1-2. Kweelana a Milimo 8:27-31, 35-38, ino nciinshi cakapa kwaamba ayi mwine Isopya abombekwe?

SA mulisuni kubombekwa akuba shikwiiya wakwe Klistu? Kusuna Yehova alimwi akumulumba kwapa kwaamba ayi bantu baanji basalewo kucita boobo. Amuleke tubandike cakubonenaako ca mweendeleshi wakalinga kusebensela mwaami mwanakashi waku Isopya.

² Mwine Isopya ndyaakeeyabo kuswa mu Malembo kwaamba ayi alyeelete kubombekwa, taakwe kuwayawaya. (Amubelenge Milimo 8:27-31, 35-38.) Ino nciinshi cakamupa kucita boobo? Ncakutatoonsha kwaamba ayi wakabona kuyandika kwa Maswi akwe Lesa ngaakalinga kubelenga kuswa mulibuku lyakwe Isaya, ndyaakalinga palweendo kaatantite mucikoci. Alimwi Filipi ndyaakamusansulwita nshaakalinga kubelenga, musankwa uyu wakalumba abuumbi pasheesho Yesu nshaakamucitila. Ano ino musankwa uyu wakalinga waya mukucita nshi ku Jelusalemu? Musankwa ulya wakalinga kumusuni kale Yehova. Ino nciinshi ncetwaambila boobo? Mukwiinga wakalinga kuya ku Jelusalemu mukupaila Yehova. Musankwa uyu alyeelete wakacileka kupaila nkwakalinga kupaila kale kale, akuba kulubasu lwa mushobo wakalinga kulyaabite kuli Lesa wancinebo eenka. Kusuna Yehova nkokwakapa kwaamba ayi asaleewo kubombekwa akuba shikwiiya wakwe Klistu.​—Mate. 28:19.

3. Ino nshiinshi sheenga shapa kwaamba ayi muntu aalilwe kubombekwa? (Amubone kabokosi katokwaamba ayi “ Ino Nciinshi Cili mu Moyo Wanu?”)

³ Kusuna Yehova inga kwamupa kwaamba ayi musune kubombekwa. Nacibi boobo, lusuno lweenka alimwi inga lwapa kwaamba ayi mwaalilwe kubombekwa. Munshila nshi?  Atubandike shakubonenaako. Mpashi mulisuni bunene beshikamukowa banu abeshicibusa bateshi Bakamboni, aboobo mulalisukama ayi na mubombekwe balaakumupata. (Mate. 10:37) Na mpashi kuli shintu shimwi nshomusuni kucita sombi Lesa ulishipatite, alimwi mpashi mulaalilwa kushileka. (Kulu. 97:10) Na mpashi kuswabo kubwanike mulisuni shakusekelela shimwi shikumite bupailishi bwakubeca. Mpashi kuli nshomwiibaluka shipa kwaamba ayi munokondwa akusekelela uko. Ishi inga shapa kwaamba ayi cibe ciyumu kucileka kukonkela milawo njaapatite Yehova. (1 Koli. 10:20, 21) Aboobo inga mwaliipusha ayi, “Ino nshiinshi na mbaani mbonjeelete kusuna abuumbi?”

4. Ino nciinshi cinene ceenga camupa kwaamba ayi mubombekwe?

⁴ Kuli shintu shiinji shiyandika nsheenga mwasuuna. Kucakubonenaako, mpashi mwakalinga kusuni kale Maswi akwe Lesa nabi kamutana kutalika kwiiya Baibo a Bakamboni Bakwe Yehova. Alimwi mpashi a Yesu mwakalinga kumusuni kale. Alimwi kuswabo ciindi ndyemwakashiba Bakamboni Bakwe Yehova mulyeelete mulanyumfwa kabotu kucanikaabo pomwi. Nacibi boobo, kusunabo shintu ishi inga takumupi kusuna kulyaaba kuli Yehova akubombekwa. Cintu cinene ceenga camupa kusuna kubombekwa nkusuna Yehova Lesa. Na mwasuna Yehova kwiinda cintu cimwi cili coonse, taakuwo muntu nabi cintu cili coonse ceshi cikape kwaamba ayi mwaalilwe kumusebensela. Kusuna Yehova kulaakumupa kubombekwa akumucafwa kutolelela kushomeka kuli nguwe pesule lyakubombekwa.

