1. Kweelana a Mateyo 7:13, 14, ino ni nshila nshi njotweelesha kukonkela?

SOONSE tutosebensela Yehova cankusu kwaamba ayi tukeelele kunjila mucishi cipya mubuleelo bwakwe Yehova. Bushiku buli boonse tuleelesha kukonkela nshila itola kubuumi. Ano bweenka Yesu mbwakaamba, teshi cuubu kukonkela nshila iyi. (Amubelenge Mateyo 7:13, 14.) Mukwiinga tatumaninite ncuubu kuswa panshila iyi.​—Gala. 6:1.

2. Ino nshiinshi nsheshi twiiye mumutwi uyu? (Amubone a kabokosi kacite mutwi utokwaamba ayi “ Kuliceesha Kulatucafwa Kwaaluka.”)

² Kwaamba ayi tutolelele kweenda panshila itola kubuumi, tulyeelete kuba balibambite kwaalula mbotuyeeya, mbotubona shintu, alimwi ambotucita shintu. Mutumwi Paulo wakayuminisha Beneklistu baku Kolinto ayi bakalinga kweelete kutolelela kusumina “kululamikwa.” (2 Koli. 13:11) Aswebo tulyeelete kukonkela kululika uku. Mumutwi uyu, tutokwiiya mbweenga Baibo yatucafwa kwaaluka alimwi ambweenga beshicibusa bashimpite lwakumushimu batucafwa kutolelela kuba panshila itola kubuumi. Tutokwiiya andyeenga caba ciyumu kukonkela butanjilishi buswa kulibunga lyakwe Yehova. Alimwi tutokwiiya ambweenga kuliceesha kwatucafwa kwaaluka akutolelela kusebensela Yehova calusangalalo.

3. Ino Maswi akwe Lesa alatucafwa buyani?

³ Mukwiinga tatumaninite, teshi cuubu kulilanga langa kabotu mumoyo alimwi amumiyeeyo yesu. Alimwi ici cilapa kwaamba ayi cibe ciyumu kushiba moyo wesu nkoototutanjilila. (Jele. 17:9) Ncuubu abuumbi kulibeca sobeene kwiinda ‘mukuyeeya kutabete kabotu.’ (Jemu. 1:22) Aboobo tulyeelete kusebensesha Maswi akwe Lesa kulilanga langa kwaamba ayi tushibe shili mukati kamoyo wesu aceeco citupa kucita shintu. (Ebu. 4:12, 13) Munshila imwi, inga twaamba ayi Maswi akwe Lesa ali anga ni mashini ya X-leyi, iyo itucafwa kulibona mbotubete mukati kamoyo. Ano kwaamba ayi tucikoonshe  kukonkela kululika kuswa mu Baibo na kubaabo beemikaninaako Lesa, tulyeelete kuba baliceesha.

4. Ino tulishi buyani ayi Mwaami Saulo wakaba muntu ulisumpula?

⁴ Cakubonenaako ca Mwaami Saulo cilatondesha shicitika na muntu taacitewo mushimu wakuliceesha. Saulo wakaba muntu ulisumpula abuumbi cakwaamba ayi wakakaka kusumina kwaamba ayi wakalinga kuyandika kwaalula mbwaakalinga kuyeeya alimwi ambwaakalinga kucita shintu. (Kulu. 36:1, 2; Abaku. 2:4) Ici cakabonekela patuba Yehova ndyaakamupa butanjilishi bwa nshaakalinga kweelete kucita pesule lyakukoma bene Amaleki. Nacibi boobo, Saulo taakwe kunyumfwila Yehova. Alimwi mushinshimi Samwelo ndyaakamulwiita nshaakacita, Saulo wakakaka kusumina cilubo ncaakacita. Muciindi cakucita boobo, wakatalika kuubya cilubo ncaakacita akupa bamwi mulandu ayi mbobakamukakatisha kucita nshaakacita. (1 Samwe. 15:13-24) Ici tacakalinga ciindi cakutaanguna Saulo kutondesha mushimu uyu. (1 Samwe. 13:10-14) Cakabica abuumbi mukwiinga wakalekela moyo wakwe kulisumpula. Taakwe kwaalula mbwaakalinga kuyeeya, aboobo Yehova wakamululika akumukaka.

