Liswi ili lilasansulula “kushomesha cakulumbila na kwaambilisha cakulumbila uko kwiilikaawo akwaamba ayi Lesa . . . ngo kamboni.” Inga twacita boobo kwiinda mukulemba na kwaamba.

Bamwi inga bayeeya ayi tacibete kabotu kushomesha cakulumbila ceebo ca maswi Yesu ngakaamba ayi: “Ntoomulwiita ayi muteeleshi kulumbila napaceyi . . . Mwebo amweelebo pakwaamba ayi, ‘Ee’ nabi ‘Sobwe’ mukwiinga na ceenda waawa ingayi cilaswa kuli Satana.” (Mate. 5:33-37) Yesu wakalinga kucishi kwaamba ayi kweelana a Mulawo wakwe Mose, kuli kulumbila kumwi bene Isilaeli nkobakalinga kuyandika. Alimwi basebenshi bakwe Lesa abalo kuli ciindi cimwi ndyebakashomeshawo cakulumbila. (Mata. 14:22, 23; Kulo. 22:10, 11) Wakalinga kucishi ayi Yehova alakwe wakaambawo shishomesho cakulumbila. (Ebu. 6:13-17) Aboobo Yesu taakalinga kwaamba ayi inga tatushomeshi cakulumbila. Sombi wakalinga kucenjesha bantu pamakani akushomesha cakulumbila pashintu shitayandiki bunene. Lyoonse tulyeelete kucita kweelana anshotwashomesha, mukwiinga Yehova nshatulangila kucita.

Ano ino nciinshi ncotweelete kucita na batulwiita ayi tushomeshe cakulumbila? Cakutaanguna, amube bashinishite kwaamba ayi mulaakucikonsha kucita kweelana ambweshi mushomeshe. Na mutoobona ayi inga tamucikoonshi kucita kweelana anshemutoolangilwa kushomesha cakulumbila, inga cabota kutalumbila. Maswi akwe Lesa alatucenjesha ayi: “Ncibotu kutashomesha cakulumbila kucita cimwi cintu kwiinda kushomesha, sombi wabula kucita ncewakashomesha.” (Shiku. 5:5) Cabili, amuyeeye pa njiisho shamu Baibo shikumite paceeco ncemusuni kushomesha cakulumbila, lyalo amucite kweelana anjeelacaamba yanu yakaiishikwa. Ino ni njiisho shili nsheenga mwayeeyawo?

Kushomesha cakulumbila kumwi kuleendelana akuyanda kwakwe Lesa. Kucakubonenaako, Bakamboni Bakwe Yehova balashomesha cakulumbila ndyebatokweebana. Uyu ngumushobo womwi wakulumbila. Musankwa amwanakashi batokweebana balashomesha pameenso akwe Lesa abakamboni, kwaamba ayi balaakunoosunana, kubikilana maano, akupana bulemu “kulilabo na boonse kabacili boomi.” (Mpashi aya teshi maswi ngeenga beebene bamwi baamba ndyebatokweebana, sombi balalumbila kuli Lesa.) Lyalo baleebana, alimwi cikwati cabo cilyeelete kutolelela kwamuyayaya. (Mata. 2:24; 1 Koli. 7:39) Kulumbila uku kuleelela mukwiinga kuleendelana akuyanda kwakwe Lesa.

Kulumbila kumwi takweendelani akuyanda kwakwe Lesa. Mbuli Beneklistu bancine inga tatushomeshi cakulumbila ayi tulaakunooshitilisha cishi kwiinda mukwaabanamo lubasu munkondo na kukaka kusumina kucileka kushoma muli Lesa. Kucita boobo nkupwaya milawo yakwe Lesa. Beneklistu tabeelete kuba “kulubasu lwacishi,” aboobo tatwaabanimo  lubasu mushamapolitiki.​—Joni 15:19; Isa. 2:4; Jemu. 1:27.

Mumakani amwi akushomesha cakulumbila Beneklistu balasala kweelana anjeelacaamba yabo. Cimwi ciindi, inga twayandika kuyeeya cakubikila maano pamakani Yesu ngakaamba ayi, “Amupe Sisa shintu shakwe Sisa, sombi shakwe Lesa amupe Lesa.”​—Luka 20:25.

Atuyeeye kwaamba ayi Mwineklistu alisuni kulembesha cipepa cakutondesha ayi ngwa kucishi uko nkwakala na mpashi alisuni kubwesa pasipoti. Ano bamulwiita kwaamba ayi alyeelete kushomesha cakulumbila ayi alaakunooshomeka kucishi ico. Na kulumbila uko kutokwilikaawo kucita shintu shiteendelani amulawo wakwe Lesa, njeelacaamba yakwe yakaiishikwa anjiisho shamu Baibo tayeelete kumusuminisha. Nacibi boobo, mpashi mfulumeende inga yasuminisha kwaalula maswi akulumbila kwaamba ayi njeelacaamba yakwe imusuminishe.

Kushomesha cakulumbila kusebensesha maswi akaalulwa ayi mulaakunooshomeka kucishi kuleendelana a Bene Loma 13:1, yaamba ayi: “Muntu uli woonse ulyeelete kunyumfwila beendeleshi bacishi.” Aboobo Mwineklistu inga wasalawo ayi tapuwo lipenshi kushomesha cakulumbila kwaamba ayi alaakunoocita cintu cimwi Lesa ncaatulangila kucita.

Cilayandika abuumbi kukonkela njeelacaamba na mwalwiitikwa kucata cintu cimwi na kutambika lyaansa ndyemutooshomesha cakulumbila. Bene Loma bamuciindi cakale kale abene Saiki bakalinga kushomesha cakulumbila kabacatite mipeeni yabo. Alimwi kucita boobo kwakalinga kusansulula ayi basebensesha citondesho ca lesa wabo wankondo kwaamba ayi muntu uyo anooshomeka lyoonse. Ba Giliki bakalinga kutambika lyaansa kwiculu ndyebatoolumbila. Kwiinda mukucita boobo bakalinga kutondesha kwaamba ayi balishi ayi kuli ucite nkusu sha bulesa wakalinga kubona nshobalumbila alimwi muntu uli woonse nkweenga walyaambilila.

Taakuwo musebenshi wakwe Yehova weenga walumbila kacatite na kutondeka cili coonse cikumite kubupailishi bwakubeca. Ano ino mbuyani na ndyemuli ku kooti bamulwiita ayi mucate Baibo akulumbila ayi mutokwaamba bumboni bwancine? Mubukaalo ubo, inga mwasalawo kusumina kucita boobo, mukwiinga Malembo alaamba ayi kuli basebenshi bakwe Lesa bashomeka bakalumbila kabacatite cimwi cintu. (Mata. 24:2, 3, 9; 47:29-31) Cilayandika kwiibaluka kwaamba ayi kulumbila kwa mushobo uyo, nkushomesha pameenso akwe Lesa kwaamba ayi mutokwaamba lushinisho. Mulyeelete kuba balibambite kwaamba sha lushinisho kumwiipusho uli woonse ngweenga bamwiipusha.

Mukwiinga tulabona ayi bushicibusa bwesu a Yehova bulayandika abuumbi, tulyeelete kutaanguna kupaila akuyeeyawo cakubikila maano na batulwiita kulumbila. Tulisuni kucita boobo ceebo cakwaamba ayi tatusuni kupilinganya njeelacaamba yesu na kutakonkela njiisho shamu Baibo. Na mwasalawo kulumbila, mulyeelete kuba bashinishite kucita kweelana ambomwashomesha.​—1 Pit. 2:12.