1. Ino ndilili ndyeenga caba ciyumu kusebensela Yehova?

INO ndilili ndyeenga caba ciyumu abuumbi kusebensela Yehova​—sa nciindi ndyemucite mapensho aanji na ndyemutacite mapensho? Ncuubu kucinka manungo muli Yehova ndyetucite mapensho. Ano ino tulacita buyani na shintu shitotweendela kabotu? Sa cimwi ciindi tulalubaako kusebensela Yehova mbokuyandika? Yehova wakacenjesha bene Isilaeli ayi ca mushobo uyu inga cabacitikila.​—Duto. 6:10-12.

2. Ino Mwaami Asa wakacita buyani?

² Mwaami Asa ncakubonenaako cibotu abuumbi ca muntu wakatondesha busongo alimwi akucinka manungo muli Yehova. Wakacikonsha kusebensela Yehova ciindi shintu ndyeshakalinga kabotu alimwi andyeshatakalinga kabotu. Mubuumi bwakwe boonse, “Asa wakasebensela Yehova camoyo woonse.” (1 Baami 15:14.) Nshila yomwi Asa mbwakasebensela Yehova camoyo woonse nkwiinda mukukasha kulambila shibumbwa bumbwa mu Juda. Baibo ilaamba ayi ‘wakakushamo shipaililo shabakunsengwe, kunyonyoola misena yakulambililaako ya patulundu, kupwaya macinko asalalite akutimboola shisamu nshobakalinga beemika.’ (2 Maka. 14:3, 5) Wakakusha abankambiyakwe ba Maaka pacuuna cabo kuŋanda ya kubwalo. Ino nciinshi ncaakacitila boobo? Wakacita boobo mukwiinga bankambiyakwe mbobakalinga kunembo kuyuminisha kupaila shibumbwa bumbwa.​—1 Baami 15:11-13.

3. Ino tutokwiiya nshi mumutwi uyu?

 ³ Asa taakwe kweelabo pa kunyonyoola shibumbwa bumbwa. Wakayuminisha kulambila kusalalite akucafwa ba Juda kutalika kulambila Yehova alimwi. Yehova wakapa shoolwe Asa alimwi aba Juda boonse kwiinda mukubapa luumuno. * Kwamyaaka 10 Asa njaakakala pa Bwaami, “cishi cakalinga muluumuno.” (2 Maka. 14:1, 4, 6) Mumutwi uyu, tutokwiiya Asa nshaakacita ciindi ndyebakalinga muluumuno. Lyalo tutobandika ashakacita Beneklistu bamuciindi ca batumwi, abo bakasebensa kabotu muciindi ca luumuno bweenka mbuli Asa. Lyalo mukweelaako tutocana cikumbulo kumwiipusho uyu: Ino inga mwacita buyani na mulekala mucishi mfulumeende moisuminisha Bakamboni Bakwe Yehova kupaila cakwaanguluka?

4. Kweelana a 2 Makani 14:2, 6, 7, ino Asa wakacita buyani ciindi ndyekwakalinga luumuno?

⁴ Amubelenge 2 Makani 14:2, 6, 7. Asa wakalwiita bantu ayi Yehova ‘ngowakabapa kwaamba ayi babe aluumuno.’ Taakwe kuyeeya ayi ciindi ca luumuno cakalinga ciindi ca kukalabo akuliiba. Sombi wakatalika kuyaka ndabala, lubumbu, njashi, alimwi akupanga minjililo. Wakalwiita ba Juda ayi: “Cishi cicili ceesu.” Ino wakalinga kusansulula nshi? Wakasansulula ayi bantu bakalinga kucite lwaanguluko lwa kweenda akuyaka mucishi Lesa ncakabapa kwakubula kupikishikwa abalwani. Wakabayuminisha kusebensa kabotu ciindi ndyekwakalinga luumuno.

5. Ino nceebonshi Asa ncaakayuminishila likoto lya bashilumamba bakwe?

⁵ Alimwi Asa wakasebensesha ciindi ca luumuno kuyumya likoto lya bashilumamba bakwe. (2 Maka. 14:8) Sa ici cilaamba ayi  taakalinga kucite lushomo muli Yehova? Sobwe. Wakalinga kucishi kwaamba ayi mbuli mwaami, ngowakalinga kucite mukuli wakucafwa bantu kulibambila mapensho ngeenga bacana kunembo. Asa wakalinga kucishi ayi luumuno ndobakalinga kucite paciindi cilya teshi lukatolelele kwa muyayaya, alimwi ishi sheenka nsheshakesa mukucitika.

