1. Ino nciinshi citupa kuba alusangalalo abuumbi?

 YEHOVA alisuni kwaamba ayi tunooba basangalete. Tulishi sheeshi mukwiinga lusangalalo ndubasu lwa shisepo sha mushimu usalashi. (Gala. 5:22) Mukwiinga kupa kulaleta lusangalalo kwiinda kutambula, tulasangalala abuumbi na katusebensa cankusu muncito yakushimikila akucafwa bamakwesu abenankashi munshila shipusenepusene.​—Milimo 20:35.

2-3. (a) Kweelana a Bene Galatiya 6:4, ino nshintu nshi shobilo sheenga shatucafwa kutolelela kuba alusangalalo muncito yakwe Yehova? (b) Ino nshiinshi nsheshi twiiye mumutwi uyu?

² Kweelana alilembo lya Bene Galatiya 6:4, mutumwi Paulo wakaamba shintu shobilo sheenga shatucafwa kutolelela kuba alusangalalo. (Amubelenge.) Cakutaanguna nkusebensela Yehova kushika peela nkusu shesu. Kucita boobo kulyeelete kutupa kuba basangalete. (Mate. 22:36-38) Cabili, tulyeelete kuleya kulyeelanya kubamwi. Tulyeelete kulumba Yehova pa shili shoonse nshetutoocikonsha kucita kweelana abuumi mbotucite, lwiiyo, alimwi ankusu shesu. Tulyeelete kucita boobo mukwiinga Yehova ngowakatupa shintu shoonse nshetucite. Ano na bamwi balacita kabotu mumbasu shimwi sha ncito yakushimikila kwiinda ndiswe, tulyeelete kusangalala kwaamba ayi batosebensesha lushibo lwabo kulumbaisha Yehova, kuteshi ceebo cakwaamba ayi balisuni kulibonesha ayi baleendaawo bamwi. Aboobo muciindi cakupinganaabo, tulyeelete kukonkela cakubonenaako cabo.

³ Mumutwi uyu, tutokwiiya sheenga shatucafwa kuliyumya na twalinyumfwa cibiibi ceebo cakwaalilwa kucita shiinji muncito yesu. Tutokwiiya ambweenga twasebensesha cipo cili coonse nceenga katucite. Alimwi tutokwiiya ansheenga tweeya kushakubonenaako sha bamwi.

4. Ino nciinshi ceenga catupa kulinyumfwa kulefuka? Amwaambe cakubonenaako.

⁴ Basebenshi bakwe Yehova bamwi balaalilwa kucita shiinji muncito yakwe, ceebo cakuciswa ciswa na kucembela. Alimwi ici cilabapa kulinyumfwa cibiibi. Ubu mbocakalinga kuli ba Carol. Paciindi cimwi bakalinga kucite coolwe cakusebensela kumusena ubulishite. Paciindi ici bakalinga kutanjilila shiiyo sha Baibo shili 35. Alimwi bakacafwa bamwi baanji kulyaaba akubombekwa. Ba Carol bakalinga kucita shiinji muncito yakushimikila! Lyalo bakaciswa abuumbi cakwaamba ayi liinji bakalinga kukalabo paŋanda. Bakaamba ayi: “Ndicishi kwaamba ayi ceebo cakuciswa, inga nshicikoonshi kucita shiinji mbuli bamwi.” Bakeelikaawo akwaamba ayi: “Sombi ndalinyumfwa anga nshintooshomeka mbuli mbabo. Inga nshicikoonshi kucita shoonse nshonsuni kucita, aboobo ici cilampa kulinyumfwa kulefuka.” Ba Carol balisuni kucita shoonse nsheenga bacikonsha muncito yakwe Yehova. Ici ncintu cibotu abuumbi! Ncakutatoonsha kwaamba ayi Lesa wesu shinkumbu alikondetwe mukwiinga batoocita nsheenga bacikonsha.

5. (a) Ino nciinshi ncotweelete kwiibaluka na twalinyumfwa kulefuka ceebo cakwaalilwa kucita nshetusuni? (b) Kweelana ashikope shatondeshekwa, ino mukwesu watolelela buyani kusebensela Yehova kushika peela nkusu shakwe?

