1-2. Ino kuyuminisha nkotucana pa Tushimpi 4:25 inga twakukonkela buyani? Amwaambe cakubonenaako.

AMUYEEYE shakubonenaako shotatwe ishi. Nankashi wacinene atooyeya shibotu shakamucitikila kale kale. Nabi kwaamba ayi atokwiinda mumapensho pacecino ciindi, watolelela kucita nsheenga wacikonsha muncito yakwe Yehova. (1 Koli. 15:58) Bushiku abushiku alayeeya mbweshi cikabe, kuba mucishi cipya pomwi amukwashi wakwe alimwi abeshicibusa. Nankashi umwi atokwiibaluka mbwaakakalashikwa aumwi mulibungano, sombi wasala kutatolelela kuyeeyawo. (Kolo. 3:13) Mukwesu atokwiibaluka shilubo nshaakacitawo kale kale, sombi wabikila maano kukucita shoonse nsheenga wacikonsha kwaamba ayi atolelele kusebensela Yehova cakushomeka.​—Kulu. 51:10.

² Ino nshiinshi shikoshenye pa Beneklistu aba? Boonse batokwiibaluka shakabacitikilawo kale kale, sombi tabatootolelela kuyeeyabo pashintu isho. Balilangitebo kunembo kwakubula kucebooka.​—Amubelenge Tushimpi 4:25.

3. Ino nceebonshi ncotuyandikila kunoolangitebo kunembo?

³ Ino nceebonshi ncotuyandikila kunoolangitebo kunembo? Bweenka muntu mbweenga taacikoonshi kweenda kabotu na lyoonse kaalangilishabo kwisule, inga twaalilwa kuya panembo mukusebensela Yehova na lyoonse katuyeeyabo shakatucitikila kale kale.​—Luka 9:62.

4. Ino nshiinshi nsheshi twiiye mumutwi uyu?

⁴ Mumutwi uyu, tutokwiiya toose totatwe tweenga twatupa kunoobikila bunene maano kushintu shakale kale. Toose utu: (1) nkuyeeya ayi buumi bwesu bwakalinga kabotu kale kale, (2) kubikila mfundilishi, alimwi a (3) kulinyumfwa cibiibi cakwiindilila. Tutokwiiya mbweenga kukonkela njiisho shamu Baibo kwatucafwa kutabikila  maano ku “shintu shakwisule,” sombi kutolelela kubikila maano ku “shintu shili kunembo.”​—Fili. 3:13, NWT.

5. Ino Shikushimikila 7:10 ilatulwiita kutacita nshi?

⁵ Amubelenge Shikushimikila 7:10. Lilembo ili talitokwaamba ayi tacibete kabotu kwiipusha ayi: ‘Nceebonshi ciindi cakalekale cakalinga cibotu?’ Yehova ngowakatupa cipo cakwiibaluka shintu. Sombi lyaamba ayi: ‘Uteepushi ayi, ‘Nceebonshi ciindi cakalekale cakalinga cibotu kwiinda cecino?’ Aboobo tulyeelete kucenjela kwaamba ayi tatutokweelanya buumi bwesu bwakale kale ku bukaalo mbotubeteemo pacecino ciindi. Teshi cintu cabusongo kwiipusha mwiipusho uyu.

