1. Ino Yehova alabona nshi muli ndiswe?

YEHOVA LESA “alakondwa mubantu bakwe.” (Kulu. 149:4) Kushiba cancine ici kulatupa kukondwa! Yehova alabona mibo yesu ibotu; alicishi kwaamba ayi inga twaba bantu bali kabotu, aboobo alatucafwa kuba beshicibusa bakwe. Na twatolelela kushomeka kuli nguwe, alaakutolelela kuba shicibusa wesu kwamuyayaya!​—Joni 6:44.

2. Ino nciinshi cipa bamwi kushoma ayi Yehova inga tabasuniiwo?

² Bamwi inga baamba ayi, ‘Ndicishi kwaamba ayi Yehova alibasuni bantu bakwe mbuli likoto, ino inga ndashiba buyani na palwaangu anebo alinsuni?’ Ino nciinshi ceenga capa kwaamba ayi muntu aliipushe mwiipusho mbuli wooyu? Ba Oksana, * abo bakapenga abuumbi ndyebakalinga kukula bakaamba ayi: “Ndakakondwa abuumbi ndyendakabombekwa akutalika bupainiya. Ano pesule lya myaaka 15, ndakatalika kuyeeya shibiibi shakancitikila kubwanike. Ndakatalika kuyeeya ayi Yehova taansuniiwo alimwi nsheeletewo akusunwa kuli nguwe.” Nankashi waliina lya Yua, painiya alakwe wakeenda mumapensho aanji kubwanike, wakaamba ayi: “Ndakaaba buumi bwangu kuli Yehova mukwiinga ndakalinga kusuni kumusangalasha. Sombi ndakalinga kushomete cakutatoonsha ayi Yehova inga taansuniiwo.”

3. Ino tutokwiiya nshi mumutwi uyu?

³ Bweenka mbuli benankashi bashomeka mbotwaambawo, amwebo mulimusuni abuumbi Yehova, ano mpashi mulatoonsha na alimusuni. Ino nceebonshi mulyeelete kushoma cakutatoonsha kwaamba ayi alamubikila maano? Alimwi ino nciinshi ceenga  camucafwa na mwatalika kuyeeya ayi Yehova taamusuniiwo? Amuleke tucane shikumbulo kumiipusho iyi.

4. Ino nceebonshi kutoonsha lusuno lwakwe Yehova nkubiibi?

⁴ Na katushoma cakutatoonsha kwaamba ayi Yehova alitusuni, tulaakucita shoonse nsheenga twacikonsha kwaamba ayi tutolelele kumusebensela nabi ndyetutokwiinda mumapensho. Ano na katutoonsha kubikila maano kwakwe Lesa, tulaakumaninwa nkusu. (Tus. 24:10) Alimwi na twalefuka akucileka kushoma lusuno lwakwe Lesa, nkokwaamba ayi tulakwaalilwa kulwana Satana.​—Efe. 6:16.

5. Ino nshiinshi shicitika na muntu watalika kuyeeya ayi Lesa taamubikiliko maano?

⁵ Bamakwesu abenankashi bamwi bakatalika kuyeeya ayi Yehova tabasuniiwo alimwi taababikili maano, aboobo bakaboolela mwisule. Munene waliina lya James wakaamba ayi: “Nabi kwaamba ayi ndakalinga kusebensela pa Bethel alimwi ndakalinga kusangalala muncito yakushimikila mumushobo umwi, ndakalinga kutoonsha na Yehova wakalinga kukondetwe akusebensa kwangu. Paciindi cimwi ndakatalika akutoonsha na Yehova wakalinga kukutika mipailo yangu.” Nankashi waliina lya Eva, alakwe uli muncito yaciindi coonse wakaamba ayi: “Ndakesa mukushiba kwaamba ayi kutoonsha na Yehova alikusuni nkubiibi mukwiinga inga kwapa kwaamba ayi ucileeke kumusebensela kabotu. Kulinyumfwa boobo inga kwakulengesha kucileka kuba alusuno lwakusebensela Yehova, akucileka kuba alusangalalo muncito yakwe.” Mukwesu waliina lya Michael, painiya waciindi coonse alimwi munene mulibungano, wakaamba ayi: “Kutashoma kwaamba ayi Lesa alakubikila maano inga kwakulengesha kulitalamusha kuli nguwe.”

