1-2. (a) Ino ndilili bamwi ndyebayeeya bunene pali shicibusa na shikamukowa wabo wakafwa? (b) Ino nciinshi Yesu ncaakatalika mashiku pabushiku kaatana kufwa?

 NABI kwaamba ayi peenda myaaka iinji kuswa ciindi shicibusa na shikamukowa wesu ndyaakafwa, tulatolelela kumwiibaluka. Bamwi balayeeya bunene pali shicibusa na shikamukowa wabo wakafwa na bushiku ndyaakafwa bwashika.

² Mwaaka amwaaka tulaba pabantu baanji abuumbi nsengwe yoonse, abo babungana pomwi kwaamba ayi beebaluke lufu lwa muntu ngobasuni abuumbi—Yesu Klistu. (1 Pit. 1:8) Tulabungana pomwi kwaamba ayi twiibaluke wakaaba buumi bwakwe mbuli cilubula kwaamba ayi atulubule kuswa kububi alufu. (Mate. 20:28) Alimwi Yesu wakalinga kusuni ayi bashikwiiya bakwe banookwiibaluka lufu lwakwe. Mashiku pabushiku kaatana kufwa, Yesu wakatalika mulalilo wa mwaami akupa mulawo wakwaamba ayi: “Kamucita ceeci mukunjibaluka.”—Luka 22:19.

3. Ino nshiinshi nsheshi twiiye mumutwi uyu?

³ Bantu baniinibo pabantu bacanika Kuciibalusho ca lufu lwakwe Yesu, mbobalangila kwikala kwiculu. Sombi bantu baanji balangila kwikala pacishi capanshi abalo balacanikaako. Mumutwi uyu, tutokwiiya cipa kwaamba ayi makoto oonse obilo banolangila kucanika Kuciibalusho mwaaka amwaaka. Alimwi tutokwiiya ambotufubilaamo na twacanika Kuciibalusho. Ano amuleke tutaangune kubandika pasheebo  shipa kwaamba ayi bananikitwe banocanika Kuciibalusho.

4. Ino nceebonshi bananikitwe balalyako shinkwa akunwako waini Paciibalusho?

⁴ Mwaaka amwaaka, bananikitwe beshikucanika Kuciibalusho balalyako shinkwa akunwako waini. Ino nciinshi cibapa kulyako shinkwa akunwako waini? Kwaamba ayi tucane cikumbulo kumwiipusho uyu, amuyeeye shakacitika mashiku pabushiku bwakweelaako Yesu kaatana kufwa. Pesule lyakusekelela Pasika, Yesu wakatalika Mulalilo wa Mwaami. Wakapa batumwi bakwe bashomeka bali 11 shinkwa alimwi a waini akubalwiita ayi balyeeko akunwaamo. Yesu Klistu wakabandika ambabo pashipangano shobilo—nkokwaamba ayi cipangano cipya alimwi acipangano ca Bwaami. * (Luka 22:19, 20, 28-30) Shipangano ishi shakapa kwaamba ayi batumwi alimwi abantu bamwi baniini babe acoolwe cakuba baami alimwi bapailishi kwiculu. (Ciyu. 5:10; 14:1) Bananikitwe bacaalitewo beenkabo abo bali mushipangano shobilo ishi, mbweenga balyako shinkwa akunwako waini Paciibalusho.

5. Ino nshiinshi bananikitwe nshobeshi pakulangila nkobacite?

⁵ Ceebo acimwi cipa kwaamba ayi bananikitwe banocanika Kuciibalusho ncakwaamba ayi: Ciibalusho cilabapa coolwe cakuyeeya pakulangila nkobacite. Yehova wakabapa kulangila kulibetele abuumbi—nkokwaamba ayi kuba abuumi butafwi alimwi butabooli kwiculu, kweendelesha pomwi a Yesu Klistu alimwi aba 144,000 alimwi ciinditeewo, balaakunomubona Yehova Lesa! (1 Koli. 15:51-53; 1 Joni 3:2) Bananikitwe balicishi ayi bakasalwa kwaamba ayi bakaye bakatambule shoolwe ishi kwiculu. Sombi kwaamba ayi bakasuminishikwe kuya kwiculu, balyeelete kutolelela kushomeka kushikila kulufu. (2 Timo. 4:7, 8) Bananikitwe balasangalala abuumbi na bayeeya pakulangila nkobacite kwakuya mukwikala kwiculu. (Taitasi 2:13) Ino mbuyani ‘bambelele shimwi’? (Joni 10:16) Ino nsheebo nshi shimwi shibapa kunoocanika Kuciibalusho?

