1. Ino nciinshi cibotu kwiindaawo nceenga muntu wasala kucita?

LIINJI, shisala bashali shilesa mukukuma buumi bwa bana babo kunembo. Na bashali tabana kusala kabotu, inga balengesha ayi bana babo bacane mapensho. Ano na basala kabotu, inga bacafwa bana babo kuba abuumi busangalasha kunembo. Nacibi boobo, baana abalo balyeelete kusala kabotu. Cibotu kwiindaawo nceenga muntu wasala kucita nkusebensela Ishiwesu wakwiculu shilusuno Yehova.​—Kulu. 73:28.

2. Ino Yesu abashali bakwe bakasala kucita nshi?

² Bashali bakwe Yesu bakalinga kushinishite kucafwa bana babo kusebensela Yehova, alimwi nshobakasala shakatondesha patuba kwaamba ayi kusebensela Yehova cakalinga cintu ciyandika mubuumi bwabo. (Luka 2:40, 41, 52) Yesu alakwe wakasala kucita shintu shakamucafwa kukumanisha luyaando lwakwe Yehova. (Mate. 4:1-10) Yesu wakaba muntu ucite nkumbu, ushomeka, alimwi utacite boowa. Mushali uli woonse usuni Yehova inga wakondwa abuumbi kuba amwaana ucite mibo mbuli yeeyi.

3. Ino njimiipusho nshi njeshi twiiye mumutwi uyu?

³ Mumutwi uyu, tutoobandika miipusho iyi: Ino Yehova wakasala nshi pali Yesu? Ino bashali Beneklistu inga beeya nshi kuswa kucakubonenaako cakwe Josefu a Maliya pamakani anshobakasala? Alimwi ino Beneklistu bacanike inga beeya nshi pashintu Yesu nshaakasala?

4. Ino Yehova wakamusalila bashali bakalinga buyani Yesu?

⁴ Yehova wakasala bantu bakalinga kweelela kabotu kuba bashali bakwe Yesu. (Mate. 1:18-23; Luka 1:26-38) Makani akaamba Maliya ngotucana mu Baibo alatondesha ayi wakalinga kusuni Yehova  abuumbi a Maswi akwe. (Luka 1:46-55) Alimwi Josefu alakwe mbwaakacita ndyaakatambula butanjilishi kuswa kuli Yehova, cakatondesha patuba kwaamba ayi wakalinga muntu ulemeka Lesa alimwi wakalinga kusuni kucita shimusangalasha.​—Mate. 1:24.

5-6. Ino mbuumi buli buyani Yehova mbwaakasuminisha Mwanaakwe kwiindaamo?

⁵ Yehova taakwe kusalila Yesu bashali babile. Mulambu wakabenga Josefu a Maliya Yesu ndyaakashalwa ulatondesha ayi tabakalinga babile. (Luka 2:24) Mpashi Josefu wakalinga kucite kaanda mwakalinga kusebensela ncito yakwe ya bukapenta ku Nasaleti. Cilyeelete tabakalinga kucite maali na shintu shiinji, mukwiinga mukuya kwaciindi bakaba abaana 7 na kwiindaawo.​—Mate. 13:55, 56.

⁶ Yehova wakashitilisha Yesu kumapensho amwi, sombi kuteshi kumapensho oonse. (Mate. 2:13-15) Kucakubonenaako, Yesu wakalinga kucite beshikamukowa batakalinga kumushoma. Ano amuyeeyebo Yesu mbwaakalinyumfwa kuba abeshikamukowa batakalinga kumushoma ayi ngu Mesiya pakutaanguna. (Maako 3:21; Joni 7:5) Alimwi mpashi Josefu wakafwa Yesu kaacili mwanike, alimwi cilyeelete cakalinga ciyumu abuumbi kuli nguwe. Mbuli mwaana munenebantu ici cakalinga kusansulula ayi Yesu ngowakalinga kweelete kutolelela anciito yakashiya baishi. (Maako 6:3) Yesu ndyaakakula, wakashiba shakucita kwaamba ayi alame mukwashi wakwe. Cilyeelete wakalinga kusebensa cankusu kwaamba ayi alangoole shiyandika sha mukwashi. Aboobo wakalinga kucishi kulema mbokunyumfwika pesule lya kusebensa.

7. (a) Ino njimiipusho nshi yeenga yacafwa bali mucikwati kulela kabotu bana babo? (b) Ino Tushimpi 2:1-6 inga yacafwa buyani bashali kwiisha bana babo?