5. Ino nshiinshi nsheenga tweeya kuswa kucakubonenaako cakwe Saulo?

⁵ Kwaamba ayi tuleye kukonkela cakubonenaako cakwe Saulo, tulyeelete kuliipusha miipusho iyi: ‘Sa na ndabelenga kululika kuswa mu Maswi akwe Lesa, ndalangoola mwakuleyela? Sa ndayeeya ayi nshentoocita teshi shibiibi abuumbi? Sa ndapa bamwi mulandu pasheesho nshentoocita?’ Na cikumbulo cesu ngu ee kumwiipusho uli woonse pamiipusho iyi, nkokwaamba ayi tulyeelete kwaalula mbotuyeeya ambotubona shintu. Mukwiinga na twaalilwa kucita boobo, moyo wesu ulaakuyuma abuumbi cakwaamba ayi Yehova alaakutukaka kuba beshicibusa bakwe.​—Jemu. 4:6.

6. Amwaambe bupusano bwakalinga pa Mwaami Saulo alimwi a Mwaami Defedi.

⁶ Ano amubone bupusano bwakalinga pa Mwaami Saulo awooyo wakamupyana, Mwaami Defedi, musankwa wakalinga kusuni “mulawo wakwe Yehova.” (Kulu. 1:1-3) Defedi wakalinga kucishi kwaamba ayi Yehova alapulusha baabo baliceesha akupikisha baabo balisumpula. (2 Samwe. 22:28) Aboobo wakasuminisha mulawo wakwe Lesa kwaalula mbwaakalinga kuyeeya. Wakalemba ayi: “Ndanoolumbaisha Yehova, ceebo alamfunda. Nabibo ciindi camashiku, miyeeyo yangu yamukati kamoyo ilandulamika.”​—Kulu. 16:7, NWT.

7. Ino kuliceesha kulaakutupa kucita buyani?

⁷ Kuliceesha kulaakutupa kunyumfwila Maswi akwe Lesa, akwaalula kuyeeya kutabete kabotu kakutana kutupa kucita shibiibi. Maswi akwe Lesa alaakuba anga ndiswi litulwiita ayi: “Nshila njeeyi. Amukonkele njiyo.” Alaakutucenjesha na twatalika kucita cintu cimwi citabete kabotu. (Isa. 30:21) Tulaakufubilaamo abuumbi na katunyumfwila Yehova. (Isa. 48:17) Kucakubonenaako, teshi tukalenshekwe nsoni ceebo cakululikwa amuntu umwi. Alimwi tulaakusena pafwiifwi a Yehova mukwiinga tulishi kwaamba ayi alatubikila maano mbuli mushali shilusuno.​—Ebu. 12:7.

8. Kweelana a Jemusi 1:22-25, ino Maswi akwe Lesa inga twaasebensesha buyani bweenka mbuli ligilasi?

⁸ Maswi akwe Lesa inga atucafwa bweenka mbuli ligilasi. (Amubelenge Jemusi 1:22-25.) Buunji bwandiswe tulalanga muligilasi bushiku abushiku katutana kuswa paŋanda. Kucita boobo kulatucafwa kubona na kuli pamwi mpotweelete kulibamba kabotu, bamwi kabatana kutubona. Ubu mboceelete kuba andyetutobelenga Baibo bushiku abushiku, inga twabona mbotweelete kwaalula miyeeyo yesu alimwi ambotubona shintu. Baanji balabona ayi kubelenga lilembo lya bushiku macuunsa kabatana kuswa paŋanda bushiku abushiku kulabacafwa. Balaalula nshobayeeya kweelana anshobabelenga. Aboobo bushiku boonse, baleelesha kucana nshila mbweenga bakonkela kululikwa nkobeeya kuswa mu Maswi akwe Lesa. Kwiilikaawo, tulyeelete kuba abubaambo bwakubelenga Baibo akukutumana kuyeeya pa Maswi akwe Lesa bushiku abushiku. Ici inga caboneka anga ncintu  cuubu kucita, sombi ncintu comwi ciyandika abuumbi ncotweelete kucita kwaamba ayi tucikoonshe kutolelela kuba panshila ishupite itola kubuumi.