6. Ino nshiinshi shipa kwaamba ayi bambelele shimwi banocanika Kuciibalusho?

⁶ Bambelele shimwi balacanikaako Kuciibalusho alimwi tabaliiko shinkwa na kunwako waini, sombi balasangalala kucanikaako. Mu 1938, abo balangila kwikala pacishi capanshi, bakeetwa kwaciindi cakutaanguna kucanika Kuciibalusho. Njashi Yamulindilishi ya March 1, 1938, yakaamba ayi: “Cilaakubabo kabotu bambelele shimwi kucanika kukubungana uku akubona shicitika. . . . Abalo cilyeelete kuba ciindi cakusangalala.” Bweenka mbuli mbobasangalala abo bacanika kubwiinga, bambelele shimwi balasangalala kucanika Kuciibalusho akubona shicitika.

7. Ino nceebonshi bambelele shimwi balalangila kukutika kulikani lya Ciibalusho?

⁷ Bambelele shimwi abalo balayeeya pakulangila nkobacite. Balalangila bunene kukutika kulikani lya Ciibalusho, mukwiinga lilaamba bunene pashintu Yesu Klistu alimwi aba 144,000 mbweshi akanokweendeleshaabo kwiculu, nsheshi bakacitile bantu bashomeka mubuleelo bwa myaaka 1,000. Kwiinda mubutanjilishi bwakwe Yesu Klistu  Mwaami wabo, abo mbweshi akanokweendeleshaabo balaakucafwilisha mukwaalula cishi kuba paladaiso akucafwa bantu banyumfwila kuba bamaninite. Bantu baanji bacanika Kuciibalusho, balasangalala abuumbi kuyeeya pakukumanishikwa kwa bushinshimi bwamu Baibo, mbuli bushinshimi mbotucana palilembo lya Isaya 35:5, 6; 65:21-23; alimwi a Ciyubululo 21:3, 4. Kwiinda mukuyeeya ayi bali pomwi abeshicibusa alimwi abeshikamukowa babo mucishi cipya, balatolelela kulangila buumi bwakunembo akuba bashinishite kutolelela kusebensela Yehova.—Mate. 24:13; Gala. 6:9.

8. Ino nceebonshi cimwi cipa bambelele shimwi kucanika Kuciibalusho?

⁸ Ceebo acimwi cipa kwaamba ayi bambelele shimwi banocanika Kuciibalusho ncakwaamba ayi, balisuni kutondesha lusuno kubananikitwe alimwi akubacafwa. Maswi akwe Lesa akaambila limwi ayi bananikitwe alimwi abaabo batolangila kukala pacishi capanshi, balaakunosebensela pomwi mulucatano. Munshila nshi? Amuleke tubandike pashakubonenaako shimwi shiniini.

9. Ino bushinshimi bulembetwe pa Sekaliya 8:23 bulatondesha buyani bambelele shimwi mbobalinyumfwa pa bananikitwe?

⁹ Amubelenge Sekaliya 8:23. Bushinshimi ubu bulatondesha kabotu bambelele shimwi mbobalinyumfwa pabamakwesu abenankashi bananikitwe. Maswi akwaamba ayi “mu Juda” alimwi aliswi lyakwaamba ayi “andimwe” alaamba palikoto lyomwi—nkokwaamba ayi bananikitwe bacaliteewo. (Loma. 2:28, 29) “Bantu bali likumi kuswa mumishobo yoonse ya mushishi,” baleemikaninaako bambelele shimwi. ‘Balacatisha’ akutolelela kuba pomwi abananikitwe mukulambila kusalalite. Aboobo Paciibalusho macolesha, bambelele shimwi balatondesha mbobacatene abananikitwe kwiinda mukucanika pomwi ambabo Kuciibalusho.