⁷ Na muli mucikwati alimwi mulisuni kuba abaana, amuliipushe ayi: ‘Sa tuli bantu baliceesha alimwi babikila maano kushintu shakumushimu bweenka bwakalinga Josefu a Maliya, bantu Yehova mbweenga wasala ayi balame kateta uyandika abuumbi?’ (Kulu. 127:3, 4) Na mwakaba kale mushali, amuliipushe ayi: ‘Sa ntokwiisha bana bangu kushiba bubotu bwakusebensa cankusu?’ (Shiku. 3:12, 13) ‘Sa ndashitilisha bana bangu kumapensho na kushintu shibiibi nsheenga bacana mucishi cakwe Satana?’ (Tus. 22:3) Inga tamucikoonshi kushitilisha baana kumapensho oonse ngeenga bacana. Mukwiinga ico inga tacikonsheki. Sombi inga mwabacafwa kulibambila limwi kwiinda mukutolelela kubaiisha munshila yalusuno mbweenga  bacinka manungo mu Maswi akwe Lesa ndyebacana mapensho. (Amubelenge Tushimpi 2:1-6.) Kucakubonenaako, na shikamukowa wacileka kusebensela Yehova, amusebenseshe Maswi akwe Lesa kucafwa bana banu kushiba kuyandika kwa kutolelela kushomeka kuli Yehova. (Kulu. 31:23) Na muntu ngomusuni wafwa, amucafwe bana banu kwiinda mukubatondesha Malembo eenga abacafwa kuliyumya akucana luumuno.​—2 Koli. 1:3, 4; 2 Timo. 3:16.

8. Kweelana a Dutolonomi 6:6, 7, ino mbutanjilishi nshi Josefu a Maliya mbobakakonkela?

⁸ Josefu a Maliya bakacafwa Yesu kukula kabotu akusangalasha Lesa mukwiinga bakakonkela butanjilishi bwakwe Yehova bwaamba pabashali. (Amubelenge Dutolonomi 6:6, 7.) Josefu a Maliya bakalinga kumusuni abuumbi Yehova, alimwi cintu ciyandika ncobakalinga kusuni nkucafwa bana babo kusuna Yehova bweenka mbuli mbabo.

9. Ino nshiinshi shiyandika Josefu a Maliya nshobakasala?

⁹ Josefu a Maliya bakasala kutolelela kukonkela mulongo ubotu wakucita shintu shakumushimu mbuli mukwashi. Alimwi ncakutatoonsha kwaamba ayi bakalinga kuya kumabungano nsondo ansondo ku sunagogi mutauni ya Nasaleti, alimwi aku Jelusalemu kukusekelela Pasika kwa mwaaka amwaaka. (Luka 2:41; 4:16) Mpashi ici nceciindi ndyebakalinga kwiisha Yesu abamakwabo pamakani akacitikila bantu bakwe Lesa kale kale. Alimwi mpashi nceciindi ncebakalinga kufwakashilako amisena yaambwa mu Malembo. Cilyeelete tacakalinga cuubu kutolelela kukonkela mulongo wakucita shintu shakumushimu mbuli mukwashi baana ndyebakafulilaako. Nacibi boobo, bakacana shoolwe shiinji ceebo cakucita boobo! Mukwiinga bakalinga kubika panembo shintu shakumushimu, mukwashi wabo wakatolelela kuba uyumu lwakumushimu.

10. Ino Beneklistu bashali inga beeya nshi kuswa kucakubonenaako cakwe Josefu a Maliya?

¹⁰ Ino bashali balemeka Lesa inga beeya nshi kuswa kucakubonenaako cakwe Josefu a Maliya? Cintu ciyandika abuumbi nkutondesha bana banu kwaamba ayi mulimusuni abuumbi Yehova kwiinda mushintu nshemwaamba akucita. Mutaluubi kwaamba ayi cipo ciinditeewo nceenga mwapa bana banu nkubacafwa kusuna Yehova.  Alimwi cintu comwi ciyandika abuumbi nceenga mwaciita, nkubaiisha kushiba mbweenga batolelela kuba amulongo ubotu wakucita shintu shakumushimu mbuli kwiiya, kupaila, kucanika kumabungano, alimwi akwaabanamo lubasu muncito yakushimikila. (1 Timo. 6:6) Kwiilikaawo, mulyeelete kulangweta bana banu shintu shakumubili nshebayandika. (1 Timo. 5:8) Sombi mutaluubi kwaamba ayi bushicibusa bwabo a Yehova mbweshi bukabacaafwe kupuluka mamanino abweende bwashintu ubu bubiibi akunjila mucishi cipya, kuteshi shintu shabo shakumubili sobwe.​—Ese. 7:19; 1 Timo. 4:8.