6. Ino nshiinshi nshotweelete kucita na twatalika kutoonsha na Lesa alatubikila maano?

⁶ Shakubonenaako ishi shitootondesha kutoonsha na Yehova alitusuni mbweenga kwanyonyoola lushomo lwesu. Ano ino nshiinshi nsheenga twaciita na twatalika kutoonsha na Yehova alitusuni? Tulyeelete kukaka miyeeyo iyo peenkapo! Amupaile kuli Yehova kwaamba ayi amucaafwe kucileka kutoonsha akumupa ‘luumuno lwakwe Lesa ulo lweshi lukalame myoyo yanu alimwi amiyeeyo yanu.’ (Kulu. 139:23; Filip. 4:6, 7) Alimwi mutaluubi kwaamba ayi tamubete nweenka. Kuli bamakwesu abenankashi bamwi bashomeka balinyumfwa bweenka  mbuli mbomulinyumfwa. Basebenshi bakwe Yehova bamuciindi cakale kale abalo cimwi ciindi bakalinga kutoonsha na Yehova ulababikila maano. Amuleke tubandike nsheenga tweeya kucakubonenaako ca mutumwi Paulo.

7. Ino ngamapensho nshi Paulo ngakeendaamo?

⁷ Sa cimwi ciindi mulabona anga incito shamufulila abuumbi, aboobo nciyumu kwaamba ayi mucikoonshe kushikumanisha shoonse? Na mbomubona, nkokwaamba ayi inga mwanyumfwisha shakacitikila Paulo. Wakalinga ‘kulisukama abuumbi ceebo ca mabungano oonse.’ (2 Koli. 11:23-28) Sa kuciswa kwaciindi cilaamfu kulamupa kutaba alusangalalo? Paulo wakaliyumya a “muumfwa mumubili,” mpashi bulwashi mbwaakalinga kusunishishi ayi boole. (2 Koli. 12:7-10) Sa cimwi ciindi mulalinyumfwa kulefuka ceebo ca shilubo shanu? Alakwe Paulo mbwaakalinga kulinyumfwa cimwi ciindi. Mukwiinga lyoonse wakalinga kuyandika kulwana cankusu kwaamba ayi acite ciluleme wakaamba ayi “maawe nemucaangu.”​—Loma. 7:21-24.

8. Ino nciinshi cakacafwa Paulo kuliyumya mumapensho?

⁸ Nabi kwaamba ayi Paulo wakalinga kwiinda mumapensho aanji, wakatolelela kusebensela Yehova. Ino nciinshi cakamucafwa? Nabi kwaamba ayi wakalinga kucishi ayi taamaninite, wakalinga kucite lushomo luyumu mucilubula alimwi wakalinga kucishi Yesu nshaakashomesha ayi “uyo woonse ushoma [Yesu] inga waba abuumi butamaani.” (Joni 3:16; Loma. 6:23) Ncakutatoonsha kwaamba ayi Paulo wakalinga womwi pabaabo bakalinga kushoma mucilubula. Wakalinga kushomete cakutatoonsha kwaamba ayi Yehova alilibambite kulekelela baabo bacita cilubo cinene na baana.​—Kulu. 86:5.

9. Ino nshiinshi nsheenga tweeya ku maswi akaamba Paulo palilembo lya Bene Galatiya 2:20?

⁹ Paulo wakalinga kucishi ayi Lesa alimusuni abuumbi mukwiinga wakatuma Yesu kusa mukumufwita. (Amubelenge Bene Galatiya 2:20.) Amunyumfwe maswi ayuminisha Paulo ngakaamba ngotucana kumamanino avesi 20. Wakaamba ayi: “Mwanaakwe Lesa . . . wakansuna abuumbi akwaaba buumi bwakwe ceebo ca ndime.” Paulo taakalinga kulibona ayi ngumuntu mubiibi abuumbi cakwaamba ayi Lesa inga tamutondeshi lusuno, taakalinga kuyeeya ayi ‘ndaboona Yehova ncaasunini bamakwesu abenankashi sombi kuteshi ndime.’ Paulo wakebalusha bene Loma ayi: “Klistu wakatufwita katucili bamucita shibi.” (Loma. 5:8) Taakuwo ceenga capa kwaamba ayi Lesa aalilwe kutusuna!

10. Ino nshiinshi nshetutokwiiyaawo palilembo lya Bene Loma 8:38, 39?

 ¹⁰ Amubelenge Bene Loma 8:38, 39. Paulo wakalinga kucishi ayi lusuno lwakwe Lesa lulicite nkusu. Wakalemba ayi taakuwo “ceenga catupansaanya alusuno lwakwe Lesa.” Paulo wakalinga kucishi Yehova mbwakatondesha kukalika moyo kubene Isilaeli. Alimwi wakalinga kucishi Yehova mbwakamunyumfwila nkumbu. Aboobo mu maswi amwi inga twaamba ayi Paulo wakalinga kuyeeya ayi, ‘Mukwiinga Yehova wakatuma Mwanaakwe kusa mukufwa ceebo ca ndime, nsheelete kutoonsha kwaamba ayi alinsuni.’​—Loma. 8:32.

