1. Kweelana a Mateyo 28:18-20, ino Yesu wakalwiita bashikwiiya bakwe kucita nshi?

PESULE lyakubushikwa kuswa kubafu, Yesu wakabonekela kubashikwiiya bakwe bakalinga babungana ku Galili. Wakalinga kusuni kubalwiita makani ayandika. Ino ngamakani nshi? Ngaaya ngotucana palilembo lya Mateyo 28:18-20.​—Amubelenge.

2. Ino njimiipusho nshi njeshi tubandike?

² Mulawo Yesu ngwakapa bashikwiiya bakwe wakucafwa bantu kuba bashikwiiya ngoweelete kukonkela basebenshi bakwe Lesa amunshiku shino. Aboobo amuleke tubandike miipusho yotatwe pancito njaakatupa. Wakutaanguna, kwiilika pakucafwa bashikwiiya bapya kushiba milawo yakwe Lesa, ino nciinshi cimwi ncotweelete kucita? Wabili, ino beshikushimikila boonse mulibungano inga bacita buyani kwaamba ayi bacafwe shikwiiya Baibo kuya panembo lwakumushimu? Watatu, ino inga twacita buyani kwaamba ayi tucafwe bamakwesu abenankashi bakaboolela mwisule kutalika alimwi kushimikila?

3. Ino nshiinshi Yesu nshaakeelikawo pa mulawo ngwakaamba?

³ Yesu nshaakaamba shakanyumfwika. Tulyeelete kwiisha bantu shintu nshaakatulwiita. Nacibi boobo, kuli citeente comwi ciyandika ncotuteelete kuluba. Yesu taakwe kwaamba ayi: ‘Amubeeishe shintu shoonse nshendakamulwiita.’ Sombi wakaamba ayi: Mukabeeishe “kukonkela shintu shoonse nshendakamulwiita.” Kwaamba ayi tucikoonshe kukonkela Yesu  nshakaamba, tulyeelete kwiisha shikwiiya Baibo shakucita alimwi akumutondesha bwakucita. (Milimo 8:31) Ino nceebonshi ncotweelete kucitila boobo?

4. Ino kukonkela mulawo cilaamba nshi? Amwaambe cakubonenaako.

⁴ Ino nshiinshi nsheenga twaciita kwaamba ayi tucafwe muntu kukonkela shintu Klistu nshaakatulwiita? Cakubonenaako citookonkelawo inga catucafwa kunyumfwisha kabotu nshotweelete kucita. Ino shikwiisha bwa kweensha motoka inga wacita buyani kwaamba ayi acafwe shikwiiya kukonkela milawo yakweensha? Cakutaanguna, shikwiisha alayiisha shikwiiya milawo njaeelete kukonkela ndyaatokweensha motoka. Nacibi boobo, shikwiisha alyeelete kucitawo comwi kwaamba ayi acafwe shikwiiya wakwe kushiba mbweenga wakonkela milawo iyo. Alyeelete kuya abashikwiiya bakwe akubatondesha shakucita ndyebatookweensha akweelesha kukonkela nshobakeeya. Ino nshiinshi nsheenga tweeya kucakubonenaako ici?

5. (a) Kweelana a Joni 14:15 alimwi a 1 Joni 2:3 ino nshiinshi nshotweelete kwiisha shikwiiya Baibo kunoocita? (b) Amwaambe shakubonenaako sha mbweenga twacafwa shikwiiya.

⁵ Ndyetutokwiisha bamwi Baibo, tulabaiisha milawo yakwe Lesa. Nacibi boobo, kuli ashimwi nshotweelete kucita. Tulyeelete kwiisha bashikwiiya Baibo kushiba mbweenga bakonkela nshebatokwiiya. (Amubelenge Joni 14:15; 1 Joni 2:3.) Kwiinda kucabonenaako cesu, inga twabacafwa kushiba mbweenga bakonkela cancine ncobatokwiiya ndyebali kucikolo, kuncito, na mukufwakasha. Inga twabalwiitako cakatucitikila kwaamba ayi tubatondeshe kukonkela njiisho shamu Baibo mbokwakatushitilisha kumapensho na kutucafwa kusala kabotu. Ndyetuli ashikwiiya wesu, inga twapaila kuli Yehova akumusenga kwaamba ayi atanjilile shikwiiya kwiinda mumushimu wakwe usalashi.​—Joni 16:13.

