1-2. Ino ncikoshanyo nshi citucafwa kunyumfwishisha maswi ngotucana palilembo lya 1 Pita 2:21?

AMUYEEYE kwaamba ayi muli pakati ka likoto lya bantu batokwiinda muluundu luloondesha alimwi munshila icite museese. Muntu ushimo kabotu abuumbi ngwaatomutanjilila. Ndyaatoyaceenda, mutoomukonkela mwisule, kamuya cilyata mwaatoolyata. Ano mukuya kwaciindi uyo utoomutanjilila wacileka kuboneka, muciindi cakulisukama, mwebo ambomuli abo mulikoto, mwatolelela kumukonkela kwiinda mukukonkela myeendo mwalinga kulyata!

² Cishi cibiibi cino ncetubetemo cili anga nduundu luloondesha, alimwi mbuli Beneklistu bancine tuli anga ndikoto litokwiinda muluundu ulu. Nacibi boobo, Yehova wakatupa Mwanaakwe, Yesu Klistu, uyo ucishi kabotu kutanjilila. Alimwi inga twacikonsha kukonkela mwakeenda na cakubonenaako cakwe. (1 Pit. 2:21) Libuku limwi lyaamba pamakani amu Baibo lilaamba palilembo ili ayi Pita wakakoshanisha Yesu kumuntu shikutanjilila bantu. Bweenka shikutanjilila bantu mbwaashiya myeendo mwalinga kulyata, Yesu alakwe wakashiya cakubonenaako ncotweelete kukonkela. Amuleke tubandike miipusho yotatwe itokwaamba pamakani akukonkela Yesu mwaakeenda: Ino kukonkela Yesu mwaakeenda cilaamba nshi? Ino nceebonshi tulyeelete kukonkela Yesu mwaakeenda, alimwi ino cakubonenaako cakwe inga twacikonkela buyani?

3. Ino kukonkela muntu mwaakeenda cilaamba nshi?

³ Ino kukonkela umwi mwaakeenda cilaamba nshi? Mu Baibo, maswi akwaamba ayi “kweenda” alimwi a “myeendo” cimwi ciindi alasansulula shintu muntu nshaacita mubuumi bwakwe. (Mata. 6:9; Tus. 4:26) Shintu muntu nshaacita mubuumi inga twashikoshanisha  ku myeendo muntu mwalinga kulyata. Aboobo kukonkela mwaakeenda cilaamba kukonkela cakubonenaako cakwe.

4. Ino kukonkela Yesu mwaakeenda cilaamba nshi?

⁴ Aboobo ino kukonkela Yesu mwaakeenda cilaamba nshi? Cilaamba kukonkela cakubonenaako cakwe. Kweelana alilembo paswa mutwi uyu, mutumwi Pita wakalinga kwaamba cakubonenaako cibotu Yesu ncakatondesha kwiinda mukuliyumya mumapensho; nacibi boobo, kuli shimwi shiinji nshaakacita nsheenga twakonkela cakubonenaako cakwe. (1 Pit. 2:18-25) Ncakwiila Yesu wakatondesha cakubonenaako cibotu mushintu shoonse, ncotweelete kukonkela.

5. Sa bantu batamaninite inga bacikonsha kukonkela Yesu mwaakeenda? Amusansulule.

⁵ Ano sa mbuli bantu batamaninite inga twacikonsha kukonkela cakubonenaako cakwe Yesu? Ee inga twacikonsha. Ncakwiila inga tatucikoonshi kweenda bweenka mbwakalinga kweenda mukwiinga wakalinga kumaninite. Nacibi boobo, na katukonkela mwaakeenda cakubikila maano, akucita shoonse nsheenga twacikonsha mbuli bantu batamaninite, nkokwaamba ayi tulaakucikonsha kukonkela shakaamba mutumwi Joni ayi: ‘Tulyeelete kutolelela kweenda bweenka [Yesu] alakwe mbwaakeenda.’​—1 Joni 2:6, NWT.

