1. Ino muntu alyeelete kucita buyani kaatana kutalika kuyaka ŋanda?

AMUYEEYE ayi muntu alisuni kuyaka ŋanda. Alishi mushobo wa ŋanda njaasuni kuyaka. Ano sa inga wanyamukabo peenkapo ayi ndaaya mukuula shintu shakuyakisha? Sobwe. Kuli cimwi ciyandika ncaeelete kutaanguna kucita, alyeelete kushiba maali atoyandika kwaamba ayi ŋanda yoonse ikamaane. Ino nceebonshi? Mukwiinga alyeelete kushiba na alicite maali akwene kumanisha ŋanda. Na washibila limwi maali atoyandika, inga wacikonsha kutalika kuyaka ŋanda akwiimanisha.

2. Kweelana a Luka 14:28-30, ino nciinshi ncomweelete kutaanguna kucita kamutana kubombekwa?

² Sa mulisuni kubombekwa ceebo cakwaamba ayi mulisuni Yehova alimwi mulamulumba ceebo ca shintu nshaakamucitila? Na nshemutoyeeyawo, nkokwaamba ayi mulyeelete kucita bweenka mbuli muntu usuni kuyaka ŋanda mbwaacita. Ino nciinshi nceenga twaambila boobo? Atubandike maswi akaamba Yesu pa Luka 14:27-30. (Amubelenge.) Yesu wakalinga kwaamba ncocaamba kuba shikwiiya wakwe. Kwaamba ayi tube shikwiiya, tulyeelete kutaanguna kukala panshi akubona ‘shiyandika,’​—nkokwaamba ayi tulyeelete kuba balibambite kuliyumya mumapensho ngeshi tukacane alimwi akulyaaba. (Luka 9:23-26; 12:51-53) Aboobo kamutana kubombekwa, mulyeelete kutaanguna kuyeeyawo cakubikila maano pashintu nsheshi mukanokwiindaamo na mukabe shikwiiya wakwe Klistu. Kucita boobo kulaakumucafwa kuba ulibambite kutolelela kusebensela Lesa cakushomeka mbuli Mwineklistu wakabombekwa.

3. Ino tutobandika nshi mumutwi uyu?

³ Sa kuba shikwiiya wakwe Yesu wakabombekwa kulicite mpindu kwiinda mapensho ngeshi mukayandike kuliyumya alimwi ashintu nshomweelete kucileka? Ee! Kubombekwa kulaleta shoolwe shiinji  pacecino ciindi alimwi akunembo. Amuleke tubandike miipusho iyandika pamakani akubombekwa. Shikumbulo kumiipusho iyi shitomucafwa kukumbula mwiipusho wakwaamba ayi, “Sa ndalibambila kubombekwa?”

4. (a) Ino kulyaaba cilaamba nshi? (b) Ino “kulikaka” kwaambwa pa Mateyo 16:24 cilaamba nshi?

⁴ Ino kulyaaba cilaamba nshi? Kamutana kubombekwa mulyeelete kutaanguna kulyaaba. Ndyemutoolyaaba mulyeelete kupaila kuli Yehova kuswa panshi lya moyo akumulwiita ayi mulisuni kumusebensela buumi bwanu boonse. Na mwalyaaba kuli Lesa, nkokwaamba ayi “mwalikaka” nobeene. (Amubelenge Mateyo 16:24. NWT) Alimwi ici cilaamba ayi mwaba bakwe Yehova ano, ico cili ncoolwe cinene abuumbi. (Loma. 14:8) Na mwalikaka nkokwaamba ayi mwalwiita Yehova ayi kuswa sunu mulaakunobikila maano abuumbi kukumusebensela kuteshi kukucita shimusangalasha nobeene. Kulyaaba ncishomesho ciyandika abuumbi kuli Lesa. Alimwi Yehova taatukakatishi kupanga cishomesho ici. Ano na twamushomesha, alatulangila ayi tukakumanishe nshotwakashomesha.​—Kulu. 116:12, 14.

5. Ino kulyaaba kulipusene buyani akubombekwa?

⁵ Ino kulyaaba kulipusene buyani akubombekwa? Kulyaaba kulacitwa muntu kaali eenka, alimwi taakuwo ushiba ayi muntu walyaaba kuli Yehova. Ano kubombekwa kwalo kulacitwa pameenso abantu baanji, alimwi liinji kulabako pakubungana kwalubasu na kubungana kunene. Na mwabombekwa, mulatondesha kumuntu uli woonse kwaamba ayi mwakalyaaba kuli Yehova. * Aboobo kubombekwa kwanu kulapa bantu boonse kushiba kwaamba ayi mulisuni Yehova Lesa wanu amoyo wanu woonse, buumi bwanu boonse, miyeeyo yanu yoonse, alimwi ankusu shanu shoonse alimwi ayi mulishinishite kusebensela Yehova kwamuyayaya.​—Maako 12:30.