6. Ino nshiinshi shiilikitwe mukwiisha bamwi kukonkela Yesu nshaakatulwiita?

⁶ Ino nshiinshi shiilikitwe mukwiisha bamwi kukonkela Yesu nshaakatulwiita? Tulyeelete kucafwa bashikwiiya Baibo besu kuba alusuno lwakucafwa bamwi kuba bashikwiiya. Bashikwiiya bamwi inga baloonda kushimikila. Aboobo tulyeelete kukalika moyo ndyetutoobacafwa kunyumfwishisha kabotu cancine camu Baibo kwaamba ayi babe alushomo luyumu. Lyalo cancine inga cabashika pamoyo akubayuminisha kutalika kushimikila. Ino inga twacita buyani kwaamba ayi tucafwe shikwiiya kuba alusuno lwakushimikila makani abotu?

7. Ino inga twacita buyani kwaamba ayi tucafwe shikwiiya kuba alusuno lwakushimikila bamwi makani abotu?

⁷ Inga tweepusha shikwiiya wesu miipusho mbuli: “Ino mbubotu nshi mbomwacana ceebo cakukonkela njiisho shamu Baibo? Sa mutoobona ayi kuli abamwi bayandika kunyumfwa makani aya? Ino inga mwacita buyani kwaamba ayi mubacaafwe?” (Tus. 3:27; Mate. 9:37, 38) Amumutondeshe ma tilakiti ayo abete lubasu lwa Shisebensesho Nshetusebensesha Ndyetutokwiisha alimwi amuleke kwaamba ayi asaleewo ngwaatoobona ayi bashikamukowa bakwe, beshicibusa, na abo mbwaasebensaabo inga basuna kubelenga. Amumupe matilakiti apusenepusene. Amwiindulukeemo anguwe kwaamba ayi mumucaafwe kushiba bwakwaabila kabotu matilakiti. Ano na weelela kusebensa mbuli shikushimikila utana kubombekwa, tulyeelete kunooshimikila akwe kwaamba ayi tumucaafwe.​—Shiku. 4:9, 10; Luka 6:40.

8. Ino nceebonshi shikwiiya wesu alayandika kusuna bunene Lesa alimwi abantu? (Amubone kabokosi kalembetwe ayi “ Nsheenga Twaciita Kwaamba ayi Tucafwe Shikwiiya Kusuna Lesa.”)

⁸ Mutaluubi kwaamba ayi Yesu wakatulwiita ayi tulyeelete kwiisha bamwi “kukonkela shintu  shoonse” nshaakatulwiita. Ici cileelikaawo milawo yobilo inene kwiindaawo​—nkokwaamba ayi kusuna Lesa alimwi abantu​—milawo iyi yoonse yobilo ilicatene abuumbi anciito yakushimikila alimwi akucafwa bantu kuba bashikwiiya. (Mate. 22:37-39) Ino ilicatene buyani? Cintu cinene ceelete kutupa kushimikila nkusuna Lesa alimwi abantu. Tulishi kwaamba ayi bashikwiiya Baibo bamwi inga baloonda kwaabanamo lubasu muncito yakushimikila. Sombi inga twabayuminisha kwaamba ayi kwiinda munkusu shakwe Yehova boowa inga bwamana mukuya kwaciindi. (Kulu. 18:1-3; Tus. 29:25) Kabokosi kacatene amutwi uyu katokwaamba nsheenga twaciita kwaamba ayi tucafwe shikwiiya kuya panembo mukusuna Lesa. Kwiilikaawo, ino nshiinshi nsheenga womwi awomwi mulibungano wacita kwaamba ayi acafwe shikwiiya mupya kutondesha lusuno?

