Ndyendakashika myaaka mpashi 13, bushicibusa bwangu a Yehova bwakatalika kuboolela mwisule. Ndakalinga kubona ayi babyaanji bakucikolo bakalinga kucite lwaanguluko lwakucita shiinji, aboobo anebo ncendakalinga kusuni. Ndakatalika kubona anga milawo yakalinga kumpa bashali alimwi anjiisho sha Bwineklistu nshiyumu kukonkela, alimwi ndakatalika kubona anga kucita shintu shakumushimu nincito abuumbi. Nabi kwaamba ayi ndakalinga kucishi ayi Yehova nkwaali, nshindakalinga kulinyumfwa kuba pafwiifwi anguwe.

Nacibi boobo, nshikwe kucilekela limwi kushimikila sombi ndakalinga kusebensako paniini. Lyoonse nshindakalinga kulibambila ndyentooya muncito yakushimikila, aboobo ndakalinga kupenga kwaamba ayi ntalike kubandika amuntu lyalo akutolelela amubandi. Aboobo nshindakalinga kucitewo lweendo lwakuboolelaako na ciiyo ca Baibo alimwi ndakacileka kusangalala muncito yakushimikila, alimwi ici cakampa kwiipata ncito yakushimikila. Ndakalinga kuliipusha ayi, ‘Ano muntu inga wacikonsha buyani kunooshimikila nsondo ansondo, mweenshi amweenshi?’

Ndyendakashika myaaka 17, ndakalinga kusuni abuumbi kuba alwaanguluko. Aboobo ndakalongela shintu shangu akulongela ku cishi ca Australia. Bashali bangu bakalinyumfwa cibiibi abuumbi ndyendakaswa  paŋanda. Bakalisukama sombi bakalinga kuyeeya ayi ndaakutolelela kucita shintu shakumushimu.

Ndyendakalongela ku Australia, ndakaboolela panshi abuumbi lwakumushimu. Ndakatalika kulofwa kumabungano. Ndakatalika kusekana abacanike babyaanji batakalinga kusuni bunene kucanika kumabungano bweenka mbuli ndime, twakalinga kucanikaako kumabungano, lyalo pesule twakalinga kuya mukunwa akushana kumabiyawolo mashiku. Na ndayeeya paciindi cilya, ndabona kwaamba ayi mweendo womwi wakalinga mucancine uyu umwi wakalinga mucishi, sombi taakuwo lubasu ndondakalinga kusuni abuumbi pambasu shoonse shobilo.

Ndipakeenda myaaka mpashi yobilo, ndakakumanya nankashi utana kushiba kwaamba ayi wakampa kutalika kuyeeya pashintu nshendakalinga kucita. Ndakalinga kukala abenankashi bali 5 muŋanda yomwi, aboobo twakeeta mutanjilili walubasu amukaakwe, Tamara, kwaamba ayi tukale abo nsondo yoonse. Mukwesu ndyaakalinga kucita sha kulibungano, nankashi Tamara wakalinga kusa mukubandika andiswe alimwi twakalinga kuseka pomwi. Ndakanyumfwa kabotu nankashi uyu nshaakalinga kucita. Wakalinga muntu uliceesha alimwi ucishi kuseka abantu. Ndakanyumfwa kabotu abuumbi kushiba kwaamba ayi inga cakonsheka kuseka akubandika pomwi amuntu ubikila maano abuumbi kushintu shakumushimu.

Nankashi Tamara wakalinga muntu usangalete abuumbi. Alimwi wakalinga kusuni cancine anciito yakushimikila abuumbi cakwaamba ayi kubabo kaciindi kaniini anguwe, awebo nkutalika kusuna kusebensela Yehova. Wakalinga kusangalete abuumbi kusebensela Yehova amoyo wakwe woonse, ano mukwiinga nshindakalinga kusebensela Yehova amoyo wangu woonse, nshindakalinga kusangalete. Kubikila maano abuumbi kukusebensela Yehova alimwi alusangalalo lwancinencine ndobakalinga kucite, shakapa kwaamba ayi anebo nkonkele cakubonenaako cabo. Ndakatalika kuyeeya pacancine comwi ciyandika abuumbi ncetucana mu Malembo, cakwaamba ayi: Yehova alisuni kwaamba ayi soonse tunomusebensela “cakukondwa” alimwi “akwiimba cakusangalala.”​—Kulu. 100:2.

