1-2. Ino nciinshi ncotweelete kucita ndyetutolindila kukumanishikwa kwa cishomesho ca cishi cipya?

 TULALUMBA abuumbi pacishomesho cakwe Yehova cakwaamba ayi alaakwaalula cishi cino kwaamba ayi cikabe cishi cipya umo mweshi mukabe bululami. (2 Pit. 3:13) Nabi kwaamba ayi tatucishiiwo Yehova ndyeshi akaalule cishi cino kuba cishi cipya, shintu shitoocitika shitotondesha ayi kwacaalabo paniini.​—Mate. 24:32-34, 36; Milimo 1:7.

² Ndyetutolindila kukumanishikwa kwa cishomesho ici, soonse tulyeelete kutolelela kuyumya lushomo lwesu nabi twasebensela Yehova kwamyaaka iinji buyani. Ino nceebonshi? Nceebo cakwaamba ayi nabi muntu kaacite lushomo luyumu, mukuya kwaciindi inga lwaceya. Nceceeco mutumwi Paulo ncaakaambila ayi kubula lushomo ‘ncibiibi ico cifwambaana kutucata.’ (Ebu. 12:1) Kwaamba ayi tutolelele kuba alushomo luyumu, lyoonse tulyeelete kutolelela kuyeeya pashintu shitondesha ayi conoono Lesa alaakwaalula cishi cino kuba cishi cipya.​—Ebu. 11:1.

3. Ino tutokwiiya nshi mumutwi uyu?

³ Mumutwi uyu, tutobandika shintu shotatwe nsheenga twaciita kwaamba ayi tuyumye lushomo lwesu mucishomesho cakwe Yehova ca cishi cipya: (1) kukutumana kuyeeya pacilubula, (2) kuyeeya pa nkusu Yehova nshaacite, alimwi (3) kucita shintu sheenga shayumya bushicibusa bwesu a Yehova. Lyalo tutobandika maswi Yehova ngaakalwiita Abakuku mbweenga ayumya lushomo lwesu munshiku shino. Sombi amuleke tutaangune kubandika pabukaalo bumwi, mpashi mbotutokwiindaamo pacecino ciindi mbotuyandika kutondesha ayi tulicite lushomo luyumu mucishomesho cakwe Lesa ca cishi cipya.

 BUKAALO MBOTUYANDIKA KUTONDESHA AYI TULICITE LUSHOMO LUYUMU

4. Ino nshiinshi nshotweelete kusalawo kucita nshotuyandika kutondesha ayi tulicite lushomo luyumu?

⁴ Bushiku abushiku tulasalawo shakucita nshotuyandika kutondesha ayi tulicite lushomo luyumu. Kucakubonenaako, tulayandika kusalawo shakucita pamakani mbuli beshicibusa, shakulikondelesha, lwiiyo ndweshi tukeeye, kuba mucikwati nabi sobwe, kuba abaana nabi sobwe alimwi anciito njeshi tukanoosebensa. Aboobo inga twaliipusha ayi: ‘Sa nshonsalawo kucita shilatondesha ayi ndashoma ayi conoonobo Lesa alakwaalula cishi cino kuba cishi cipya? Nabi sa ndasalawo kucita shintu shicita baabo batashomi ayi inga bekala kwamuyayaya?’ (Mate. 6:19, 20; Luka 12:16-21) Tulaakunosala shakucita shili kabotu na twayumya lushomo lwesu mucishomesho cakwaamba ayi cishi cipya cili pafwiifwi abuumbi.

5-6. Ino nceebonshi tulayandika kuba alushomo luyumu ndyetutokwiinda mumapensho? Amwaambe cakubonenaako.