6. Ino nceebonshi teshi cintu camaano kunoyeeya ayi buumi bwesu bwakalinga kabotu kale kale? Amwaambe cakubonenaako.

⁶ Ino nceebonshi teshi cintu camaano kutolelela kuyeeya ayi buumi bwesu bwakalinga kabotu kale kale? Tacibete kabotu mukwiinga kucita boobo kulatupa kunooyeeyabo shibotu shakale kale akuluba mapensho ngotwakalinga kucana. Amuyeeye cakubonenaako ca bene Isilaeli bamuciindi cakale kale. Pesule lyakuswa mu Ijipiti pakeendabo ciindi ciniini bakaluba mapensho oonse ngobakalinga kwiindaamo. Bakatalika kuyeeyabo pa shakulya shibotu nshobakalinga kulya. Bakaamba ayi: “Mucishi ca Ijipiti twakalinga kulya nswi cakutoola. Amwiibaluke shibimbi, banamunwa, maliiki alimwi aanyensi wa mishobo ipusenepusene!” (Shakube. 11:5) Ano sa ncakwiila bakalinga kulya shakulya “cakutoola”? Sobwe. Bene Isilaeli bakapenga abuumbi paciindi ndyebakalinga mucishi ca Ijipiti mbuli basha bakalinga kupenshekwa. (Kulo. 1:13, 14; 3:6-9) Nacibi boobo, ndipakeenda ciindi bakaaluba mapensho ayo akutalika kuyeeya shakale kale. Bakasala kubikila maano kuyeeya pashibotu shakale kale muciindi cakubikila maano kuyeeya pashintu shibotu Yehova nshakabacitila paciindi cilya. Yehova taakwe kukondwa anshobakacita.​—Shakube. 11:10.

7. Ino nciinshi cakacafwa nankashi umwi kutatolelela kuyeeya buumi bwakale kale?

⁷ Ino inga twacita buyani kwaamba ayi tuleye kunoobikila maano kukuyeeya shakale kale? Amuyeeye cakubonenaako cakwe nankashi wakatalika kusebensela pa Bethel yaku Brooklyn  mu 1945. Ndipakeenda myaaka wakeebwa kumukwesu umwi ngobakalinga akwe pa Bethel, alimwi bakatolelela kusebensela pomwi kwa myaaka iinji. Nacibi boobo, mu 1976, beebaye bakaciswa. Nankashi wakaamba ayi beebaye ndyebakabona ayi bali pafwiifwi kufwa, bakamulwiita nsheenga wacita kwaamba ayi akacikoonshe kuliyumya mbuli mukalubinje. Bakamulwiita ayi: “Twekala buumi bubotu mucikwati cesu. Bantu baanji balaalilwa.” Sombi bakamuyuminisha ayi: “Nabi kwaamba ayi teshi ukaluube shintu shibotu nshetwakacita pomwi, kutabikila bunene maano kushintu isho. Mukuya kwaciindi buumba bulaakuceya. Utalinyumfwi kulefuka abuumbi ceebo ca sheesho shakucitikila. Unoosangalala kuyeeya ciindi ndyetwakalinga kusebensela Yehova pomwi. . . . Kwiibaluka shintu ncipo Yehova ncaakatupa.” Ncakutatoonsha uku kwakalinga kuyuminisha kubotu.

8. Ino nankashi wakayuminishikwa buyani kumaswi akuyuminisha akamulwiita beebaye?

⁸ Nankashi wakakonkela maswi akuyuminisha akamulwiita beebaye. Wakatolelela kusebensela Yehova cakushomeka kushikila ndyaakafwa kaacite myaaka 92. Myaaka iniini kaatana kufwa wakaamba ayi: “Na ndayeeya pa myaaka 63 njondasebensela Yehova muncito yaciindi coonse, inga ndaamba ayi ndakalinga kucite buumi bucite mpindu.” Ino nciinshi ncakaambila boobo? Wakatolelela akwaamba ayi: “Cipa kwaamba ayi buumi bwesu bube ampindu, ngumukwashi wesu wabamakwesu abenankashi alimwi akulangila kuba abuumi butamaani mucishi ca paladaiso ndyetutoosebensela Mulengi wesu Munene, Lesa wancinebo eenka, Yehova.” * Inga tweeya shiinji abuumbi kuswa kucakubonenaako cibotu cakwe nankashi uyu wakabikila maano ku shishomesho shakwe Yehova!