6-7. Ino nciinshi nceenga twaambila ayi kukonkela cakubonenaako cakwe Yesu inga kwatupa kuyumya bushicibusa bwesu a Yehova?

⁶ Kukonkela Yesu mwaakeenda kulaakuyumya bushicibusa bwesu a Yehova. Ino nciinshi nceenga twaambila boobo? Cakutaanguna, Yesu lyoonse wakalinga kucita shisangalasha Lesa. (Joni 8:29) Aboobo na katukonkela mwaakeenda, tulaakunoocita shisangalasha Yehova. Alimwi inga tatutoonshi kwaamba ayi Ishiwesu wakwiculu alaakuba pafwiifwi abaabo beelesha cankusu kuba beshicibusa bakwe.​—Jemu. 4:8.

⁷ Cabili, Yesu wakalinga kukonkela cakubonenaako ca baIshi mushintu shoonse. Nceceeco ncakaambila ayi: “Uyo wabona ndime wabona  aba Ta.” (Joni 14:9) Inga twakonkela mibo yakwe Yesu alimwi ambwaakalinga kucita shintu​—kucakubonenaako, wakanyumfwila nkumbu shimanata, wakayeeyelako mwanakashi wakalinga kucite bulwashi bwamukunko, alimwi wakalinga kucite nkumbu kubaabo bakalinga kucite buumba. Na aswebo katukonkela cakubonenaako cakwe Yesu, nkokwaamba ayi tutokonkela Yehova. (Maako 1:40, 41; 5:25-34; Joni 11:33-35) Alimwi na katukonkela cakubonenaako cakwe Yehova, tulayumya bushicibusa bwesu anguwe.

8. Amusansulule mbweenga kukonkela Yesu mwaakeenda kwatucafwa ‘kukoma bubi bwamucishi.’

⁸ Kukonkela Yesu mwaakeenda inga kwatucafwa kuleya kupilinganishikwa ashintu shamucishi cibiibi ici. Ciindi camashiku, pabushiku Yesu kaatana kucaikwa, wakaamba ayi: “Bubi bwa mucishi cino ndabukoma.” (Joni 16:33) Wakalinga kusansulula ayi wakakaka kuyungwa amiyeeyo ashintu bantu bamucishi nshobacita. Yesu wakatolelela kubikila maano kuluyaando ndwaakesita pacishi capanshi, nkokwaamba ayi kusalasha liina lyakwe Yehova. Ino mbuyani swebo? Mucishi muli shintu shiinji sheenga shatupilinganya. Nacibi boobo, bweenka mbuli Yesu, na twatolelela kubikila maano kukucita kuyanda kwakwe Yehova, tulaakucikonsha ‘kukoma bubi bwamucishi.’​—1 Joni 5:5.

9. Ino nshiinshi nshotweelete kucita kwaamba ayi tutolelele kuba panshila itola kubuumi butamaani?

⁹ Na katukonkela cakubonenaako cakwe Yesu tulaakucana buumi butamaani. Musankwa mubile ndyaakeepusha Yesu nshaeelete kucita kwaamba ayi akacane buumi butamaani, Yesu wakakumbula ayi: “Use ube shikwiiya wangu.” (Mate. 19:16-21, NWT) Ku baJuda bamwi batakalinga kumushoma ayi ngu Klistu, Yesu wakaamba ayi: “Mbelele shangu . . . shilankonkela. Ndashipa buumi butamaani.” (Joni 10:24-29) Alimwi Yesu wakalwiita Nikodemasi, womwi waba munkuta inene ya Sanihedilini uyo wakalinga kusuni kwiiya shiinji pasheesho Yesu nshaakalinga kwiisha, ayi “uyo woonse umushoma” alaakuba “abuumi butamaani.” (Joni 3:16) Tulatondesha ayi tulashoma muli Yesu kwiinda mukukonkela nshaakaamba alimwi anshaakalinga kucita. Kucita boobo kulaakutucafwa kutolelela kuba panshila itola kubuumi butamaani.​—Mate. 7:14.