9. Mucikoshanyo ca muntu utokwiiya kweensha motoka, ino shikwiiya atokwiiya shiiyo shicafwa munshila nshi?

⁹ Amuyeeye cikoshanyo ca muntu utokwiiya bwa kweensha motoka alimwi. Ino shikwiiya atokwiiya munshila nshi, ndyaatooya bweensha motoka ashikumwiisha kaali pafwiifwi? Kwiinda mukukutika shikumwiisha alimwi akulangilisha cakubikila maano kubamwi batokweensha kabotu. Kucakubonenaako, shikwiisha inga watondesha shikwiiya, dilaiva umwi uyo wasuminisha kwaamba ayi umwi aye panembo lyakwe. Na mpashi shikwiisha inga watondesha shikwiiya, dilaiva umwi waceeshako malaiti akwe kwaamba ayi bamwi banoobona kabotu, lyalo akuyuminisha shikwiiya kukonkela shakubonenaako isho. Shakubonenaako isho inga shacafwa shikwiiya, kwiiya nsheenga wakonkela ndyaatokweensha.

10. Ino nciinshi ceenga cacafwa shikwiiya Baibo kuya panembo lwakumushimu?

¹⁰ Ubu mbocibete ashikwiiya Baibo watalika kweenda panshila itola kubuumi, aleeya kuteshibo kuswa kuwooyo utoomwiisha, sombi akubasebenshi bakwe Yehova bamwi bacite cakubonenaako cibotu. Aboobo, ino nciinshi ceenga camucafwa bunene shikwiiya Baibo kuya panembo lwakumushimu? Kucanika kumabungano esu a Bwineklistu. Ino nciinshi ncetwaambila boobo? Twaamba boobo mukwiinga nshetwiiya kumabungano shilaakubacafwa kwiiya shiinji alimwi akuyumya lushomo alusuno lwabo pali Lesa. (Milimo 15:30-32) Kwiilikaawo, ndyebali kumabungano shikwiisha inga wayuminisha bamakwesu abenankashi abo bakeenda mubukaalo mbwabeteemo shikwiiya Baibo uyo, kwaamba ayi bamushibe kabotu. Ino nshakubonenaako nshi shakutondesha lusuno lwa Bwineklistu nsheenga shikwiiya wabona mulibungano?

11. Ino nshakubonenaako sha buyani nsheenga shikwiiya wabona mulibungano, alimwi ino inga shamupa kucita buyani?

¹¹ Amuyeeye shakubonenaako shitokonkelaawo; shikwiiya Baibo mushali mwanakashi utacite ibaye, wabona nankashi uli mubukaalo mbuli mbwabeteemo. Wayuminishikwa kubona nankashi mbwaasebensa cankusu kwaamba ayi acikoonshe kusa ku Ŋanda ya Bwaami abaana baniini. Shikwiiya musankwa utolwana lipenshi lyakufweba fwaka washibana amukwesu wakacikonsha kukoma lipenshi ilyo. Aboobo mukwesu uyo wamusansulwiita kusuna Yehova mbokwakamucafwa kukonkela milawo yakwe. (2 Koli. 7:1; Fili. 4:13) Pesule lyakukutika mukwesu nshakeendaamo, shikwiiya washoma ayi alakwe inga wacikonsha, mukwesu ndyamuyuminisha ayi, “Awebo inga wacikonsha kucileka kufweba.” Shikwiiya Baibo mwanakashi wacanike wabona nankashi wacanike usangalete ceebo cakuba Kamboni. Cakubonenaako cakwe nankashi capa kwaamba ayi shikwiiya uyu asune kushiba shipa nankashi uyu kuba alusangalalo lyoonse.