5. Ino njimiipusho nshi njeshi tubandike?

⁵ Yesu wakaamba ayi tulyeelete kusuna Yehova amoyo wesu woonse, buumi bwesu boonse, miyeeyo yesu yoonse, alimwi ankusu shesu shoonse. (Maako 12:30) Ino inga mwacita buyani kwaamba ayi musune Yehova abuumbi akumulemeka? Kuyeeya bunene Yehova mbwatutondesha lusuno inga kwatucafwa kumusuna. (1 Joni 4:19) Ino nshiinshi shimwi nsheshi mukasunishishe kucita ceebo cakusuna Yehova abuumbi? *

6. Kweelana a Bene Loma 1:20, ino nshiinshi shimwi sheenga shamupa kwiiya pali Yehova?

⁶ Amwiiye pali Yehova kwiinda mukuyeeya pashintu nshaakalenga. (Amubelenge Bene Loma 1:20; Ciyu. 4:11) Amukutumane akuyeeya busongo bwakwe Yehova mbobubonekela mushintu nshaakalenga mbuli shishango ashinyama. Inga mweeyaako paniini Yehova mbwaakalenga mubili wanu munshila ikankamika. (Kulu. 139:14) Munooyeeya ankusu Yehova nshaakabika mulisuba, akwiibaluka kwaamba ayi lisuba ni nyenyeenshi yomwibo panyenyeenshi shiinji abuumbi. * (Isa. 40:26) Kucita boobo kulaakumupa kulemeka Yehova abuumbi. Nacibi boobo, kushiba nkusu abusongo bwakwe Yehova ncintu comwibo pashintu shiinji sheenga shamucafwa kuba abushicibusa anguwe. Aboobo kwaamba ayi muyumye lusuno lwanu pali Yehova akuba abushicibusa anguwe, mulyeelete kwiiya shiinji.

7. Ino nshiinshi nshomweelete kushoma kwaamba ayi musune Yehova abuumbi?

⁷ Mulyeelete kushoma cakutatoonsha ayi Yehova alimusuni abuumbi. Sa mulabona ayi nciyumu kushoma ayi Mulengi waliculu acishi capanshi alimushi alimwi alamubikila maano? Na mbomubona, amwiibaluke kwaamba ayi Yehova “taabete kulaale aswebo soonse.” (Milimo 17:26-28) “Ulalanga langa mumyoyo yoonse,” alimwi wakamushomesha bweenka  Defedi mbwaakalwiita Solomoni, ayi “na ukamulangoole, alaakupa kwaamba ayi ukamucaane.” (1 Maka. 28:9, NWT) Alimwi mutokwiiya Baibo ceebo ca maswi akaamba Yehova ayi, “ndakusenya kuli ndime.” (Jele. 31:3, NWT) Mulaakusuna Yehova abuumbi na mukeshibe shintu shiinji Yehova nshaakamucitila.

8. Ino inga mwatondesha buyani ayi mulalumba Yehova palusuno lwakwe?

⁸ Nshila yomwi mbweenga twatondesha ayi tulalumba Yehova palusuno lwakwe, nkwiinda mukubandika anguwe mumupailo. Kulwiita Yehova shili kumoyo wanu akumulumba pashintu nshaamucitila, kulaakumupa kumusuna abuumbi. Alimwi kubona Yehova mbwakumbula mipailo yanu kulaakuyumya bushicibusa bwanu anguwe. (Kulu. 116:1) Lyalo mulaakushoma cakutatoonsha kwaamba ayi ncakwiila alishi mbomulinyumfwa. Ano kwaamba ayi mube pafwiifwi abuumbi a Yehova, mulyeelete kunyumfwishisha kabotu mbwabona shintu. Alimwi mulyeelete kushiba nshaasuni ayi munoocita. Kwaamba ayi mushishiibe shoonse ishi mulyeelete kwiiya Baibo.

9. Ino inga mwatondesha buyani ayi Maswi akwe Lesa alayandika?

⁹ Amutondeshe ayi Maswi akwe Lesa alayandika. Baibo yeenkabo njoitwiisha cancine pali Yehova aluyaando ndwaakabumbila bantu. Inga mwatondesha ayi Maswi akwe Lesa alayandika kwiinda mukubelenga Baibo bushiku abushiku, kulibambila limwi kamutana kwiiya Baibo abatomwiisha, alimwi akukonkela nshemutokwiiya. (Kulu. 119:97, 99; Joni 17:17) Sa mulicite mulongo wakubelenga Baibo bushiku abushiku? Sa mulaukonkela cakushinisha?