10. Ino nshiinshi nshotweelete kucita kwaamba ayi ‘tumushibe’ kabotu Yesu? (Joni 17:3)

¹⁰ Katutana kutalika kukonkela Yesu mwaakeenda, tulyeelete kutaanguna kumushiba. (Amubelenge Joni 17:3.) Tulyeelete kutolelela kwiiya pali Yesu kwaamba ayi ‘tumushiibe.’ Kumushiba kabotu Yesu kulayandika kwiiya pamibo yakwe, mbwaakalinga kubona shintu, alimwi anjiisho nshaakalinga kukonkela. Nabi twakala mucancine kwa myaaka iinji, tulyeelete kutolelela kwiiya pali Yehova a Mwanaakwe kwaamba ayi ‘tubashibe’ kabotu.

11. Ino ngamakani nshi ngotucana mumabuku ali 4 aMakani Abotu?

¹¹ Mukwiinga Yehova alitusuni, wakapa kwaamba ayi mu Maswi akwe mube mabuku ali 4 a  Makani Abotu, eenga atucafwa kumushiba kabotu Mwanaakwe. Mabuku aya alaamba pabuumi bwakwe Yesu ambwakalinga kusebensa ncito yakushimikila. Alatucafwa kushiba Yesu nshaakalinga kwaamba, kucita, alimwi ambwakalinga kubona shintu. Mabuku aMakani Abotu alatucafwa ‘kuyeeya’ bunene pacakubonenaako cakwe Yesu. (Ebu. 12:3) Munshila imwi inga twaamba ayi, mumabuku aya motucana makani atutondesha Yesu mwaakeenda. Aboobo na katwaabelenga cakubikila maano, tulaakumushiba kabotu abuumbi Yesu. Kucita boobo kulaakutucafwa kukonkela mwaakeenda.

12. Ino inga twacita buyani kwaamba ayi tufubileemo ndyetutobelenga mabuku aMakani Abotu?

¹² Kwaamba ayi tufubileemo mukubelenga mabuku aMakani Abotu, tatweelete kweelabo pakwaabelenga. Tulyeelete kucana ciindi cakwiiya cakubikila maano alimwi akukutumana kuyeeyawo abuumbi. (Amweelanye a Joshuwa 1:8) Amuleke tubandike shintu shobilo sheenga shatucafwa kukutumana kuyeeyawo ndyetutobelenga mabuku aMakani Abotu akukonkela nshotwabelenga.

13. Ino inga mwacita buyani kwaamba ayi munooyeeya ayi amwebo nkomuli makani ngomutobelenga ndyaakalinga kucitika?

¹³ Cakutaanguna, amuyeeye kwaamba ayi amwebo nkomuli makani ngomutobelenga ndyaakalinga kucitika. Amuyeeye mboshakalinga kucitika, kunyumfwika, akulinyumfwa mbobakalinyumfwa abo bakalingaako nshemutoobelenga ndyeshakalinga kucitika. Kwaamba ayi mucikoonshe kucita boobo, amulangweteewo makani aamwi kusebensesha mabuku akabambwa alibunga lyakwe Yehova. Amubone makani oonse atokwaambwawo, nkokwaamba ayi shintu shakacitika makani ngomutobelenga kaatana kucitika alimwi asheesho shakacitika pesule. Amulangoole makani aamwi aamba sha bantu alimwi amisena yaambwa mumakani ngomutobelenga. Amweelanye makani ngomutobelenga kumakani eenka ayo ano akalembwa mulibuku lya Makani Abotu limwi. Cimwi ciindi wakalemba libuku lya Makani Abotu womwi, inga waamba makani eenga amucafwa ayo shikulemba umwi ngaatana kwaambawo.

14-15. Ino nshiinshi nshotweelete kucita kwaamba ayi tucikoonshe kukonkela nshotweeya mumabuku aMakani Abotu?