10. Ino nshiinshi Yehova nshaakacita kwaamba ayi akumanishe bushinshimi mbotucana pa Esekelo 37:15-19, 24, 25?

¹⁰ Amubelenge Esekelo 37:15-19, 24, 25. Yehova wakakumanisha bushinshimi ubu kwiinda mukupa kwaamba ayi bananikitwe alimwi abambelele shimwi banoosebensela pomwi mulucatano. Bushinshimi ubu bulaamba patusamu tobilo. Abo balangila kwikala kwiculu bali anga nkasamu ‘kakwe Juda’ (mushobo umo mwakalinga kuswa bamaami ba bene Isilaeli), lyalo abo balangila kwikala pacishi capanshi bali anga nkasamu ‘kakwe Efuleemu.’ * Yehova wakalinga kusa mukucatanya makoto oonse obilo kwaamba ayi babe “kasamu komwi.” Ici cilasansulula ayi balasebensela pomwi mulucatano kwiinda mukutanjililwa a Mwaami wabo womwi, Yesu Klistu. Mwaaka amwaaka, bananikitwe abambelele shimwi balacanika Kuciibalusho, kuteshi mbuli makoto obilo apusene, sombi mbuli “litanga lyomwi” licite ‘mwembeshi womwi.’—Joni 10:16.

11. Ino ‘bambelele’ shimwi baambwa pa Mateyo 25:31-36, 40 balacafwa buyani bamakwabo Klistu?

¹¹ Amubelenge Mateyo 25:31-36, 40. “Mbelele” Yesu nshaakaambawo mulilembo ili, shileemikaninaako baabo balangila kwikala pacishi capanshi—nkokwaamba ayi bambelele shimwi. Balacafwilisha bamakwabo Klistu cakushomeka kwiinda mukubacafwa kukumanisha ncito inene abuumbi—yakushimikila alimwi akucafwa bantu kuba bashikwiiya nsengwe yoonse.—Mate. 24:14; 28:19, 20.

12-13. Ino munshila nshi ashimwi bambelele shimwi mbobacafwa bamakwabo Klistu?

 ¹² Mwaaka amwaaka na kwacaalabo nsondo shiniini kwaamba ayi bushiku bwa Ciibalusho bushike, bambelele shimwi balacafwa bamakwabo Klistu kwiinda mukwaabanamo lubasu peela nkusu shabo muncito yakwiita bantu kucanika Kuciibalusho. (Amubone kabokosi kacite mutwi utokwaamba ayi “ Sa Mwakatalika Kale Kulibambila Ciibalusho?”) Alimwi balashinisha kwaamba ayi shoonse shitoyandika Paciibalusho shabambwa nabi kwaamba ayi taakuwo nabi womwi unanikitwe mulibungano linemishaabo. Bambelele shimwi balasangalala abuumbi kucafwa bamakwabo Klistu munshila mbuli sheeshi. Bambelele shimwi balicishi kwaamba ayi Yesu alabona nshobacitila bamakwabo bananikitwe anga batoocitila nguwe mwiine.—Mate. 25:37-40.

¹³ Ino nsheebo nshi ashimwi shipa kwaamba ayi soonse tunoocanika Kuciibalusho nabi kwaamba ayi tulicite kulangila kupusene?

14. Ino Yehova a Yesu bakatutondesha buyani lusuno lwiinditeewo?

¹⁴ Tulalumba palusuno Yehova a Yesu ndobakatutondesha. Yehova wakatutondesha lusuno munshila shiinji shipusenepusene. Sombi nshila iinditeewo mbwaakatutondesha lusuno, nkwiinda mukututumina Mwanaakwe ngwaasuni abuumbi kwaamba ayi ese apenge akufwita ndiswe. (Joni 3:16) Alimwi tulishi ayi Yesu alakwe wakatondesha ayi alitusuni abuumbi, kwiinda mukulyaaba kwaaba buumi bwakwe ceebo ca ndiswe. (Joni 15:13) Taakuwo nceenga twabooshesha Yehova a Yesu palusuno ndobakatutondesha. Sombi inga twatondesha kulumba kwiinda mushintu nshotucita bushiku abushiku. (Kolo. 3:15) Alimwi tulacanika Kuciibalusho kwaamba ayi twiibaluke lusuno ndobakatutondesha alimwi akutondesha ayi tulibasuni.

15. Ino nceebonshi bananikitwe abambelele shimwi balalumba abuumbi pacipo cacilubula?

¹⁵ Tulalumba abuumbi pacipo ca cilubula. (Mate. 20:28) Bananikitwe balalumba abuumbi pacilubula, mukwiinga cilaakupa kwaamba ayi bakatambule cilambu cabo. Ceebo calushomo lwabo mucilubula cakwe Klistu, Yehova alababona ayi baliluleme alimwi wakabasala kuba bana bakwe. (Loma. 5:1; 8:15-17, 23) Bambelele shimwi abalo balalumba pacilubula. Mukwiinga balicite lushomo mumulambu wakwe Klistu, balicite bushicibusa bubotu a Lesa, inga bamusebensela ncito isalalite alimwi balalangila ‘kupula mumapensho anene.’ (Ciyu. 7:13-15) Nshila yomwi bananikitwe abambelele shimwi mbobatondesha kulumba pacilubula, nkwiinda mukucanika Kuciibalusho mwaaka amwaaka.