6-7. Kweelana a 1 Pita 3:18-22, ino nceebonshi kubombekwa kulayandika?

⁶ Ino nceebonshi kubombekwa kulayandika? Atubandike maswi ngotucana pa 1 Pita 3:18-22. (Amubelenge.) Bweenka mbuli bwaato bwa muciindi cakwe Nowa mbobwakapa bantu kushiba ayi wakalinga kucite lushomo, kubombekwa akwalo kulapa kwaamba ayi bantu bashibe ayi mwakalyaaba kuli Yehova. Ano sa kubombekwa kulayandika? Ee. Pita wakaamba kubombekwa ncokuyandikila. Cakutaanguna wakaamba ayi “uko kumupulusha.” Kubombekwa inga kwatupulusha na katucita shitondesha ayi tulashoma muli Yesu, akusumina ayi ncakwiila wakatufwita, wakabushikwa alimwi pacecino ciindi ali kwiculu “kulyaansa lyakululyo lyakwe Lesa.”

⁷ Cabili, kubombekwa kulatupa kuba “anjeelacaamba isalalite.” Na twalyaaba kuli Yehova akubombekwa, tulaba abushicibusa bulibetele anguwe. Mukwiinga twakaana kuswa panshi lya moyo alimwi tulashoma mucilubula, Lesa alatulekelela shibiibi shesu. Aboobo inga twaba anjeelacaamba isalalite kuli Lesa.

8. Ino nciinshi ceelete kumupa kusalawo kubombekwa?

⁸ Ino nciinshi ceelete kumupa kusalawo kubombekwa? Mukwiinga mwakeeya Baibo cakubikila maano, mwakeeya shiinji pali Yehova mbuli mibo yakwe alimwi ambwacita shintu. Nshomwakeeya pali nguwe shakamushika pamoyo aboobo mulimusuni abuumbi. Kusuna Yehova ncecintu cinene ceelete kupa kwaamba ayi musalewo kubombekwa.

9. Kweelana a Mateyo 28:19, 20, ino kubombekwa muliina lya baTa, lya Mwaana alya mushimu usalashi cilaamba nshi?

⁹ Cimwi ceelete kumupa kusalawo kubombekwa ncancine camu Baibo ncomwakeeya akushoma. Amubone Yesu nshaakaamba ndyaakapa mulawo wa kwiisha bantu kuba bashikwiiya. (Amubelenge Mateyo 28:19, 20.) Wakaamba ayi muntu atobombekwa alyeelete kubombekwa  “muliina lya baTa alya Mwaana alimwi alya mushimu usalashi.” Ino wakalinga kusansulula nshi? Mulyeelete kushoma camoyo woonse Baibo nshoiisha pali Yehova; Mwanaakwe, Yesu, alimwi amushimu usalashi. Makani ancine aya alicite nkusu abuumbi alimwi inga amushika pamoyo. (Ebu 4:12) Amuleke tubandikeewo amwi pa aayo.

10-11. Ino ncancine nshi ncomwakeeya akushoma pali baTa?

¹⁰ Amuyeeye ciindi ndyemwakeeyabo cancine pali baTa: Liina lyakwe “ngu Yehova,” lakwe ‘eenkabo ngowiinditeewo pacishi coonse,’ alimwi lakwebo eenka “ngo Lesa wancine.” (Kulu. 83:18; NWT, Isa. 37:16, NWT) Ngo Mulengi wesu, alimwi “lupulusho lulaswa kuli Yehova.” (Kulu. 3:8; 36:9) Wakabika bubaambo bwakutupulusha kuswa kububi alufu akutupa bulindilishi bwakuba abuumi bwa muyayaya. (Joni 17:3) Kulyaaba akubombekwa kwanu kulaakutondesha ayi muli Kamboni wakwe Yehova. (Isa. 43:10-12) Mulaakuba lubasu lwa mukwashi wa basebenshi bakwe Yehova nsengwe yoonse, abo banyumfwa kabotu kwiitwa liina lyakwe alimwi basuni abantu bamwi kushiba liina ili.​—Kulu. 86:12.

¹¹ Ncoolwe cinene abuumbi kushiba Baibo nshoiisha pali baTa! Kunyumfwishisha cancine cibotu abuumbi ici, kulaakumupa kusuna kulyaaba kuli Yehova akubombekwa.

12-13. Ino ncancine nshi ncomwakeeya akushoma pa Mwaana?

