1. Ino nceebonshi tulakumbulawo kumabungano?

 INO NCEEBONSHI ncetucanikila kumabungano ansondo ansondo? Ceebo cinene ncakwaamba ayi tulalumbaisha Yehova. (Kulu. 26:12; 111:1) Alimwi tulacanika kumabungano kwaamba ayi tunoyuminishanya munshiku shino shiyumu abuumbi. (1 Tesa. 5:11) Na twakumbulawo kumabungano, tulalumbaisha Yehova akuyuminisha bamwi.

2. Ino ndilili ndyetuba ashoolwe shakukumbulawo kumabungano esu?

² Nsondo ansondo tulaba ashoolwe shakukumbulawo kumabungano esu. Kucakubonenaako, inga twaabanamo lubasu pa Ciiyo ca Njashi Yamulindilishi. Alimwi kumabungano esu amukati kansondo, inga twakumbulawo palubasu lwa Buboni Bwakumushimu, pa Ciiyo ca Baibo Calibungano alimwi ambasu shimwi shakubandikishanya.

3. Ino nshiinshi sheenga shapa kwaamba ayi citubete ciyumu kukumbulawo, alimwi ino lilembo lya Bene Ebulu 10:24, 25 inga lyatucafwa buyani?

³ Soonse tulisuni kulumbaisha Yehova akuyuminisha bashominyineesu. Sombi cimwi ciindi inga catubeta ciyumu kukumbulawo. Mpashi inga katuloonda kukumbulawo, na mpashi inga katusunishishi kukumbulawo sombi liinji kabatatutondekiiwo na twatambika lyaansa. Ino nshiinshi sheenga shatucafwa kukoma mapensho aya? Makani mutumwi Paulo ngaakalembela Beneklistu bene Ebulu, inga atucafwa kucana cikumbulo kumwiipusho uyu. Ndyaakalinga kwaamba pakuyandika kwakubungana pomwi, wakaamba ayi tulyeelete kubikila maano ‘kukuyuminishanya.’ (Amubelenge Bene Ebulu 10:24, 25.) Teshi tukanoolonda abuumbi kutambika lyaansa kwaamba ayi tukumbulewo na katwiibaluka ayi inga twayuminisha bamwi nabi twakumbulabo cikumbulo cifwiifwi kutondesha lushomo lwesu. Alimwi na liinji tabatootupa coolwe cakukumbulawo, inga twasangalala kwaamba ayi bamwi batooba acoolwe cakukumbulawo.​—1 Pit. 3:8.

4. Ino nshiteente nshi shotatwe nsheshi tubandikeewo mumutwi uyu?

 ⁴ Mumutwi uyu, tutotaanguna kubandika mbweenga twayuminishanya na tuli mulibungano liniini muli baniini beshikukumbulawo. Lyalo, tutobandika mbweenga twayuminishanya na tuli mulibungano linene muli baanji beshikukumbulawo. Mukweelaako, tutobandika nsheenga twaciita kwaamba ayi shikumbulo shesu shinoyuminisha bamwi.

5. Ino inga twacita buyani kwaamba ayi tuyuminishe bamwi na mbantu baniinibo bacanika kumabungano?

⁵ Mulibungano liniini na likoto, beshikukumbulawo balaba baniini uyo utootanjilila mbweenga watondeka. Cimwi ciindi inga wayandika kulindilaako paniini kwaamba ayi umwi atambike lyaansa. Mpashi mabungano inga atola ciindi alimwi ici taciyuminishiiwo. Ino nshiinshi nsheenga mwaciita? Amube balibambite kunookumbulawo abuumbi. Na kamucita boobo, inga mwayuminisha bamwi kunookumbulawo abuumbi.

6-7. Ino nshiinshi nsheenga twaciita kwaamba ayi tutanoolonda bunene na tulisuni kukumbulawo kumabungano?

⁶ Ino nshiinshi nsheenga mwaciita na mulaloonda kukumbulawo kumabungano? Amushibe kwaamba ayi baanji mbobalinyumfwa. Sombi kwaamba ayi munoyuminisha bamakwesu abenankashi abuumbi kumabungano, mpashi inga mwayandika kucana nshila sheenga shamucafwa kutanoloonda bunene kukumbulawo. Ino inga mwacita buyani ubo?

