1. Ino cipo cakwaamba cakaswa kuli?

 YEHOVA ngowakatupa nkusu shakwaamba. Muntu wakutaanguna Adamu ndyaakalengwabo, wakatalika kusebensesha maswi kubandika a Ishi wakwiculu. Alimwi wakalinga kucikonsha kupanga maswi apya akusebensesha pakwaamba. Adamu wakasebensesha cipo cakwaamba ndyaakalinga kupa meena shinyama. (Mata. 2:19) Alimwi wakakondwa abuumbi kubandika amuntu umwi kwaciindi cakutaanguna. Muntu uyo wakalinga Efa, mukaakwe mubotu!​—Mata. 2:22, 23.

2. Ino bantu balacisebensesha buyani cipo cakwaamba kuswabo kale kale kushika apacecino ciindi?

² Tapana kwiinda aciindi cilaamfu, cipo cakwaamba cakasebenseshekwa munshila itabete kabotu. Satana wakabeca Efa, alimwi bubeshi bwakwe bakalengesha muntu kubisha akuba utamaninite. (Mata. 3:1-4) Adamu taakwe kusebensesha kabotu cipo cakwe cakwaamba. Wakapa mulandu Efa alimwi a Yehova ceebo cakubisha kwakwe. (Mata. 3:12) Kaini wakabeca kuli Yehova pesule lyakucaya Abelo mukwabo. (Mata. 4:9) Mukuya kwaciindi, Lameki uyo wakalinga wamulishalane lyakwe Kaini wakalemba maswi akalinga kutondesha kwaamba ayi bantu bakalinga kucite lunkutwe abuumbi paciindi ndyaakalinga muumi. (Mata. 4:23, 24) Ino bantu bali buyani munshiku shino? Cimwi ciindi beshimapolitiki tabanyumfwiwo nsoni kusebensesha maswi abiibi kubantu. Alimwi mumafilimu aanji pacecino ciindi balasebensesha maswi atabete kabotu. Beshicikolo abalo balanyumfwa bamwi kabasebensesha maswi atabete kabotu, bamanene abalo balanyumfwa bantu baamba maswi atabete kabotu kuncito. Kutasebensesha kabotu cipo cakwaamba nkotutobona pacecino ciindi kulatondesha patuba kwaamba ayi cishi ncotubeteemo cabica abuumbi.

3. Ino nciinshi ncotweelete kubikila maano kuleya, alimwi ino nshiinshi nsheshi twiiye mumutwi uyu?

 ³ Na tatuna kucenjela, kushibila kunyumfwa bantu kabaamba maswi atabete kabotu inga kwapa kwaamba ayi aswebo tutalike kwaasebensesha. Mbuli Beneklistu tulisuni kucita shisangalasha Yehova, aboobo tulaleya kwaamba maswi atabete kabotu. Tulyeelete kusebensesha cipo cakwaamba munshila ili kabotu kwaamba ayi tulumbaishe Lesa wesu. Mumutwi uyu, tutokwiiya mbweenga twacita boobo (1) ndyetuli muncito yakushimikila, (2) kumabungano, alimwi (3) ndyetutobandika abamwi. Ano citaanshi amuleke tubandike Yehova ncaabikila maano ku mbotusebensesha cipo cakwaamba.

4. Kweelana a Malaki 3:16, ino nceebonshi Yehova alabikila maano kushintu nshetwaamba?

⁴ Amubelenge Malaki 3:16. Sa kuli ceebo nceenga mwayeeyawo ceenga capa kwaamba ayi Yehova alembe “mulibuku lya ciibalusho”meena abaabo bakalinga kwaamba shitondesha ayi balamuloonda akuyeeya paliina lyakwe? Shintu nshetwaamba shilatondesha shili mumoyo wesu. Yesu wakaamba ayi: “Muntu ulaamba ciswite mumoyo wakwe.” (Mate. 12:34) Nshetusala kwaamba shilatondesha mbotumusuni Yehova. Alimwi Yehova alisuni ayi abo bamusuni bakabe abuumi bwamuyayaya mucishi cipya.

5. (a) Ino kulambila kwesu kulicatene buyani anshetwaamba? (b) Kweelana a cikope catondeshekwa, ino nshiinshi nshotweelete kwiibaluka pamakani anshetwaamba?

⁵ Nshetwaamba inga shapa kwaamba ayi Yehova atambule kulambila kwesu nabi sobwe. (Jemu. 1:26) Bantu bamwi batasuni Lesa balaamba munshila yabukali, yakutatondesha nkumbu, alimwi yakulisumpula. (2 Timo. 3:1-5) Tatusuniiwo kuba mbuli mbabo. Tulisuni kwaamba shintu sheenga shasangalasha Yehova. Ano sa Yehova inga wasangalala na ndyetuli kumabungano na muncito yakushimikila tulaamba maswi ali kabotu sombi kuŋanda tulaamba ca bukali alimwi cakutatondesha lusuno kuba mumukwashi wesu?​—1 Pit. 3:7.