9. Kweelana a Lefi 19:18 ino nciinshi ceenga capa kwaamba ayi cibe ciyumu kulekelela umwi watukalasha?

⁹ Amubelenge Bene Lefi 19:18. Cimwi ciindi cilaba ciyumu kulekelela na watukalasha ngumushominyineesu, shicibusa, na shikamukowa.  Kucakubonenaako, nankashi umwi wakabekesha nankashi ayi wamwiipila maali. Ndipakeenda ciindi, nankashi uyo wakeepilwa maali wakesa mukushiba ayi nankashi uyo ngwakabekesha teshi ngowakeepa maali aboobo wakaya mukulilekelela. Nacibi boobo, nankashi uyo wakalinga wabekeshekwa wakakalala abuumbi alimwi taakwe kucileka kuyeeya shakacitika. Sa amwebo mwakalinyumfwawo kale boobo? Nabi kwaamba ayi tatuna kwiindaawo kale mubukaalo mbuli boobu, buunji bwandiswe twakalinyumfwawo kale anga inga tatumulekeleliiwo uyo wakatukalasha.

10. Ino nciinshi ceenga catucafwa na twalinyumfwa kuba amfundilishi?

¹⁰ Ino nciinshi ceenga catucafwa na twalinyumfwa kuba amfundilishi? Cintu comwi ncotweelete kwiibaluka ncakwaamba ayi Yehova alabona shintu shoonse. Alishi shoonse nshotwiindaamo, kwiilikaawo ashintu shitabete kabotu bamwi nshebatucitila. (Ebu. 4:13) Alalinyumfwa cibiibi na katwiinda mumapensho. (Isa. 63:9) Alimwi wakatushomesha kwaamba ayi mukuya kwaciindi alaakukushawo shibiibi shoonse shakatucitikilawo.​—Ciyu. 21:3, 4.

11. Ino kutabikila mfundilishi kulatucafwa buyani?

¹¹ Kwiilikaawo, tulisuni kwiibaluka kwaamba ayi kutabikila mfundilishi kulatupa kulinyumfwa kabotu sobeene. Ici ncaakesa mukushiba nankashi ulya wakalinga wabekeshekwa. Mukuya kwaciindi, wakacikonsha kulekelela nankashi uyo wakalinga wamubekesha akucileka kumubikila mfundilishi. Wakesa mukushiba ayi na twalekelela bamwi, Yehova alatulekelela. (Mate. 6:14) Wakalinga kucishi kwaamba ayi shakacita nankashi tashakalinga kabotu, sombi wakasalawo kumulekelela. Aboobo ici cakapa kwaamba ayi nankashi abe usangalete alimwi akubikila maano kukusebensela Yehova.

12. Ino nshiinshi nshetwiiya pa lilembo lya 1 Joni 3:19, 20?

¹² Amubelenge 1 Joni 3:19, 20. Cimwi ciindi soonse tulalinyumfwa cibiibi. Kucakubonenaako, bamwi balalinyumfwa cibiibi ceebo ca shintu nshebakacita kabatana kwiiya cancine. Bamwi balalinyumfwa cibiibi ceebo ca shilubo nshebakacita pesule lyakubombekwa. (Loma. 3:23) Ncakwiila tulisuni kucita shintu shiluleme. Sombi “soonse tulabisha mushintu shiinji.” (Jemu. 3:2; Loma. 7:21-23) Nabi kwaamba ayi tatusangalali kulinyumfwa cibiibi, cimwi ciindi kulacafwa. Ino nciinshi ncetwaambila boobo? Twaamba boobo mukwiinga kulinyumfwa cibiibi cakwiindilila inga kwatucafwa kwaalula buumi bwesu akuba bashinishite kutabooshawo shilubo shesu.​—Ebu. 12:12, 13.