¹² Ino mwakacita buyani ndyemwakeeya cancine pa Mwaana? Yesu ngo muntu wabili uyandika abuumbi kuswa pali Yehova mububumbo boonse. Wakaliyandila kwaaba buumi bwakwe mbuli cilubula ceebo ca ndiswe. Na katucita shintu shitondesha ayi tulicite lushomo mucilubula, inga twalekelelwa shibiibi shesu, kuba abushicibusa a Lesa, akuba abuumi bwamuyayaya kunembo. (Joni 3:16) Yesu ngo Mupailishi wesu Munene. Alisuni kutucafwa kufubilaamo mu mpindu ya cilubula alimwi akuba abushicibusa buyumu a Lesa. (Ebu 4:15; 7:24, 25) Mbuli Mwaami wa Bwaami bwakwiculu, Yehova alakusalasha liina Lyakwe kwiinda muli nguwe akukushaawo shibiibi shoonse, alimwi akuleta shoolwe sha muyayaya mu Paladaiso kunembo. (Mate. 6:9, 10; Ciyu. 11:15) Yesu ncakubonenaako ncotweelete kukonkela. (1 Pita 2:21) Wakatutondesha cakubonenaako mbuli mbotweelete kubika panembo kuyanda kwakwe Lesa mubuumi bwesu.​—Joni 4:34.

¹³ Na mwasumina Baibo nshoiisha pali Yesu, mulaakumusuna abuumbi Mwanaakwe Lesa ngwaasuni abuumbi. Aboobo mulaakusuna kucita kuyanda kwakwe Lesa mubuumi bwanu boonse, bweenka mbuli Yesu mbwaakacita. Ici cilaakupa kwaamba ayi mulyaabe kuli Yehova akubombekwa.

14-15. Ino ncancine nshi ncomwakeeya akushoma pa mushimu usalashi?

¹⁴ Ino mwakashiba nshi ndyemwakeeya cancine pa mushimu usalashi? Mwakesa mukushiba ayi mushimu usalashi teshi muntu, sombi ni nkusu Lesa nshaasebensesha. Yehova wakasebensesha mushimu wakwe usalashi kutanjilila baabo bakalinga kulemba Baibo, alimwi mushimu usalashi ngootucafwa kunyumfwishisha akukonkela nshotubelenga. (Joni 14:26; 2 Pita 1:21) Kwiinda mumushimu wakwe, Yehova alatupa “nkusu shiindaawo nshetucite.” (2 Koli. 4:7) Mushimu ngootupa nkusu shakushimikila, kukoma meelesho, kuliyumya ndyetwalefuka, akuliyumya mumapensho. Ulatucafwa akutondesha shisepo shibotu abuumbi sha “mushimu.” (Gala. 5:22) Lesa alapa mushimu wakwe kumuntu uli woonse umushoma akumusenga.​—Luka 11:13.

¹⁵ Tulaba alusangalalo abuumbi ceebo cakushiba ayi Yehova alapa basebenshi bakwe mushimu usalashi upa kwaamba ayi bacikoonshe kumusebensela! Na mwasumina cancine ncomwakeeya pamakani amushimu usalashi, mulaakuyuminishikwa kulyaaba kuli Lesa akubombekwa.

16. Ino nshiinshi nshetweeya kushika waano mumutwi uyu?

 ¹⁶ Kusalawo kulyaaba kuli Lesa akubombekwa ncintu ciyandika abuumbi. Bweenka mbuli mbotweeya, mulyeelete kuba balibambite kulyaaba akuliyumya mumapensho ali woonse ngeshi mukacane. Nacibi boobo, shoolwe nsheshi mukacane shileendaawo pakulyaaba kuli koonse nkweenga mwaciita. Kubombekwa inga kwapa kwaamba ayi mukapuluke, alimwi kulapa muntu kuba anjeelacaamba isalalite kuli Lesa. Cinene ceelete kumupa kwaamba ayi musalewo kubombekwa ndusuno lwanu pali Yehova. Mulyeelete kushoma camoyo woonse cancine ncomwakeeya pali baTa, pa Mwaana, alimwi apa mushimu usalashi. Kweelana anshetweeya kushika waano, ino mwiipusho wakwaamba ayi, “Sa ndalibambila kubombekwa,” inga mwaukumbula buyani?

17. Ino nshiinshi shimwi muntu nshaeelete kucita kaatana kubombekwa?

¹⁷ Na mutolinyumfwa ayi mwalibambila kubombekwa, nkokwaamba ayi mwacita kale shiinji kwaamba ayi mube abushicibusa bubotu a Yehova. * Kwiiya Baibo kwamucafwa kushiba makani aanji pali Yehova a Yesu. Alimwi mulicite lushomo. (Ebu 11:6) Mulashoma cakutatoonsha ayi Yehova alaakukumanisha shishomesho shakwe nshetucana mu Baibo, alimwi mulishomete ayi mulambu wakwe Yesu inga wamupulusha kuswa kububi alufu. Mwakaana kuswa kushibiibi shanu, nkokwaamba ayi mwakalinyumfwa cibiibi pashibiibi shoonse nshomwakalinga kucita, alimwi mwakasenga Yehova ayi amulekelele. Mwakaalula buumi bwanu kwiinda mukushiya nshila shibiibi nshomwakalinga kukonkela kale kale alimwi akutalika kucita shintu Lesa nshaasuni. (Milimo 3:19) Alimwi mulisunishishi kulwiitaako bamwi nshomushoma. Mwakeelela kuba shikushimikila utana kubombekwa akutalika kwaabanamo lubasu mukushimikila pantu pomwi alibungano. (Mate. 24:14) Yehova alikondetwe abuumbi pali ndimwe ceebo cakucita shintu shiyandika ishi. Mwapa kwaamba ayi asangalale abuumbi.​—Tus. 27:11.

