1. Ino mbukaalo nshi buyumu Defedi mbwakalingaamo?

 PACIINDI cimwi Defedi wakacica kwaamba ayi atacaikwi. Saulo mwaami wabene Isilaeli uyo wakalinga kucite nkusu, wakalinga kushinishite kumucaya. Defedi ndyaakalinga kuyandika shakulya, wakeemikanaako pandabala ya Nobu, apo mpaakasenga shinkwa ulibo 5. (1 Samwe. 21:1, 3) Paciindi cimwi, Defedi abasankwa mbaakalingaabo bakayuba mucimfwengo. (1 Samwe. 22:1) Ino nciinshi cakapa kwaamba ayi Defedi abe mubukaalo ubu?

2. Ino nshintu nshi shibiibi abuumbi Saulo nshaakacita? (1 Samwelo 23:16, 17)

² Saulo wakalinga kumunyumfwila munyono abuumbi Defedi ceebo cakwaamba ayi bantu baanji bakalinga kumusuni alimwi wakakoma munkondo shiinji. Alimwi Saulo wakalinga kucishi kwaamba ayi Yehova wakamukaka kuba mwaami wabene Isilaeli ceebo cakwaamba ayi taakwe kumunyumfwila alimwi Yehova wakasala Defedi kwaamba ayi abe mwaami. (Amubelenge 1 Samwelo 23:16, 17.) Nacibi boobo, mukwiinga Saulo wakalinga mwaami wabene Isilaeli, wakalinga kucite bashilumamba baanji alimwi abantu baanji bakalinga kulubasu lwakwe. Aboobo Defedi wakalinga kweelete kucica kwaamba ayi atacaikwi. Ano sa Saulo wakalinga kuyeeya ayi inga wapa kwaamba ayi Lesa aalilwe kubika Defedi pa bwaami? (Isa. 55:11) Baibo tayaambiwo, sombi inga twashoma cakutatoonsha kwaamba ayi: Saulo wakalinga kusuni kucita cintu cibiibi abuumbi. Abo bapikisha Lesa tabaswitililiiwo!

3. Ino Defedi wakalinga kulinyumfwa buyani nabi ndyaakalinga mubukaalo buyumu?

³ Defedi wakalinga muntu uliceesha. Taakwe kulisala kwaamba ayi abe mwaami wabene Isilaeli. Sombi Yehova ngwaakamusala  kwaamba ayi abe mwaami. (1 Samwe. 16:1, 12, 13) Saulo wakamupata abuumbi Defedi. Sombi Defedi taakwe kupa mulandu Yehova ceebo cabukaalo mbwakalingaamo; alimwi taakwe kutongooka ceebo cakubula shakulya shikwene na ceebo cakunokoona mucimfwengo. Sombi cilyeelete kwaamba ayi paciindi ndyaakalinga kukala mucimfwengo ico, nceciindi ndyaakalemba lwiimbo lubotu abuumbi lwakulumbaisha Lesa umo muli maswi ali palilembo paswa mutwi uno, aamba ayi: ‘Abo bayandoola Yehova, taaku cintu cibotu nceshi bakabule.’—Kulu. 34:10.

4. Ino njimiipusho nshi njeshi tubandike, alimwi ino nceebonshi ilayandika?

⁴ Basebenshi bakwe Yehova baanji tababiiwo ashakulya shikwene, na shintu shiyandika mubuumi. * Ishi shacitikila basebenshi bakwe Yehova baanji, bunene bunene paciindi cabulwashi bwa COVID-19. Alimwi “mapensho anene” ndyaatosena pafwiifwi, inga twalangila kwiinda mumapensho ayumu abuumbi. (Mate. 24:21) Paceebo ca sheeshi nshetwabandikaawo, amuleke tucane shikumbulo kumiipusho yone: Ino munshila nshi Defedi mwaatakwe ‘kubulisha cintu cibotu’? Ino nceebonshi tulyeelete kwiiya kukwana ashintu nshetucite? Ino nceebonshi nceenga twashomena cakutatoonsha kwaamba ayi Yehova alaakunotulama? Alimwi ino nshiinshi nsheenga twaciita kwaamba ayi tulibambile mapensho ngeshi tukeendeemo kunembo?