9. Ino nciinshi ceenga capa kwaamba ayi shicibusa amululike?

⁹ Sa mwakatalikaawo kale kucita cintu ceenga canyonyoola bushicibusa bwanu a Yehova? (Kulu. 73:2, 3) Shicibusa ushimpite lwakumushimu ndyaakesa kuli ndimwe kwaamba ayi amululike, sa mwakamunyumfwila akukonkela nshaakamulwiita? Na mbomwakacita, nkokwaamba ayi mwakacita kabotu, alimwi ncakutatoonsha mwakalumba abuumbi kwaamba ayi shicibusa wanu wakamucenjesha.​—Tus. 1:5.

10. Ino mulyeelete kucita buyani na shicibusa wamululika?

¹⁰ Maswi akwe Lesa alatwiibalusha ayi: “Shilonda shakuumwa ashicibusa wako shilashomeka.” (Tus. 27:6, NWT) Ino maswi aya alaamba nshi? Amuyeeye cikoshanyo ici: Amuyeeye kwaamba ayi mutoolindila kusotoka loodi mwiinda myotoka abuumbi lyalo mwapilinganishikwa a fooni. Mwatalika kusotoka loodi cakubula kutaanguna kulanga na kuli motoka itoosa. Ano peenkapo, shicibusa wamucata kulyaansa akumukwela. Wamukwela cankusu cakwaamba ayi alyaansa lyanu lyacisa, nacibi boobo, isho nshaacita shapa kwaamba ayi mutaliimbwi. Ncakwiila lyaansa lyanu inga lyatola nshiku kalicisa, ano sa inga mwakalala kwaamba ayi shicibusa wakamukwela? Sobwe napaceyi! Inga mwalumba kwaamba ayi wakamucafwa. Aboobo mbocibete na shicibusa wamucenjesha ayi nshemwaamba na nshemucita tashitookweendelana anjiisho shakwe Lesa shiluleme, inga camucisa pakutaanguna. Sombi mutakalali kwaamba ayi wakamululika. Mukwiinga kucita boobo nkubula maano. (Shiku. 7:9) Sombi amulumbe kwaamba ayi shicibusa taakwe kuloonda kumucafwa.

11. Ino nciinshi ceenga capa kwaamba ayi muntu akake kululikwa kuswa kuli shicibusa?

¹¹ Ino nciinshi ceenga capa kwaamba ayi muntu akake kululikwa kuswa kuli shicibusa ngwaasuni abuumbi? Kulisumpula. Bantu balisumpula balisuni bantu “baamba nshebasuni kunyumfwa.” ‘Balafutata kwaamba ayi batanyumfwi shalushinisho.’ (2 Timo. 4:3, 4, NWT) Balalinyumfwa ayi taakuwo weenga wabapandako maano mukwiinga mbasongo kwiinda bamwi. Nacibi boobo, mutumwi Paulo wakalemba ayi: “Na umwi kaalisumpula, sombi kakutaaku mbwaabete, ingayi utoolibecabo mwiine.” (Gala. 6:3) Mwaami Solomoni wakasansulula kabotu makani aya ndyaakaamba ayi: “Mwaana muniini sombi musongo, uli kabotu kwiinda mwaami mucembele sombi muluya, utanyumfwili kucenjeshekwa.”​—Shiku. 4:13.

