1. Ino 2 Bene Kolinto 3:1-3 ilaamba nshi citucafwa kushiba kwaamba ayi kwiisha muntu Baibo akubona mbwaya panembo ncoolwe cilibetele kuswa kuli Yehova? (Amubone cikope cili pa peeji yakutaanguna.)

INO mulalinyumfwa buyani na mwabona shikwiiya Baibo ngomushi wabombekwa? Ncakutatoonsha mulasangalala. (Mate. 28:19) Alimwi lusangalalo luleendaawo na ndimwe mwakalinga kumwiisha Baibo! (1 Tesa. 2:19, 20) Bashikwiiya bakabombekwa conoono bali anga ‘ngamakalata abotu akulumba,’ kuteshibo kubaabo bakalinga kubaiisha sombi akulibungano lyoonse.​—Amubelenge 2 Bene Kolinto 3:1-3.

2. (a) Ino ngumwiipusho nshi uyandika ngotweelete kuyeeyawo, alimwi ino nceebonshi? (b) Ino kucita ciiyo ca Baibo cilaamba nshi? (Amubone futunoti.)

² Cilayuminisha abuumbi kushiba kwaamba ayi myaaka 4 yaiinda, mweenshi uli woonse nsengwe yoonse twakalinga kucita shiiyo sha Baibo * shishika kuma 10,000,000. Alimwi mu myaaka yeenka iyi, bantu beendilila 280,000 bakalinga kubombekwa mbuli Bakamboni Bakwe Yehova alimwi mbuli beshikwiiya bakwe Yesu Klistu bapya mwaaka a mwaaka. Ino inga twacita buyani kwaamba ayi tucafwe bantu baanji kuya panembo akubombekwa? Mukwiinga Yehova wapa bantu coolwe cakwaamba ayi babe Bakamboni bakwe, tulisuni kucita nsheenga twacikonsha kwaamba ayi tubacafwe kuya panembo cakufwambaana  akubombekwa. Ciindi camana!​—1 Koli. 7:29a; 1 Pita 4:7.

3. Ino nshiinshi nsheshi twiiye mumutwi uyu pamakani ashiiyo sha Baibo?

³ Mukwiinga kucafwa bantu kuba bashikwiiya ncintu ciyandika abuumbi, Likoto Litanjilila lyakalwiita bamakwesu kumaofesi amisampi kwaamba ayi balange lange akubona nsheenga twaciita kwaamba ayi tucafwe shiiyo sha Baibo kuya panembo akubombekwa. Mumutwi uyu autokonkelawo, tutobandika nsheenga tweeya kuswa ku bapainiya, bamishonali, alimwi abamatanjilili balubasu bacishi kabotu ncito yakushimikila. * (Tus. 11:14; 15:22) Tutokwiiya nsheenga shikwiisha Baibo alimwi ashikwiiya wacita kwaamba ayi ciiyo ca Baibo ciswitilile. Mumutwi uyu, tutokwiiya shintu shosanwe shikwiiya uli woonse nshaeelete kucita kwaamba ayi acikoonshe kuya panembo akubombekwa.

4. Ino kutola ciindi ciniinibo kwiiya Maswi akwe Lesa inga kwapa shikwiiya kutacita buyani?

⁴ Bamakwesu abenankashi bamwi balacita shiiyo sha Baibo ndyebeemfwi pamulyango wa mwine ŋanda. Nabi kwaamba ayi kucita boobo inga kwacafwa muntu kusuna kwiiya Baibo, mibandi iyi ilababo yakaciindi kaniini alimwi mpashi tatuciti boobo nsondo ansondo. Kwaamba ayi bacafwe muntu kutolelela kusuna kwiiya, bamwi baleepusha liina a fooni namba ya mwine ŋanda akumutumina na kumulembela meseji kwaamba ayi babandike akwe makani amu Baibo kabatana kumufwakashila. Inga batolelela kucita boobo kwa myeenshi sombi kwakubula kutalika ciiyo ca Baibo. Ano sa shikwiiya inga waya panembo akulyaaba akubombekwa na ulatolabo ciindi ciniini kwiiya Maswi akwe Lesa? Sobwe napaceyi.

