“Bakamboni tabakwe kutondeshabo kubikila maano kubantu, sombi bakacita boobo akutubwa twangu. Bushiku bumwi ba Elaine, bakalinga kwiimfwi pafwiifwi akakoci kamabuku, bakapa shakulya tubwa twangu. Kuswabo bushiku ubo, lyoonse na tweendilabo pafwiifwi akakoci kamabuku, tubwa twangu twakalinga kusuni kuya kuli Bakamboni kwaamba ayi batupe shakulya.

“Kwa myeenshi iinji Bakamboni bakatolelela kupa shakulya tubwa twangu lyoonse na ndabacana. Alimwi ndakalinga kusangalala kubandikaabo paniini. Sombi nshindakalinga kusuni kubandikaabo kwaciindi cilaamfu. Ndakalinga kucite myaaka iindilila kuma 70, alimwi nshindakalinga kushi kabotu Bakamboni nshobashoma. Mukwiinga ndakalinga ndacileka kushoma mumaceeci aliita ayi Mbeneklistu, ndakayeeya ayi inga cabota kwiiya Baibo neenka.

“Paciindi ceenka ici, ndakabona Bakamboni bamwi mumbasu shiinji sha mutauni, kabeemfwi pafwiifwi atukoci twabo twamabuku. Abalo bakalinga kwaansha uli woonse calusangalalo. Lyoonse na ndeepusha miipusho bakalinga kunkumbula kusebensesha Baibo. Aboobo ici cakampa kubashoma abuumbi.

“Bushiku bumwi, ba Elaine bakanjipusha ayi, ‘Sa mulashoma ayi shinyama nshipo kuswa kuli Lesa?’ Ndakakumbula ayi, ‘Ee ndashoma!’ Lyalo ba Elaine bakambelengela lilembo lyakwe Isaya 11:6-9. Kuswabo bushiku ubu ndakalinga kusuni kwiiya shamu Baibo. Nacibi boobo, nshindakalinga kusuniiwo kubwesa libuku lili lyoonse kuswa kuli Bakamboni.

“Munshiku shakakonkelaawo, ndakakondwa kubandikaako paniini aba Elaine alimwi abeebaabo ba Brent. Bakandwiita ayi nkabelenge Baibo kutalika a libuku lyakwe Mateyo kuya mukushika kulibuku lya Milimo ya Batumwi. Lyalo ndaakunyumfwisha kuba Mwineklistu wancine ncocaamba. Anebo ndakacita boobo. Tapana kwiinda ciindi cilaamfu, ndakasumina kwiiya Baibo aba Brent abakaabo ba Elaine. Ishi shakacitika mumwaaka wa 2016.

“Nsondo ansondo ndakalinga kulangila kwiiya Baibo akucanika kumabungano ku Ŋanda ya Bwaami. Ndakakondwa abuumbi kwaamba ayi ndakalinga kwiiya Baibo nshoyaamba. Ndipakeendabo mwaaka womwi, ndakabombekwa akuba Kamboni. Pacecino ciindi ndicite myaaka 79 alimwi ndalumba abuumbi kwaamba ayi ndakacana bupailishi bwancine. Yehova wampa coolwe cakuba mumukwashi wakwe wabasebenshi bakalyaaba.”