5-6. Ino lilembo lya Kulumbaisha 23:1-6 lilatucafwa buyani kunyumfwishisha Defedi ncaakalinga kusansulula ndyaakaamba ayi basebenshi bakwe Lesa ‘taaku cintu cibotu nceshi bakabule’?

⁵ Ino Defedi wakalinga kusansulula nshi ndyaakaamba ayi basebenshi bakwe Yehova ‘taaku cintu cibotu nceshi bakabule’? Inga twanyumfwishisha ncaakalinga kusansulula na twabona maswi akoshenyeeko a aaya, ngaakasebensesha mu Kulumbaisha 23. (Amubelenge Kulumbaisha 23:1-6.) Defedi wakatalika lilembo ili amaswi akwaamba ayi: ‘Yehova ngomweembeshi wangu. Taaku nceshi nkabule.’ Mulilembo lyoonse lya Kulumbaisha 23, Defedi wakaamba pashintu shiyandika abuumbi mbuli—shintu shibotu Yehova  nshaakamucitila ceebo cakwaamba ayi wakasumina Yehova kuba mweembeshi wakwe. Yehova wakalinga kumutanjilila “munshila iluleme,” alimwi wakatolelela kucafwa Defedi shintu ndyeshakalinga kabotu alimwi andyeshatakalinga kabotu. Defedi wakalinga kucishi kwaamba ayi alaakunokwiinda mumapensho nabi kwaamba ayi alaakunooba “mumafulo acite mweemfu” akwe Yehova. Paciindi cimwi wakalinga kulefuka cakwaamba ayi wakalinga kulinyumfwabo anga atokwiinda “mumunshinshe ushiya mbi,” alimwi wakalinga kucite abalwani. Sombi mukwiinga Yehova ngowakalinga Mweembeshi wakwe, Defedi “taakwe kuloondaawo cili coonse.”

⁶ Ici ncecikumbulo kumwiipusho wakwaamba ayi: Ino munshila nshi Defedi mwaatakwe ‘kubulisha cintu cibotu’? Wakalinga kucite shintu shoonse nshaakalinga kuyandika kwaamba ayi atolelele kuba abushicibusa buyumu a Yehova. Taakalinga kuyandika kuba ashintu shiinji lwakumubili kwaamba ayi anooba alusangalalo. Defedi wakalinga kukwene ashintu Yehova nshaakalinga kumupa. Shintu shakalinga kuyandika abuumbi kuli nguwe nshoolwe kuswa kuli Yehova alimwi akushitilishikwa anguwe.

7. Kweelana a Luka 21:20-24, ino ngamapensho nshi Beneklistu bakalinga kukala mu Judeya ngobakeendaamo?

⁷ Maswi Defedi ngakaamba alatucafwa kubona ayi cilayandika abuumbi kunoobona shintu shakumubili munshila yeelete. Inga twasangalala ashintu shili shoonse nshetucite lwakumubili, sombi tatweelete kunoobikila maano abuumbi kushintu isho. Ici ncocancine ciyandika abuumbi Beneklistu bakalinga kukala mu Judeya ncobakesa mukunyumfwishisha. (Amubelenge Luka 21:20-24.) Yesu wakabacenjesha ayi kulaakuba ciindi ndabala ya Jelusalemu ndyeshi “ikashingulukwe abashilumamba.” Ici ndyecakacitika, bakalinga kweelete “kucicila kutulundu.” Kuswa mundabala kwakalinga kusa mukubacafwa kupuluka, sombi bakalinga kweelete kushiya shintu shiinji. Myaaka iinji yainda, Njashi Yamulindilishi imwi yakaamba ayi: “Bakashiya myuunda alimwi amaandaabo, alimwi tabana kubwesawo ashintu mumaandaabo. Bakalinga kushomete cakutatoonsha kwaamba ayi Yehova alaakunoobashitilisha akubacafwa alimwi bakabika kulambila Yehova panembo lya shintu shoonse shakalinga kuboneka kuyandika.”

