1-2. Ino Shikushimikila 11:6 ilicatene buyani akushimikila makani abotu a Bwaami?

MUSHISHI shimwi, bantu baanji balisuni kwiiya shiinji na banyumfwa makani abotu. Ngomakani ngobalinga kulindila! Ano mushishi shimwi, bantu baanji tabasuniiwo kwiiya pali Lesa na Baibo. Ino nkomukala bantu balacita buyani na banyumfwa makani abotu? Muli moonse mweenga cabeta, Yehova alisuni kwaamba ayi tutolelele kushimikila kushikila ndyeshi akatulwiite ayi cakwana.

² Yehova wakabika kale bushiku incito yakushimikila ndyeshi ikamaane. Lyalo “mamanino alaakushika.” (Mate. 24:14, 36) Aboobo ciindi ici kacitana kushika, ino inga twatondesha buyani ayi tulanyumfwila maswi akwaamba ayi ‘utaleki lyaansa lyako kookesha’? *​—Amubelenge Shikushimikila 11:6.

3. Ino tutokwiiya nshi mumutwi uyu?

³ Mumutwi wamana twakabandika shintu shone nsheenga twaciita kwaamba ayi tunokwiisha kabotu makani abotu. (Mate. 4:19) Mumutwi uyu tutokwiiya shintu shotatwe sheenga shatucafwa kuba bashinishite kushimikila, nabi ndyetuli mubukaalo buyumu buyani. Tutokwiiya ncotuyandikila (1) kubikila maano kuncito yakushimikila, (2) kukalika moyo, alimwi (3) akutolelela kuba alushomo luyumu.

4. Ino nceebonshi tulyeelete kubikila maano kuncito Yehova njaakatupa?

⁴ Yesu wakalwiita bashikwiiya bakwe bantu mbweshi bakabe ashintu sheshi shikanoocitika munshiku shakweelaako. Wakalinga  kucishi kwaamba ayi shintu ishi inga shabalengesha kucileka kubikila maano kuncito yakushimikila. Wakalwiita bashikwiiya bakwe ayi “kamulibambitebo lyoonse.” (Mate. 24:42) Muciindi cakwe Nowa, kwakalinga shintu shiinji shakapa kwaamba ayi bantu baalilwe kubikila maano kukucenjesha kwakwe Nowa. Amunshiku shino mbocibete. (Mate. 24:37-39; 2 Pita 2:5) Aboobo nceceeco ncotweelete kubikila maano kuncito Yehova njaakatupa.

5. Ino Milimo 1:6-8 ilasansulula ayi incito yakushimikila ilaakushika kulaale buyani?

⁵ Munshiku shino, tulyeelete kweelesha cankusu kubikila maano abuumbi kuncito yakushimikila makani abotu a Bwaami. Yesu wakaamba ayi bashikwiiya bakwe balaakutolelela kushimikila pesule lyakufwa kwakwe akushimikila mumisena iinji. (Joni 14:12) Yesu ndyaakafwa, bashikwiiya bakwe bamwi bakaboolela kuncito yabo yakucata nswi. Ndyaakabushikwa kuswa kubafu, wakacita caankamiko akucafwa bashikwiiya bakwe bamwi kucata nswi shiinji. Pesule lyakucita caankamiko, Yesu wakayuminisha kuyandika kwa ncito yakushimikila akwiisha bantu kuba bashikwiiya. (Joni 21:15-17) Yesu kaatana kuya kwiculu, wakalwiita bashikwiiya bakwe ayi incito yakushimikila njaakatalika, ilaakuya palaamfu abuumbi kwiindilila manyinsa a cishi ca bene Isilaeli. (Amubelenge Milimo 1:6-8.) Ndipakeenda myaaka, Yesu wakatondesha Joni mucili anga nciloto shakalinga kusa mukucitika mu “bushiku bwa Mwaami.” * Pasheesho Joni nshaakabona, pakalinga cakucitika ciloondesha abuumbi: Wakabona munjelo wakalinga kwaambilisha “makani abotu atamaani” akalinga kushimikilwa “kubantu bacite shikanda shipusenepusene, mikowa yoonse, milaka yoonse alimwi akumishobo yoonse.” (Ciyu. 1:10; 14:6) Ncakutatoonsha kwaamba ayi Yehova ncaasuni munshiku shino ncakwaamba ayi twaabanemo lubasu muncito yakushimikila itoocitwa nsengwe yoonse.

