MUTWI WAKWIIYA 16
“Nandumi Yako Utoobuka”!
“Yesu wakalwiita [Malita] ayi: ‘Nandumi yako utoobuka.’”—JONI 11:23.
LWIIMBO 151 Alaakwiita
NSHESHI TWIIYE a
1. Ino nshiinshi musankwa umwi wacanike nshaakaamba shakatondesha ayi wakalinga kulangila kubushikwa kwa bafu?
MUSANKWA wacanike waliina lya Matthew, alaciswa bulwashi bunene. Aboobo bakamucita opaleshoni mankanda aanji. Ndyaakalinga kucite myaaka 7, lakwe abamumukwashi wakwe bakalinga kweebela pulogilamu yapa mweenshi ya JW Broadcasting®. Kumamanino apulogilamu, bakeebela vidyo ya nyimbo yakatondesha bantu kabatambula beshikamukowa na beshicibusa babo bakabushikwa. b Pulogilamu ndyeyakamana, Matthew wakacata bashali bakwe kumaansa akubalwiita ayi: “Te mwaboona! Anebo nabi ndafwa ndaakubushikwa. Inga mwandindila; tulaakubonana alimwi.” Amuyeeyebo bashali mbobakasangalala ndyebakashiba ayi mwanaabo wakalinga kucite lushomo luyumu mucishomesho ca kubushikwa kwa bafu.
2-3. Ino nceebonshi cilayandika kwaamba ayi ciindi aciindi katuyeeya pacishomesho ca kubushikwa kwa bafu?
2 Cilayandika abuumbi kwaamba ayi ciindi aciindi katuyeeya pacishomesho camu Baibo ca kubushikwa kwa bafu. (Joni 5:28, 29) Ino nceebonshi? Mukwiinga tatucishiiwo ndyeenga twaciswa bulwashi bunene na ndyeenga twafwitwa shikamukowa nabi shicibusa. (Shiku. 9:11; Jemu. 4:13, 14) Kulangila kubushikwa kwa bafu inga kwatucafwa kuliyumya ndyetutokwiinda mumapensho mbuli aaya. (1 Tesa. 4:13) Maswi akwe Lesa alatucafwa kushiba ayi Ishiwesu wakwiculu alitwishi kabotu alimwi alitusuni abuumbi. (Luka 12:7) Yehova Lesa alyeelete kutushiba kabotu abuumbi kwaamba ayi akatubuushe kweelana ambotwakalinga kucita shintu alimwi ambotwakalinga kuyeeya. Yehova alitusuni abuumbi alimwi wakapa kwaamba ayi cikakonsheke kuba abuumi butamaani. Nabi twafwa alaakutubusha!
3 Mumutwi uyu, tutotaanguna kubandika sheenga shatupa kushoma ayi bafu balaakubushikwa. Lyalo tutobandika makani amu Baibo eenga ayumya lushomo lwesu. Makani ayo mpopaswa lilembo lya mutwi uyu apo paamba ayi: “Nandumi yako utoobuka.” (Joni 11:23) Mukweelaako, tutobandika nsheenga twaciita kwaamba ayi tuyumye lushomo lwesu mucishomesho ca kubushikwa kwa bafu.
SHEENGA SHATUPA KUSHOMA AYI BAFU BALAAKUBUSHIKWA
4. Ino nciinshi ncotweelete kushoma cakutatoonsha kwaamba ayi tushome cishomesho cimwi? Amwaambe cakubonenaako.
4 Kwaamba ayi tushome cishomesho cimwi, tulyeelete kushoma cakutatoonsha ayi uyo watushomesha alisunishishi kucikumanisha alimwi alicite nkusu shakucita boobo. Kucakubonenaako, amuyeeye ayi ŋanda yanu yanyonyooka abuumbi kumfula ya cipuupu. Lyalo shicibusa wanu wamushomesha ayi, ‘Ndaakumucafwa kubamba ŋanda yanu.’ Ndyaatokwaamba mwaboona ayi alishinishite alimwi mwashoma cakutatoonsha ayi alisuni kumucafwa. Na alicishi kabotu kuyaka alimwi alicite shisebensesho shiyandika, inga mwashiiba ayi inga wacikonsha kumucafwa. Aboobo inga mwashoma nshaamulwiita. Ino mbuyani pacishomesho ca kubushikwa kwa bafu Lesa ncaakatushomesha? Sa ncakwiila alisunishishi kucikumanisha alimwi sa alicite nkusu shakucita boobo?