5. Kweelana a Luka 14:27-33, ino Yesu wakaamba nshi nsheenga twaciita kwaamba ayi tuyuminishe shiiyo shesu sha Baibo?

⁵ Paciindi cimwi, Yesu wakaamba cakubonenaako citondesha muntu nshaeelete kucita na alisuni kuba shikwiiya wakwe. Wakaamba sha muntu usuni kuyaka ŋanda alimwi a mwaami usuni kuya kunkondo. Yesu wakaamba ayi shikuyaka alyeelete kutaanguna kukala panshi akubona ‘shiyandika’ kwaamba ayi acikoonshe kuyaka, alimwi mwaami alyeelete kutaanguna kubona na bashilumamba bakwe inga bacikonsha kulwana nkondo. (Amubelenge Luka 14:27-33.) Yesu wakalinga kucishi ayi muntu usuni kuba shikwiiya wakwe alyeelete kutaanguna kuyeeyawo cakubikila maano  na inga wacikonsha kuba shikwiiya wakwe. Aboobo, tulyeelete kuyuminisha shiiyo shesu sha Baibo kunokwiiya nsondo ansondo. Ino inga twabayuminisha buyani?

6. Ino nshiinshi nsheenga twaciita kwaamba ayi ciiyo citalike kuya panembo?

⁶ Citaanshi amunungeeko ciindi cakwiiya. Mpashi inga mweelikaawo vesi yomwi na obilo lyoonse ndyemwaya mukwiiya. Na mwine ŋanda washibila, amumusenge na inga cakonsheka kukalaako kwaamba ayi mubandike kabotu. Nsheenga waamba inga shamucafwa kushiba na ulabona kuyandika kwa ciiyo ca Baibo. Mukuya kwaciindi, inga mwamwiipusha na inga wasumina kwaamba ayi munokwiiya mankanda obilo munsondo, kwaamba ayi afwambaane kuya panembo. Nacibi boobo, teshi kwiiyabo lyomwi na mankanda obilo munsondo kuyandika.

7. Ino shikwiisha inga walibambila buyani kaatana kuya mukucita ciiyo ca Baibo?

⁷ Mbuli shikwiisha, mulyeelete kulibambila kabotu kamutana kuya kushiiyo. Inga mwatalika kulibambila kwiinda mukubelenga lubasu loonse ndomutooya mukwiisha akubelenga malembo atondeshekwa. Amushinyumfwishishe kabotu shiteente shinene. Amuyeeye shitokwaamba mutwi waciiyo, tumitwi tuniini, miipusho yakwiiya, malembo atondeshekwa ayi “amubelenge”, shikope, alimwi amavidyo ali woonse eenga amucafwa kusansulula kabotu makani. Lyalo amuyeeye mbweenga mwasansulula makani ayo munshila yuubu, kwaamba ayi shikwiiya acikoonshe kunyumfwishisha akukonkela nshatokwiiya.​—Neye. 8:8; Tus. 15:28a.

8. Ino nshiinshi nsheenga tweeya palilembo lya Bene Kolose 1:9, 10 pamakani akupaililako shikwiiya?

⁸ Ndyemutoolibambila, amupaile akusenga Yehova kwaamba ayi acafwe shikwiiya wanu. Amupaile kwaamba ayi Yehova amucaafwe kwiisha Baibo munshila yeenga ya mushika pamoyo shikwiiya. (Amubelenge Bene Kolose 1:9, 10.) Amuliipushe na kuli lubasu ndomutoobona ayi shikwiiya inga waalilwa kunyumfwisha na kushoma. Mutaluubi kwaamba ayi luyaando lwanu ndwakumucafwa kuya panembo akubombekwa.

9. Ino shikwiisha inga wacita buyani kwaamba ayi acafwe shikwiiya kulibambila ciiyo? Amusansulule.

⁹ Tutoolangila kwaamba ayi na ciiyo ca Baibo kacicitwa lyoonse, shikwiiya inga watondesha kulumba pashintu Yehova a Yesu nshebakacita, lyalo akusuna kwiiya shiinji. (Mate. 5:3, 6) Kwaamba ayi afubileemo mushintu  nshatokwiiya, shikwiiya alyeelete kubikilaako maano ndyatokwiiya. Aboobo, amumucaafwe kushiba kuyandika kwa kulibambila limwi kwiinda mukubelengela limwi akuyeeya mbweenga wakonkela nshatokwiiya. Ino inga mwamucafwa buyani? Amulibambile ciiyo pomwi kwaamba ayi ashibe mbwaeelete kulibambila. * Amumucaafwe kushiba mbweenga wacana shikumbulo shilulamite mwiipusho, akumutondesha mbweenga camucafwa kwiibaluka cikumbulo na kacongabo maswi ali paciteente cinene. Lyalo amumuyuminishe kukumbula mumaswi akwe. Ici cilaakumucafwa kushiba na wanyumfwishisha nshatokwiiya. Nacibi boobo, kuli acimwi nceenga mwamuyuminisha kucita.