6. Ino nshiinshi sheenga shatucafwa kubikila maano abuumbi kuncito yakushimikila?

 ⁶ Kuyeeya pashintu shoonse Yehova nshaatootucitila inga kwatucafwa kubikila maano abuumbi kuncito yakushimikila. Kucakubonenaako, atotwaabila shakulya shakumushimu shiinji abuumbi mbuli mabuku akapulintwa, apa webusaiti, akukutikabo, mavidyo, alimwi amabulodikasiti apa intaneti. Amuyeeye paceeci: Webusaiti yesu ilicite makani mumishobo ipusenepusene iindilila 1,000! (Mate. 24:45-47) Bantu bamucishi tabacatene ceebo camapolitiki, bupailishi, alimwi aceebo cakwaamba ayi bamwi mbabile bamwi mbakandu. Ano basebenshi bakwe Lesa beendilila 8 miliyoni nsengwe yoonse balicatene. Kucakubonenaako, Pacisanu pa 19 April mu 2019, Bakamboni Bakwe Yehova nsengwe yoonse bakeebela vidyo yomwi ya mubandi wa lilembo lya bushiku. Ico citondesha kwaamba ayi ncakwiila tulicatene. Pabushiku bweenka bulya macolesha, bantu bashika 20,919,041 bakabungana pa Ciibalusho ca lufu lwakwe Yesu. Tulisuni kutolelela kusebensa cankusu muncito yakushimikila sha Bwaami mukwiinga tulishi ayi ncoolwe cinene abuumbi kubona akwaabanamo lubasu mushakucitika shibotu abuumbi mbuli sheeshi.

7. Ino cakubonenaako cakwe Yesu inga catucafwa buyani kutolelela kubikila maano kuncito yakushimikila?

⁷ Cimwi ceenga catucafwa kubikila maano kuncito yakushimikila nkukonkela cakubonenaako cakwe Yesu. Taakwe kusuminisha cintu cili coonse kumupilinganya muncito yakwe yakushimikila. (Joni 18:37) Taakwe kuyungwa Satana ndyaakamulwiita ayi “inga ndakupa malelo oonse aya abubotu bwa ngawo”; na kukonkela bamwi ndyebakalinga kusuni kumubika pa bwaami. (Mate. 4:8, 9; Joni 6:15) Taakwe kuyungwa alunkumbwa lwakuba mubile; na kuloonda ndyaakalinga kupikishikwa abuumbi. (Luka 9:58; Joni 8:59) Kwiibaluka mutumwi Paulo nshakaamba inga kwatucafwa kutolelela kubikila maano kuncito yakushimikila nabi ndyetutokwiinda mumapensho eenga eelesha lushomo lwesu. Wakayuminisha Beneklistu kukonkela cakubonenaako cakwe Yesu kwaamba ayi ‘batalefuki akucileka kushoma’!​—Ebu. 12:3.

8. Ino kukalika moyo cilaamba nshi, alimwi ino nceebonshi ncokuyandikila pacecino ciindi?

⁸ Kukalika moyo cilaamba kulindila cakukalikana kwaamba ayi bukaalo bwaaluke. Inga caba ayi tutoolangila ciindi shibiibi ndyeshi shikamaane na kukumanishikwa kwa shintu shibotu nshetwalangila kwa myaaka iinji, tulayandika kukalika moyo. Mushinshimi Abakuku wakalinga kulangila mamanino ashintu shibiibi shakalinga kucitika mu Juda. (Abaku. 1:2) Bashikwiiya bakwe Yesu bakalinga kulangila ayi Bwaami bwakwe Lesa “butobonekela peenka palya” akubaangulula kuswa kubene Loma bakalinga kubapensha. (Luka 19:11) Tutolangila bushiku Bwaami bwakwe Lesa ndyeshi bukakushe shibiibi shoonse, akuleta cishi cipya ceshi cikasulebo abantu baluleme. (2 Pita 3:13) Nacibi boobo, tulyeelete kulindila cakukalika moyo kushikila ciindi Yehova mwiine ncaakasala cikashiike. Atubandike Yehova mbwatwiisha kukalika moyo.

