamba ayi cibe ciyumu kutambula beensu.

15-16. (a) Ino nciinshi cipa bamwi kuwayawaya kutambula beensu? (b) Ino nciinshi cakacafwa nankashi Edit kutondesha mushimu wakutambula beensu?

¹⁵ Inga twawayawaya kutabumbula beensu ceebo ca bukaalo bwesu. Kucakubonenaako, atubandike shakacitikila nankashi mukalubinje Edit. Kaatana kuba Kamboni, taakalinga kusuni bunene kubandika abantu. Nankashi uyu wakalinga kuyeeya ayi inga taacikoonshi kutambula beensu.

¹⁶ Ano ndyaakaba Kamboni, wakacileka kuyeeya boobo. Wakeelesha kucita nsheenga wacikonsha kwaamba ayi atondeshe mushimu wakutambula beensu. Wakaamba ayi: “Ndyekwakalinga kuyaka Ŋanda ya Bwaami, munene umwi wakandwiita ayi kuli beebene bomwi batoosa mukutucafwa anciito yakuyaka, aboobo wakasenga na inga bekalako kuŋanda kumishesu kwa nsondo shobilo. Ndakeebaluka Yehova mbwakapa shoolwe mukalubinje waku Salefati.” (1 Baam. 17:12-16) Nankashi Edit wakasumina kutambula beebene abo. Ano sa wakacana shoolwe? Wakaamba ayi: “Muciindi cakukalaabo nsondo shobilo, ndakeekalaabo myeenshi yobilo. Twakekalabo anga ngumukwashi womwi.” Alimwi mulibungano nankashi Edit wakaba abeshicibusa baanji. Pacecino ciindi nankashi uyu ngu painiya waciindi coonse, alimwi bamakwesu abenankashi mbwaasebensaabo muncito yakushimikila, balaya mukumufwakashila  kuŋanda yakwe. Wakaamba ayi: “Kwaabilako bamwi kulampa kuba alusangalalo! Alimwi ndacaana shoolwe ashimwi shiinji.”​—Ebu 13:1, 2.

17. Ino mukwesu Luka amukaakwe bakesa mukwiibaluka nshi?

¹⁷ Mpashi tulicite kale mushimu wakutambula beensu, ano sa kuli ashimwi nsheenga twanungaawo? Kucakubonenaako, mukwesu Luka amukaakwe, mbantu bacite mushimu wakutambula beensu. Liinji bakalinga kusuni kwiitako bashali baabo, beshikamukowa, beshicibusa, alimwi amutanjilili walubasu amukaakwe. Nacibi boobo, mukwesu Luka wakaamba ayi, “Twakesa mukubona ayi twakalinga kwiitabo bantu mbotwakalinga kushibeneabo.” Ino bakacita buyani kwaamba ayi batole panembo mushimu wabo wakutambula beensu?

18. Ino mukwesu Luka amukaakwe bakacita buyani kwaamba ayi batole panembo mushimu wabo wakutambula beensu?

¹⁸ Mukwesu Luka amukaakwe bakeeya shiinji pamakani akutambula beensu ndyebakayeeya pamaswi akaamba Yesu ayi: “Ono na kamusunibo bantu abo bamusuni, nkokwaamba ayi ncilambu nshi nceenga mwatambula?” (Mate. 5:45-47) Bakesa mukushiba ayi bakalinga kuyandika kukonkela cakubonenaako cakwe Yehova, uyo utondesha bwaabi kumuntu uli woonse. Aboobo bakatalika kwiitako bamakwesu abenankashi bamwi mbobatana kwiitawo kale. Mukwesu Luka wakaamba ayi: “Pacecino ciindi tulasangalala kuba pomwi abamakwesu abenankashi bapusenepusene. Tulayuminishanya abuumbi alimwi bushicibusa bwesu bwayuminaako.”

19. Ino inga twacita buyani kwaamba ayi tutondeshe ayi tuli bashikwiiya bakwe Yesu, alimwi ino nshiinshi nshomushinishite kucita?

¹⁹ Tweeya kutondesha lusuno ku umwi amubye mbweenga kwatucafwa kunyumfwana abamwi, kutaba akasalulushi, alimwi akutondesha mushimu wakutambula beensu. Tatweelete kunoyeeya shibiibi pabamakwesu abenankashi, sombi tulyeelete kubasuna abuumbi kuswa panshi lya moyo. Kucita boobo kulaakutupa kuba alusangalalo alimwi tulaakutondesha ayi ncakwiila tuli bashikwiiya bakwe Yesu bancinencine.​—Joni 13:17, 35.