8. Ino nciiyo nshi ciyandika abuumbi nceenga tweeya kuswa kushakacitikila Beneklistu bakalinga kukala mu Judeya?

⁸ Ino nciiyo nshi ciyandika abuumbi nceenga tweeya kuswa kucakubonenaako ca Beneklistu bakalinga kukala mu Judeya? Njashi Yamulindilishi njetwaambawo yakaamba ayi: “Mpashi kunembo inga tweenda mumeelesho eenga atondesha mbotubona shintu shakumubili; sa tulabikila maano abuumbi kushintu shakumubili, na mpashi tulabona ayi kupuluka kulayandika abuumbi ceebo cakwaamba ayi tulashomeka kuli Lesa? Na mamanino akese tulaakuyandika kuliyumya mumapensho ngeshi tukanokwiindaamo alimwi akulyaaba kushiya shintu shimwi. Sa tulaakuba balibambite kucita shili shoonse shiyandika, bweenka mbuli mbobakacita Beneklistu bakalinga kukala mu Judeya?” *

9. Ino maswi Paulo ngaakalwiita Bene Ebulu alamuyuminisha buyani?

⁹ Sa inga mwayeeyabo mbocakalinga ciyumu ku Beneklistu aba kushiya shintu shoonse nshobakalinga kucite akutalika buumi bupya kumusena kumwi? Bakalinga kuyandika kushoma ayi Yehova alaakunoobapa nshebayandika. Sombi kwakalinga acimwi cakalinga kweelete kubacafwa. Kakucaalite myaaka 5 kwaamba ayi Bene Loma bashinguluke Jelusalemu, mutumwi Paulo wakalwiita Bene Ebulu makani ayandika eenga abacafwa. Wakabalwiita ayi: ‘Mutasunishi bunene maali mubukaalo bwanu, sombi mukwane mushintu sheenka nshemucite. Mukwiinga wakaamba ayi: ‘Teshi nkamushiyeewo nabi kumulekelesha sobwe.’ Aboobo inga twaamba cakushinisha ayi: ‘Yehova ngomucafwi wangu; teshi nkaloondeewo. Ino muntu  inga wancita nshi?’’ (Ebu. 13:5, 6) Ncakutatoonsha kwaamba ayi cakalinga cuubu kubaabo bakakonkela Paulo nshaakabalwiita kukwana ashintu nshebakalinga kucite kumusena nkobakaya mukukala. Bakalinga kushomete ayi Yehova alaakunoobapa nshebayandika. Maswi ngakaamba Paulo alatucafwa kushiba ayi aswebo inga twashoma cakutatoonsha kwaamba ayi Yehova alaakunootupa nshetuyandika.

10. Ino nciiyo nshi Paulo ncaakeeya?

¹⁰ Aya ngomaswi akululika Paulo ngaakalwiita Timoti, alimwi alatukuma andiswe. Wakalemba ayi: ‘Ono na katucite shakufwala ashakulya, tulaakukwana ashintu sheenka ishi.’ (1 Timo. 6:8) Ano sa ici cilasansulula ayi inga tatulyi shakulya shibotu, kuba aŋanda ibotu, na kucileka kuula shakufwala? Ici teshi ncaakalinga kusansulula Paulo. Sombi wakalinga kusansulula ayi tulyeelete kukwana ashintu shili shoonse nshetucite lwakumubili. (Filip. 4:12) Ici nceciiyo Paulo ncaakeeya. Cintu ciyandika abuumbi ncetucite mbushicibusa bwesu a Lesa, kuteshi cintu cili coonse cakumubili ncetucite.—Abaku. 3:17, 18.