⁵ Alimwi tuleenda mumeelesho ngotuyandika kutondesha ayi tulicite lushomo luyumu. Mpashi inga twayandika kuliyumya ndyetutopenshekwa, ndyetwaciswa bulwashi bunene na ndyetutokwiinda mubukaalo bumwi bweenga bwatupa kulefuka. Pakutaanguna inga twalinyumfwa ayi tutoocikonsha kuliyumya mulipenshi ndyetutokwiindaamo. Sombi na lipenshi lyatolelela, tulaakuyandika lushomo luyumu kwaamba ayi tucikonshe kuliyumya akutolelela kusebensela Yehova calusangalalo.​—Loma. 12:12; 1 Pit. 1:6, 7.

⁶ Ndyetutokwiinda mulipenshi limwi, mpashi inga twalinyumfwa ayi cishomesho cakwe Yehova ca cishi cipya teshi cikakumanishikweewo. Sa ici cilasansulula ayi lushomo lwesu nduniini? Sobwe. Amuyeeye pacakubonenaako ici. Na kwatontola abuumbi, mpashi inga mwayeeya ayi teshi kukalunguleewo. Nacibi boobo, mukuya kwaciindi kulatalika kulungula. Aswebo na twalefuka abuumbi, mpashi inga twalinyumfwa ayi cishomesho ca cishi cipya teshi cikakumanishikweewo. Nacibi boobo, na tulicite lushomo luyumu, tulicishi kwaamba ayi shishomesho shakwe Lesa shilaakukumanishikwa. (Kulu. 94:3, 14, 15; Ebu. 6:17-19) Na katucite lushomo lwamushobo uyu, inga twatolelela kubika kulambila Yehova panembo mubuumi bwesu.

7. Ino nkuyeeya kwa buyani nkotweelete kuleya?

⁷ Alimwi tulayandika kuba alushomo luyumu kwaamba ayi tucikonshe kusebensa ncito yakushimikila. Bantu baanji mbotushimikila “makani abotu” aamba pacishi cipya cakwe Lesa, balabona ayi ngakubeca. (Mate. 24:14; Esek. 33:32) Tulyeelete kucenjela kwaamba ayi tutanotoonsha Yehova nshatwiisha bweenka mbuli bamwi mbobacita. Kwaamba ayi tucikonshe kucita boobo, tulyeelete kutolelela kuyumya lushomo lwesu. Amuleke tubandike shintu shotatwe sheenga shatucafwa kucita boobo.

AMUKUTUMANE KUYEEYA PACILUBULA

8-9. Ino kukutumana kuyeeya pacilubula inga kwayumya buyani lushomo lwesu?

⁸ Cintu comwi nceenga twaciita kwaamba ayi tuyumye lushomo lwesu, nkukutumana kuyeeya pacilubula. Cilubula cilatucafwa kushoma ayi shishomesho shakwe Lesa shilaakukumanishikwa. Kuyeeya cakubikila maano pacakapa kwaamba ayi Yehova atupe cilubula, anshaakacita kwaamba ayi atupe cilubula kulatucafwa kushoma cakutatonsha ayi cishomesho cakwe cakutupa buumi butamaani mucishi cipya, cilaakukumanishikwa. Ino nciinshi nceenga twaambila boobo?

⁹ Ino nshiinshi Yehova nshaakacita kwaamba ayi atupe cilubula? Yehova wakatuma Mwanaakwe wakashalwabo eenka alimwi ngwaasuni abuumbi, kuswa kwiculu akusa mukushalwa pacishi capanshi mbuli muntu umaninite. Yesu ndyaakalinga pacishi wakaliyumya mumapensho apusenepusene. Lyalo wakapenshekwa akufwa lufu lucisa. Yehova wakatutondesha lusuno abuumbi ndyaakatupa cilubula! Lesa  wesu shilusuno naakwiinga taakwe kusuminisha Mwanaakwe kupenshekwa akufwa, naakwiinga wakalinga kusuni ayi tukekale kabotu kwamyaaka iniinibo. (Joni 3:16; 1 Pit. 1:18, 19) Mukwiinga Yehova wakatupa Mwanaakwe ngwaasuni abuumbi kwaamba ayi atucaafwe, alaakushinisha kwaamba ayi tukekale kwamuyayaya mucishi cipya.