10. Ino nceebonshi Baibo ndibuku lilibetele?

¹⁰ Cintu comwi cipa kwaamba ayi Baibo ibe libuku lilibetele, nceebo cakwaamba ayi ilaamba makani abantu bakalingaako Yesu ndyaakalinga pacishi capanshi. Ndyelibuku lyeenkabo lyaamba pashintu Yesu nshaakamucitila. Kwiiya pashintu Yesu nshaakaamba akucita kulaakumupa kusuna kuba bushicibusa anguwe.

11. Ino nshiinshi sheenga shamucafwa kusuna Yehova?

¹¹ Amusune Yesu, lyalo lusuno lwanu pali Yehova lulaakukomena. Ino nceebonshi? Mukwiinga Yesu alakonkela kabotu mibo ya Baishi.  (Joni 14:9) Aboobo kwiiya shiinji pali Yesu kulaakumucafwa kumushiba kabotu Yehova akumulumba. Amuyeeyebo Yesu mbwakatondesha nkumbu kubantu bakalinga kusuulwa ceebo cakuba bakandu, kuciswa akubula wakubacafwa. Amuyeeye amakani Yesu ngakaamba eenga amucafwa mubuumi bwanu bwa bushiku abushiku, alusangalalo ndomucana na mwaakonkela.​—Mate. 5:1-11; 7:24-27.

12. Ino kwiiya shiinji pali Yesu inga kwamupa kucita nshi?

¹² Kuyeeya bunene pamulambu wakwe Yesu uyo ngwakabenga kwaamba ayi tulekelelwe shibiibi shesu kulaakumupa kumusuna abuumbi. (Mate. 20:28) Kushiba kwaamba ayi Yesu wakalyaaba kufwa ceebo ca ndimwe, inga kwamupa kwaana kuswa kushibiibi shanu akusenga kulekelelwa kuli Yehova. (Milimo 3:19, 20; 1 Joni 1:9) Kusuna Yesu a Yehova kulaakumupa kusuna kuba pafwiifwi abantu bamusuni.

13. Ino Yehova wakamupa nshi?

¹³ Amusune mukwashi wakwe Yehova. Beshikamukowa abeshicibusa bateshi Bakamboni mpashi inga tabanyumfwishishi ncomwasalilawo kulyaaba kuli Yehova. Cimwi ciindi inga batalika akumupikisha. Yehova alaakumucafwa kwiinda mukumupa mukwashi wakumushimu. Na mukatolelele kuba pafwiifwi amukwashi uyu, mulaakucana lusuno alucafwo ndomuyandika. (Maako 10:29, 30; Ebu 10:24, 25) Mpashi mukuya kwaciindi mukwashi wanu awalo inga watalika kusebensela Yehova akukonkela njiisho shakwe.​—1 Pita 2:12.

14. Kweelana a 1 Joni 5:3, ino mbubotu nshi mbomwacana ceebo ca kukonkela njiisho shakwe Yehova?

¹⁴ Amwiiye kulumba akukonkela njiisho shakwe Yehova. Mpashi kamutana kwiiya cancine pali Yehova mwakalinga kulisalila nobeene nshomwakalinga kubona ayi nsheshiluleme na shitaluleme, ano pacecino ciindi mwaboona kwaamba ayi kukonkela njiisho shakwe Yehova nkokuli kabotu. (Kulu. 1:1-3; amubelenge 1 Joni 5:3.) Amuyeeyebo Baibo nshoiisha pamakani abasankwa beebete, banakashi beebetwe, bashali, alimwi abaana. (Efe. 5:22–6:4) Sa kukonkela njiisho ishi kwapa kwaamba ayi mube alusangalalo mumukwashi wanu? Sa mulicite mibo ibotu ceebo cakunyumfwila butanjilishi bwakwe Yehova pamakani akusala kabotu beshicibusa? Sa kucita boobo kwamupa kuba alusangalalo? (Tus. 13:20; 1 Koli. 15:33) Cakutatoonsha mulyeelete mwakumbula ayi ee kumiipusho yoonse iyi.