9. Ino nshakubonenaako shili shitondesha kwaamba ayi Yehova alakalika moyo?

⁹ Yehova alicite cakubonenaako cibotu abuumbi cakukalika moyo. Wakapa Nowa ciindi cikwene kabotu kwaamba ayi acikoonshe kuyaka bwaato “akwaambilisha bululami.” (2 Pita 2:5; 1 Pita 3:20) Yehova wakakutika Abulaamu ndyaakamwiipusha mankanda aanji, ndyaakasala kunyonyoola bantu babiibi bakalinga mundabala ya Sodoma a Gomola. (Mata. 18:20-33) Kwa myaaka iinji, Yehova wakatondesha kukalika moyo abuumbi kubene Isilaeli batakalinga kushomeka. (Neye. 9:30, 31) Apacecino ciindi tulabona Yehova mbwaakalika moyo mukwiinga wakapa bantu boonse basuni kuba beshicibusa bakwe ciindi ‘cakwaana.’ (2 Pita 3:9; Joni 6:44; 1 Timo. 2:3, 4) Mukwiinga Yehova alakalika  moyo, aswebo tulyeelete kukalika moyo ndyetutotolelela kushimikila akwiisha. Alimwi alatwiisha kukalika moyo kwiinda mucikoshanyo ncotucana mu Maswi akwe.

10. Kweelana a Jemusi 5:7, 8, ino nshiinshi nsheenga tweeya kuswa kucabonenaako ca mulimi?

¹⁰ Amubelenge Jemusi 5:7, 8. Cikoshanyo ca mulimi cilatwiisha kuba bantu bakalika moyo. Ncakwiila, shishango shimwi shilafwambaana kukula. Nacibi boobo, shishango shiinji, bunene bunene isho shicata shisepo, shilatola ciindi kukomena akupya. Muciindi ca bene Isilaeli ciindi cakulima cakalinga kutola myeenshi 6. Balimi bakalinga kushanga mbuto shabo kumatalikilo acilimo akutebula kumatalikilo amupewo pesule lya mfula yakweelaako. (Maako 4:28) Inga twatondesha busongo na twakonkela cakubonenaako cakukalika moyo bweenka mbuli mulimi. Nacibi boobo, ici teshi cuubu.

11. Ino kukalika moyo inga kwatucafwa buyani muncito yakushimikila?

¹¹ Liinji bantu batamaninite balisuni kubona sheshi shiswe musheesho nshobacita peenkapo. Ano na tulisuni kwaamba ayi shishango shikule kabotu akucata shisepo, tulyeelete kunooshilama lyoonse. Tulyeelete kushanga, kusakwita akutilila. Anciito yakwiisha bantu kuba bashikwiiya ayalo mboibete. Tulyeelete kusebensa cankusu kwaamba ayi tucafwe bantu kuba bashikwiiya. Cilatola ciindi kwaamba ayi tucafwe shikwiiya Baibo kwiiya kutaba akasalulushi sombi kusuna bantu bamishobo yoonse. Kukalika moyo kulaakutucafwa kutalefuka na twacana mapensho. Tulyeelete kukalika moyo na twacaana bantu basuni kukutika kumakani abotu akwiiya cancine. Inga tatukakatishi shikwiiya Baibo kuba alushomo. Bashikwiiya bakwe Yesu abalo cimwi ciindi tabakalinga kunyumfwishisha shintu shimwi Yesu nshaakalinga kubaiisha. (Joni 14:9) Nabi kwaamba ayi inga twashanga akutilila, tutaluubi kwaamba ayi Lesa ngoolengesha kwaamba ayi shikule.​—1 Koli. 3:6.