11. Ino maswi Mose ngaakalwiita bene Isilaeli alatwiisha nshi pamakani akukwana ashintu nshetucite?

¹¹ Shintu nshetubona ayi nshetuyandika inga shapusana a Yehova nshaabona ayi nshetuyandika. Pesule lyakwaamba ayi bene Isilaeli bekala muluyanga kwamyaaka 40, Mose wakabalwiita ayi: ‘Amwiibaluke Yehova Lesa wanu mbwaamupa coolwe mushintu shoonse nshemwakacita. Wakamulama ndimwakalinga kwiingooka muluyanga ulu lutabwenekete ankolweela. Wakalingaanu myaaka yoonse 40, alimwi taaku ncemwakabulisha.’ (Duto. 2:7) Mumyaaka yoonse  iyi ili 40, Yehova wakalinga kupa bene Isilaeli mana kwaamba ayi banoolya. Shakufwala nshobakaswaasho mu Ijipiti, tashina kukwamokaawo. (Duto. 8:3, 4) Nabi kwaamba ayi bamwi bakalinga kubona anga shintu ishi tashakalinga kukweneewo, Mose wakebalusha bene Isilaeli ayi bakalinga kucite shintu shoonse nshebakalinga kuyandika. Yehova inga wakondwa na tweeya kukwana ashintu nshetucite. Alisuni kwaamba ayi katulumba nabi patuntu tuniini ntwaatupa alimwi akunyumfwishisha kwaamba ayi nshipo kuswa kuli nguwe.

12. Ino nciinshi citondesha kwaamba ayi Defedi wakalinga kushoma muli Yehova, kuteshi munkusu shakwe mwiine?

¹² Defedi wakalinga kucishi kwaamba ayi Yehova alashomeka alimwi alabikila maano abuumbi kubaabo bamusuni. Nabi kwaamba ayi Defedi wakalinga mubukaalo buyumu ndyaakalemba Kulumbaisha 34, wakalinga kucite lushomo luyumu muli Yehova cakwaamba ayi wakalinga kushomete cakutatoonsha kwaamba ayi ‘munjelo wakwe Yehova’ atomushitilisha. (Kulu. 34:7) Mpashi Defedi wakalinga kukoshanisha munjelo wakwe Yehova kuli shilumamba uli muluundu utolangalanga balwani batoosa. Nabi kwaamba ayi Defedi wakalinga shilumamba utaloondi alimwi Yehova wakamushomesha kwaamba ayi alaakuba mwaami, taakwe kucinka manungo mulushibo ndwaakalinga kucite lwakufusa mabwe na lwakusebensesha mupeeni kukoma balwani bakwe. (1 Samwe. 16:13; 24:12) Defedi wakalinga kucinkite manungo muli Lesa alimwi akushoma cakutatoonsha kwaamba ayi munjelo wakwe Yehova ‘alafuna baabo balemeka Yehova.’ Ncakwiila kwaamba ayi munshiku shino tatulangili Yehova kutushitilisha munshila ya caankamiko. Sombi tulishi kwaamba ayi abo bashoma muli Yehova balaakuba abuumi butamaani nabi kwaamba ayi inga bafwa pacecino ciindi.

13. Ino nceebonshi tulaakuboneka anga tatucitewo wakutushitilisha na Gogi akatulwaane, sombi ino nceebonshi teshi tukayandike kuloonda? (Amubone cikope cili pa peeji yakutaanguna.)

¹³ Conoonobo, lushomo lwesu lwakwaamba ayi Yehova alaakutushitilisha, lulaakweeleshekwa. Na Gogi waku Magogi akalwane bantu bakwe Lesa, mpashi tulaakuyeeya ayi batootucaya. Tulaakuyandika kushoma cakutatoonsha kwaamba ayi Yehova alaakutupulusha. Shishi shilaakunobona anga tuli anga ni mbelele shitacite wakushishitilisha. (Ese. 38:10-12) Teshi tukabeewo ashilwanisho, alimwi teshi tukanoocishiiwo kulwana nkondo. Shishi shilaakubona ayi cilaakuba cuubu kutukoma. Tabacishiiwo kwaamba ayi baanjelo bakwe Yehova balilibambite kutushitilisha. Sombi ceebo calushomo tulicishi kwaamba ayi balaakutushitilisha. Sombi shishi teshi shikashibeewo ayi baanjelo batootushitilisha. Bantu aba tabashomi muli Lesa. Balaakukankamana abuumbi likoto lyabashilumamba bali kwiculu, ndyeshi likatulwanineko nkondo!—Ciyu. 19:11, 14, 15.