Ndakalinga kusuni kuba alusangalalo bweenka mbuli ba Tamara, nacibi boobo, ndakalinga kweelete kutaanguna kwaalula shiinji kwaamba ayi ntalike kuba alusangalalo. Nabi kwaamba ayi nshikwe kwaalula shintu peenkapo, ndakatalika paniini paniini.  Ndakatalika kulibambila kaantana kuya muncito yakushimikila, alimwi ciindi aciindi ndakalinga kucitako bupainiya bwakucafwilisha. Ici cakancafwa abuumbi kushimikila cakutaloonda. Mukwiinga liinji ndakalinga kusebensesha Baibo muncito yakushimikila, ndakalinga kusangalala abuumbi. Mukuya kwaciindi ndakatalika kucita bupainiya bwakucafwilisha mweenshi uli woonse.

Ndakatalika kunyumfwana abeshicibusa bashiimo shipusenepusene abo bakalinga kucita kabotu abuumbi mucancine alimwi bakalinga kusangalala kusebensela Yehova. Cakubonenaako cabo cibotu cakancafwa kutalika kuyeeya pacintu cakalinga kuyandika abuumbi mubuumi bwangu, alimwi ndakatalika kubelenga Baibo bushiku abushiku. Ndakatalika kusangalala abuumbi kusebensa ncito yakushimikila, lyalo mukuya kwaciindi ndakatalika bupainiya bwaciindi coonse. Ici ncecakalinga ciindi cakutaanguna ndyendakabaawo alusangalalo pesule lya myaaka iinji alimwi ndakakondwa abuumbi kuba mulibungano.

Ndipakeenda mwaaka womwi, ndakakumanya mukwesu waliina lya Alex, wakalinga muntu ucite moyo ubotu, wakalinga kusuni Yehova anciito yakushimikila. Wakalinga musebenshi ucafwilisha alimwi painiya waciindi coonse kwa myaaka 6. Wakalinga wasebensaako kwakaciindi kumusena ubulishite kucishi ca Malawi. Ndyaakalinga ku Malawi, wakalinga kucanika bunene abamishonali bakalinga cakubonenaako cibotu kulinguwe alimwi bakamuyuminisha kutolelela kubika sha Bwaami panembo.

Mu mwaaka wa 2003, nebo aba Alex twakeebana, aboobo kuswabo ciindi cilya twakatolelela muncito yaciindi coonse. Twakeeya shintu shiinji, alimwi Yehova watupa shoolwe munshila shiinji abuumbi.

Mu mwaaka wa 2009, twakapekwa coolwe cakusebensa mbuli bamishonali kumusena wiitwa ayi Timor-Leste, cishi ciniini cicanika pansumbu shaku  Indonesia. Twakakankamana abuumbi, kukondwa, alimwi akulisukama paciindi comwi. Ndipakeenda myaaka 5 twakashika mundabala inene iitwa ayi Dili.

Buumi kumusena uko bwakalinga kupusene abuumbi ambotwakashibila. Twakalinga kweelete kwiiya mbobakala, mushobo, kushibila shakulya, alimwi  abukaalo bupusene ambotwakashibila. Ndyetwakalinga kushimikila liinji twakalinga kucana bantu bakandu, bataiite, alimwi abakalinga kupenshekwa. Alimwi twakalinga kucana abantu baanji bakalinga kwiinda mumapensho aanji ceebo ca nkondo alimwi akucayana kwakalinga mucishi ici. *