10. Ino nceebonshi kubelenga Baibo bushiku abushiku kulayandika, alimwi ino shikwiiya alyeelete kucita buyani kwaamba ayi afubileemo?

¹⁰ Kwiilika pakwiishikwa nsondo ansondo, shikwiiya inga wafubilaamo na weeya kulicitila shintu shimwi bushiku abushiku. Alyeelete kubandika a Yehova. Munshila nshi? Kwiinda mukukutika akupaila kuli Yehova. Inga wakutika kuli Lesa kwiinda mukubelenga Baibo bushiku abushiku. (Joshu. 1:8; Kulu. 1:1-3) Amumutondeshe mbweenga wasebensesha “Mulongo Wakubelenga Baibo” ucanika pa jw.org. * Alimwi kwaamba ayi afubileemo, tulyeelete kumuyuminisha kuteelabo pakubelenga Baibo, sombi kubelenga akukutumana kuyeeya nshatokwiiya pali Yehova ambweenga wakonkela nshatokwiiya.​—Milimo 17:11; Jemu. 1:25.

11. Ino nshiinshi sheenga shacafwa shikwiiya kwiiya bwakupaila, alimwi ino nceebonshi kupaila kuli Yehova lyoonse kulayandika?

¹¹ Amuyuminishe shikwiiya wanu kubandika a Yehova kwiinda mukupaila bushiku abushiku. Amupaile camoyo woonse ndyemutotalika ciiyo andyemwamanisha, alimwi amumwilikeemo mumupailo shikwiiya. Kunyumfwa mbomutoopaila camoyo woonse kulaakumucafwa kushiba bwakupaila kuli Yehova Lesa kwiinda muliina lyakwe Yesu Klistu. (Mate. 6:9; Joni 15:16) Amuyeyebo kubelenga Baibo bushiku abushiku (kukutika kuli Yehova) alimwi akupaila (kubandika a Yehova) mbweshi kukacafwe shikwiiya wanu kusena pafwiifwi a Lesa! (Jemu. 4:8) Na shikwiiya wanu kaacita sheeshi bushiku abushiku, alaakuya panembo akulyaaba alimwi akubombekwa.

12. Ino shikwiisha inga wacita buyani kwaamba ayi acafwe shikwiiya kuba abushicibusa a Yehova?

¹² Nshatokwiiya paciiyo ca Baibo shilyeelete kumushika pamoyo kuteshi kweelabo kumutwi. Ino nceebonshi? Moyo wesu​—uyo wiilikaawo nshetukumbwa, nshetuyeeya, alimwi ambotulinyumfwa​—ngootupa kucita shintu. Yesu wakaiisha bantu baanji alimwi bakalinga kunyumfwa kabotu kwiiya kuli nguwe. Nacibi boobo, bantu baanji bakatalika kumukonkela ceebo cakwaamba ayi nshaakabaiisha shakabashika pamoyo. (Luka 24:15, 27, 32) Shikwiiya wanu alyeelete kunoobona Yehova mbuli Muntu wancinencine, uyo ngweenga wacikonsha kuba abushicibusa anguwe, akunoomubona mbuli Ishi, Lesa wakwe alimwi shicibusa wakwe. (Kulu. 25:4, 5) Ndyemutoocita ciiyo ca Baibo, amucafwe shikwiiya kubikila maano kumibo yakwe Yehova. (Kulo. 34:5, 6; 1 Pita 5:6, 7) Mumutwi uli woonse ngomutobandika, amubikile maano kuyuminisha mibo yakwe Yehova. Amucafwe shikwiiya kulumba Yehova pamibo yakwe ibotu mbuli, kubota moyo ankuumbu. Yesu wakaamba ayi ‘mulawo unene alimwi utaanshi’ ngooyu, ‘suna Yehova Lesa wako.’ (Mate. 22:37, 38) Amweeleshe kucafwa shikwiiya Baibo wanu kusuna Lesa camoyo woonse.