11. Nabi kwaamba ayi Paulo wakacita shibiibi mbuli sheesho shaambwa pa 1 Timoti 1:12-15, ino nciinshi cakamupa kushoma cakutatoonsha kwaamba ayi Lesa alimusuni?

¹¹ Amubelenge 1 Timoti 1:12-15. Cilyeelete kwakalinga ciindi Paulo ndyaakalinga kulinyumfwa cibiibi abuumbi na wayeeya shibiibi nshaakalinga kucitika kale kale. Aboobo inga tatukankamani ayi wakalyaamba ayi “nebo ndeendaawo kubica”! Kaatana kwiiya cancine, Paulo wakalinga kupensha Beneklistu mumisena ipusenepusene, bamwi wakalinga kubabika mujeele, akusuminisha kwaamba ayi bamwi bacaikwe. (Milimo 26:10, 11) Na Paulo wakakumanyawo Mwineklistu wacanike uyo bashali bakwe bakacaikwa ceebo cakwaamba ayi ngowakasuminisha, nkokwaamba ayi wakalinga kulinyumfwa cibiibi abuumbi. Paulo wakalinga kulinyumfwa cibiibi abuumbi pashibiibi nshaakalinga kucita kale kale. Wakashoma kwaamba ayi Klistu wakafwa ceebo ca nguwe, aboobo wakalemba ayi: “Kwiinda muluse lwakwe Lesa ndakaba mbuli mboombete bulya.” (1 Koli. 15:3, 10) Ino nciinshi ncetutokwiiyawo? Mulyeelete kushoma cakutatoonsha kwaamba ayi Yesu wakafwita ndimwe akupa kwaamba ayi mucikoonshe kuba abushicibusa buyumu a Yehova. (Milimo 3:19) Lesa nshaabikila maano nshesho nshemutoocita pacecino ciindi ansheshi mukacite kunembo,  kuteshi kushilubo nshomwakacita kale kale, mpashi kamuli kale Kamboni na kamutana kuba.​—Isa. 1:18.

12. Ino maswi ngotucana pa 1 Joni 3:19, 20 inga atucafwa buyani na twalinyumfwa anga tatucitewo ncito, na kulinyumfwa anga taakuwo weenga watusuna?

¹² Na mwayeeya cancine cakwaamba ayi Yesu wakafwa ceebo ca shibiibi shanu, mpashi inga mwaamba ayi, ‘Nsheeleli kutambula cipo cakakomena bobulya.’ Ino nceebonshi nceenga mwalinyumfwila boobo? Moyo wesu utamaninite inga watubeca akutupa kulinyumfwa anga tatucitewo ncito na kulinyumfwa ayi taakuwo weenga watusuna. (Amubelenge 1 Joni 3:19, 20.) Na twatalika kulinyumfwa boobo, tulyeelete kwiibaluka kwaamba ayi “Lesa ngumunene kwiinda myoyo yesu.” Nabi tulinyumfwe anga Yehova tatusuniiwo na inga taatulekeleli, Ishiwesu wakwiculu alakutolelela kutusuna alimwi akutulekelela. Tulyeelete kwiiya kushoma kwaamba ayi Yehova alitusuni. Kwaamba ayi tucikoonshe kucita boobo, tulyeelete kwiiya Maswi akwe Lesa lyoonse, kupaila lyoonse, alimwi akucanika pomwi abantu bakwe Lesa bashomeka. Ino nceebonshi kucita shintu ishi kulayandika?

13. Ino kwiiya Maswi akwe Lesa inga kwatucafwa buyani? (Amubone kabokosi kacite mutwi utokwaamba ayi “ Maswi Akwe Lesa Mbwabacafwa.”)

¹³ Munoobelenga Maswi akwe Lesa bushiku abushiku, lyalo mulaakwishiba kabotu mibo yakwe Yehova. Mulaakushiba mbwaamusuni. Na kamukutumana akuyeeya bunene pa Maswi akwe Lesa bushiku abushiku, ‘mulaakunoolulamika’ nshomuyeeya alimwi ashili mumoyo wanu. (2 Timo. 3:16) Mukwesu waliina lya Kevin munene mulibungano wakalinga kulibona anga taakuwo mbwaabete, wakaamba ayi: “Kubelenga Kulumbaisha 103 alimwi akukutumana kuyeeyawo kwancafwa kululamika miyeeyo yangu akushiba kabotu Yehova mbwaambona.” Ba Eva, mbotwalinga twaambawo, bakaamba ayi: “Pakumana kwa bushiku, ndacana ciindi cakuyeeya pashintu Yehova nshaabona ayi nsheshiyandika. Kucita boobo kulampa kuba aluumuno mumoyo alimwi kulayumya lushomo lwangu.”