6. Ino nshiinshi shibotu shakacitika ceebo cakwaamba ayi Kimberly wakasebensesha maswi ali kabotu?

⁶ Kusebensesha kabotu cipo cakwaamba kulatondesha patuba kwaamba ayi tuli basebenshi bakwe Yehova. Alimwi ici cilapa kwaamba ayi bamwi babone ‘bupusano buli pakati ka bantu  basebensela Lesa abatamusebenseli.’ (Mala. 3:18) Ishi nsheshakacitikila nankashi waliina lya Kimberly. * Wakapekwa ncito kucikolo njaakalinga kweelete kusebensa ashicikolo umwi. Pesule lyakusebensela pomwi, shicikolo wakabona kwaamba ayi Kimberly wakalinga kupuseneeko kubeshicikolo bamwi. Taakalinga kwaamba shibiibi pabamwi, sombi wakalinga kwaamba shiyuminisha, alimwi akusebensesha maswi ali kabotu. Shicikolo uyo wakanyumfwa kabotu abuumbi aboobo wakasumina kutalika kwiiya Baibo. Yehova alasangalala abuumbi na katwaamba munshila yeenga yapa bantu kusuna kwiiya cancine!

7. Ino nciinshi ncomushinishite kucita acipo cakwaamba Lesa ncaakamupa?

⁷ Soonse tulisuni kwaamba munshila yeenga yalemeka Yehova akuyumya bushicibusa bwesu abamakwesu. Aboobo amuleke tubandike nshila shicafwa mbweenga twatondesha cakubonenaako cibotu mushintu nshetwaamba.

8. Ino Yesu wakatondesha buyani cakubonenaako cibotu pamakani ambwakacita ndyaakalinga muncito yakushimikila?

⁸ Amwaambe cabulemu akutondesha nkumbu bamwi ndyebatoomupikisha. Yesu ndyaakalinga pacishi, bantu bakamubekesha ayi ngumulyabi, ngucakolwa, ngumuntu usebensela Satana, taakonkeli bushiku bwa Sabata, alimwi takalinga kucitewo bulemu kuli Lesa. (Mate. 11:19; 26:65; Luka 11:15; Joni 9:16) Nacibi boobo, Yesu taakwe kubakumbula cabukali. Bweenka mbuli Yesu, aswebo tatweelete kukumbula cibiibi na batukumbula munshila itabete kabotu. (1 Pit. 2:21-23) Nacibi boobo, teshi cuubu kucita boobo. (Jemu. 3:2) Ino nciinshi ceenga catucafwa?

9. Ino nciinshi ceenga catucafwa kuleya kwaamba shitabete kabotu ndyetuli muncito yakushimikila?

⁹ Mutakalali na muntu wamukumbula cibiibi ndyemuli muncito yakushimikila. Mukwesu waliina lya Sam wakaamba ayi, “Ndeelesha kuyeeya muntu uyo ncaatoyandikila kukutika makani acancine pali Lesa akwiibaluka kwaamba ayi inga waaluka.” Cimwi ciindi bantu bamwi balakalala ceebo cakwaamba twabafwakashila paciindi citabete kabotu. Na twacaana muntu ukalalite, inga twacita shicita nankashi waliina lya Lucia. Inga twapaila mumoyo, kusenga Yehova kwaamba ayi atucaafwe kutolelela kukalika moyo akulikasha kwaamba ayi tutaambi cili coonse citabete kabotu na ceenga catondesha kubula bulemu.

10. Kweelana a 1 Timoti 4:13, ino nciinshi ncotweelete kusebenselaawo?

¹⁰ Amushibe bwakwiisha kabotu. Nabi kwaamba ayi Timoti wakalinga kucishi kushimikila alakwe wakalinga kuyandika kuya panembo mukwiisha kwakwe. (Amubelenge 1 Timoti 4:13.) Ino inga twacita buyani kwaamba ayi tuye panembo mukwiisha kabotu muncito yakushimikila?  Tulyeelete kulibambila kabotu. Alimwi cabotaako ncakwaamba ayi tulicite shakusebensesha shipusenepusene sheenga shatucafwa kwiisha kabotu. Inga mwacana makani acafwa kwiinda mukusebensesha buloshuwa ya Amubikile Maano Kukubelenga Akwiisha alimwi a lubasu lwa “Amwiiye Nsheenga Mwaciita Muncito Yakushimikila” lucanika Mukabuku Kamabungano Abuumi bwa Bwineklistu Anciito Yesu. Sa mulashisebensesha shitabatisho ishi? Cilaba cuubu kwaamba cakushinisha ndyetutooshimikila na twalibambila kabotu.