5-6. Ino nshiinshi sheenga shatupa kushoma ayi Yehova alisunishishi kubusha bantu bakafwa?
5 Sa ncakwiila Yehova alisunishishi kubusha bantu bakafwa? Ncakutatoonsha. Wakatanjilila bantu bamwi bakalemba Baibo kulemba pacishomesho ca kubushikwa kwa bafu. (Isa. 26:19; Osi. 13:14; Ciyu. 20:11-13) Alimwi lyoonse Yehova alakumanisha nshaashomesha. (Joshu. 23:14) Ncakwiila Yehova alisunishishi kubusha baabo bakafwa. Ino nceebonshi nceenga twaambila boobo?
6 Amuyeeye pamaswi Jobo ngakaamba. Wakalinga kushomete ayi nabi wafwa, Yehova wakalinga kusunishishi kumubusha. (Jobo 14:14, 15.) Ubu bweenka Yehova mbwaalinyumfwa pabasebenshi bakwe boonse bakafwa. Alisunishishi kubabusha kwaamba ayi bakabe abuumi buli kabotu akuba alusangalalo. Ino Yehova alalinyumfwa buyani pabaabo boonse bakafwa kabatana kuba acoolwe cakwiiya cancine pali nguwe? Lesa wesu shilusuno alisunishishi kubabusha abalo. (Milimo 24:15) Alisuni kwaamba ayi abalo bakabe acoolwe cakuba beshicibusa bakwe akukala kwamuyayaya pacishi. (Joni 3:16) Ncakutatoonsha kwaamba ayi Yehova alisunishishi kubusha bantu bakafwa.
7-8. Ino nshiinshi sheenga shatupa kushoma ayi Lesa alicite nkusu shakubusha baabo bakafwa?
7 Sa Yehova alicite nkusu shakubusha bantu bakafwa? Ncakutatoonsha! Ngu Lesa “Shinkusu Shoonse.” (Ciyu. 1:8) Aboobo alicite nkusu shiinditeewo shakukoma mulwani uli woonse, kwiilikaawo alufu. (1 Koli. 15:26) Kushiba makani aya kulatuyuminisha. Amuyeeye shakacitikila Nankashi Emma Arnold. Lakwe amukwashi wakwe bakeenda mumeelesho ayumu abuumbi ayo akeelesha lushomo lwabo paciindi ndyekwakalinga Nkondo Yapacishi Coonse Yabili. Kwaamba ayi ayuminishe mwanaakwe mwanakashi ceebo cakufwitwa beshikamukowa alimwi abeshicibusa mumisumba yakupenshesha yaba Nazi, wakamulwiita ayi: “Na bantu bakafwa teshi bakabushikweewo, nkokwaamba ayi lufu lulicite nkusu kwiinda Lesa. Sombi ico teshi cancine.” Ncakutatoonsha kwaamba ayi taakuwo cintu cicite nkusu kwiinda Yehova! Lesa shinkusu shoonse uyo wakalenga bantu alicite nkusu shakubusha baabo bakafwa.
8 Ceebo acimwi ceenga catupa kushoma kwaamba ayi Lesa alicite nkusu shakubusha baabo bakafwa, ncakwaamba ayi aleebaluka shintu shoonse. Alishi liina lya nyenyeenshi yomwi ayomwi. (Isa. 40:26) Alimwi abo bakafwa alabeebaluka. (Jobo 14:13; Luka 20:37, 38) Ncuubu kuli nguwe kwiibaluka makani oonse pabaabo mbweshi akabushe, kwiilikaawo ambobakalinga kuboneka, nshebakeendaamo mubuumi alimwi ambobakalinga kuyeeya.