12. Ino inga twatondesha buyani kukalika moyo ndyetutooshimikila beshikamukowa bateshi Bakamboni?

¹² Inga caba ciyumu kukalika moyo ndyetutooshimikila beshikamukowa bateshi bakamboni.  Njiisho njetucana palilembo lya Shikushimikila 3:1, 7 inga yatucafwa. Ilaamba ayi: “Kuli ciindi cakukutumana aciindi cakwaamba.” Kutondesha mibo ibotu inga kwapa kwaamba ayi beshikamukowa besu basune kwiiya cancine. Nacibi boobo, tulyeelete kuba balibambite kubashimikila pali Yehova. (1 Pita 3:1, 2) Tulyeelete kusebensa cankusu kushimikila akwiisha bantu, sombi tulyeelete kukalika moyo kubantu boonse kwiilikaawo abeshikamukowa.

13-14. Ino nshakubonenaako shili sha kukalika moyo nsheenga twakonkela?

¹³ Inga tweeya kukalika moyo kuswa kushakubonenaako sha basebenshi bakwe Lesa bashomeka baambwa mu Baibo alimwi abamunshiku shino. Abakuku wakalinga kulangila mamanino ashintu shibiibi, sombi wakatondesha kukalika moyo ndyaakaamba ayi: “Ndaakwiimikana anga ngushikulindilila.” (Abaku. 2:1) Mutumwi Paulo wakaamba ayi wakalinga kusunishishi ‘kumanisha’ ncito yakwe. Nacibi boobo, wakatondesha kukalika moyo akutolelela “kushimikila makani abotu.”​—Milimo 20:24.

¹⁴ Amuyeeye cakubonenaako ca beebene bakamanisha cikolo ca Gilyadi akutumwa kuya mukusebensela kucishi kwakalinga Bakamboni baniinibo alimwi kuli bantu baanji bateshi Beneklistu. Bantu baanji tabakalinga kusuniiwo kwiiya Baibo kumusena uku. Nacibi boobo, babyaabo mbobakalingaabo mucikolo abo bakatumwa kushishi shimwi, bakalinga kubatumina akubalwiita shiiyo shabo sha Baibo mboshitooya panembo alimwi bantu baanji mbobakalinga kusuni kwiiya Baibo. Nabi kwaamba ayi bantu baanji tabakalinga kusuni kukutika, beebene aba bakatolelela kushimikila cakukalika moyo. Pesule lyakushimikila kwa myaaka 8 kumusena bantu nkobatakalinga kusuni kukutika, beebene aba bakasangalala abuumbi shikwiiya Baibo wabo womwi ndyaakabombekwa. Ino nshiinshi basebenshi bakwe Lesa bakale kale alimwi abamunshiku shino nshebakacita? Tabakwe kuboolela mwisule na kuleka lyaansa lyabo kwaamba ayi lyookeshe, alimwi Yehova wakabapa coolwe ceebo cakukalika moyo kwabo. Aboobo ‘amukonkele baabo beshibakacane shakashomeshekwa kwiinda mulushomo akukalika moyo.’​—Ebu. 6:10-12.

15. Ino lushomo lulatucafwa buyani kuba alusuno lwakutolelela kushimikila?

¹⁵ Tulashoma makani abotu ngotushimikila, aboobo tulisunishishi kushimikila bantu baanji. Tulashoma shishomesho shakwe Lesa nshetucana mu Maswi akwe. (Kulu. 119:42; Isa. 40:8) Tutoobona bushinshimi bwamu Baibo mbobutookumanishikwa munshiku shino. Tulabona bantu mbobaalula buumi bwabo pesule lyakutalika kukonkela nshebatokwiiya kuswa mu Baibo. Ishi shilatupa kushoma cakutatoonsha kwaamba ayi makani abotu a Bwaami, ngamakani muntu uli woonse ngaeelete kukutika.