11. (a) Ino makani ngotucana pa 1 Timoti 6:17-19 inga acafwa buyani bashali kusala kabotu ndyebatoolela bana babo? (b) Ino nshakucita shili nsheenga mukwashi wanu wasuna kuyeeyawo, alimwi ino nshoolwe nshi nsheenga mwacaana? (Amubone kabokosi kacite mutwi utokwaamba ayi “ Ino Nshiinshi Nsheshi Mukacite Kunembo?”)

¹¹ Cilayuminisha abuumbi kubona Beneklistu bashali baanji mbobatoocafwa bana babo kusala shintu shakumushimu! Lyoonse balasebensela Yehova pomwi mbuli mukwashi. Balesa pomwi kumabungano ansondo ansondo alimwi akukubungana kunene. Alimwi balaabanamo lubasu amuncito yakushimikila. Mikwashi imwi balacikonsha akuya mukushimikila kumisena liinji kutashimikilwi. Bamwi balaya mukufwakasha pomwi ku Bethel na kwaabanamo lubasu muncito yakuyaka misena isebenseshekwa muncito yakwe Lesa. Mikwashi beshikusala kucita shintu ishi balasebensesha maali. Alimwi mpashi teshi cuubu kucita boobo. Nacibi boobo, Yehova alaakubapa cilambu ceebo cakulyaaba kwabo. (Amubelenge 1 Timoti 6:17-19.) Liinji baana bakula mumikwashi ili boobo balatolelela kucita shintu shibotu nshobakeeya alimwi balakondwa kwaamba ayi bashali baabo bakabalela kabotu! *​—Tus. 10:22.

12. Ino Yesu wakalinga kweelete kucita nshi ndyaakakula?

¹² Baishi Yesu ba kwiculu lyoonse balasala kabotu, abalo bashali mbwakalinga kucite pacishi capanshi bakasala cabusongo. Nacibi boobo, Yesu ndyaakakula wakalinga kweelete kulisalila mwiine. (Gala. 6:5) Bweenka mbuli muntu uli woonse, alakwe wakalinga kucite lwaanguluko lwakulisalila. Naakalinga kusuni, naakwiinga wakasala kubika panembo shimusangalasha. Muciindi cakucita boobo, Yesu wakasala kutolelela kuyumya bushicibusa bwakwe a Yehova. (Joni 8:29) Ino cakubonenaako cakwe inga cabacafwa buyani bacanike munshiku shino?

13. Ino nciinshi ciyandika Yesu ncaakasala kaacili mwanike?

¹³ Ndyaakalinga mwanike, Yesu wakasala kunoonyumfwila bashali bakwe. Taakalinga kukaka kunyumfwila bashali bakwe ceebo cakuyeeya ayi wakalinga kucishi shiinji kubeendaawo. Sombi, “wakatolelela kubanyumfwila.” (Luka 2:51, NWT) Yesu ngowakalinga munenebantu,  nkokwaamba ayi kuli mikuli imwi njaakalinga kucite alimwi cilyeelete kwaamba ayi wakacita nshaakalinga kucikonsha kwaamba ayi akumanishe mikuli iyo. Alyeelete wakasebensa cankusu kwaamba ayi ashibe ncito yakalinga kucita baishi ba Josefu akucafwa mukwashi.

14. Ino tulishi buyani ayi Yesu wakalinga kwaashi kabotu Maswi akwe Lesa?

¹⁴ Cilyeelete kwaamba ayi bashali bakwe Yesu bakamulwiita kwaamba ayi wakashalwa munshila ya caankamiko alimwi amakani akaamba beshinkombe bakwe Lesa pali nguwe. (Luka 2:8-19, 25-38) Nacibi boobo, Yesu taakwe kweelabo pakuba alushibo kuswa kusheesho nshebakamulwiita; alyeelete alakwe wakalinga kubelenga Malembo palwaakwe mwiine. Ino tulishi buyani ayi Yesu wakalinga kwaashi kabotu Maswi akwe Lesa? Tulishi boobo mukwiinga ndyaakalingabo mwanike, bafundishi ku Jelusalemu “bakakankamana ndibakanyumfwa kukumbula kwakwe kwabusongo.” (Luka 2:46, 47) Alimwi ndyaakalinga kucitebo myaaka 12 yakushalwa, Yesu wakeeya Maswi akwe Lesa abuumbi cakwaamba ayi wakalinga kushomete cakutatoonsha kwaamba ayi Yehova mbo Baishi.​—Luka 2:42, 43, 49.