11. Ino nciinshi cacafwa bamakwesu abenankashi bamwi kuya panembo mukwiisha kabotu?

¹¹ Cimwi ceenga catucafwa kwiiya bwakwiisha kabotu, nkukonkela cakubonenaako ca baabo bacishi kwiisha kabotu mulibungano. Mukwesu Sam ngotwalinga twaambawo alaliipusha ayi, ino nciinshi cilengesha bamakwesu abenankashi bamwi mulibungano kushiba bwakwiisha kabotu? Alakutika cakubikila maano mbobaiisha akweelesha kukonkela cakubonenaako cabo. Nankashi waliina lya Talia alakutika cakubikila maano kubamakwesu baamba makani a Baibo. Kucita boobo kwamucafwa kwiiya bwakubandika makani bantu liinji ngobeepushaawo muncito yakushimikila.

12. Ino bamwi balaalilwa kucita nshi?

¹² Soonse inga twaabanamo lubasu ndyetuli kumabungano kwiinda mukwiimba pomwi akwaamba shikumbulo nshotwakalibambila kabotu. (Kulu. 22:22) Bamwi balaalilwa kwiimba na kubandika pabantu baanji. Sa amwebo cilamuyumina? Na cilamuyumina, amwiiye shakacafwa bamwi kutaloonda kwiimba akukumbulawo kumabungano.

13. Ino nciinshi ceenga camucafwa kwiimba camoyo woonse ndyemuli kumabungano?

¹³ Amwiimbe camoyo woonse. Cinene ncotwiimbila nyimbo kumabungano nkulumbaisha Yehova. Nankashi waliina lya Sala alalinyumfwa ayi taacishiiwo kwiimba. Nacibi boobo, alisuni kulumbaisha Yehova munyimbo. Aboobo cimucafwa nkulibambila limwi kuŋanda, bweenka mbwalibambila mbasu shimwi shakumabungano. Aleendulukaamo munyimbo akubona maswi ali munyimbo mbwatokweendelana amakani eshi akabandikwe kumabungano. Wakaamba ayi: “Kuyeeya pamaswi kulancafwa kutalisukama na ntokwiimba kabotu nabi sobwe.”

14. Ino nciinshi ceenga camucafwa kukumbulawo kumabungano na mulaloonda?

¹⁴ Munookumbulawo lyoonse. Ici teshi cuubu kubamwi. Nankashi Talia ngotwalinga twaambawo, wakaamba ayi: “Kubandika pabantu baanji kulampa kuloonda abuumbi, aboobo cilaba ciyumu kwaamba ayi nkumbulewo kumabungano.” Nacibi boobo, ici tacipi kwaamba ayi ba Talia baalilwe kukumbulawo kumabungano. Ndyebatoolibambila mabungano, balebaluka kwaamba ayi uyo wataanguna kukumbulawo  alyeelete kwaamba cikumbulo cifwiifwi alimwi cilulamite mwiipusho. Aboobo bakaamba ayi: “Cilibo kabotu nabi ndakumbula cikumbulo cifwiifwi, cuubu, alimwi cilulamite citeente cinene mukwiinga ncecikumbulo uyo utootanjilila ncaatolangila.”

15. Ino nshiinshi nshotweelete kwiibaluka pamakani akukumbulawo?

¹⁵ Nacibi boobo, bamakwesu abenankashi bataloondi kukumbulawo abalo cimwi ciindi balaalilwa kukumbulawo. Ino nceebonshi? Nankashi waliina lya Juliet wakaamba ayi, “Cimwi ciindi ndaalilwa kukumbulawo ceebo cakuyeeya ayi cikumbulo cangu tacishikiteewo.” Ano mutaluubi kwaamba ayi Yehova alisuni kwaamba ayi tunookumbula kweelana ambweenga twacikonsha. * Alakondwa abuumbi na katucita nsheenga twacikonsha kumabungano nabi ndyetucite boowa.