16. Kweelana a Kulumbaisha 46:1-3, ino kushoma muli Yehova alimwi a Yesu kulatucafwa buyani kutolelela kushimikila?

¹⁶ Kwiilikaawo, tulashoma muli Yehova, uyo wakatupa makani ngotushimikila, alimwi amuli Yesu uyo Yehova ngwakabika mbuli Mwaami wa Bwaami bwakwe. (Joni 14:1) Aboobo nabi twiinde mumapensho ali buyani, Yehova alaakutucafwa akutupa nkusu. (Amubelenge Kulumbaisha 46:1-3.) Kwiilikaawo, tulishomete kwaamba ayi incito yakushimikila itootanjililwa a Yesu kuswa kwiculu, kwiinda mukusebensesha nkusu Yehova nshaakamupa.​—Mate. 28:18-20.

17. Amwaambe cakacitika citondesha kwaamba ayi tulyeelete kutolelela kushimikila.

¹⁷ Lushomo lulatucafwa kutatoonsha kwaamba ayi Yehova alaakutupa shoolwe na katusebensa cankusu. Alimwi cimwi ciindi inga wacita boobo munshila njetutana kuyeeyelawo. (Shiku. 11:6) Kucakubonenaako, bushiku buli boonse bantu baanji balabona tukoci alimwi amatebulu mpotubika mabuku ndyetutooshimikila. Sa iyi ni nshila ibotu yakushimikila? Cakutatoonsha!  Incito Yesu ya Bwaami yamu November 2014 yakaambawo sha wacanike wakalinga pacikolo ca yunivesiti uyo wakalinga kusuni kulemba makani pali Bakamboni Bakwe Yehova. Taakwe kucikonsha kucana Ŋanda ya Bwaami, sombi wakacana Bakamboni bakalinga kushimikila akakoci kamabuku pacikolo peenka palya, alimwi wakacana amakani ngaakalinga kusuni kulemba. Mukuya kwaciindi, wakabombekwa mbuli Kamboni alimwi pacecino ciindi ngu painiya waciindi coonse. Shakacitika mbuli sheshi shilatupa kutolelela kushimikila mukwiinga shilatucafwa kushiba kwaamba ayi kuli bantu batolangoola makani a Bwaami.

18. Ino nciinshi ceenga catupa kushoma kwaamba ayi incito yakushimikila ilaakumana paciindi ceelete?

¹⁸ Inga twashoma cakutatoonsha kwaamba ayi incito yakushimikila ilaakumana paciindi ceelete. Amuyeeye shakacitika munshiku shakwe Nowa. Yehova wakatondesha kwaamba ayi ngu Lesa ulama ciindi. Myaaka 120 Muyoba unene kootana kucitika, Yehova wakasala bushiku ndyeshi ukatalike. Ndipakeenda myaaka iinji, Yehova wakalwiita Nowa ayi ayake bwaato. Mpashi kwa myaaka 40 na 50 Muyoba kootana kutalika, Nowa wakatolelela kusebensa cankusu. Nabi kwaamba ayi bantu tabakwe kumunyumfwila, wakatolelela kushimikila makani akubacenjesha, kushikila ciindi Yehova ndyaakamulwiita kunjisha shinyama mu bwaato. Lyalo paciindi ceelete, “Yehova wakacala cisasa.”​—Mata. 6:3; 7:1, 2, 16.

19. Ino nshiinshi nsheenga twalangila na twatolelela kutaleka lyaansa lyesu kookesha?

¹⁹ Conoonobo Yehova alaakutulwiita ayi incito yakushimikila sha Bwaami yamana ano. Lyalo ndyeshi akanyonyoole bweende bwashintu bwakwe Satana, akuleta cishi cipya ceshi cikasulebo bantu bamunyumfwila. Kushikila ciindi ico, atukonkele cakubonenaako cakwe Nowa, Abakuku, alimwi abamwi batakwe kuleka lyaansa lyabo kookesha. Atubikile maano kuncito yakushimikila, kukalika moyo, alimwi akutolelela kuyumya lushomo lwesu muli Yehova amushishomesho shakwe.