Ndakashalwa mu 1983. Ndyendakalinga kukula ndakalingabo kabotu bweenka mbuli mwaana uli woonse, ano ndyendakwanya myaaka 10, ndakatalika kunyumfwa kucisa abuumbi mubili woonse. Ndipakeenda myaaka yobilo, ndakacileka kweenda. Bushiku bumwi ndyendakabuka ndakaalilwa kweenda, ndakeelesha kunyanyasha myeendo sombi ndakaalilwa mukwiinga nkusu shakamanina limwi. Kuswabo bushiku bulya, nshina kweendawo alimwi. Alimwi bulwashi bwangu bwakapa kwaamba ayi ncileke kukula. Kushikila asunu ndimuniini bweenka mbuli mwanike.

Ndipakeenda myeenshi iniini kuswa ciindi ndyendakatalika kuciswa, Bakamboni Bakwe Yehova bobilo bakamfwakashila. Lyoonse ndakalinga kuyuba na kwesa beensu, ano pabushiku ubu nshina kuyuba. Ndyebakalinga kunshimikila sha Paladaiso, ndakeebaluka nshendakanyumfwawo ndyendakalinga kucite myaaka 5. Paciindi cilya, ba mishonali ba liina lya Jethro, bakalinga kukala ku Suriname, bakalinga kusa mukufwakasha mumushi motwakalinga kukala linkanda lyomwi pa mweenshi alimwi bakalinga kwiisha bata makani amu Baibo. Ba Jethro bakalinga kucite nkumbu. Ndakalinga kubasuni abuumbi. Alimwi ndakalinga kuya abakapa kumabungano amwi aBakamboni akalinga kucitilwa mumushi mumisheesu. Aboobo ba Florence, abo bakalinga bomwi pa banakashi bobilo bakesa mukunshimikila ndyebakanjipusha ayi sa inga wasuna kwiiya shiinji, ndakasumina.

Ba Florence bakesa alimwi abeebaabo ba Justus, lyalo bakatalika kunjiisha Baibo. Ndyebakabona ayi nshicishiiwo kubelenga, bakatalika kuncafwa kwiiya kubelenga. Ndipakeenda ciindi, ndakatalika kubelenga neenka. Bushiku bumwi, beebene aba bakandwiita ayi bakapekwa ncito yakushimikila ku Suriname. Cakabica abuumbi mukwiinga ku Orealla takwakalingaawo wakwaamba ayi atolelele kunjisha Baibo. Nacibi boobo, cakabota ncakwaamba ayi Yehova taakwe kundubaako.

Tapana kwiinda aciindi cilaamfu abuumbi painiya waliina lya Floyd wakesa ku Orealla, aboobo wakancana ndyaakalinga kushimikila kuŋanda aŋanda. Ndyaakandwita sha kwiiya Baibo, ndakamweta mweta. Aboobo wakanjipusha ayi “Ino utoomweta mweta nshi?” Ndakamulwiita ayi ndakamanisha kale kwiiya buloshuwa ya What Does God Require of Us? alimwi ndakalinga ndatalika akwiiya libuku lya Knowledge That Leads to Everlasting Life. * Ndakamusansulwiita acakapa kwaamba ayi ciiyo citatoleleli. Ba Floyd bakatolelela kunjisha lubasu lwakalinga lwacala mulibuku lya Knowledge, ano abalo bakabatuma kuya mukusebensela  kumusena kumwi. Ndakacaala kaantacite wakunjiisha Baibo alimwi.

Nacibi boobo, mu 2004, bapainiya balibetele bobilo ba Granville aba Joshua, bakatumwa kusa mukusebensela ku Orealla. Bakalinga kushimikila kuŋanda aŋanda, aboobo bakancana. Ndyebakanjipusha na inga ndasuna kwiiya, ndakamweta mweta. Ndakabasenga ayi ntalike kwiiya mulibuku lya Knowledge kuswabo kumatalikilo. Ndakalinga kusuni kubona na batoonjisha shintu sheenka shakanjiisha bakalinga kunjisha pakutaanguna. Ba Granville bakandwiita ayi mabungano alabaako mumushi mweenka mumisheesu. Nabi kwaamba ayi ndakekala paŋanda kwakubula kuya kuli koonse kwa myaaka 10, ndakalinga kusuni kucanikaako. Aboobo ba Granville bakesa mukumbwesa akumbika pakacinga kabalema akuntola ku Ŋanda ya Bwaami.