6. Ino Beneklistu bamuciindi ca batumwi bakacita buyani ndyebakalinga muluumuno?

⁶ Nabi kwaamba ayi Beneklistu bamuciindi ca batumwi bakalinga kupenshekwa liinji, kwakalinga shiindi ndyebakalinga kuba muluumuno. Ino bakacita buyani muciindi ca luumuno? Basankwa abanakashi bashomeka aba bakasebensa cankusu mukushimikila makani abotu alimwi akubikila maano kukusebensela Yehova. Aboobo bakafulilaako abuumbi. Ici cilatondesha ayi Yehova wakabapa shoolwe ceebo cakusebensa cankusu paciindi ndyekwakalinga luumuno.​—Milimo 9:26-31.

7-8. Ino Paulo abamwi bakacita buyani ndyebakalinga kucite coolwe? Amusansulule.

⁷ Bashikwiiya bakwe Yesu bakutaanguna bakalinga kushimikila lyoonse na bacana coolwe cakucita boobo. Kucakubonenaako, mutumwi Paulo ndyaakabona coolwe cinene cakushimikila mu Efeso, wakekala mundabala ilya kwaamba ayi ashimikile makani abotu akucafwa bantu kuba bashikwiiya.​—1 Koli. 16:8, 9.

⁸ Paulo a Beneklistu bamwi bakalinga kucite coolwe acimwi cakushimikila makani abotu mu 49 C.E. makani akupalulwa ndyaakabandikwa abamanene alimwi abatumwi ku Jelusalemu. (Milimo 15:23-29) Pesule lyakulwita mabungano oonse, bashikwiiya bakasebensa cankusu ‘kwiisha akushimikila makani abotu akwe Yehova.’ (Milimo 15:30-35) Ino nshiinshi shakaswaamo? Baibo ilaamba ayi “lyalo bantu ba mushoonde bakayuma mulushomo alimwi bakalinga kufulilaako bushiku abushiku.”​—Milimo 16:4, 5.

9. Ino bukaalo buli buyani mushishi shiinji munshiku shino, alimwi ino ngumwiipusho nshi ngotweelete kuliipusha?

⁹ Munshiku shino, mushishi shiinji tulicite lwaanguluko lwakushimikila. Sa amwebo nkomukala kuli lwaanguluko lwakupaila? Na kuli lwaanguluko, amuliipushe ayi, ‘Ino lwaanguluko ulu ntoolusebensesha buyani?’ Inshiku shino shakweelaako shilasangalasha abuumbi kubantu bakwe Yehova, mukwiinga shatupa coolwe cakuba ashakucita shiinji muncito inene abuumbi yakushimikila akwiisha itana kucitwawo kale pacishi capanshi. (Maako 13:10) Kuli shiinji nsheenga twaciita muncito iyi.

10. Ino lilembo lya 2 Timoti 4:2 lilatuyuminisha kucita nshi?

¹⁰ Ino inga mwacita buyani paciindi ndyekuli luumuno? (Amubelenge 2 Timoti 4:2.) Mpashi inga mwalanga langa pabukaalo bwanu, akubona na mwebo nabi umwi mumukwashi, inga watalika kucita shiinji muncito yakushimikila mbuli kusebensako bupainiya. Cino teshi ciindi cakuba abubile buunji alimwi ashintu shakumubili, mukwiinga shintu isho teshi tukapuluke asho mumapensho anene.​—Tus. 11:4; Mate. 6:31-33; 1 Joni 2:15-17.

11. Ino bamwi bacita buyani kwaamba ayi bacikoonshe kushimikila makani abotu kubantu baanji?

¹¹ Beshikushimikila baanji beeyako mushobo umwi kwaamba ayi bacikoonshe kucafwa bamwi kwiiya pali Yehova. Libunga lyakwe Yehova lilabacafwa kwiinda mukubamba mabuku aamba shamu Baibo mumishobo iinji. Kucakubonenaako, mumwaaka wa 2010, mabuku esu akalinga kucanika mumishobo mpashi 500, ano pacecino ciindi atoocanika mumishobo iindilila 1,000!