AMUYEEYE PA NKUSU YEHOVA NSHAACITE

10. Kweelana a Bene Efeso 3:20, ino nshiinshi nsheenga Yehova wacita?

¹⁰ Cintu cabili nceenga twaciita kwaamba ayi tuyumye lushomo lwesu, nkuyeeya pa nkusu Yehova nshaacite. Alicite nkusu shakukumanisha shintu shoonse nshaakashomesha. Bantu baanji munshiku shino balayeeya ayi inga tacikonsheki kuba abuumi butamaani mucishi cipya. Sombi liinji Yehova alashomesha kucita shintu bantu nsheenga tabacikoonshi kukumanisha. Lakwe inga wacikonsha kushikumanisha mukwiinga ngu Lesa Shinkusu Shoonse. (Jobo 42:2; Maako 10:27) Aboobo tatukankamani na watushomesha kucita shintu nshotubona ayi inga tashikonshekiiwo—Amubelenge Bene Efeso 3:20.

11. Amwaambe shishomesho shakwe Lesa bantu nshobakalinga kubona anga inga tashikumanishikwiiwo. (Amubone kabokosi kacite mutwi utokwaamba ayi “ Shishomesho Shakakumanishikwa Bantu Nshobakalinga Kubona Anga Inga Tashikumanishikwiiwo.”)

¹¹ Amuyeeye pashintu shimwi Yehova nshaakashomesha bantu bakwe kale kale, shakalinga kuboneka anga inga tashikumanishikwi. Wakashomesha Abulaamu a Saala ayi balaakuba amwaana musankwa mubucembele bwabo. (Mata. 17:15-17) Alimwi wakashomesha Abulaamu ayi bamulunyungu lwakwe balaakukala mucishi ca Kenani. Bene Isilaeli abo bakalinga bamulunyungu lwakwe Abulaamu ndyebakalinga mubusha mu Ijipiti kwamyaaka iinji, cakalinga kuboneka anga cishomesho ici teshi cikakumanishikweewo. Sombi cakakumanishikwa. Mukuya kwaciindi, Yehova wakaamba ayi Lisabeti alaakuba amwaana nabi kwaamba ayi wakalinga wacembela. Alimwi wakalwiita Maliya uyo wakalinga mooye ayi alaakushala Mwaana musankwa wakwe Lesa. Ici cakalinga kusa mukukumanisha cishomesho Yehova ncakaamba myaaka iinji yainda, mumuunda wa Edeni!​—Mata. 3:15.

12. Ino lilembo lya Joshuwa 23:14 alya Isaya 55:10, 11 lilatulwiita nshi pa nkusu Yehova nshaacite?

¹² Na twayeeya pashishomesho shakwe Yehova shoonse alimwi ambwaakashikumanisha, tulanyumfwisha ayi alicite nkusu shiinditeewo. Lyalo lushomo lwesu mucishomesho ca cishi cipya lulaakuyuminaako. (Amubelenge Joshuwa 23:14; Isaya 55:10, 11.) Kucita boobo, kulatucafwa kuba balibambite kushoma ayi ncakwiila cishi cipya cilaakubaako alimwi teshi kalabibo. Yehova wakaamba paliculu lipya alimwi acishi cipya ayi: “Maswi aya ngancine alimwi ngalushinisho.”​—Ciyu. 21:1, 5, NWT.