⁵ Na cimwi ciindi mulalinyumfwa cibiibi ceebo cakwaalilwa kucita shintu shimwi, amuliipushe ayi, ‘Ino Yehova alisuni ayi ncite nshi?’ Alisuni kwaamba ayi munoocita shoonse nsheenga mwacikonsha kweelana abukaalo mbomubeteemo. Amuyeeye paceeci: Nankashi ucite myaaka 80 atolinyumfwa cibiibi ceebo cakwaalilwa kusebensa kweelana ambwakalinga kusebensa ndyaakalinga kucite myaaka 40. Atoyeeya ayi nabi kwaamba ayi atoocita nsheenga wacikonsha, Yehova taasangaleteewo anshatoocita. Ano sa ici ncancine? Amuyeeyebo. Na nankashi uyu wakalinga kusebensa kushika peela nkusu shakwe ndyaakalinga kucite myaaka 40, alimwi watolelela kusebensa kushika peela nkusu shakwe ndyaacite myaaka 80, nkokwaamba ayi taakwe kucilekaawo kusebensela Yehova kushika peela nkusu shakwe. Na twatalika kuyeeya ayi tatutoocita shiinji sheenga shasangalasha Yehova, tulyeelete kuliibalusha cancine cakwaamba ayi Yehova ngooshiba nsheenga twacikonsha kucita kwaamba ayi tumusangalashe. Inga twasangalasha Yehova na katusebensa kushika peela nkusu shesu.​—Amweelanye a Mateyo 25:20-23.

6. Ino nshiinshi nsheenga tweeya kucakubonenaako caba Maria?

⁶ Cilaakutubeta cuubu kuba basangalete, na katubikila maano kushintu nsheenga twacikonsha kucita, kuteshi kusheesho nsheenga tatucikoonshi. Amuyeeye cakubonenaako ca nankashi waliina lya Maria, uyo ucite bulwashi bupa kwaamba ayi aalilwe kucita shiinji muncito yakushimikila. Pakutaanguna wakalinyumfwa kulefuka akulibona anga taacitewo ncito. Ano ndyaakayeeya nankashi umwi mulibungano watakalinga kucikonshaawo akubuka, Maria wakasalawo kuya mukumucafwa. Wakaamba ayi: “Ndakabika bubaambo bwakushimikila anguwe kusebensesha fooni akulemba makalata, lyoonse na twasebensa pomwi, ndakalinga kuya kuŋanda kankondetwe akulinyumfwa kabotu kwaamba ayi ndacafwa nankashi yangu.” Aswebo inga twatolelela kuba alusangalalo na katubikila maano ku nsheenga twacikonsha kuteshi kusheesho nshetwaalilwa. Ano ino mbuyani na inga twacikonsha kucita shiinji nabi mpashi kuli mbasu shimwi muncito yakwe Yehova nshotucita kabotu?

7. Ino ngamakani nshi acafwa mutumwi Pita ngaakayuminisha Beneklistu?

⁷ Munkalata yakwe yakutaanguna, mutumwi Pita wakayuminisha bashominyina kusebensesha shipo shabo mukuyuminisha bamwi. Wakalemba ayi: ‘Kweelana acipo umwi aumwi  ncaakatambula, ulyeelete kuba mbuli shikulama buboni mubotu, ulyeelete kusebensesha cipo ncaakatambula mukucafwa bamwi.’ (1 Pit. 4:10) Tulyeelete kusebensesha cipo ncetucite kushika peela nkusu shesu, kuteshi kuloonda ayi bamwi inga batunyumfwila munyono na kulefuka. Na twaalilwa kusebensa kushika peela nkusu shesu ceebo cakulisukama bamwi mbweshi balinyumfwe, nkokwaamba ayi tatutoosebensela Yehova kushika peela nkusu shesu.