⁷ Mpashi inga mweenduluka mumakani amwi acanika mu Njashi Yamulindilishi akalinga kwaamba pa kukumbulawo kumabungano. b Kucakubonenaako, amulibambile kabotu. (Tus. 21:5) Na mwaashiba kabotu makani eshi akabandikweewo, teshi mukaloonde abuumbi kukumbulawo kumabungano. Alimwi ndyemutokumbula, amwaambe shikumbulo shifwiifwi. (Tus. 15:23; 17:27) Kwaamba cikumbulo cifwiifwi, kulaakumucafwa kutaloonda bunene ndyemusuni kukumbulawo. Na mwaamba cikumbulo cifwiifwi, bamakwesu abenankashi inga banyumfwishisha kabotu citeente kwiinda kwaamba cikumbulo cilaamfu muli miyeeyo iinji. Kwaamba cikumbulo cifwiifwi mumaswi anu, kulaakutondesha ayi mwakalibambila kabotu alimwi mwakanyumfwisha kabotu makani ngomutokwiiya.

8. Ino Yehova alalinyumfwa buyani na twacita nsheenga twacikonsha kwaamba ayi tukumbulewo?

⁸ Ano ino nshiinshi nsheenga mwaciita na mwatolelela kuloonda kukumbulawo mankanda aanji nabi pesule lya kukonkela nshetwabandikaawo? Amushibe kwaamba ayi Yehova alalumba pa kweelesha cankusu kwanu kwaamba ayi mukumbulewo. (Luka 21:1-4) Yehova taatulwiiti kucita nsheenga tatucikoonshi. (Filip. 4:5) Amusale nsheenga mwaciita, mbweenga mwashikumanisha, akupaila kwaamba ayi Yehova amucaafwe kukalika moyo. Mpashi pakutaanguna inga mwasalawo kukumbulawobo linkanda lyomwi akwaamba cikumbulo cifwiifwi.

9. Ino nceebonshi inga catubeta ciyumu kukumbulawo mulibungano linene?

⁹ Na mulibungano momubete muli beshikushimikila baanji, inga mwacana lipenshi limwi. Mpashi bamakwesu abenankashi baanji balatambika maansa kwaamba ayi bakumbulewo. Sombi mwebo na mwatambika lyaansa teshi liinji ndyobamutondeka. Kucakubonenaako, Nankashi Danielle, lyoonse alanyumfwa kabotu kukumbulawo kumabungano. c Alabona ayi kukumbulawo kumabungano ndubasu lwakulambila, ninshila mbwaayuminisha bamwi alimwi ninshila mbwayumya lushomo lwakwe mushintu  Baibo nshoyaamba. Sombi ndyaakalongela kulibungano linene, teshi lyoonse ndyebakalinga kumutondeka kwaamba ayi akumbuleewo. Alimwi cimwi ciindi mabungano akalinga kumanabo kutakumbulawo. Wakaamba ayi: “Ndakalinyumfwa cibiibi akulinyumfwa ayi ndeendwa coolwe. Na tabatokutondeka mankanda aanji, ulatalika kuyeeya ayi mpashi batoocitilabo kashanga.”

10. Ino nshiinshi nsheenga twaciita kwaamba ayi tunooba ashoolwe shiinji shakukumbulawo kumabungano?

¹⁰ Sa amwebo mwakalinyumfwawo kale bweenka ba Danielle mbobakalinyumfwa? Na camushobo uyu cakamucitikilaawo, mpashi inga mwayeeya ayi cilibo kabotu kucileka kutambika lyaansa, lyalo akunookutikabo kumabungano. Nacibi boobo, tamweelete kucileka kweelesha kukumbulawo. Ino nshiinshi nsheenga mwaciita? Comwi ceenga camucafwa nkulibambila shikumbulo shiinji. Na mwatambika lyaansa lyalo tabana kumutondeka kwaamba ayi mukumbulewo, mpashi inga mwakumbulawo paciindi cimwi mukwiinga mwakalibambila shikumbulo shiinji. Ndyemutolibambila Ciiyo ca Njashi Yamulindilishi, amuyeeye palagilafu yomwi ayomwi mboicatene amutwi utoobandikwaawo. Na mwacita boobo, mpashi mulaakuba ashoolwe shiinji shakwaamba shikumbulo shiyuminisha paciiyo. Kwiilikaawo, mpashi inga mwalibambila kukumbulawo mumapalagilafu muli makani amu Baibo ayumu abuumbi kusansulula. (1 Koli. 2:10) Ino nceebonshi? Mukwiinga mpashi mbaniini beenga batambika maansa kwaamba ayi bakumbulewo mumapalagilafu ayo. Ano ino nciinshi nceenga mwaciita na mulacanika kumabungano lyoonse alimwi mweelesha kukonkela sheeshi nshetwabandikaawo, sombi tabamutondekiiwo kwaamba ayi mukumbulewo? Mpashi inga mwabandika awooyo utootanjilila, mabungano kaatana kutalika akumulwiita palagilafu njomusuni kukumbulawo.