16. Ino nshintu nshi nshotweelete kuleya kwaamba?

¹⁶ Amuleye kwaamba maswi atabete kabotu. (Efe. 4:31) Bweenka mbotwabandikawo kale, Mwineklistu taeelete kusebensesha maswi atabete kabotu. Nacibi boobo, kuli nshila shimwi shitabonekeli patuba bantu mbobasebensesha maswi atabete kabotu nshotweelete kuleya. Kucakubonenaako, tulyeelete kuleya kwaamba shintu shitabete kabotu pabantu ba mishobo imwi na bakonkela milawo ipuseneeko a yesu. Alimwi tulyeelete kuleya kwaamba shintu shibiibi sheenga shakalasha bamwi. Mukwesu umwi wakaamba ayi: “Ndakaambawo shintu shimwi nshendakalinga kubona anga nshakusekesha alimwi shilibo kabotu, sombi anu tashakalinga kabotu kubamwi. Mukuya kwamyaaka, mukaangu wancafwa abuumbi mukwiinga ndyetuli sobilo alaandwiita na ndaamba maswi eenga akalasha bamwi.”

17. Kweelana a Bene Efeso 4:29, ino inga twacita buyani kwaamba ayi tuyuminishe bamwi?

¹⁷ Amwaambe munshila iyuminisha. Muciindi cakwaamba shibiibi na kutongooka pabamwi, amube muntu ufwambaana kulumba bamwi. (Amubelenge Bene Efeso 4:29.) Nabi kwaamba ayi bene Isilaeli bakalinga kucite sheebo shiinji shakalinga kweelete kubapa kuba bantu balumba, liinji bakalinga kusuni kutongooka. Mushimu wakutongooka ulayambukila. Na mutokwiibaluka, makani atabete kabotu akaleta beshikusensa bali 10 akalengesha bene Isilaeli boonse kutalika “kutongookela Mose.” (Shakube. 13:31–14:4) Ano kulumba bamwi kulapa kwaamba ayi uli woonse abe usangalete. Ncakutatoonsha kwaamba ayi cintu comwi cakacafwa mwanaakwe Jefuta mwanakashi kutolelela muncito yakwe, nkulumbwa kuswa kubeshicibusa bakwe. (Boombo. 11:40) Nankashi waliina lya Sala ngotwalinga twaambawo wakaamba ayi,  “Na twalumba bamwi tulabapa kulinyumfwa ayi Yehova alibasuni alimwi balayandika mulibunga lyakwe.” Aboobo amubaluumbe bashominyinaanu.

18. Kweelana a Kulumbaisha 15:1, 2, ino nceebonshi tulyeelete kwaamba lushinisho, alimwi ino ici cileelikaawo nshi?

¹⁸ Amwaambe lushinisho. Inga tatusangalashi Yehova na tulaamba shakubeca. Yehova alipatite kubeca kwa mushobo uli woonse. (Tus. 6:16, 17) Nabi kwaamba ayi bantu munshiku shino balabona ayi kubeca kulibo kabotu, swebo tulakuleya mukwiinga Yehova alatulwiita ayi takubete kabotu. (Amubelenge Kulumbaisha 15:1, 2.) Kwaamba lushinisho tacaambibo kuleya kwaamba makani akubeca, sombi kuleelikawo akuleya kusisa makani eenga apa kwaamba ayi bamwi bashibe cancine.

19. Ino nciinshi cimwi ncotweelete kuleya?

¹⁹ Amuleye kufuya. (Tus. 25:23; 2 Tesa. 3:11) Nankashi waliina lya Juliet, ngotwalinga twaambawo wakaamba shibiibi shiswa mukufuya. Wakaamba ayi: “Cilampa kulinyumfwa cibiibi na ndanyumfwa bamwi kabafuya, alimwi cilampa kutamushoma muntu utoofuya. Mukwiinga na atoofuya bamwi kuli ndime nkokwaamba ayi anebo inga wamfuya ndyaali abamwi.” Na mwabona kwaamba ayi mumubandi mwanjila kufuya bamwi, amucileeke akutalika kwaamba pashintu shimwi shiyuminisha.​—Kolo. 4:6.

20. Ino nciinshi ncomushinishite kucita ashintu nshemwaamba?

²⁰ Mukwiinga tulekala mucishi bantu baanji mobaamba maswi atabete kabotu, tulyeelete kusebensa cankusu kwaamba ayi nshetwaamba shinoosangalasha Yehova. Mutaluubi kwaamba ayi kwaamba ncipo kuswa kuli Yehova, aboobo alabikila maano mbotucisebensesha. Alaakutucafwa na katweelesha cankusu kwaamba shili kabotu ndyetuli muncito yakushimikila, ndyetuli kumabungano, alimwi andyetutoobandika abamwi. Na Yehova akanyonyoole cishi cibiibi ici, cilaakuba cuubu kumulemeka kwiinda mushintu nshetwaamba. (Judi 15) Ano kushikila ciindi ico cikashiike, amube bashinishite kusangalasha Yehova kwiinda mu ‘maswi aswa mumulomo wanu.’​—Kulu. 19:14.