8. Kweelana a 1 Bene Kolinto 4:6, 7, ino nceebonshi tulyeelete kuleya kulisumpula pashipo nshetucite?

⁸ Tulyeelete kusebensesha shipo shesu kushika peela nkusu, nacibi boobo, tulyeelete kucenjela kwaamba ayi tutanoolisumpula ceebo ca shipo isho. (Amubelenge 1 Bene Kolinto 4:6, 7.) Kucakubonenaako, mpashi mulicishi kabotu abuumbi bwakutalika shiiyo sha Baibo. Mulyeelete kucisebensesha cipo ico! Nacibi boobo, tulyeelete kwiibaluka kwaamba ayi tatweelete kulisumpula ceebo ca cipo ncetucite. Atuyeeye kwaamba ayi mwasebensa kabotu muncito yakushimikila akucikonsha kutalika ciiyo ca Baibo. Mulisunishishi kulwiitako bamwi bamu kakoto kanu kakushimikila. Ndyemwabungana, nankashi umwi atokwaamba mbwakacikonsha kushimikila akwaabilako magazini. Wakacikonsha kwaabila magazini; mwebo mwakacikonsha kutalika ciiyo. Ino inga mwacita buyani? Mulishi kwaamba ayi kulwiitako bamwi shakamucitikila inga kwabayuminisha, nacibi boobo, mpashi inga mwasalawo kushibandika paciindi cimwi, kwaamba ayi nankashi wakacikonsha kwaabila magazini atalinyumfwi cibiibi. Na mwacita boobo nkokwaamba ayi mwacita kabotu. Sombi kutacileka kulangoola shiiyo sha Baibo. Mukwiinga ico ncecipo ncomucite—aboobo amucisebenseshe!

9. Ino shipo shesu tulyeelete kushisebensesha buyani?

⁹ Tutaluubi kwaamba ayi cipo cili coonse nceenga katucite cakaswa kuli Yehova. Tulyeelete kusebensesha shipo isho kuyuminisha bamwi mulibungano, kuteshi kulinyumfwa anga tuliindite bamwi. (Filip. 2:3) Na katusebensesha nkusu alushibo lwesu kucita kuyanda kwakwe Lesa, tulaakuba alusangalalo. Kuteshi ceebo cakwaamba ayi tutoocita shiinji kwiinda bamwi na tulibeenditeewo sobwe. Sombi ceebo cakwaamba ayi tutoosebensesha shipo shesu kulumbaisha Yehova.

10. Ino nceebonshi tacibete kabotu kulyeelanya kubamwi?

¹⁰ Na tatuna kucenjela, inga twawita mukoose ka kweelanya nshetucikonsha kucita kumuntu umwi nshaalilwa kucita kabotu. Kucakubonenaako, mukwesu inga kaali mwaambi ucishi kabotu abuumbi kwaamba makani. Ico ncecipo ncaacite. Mpashi mumoyo inga watalika kusuula  mukwesu waalilwa kwaamba kabotu makani. Nacibi boobo, mpashi mukwesu uyo alacita kabotu kumakani akutondesha mushimu wakutambula beensu, kwiisha kabotu bana bakwe, na kusebensa cankusu muncito yakushimikila. Tulalumba abuumbi kwaamba ayi tulicite bamakwesu abenankashi baanji bacite lushibo, alimwi basebensesha shipo shabo muncito yakwe Yehova akucafwa bamwi!

11. Ino nceebonshi tulyeelete kweelesha kukonkela cakubonenaako cakwe Yesu?

¹¹ Nabi kwaamba ayi tulyeelete kuleya kulyeelanya kubamwi, kuli shiinji nsheenga tweeya kubasebenshi bamwi bakwe Yehova bashomeka. Cakubonenaako cibotu kwiindaawo nceenga tweeyako ncakwe Yesu. Nabi kwaamba ayi tatumaninite, inga tweeya shiinji kumibo yakwe ibotu alimwi ashintu shibotu nshaakalinga kucita. (1 Pit. 2:21) Na tweelesha kukonkela cakubonenaako cakwe kushika peela nkusu shesu, tulaba basebenshi bakwe Yehova bali kabotu alimwi bacishi kusebensa kabotu muncito yakushimikila.

12-13. Ino nshiinshi nsheenga tweeya kucabonenaako ca Mwaami Defedi?

¹² Mu Baibo muli shakubonenaako shiinji sha basankwa abanakashi bashomeka mbweenga twakonkela cakubonenaako cabo nabi kwaamba ayi tabakalinga kumaninite. (Ebu. 6:12) Amuyeeye pa Mwaami Defedi, uyo Yehova ngwakaamba ayi ‘muntu ngoonsuni abuumbi,’ na kweelana abusansulushi bwa Baibo imwi ayi, “muntu unsangalasha abuumbi.” (Milimo 13:22) Nacibi boobo, Defedi taakalinga kumaninitewo. Alimwi ngumuntu wakacitawo shilubo shinene. Sombi Defedi ncakubonenaako cibotu kuli ndiswe. Ino nceebonshi? Ndyaakalulikwa taakwe kutalika kulangoola mwakuleyela. Sombi wakasumina kululikwa alimwi wakalinyumfwa cibiibi abuumbi pashintu nshaakacita. Aboobo Yehova wakamulekelela.​—Kulu. 51:3, 4, 10-12.