16. Ino nceebonshi cimwi citupa kucanika Kuciibalusho?

¹⁶ Ceebo cimwi citupa kucanika Kuciibalusho, nkusuna kunyumfwila Yesu. Tacicite mulandu akulangila nkotucite, soonse tulisuni kukonkela mulawo Yesu ngwaakapa mashiku pabushiku ndyaakatalika Ciibalusho wakwaamba ayi: “Kamucita ceeci mukunjibaluka.”—1 Koli. 11:23, 24.

17. Ino Ciibalusho cilatucafwa buyani kuyumya bushicibusa bwesu a Yehova?

¹⁷ Tulaba abushicibusa buyumu a Yehova. (Jemu. 4:8) Kweelana ambotweeya, kucanika Kuciibalusho kulatupa coolwe cakuyeeya pakulangila Yehova nkwakatupa alimwi akukutumana kuyeeya palusuno lwiinditeewo ndwaakatutondesha. (Jele. 29:11; 1 Joni 4:8-10) Na twayeeya pakulangila nkotucite alimwi  alusuno lutamaani Lesa ndwaatutondesha, tulamusuna abuumbi alimwi tulayumya bushicibusa bwesu anguwe.—Loma. 8:38, 39.

18. Ino kukutumana kuyeeya pacakubonenaako cakwe Yesu kulatuyuminisha kucita nshi?

¹⁸ Tulayuminishikwa kukonkela cakubonenaako cakwe Yesu. (1 Pit. 2:21) Na kwacaala nshiku shiniini kwaamba ayi bushiku bwa Ciibalusho bushike, tulabikila maano kubelenga makani amu Baibo aamba shakacitika munsondo yakweelaako Yesu kaatana kufwa, aamba palufu lwakwe alimwi apakubushikwa kwakwe. Lyalo Paciibalusho macolesha, likani lya Ciibalusho lilatucafwa kwiibaluka lusuno Yesu ndwaakatutondesha. (Efe. 5:2; 1 Joni 3:16) Na twabelenga pacakubonenaako cakwe Yesu cakulyaaba alimwi akukutumana kuyeeyawo, tulayuminishikwa “kwikala bweenka bwakekala Yesu Klistu.”—1 Joni 2:6.

19. Ino nshiinshi sheenga shatucafwa kutolelela kuba beshicibusa bakwe Lesa?

¹⁹ Tulaba bashinishite kutolelela kuba beshicibusa bakwe Lesa. (Judi 20, 21) Tulatolelela kuba beshicibusa bakwe Lesa kwiinda mukucita shoonse nsheenga twacikonsha kwaamba ayi tunomunyumfwila, kusalasha liina lyakwe alimwi akumusangalasha. (Tus. 27:11; Mate. 6:9; 1 Joni 5:3) Kucanika Kuciibalusho kulatucafwa kucita shintu shisangalasha Yehova bushiku abushiku ico ceenga caba anga tutomulwiita ayi, ‘Ndisuni kutolelela kuba shicibusa wanu!’

20. Ino nsheebo nshi shibotu sheelete kutupa kucanika Kuciibalusho?

²⁰ Inga caba ayi tutolangila kwikala kwamuyayaya kwiculu na pacishi capanshi, tulicite sheebo shibotu sheelete kutupa kucanika Kuciibalusho. Mwaaka amwaaka na twabungana pabushiku ubu, tuleebaluka lufu lwa muntu ngotusuni, Yesu Klistu. Alimwi ciinditeewo, tuleebaluka lusuno lwiinditeewo Yehova ndwaakatutondesha kwiinda mukututumina Mwanaakwe kwaamba ayi ese aabe buumi bwakwe mbuli cilubula. Ciibalusho ca mwaaka uno cilaakubako macolesha Pacisanu, pa 15 April, 2022. Tulimusuni Yehova alimwi a Mwanaakwe. Aboobo pabushiku ndyeshi tukanokwiibaluka lufu lwakwe Yesu, taakuwo cintu ceenga cayandika kuli ndiswe kwiinda kucanika Kuciibalusho.