AMUCITE SHINTU SHEENGA SHAYUMYA BUSHICIBUSA BWANU A YEHOVA

13. Ino mabungano ansondo ansondo alatucafwa buyani kuyumya lushomo lwesu? Amusansulule.

¹³ Cintu catatu nceenga twaciita kwaamba ayi tuyumye lushomo lwesu, nkucita shintu sheenga shayumya bushicibusa bwesu a Yehova. Kucakubonenaako, amuyeeye mabungano ansondo ansondo mbwaatucafwa. Nankashi Anna, uyo wakasebensa ncito shipusenepusene muncito yaciindi coonse kwamyaaka iinji, wakaamba ayi: “Mabungano alancafwa kutolelela kuba alushomo luyumu. Nabi kwaamba ayi mwaambi tacishi kabotu kwaamba makani alimwi taambi makani munshila yeenga yapa batookutika kubona makani ayo munshila njobatana kuyeeyawo kale, liinji ndanyumfwako citeente ceenga cancafwa kunyumfwishisha makani amwi amu Baibo. Alimwi ici cilayumya lushomo lwangu.” b Alimwi lushomo lwesu lulayuminaako na katukutika kushikumbulo sha bamakwesu abenankashi mulibungano.​—Loma. 1:11, 12; 10:17.

14. Ino kwaabanamo lubasu muncito yakushimikila kulatucafwa buyani kuyumya lushomo lwesu?

 ¹⁴ Cimwi citucafwa kuyumya lushomo lwesu, nkwaabanamo lubasu muncito yakushimikila. (Ebu. 10:23) Ba Barbara abo basebensela Yehova kwamyaaka iindilila 70, bakaamba ayi: “Kwaabanamo lubasu muncito yakushimikila kwatolelela kuyumya lushomo lwangu. Ndyentolwiitako bamwi pashishomesho shibotu shakwe Yehova, lushomo lwangu lulatolelela kuyuminaako.”

15. Ino kucita ciiyo capalweesu kulayumya buyani lushomo lwesu? (Amubone ashikope.)

¹⁵ Cintu acimwi ceenga catucafwa kuyumya lushomo lwesu, nkucita ciiyo capalweesu. Ba Susan bakaamba ayi kuba amulongo wakucita ciiyo capalwaabo kulabacafwa. Bakaamba ayi: “Pasondo ndalibambila Ciiyo ca Njashi Yamulindilishi ca nsondo itokonkelaawo. Pamaande a Pacibili, ndalibambila kubungana kwa Buumi bwa Bwineklistu Anciito Yesu. Lyalo munshiku ishi shimwi shacaala, ndacita ciiyo capalwaangu.” Kuba amulongo wakucita ciiyo capalwaabo alimwi akuukonkela, kwacafwa ba Susan kutolelela kuyumya lushomo lwabo. Ba Irene basebensela kumaofesi anene kwamyaaka iinji, bakaamba ayi kwiiya bushinshimi bwamu Baibo kulayumya lushomo lwabo. Bakaamba ayi: “Ndasangalala kushiba kwaamba ayi bushinshimi boonse Yehova mbwaamba bulakumanishikwa.” c

“ALAAKUCITIKA CANCINENCINE”

16. Ino nceebonshi maswi Yehova ngaakalwiita Abakuku inga atuyuminisha aswebo munshiku shino? (Bene Ebulu 10:36, 37)

¹⁶ Basebenshi bakwe Yehova bamwi balindila mamanino acishi cino kwamyaaka iinji. Bantu bamwi balayeeya ayi mamanino acishi cino acelwa kusa. Sombi Yehova alicishi basebenshi bakwe mbobalinyumfwa. Nceceeco ncaakalwiitila Abakuku ayi: “Ee, waaleembe ceebo ciindi ca ngawo tacina kushikila. Nakubi boobo, ciindi ca ngawo citoosa cakufwambaana. Ncakwiila, alaakucitika cancinencine. Nabi aboneke kucelwa mukucitika, ukaalindilebo mukwiinga alaakucitika cancinencine alimwi teshi akacelwewo,  sobwe!” (Abaku. 2:3) Sa Lesa wakaamba maswi aya kwaamba ayi ayuminishe Abakuku eenkabo? Nabi sa maswi ngakaamba inga atuyuminisha aswebo munshiku shino? Kwiinda mukutanjililwa amushimu usalashi, mutumwi Paulo wakaamba mbweenga maswi aya acafwa Beneklistu batolangila cishi cipya. (Amubelenge Bene Ebulu 10:36, 37.) Aboobo, inga twashoma cakutatoonsha kwaamba ayi nabi tutoobona kwaamba ayi cishomesho cakwe Yehova ca kutupulusha citocelwa kukumanishikwa ‘cilaakucitika cancinencine alimwi teshi cikacelwewo, sobwe!’