 ¹⁴ Cabili, amukonkele nshomweeya kuswa mumabuku aMakani Abotu. (Joni 13:17) Pesule lyakubelenga cakubikila maano makani kuswa mulibuku lya Makani Abotu, amuliipushe ayi: ‘Ino nshiinshi nshetokwiiya pamakani aya nsheenga ndakonkela? Ino inga ndasebensesha buyani makani aya kucafwa umwi?’ Amweeleshe kuyeeya na kuli umwi ngweenga mwacafwako, lyalo paciindi ceelete, inga mwalwiitaako umwi nshomwakeeya kwakubula kumukalasha.

¹⁵ Amuleke tubandike cakubonenaako ca mbweenga twakonkela shintu shobilo nshetwabandikaawo. Tutobandika pamakani amukalubinje mukandu Yesu ngwakabona mu tempele.

16. Amusansulule shakalinga kucitika shilembetwe pa Maako 12:41.

¹⁶ Amuyeeye ayi nkomuli ndyemutobelenga shakalinga kucitika. (Amubelenge Maako 12:41.) Amuyeeye shakalinga kucitika. Pakalinga pabushiku bwa Nisani 11, mumwaaka wa 33 kakucalitebo inshiku shiniini kwaamba ayi Yesu acaikwe. Pabushiku ubu Yesu wakatola ciindi cilaamfu kwiisha bantu mu tempele. Nacibi boobo, bamatanjilili babupailishi bakalinga kumupikisha. Paciindi cimwi bamwi bakalinga kumwiipusha nkwaakakusha nkusu shakucita shaankamiko. Bamwi bakalinga kumwiipusha miipusho njobakalinga kubona anga inga waalilwa kukumbula. (Maako 11:27-33; 12:13-34) Lyalo Yesu wakaya kulubasu lumwi lwa tempele. Mpashi wakalinga waya kulubasu lwakalinga kwiitwa ayi Lubaansa lwa Banakashi. Ndyaakalinga kulubasu ulu wakabona shakubikaamo maali shakalinga pafwiifwi alubumbu lwakalinga kushingulukite musena uyu. Wakekala, lyalo akutalika kulangilisha bantu mbobakalinga kubika maali mushakubikaamo maali. Wakabona babile baanji bakalinga kubika maali aanji mushakubikaamo maali. Mpashi wakalinga pafwiifwi abuumbi cakwaamba ayi wakalinga kunyumfwa maali ndyaatolokela mushakubikaamo.

17. Ino nshiinshi nshaakacita mukalubinje waambwa pa Maako 12:42?

¹⁷ Amubelenge Maako 12:42. Ndipakeenda kaciindi, Yesu wakabona mwanakashi umwi. Mwanakashi uyo wakalinga “mukalubinje mukandu.” (Luka 21:2) Buumi bwakalinga buyumu abuumbi kumwanakashi uyu, mpashi taakalinga kubaawo amaali akwene kuula shiyandika. Nacibi boobo, wakaya mukubika tumaali twamukuba tobilo mucakubikaamo maali, mpashi tatuna kunyumfwika akunyumfwika pesule lyakutuwaala mucakubikaamo maali. Yesu wakalinga kucishi maali mwanakashi mukalubinje ngakabikaamo. Wakabikamo tumaali tobilo twakalinga kwiitwa ayi lepita, uto twatakalinga kucite mpindu iniini paciindi cilya. Tatwakalinga kukwana nabi kuula kayuni komwi patuyuni twakalinga kucipite abuumbi bantu ntobakalinga kulya.

18. Kweelana a Maako 12:43, 44, ino Yesu wakaamba nshi pacipo cakapa mukalubinje?

¹⁸ Amubelenge Maako 12:43, 44. Yesu wakakondwa abuumbi ashakacita mukalubinje uyu. Aboobo wakeeta bashikwiiya bakwe, akubatondesha mukalubinje, lyalo akwaamba ayi: “Uyu mukalubinje mukandu wabikaamo maali aanji kwiinda baabo boonse babika.” Lyalo wakasansulula ayi: “Mukwiinga boonse [bunene bunene babile] balikukusha pamaali aanji ngobacite, sombi lakwe mubukandu bwakwe, wabikaamo maali oonse ngaalinga kucite, ayo akalinga muŋanda yakwe.” Kubikaamo maali oonse ngaakalinga kucite kwakacita mukalubinje ushomeka ulya, kwakalinga kutondesha mbwaakalinga kucinkite manungo muli Yehova kwaamba ayi alaakumulama.​—Kulu. 26:3.

