BAMAKWESU abenankashi baanji bakalinga balongela kushishi shimwi kwaamba ayi bakacane maali, bakaboolela alimwi kushishi shinemishaabo. Bamakwesu abenankashi aba bakalongela kumisena kuli beshikushimikila baniini ceebo calusuno lwabo pali Yehova abantu. (Mate. 22:37-39) Ino bakalyaaba buyani, alimwi ino nshoolwe nshi nshobakacana? Kwaamba ayi tucane shikumbulo, amuleke tubandike pacishi ca Cameroon cicanika kulubasu lwa kumbo kwa Africa.

Mu 1998 mukwesu waliina lya Onésime wakalonga kuswa kucishi cinemishaabo ca Cameroon. Wakaya mukukala kucishi cimwi kwa myaaka 14. Bushiku bumwi ndyaakalinga kumabungano, wakanyumfwa cikoshanyo caamba pamakani akushimikila. Mwaambi wakaamba ayi, “Na beshicibusa bobilo batoocata nswi mumisena ipusene alimwi womwi pabaabo atoocata shiinji kwiinda mubye, sa uyo umwi utoocata shiniini inga taalongeli kumusena mubye nkwaatoocata nswi shiinji?”

Cikoshanyo ici cakapa mukwesu Onésime kutalika kuyeeya shakuboolela kumishaabo ku Cameroon, uko bantu baanji nkobasuni kwiiya Baibo. Nacibi boobo wakalisukama. Wakalisukama na inga wacikonsha kushibila alimwi buumi bwa mucishi cinemishaabo pesule lyakukala myaaka iinji kucishi cimwi. Kwaamba ayi abone na inga wacikonsha, mukwesu Onésime wakataanguna kuya mukufwakasha ku Cameroon kwa myeenshi ili 6. Lyalo mu 2012, wakalongela limwi.

Wakaamba ayi: “Ndakalinga kweelete kushibila kukulungula abuumbi alimwi abukaalo bumwi bupuseneeko. Ndakalinga kweelete kushibila kukala pashuuna shamapulanga mu Ŋanda ya Bwaami. Nacibi boobo, cakancafwa kulubaako buumi bwakukala pashuuna shibotu, nkukutika cakubikila maano ciindi camapulogilamu.” Mukwesu uyu wakaamba boobo kaamweta mweta.

Mu 2013, mukwesu Onésime wakeeba nankashi Géraldine, alakwe wakaboolela kucishi ca Cameroon pesule lyakukala myaaka 9 kucishi ca France. Ino nshoolwe nshi beebene aba nshobakacana ceebo cakubikila maano kukusebensela Lesa? Mukwesu Onésime wakaamba ayi: “Mbuli beebene, twakapekwa coolwe cakucanika ku Cikolo ca Bashimikila sha Bwaami alimwi akusebensela pa Bethel. Mwaaka wamana, beshikwiiya Baibo bali 20 bamulibungano lyesu bakabombekwa. Aboobo ntolinyumfwa ayi ndi kumusena weelete ‘kucata nswi.’” (Maako 1:17, 18) Ba Géraldine abalo bakaamba ayi: “Ndacaana shoolwe shiinji nshentana kuyeeyelawo.”

Ba Judith bakalinga balongela kucishi ca America sombi bakalinga kusuni kucita shiinji muncito yakushimikila. Bakaamba ayi, “Lyoonse na ndamana kufwakashila mukwashi ku Cameroon, ndakalinga kulila mukwiinga ndakalinga kushiya shiiyo sha Baibo shiinji.” Nacibi boobo, ba Judith bakalinga kuwayawaya kuboolela ku Cameroon. Bakalinga kusebensa ncito ya maali aanji yakalinga kubacafwa kulama beshiwabo bakalinga balwashi ku Cameroon. Nacibi boobo, ba Judith bakashoma muli Yehova akuboolela alimwi  kucishi ca Cameroon. Bakaamba ayi kuli shimwi shibotu nshobayeeya nshobakalinga kucite ndyebakalinga ku America. Bakapaila kwaamba ayi Yehova abacaafwe kwaalula buumi alimwi wakabacafwa kwiinda mukuyuminishikwa nkobakatambula kuswa kumutanjilili walubasu amukaakwe.

