Mubukaalo ubu, libungano lilabona ayi cikwati cakale kale cakamana musankwa ndyaakeeba alimwi. Aboobo cikwati cipya ncaanjilaamo ncikwati kweelana amulawo. Kwaamba ayi tunyumfwishishe ncetwaambila boobo, amuleke tubandike Yesu nshaakaamba pamakani akulekana akunjila mucikwati alimwi.

Kweelana a Mateyo 19:9, Yesu wakaamba ceebo comwibo ceenga capa kwaamba ayi cikwati cimane. Wakaamba ayi: “Muntu uli woonse uleka mukaakwe utakwe kucita bulale, akweeba umbi, wacita bulale.” Maswi Yesu ngakaamba alatwiisha ayi (1) Malembo alasuminishabo bantu bali mucikwati kulekana na umwi wacita bulale alimwi (2) ayi na musankwa waleka mukaakwe utana kucita bulale akweeba umwi ingayi wacita bulale. *

Sa Yesu nshaakaamba shilasansulula ayi na musankwa wacita bulale akuleka mukaakwe alyaangulukite kweeba alimwi, kweelana a Malembo? Sobwe, teshi lyoonse ndyeenga caba boobo. Na musankwa wacita bulale, mukaakwe inga wasalawo kulekelela ibaye na kumukaka. Na mukaakwe wasalawo kumukaka akumanisha cikwati kweelana amulawo, boonse bobilo balyaangulukite kunjila mucikwati amuntu umwi pesule lya kulekana.

Nacibi boobo, mpashi mwanakashi inga kaasuni ayi cikwati cabo citolelele, aboobo inga wasalawo kulekelela ibaye uyo wacita bulale. Ano ino mbuyani na musankwa uyo wacita bulale wakaka kwaamba ayi cikwati citolelele nabi mukaakwe ndyaasalawo kumulekelela, lyalo waya mukubwesa cipepa cakulekana kwakubula kusuminishanya amukaakwe? Mukwiinga mwanakashi alisuni kumulekelela kwaamba ayi cikwati citolelele, nkokwaamba ayi musankwa taangulukite kweeba mwanakashi umwi kweelana a Malembo. Na wasalawo kweeba mwanakashi umwi nabi ndyaataangulukite kucita boobo, nkokwaamba ayi wacita bulale alimwi. Aboobo bamanene inga babamba komiti yaboomboloshi alimwi, kwaamba ayi babambe makani acilubo ncaacita.​—1 Koli. 5:1, 2; 6:9, 10.

Na musankwa utaangulukite kweeba mwanakashi umwi kweelana a Malembo weeba, ino libungano lilacibona buyani cikwati cakale kale acipya ncaanjilaamo? Kweelana a Malembo, sa cikwati cakale kale cilatolelela? Sa mukaakwe ngwaakaleka inga wasala kumulekelela na kumukaka? Sa cikwati cipya ncaanjilaamo inga twaamba ayi ncikwati ca bulale?

Kale kale, libungano lyakalinga kubona cikwati cipya ico mbuli cikwati ca bulale, kulilabo na mwanakashi ngwaakaleka acili muumi, taana kweebwa ku umwi, alimwi na taana kubisha kwiinda mukucita bulale. Nacibi boobo, Yesu ndyaakalinga kwaamba sha kulekana akweeba alimwi, taakwe kwaambawo sha wooyo utakwe kucita bulale. Sombi wakaamba ayi musankwa waleka mukaakwe pamulandu uteshi wamu Malembo akweeba mwanakashi umwi, ingayi wacita bulale. Na caba boobo, kuleka mukaakwe akweeba mwanakashi  umwi, uko Yesu nkwakaamba ayi kulibo bweenka mbuli kucita bulale, kulamana cikwati cakwe cakale kale.

Na musankwa waleka mukaakwe akweeba mwanakashi umwi, inga tacikonsheki kwaamba ayi mukaakwe wakutaanguna uyo utana kubisha amulekelele. Aboobo taacitewo mukuli ulemu wakusalawo kulekelela ibaye. Kwiilikaawo, inga caba ayi mukaakwe uyo ngwaakaleka wafwa, wakeebwa alimwi, nabi kucita bulale, ishi tashikumi libungano mbolibona cikwati cipya ncaanjilaamo. *

Mucakubonenaako ncetwabandikaawo, musankwa ngowakacita bulale akupa kwaamba ayi cikwati cimane. Ano ino mbuyani na musankwa taakwe kucita bulale sombi wamanisha cikwati akweeba mwanakashi umwi? Na ino mbuyani na musankwa taakwe kucita bulale cikwati kacitana kumana, sombi wacita boobo pesule lyakumanisha cikwati, lyalo akweeba mwanakashi umwi nabi kwaamba ayi mukaakwe walinga kusuni kumulekelela? Mushakubonenaako shoonse ishi, kumanisha cikwati akweeba mwanakashi umwi, nkucita bulale, aboobo kulamanisha cikwati cakwe cakale kale. Cikwati cipya ncaanjilaamo cilisuminishitwe kweelana amulawo. Njashi Yamulindilishi yamu Cisungu ya November 15, 1979, peeji 32, yakaamba ayi: “Mukwiinga ano wanjila mucikwati cipya inga tabooleli kumukaakwe wakale kale; cikwati cakwe cakale kale cakamana ndyebakalekana, ndyaakacita bulale akweeba mwanakashi umwi.”

Ici tacaambi ayi Beneklistu balabona ayi cikwati tacisalalite ano, na kwaamba ayi bulale teshi cilubo cinene sobwe. Na musankwa waleka mukaakwe patapuwo mulandu wamu Malembo akuya mukweeba mwanakashi umwi ndyaataangulukite kucita boobo, bamanene balaakuyandika kubamba komiti yaboomboloshi ceebo wacita bulale. (Na mwanakashi ngwaeeba alakwe ngu Kamboni, alaakubambilwa komiti ya boomboloshi ceebo cakucita bulale.) Nabi kwaamba ayi cikwati cipya ico ncaanjilaamo teshi cikwati ca bulale, musankwa uyo inga taeeleli kutambula mukuli uli woonse mulibungano kwa myaaka iinji. Alimwi kushikila bantu bakalubeeko kucilubo ico akutalika kumubona ayi aleelela kupekwa bulemu alimwi. Kaatana kupekwa mukuli uli woonse mulibungano, bamanene inga bayeeya pabukaalo bwa mukaakwe ngwaakaleka alimwi abaana baniini mbwaakashiya kumukaakwe.​—Mala. 2:14-16.

Mukwiinga kulekana akweeba alimwi kuteshi kwa Mumalembo kulaleta mapensho anene, Beneklistu inga batondesha busongo kwiinda mukubona cikwati kwaamba ayi cilisalalite, bweenka mbuli Yehova mbwacibona.​—Shiku. 5:4, 5; Ebu. 13:4.