11. Ino Bene Filipi 2:4 ilatuyuminisha kucita nshi?

¹¹ Amubelenge Bene Filipi 2:4. Kwiinda mukutanjililwa amushimu usalashi, mutumwi Paulo wakayuminisha Beneklistu kunoobikila maano kushintu shicafwa bamwi. Ino inga twacita buyani kwaamba ayi tukonkele kululika uku ndyetutobungana? Nkwiinda mukunokwiibaluka ayi bamwi abalo balisuni kukumbulawo.

12. Ino ninshila nshi ibotu mbweenga twayuminisha bamwi kumabungano? (Amubone acikope.)

¹² Amuyeeye paceeci: Sa ndyemutobandika abeshicibusa banu, inga kamusuni kunookwaambabo nweenka balo kutanokwaambaawo? Kwalo  inga tamuciti boobo! Mulisuni kwaamba ayi abalo banokwaambaawo. Ubu mbotusuni kunoocita andyetuli kumabungano. Tulisuni kwaamba ayi baanji banokumbulawo. Alimwi nshila yomwi ibotu mbweenga twayuminisha bamakwesu abenankashi kutondesha lushomo lwabo, nkwiinda mukupa kwaamba ayi abalo bakumbulewo. (1 Koli. 10:24) Amuleke tubandike mbweenga twacita boobo.

13. Ino nshiinshi nsheenga twaciita kwaamba ayi bamwi babe acoolwe cakukumbulawo kumabungano?

¹³ Cintu comwi nceenga twaciita, nkwaamba shikumbulo shifwiifwi. Kucita boobo, kulapa kwaamba ayi baanji bakumbulewo. Bamanene alimwi abeshikushimikila bamwi bashimpite lwakumushimu, balyeelete kutondesha cakubonenaako cibotu pamakani aya. Alimwi nabi kwaamba ayi mwaamba cikumbulo cifwiifwi, amuleye kwaamba shiteente shiinji. Na mwaamba shiteente shoonse shili mupalagilafu, bamwi balaakubula shakukumbulawo. Kucakubonenaako, mupalagilafu iyi twabandika pashintu shobilo nsheenga twaciita—kwaamba shikumbulo shifwiifwi alimwi akuleya kwaamba shiteente shoonse shili mupalagilafu. Na bataangune kutondeka ndimwe kwaamba ayi mukumbulewo mupalagilafu iyi, amweeleshe kwaambawobo citeente comwi.

14. Ino nciinshi ceenga catucafwa kushiba ciindi ndyeenga twatambika lyaansa kwaamba ayi tukumbulewo? (Amubone acikope.)

¹⁴ Amuyeeye kabotu ciindi ndyemweelete kutambika lyaansa kwaamba ayi mukumbulewo. Na katutambika bunene lyaansa, inga twapa kwaamba ayi uyo utootanjilila anootutondekabo nabi kwaamba ayi bamwi tabana kukumbulawo. Alimwi ici inga capa kwaamba ayi bamwi bacileeke kutambika lyaansa.​—Shiku. 3:7.

15. (a) Ino tulyeelete kucita buyani na uyo utootanjilila taakwe kututondeka kwaamba ayi tukumbulewo? (b) Ino beshikutanjilila inga bacita buyani kwaamba ayi boonse babe acoolwe cakukumbulawo? (Amubone kabokosi kacite mutwi utokwaamba ayi “ Nsheenga Mwaciita na Ndimwe Mutootanjilila.”)