12. Ino nciinshi nceenga twaambila ayi kucafwa shikwiiya Baibo ngu mukuli wa muntu uli woonse mulibungano?

 ¹² Kushibana abeshikushimikila bapusenepusene bashomeka kulacafwa shikwiiya Baibo kwiiya mbweenga wakonkela mulawo wakwe Klistu wakusuna Lesa alimwi akusuna bantu. (Joni 13:35; 1 Timo. 4:12) Alimwi bweenka mbotwaambawo kale, shikwiiya Baibo inga weeya mbweenga wakoma mapensho ngatokwiindaamo kwiinda mukubona cakubonenaako ca beshikushimikila bamwi. Alimwi ici inga camupa kubona kwaamba ayi cilakonsheka kwaalula buumi akuba shikwiiya wakwe Klistu. (Duto. 30:11) Uli woonse mulibungano kuli nsheenga wacita kwaamba ayi shikwiiya Baibo aye panembo. (Mate. 5:16) Ino nshiinshi nshomucita palwaanu kwaamba ayi muyuminishe beshikwiiya Baibo abo besa kumabungano?

13-14. Ino Yesu wakacita buyani paciindi batumwi bakwe ndyebakalinga baboolela mwisule?

¹³ Tulisuni kucafwa bamakwesu abenankashi bakaboolela mwisule kutalika alimwi kwaabanamo lubasu mukukumanisha ncito yakushimikila akucafwa bantu kuba bashikwiiya yakatupa Klistu. Yesu nshaakacita ciindi batumwi bakwe ndyebakalinga balefuka shilatondesha nsheenga aswebo twaciita munshiku shino.

¹⁴ Kakucalitebo nshiku shiniini kwaamba ayi Yesu acaikwe, batumwi bakwe ‘bakamupalangana akumucica.’ (Maako 14:50; Joni 16:32) Ino Yesu wakacita buyani paciindi batumwi bakwe ndyebakalinga baboolela mwisule? Ndyaakabushikwa, Yesu wakalwiita bashikwiiya bakwe banakashi bamwi ayi: “Mutaloondi! Kamuya mukalwiite bamakwesu [kwaamba ayi ndakabushikwa].” (Mate. 28:10a) Yesu taakwe kubasuula batumwi bakwe. Nabi kwaamba ayi bakalinga bamupalangana, wakatolelela kubeeta ayi “bamakwesu.” Bweenka mbuli Yehova, Yesu wakalinga muntu ucite nkumbu alimwi ulekelela.​—2 Baam. 13:23.

15. Ino tulalinyumfwa buyani pabaabo bakacileka kushimikila?

¹⁵ Aswebo tulababikila maano abuumbi abo boonse bakacileka kushimikila. Mbamakwesu abenankashi alimwi tulibasuni abuumbi! Tuciibaluka mbobakatondesha lusuno kwiinda mukusebensa cankusu alimwi mpashi bamwi bakacita boobo kwa myaaka iinji. (Ebu. 6:10) Tulabayeeya abuumbi! (Luka 15:4-7) Bweenka mbuli Yesu, ino nshiinshi nsheenga twaciita kwaamba ayi tutondeshe ayi tulababikila maano?

16. Ino inga twatondesha buyani ayi tulabikila maano kubamakwesu abenankashi bakaboolela mwisule?

¹⁶ Amubeete kumabungano. Nshila yomwi Yesu mbwakayuminisha batumwi bakwe nkwiinda mukubeeta kukubungana. (Mate. 28:10b; 1 Koli. 15:6) Aswebo munshiku shino inga twayuminisha baabo bakaboolela mwisule kwiinda mukubeeta kumabungano na bakacileka kubungana. Tulishi kwaamba ayi inga twayandika kutolelela kubeeta kushikila ndyeshi bakese. Cilyeelete kwaamba ayi Yesu wakakondwa bashikwiiya bakwe ndyebakasumina kusa ndyaakabeeta.​—Amweelanye a Mateyo 28:16 a Luka 15:6.