14. Ino nshiinshi nsheenga twaciita pacecino ciindi kwaamba ayi tulibambile mapensho atoosa kunembo?

¹⁴ Ino nshiinshi nsheenga twaciita pacecino ciindi kwaamba ayi tulibambile mapensho atoosa kunembo? Cakutaanguna, tulyeelete kunoobona shintu shakumubili munshila yeelete alimwi akwiibaluka kwaamba ayi bushiku bumwi tulaakushishiya. Alimwi tulyeelete kukwana ashintu nshetucite akusangalala ceebo cakwaamba ayi tulicite bushicibusa a Yehova. Na twamushiba kabotu Lesa wesu, tulaakushoma cakutatonsha kwaamba ayi alaakutushitilisha na Gogi waku Magogi akatulwaane.

15. Ino nshiinshi shakacitika kuli Defedi ndyaakalinga mwanike isho shakamucafwa kushiba kwaamba ayi Yehova alaakunoomucafwa lyoonse?

¹⁵ Amuyeeye cimwi cakacafwa Defedi alimwi ceenga catucafwa aswebo kulibambila mapensho atoosa kunembo. Defedi wakaamba ayi: ‘Amweeleshe  akubona ayi Yehova ngumubotu. Ulicite coolwe muntu uyuba muli nguwe.’ (Kulu. 34:8) Maswi aya alatondesha cakacafwa Defedi kushiba kwaamba ayi inga washoma ayi Yehova alaakumucafwa. Liinji Defedi wakalinga kucinka manungo muli Yehova alimwi Lesa wakalinga kumucafwa lyoonse. Defedi ndyaakalinga mwanike, wakalwana a ndundwa minkulwa mwine Filisiti waliina lya Golyati. Alimwi wakalwiita shilumamba uyu wakalinga kucite nkusu ayi: ‘Sunu Yehova utookwaaba mumaansaangu.’ (1 Samwe. 17:46) Mukuya kwaciindi Defedi ndyaakaba musebenshi wakwe Saulo, Saulo wakeelesha kumucaya mankanda aanji. Sombi ‘Yehova wakalinga’ a Defedi. (1 Samwe. 18:12) Mukwiinga Defedi wakabonaawo Yehova mbwakamucafwa, wakalinga kushomete cakutatonsha kwaamba ayi alaakumucafwa mumapensho ngaakalinga kwiindaamo.

16. Ino nshiinshi nsheenga twaciita kwaamba ayi ‘tweeleshe’ akubona bubotu bwakwe Yehova?

¹⁶ Na katucinka manungo abuumbi mubutanjilishi bwakwe Yehova pacecino ciindi, tulaakushoma cakutatonsha kwaamba ayi alaakutupulusha kunembo. Tulyeelete kushoma muli Yehova kwaamba ayi tusenge munene wancito kutusuminisha kucanika kukubungana kwalubasu na kukubungana kunene, na kumusenga kwaamba ayi atuceesheleko ciindi ncetusebensa kwaamba ayi tunoocikonsha kucanika kumabungano ansondo ansondo alimwi akuba aciindi cikwene cakwaabanamo lubasu muncito yakushimikila. Ino mbuyani na munene wancito wakaka kucita nshotwamusenga, lyalo watukusha ncito? Sa tulashoma kwaamba ayi Yehova teshi akatushiyewo nabi kutulekelesha alimwi akwaamba ayi lyoonse alaakunootupa nshetuyandika? (Ebu. 13:5) Baanji bali muncito yaciindi coonse inga baamba shakabacitikila shitondesha Yehova mbwakabacafwa ndyebakalinga kuyandika lucafwo abuumbi. Yehova alashomeka.

17. Ino ndilembo nshi lya mwaaka wa 2022, alimwi ino nceebonshi ndyapaciindi ceelete?

¹⁷ Mukwiinga Yehova ali andiswe, tatweelete kuloonda sheshi shikacitike kunembo. Lesa wesu teshi akatulekeleshewo na twatolelela kubika sha Bwaami panembo mubuumi bwesu. Kwaamba ayi batucaafwe kubona kuyandika kwa kulibambilila limwi mapensho atoosa kunembo akutucafwa kushoma ayi Yehova teshi akatulekeleshewo, bamu Likoto Litanjilila bakasala lilembo lya Kulumbaisha 34:10 kwaamba ayi libe lilembo lya mwaaka wa 2022, apo mpotucana maswi aamba ayi: ‘Abo bayandoola Yehova, taaku cintu cibotu nceshi bakabule.’