12. Kweelana a Bene Galatiya 2:11-14, ino nshiinshi nsheenga tweeya kuswa kucakubonenaako cakwe Pita?

¹² Amuyeeye Pita nshaakacita ciindi ndyaakalulikwa pabantu ku mutumwi Paulo. (Amubelenge Bene Galatiya 2:11-14.) Naakalinga kusuni, naakwiinga wakakalala akubikila Paulo mfundilishi ceebo cakubikila maano nshila mbwakamululika alimwi aceebo cakumululikila pabantu. Sombi Pita wakalinga musongo. Wakasumina kululikwa alimwi taakwe kubikila mfundilishi mutumwi Paulo. Muciindi cakucita boobo wakesa mukwiita mutumwi Paulo ayi “mukwabesu usunikwi.”​—2 Pita 3:15.

13. Ino nshiinshi nshotweelete kutaanguna kwiibaluka katutana kululika bamwi?

¹³ Ino nshiinshi nshomweelete kutaanguna kuyeeya kamutana kululika bamwi? Kamutana kuya mukululika shicibusa, amutaangune kuliipusha ayi, ‘Sa ntotondesha kuba “ululeme cakwiindilisha”?’ (Shiku. 7:16) Muntu ulibona kuba ululeme cakwiindilisha uloombolosha bamwi kweelana ambwaabona shintu kuteshi kweelana anjiisho shakwe Yehova, alimwi mpashi taacitewo ankuumbu. Na pesule lyakulicencenta mwaboona ayi mulyeelete kuya mukubandika ashicibusa wanu, amutaangune kubona lipenshi liliiwo alimwi  amusebenseshe miipusho ipa muntu kwaamba mbwatooyeeya kwaamba ayi mucafwe shicibusa wanu kubona cilubo ncaakacita. Amushinishe kwaamba ayi kululika kwanu kwaswa mu Malembo. Mutaluubi kwaamba ayi teshi ndimwe mucite mukuli wakumoombolosha sombi kumucafwa kunyumfwishisha Yehova mbwaalinyumfwa paceeco ncaatoocita. (Loma. 14:10) Amusebenseshe busongo mbotucana mu Maswi akwe Lesa, alimwi ndyemutolulika bamwi amukonkele cakubonenaako cakwe Yesu cakutondesha nkumbu. (Tus. 3:5; Mate. 12:20) Ino nceebonshi? Nceebo cakwaamba ayi aswebo Yehova alaakutucita bweenka mbotucita bamwi.​—Jemu. 2:13.

14. Ino libunga lyakwe Yehova lilatwaabila nshi?

¹⁴ Yehova atootutanjilila panshila itola kubuumi kwiinda mulibunga lyakwe lyapacishi capanshi, ilyo litwaabila shintu mbuli mavidyo, mabuku, alimwi amabungano atucafwa kukonkela kululika nkotucana mu Maswi akwe Lesa. Makani aya inga twaashoma mukwiinga alaswa mu Malembo. Bamulikoto Litanjilila balacinka manungo mumushimu usalashi kwaamba ayi ubacaafwe ndyebatosala nsheenga twaciita kwaamba ayi tukumanishe kabotu incito yakushimikila. Nacibi boobo, Bamulikoto Litanjilila baleendulukaamo alimwi mushesho nshobakasala akubona sheenga shayandika kwaalulwa. Ino nceebonshi? Nceebo cakwaamba ayi “shintu shicitika mucishi ici shitooya bwaaluka,” aboobo libunga lyakwe Lesa lilyeelete kusebensa kweelana akwaaluka kwa bukaalo.​—1 Koli. 7:31.