15. Ino Yesu wakatondesha buyani ayi wakasala kucita kuyanda kwakwe Yehova?

¹⁵ Yesu ndyaakashiba luyaando lwakwe Yehova, wakasalawo kusumina ncito yakwe njaakapekwa. (Joni 6:38) Wakalinga kucishi kwaamba ayi bantu baanji balaakumupata. Nabi kwaamba ayi ishi teshi nshaakalinga kusuni, wakasalawo kunyumfwila Yehova. Yesu ndyaakabombekwa mu 29 C.E., incito njaakalinga kubikila maano abuumbi mubuumi bwakwe nkucita kuyanda kwakwe Yehova. (Ebu. 10:5-7) Nabi ndyaakalinga kufwa pacisamu cakupenshesha, wakatolelela kuba ushinishite kucita kuyanda kwa Baishi.​—Joni 19:30.

16. Ino nciinshi nceenga baana beeya kuswa kucakubonenaako cakwe Yesu?

¹⁶ Amunyumfwile bashali banu. Bweenka mbuli Josefu a Maliya, bashali banu tabamaninite. Nacibi boobo, Yehova wakabapa mukuli wakumushitilisha, kumwiisha, alimwi akumupa butanjilishi. Na kamukutika nshobamulwiita akubatondesha bulemu, ‘shintu shilaakumweendela kabotu.’​—Efe. 6:1-4, NWT.

17. Kweelana a Joshuwa 24:15, ino nshiinshi bacanike nshobeelete kulisalila?

¹⁷ Amusale ngweshi munoosebensela. Mulyeelete kutaanguna kumushiba kabotu Yehova,  kushiba shiilikitwe mukuyanda kwakwe, luyaando lwakwe mbolukuma buumi bwanu, akucita sheenga shamucafwa kushoma cakutatoonsha kwaamba ayi Baibo nshoyaamba pamakani aya nshancine. (Loma. 12:2) Lyalo ndyeenga mwacikonsha kusala cintu ciyandika abuumbi mubuumi, kusebensela Yehova. (Amubelenge Joshuwa 24:15; Shiku. 12:1) Na mwatolelela kukonkela mulongo wakubelenga Baibo lyoonse akwiiya, mulaakutolelela kusuna Yehova akuyumya lushomo lwanu muli nguwe.

18. Ino nciinshi bacanike ncobeelete kusala, alimwi ino nshiinshi sheshi shikasweemo?

¹⁸ Amutanjishe kucita kuyanda kwakwe Yehova mubuumi bwanu. Bantu bamucishi cakwe Satana balashomesha ayi na wasebensesha lushibo lwako kwaamba ayi ufubileemo omwiine, ulaakucana lusangalalo. Ano cancine ncotushi ncakwaamba ayi bantu babikila maano abuumbi kukulangoola shintu shakumubili ‘balalinjisha mubuumba bunene.’ (1 Timo. 6:9, 10) Ano na mwanyumfwila Yehova akusala kutanjisha kuyanda kwakwe mubuumi bwanu, mulaakuswitilila akucana lusangalalo lwancinencine.​—Joshu. 1:8.

19. Ino bashali balyeelete kwiibaluka nshi?

¹⁹ Nobashali, amucite nsheenga mwacikonsha kwaamba ayi mucafwe mukwashi wanu kusebensela Yehova. Amucinke manungo muli nguwe, lyalo alaakumucafwa kusala cabusongo. (Tus. 3:5, 6) Mutaluubi kwaamba ayi bana banu balabikila bunene maano kushintu nshemucita kwiinda kusheesho nshemwaamba. Aboobo amusale shintu sheenga shacafwa bana banu kusangalasha Yehova.

20. Ino nshoolwe nshi bacanike nsheshi bakacane na basala kusebensela Yehova?

²⁰ Nobacanike, bashali banu inga bamucafwa kusala kabotu mubuumi. Sombi mulyeelete kusala kabotu nobeene kwaamba ayi musangalashe Yehova. Aboobo amukonkele cakubonenaako cakwe Yesu akusala kusebensela Ishiwanu wakwiculu shilusuno. Na mukacite boobo, mulaakucana buumi bucite shakucita shiinji, buumi bucite mpindu alimwi busangalasha abuumbi pacecino ciindi. (1 Timo. 4:16) Lyalo kunembo, mulaakucana buumi busangalasha kwiindaawo!