13. Ino nceebonshi tulyeelete kuleya kulinyumfwa cibiibi cakwiindilila?

¹³ Nacibi boobo, inga twaciindilisha kulinyumfwa cibiibi​—nkokwaamba ayi kutolelela kulinyumfwa kuba amulandu nabi pesule lyakwaamba ayi twaana kuswa kushibiibi shesu alimwi Yehova watondesha kwaamba ayi watulekelela. Kulinyumfwa boobo takubete kabotu. (Kulu. 31:10; 38:3, 4) Ino nceebonshi? Atubandike cakubonenaako cakwe nankashi wakatolelela kulinyumfwa cibiibi ceebo ca shilubo nshaakacita kale kale. Wakaamba ayi: “Ndakalinga kubona ayi kusebensa kwangu cankusu muncito yakushimikila takucitewo mpindu mukwiinga mpashi teshi nkapulukeewo.” Buunji bwandiswe inga twalinyumfwa boobo. Aboobo tulyeelete kuleya koose kakulinyumfwa cibiibi cakwiindilila. Ino nceebonshi? Nceebo cakwaamba ayi Satana inga wakondwa na twacileka kusebensela Yehova, nabi kwaamba ayi Yehova wakatulekelela kale!​—Amweelanye a 2 Bene Kolinto 2:5-7, 11.

14. Ino nciinshi ceenga catupa kushoma kwaamba ayi Yehova alisuni kutulekelela?

¹⁴ Nacibi boobo, mpashi inga twaliipusha ayi, ‘Ino inga ndashiba buyani ayi ncakwiila Yehova wandekelela?’ Kwiipusha mwiipusho uyo, ncitondesho cakwaamba ayi Yehova inga wamulekelela. Myaaka iinji yaiinda, Njashi Yamulindilishi yakaamba ayi: “Na twacana kwaamba ayi tutoocita cilubo comwi comwi, nkokwaamba ayi mpashi  tatuna kucikonsha kukoma lipenshi ndyetwakalinga kucite katutana kutalika kusebensela Lesa. . . . Nacibi boobo mutabooleli mwisule. Mutayeeyi ayi mwaciita cilubo nceshi mukabule kulekelelwa. Mukwiinga uyo ngomuyeeyo Satana ngwaasuni ayi munooyeeya. Kulinyumfwa cibiibi abuumbi ndyemwacita cilubo ncitondesho cakwaamba ayi muli muntu uli kabotu alimwi Yehova inga wamulekelela. Amube baliceesha akutolelela kupaila kuli Lesa kwaamba ayi amulekelele, amucaafwe kuba anjeelacaamba isalalite alimwi akumucafwa kucileka kucita shilubo. Nabi kwaamba ayi mwaana muniini abe alipenshi lyomwi lyomwi, lyoonse alaya mukusenga lucafwo kuli baishi. Aboobo amutolelele kusenga Yehova kwaamba ayi amucaafwe, alimwi ncakwiila alaakumucafwa ceebo ca nkumbu shakwe.” *

15-16. Ino bamwi balalinyumfwa buyani na besa mukushiba kwaamba ayi Yehova taakwe kubasuula?

¹⁵ Basebenshi bakwe Yehova baanji balayuminishikwa ceebo cakushiba kwaamba ayi Yehova alababona ayi inga baaluka. Kucakubonenaako, myaaka yaiinda, mukwesu umwi wakayuminishikwa amakani ngaakabelenga kuswa mu Njashi Yamulindilishi. Nankashi wakaambwa mu Njashi Yamulindilishi iyi wakaamba ayi, ceebo ca shintu shibiibi shakamucitila kale kale, wakalinga kutoonsha na Yehova inga wasuna muntu mbuli nguwe. Wakatolelela kulinyumfwa boobo nabi ndipakeenda myaaka kuswa ciindi ndyaakabombekwa. Nacibi boobo, ndyaakakutumana akuyeeya pacilubula, wakatalika kubona shintu munshila ipuseneeko. *