18. Ino nshiinshi shimwi nshomweelete kucita kamutana kubombekwa?

¹⁸ Kuli ashimwi nshomweelete kucita kamutana kubombekwa. Bweenka mbuli mbotweeya, mulyeelete kulyaaba kuli Lesa. Amupaile kuli Yehova kuswa panshi lya moyo, akumushomesha ayi mulaakunoocita kuyanda kwakwe mubuumi bwanu boonse. (1 Pita 4:2) Lyalo inga mwalwiita shikubunganya likoto lya bamanene kwaamba ayi mulisuni kubombekwa. Alaakulwiita bamanene bamwi kwaamba ayi babandike andimwe. Tamweelete kuloonda kubandika abamakwesu aba. Bamakwesu aba balyeelete balimushi kale alimwi balimusuni. Balaakumwiindulusha mumiipusho ya njiisho shakutaanguna shamu Baibo. Balisuni kushiba na ncakwiila mwakashinyumfwishisha njiisho ishi alimwi akubona na mulicishi kuyandika kwa kulyaaba akubombekwa. Na bakabone ayi mutokweelela, balaakumulwiita  ayi inga mwabombekwa pakubungana kwalubasu na pakubungana kunene kutoosa.

19-20. Ino nshiinshi nsheshi mukayandike kucita pesule lyakubombekwa?

¹⁹ Ino nshiinshi nsheshi mukayandike kucita pesule lyakubombekwa? * Mutaluubi kwaamba ayi kulyaaba kuli anga ncishomesho, aboobo Yehova atolangila ayi mulaakukumanisha nshemwakashomesha. Pesule lyakubombekwa, mulaakuyandika kukala buumi kweelana akushomesha kwanu. Ino nshiinshi nsheenga mwaciita?

²⁰ Amutolelele kusebensela pomwi alibungano. Na mukabe Mwineklistu wakabombekwa, mulaakuba lubasu lwa mukwashi wa “bamakwesu abenankashi.” (1 Pita 2:17) Bamakwesu abenankashi ngumukwashi wanu wakumushimu. Aboobo kucanika kumabungano lyoonse kulaakuyumya bushicibusa bwanu ambabo. Munobelenga Baibo akukutumana kuyeeyawo bushiku abushiku. (Kulu. 1:1, 2) Pesule lyakubelenga lubasu lwamu Baibo, amukutumane akuyeeyawo abuumbi pamakani ngomwabelenga. Lyalo nshemutoobelenga shilaakumushika pamoyo. “Munoopaila lyoonse.” (Mate. 26:41) Kupaila kuswa panshi lya moyo kulaakuyumya bushicibusa bwanu a Yehova. “Amutolelele . . . kutaanguna kuyandoola sha Bwaami.” (Mate. 6:33) Inga mwacita boobo kwiinda mukubona ncito yakushimikila mbuli incito iyandika abuumbi mubuumi bwanu. Inga mwatolelela kuyumya lushomo lwanu akucafwako bamwi kuba abulindilishi bwa buumi butamaani na lyoonse kamwaabanamo lubasu muncito yakushimikila.​—1 Timo. 4:16.

21. Ino kubombekwa kulaakumupa shoolwe nshi?

²¹ Kulyaaba kuli Yehova akubombekwa ncintu ciyandika abuumbi muntu nceenga wasala kucita. Ncakwiila mulaakuyandika kulyaaba akuliyumya mumapensho ngeenga mwacaana. Ano sa kulyaaba akubombekwa kulicite mpindu iinda pa mapensho ngeshi mukacane? Cakutatoonsha! Mapensho ali woonse ngeenga mwacaana pacecino ciindi “ngoobu alimwi teshi aciindi cilaamfu.” (2 Koli. 4:17) Alimwi kubombekwa kwanu kulaakupa kwaamba ayi mube abuumi busangalasha pacecino ciindi, lyalo akuba a “buumi butamaani” kunembo. (1 Timo. 6:19) Aboobo mulyeelete kuyeeyawo abuumbi akupaililawo kamutana kukumbula mwiipusho wakwaamba ayi, “Sa ndalibambila kubombekwa?”