Incito yakushimikila yakalinga kubota abuumbi! Kucakubonenaako, bushiku bumwi ndakakumanya mwanakashi wacanike waliina lya Maria wakalinga kucite myaaka 13. * Paciindi ici kapali peendabo myaaka iniini kuswa ciindi banyina ndyebakafwa, alimwi liinji taakalinga kubonana abaishi. Bweenka mbocakalinga kubanike baanji baciimo mbuli nguwe, Maria taakalinga kucishi shakucita mubuumi bwakwe. Ntokwiibaluka bushiku bumwi wakaalilwa kulicata akutalika kulila ndyaakalinga kunsansulwita mbwaakalinga kulinyumfwa. Nacibi boobo, nshikwe kunyumfwishisha nshaakalinga kwaamba mukwiinga paciindi ici kaantana kuushiba kabotu mushobo. Ndakapaila kuli Yehova kwaamba ayi ancaafwe kushiba mbweenga ndamuyuminisha Maria, lyalo ndakatalika kumubelengela malembo ayuminisha. Ndipakeendabo myaaka iniini, ndakabona cancine mbocakacafwa Maria kwaalula mbwaakalinga kuyeeya, mbwaakalinga kuboneka, alimwi anshaakalinga kucita. Wakabombekwa alimwi pacecino ciindi alicite shiiyo sha Baibo. Maria wakacana mukwashi unene wakumushimu alimwi alalinyumfwa ayi balimusuni abuumbi.

Incito yakushimikila itooya panembo abuumbi ku Timor-Leste. Nabi kwaamba ayi beshikushimikila baanji bakabombekwa mumyaaka 10 yaiinda, baanji mbapainiya, basebenshi bacafwilisha, na bamanene. Bamwi balasebensa ku ofesi yabasansulushi akucafwilisha muncito yakubamba shakulya shakumushimu mumishobo inemishaabo. Ndakakondwa abuumbi kubanyumfwa kabeemba kumabungano, kubona mbobasangalete, alimwi akubona mbobatooya panembo lwakumushimu.

Nabi kwaamba ayi buumi ku Timor-Leste bwakalinga kupusene abuumbi ambotwakalinga kukala ku Australia, ndakalinga kusangalete abuumbi kwiinda mbondakalinga kulangila. Cimwi ciindi twakalinga kutyaanana mukabasi kaniini, mweenka umo kamuli answi shiyumu alimwi amasaka aswite bucisa ngobakalinga kuswa mukuula kumaaketi. Cimwi ciindi twakalinga kucita shiiyo sha Baibo mukaanda kalungula mwakalinga matombe alimwi ankuku kasheendaana. Nabi kwaamba ayi kwakalinga mapensho oonse aya, liinji ndakalinga kusangalala abuumbi!

Na ndayeeya shakacitika kale kale, ndalumba abuumbi kwaamba ayi bashali bangu bakasebensa cankusu kuncafwa kwiiya pali Yehova alimwi akutolelela kuncafwa nabi paciindi ndyendakalinga ndaboolela mwisule. Ndakesa mukushoma kwaamba ayi Baibo nshoyaamba pa Tushimpi 22:6 nshancine. Bama abata balikondetwe abuumbi kubona nebo aba Alex mbotutosebensela Yehova. Kuswabo mu 2016 tulafwakashila mabungano mucishi ca Australia a New Zealand.

Ndakankamana abuumbi na ndayeeya kwaamba ayi kwakalinga ciindi ndyendakalinga kubona ncito yakushimikila mbuli mukuli ulemya. Pacecino ciindi ndikusuni abuumbi kushimikila! Ndakesa mukushiba kwaamba ayi tacicite mulandu amapensho ngeenga tweendaamo, inga twacanabo lusangalalo na katusebensela Yehova camoyo woonse. Ncakutatoonsha kwaamba ayi myaaka 18 njondasebensela Yehova pomwi abeebangu ba Alex, nceciindi ncendacana lusangalalo lwancinencine mubuumi bwangu. Ano ndashoma maswi akaamba Defedi kuli Yehova ayi: ‘Abo boonse bayuba muli ndimwe, balaakusangalala; lyoonse banokwiimba ceebo cakusangalala. . . . Alimwi abo basuni liina lyanu balaakunoosangalala muli ndimwe.’​—Kulu. 5:11.