17. Ino nshiinshi nshotweelete kucita na uyo wakaboolela mwisule wesa kumabungano?

¹⁷ Amubatambule camaansa obilo. Yesu ndyaakakumanya bashikwiiya bakwe wakabatambula camaansa obilo; taakwe kulindila ayi balo baye kuli nguwe, sombi wakaya kuli mbabo akubandikaabo. (Mate. 28:18) Ino inga twacita buyani na uyo wakaboolela mwisule wesa ku Ŋanda ya Bwaami? Ndiswe tweelete kutaanguna kuya kuli nguwe akumutambula camaansa obilo. Mpashi pakutaanguna inga twalisukama ayi teshi tushibe cakwaamba. Nacibo boobo, kwakubula kumulensha nsoni inga twamulwiita ayi twakondwa kumubona.

18. Ino bakaboolela mwisule inga twabayuminisha buyani?

 ¹⁸ Amubayuminishe. Mpashi bashikwiiya bakwe Yesu bakayeeya ayi teshi bakacikoonshe kukumanisha ncito yakushimikila cishi coonse. Yesu wakabayuminisha kwiinda mukubalwiita ayi: “Nebo ndanooli amwebo lyoonse.” (Mate. 28:20) Sa makani aya akabacafwa bashikwiiya bakwe? Ee. Kuswabo ciindi cilya, bakatalika kusebensa cankusu “kwiisha akwaambilisha makani abotu.” (Milimo 5:42) Beshikushimikila bakaboolela mwisule abalo balayandika kuyuminishikwa. Mpashi inga baba aboowa bwa kutalika kushimikila alimwi. Inga twayandika kubashomesha kwaamba ayi teshi bakanooshimikila beenka. Na balibambila, inga twasebensaabo muncito yakushimikila. Inga bakondwa kubacafwa kutalika alimwi kushimikila makani abotu. Na twabatondesha ayi bacili bamakwesu abenankashi, inga batalika kusebensa cankusu alimwi ici inga caleta lusangalalo mulibungano.

19. Ino nciinshi ncetusuni bunene, alimwi ino nceebonshi?

¹⁹ Ino ncito yakushimikila akucafwa bantu kuba bashikwiiya ilaakutolelela kushika lili? Ilaakutolelela kushikila kumamanino acishi cino cibiibi. (Mate. 28:20) Ano sa tulaakucikonsha kukumanisha ncito Yesu njaakatupa kushikila ciindi ico? Tulishinishite kucita boobo! Tulikondetwe kusebensesha ciindi, nkusu, alimwi amaali esu kwaamba ayi tucikoonshe kucana baabo ‘bacite myoyo ilibambite kutambula buumi butamaani.’ (Milimo 13:48) Na twacita boobo, nkokwaamba ayi twakonkela cakubonenaako cakwe Yesu. Wakaamba ayi: “Cakulya cangu nkucita sheesho shiyanda wooyo wakantuma akumanisha ncito yakwe.” (Joni 4:34; 17:4) Aswebo ici ncetusuni bunene. Tulisuni kukumanisha ncito njetwakapekwa. (Joni 20:21) Alimwi tulisuni kwaamba ayi abamwi, kwiilikaawo abaabo bakaboolela mwisule, abalo batolelele muncito iyi.​—Mate. 24:13.

20. Kweelana a Bene Filipi 4:13, ino nciinshi ceenga catucafwa kukumanisha ncito Yesu njaakatupa?

²⁰ Nabi kwaamba ayi nciyumu kukumanisha ncito inene Yesu njaakatupa, tatubete sweenka muncito iyi. Yesu wakashomesha ayi alaakuba andiswe. Tulasebensa ncito yakucafwa bantu kuba bashikwiiya mbuli ‘basebenshinyina bakwe Lesa’ ‘mukucatana a Klistu.’ (1 Koli. 3:9; 2 Koli. 2:17) Aboobo, inga twacikonsha kwiikumanisha. Kukumanisha ncito iyi alimwi akucafwa bamwi kucita boobo ncintu cisangalasha alimwi ncoolwe!​—Amubelenge Bene Filipi 4:13.