Mukuya kwaciindi, ba Granville bakanjuminisha ayi ntalike kwaabanamo lubasu Mu Cikolo Cancito Yeendeleshekwa aLesa. Bakaamba ayi: “Uli mulema, sombi ulacikonsha kwaamba. Bushiku bumwi, ulaakwaamba likani lya bantu boonse. Ulaakucikonsha.” Maswi ngobakandwiita akanjuminisha.

Ndakatalika kwaabanamo lubasu muncito yakushimikila pomwi aba Granville. Nacibi boobo, kweensha kacinga kabalema munshila sha mumushi shatakalinga kabotu cakalinga ciyumu. Aboobo ndakasenga ba Granville kwaamba ayi banoonjensha pa wilibala. Bubaambo ubu bwakasebensa kabotu abuumbi. Mu April 2005, ndakabombekwa. Pesule, bamakwesu bakatalika kunjisha bwakulama mabuku alibungano alimwi akusebensela ku shilimba mu Ŋanda ya Bwaami.

Cakabicako, mu 2007 bata bakafwa ndyebakalinga pamaanshi mubwaato. Mukwashi wesu wakabicilwa abuumbi. Ba Granville bakapaila andiswe alimwi akubandika malembo ayuminisha kuswa mu Baibo. Ndipakeenda myaaka yobilo, twakapolelwa likatasho alimwi lyakatumana nkusu—mukwesu Granville wakafwa ndyaakalinga pamaanshi mubwaato.

Libungano lyesu liniini lyakalinga mubuumba, lyakacaalabo amusebenshi ucafwilisha womwi kwakubula munene. Lufu lwa mukwesu Granville lwakancisa abuumbi; wakalinga shicibusa wangu ngondakalinga kusuni abuumbi. Wakancafwa abuumbi lwakumushimu alimwi alwakumubili. Kubungana kwakaboolawo kuswa ciindi ndyaakafwa, ndakalinga kucite lubasu lwa kubelenga mapalagilafu paciiyo ca Njashi Yamulindilishi. Ndakacikonshabo kubelenga mapalagilafu obilo, lyalo ndakatalika kulila alimwi minsonshi yakatolelela kuloka. Aboobo ndakaswabo pa pulatifomu.

Ndakatalika kulinyumfwako kabotu bamakwesu kuswa kulibungano limwi ndyebakesa mukutucafwa ku Orealla. Alimwi ofesi yamusampi yakatuma painiya ulibetele mukwesu Kojo. Ndakasangalala abuumbi bama alimwi amwanike wangu musankwa ndyebakatalika kwiiya Baibo lyalo akubombekwa. Lyalo mu March 2015, ndakasalwa kusebensa mbuli musebenshi ucafwilisha. Ndipakeenda ciindi, ndakaamba likani lya Baibo kwaciindi cakutaanguna. Bushiku bulya ndakalinga kumweta mweta akulosha minsonshi ceebo cakwiibaluka maswi akandwiita mukwesu Granville myaaka yakwisule ayi: “Bushiku bumwi, ulaakwaamba likani lya bantu boonse. Ulaakucikonsha.”

Kwiinda mumapulogilamu apa JW Bulodikasti^®, ndesa mukushiba kwaamba ayi kuli Bakamboni bamwi bali mubukaalo bweenka mbuli mbombeteemo. Ano nabi kwaamba ayi mbalema, balacita shiinji alimwi balisangalete mubuumi bwabo. Anebo kuli shimwi nshencikoonsha kucita. Ndakalinga kusuni abuumbi kupa Yehova shoonse nsheenga ndacikonsha, aboobo ndakatalika bupainiya. Alimwi mu mweenshi wa September 2019 ndakatambula makani ngontana kuyeeyelawo! Ndakasalwa kusebensa mbuli munene mulibungano mwakalinga beshikushimikila bashika kuma 40.

Ndalumba abuumbi kubamakwesu abenankashi bakanjiisha Baibo akuncafwa kwaabanamo lubasu muncito yakushimikila. Alimwi ciinditeewo ndalumba kwaamba ayi Yehova taakwe kundubaako.