¹³ Inga tweeya kucabonenaako cakwe Defedi kwiinda mukuliipusha miipusho mbuli: ‘Ino ndacita buyani na bandulika? Sa ndafwambaana kukusumina na ndabisha, na ndacana mwakuleyela? Sa ndisuni kupa bamwi milandu? Sa ndeelesha cankusu kutabooshawo shilubo shangu?’ Inga mwaliipusha miipusho mbuli yeeyi ndyemutokwiiya pa basankwa abanakashi bashomeka bamwi baambwa mu Baibo. Sa abalo bakeenda mumapensho mbuli ngomutokwiindaamo? Ino njimibo nshi ibotu njobakatondesha? Ndyemutolanga langa pacakubonenaako comwi acomwi, amuliipushe ayi: ‘Ino cakubonenaako ici ca musebenshi wakwe Yehova ushomeka inga ndacikonkela buyani?’

14. Ino shakubonenaako sha bashominyineesu inga shatucafwa buyani?

 ¹⁴ Cimwi ceenga catucafwa nkubona cakubonenaako ca bashominyineesu bacinene abacanike. Kucakubonenaako, sa kuli umwi mulibungano utoliyumya ceebo camapensho ngatokwiindaamo—mpashi mapensho mbuli kuyungwa abamwi, kupikishikwa ku beshikamukowa, na mpashi kuciswa? Sa kuli mibo ibotu njemutoobona mumuntu uyo njeenga amwebo mwasuna kubaawo? Kuyeeya pashakubonenaako shibotu inga kwamucafwa amwebo kuliyumya mumapensho anu. Tulalumba abuumbi kwaamba ayi bamakwesu abenankashi balatondesha shakubonenaako shibotu sha lushomo. Ici cilatupa kuba basangalete!​—Ebu. 13:7; Jemu. 1:2, 3.

15. Ino mutumwi Paulo wakayuminisha Beneklistunyina kucita nshi ceenga catucafwa kutolelela kuba basangalete muncito yakwe Yehova?

¹⁵ Kwaamba ayi tuyuminishe luumuno alucatano mulibungano, womwi awomwi alyeelete kusebensa kushika peela nkusu shakwe. Amuyeeye shakacitika ku Beneklistu bamuciindi ca batumwi. Bakalinga kucite shipo amikuli ipusenepusene. (1 Koli. 12:4, 7-11) Nacibi boobo, ici tacina kubapa kwaamba ayi batalike kupingana na kulwana. Sombi Paulo wakabayuminisha boonse kucita shakalinga kuyandika “mukuyumya bashomi abo bali ngomubili wakwe Klistu.” Paulo wakalembela Bene Efeso ayi: “Ono na cipansha cili coonse casebensa mulimo wa ncico, mubili woonse ulakula akuliyaka mulusuno.” (Efe. 4:1-3, 11, 12, 16) Abo bakacita boobo bakayuminisha luumuno alucatano mulibungano. Bweenka mbuli mbotubona amumabungano esu apacecino ciindi.

16. Ino nshiinshi nshomweelete kuba bashinishite kucita? (Bene Ebulu 6:10)

¹⁶ Amube bashinishite kuleya kulyeelanya kubamwi. Muciindi cakucita boobo, amwiiye kuswa kucakubonenaako cakwe Yesu, akweelesha cankusu kukonkela mibo yakwe. Amukonkele shakubonenaako shaambwa mu Baibo alimwi a sha munshiku shino sha baabo batondesha lushomo. Ndyemutotolelela kusebensa kushika peela nkusu shanu, amushome kwaamba ayi Yehova “uliluleme, aboobo teshi akalube ncito njemwakacita.” (Amubelenge Bene Ebulu 6:10.) Amutolelele kusangalala muncito yakwe Yehova. Mutaluubi kwaamba ayi alakondwa na wabona mbomutosebensa kushika peela nkusu shanu kwaamba ayi mumusangalashe.