15. Ino inga mwacita buyani na mulisuni lucafwo lwa mbweenga mwakonkela njiisho shamu Baibo?

¹⁵ Cimwi ciindi inga camuyumina kushiba mbweenga mwakonkela njiisho shamu Baibo. Aboobo Yehova kwiinda mulibunga lyakwe alatubambila mabuku eenga atucafwa kushiba kabotu ciluleme acitaluleme. (Ebu 5:13, 14) Kubelenga akwiiya mabuku aya kulaakumucafwa kushiba kukonkela njiisho shamu Baibo mbokutucafwa. Alimwi ici cilaakumupa kusuna kuba lubasu lwa libunga lyakwe Yehova.

16. Ino mbubaambo nshi Yehova mbwaakabika mulibunga lyakwe?

¹⁶ Amwiiye kusuna akucafwa libunga lyakwe Yehova. Yehova wabunganya bantu bakwe kwiinda mumabungano. Mwanaakwe, Yesu, ngomutwi walibungano lyomwi alyomwi. (Efe. 1:22; 5:23) Yesu wakasala likoto liniini lya basankwa bananikitwe kwaamba ayi banootanjilila ncito itocitwa pacecino ciindi. Yesu wakeeta likoto ili ayi “musebenshi ushomeka alimwi ucite maano,” alimwi bamakwesu aba balabikilako maano abuumbi kukumanisha mukuli wabo wa kumucafwa kuba beshicibusa bakwe Yehova akumushitilisha lwakumushimu. (Mate. 24:45-47) Nshila yomwi musebenshi ushomeka mbwamubikila maano, nkwiinda mukushinisha ayi wasala bamanene beelela kwaamba ayi banoomutanjilila akumushitilisha. (Isa. 32:1, 2; Ebu 13:17; 1 Pita 5:2, 3) Bamanene aba balilyaabite  kumuyuminisha akumucafwa kuba pafwiifwi a Yehova. Nacibi boobo, cintu ciyandika abuumbi nceenga bamucitila nkumucafwa kushiba mbweenga mwacafwa bamwi kwiiya pali Yehova.​—Efe. 4:11-13.

17. Kweelana a Bene Loma 10:10, 13, 14, ino nceebonshi tulashimikila bamwi pali Yehova?

¹⁷ Amucafwe bamwi kwiiya kusuna Yehova. Yesu wakalwiita bashikwiiya bakwe kwiisha bamwi pali Yehova. (Mate. 28:19, 20) Ncuubu kukonkela mulawo uyo ceebo ca kushibabo ayi tulyeelete kuukonkela. Na mulisuni Yehova abuumbi, mulaakusunishisha kulwiitako bamwi pali nguwe bweenka mbuli mutumwi Pita a Joni mbobakaamba ayi: “Swebo inga tatucilekiiwo kwaamba shintu nshetwakalinga kubona akunyumfwa sobeene.” (Milimo 4:20) Tulaba alusangalalo abuumbi na twacaafwa muntu kusuna Yehova. Amuyeeyebo shikushimikila Filipi mbwakasangalala ndyaakacafwa mwine Isopya kwiiya cancine camu Malembo akubombekwa! Na amwebo kamukonkela mulawo Yesu ngwakatupa wakuya mukushimikila, mulatondesha ayi ncakwiila mulisuni kuba Kamboni wakwe Yehova. (Amubelenge Bene Loma 10:10, 13, 14.) Amwebo mpashi inga mweepusha mwiipusho wakeepusha mwine Isopya ayi: “Sa kuli cimwi ceenga cankasha kubombekwa?”​—Milimo 8:36.

18. Ino tulaakwiiya nshi mumutwi utokonkelaawo?

¹⁸ Kubombekwa ncecintu ciyandika abuumbi nceenga mwasala kucita mubuumi bwanu. Mukwiinga nkusala kuyandika abuumbi, mulyeelete kuyeeyawo cakubikila maano akushiba shilikitweemo. Ino nshiinshi nshomweelete kushiba pamakani akubombekwa? Ino nshiinshi nshomweelete kucita kamutana kubombekwa apesule lyakubombekwa? Tulaakucana shikumbulo kumiipusho iyi mumutwi utokonkelaawo.