9. Ino nceebonshi mulashoma cishomesho cakwe Yehova ca kubushikwa kwa bafu?
9 Ncakutatoonsha kwaamba ayi inga twashoma mucishomesho cakwe Lesa ca kubushikwa kwa bafu, mukwiinga tulicishi kwaamba ayi alisunishishi kubusha baabo bakafwa alimwi alicite nkusu shakucita boobo. Ceebo acimwi ceenga catupa kushoma cishomesho ca kubushikwa kwa bafu ncakwaamba ayi Yehova wakabushaawo kale bantu kuswa kubafu. Paciindi Baibo ndyeyakalinga kulembwa, Yehova wakapa basankwa bamwi nkusu shakubusha bantu kuswa kubafu. Alimwi wakapa a Yesu nkusu shakubusha bantu kuswa kubafu. Amuleke tubandike pa caankamiko comwi pa shaankamiko shakubusha bantu Yesu nshaakacita. Caankamiko ici tulacicana mu Joni 11.
YESU WAKAFWITWA SHICIBUSA WAKWE
10. Ino ninkombe nshi Yesu njaakatambula kuswa ku Betani ndyaakalinga kushimikila kwitala lya mulonga wa Joodani, alimwi ino nciinshi ncaakacita? (Joni 11:1-3)
10 Amubelenge Joni 11:1-3. Amuyeeye shakacitika mu ndabala ya Betani kumamanino amwaaka wa 32 C.E. Yesu wakalinga kucite beshicibusa mbaakalinga kunyumfwanaabo mu ndabala iyi—Lasalo alimwi abenankashi shakwe bobilo, Maliya a Malita. (Luka 10:38-42) Sombi Lasalo wakaciswa alimwi benankashi shakwe bakalisukama. Bakatuma nkombe kuli Yesu uyo wakalinga kwitala lya mulonga wa Joodani, mushinso wakweenda nshiku shobilo kuswa ku Betani. (Joni 10:40) Cakabicaako ncakwaamba ayi, paciindi shinkombe ndyaakalinga kushika kuli Yesu, Lasalo wakafwa. Nabi kwaamba ayi Yesu wakashiba ayi shicibusa wakwe wafwa, wakekalaako nshiku ashimwi shobilo kwitala lya mulonga wa Joodani, lyalo ndyaakanyamuka kuya ku Betani. Aboobo paciindi Yesu ndyaakashika ku Betani, kapali peenda nshiku shili 4 kuswa bushiku Lasalo ndyaakafwa. Yesu wakalinga kusa mukucita cintu cimwi cakacafwa beshicibusa bakwe akupa kwaamba ayi Lesa alemekwe.—Joni 11:4, 6, 11, 17.
11. Ino nciiyo nshi nceenga tweeya pamakani akuba bushicibusa abamwi kuswa kumakani aya?
11 Kuli nsheenga tweeya pamakani akuba bushicibusa abamwi kuswa kumakani aya. Amuyeeye paceeci: Maliya a Malita ndyebakatuma nkombe kuli Yesu, tabakwe kumulwiita ayi ese ku Betani. Bakatumabo nkombe yakwaamba ayi shicibusa wakwe ngwaasuni abuumbi ngumulwashi. (Joni 11:3) Lasalo ndyaakafwa, naakwiinga Yesu wakasalawo kumubusha nabi kwaamba ayi wakalinga kulaale. Sombi Yesu wakasalawo kuya ku Betani kwaamba ayi abe pomwi a Maliya a Malita beshicibusa bakwe. Sa mulicite shicibusa weenga wamucafwa nabi kwakubula kumusenga lucafwo? Na mulicite, inga mwashoma ayi alaakumucafwa paciindi ndyeshi mukanokwiinda “mumapensho.” (Tus. 17:17) Aswebo inga twakonkela cakubonenaako cakwe Yesu kwiinda mukucafwa beshicibusa besu nabi tabana kutusenga lucafwo! Ano atutolelele kubandika pamakani akwe Lasalo kwaamba ayi tushibe shakakonkelaawo.