Na bebaluka ciindi ndyebakaboolelabo kucishi ca Cameroon, balaamba ayi, “Ndakacikonsha kucafwa bantu bali 4 kuya panembo akubombekwa, mumyaaka yotatwebo.” Ba Judith bakatalika kusebensa mbuli painiya ulibetele. Pacecino ciindi, bali muncito yaciindi coonse abeebaabo ba Sam-Castel, batoosebensa mbuli mutanjilili walubasu. Ano ino nshiinshi shakacitika kubashali babo basankwa? Ba Judith amukwashi wabo bakacikonsha kucana cipatela mucishi cimwi cakasumina kubacita opaleshoni beshiwabo. Alimwi cakabotaako ncakwaamba ayi opaleshoni yakeenda kabotu.

Mukwesu waliina lya Victor wakalongela kucishi ca Canada. Pesule lyakubelenga Njashi Yamulindilishi yakalinga kwaamba pa lwiiyo lwapeculu, wakatalika kuyeeya pa lwiiyo lwakwe. Aboobo wakacileka cikolo ca yunivesti akutalika cikolo ca myaaka iniinibo. Wakaamba ayi: “Ndakacikonsha kucana ncito paciindi ciniinibo akucita bupainiya, cintu ncondakalinga kusunishishi kucita.” Mukuya kwaciindi, mukwesu Victor wakeeba nankashi waliina lya Caroline, lyalo bakaya mukufwakasha kucishi ca Cameroon. Ndyebakalinga kufwakasha ku ofesi yamusampi, bamakwesu bakabayuminisha kuyeeyawo na inga besa mukusebensela ku Cameroon. Ba Victor bakaamba ayi, “Taakuwo ncetwakabona ayi inga catukasha kucita boobo, alimwi twakalinga kukala kale buumi bwakutalila shiinji.” Nabi kwaamba ayi ba Caroline bakalinga kuciteko mapensho amwi akuciswa, bakasala kwaamba ayi balonge.

Ba Victor aba Caroline bakatalika kusebensa mbuli bapainiya baciindi coonse kwaamba ayi bacafwe bantu baanji bakalinga kusuni kwiiya cancine. Kwakaciindi, bakacikonsha kukala kwakubula kusebensa ceebo ca maali ngobakalinga balamaako. Pesule, bakaya mukusebensaako kucishi ca Canada kwa myeenshi iniini, akuboolela alimwi kucishi ca Cameroon kwaamba ayi batolelele bupainiya. Ino nshoolwe nshi nshobakacana? Bakacanika ku Cikolo ca Bashimikila sha Bwaami, kusebensa mbuli bapainiya balibetele, alimwi pacecino ciindi mbasebenshi baciindi coonse muncito yakuyaka. Ba Victor bakaamba ayi, “Kuswa kumusena nkotwakalinga twashibila kwakapa kwaamba ayi tubone Yehova mbwaacafwa bantu bakwe kuba amibo ya Bwineklistu.”

Mu 2002, ba Alain abo bakalinga pacikolo ca yunivesti ku Germany, bakabelenga ka tilakiti kacite mutwi waamba ayi Youths​—What Will You Do With Your Life? Makani ngobakabelenga akabapa kutalika kuyeeya shakucita shimwi shipya. Mu 2006, bakacanika ku cikolo ca Ministerial Training School alimwi bakatumwa kuya mukusebensela ku Cameroon, kucishi cinemishaabo.

Ndyebakalongela ku Cameroon, ba Alain bakacana ncito yapakaciindi. Mukuya kwaciindi, bakacana ncito imwi ya maali aanji, ano bakalisukama ayi inga yabapa kutaba aciindi cikwene kabotu cakwaabanamo lubasu muncito yakushimikila. Aboobo ndyebakabeeta ayi batalike kusebensa mbuli painiya ulibetele, bakasumina peenkapo. Bakabanjisha ncito bakabalwiita ayi batotalika kubafolesha maali aanji, sombi ba Alain bakakaka coolwe ico akusumina kuba painiya ulibetele. Mukuya kwaciindi, ba Alain bakeeba nankashi wa liina lya Stéphanie, uyo wakekala ku France kwa myaaka iinji. Ino ngamapensho nshi ngobakacana ndyebakaboolela ku Cameroon?