12. Ino bantu balalinyumfwa buyani kwiiya cancine mumushobo winemishaabo? Amwaambe cakubonenaako.

 ¹² Ino bantu balalinyumfwa buyani kwiiya cancine mumushobo winemishaabo? Amuyeeye nankashi wakafubilaamo abuumbi ndyaakacanika kukubungana kunene kwakalinga mundabala ya Memphis icanika kumusena wiitwa ayi Tennessee, ku America. Kubungana kwakalinga mumushobo waci Kinyarwanda, mushobo waambwa bunene mucishi ca Rwanda, Congo (Kinshasa), alimwi aku Uganda. Pesule lyakubungana, nankashi uyu wakaamba ayi: “Pamyaaka 17 njendakala kuno ku America, sunu nkokwiiya kunyumfwishisha nshondeeya pakubungana kunene.” Ncakutatoonsha kwaamba ayi nshakeeya mumushobo winemishaabo shakamushika pamoyo. Na bukaalo bwanu inga bwasuminisha, sa inga mweeyaako mushobo umwi kwaamba ayi mucafweko bamwi kumusena nkomushimikila? Sa inga tamukondwi kwiiyako mushobo umwi, ceebo cakwaamba ayi bamwi bacanika kumusena nkomushimikila inga basuna kwiiya cancine mucinemishaabo? Mulaakucana lusangalalo ceebo cakusebensa cankusu kwanu.

13. Ino bamakwesu ku Russia bakacita buyani ndyebakalinga kucite lwaanguluko lwakulambila?

¹³ Mumisena imwi bamakwesu abenankashi tabacitewo lwaanguluko lwakushimikila ceebo cakukashikwa ku mfulumeende. Kucakubonenaako, amuyeeye bamakwesu ku Russia. Bakapenshekwa kwa myaaka iinji, ano mu March 1991, mfulumeende yakasuminisha kupaila kwesu. Paciindi cilya, ku Russia kwakalingabo Bakamboni bashika kuma 16,000. Ndipakeenda myaaka 20, namba yakaya panembo kwiindilila 160,000! Ncakutatoonsha kwaamba ayi bamakwesu bakasebensa kabotu ciindi ndyebakalinga kucite lwaanguluko lwakushimikila. Ciindi caluumuno cilya tacikwe kutolelela. Nacibi boobo, kwaaluka kwashintu takuna kupa kwaamba ayi bamakwesu bacileeke kusebensa cankusu mukutola panembo  kulambila kusalalite. Batolelela kusebensela Yehova kwiinda mukucita shili shoonse nsheenga bacikonsha.

14-15. Ino Yehova wakasebensesha buyani nkusu shakwe kucafwa Asa?

¹⁴ Muciindi cakwe Asa, ciindi caluumuno tacikwe kutolelela. Likoto lyabashilumamba bacite nkusu bakalinga kwiindilila 1 miliyoni bakesa kuswa ku Isopya. Sela munene wabashilumamba aba wakalinga kushomete kwaamba ayi batoocikonsha kukoma bene Juda. Nacibi boobo, muciindi cakushoma mulikoto lyabashilumamba, Mwaami Asa wakacinka manungo muli Yehova. Aboobo wakapaila ayi: “Amutucaafwe swebo bulya noBaami baLesa, baLesa besu mukwiinga twacinka manungo muli ndimwe alimwi twesa mukulwana bashilumamba baanji beshinkusu muliina lyanu.”​—2 Maka. 14:11.

¹⁵ Nabi kwaamba ayi bashilumamba bakaswa ku Isopya bakalinga baanji abuumbi cakwaamba ayi namba ya bashilumamba ba bene Isilaeli yakalinga kunjilamo mpashi mankanda obilo, Asa wakalinga kucishi ayi Yehova alicite nkusu alimwi atoobacafwa. Alimwi ncakwiila Yehova wakabacafwa. Bakacikonsha kukoma bashilumamba bakaswa ku Isopya.​—2 Maka. 14:8-13.