17. Ino nankashi umwi wakacita buyani kwaamba ayi akonkele maswi Yehova ngaakalwiita Abakuku?

¹⁷ Basebenshi bakwe Yehova baanji batolelela kulindila kukumanishikwa kwa cishomesho ici. Bamwi bacita boobo kwamyaaka iinji. Kucakubonenaako, Nankashi Louise, wakatalika kusebensela Yehova mumwaaka wa 1939. Wakaamba ayi: “Paciindi cilya ndakalinga kuyeeya ayi Amagedoni ilaakusa kaantana kumanisha cikolo caku sekondali. Sombi ico tacina kucitikaawo. Kwamyaaka iinji, ndatolelela kubelenga makani amu Baibo aamba pabantu bakalindila kukumanishikwa kwa shishomesho shakwe Yehova. Kucita boobo kwancafwa kutolelela kulindila kukumanishikwa kwa shishomesho shakwe Yehova. Ndabelenga pa bantu mbuli Nowa, Abulaamu, Josefu alimwi abamwi abo bakalindila kwaciindi cilaamfu kwaamba ayi Yehova akumanishe nshaakabashomesha. Kutolelela kushoma ayi shishomesho shakwe Yehova shilaakukumanishikwa, kwancafwa akucafwa bamwi kutolelela kushoma cakutatoonsha ayi cishi cipya cili pafwiifwi.” Bamwi baanji basebensela Yehova kwamyaaka iinji, abalo mbobalinyumfwa!

18. Ino kweebela shilengwa inga kwatucafwa buyani kuyumya lushomo lwesu lwakwaamba ayi cishi cipya cilaakubaako?

¹⁸ Ncakwiila Yehova tacina kwaalula cishi cino kuba cishi cipya. Sombi amuyeeye pashintu shiliiko mbuli nyenyeenshi, shisamu, shinyama alimwi abantu. Taakuwo weenga watoonsha ayi shintu ishi nkoshili nabi kwaamba ayi paciindi cimwi tashakalingaako. Nkoshili mukwiinga Yehova wakashilenga. (Mata. 1:1, 26, 27) Kwiilikaawo, Lesa wesu wakatushomesha cishi cipya. Alimwi alaakukumanisha cishomesho ici. Mucishi cipya, bantu balaakuba abuumi bubotu alimwi balaakusangalala kwikala kwamuyayaya. Inga twashoma ayi Lesa alaakwaalula cishi cino kuba cishi cipya paciindi mwiine ncaakabika.​—Isa. 65:17; Ciyu. 21:3, 4.

19. Ino inga mwacita buyani kwaamba ayi muyumye lushomo lwanu?

¹⁹ Ndyemutolindila kukumanishikwa kwa cishomesho ca cishi cipya, amucite nsheenga mwacikonsha kwaamba ayi muyumye lushomo lwanu. Amutolelele kutondesha kulumba pacilubula. Munooyeeya pa nkusu Yehova nshaacite. Alimwi munoocita shintu sheenga shayumya bushicibusa bwanu a Yehova. Na mukacite boobo, mulaakuba pabaabo beshi bakatambule “sheesho Lesa nshaakashomesha, kwiinda mulushomo akukalika moyo.”​—Ebu. 6:11, 12, NWT; Loma. 5:5.