13. Amwaambe cakubonenaako ca mbweenga mwacafwa shikwiiya kwiiya pamibo yakwe Yehova.

¹³ Ndyemutoobandika ashikwiiya, amumulwiite shikwiiya cimupa kusuna Yehova. Kucita boobo inga kwamucafwa kushiba kwaamba ayi alakwe alyeelete kuba shicibusa wakwe Lesa akumusuna. (Kulu. 73:28) Kucakubonenaako, na kuli maswi amuyuminisha mulibuku ndyemutomwiisha na lilembo lyaamba pamibo yakwe Yehova mbuli lusuno, busongo, bululami, na nkusu, amumulwiite ayi nceceebo comwi cimupa kusuna Ishiwesu wakwiculu. Kuli cintu acimwi shikwiiya Baibo woonse ncaeelete kucita kwaamba ayi aye panembo akubombekwa.

14. Ino Bene Ebulu 10:24, 25 ilatulwiita makani nshi eenga apa shikwiiya kunoocanika kumabungano?

¹⁴ Soonse tulisuni kwaamba ayi beshikwiiya Baibo besu baye panembo akubombekwa. Nshila yomwi iyandika mbweenga twabacafwa nkwiinda mukubayuminisha kucanika kumabungano. Beshikushimikila bacishi kabotu kwiisha balaamba ayi beshikwiiya Baibo beshi kusa kumabungano balafwambaana kuya panembo. (Kulu. 111:1) Beshikwiisha bamwi balasansulwiita beshikwiiya babo kwaamba ayi kuli shiinji nsheenga beeya na besa kumabungano, shiinda pasheesho nshobeeya paciiyo  ca Baibo. Amubelenge Bene Ebulu 10:24, 25 pomwi ashikwiiya Baibo, akumulwiita shoolwe nsheenga wacana na keesa kumabungano. Amumutondeshe vidyo ya Nciinshi Cicitika pa Ŋanda ya Bwaami? * Amumucaafwe shikwiiya wanu kushinisha kunoosa kumabungano lyoonse.

15. Ino nshiinshi nsheenga twaciita kwaamba ayi tuyuminishe shikwiiya kunoosa kumabungano lyoonse?

¹⁵ Ino inga mwacita buyani na shikwiiya Baibo wanu taana kusako kale kumabungano na mpashi alesakobo cimwi ciindi? Amumuyuminishe kwiinda mukumulwiitako nshomwakeeya kumabungano aconoono. Kucita boobo inga kwayuminisha shikwiiya muciindi cakumulwiitabo ayi ukese. Amumupe Njashi Yamulindilishi na Kabuku Kamabungano Abuumi Anciito ka conoono katoosebenseshekwa. Amumutondeshe sheshi shikabandikwe kumabungano atokonkelaawo, akumwiipusha lubasu ndwatoobona ayi inga lwamusangalasha. Nsheshi akeeye na akese kumabungano kwaciindi cakutaanguna teshi shikeelane anshakabona akunyumfwawo kubupailishi buli boonse. (1 Koli. 14:24, 25) Alaakucana bantu bacite cakubonenaako cibotu nceenga wakonkela akumucafwa kuya panembo akubombekwa.

16. Ino nshiinshi shiyandika kwaamba ayi tucafwe shikwiiya Baibo kuya panembo akubombekwa, alimwi ino nshiinshi nsheshi tukeeye mumutwi utokonkelaawo?

¹⁶ Ino inga twacita buyani kwaamba ayi tucafwe shikwiiya kuya panembo akubombekwa? Inga twayuminisha shikwiiya Baibo womwi awomwi kubikila maano kuciiyo kwiinda mukwiiya nsondo ansondo akulibambila limwi. Alimwi tulisuni kumuyuminisha kunobandika a Yehova bushiku abushiku akuba abushicibusa anguwe. Tulisuni kumuyuminisha kunoosa kumabungano. (Amubone kabokosi kacite mutwi utokwaamba ayi “ Shikwiiya Nshaeelete Kucita Kwaamba ayi Aye Panembo Akubombekwa.”) Nacibi boobo, bweenka mbweshi tukeeye mumutwi utokonkelaawo, kuli shintu shimwi shosanwe nsheenga shikwiisha Baibo wacita kwaamba ayi acafwe shikwiiya kuya panembo akubombekwa.