12. Ino nciinshi Yesu ncaakashomesha Malita, alimwi ino nceebonshi Malita wakalinga kweelete kushoma cishomesho ico? (Joni 11:23-26)
12 Amubelenge Joni 11:23-26. Malita wakanyumfwa ayi Yesu ali pafwiifwi a ndabala ya Betani. Aboobo peenkaapo wakamucinsha, lyalo ndyaakamukumanya wakaamba ayi: “Nkambo, nimwakalingaako naakwiinga nandumi yangu taafwi.” (Joni 11:21) Ncakwiila Yesu naakwiinga wakashilika Lasalo. Sombi kuli cintu cimwi cilibetele Yesu ncaakalinga kuyeeya kucita. Wakashomesha Malita ayi: “Nandumi yako utoobuka.” Alimwi kwaamba ayi acafwe Malita kushoma cishomesho ici, wakeelikaawo akwaamba ayi: “Ndime mbusha bantu kuswa kubafu alimwi ndime mpa buumi.” Ncakwiila, Lesa wakapa Yesu nkusu shakubusha bantu kuswa kubafu. Paciindi cimwi, Yesu wakabushawo mwanakashi wacanike ndipakeendabo ciindi ciniini kuswa ndyaakafwa, alimwi wakabushawo amusankwa wacanike mpashi pabushiku bweenka musankwa uyu ndyaakafwa. (Luka 7:11-15; 8:49-55) Ano sa inga wacikonsha kubusha muntu wakalinga mucuumbwe kwanshiku 4 alimwi wakatalika kubola?
“LASALO, SWAAMO UMO!”
Yesu wakabanyumfwila nkumbu abuumbi beshicibusa bakwe bakalinga kucite buumba (Amubone palagilafu 13 a 14)
13. Kweelana amakani ngotucana pa Joni 11:32-35, ino nshiinshi Yesu nshaakacita ndyaakabona Maliya abamwi kabalila? (Amubone acikope.)
13 Amubelenge Joni 11:32-35. Amuyeeye shakacitika Maliya nankashi yakwe Lasalo ndyaakabonana a Yesu. Alakwe wakaamba maswi Malita ngakaamba ayi: “Nkambo, nimwakalingaako naakwiinga nandumi yangu taafwi.” Lakwe abamwi bakalinga pomwi anguwe bakalinga kucite buumba abuumbi. Yesu wakalinyumfwa cibiibi abuumbi ndyaakabona Maliya a baJuda abo mbaakesaabo kabalila. Mukwiinga wakabanyumfwila nkumbu abuumbi beshicibusa bakwe, Yesu wakalila. Alicishi kabotu mbocicisa kumoyo na twafwitwa shikamukowa nabi shicibusa. Ncakutatoonsha kwaamba ayi alisunishishi kukushawo lufu ulo lupa bantu kulila!
14. Ino Yesu nshaakacita ndyaakabona Maliya kaalila shilatwiisha nshi pali Yehova?
14 Yesu nshaakacita ndyaakabona Maliya kaalila, shilatwiisha ayi Yehova ngu Lesa ucite nkumbu. Ino nceebonshi nceenga twaambila boobo? Kweelana ambotwakeeya mumutwi wamana, Yesu alalinyumfwa akuyeeya bweenka mbuli Baishi. (Joni 12:45) Yesu wakalila ceebo cakwaamba ayi wakabanyumfwila nkumbu abuumbi beshicibusa bakwe abo bakalinga kucite buumba. Aboobo tulicishi kwaamba ayi Yehova alatunyumfwila nkumbu abuumbi na watubona katulila ceebo cakuba abuumba. (Kulu. 56:8) Ncakutatoonsha kwaamba ayi kushiba makani aya kulamupa kusuna kusena pafwiifwi a Lesa wesu shinkumbu.
Yesu wakatondesha ayi alicite nkusu shakubusha bantu bakafwa (Amubone palagilafu 15 a 16)
15. Kweelana amakani ngotucana pa Joni 11:41-44, ino nshiinshi shakacitika Yesu ndyaakashika kucuumbwe cakwe Lasalo? (Amubone acikope.)
15 Amubelenge Joni 11:41-44. Yesu ndyaakashika kucuumbwe nkobakabika Lasalo, wakalwiita bantu ayi bakusheko libwe ndyobakacala kucuumbwe. Malita taakalinga kusuniiwo ayi bakusheko libwe mukwiinga wakalinga kuyeeya ayi kutooswa keema kabiibi. Yesu wakamukumbula ayi: “Sa nshikwe kukulwiita ayi na ulashoma ulakonsha kubona bulemu bwakwe Lesa?” (Joni 11:39, 40) Lyalo Yesu wakalanga kwiculu akupaila bantu boonse kabeebela. Wakalinga kusuni ayi alemeke Yehova pacintu ncaakalinga kusuni kucita. Lyalo Yesu wakeeta muliswi lyapeculu ayi: “Lasalo, swaamo umo!” Mpeeke Lasalo wakaswaamo mucuumbwe! Yesu wakacita cintu bantu bamwi ncobakalinga kuyeeya ayi inga tacikonsheki. c