14. Ino mupailo inga watucafwa buyani?

¹⁴ Munoopaila lyoonse. (1 Tesa. 5:17) Kwaamba ayi mube shicibusa amuntu umwi, mulyeelete kunoobandikaakwe lyoonse akumulwiita mbomutoolinyumfwa. Ubu mbocibete abushicibusa bwesu a Yehova. Na ndyetutopaila katumulwiita mbotutoolinyumfwa, mbotutoyeeya, alimwi ashitootusukamika, tulaakutondesha ayi tulamushoma alimwi tulicishi ayi alitusuni. (Kulu. 94:17-19; 1 Joni 5:14, 15) Ba Yua, mbotwalinga twaambawo, bakaamba ayi: “Ndyentopaila nsheelibo pakulwiita Yehova shacitika pabushiku ubo, sombi ndamulwiita nshentooyeeya ambontoolinyumfwa. Ici capa kwaamba ayi mukuya kwaciindi ntalike kubona Yehova mbuli mushali usuni bana bakwe, kuteshi mbuli munene wancito pa kampani.”​—Amubone kabokosi  kacite mutwi utokwaamba ayi “ Sa Mwakalibelengawo Kale?”

15. Ino Yehova alatondesha buyani ayi alitusuni?

¹⁵ Munoocanika pomwi abeshicibusa bashomeka; mukwiinga nshipo kuswa kuli Yehova. (Jemu. 1:17) Ishiwesu wakwiculu alatondesha ayi alitusuni kwiinda mukutupa bamakwesu abenankashi mulibungano batondesha lusuno ciindi coonse. (Tus. 17:17) Munkalata njaakalembela Bene Kolose, Paulo wakaamba meena a Beneklistu bamwi bakalinga kumucafwa, wakaamba ayi “balanjuminisha abuumbi.” (Kolo. 4:10, 11, NWT) Alimwi nabibo Klistu Yesu alakwe wakalinga kuyandika bakumucafwa alimwi wakalumba ceebo cakucafwikwa abeshicibusa bakwe, baanjelo abantu.​—Luka 22:28, 43.

16. Ino beshicibusa bashomeka inga batucafwa buyani kuyumya bushicibusa bwesu a Yehova?

¹⁶ Sa mulasenga akusumina lucafwo kuswa kubeshicibusa mulibungano? Kulwiitako shicibusa ushimpite lwakumushimu shitotusukamika teshi kwaamba ayi lushomo lwesu nduniini sobwe, mukwiinga kucita boobo kulatushitilisha. Amunyumfwe shakaamba ba James, mbotwalinga twaambawo, bakaamba ayi: “Kuba abeshicibusa bali kabotu mulibungano kwancafwa abuumbi. Na ndalisukama abuumbi, beshicibusa aba balankutika cakukalika moyo akunjibalusha kwaamba ayi balinsuni abuumbi. Na bacita boobo, cilampa kushiba kwaamba ayi Yehova alinsuni alimwi alambikilako maano.” Aboobo kutolelela kuba abushicibusa buyumu abamakwesu abenankashi kulayandika abuumbi!

17-18. Ino ngani ngotweelete kunyumfwila, alimwi ino nceebonshi?

¹⁷ Satana alisuni kwaamba ayi tucileeke kweelesha cankusu kucita shiluleme. Alisuni kwaamba ayi tunooshoma ayi Yehova taatusuniiwo, alimwi tatweeleliiwo akupuluka. Ano kweelana ambotweeya, ubo mbubeshi bwa mwana munene.

¹⁸ Yehova alimusuni. Mulayandika kuli nguwe. Na munoomunyumfwila, “mulaakutolelela kuba mulusuno lwakwe” kwamuyayaya, bweenka mbuli Yesu. (Joni 15:10) Aboobo mutanyumfwili Satana na moyo wanu uyo weenga kaumulwiita ayi Yehova taamusuniiwo. Muciindi cakucita boobo, amunyumfwile Yehova, uyo ubona bubotu mu muntu womwi awomwi. Amushome cakutatoonsha kwaamba ayi “alakondwa mubantu bakwe,” kwiilikaawo andimwe!