Ino nceebonshi Yesu ndyaakalinga pafwiifwi akufwa wakaamba maswi akaamba Defedi ngotucana pa Kulumbaisha 22:1?

Maswi amwi Yesu ngakaamba ndyaakalinga pafwiifwi akufwa ngaayo ngotucana pa Mateyo 27:46: “NobaLesa bangu, nobaLesa bangu, ino nciinshi ncemwandekeleshesha?” Kwiinda mukwaamba maswi aya, Yesu wakakumanisha bushinshimi bulembetwe palilembo ka Kulumbaisha 22:1. (Maako 15:34) Inga tatwaambi ayi Yesu wakaamba maswi aya ceebo cakwaamba ayi wakabona anga Yehova wamulekelesha na mpashi ayi lushomo lwakwe lwakaceya. Yesu wakalinga kucishi kabotu ncaakalinga kuyandikila kufwa, alimwi wakalinga kulibambite kufwa. (Mate. 16:21; 20:28) Alimwi wakalinga kucishi kwaamba ayi paciindi cakufwa Yehova teshi akamushitilishe. (Jobo 1:10) Aboobo Yehova taakwe kushitilisha Yesu paciindi ici mukwiinga wakalinga kusuni ayi Yesu atondesha patuba kwaamba ayi inga watolelela kushomeka nabi eende mumapensho ali buyani kushikila akulufu.​—Maako 14:35, 36.

Ano ino nceebonshi Yesu ncaakaambila maswi akaamba shikulumbaisha? Nabi kwaamba ayi tatucishiwo kabotu cakalengesha ayi aambe maswi aya, tutokwaamba pasheebo shimwi mpashi shakapa kwaamba ayi aambe maswi aya. *

Mpashi Yesu wakaamba maswi aya, kwaamba ayi ayuminishe cancine cakwaamba ayi Yehova teshi amushitilishe. Yesu wakalinga kuyandika kwaaba buumi bwakwe mbuli cilubula kwakubula Yehova kumucafwa. Wakalingabo mbuli muntu uli woonse alimwi wakalinga kweelete kufwa kwaamba ayi “afwite bantu boonse.”​—Ebu. 2:9.

 Mpashi Yesu wakaamba maswi amwi kuswa palilembo ka kulumbaisha kwaamba ayi bantu babikile maano ku maswi oonse ngotucana palilembo ili. Paciindi cika ba Juda baanji bakalinga kusuni kwiibaluka malembo aanji mulibuku ka kulumbaisha kumutwibo. Aboobo na banyumfwabo maswi ali muvesi yomwi, bakalinga kwiibaluka makani oonse ali palilembo ilyo. Na ici ncecakapa kwaamba ayi Yesu aambe maswi aya, nkokwaamba ayi akacafwa bashikwiiya bakwe ba Juda kwiibaluka makani abushinshimi aanji acanika palilembo ili ka kulumbaisha aamba sha lufu lwakwe. (Kulu. 22:7, 8, 15, 16, 18, 24) Alimwi mavesi akweelaako alilembo ili, alalumbaisha Yehova akutondesha ayi ngu Mwaami wabantu boonse pacishi capanshi.​—Kulu. 22:27-31.

Mpashi Yesu wakaamba maswi akaamba Defedi ceebo cakwaamba ayi wakalinga kusuni kwaamba ayi bantu bashibe ayi taakalinga kucite mulandu. Yesu kaatana kucaikwa, kwakubula kukonkela mulawo kooti ya Sanihedilini yakamoombolosha akumupa mulandu wakucobola Lesa. (Mate. 26:65, 66) Cakufwambaana bakabungana pomwi mashiku, akoombolosha mulandu kwakubula kukonkela mulawo. (Mate. 26:59; Maako 14:56-59) Aboobo Yesu ndyaakaamba ayi, “NobaLesa bangu, nobaLesa bangu, ino nciinshi ncemwandekeleshesha?” wakalinga kusuni ayi bantu bashibe kwaamba ayi taakalinga kucite mulandu wakwaamba ayi bamucailewo.

Mpashi Yesu wakaamba maswi aya, kwaamba ayi eebalushe bantu kwaamba ayi buka bweenka Yehova mbwaakasuminisha Defedi uyo wakalemba kulumbaisha kupenga, tacakalinga kusansulula ayi wakalinga wamulekelesha. Kwiipusha kwakwe Defedi takwalinga kusansulula ayi taakalinga kucitewo lushomo. Pesule ka kwiipusha mwiipusho, Defedi wakaamba ayi wakalinga kushomete ayi Yehova alaakupulusha bantu bakwe, alimwi Yehova wakatolelela kumupa shoolwe. (Kulu. 22:23, 24, 27) Ubu bweenka mbocakalinga akuli Yesu ‘Mwanaakwe Defedi,’ nabi kwaamba ayi wakalinga kupenga pacisamu cakupenshesha, tacaambi ayi Yehova wakalinga wamulekelesha.​—Mate. 21:9.

Mpashi Yesu wakaamba maswi aya ceebo cakwaamba ayi wakalinyumfwa buumba mukwiinga Yehova taakwe kumushitilisha, kwaamba ayi atolelele kushomeka kuli nguwe. Takwakalinga kuyanda kwakwe Yehova kwaamba ayi Mwanaakwe akapenshekwe akucaikwa. Kubisha kwakwe Adamu a Efa nkokwakapa kwaamba ayi Yehova asuminishe ayi Yesu afwe. Taakuwo cibiibi nabibo comwi Yesu ncaakacita, nacibi boobo, wakalinga kuyandika kupenshekwa akucaikwa kwaamba ayi akumbule miipusho pamakani Satana ngakatalika, alimwi akwaamba ayi alipile cilubula cakalinga kuyandika kwaamba ayi abooshe buumi Adamu mbwaakasowa. (Maako 8:31; 1 Pit. 2:21-24) Ishi shakalinga kusa mukukonshekabo na Yehova wacileka kushitilisha Yesu.

Mpashi Yesu wakaamba maswi aya ceebo cakwaamba ayi wakalinga kusuni ayi bashikwiiya bakwe babikile maano abuumbi ku ceebo Yehova ncaakasuminishila kwaamba ayi Yesu afwe pacisamu cakupenshesha. * Yesu wakalinga kucishi kwaamba ayi lufu lwakucaikwa anga ngu kapondo pacisamu cakupenshesha lulaakukalasha bamwi. (1 Koli. 1:23) Na bashikwiiya bakwe babikila maano kumulandu ngwakafwita cakalinga kusa mukubacafwa kubona kuyandika kwa lufu lwakwe. (Gala. 3:13, 14) Ici cakalinga kusa mukubacafwa kumubona mbuli Shikulubula kuteshi mbuli kapondo.

Teshi mulandu acakapa kwaamba ayi Yesu aambe maswi akaamba Defedi, wakalinga kucishi kwaamba ayi wakafwa pacisamu cakupenshesha ceebo cakuyanda kwakwe Yehova. Pesule kakwaamba maswi akaamba shikulumbaisha, Yesu wakaamba ayi: “Shakumanishikwa!” (Joni 19:30; Luka 22:37) Aboobo mukwiinga Yehova taakwe kumushitilisha Yesu ndyaakalinga kucaikwa, Yesu wakakumanisha shoonse Yehova nshaakamutuma kucita pacishi capanshi. Alimwi ici cakapa kwaamba ayi shoonse shakalembwa pali nguwe mu “Milawo yakwe Mose, abalaluki bakulukulu amu Kulumbaisha,” shikumanishikwe.​—Luka 24:44.