15. Ino ngamapensho nshi beshikushimikila bamwi ngobacana?

¹⁵ Ncakutatoonsha kwaamba ayi tulafwambaana kukonkela na twatambula butanjilishi bupya pamakani anshetwiiya na makani akulilemeka. Sombi ino tulacita buyani na kwaba kwaaluka kumwi mulibunga uko kukuma mbasu shimwi sha buumi bwesu? Kucakubonenaako, munshiku shino kuyaka alimwi akubamba misena njotupaililaamo kulayandika maali aanji. Aboobo Bamulikoto Litanjilila bakapa butanjilishi bwakwaamba ayi mabungano aanji alyeelete kunoosebensesha Ŋanda ya Bwaami yomwi. Aboobo ceebo cakwaaluka uku mabungano amwi atoopankaana pomwi, lyalo Maanda a Bwaami amwi atokuulishikwa. Lyalo maali atoosebenseshekwa kuyaka Maanda a Bwaami kumisena nkwatoyandika abuumbi. Na mulekala kumusena Maanda a Bwaami nkwaatokuulishikwa amabungano kupankaana, mpashi inga camubeta ciyumu kwaalula buumi bwanu kubukaalo bupya. Beshikushimikila bamwi balayandika kweenda mishinso ilaamfuko kwaamba ayi bakashike ku Ŋanda ya Bwaami. Bamwi bakasebensa  cankusu kwaabanamo lubasu mukuyaka alimwi akubamba Ŋanda ya Bwaami inga bakankamana ayi ino nceebonshi itookulishikwa. Inga balinyumfwa anga ciindi ankusu shabo shakayabo mumaanshi. Nacibi boobo, batokonkela bubaambo bupya aboobo balyeelete kulumbwa.

16. Ino kukonkela kululika nkotucana pa Bene Kolose 3:23, 24 inga kwatucafwa buyani kutolelela kuba basangalete?

¹⁶ Kwiibaluka kwaamba ayi tutosebensela Yehova alimwi ngoototanjila libunga lyakwe, kulaakutucafwa kutolelela kuba basangalete. (Amubelenge Bene Kolose 3:23, 24.) Mwaami Defedi wakatondesha cakubonenaako cibotu ndyaakalinga kupa maali akucafwilisha muncito yakuyaka tempele. Wakaamba ayi: ‘Ino nebo ndime ani alimwi abantu bangu mbaani, kwaamba ayi tupe shipo shakuliyandila mbuli sheeshi? Ceebo shintu shoonse shilaswa kuli ndimwe, aboobo twabooshabo shintu shili kale shaanu.’ (1 Maka. 29:14) Na twapa cipo ca maali, nkokwaamba ayi aswebo tutoopa Yehova shintu shili kale shakwe. Nacibi boobo, Yehova alakondwa abuumbi na twaaba ciindi, nkusu, alimwi amaali esu muncito yakwe.​—2 Koli. 9:7.

17. Ino nceebonshi tamweelete kulinyumfwa cibiibi na mulyeelete kwaalula shimwi nshemucita?

¹⁷ Kwaamba ayi tutolelele kuba panshila ishupite, soonse tulyeelete kweelesha cankusu kukonkela cakubonenaako cakwe Yesu. (1 Pita 2:21) Na kuli shimwi nshomucita nshomweelete kwaalula mutalinyumfwi cibiibi. Mukwiinga kucita boobo kulatondesha ayi mulisuni kukonkela butanjilishi bwakwe Yehova. Mutaluubi kwaamba ayi Yehova alicishi ayi tatumaninite. Aboobo taatulangili kukonkela cakubonenaako cakwe Yesu cakumaninina.

18. Ino nshiinshi nshotweelete kucita kwaamba ayi tukacane buumi bwamuyayaya?

¹⁸ Amuleke soonse tube bashinishite kubikila maano kubuumi bwakunembo akusumina kwaalula miyeeyo yesu, mbotubona shintu, alimwi anshetucita. (Tus. 4:25; Luka 9:62) Amuleke tutolelele kuba bantu baliceesha, “basangalete alimwi balulamikwa.” (2 Koli. 13:11, NWT) Na twacita boobo, “Lesa shilusuno alimwi shiluumuno alaakuba andiswe.” Alimwi alaakutucafwa kuba basangalete pacecino ciindi akutupa buumi bwamuyayaya mucishi cipya.