Ba Stéphanie bakaamba ayi: “Ndakatalika kuciswa ciswa, sombi ndakacikonsha kushilikwa lyalo akunyumfwako kabotu.” Beebene aba bakacana shoolwe ceebo cakuliyumya kwabo. Ba Alain  bakaamba ayi: “Ndyetwakaya mukushimikila kumushi kulaale kwiitwa ayi Katé, twakacana bantu baanji bakalinga kusuni kwiiya Baibo. Mukuya kwaciindi twakacikonsha kunoocita shiiyo sha Baibo pafooni. Bobilo pa beshikwiiya Baibo aba bakabombekwa, aboobo kwakabikwa bubaambo bwa likoto lya beshikushimikila.” Ba Stéphanie bakaamba ayi: “Taakuwo cintu cipa lusangalalo abuumbi kwiinda kucafwa muntu kulyaaba kuli Yehova. Kusebensela kuno kwatupa kucana lusangalalo lwancinencine.” Pacecino ciindi, ba Alain aba Stéphanie batoosebensa muncito yaciindi coonse yakufwakashila mabungano.

Ba Gisèle bakabombekwa ciindi ndyebakalinga kucikolo ca bu dokota ku Italy. Bakayuminishikwa acakubonenaako cakukala buumi bwakutalila shiinji cakatondesha bapainiya beebene bakalinga kubaiisha Baibo, aboobo abalo bakalinga kusuni kucita shiinji muncito yakushimikila. Bakatalika bupainiya bwaciindi coonse kabacili pacikolo.

Ba Gisèle bakalinga kusuni kuboolela kumishaabo ku Cameroon kwaamba ayi bakacikoonshe kucita shiinji muncito yakwe Yehova, sombi bakalinga kucite shakulisukama. Bakaamba ayi, “Ndakalisukama abuumbi ceebo cakuyeeya kwaamba ayi ndakalinga kuyandika kushiya beshicibusa, beshikamukowa alimwi acoolwe cakukala mucishi ca Italy.” Nacibi boobo, mu May 2016, ba Gisèle bakaboolela kucishi ca Cameroon. Mukuya kwaciindi, bakeebwa kuli ba Léonce, alimwi ofesi yamusampi waku Cameroon yakabalwiita ayi inga balongela kutauni iitwa ayi Ayos, uko kwakalinga beshikushimikila baniini.

Ino buumi bwakalinga buyani ku Ayos? Ba Gisèle bakaamba ayi: “Liinji twakalinga kumana nsondo shiinji kwakubula malaiti, alimwi tatwakalinga kucikonsha akubika mulilo mumafooni esu. Liinji mafooni esu taakalinga kusebensaawo. Ndakeeya bwa kutelekela pamulilo wa nkuni, alimwi twakalinga kuya mukuteka maanshi mashiku pamawilibala uku katucite amatooci, mukwiinga nceciindi bantu ndyebakalinga kuceya.” Ino nciinshi cakabacafwa kuliyumya? Ba Gisèle bakaamba ayi: “Shintu shakatucafwa ngu mushimu wakwe Yehova, ngonjebeneakwe ucafwa, kuyuminishikwa alimwi alucafwo lwa maali ndotwakalinga kutambula ciindi aciindi kuswa kumukwashi abeshicibusa.”

Sa ba Gisèle balikondetwe kwaamba ayi bakaboolela kucishi cinemishaabo? “Ee Cakutoonsha!” Bakaamba ayi, “ndyetwakalongabo kwakalinga mapensho amwi alimwi akulinyumfwa kulefuka, ano ndyetwakakomabo mapensho ayo, nebo abeebangu twakalinyumfwa anga twakacita nshotwakalinga kuyandika kucita. Tulashoma muli Yehova alimwi tulalinyumfwa kuba pafwiifwi abuumbi anguwe.” Ba Léonce aba Gisèle bakacanika ku Cikolo ca Bashimikila sha Bwaami, alimwi pacecino ciindi batoosebensa mbuli bapainiya balibetele bapakaciindi.

Bweenka mbuli beshikucata nswi batondesha kutaloonda kwaamba ayi bacikoonshe kucata nswi shiinji nabi ndyebacana mapensho, abo baboolela kucishi cinemishaabo balalyaaba mukuliyandila kwaamba ayi bacafwilishe baabo basuni kunyumfwa makani aBwaami. Alimwi ncakutatoonsha kwaamba ayi Yehova alaakubapa shoolwe beshikushimikila aba basebensa cankusu ceebo calusuno ndobatondesha paliina lyakwe. (Neye. 5:19; Ebu. 6:10) Na mwakalongela kucishi cimwi lyalo mwanyumfwa kwaamba ayi kucishi cinemishaanu kuli beshikushimikila baniini, sa mulaakuboolela? Na mukacite boobo, Yehova alaakumupa shoolwe shiinji abuumbi.​—Tus. 10:22.