¹⁶ Ino shakeendaamo nankashi shakamucafwa buyani mukwesu? Wakalemba ayi: “Ndyendakalinga mwanike , ndakalinga kulwana lipenshi lya kweebela shintu shileta miyeeyo yakoonana. Conoonobo ndakabooshaawo alimwi. Ndakasenga bamanene kwaamba ayi bancaafwe, alimwi ndakacikonsha kuya panembo mukukoma lipenshi lyangu. Bamanene bakancafwa kushoma kwaamba ayi Lesa alinsuni alimwi alisuni kuncafwa. Nacibi boobo, cimwi ciindi ndalinyumfwa kuba muntu utacite mpindu akubona anga Yehova inga taansuniiwo. Kubelenga shakacitikila nankashi ulya kwakancafwa abuumbi. Ndakanyumfwisha ano kwaamba ayi na ndaamba ayi Lesa inga tandekeleli, nkokwaamba ayi ndashoma ayi mulambu wa Mwanaakwe toocite nkusu sha kundekelela  shibiibi shangu. Ndakaasunga kabotu maswi aya kuswa mumagazini ilya kwaamba ayi nobelengaawo akukutumana kuyeeyawo lyoonse na ndalinyumfwa kuba muntu utacite mpindu.”

17. Ino Paulo wakacita buyani kwaamba ayi aleye koose ka kulinyumfwa cibiibi abuumbi?

¹⁷ Shakacitika mbuli sheeshi shilatwiibalusha mutumwi Paulo. Kaatana kuba Mwineklistu, Paulo wakacita shintu shiinji shibiibi abuumbi. Nabi kwaamba ayi wakeebaluka nshaakacita, taakwe kutolelela kunooyeeyabo pashintu isho. (1 Timo. 1:12-15) Wakashoma kwaamba ayi shibiibi shakwe inga shalekelelwa ceebo ca mulambu wacilubula alimwi wakalinga kubona cilubula mbuli cipo Lesa ncaakamupa. (Gala. 2:20) Aboobo taakwe kutolelela kulinyumfwa cibiibi abuumbi, sombi wakabikila maano kucita shoonse nsheenga wacikonsha muncito yakwe Yehova.

18. Ino nshiinshi nshotweeya mumutwi uyu?

¹⁸ Ino nshiinshi nshotweeya mumutwi uyu pamakani atoose ntotweelete kuleya? (1) Nkusu shakwiibaluka shintu ncipo kuswa kuli Yehova; nacibi boobo, nabi kwaamba ayi shintu shakalinga shibotu buyani mubuumi bwesu kale kale, mucishi cipya shintu shilaakwiindaawo kubota. (2) Nabi kwaamba ayi bamwi inga batukalasha, tulasala kubalekelela, akubikila maano kukusebensela Yehova. (3) Kutolelela kulinyumfwa cibiibi cakwiindilila ceebo ca shibiibi nshetwakacitawo inga kwapa kwaamba ayi twaalilwe kusebensela Yehova calusangalalo. Aboobo bweenka mbuli Paulo, tulyeelete kushoma kwaamba ayi Yehova wakatulekelela.

19. Ino tulishi buyani ayi mucishi cipya teshi tukapenge kuyeeya pashintu shibiibi shakacitika kale kale?

¹⁹ Tutolangila kukala buumi butamaani kunembo. Alimwi mucishi cipya cakwe Lesa, teshi tukeebalukeewo cili coonse cakacitika kale kale ico citupa kulinyumfwa cibiibi. Kwaamba paciindi ico, Baibo ilaamba ayi: “Shintu shikulukulu shilaakulubwa.” (Isa. 65:17) Ano amuyeeyebo: Sobamwi twacembela muncito yakwe Yehova, ano mucishi cipya, tulaakuboolela kubucikula bwangu. (Jobo 33:25) Aboobo atube bashinishite kutayeeya bunene shintu shakale kale, sombi kubikila maano kucishi cipya alimwi akucita nsheenga twacikonsha pacecino ciindi kwaamba ayi tukabeeko!