19. Ino nciiyo nshi ciyandika nceenga tweeya pasheesho shakaamba Yesu pali mukalubinje?

¹⁹ Amukonkele makani ngomweeya. Amuliipushe ayi, ‘Ino nshiinshi nsheenga ndeeya pamakani akaamba Yesu pali mukalubinje?’ Amuyeeye pali mukalubinje. Ncakutatoonsha kwaamba ayi alyeelete wakalinga kusuni kupa shiinji kuli Yehova.  Sombi wakacitabo nshaakalinga kucikonsha; wakapa Yehova kweelana ampakalinga kweela. Alimwi Yesu wakalinga kucishi ayi kuli baIshi, cipo cakapa mukalubinje cakalinga cilibetele. Aboobo citeente cinene ncakwaamba ayi: Yehova alakondwa na twapa kweelana ankusu shesu mposheela, nkokwaamba ayi kumusebensela camoyo woonse. (Mate. 22:37; Kolo. 3:23) Yehova alakondwa na katusebensa kushika peela nkusu shesu! Pashintu nsheenga twapa Yehova kweelana ankusu shesu mposheela, pali ciindi alimwi ankusu shesu nshetusebensesha mukulambila kwesu, mbuli muncito yakushimikila akucanika kumabungano.

20. Ino nshomweeya pamakani amukalubinje inga mwashikonkela buyani? Amwaambe cakubonenaako.

²⁰ Ino nshetwiiya pamakani amukalubinje inga mwashikonkela buyani? Amuyeeye na kuli bamwi mbweenga mwacaafwa kwiinda mukubayuminisha kwaamba ayi Yehova alakondwa pancito njobasebensa. Kucakubonenaako, sa kuli nankashi wacinene ngomushi mpashi ulinyumfwa cibiibi na kulinyumfwa kuba utacite ncito, ceebo cakwaamba ayi taacitewo nkusu shakusebensa cankusu muncito yakushimikila mbuli mbwakalinga kucita kale kale? Na mpashi inga mwayeeya mukwesu waciswa bulwashi bunene kwaciindi cilaamfu, aboobo ulalinyumfwa kulefuka ceebo cakwaalilwa kucanika kumabungano lyoonse? Amubacaafwe kwiinda mukwaamba maswi “akonsha kuyaka.” (Efe. 4:29) Amubalwiiteko makani ayuminisha ngotwiiya pamakani amukalubinje wakalinga mukandu. Maswi anu ayuminisha inga abacafwa kushiba kwaamba ayi Yehova alikondetwe pakusebensa cankusu kwabo. (Tus. 15:23; 1 Tesa. 5:11) Na mwalumba bamwi ceebo cakusebensa cankusu kwabo muncito yakwe Yehova nabi balasebensabo paniini, nkokwaamba ayi mutokonkela cakubonenaako cakwe Yesu.

21. Ino nciinshi ncomushinishite kucita?

²¹ Tulalumba abuumbi kwaamba ayi mumabuku aMakani Abotu muli makani aanji aamba pali Yesu, mukwiinga alatucafwa kukonkela cakubonenaako cakwe! Ino mbuyani kweelesha kwiiya bunene pamakani acanika mumabuku aMakani Abotu ndyemutoocita ciiyo capalwaanu na kulambila kwa mukwashi? Tutaluubi kwaamba ayi tulyeelete kuyeeyela makani ngotutobelenga mbwaakalinga kucitika alimwi akweelesha kukonkela nshetweeya. Kwiilika pa kukonkela Yesu nshaakalinga kucita, tulyeelete kukutika kushintu nshakaamba. Mumutwi utokonkelaawo, tulaakubandika nsheenga tweeya ku maswi akweelaako Yesu ngakaamba mashiku kaatana kufwa.