16. Ino tulishi buyani ayi ciindi caluumuno teshi cikatolelele?

¹⁶ Nabi kwaamba ayi tatucishiwo sheshi shikatucitikile womwi awomwi, ncotushi ncakwaamba ayi luumuno ndotucite pacecino ciindi mbuli bantu bakwe Lesa teshi lukatolelele. Mutaluubi kwaamba ayi Yesu wakaambila limwi ayi munshiku shakweelaako, bashikwiiya bakwe ‘balaakupatwa kubantu bamu shishi shoonse.’ (Mate. 24:9) Mutumwi Paulo alakwe wakaamba ayi ‘uyo woonse usuni kukala buumi bwakusebensela Lesa cakulyaaba muli Klistu Yesu ulaakupenshekwa.’ (2 Timo. 3:12) Satana alicite “bukali butaambiki,” aboobo tatweelete kunoolibeca ayi inga twacikonsha kuleya bukali bwakwe.​—Ciyu. 12:12.

17. Ino lushomo lwesu inga lweeleshekwa buyani?

¹⁷ Soonse conoono tulaakwiinda mumapensho eshi akeeleshe lushomo lwesu. Pacishi coonse kulaakuba “mapensho anene atakwe kubonekawo kale kuswabo kumatalikilo acishi kushika sunu.” (Mate. 24:21, NWT) Paciindi ico, mpashi bamumukwashi wesu balaakutubukila,  alimwi mpashi incito yesu ilaakukashikwa. (Mate. 10:35, 36) Ano sa tulaakushoma mulucafwo alushitilisho lwakwe Yehova bweenka mbuli Asa?

18. Kweelana a Bene Ebulu 10:38, 39, ino nshiinshi sheenga shatucafwa kulibambila sheshi shikacitike na ciindi caluumuno cikamaane?

¹⁸ Yehova atotucafwa lwakumushimu kulibambila shitoosa kunembo. Atoocafwa “musebenshi ushomeka alimwi ucite maano” kutubambila ‘shakulya shakumushimu paciindi ceelete’ kwaamba ayi tucikoonshe kutolelela kuba bayumu. (Mate. 24:45) Nacibi boobo, tulyeelete kusebensa cankusu kwaamba ayi tube alushomo luyumu muli Yehova.​—Amubelenge Bene Ebulu 10:38, 39.

19-20. Kweelana a 1 Makani 28:9, ino njimiipusho nshi njotweelete kuliipusha alimwi ino nceebonshi?

¹⁹ Bweenka mbuli Mwaami Asa, tulyeelete “kulangoola Yehova.” (2 Maka. 14:4; 15:1, 2, NWT) Twakatalika kulangoola Yehova ciindi ndyetwakatalika kwiiya pali nguwe akubombekwa. Tulacita shili shoonse nsheenga twacikonsha kwaamba ayi tuyumye lusuno lwesu pali Yehova. Aboobo inga twaliipusha ayi, ‘Sa ndacanika kumabungano lyoonse?’ Mabungano alatucafwa kuba ankusu shakutolelela kusebensela Yehova akuyuminishikwa kuswa kubamakwesu abenankashi. (Mate. 11:28) Alimwi inga twaliipusha ayi, ‘Sa lyoonse ndacita ciiyo ca Baibo capalwaangu?’ Na mulekala amukwashi, sa mulaba akulambila kwa mukwashi nsondo ansondo? Na mulekala nweenka, sa mulacana ciindi cakucita kulambila mbuli bucita mukwashi? Alimwi sa mulaabanamo lubasu muncito yakushimikila akwiisha kushika peela nkusu shanu?

²⁰ Ino nceebonshi tulyeelete kuliipusha miipusho iyi? Baibo ilaamba ayi Yehova alalanga langa miyeeyo yesu alimwi akubona shili mu myoyo yesu, aboobo aswebo tulyeelete kucita boobo. (Amubelenge 1 Makani 28:9.) Na twacana kwaamba ayi kuli nshotweelete kwaalula pamakani anshetusuni kucita kunembo, mbotubona shintu, na mbotuyeeya, tulyeelete kupaila kuli Yehova kwaamba ayi atucaafwe kucita boobo. Cino nceciindi cakulibambila meelesho atoosa kunembo. Mutasuminishi cili coonse kumupa kwaamba ayi mwaalilwe kusebensa kabotu ciindi ndyekucili luumuno!