¹⁵ Na beshikushimikila baanji batambika maansa kwaamba ayi bakumbulewo paciiyo, mpashi inga tabatutondeki mankanda aanji kwaamba ayi tukumbulewo. Alimwi cimwi ciindi, mpashi uyo  utootanjilila inga taatutondekiiwo kwaamba ayi tukumbulewo. Ici inga catupa kulinyumfwa cibiibi. Nacibi boobo, tatweelete kukalala na taakwe kututondeka.​—Shiku. 7:9.

16. Ino inga twacita buyani kwaamba ayi tuyuminishe baabo bakumbulawo?

¹⁶ Na mwatambika lyaansa kwaamba ayi mukumbulewo sombi tabana kumutondeka mankanda aanji kweelana ambomwalinga kusuni, mpashi inga mwakutika cakubikila maano bamwi ndyebatokumbulawo lyalo akubalumba pashikumbulo shabo pesule lya mabungano. Bamakwesu abenankashi inga bayuminishikwa na mwabalumba, bweenka mbweenga bayuminishikwa na mwakumbulawo. (Tus. 10:21) Kulumba bamwi ninshila aimwi mbweenga twayuminishanya.

17. (a) Ino nshiinshi nsheenga bashali bacita kwaamba ayi bacafwe bana babo kulibambila shikumbulo kweelana aciimo ncobabeteewo? (b) Kweelana avidyo, ino nshintu nshi shili 4 muntu nshaeelete kucita ndyatolibambila cikumbulo? (Amubone amakani amweela.)

¹⁷ Ino nshiinshi shimwi nsheenga twaciita kwaamba ayi tuyuminishanye ndyetuli kumabungano? Na muli bashali, amucafwe bana banu kulibambila shikumbulo kweelana aciimo ncobabeteewo. (Mate. 21:16) Cimwi ciindi paciiyo inga katwiiya pamakani alemu, mbuli makani aamba pacikwati na aamba pa kulilemeka. Nacibi boobo, inga kwaaba palagilafu yomwi nabi obilo baana ngeenga bakumbulawo. Alimwi amucafwe bana banu kushiba ayi teshi lyoonse ndyeenga babatondeka na batambika lyaansa. Kucita  boobo, kulaakubacafwa kutalinyumfwa cibiibi na batondeka bamwi ayi bakumbulewo muciindi cakutondeka mbabo.​—1 Timo. 6:18. d

18. Ino nshiinshi nsheenga twaciita kwaamba ayi tuleye kunokwaamba bunene pashintu shakatucitikila mubuumi bwesu, ndyetutokumbulawo? (Tushimpi 27:2)

¹⁸ Soonse inga twacikonsha kulibambila shikumbulo shiyuminisha sheenga shapa kwaamba ayi Yehova alemekwe akuyuminisha Beneklistunyineesu. (Tus. 25:11) Nabi kwaamba ayi cimwi ciindi inga twaambaako paniini pa shakatucitikila, tulyeelete kuleya kunokwaamba bunene pashintu shakatucitikila mubuumi bwesu. (Amubelenge Tushimpi 27:2; 2 Koli. 10:18) Muciindi cakucita boobo, tuleelesha kubikila maano kwaamba pali Yehova, Maswi akwe alimwi apa bantu bakwe. (Ciyu. 4:11) Nacibi boobo, na mwiipusho utolulama kwaamba pa nshotwakeendaamo, cilibo kabotu kucita boobo. Kucakubonenaako, mupalagilafu itokonkelaawo inga mwaamba shakamucitikila mubuumi.

19. (a) Ino nshiinshi sheshi shikasweemo na katuyeeyelako bamwi ndyetutobungana? (Bene Loma 1:11, 12) (b) Ino kukumbulawo kumabungano mulakubona buyani?

¹⁹ Tatweelete kulisukama abuumbi ambweenga shikumbulo shesu shaba, mukwiinga ciyandika abuumbi nkuyuminisha bamwi. Mpashi ici inga casansulula ayi inga twayandika kukumbulawo mankanda aanji. Na mpashi inga casansulula kukumbulawo mankanda aniini akusangalala kwaamba ayi bamwi abalo batooba acoolwe ca kukumbulawo. Na twabikila maano kushintu shicafwa bamwi ndyetuli kumabungano, soonse inga twayuminishanya.​—Amubelenge Bene Loma 1:11, 12.