16. Ino makani ngotucana mu Joni capita 11 alatucafwa buyani kuyumya lushomo lwesu mucishomesho ca kubushikwa kwa bafu?
16 Makani ngotucana mu Joni capita 11 alayumya lushomo lwesu mucishomesho ca kubushikwa kwa bafu. Munshila nshi? Na mutokwiibaluka, Yesu wakashomesha Malita ayi: “Nandumi yako utoobuka.” (Joni 11:23) Bweenka mbuli Baishi, Yesu alisunishishi kubusha bantu bakafwa alimwi alicite nkusu shakucita boobo. Minsonshi Yesu njaakalosha ilatondesha ayi alisunishishi kubusha bantu bakafwa akukushawo buumba bantu mbobabaabo ceebo cakufwitwa. Alimwi kubushikwa kwakwe Lasalo akwalo kwakatondesha ayi Yesu alicite nkusu shakubusha bafu. Kwiilikaawo, amuyeeye maswi Yesu ngaakalwiita Malita ayi: “Sa nshikwe kukulwiita ayi na ulashoma ulakonsha kubona bulemu bwakwe Lesa?” (Joni 11:40) Kuli sheebo shibotu sheelete kutupa kushoma cishomesho cakwe Lesa cakwaamba ayi alaakubusha bantu bakafwa. Ano ino nshiinshi nsheenga twaciita kwaamba ayi tuyumye lushomo lwesu mucishomesho ici?
MBWEENGA TWAYUMYA LUSHOMO LWESU MUCISHOMESHO CAKUBUSHIKWA KWA BAFU
17. Ino nshiinshi nshotweelete kunokwiibaluka ndyetutobelenga makani amu Baibo aamba pabantu bakabushikwa?
17 Amubelenge akukutumana kuyeeya pamakani aamba pabantu bakabushikwa kale kale. Baibo ilaamba pabantu bali 8 abo bakabushikwa pacishi capanshi. d Mpashi inga mwabika bubaambo bwakwiiya makani aya cakubikila maano. Ndyemutoocita boobo, munookwiibaluka kwaamba ayi aba mbantu bancinencine bakalingaako pacishi capanshi. Alimwi munooyeeya nsheenga mweeya kuswa kumakani ayo. Kwiilikaawo, amuyeeye cakubonenaako comwi acomwi mbocitondesha ayi Lesa alisunishishi kubusha bantu bakafwa alimwi alicite nkusu shakucita boobo. Alimwi ciyandika abuumbi, munooyeeya cakubikila maano pakubushikwa kwakwe Yesu mukwiinga nkubushikwa kuyandika abuumbi pakubushikwa kwaambwa mu Baibo. Munokwiibaluka kwaamba ayi Yesu ndyaakabushikwa wakabonekela ku bantu baanji alimwi ici cilatupa kushoma cakutatoonsha kwaamba ayi bafu balaakubushikwa.—1 Koli. 15:3-6, 20-22.
18. Ino inga mwacita buyani kwaamba ayi inyimbo shaamba pakubushikwa kwa bafu shimucaafwe? (Amubone amakani amweela.)
18 Munookutika, kwiimba akuyeeya panyimbo shaamba pakubushikwa kwa bafu. e (Efe. 5:19) Inyimbo ishi shilatucafwa kuyumya lushomo lwesu mucishomesho ca kubushikwa kwa bafu. Amwiiye bwakwiimba kabotu nyimbo isho, alimwi ndyemucite kulambila kwamukwashi amubandike mbweenga maswi ali munyimbo isho amucafwa. Amulabilile maswi ali munyimbo isho akuyeeyawo abuumbi kwaamba ayi ayumye lushomo lwanu akumushika panshi lyamoyo. Lyalo na mukeende mulipenshi linene mubuumi bwanu na kufwitwa shikamukowa nabi shicibusa, mushimu wakwe Yehova ulaakumucafwa kwiibaluka nyimbo ishi kwaamba ayi shimuyuminishe akumupa nkusu.
19. Ino nshiinshi nsheenga twayeeya pakubushikwa kwa bafu? (Amubone kabokosi kacite mutwi utokwaamba ayi “ Ino Njimiipusho Nshi Njeshi Mukabeepushe?”)
19 Munoyeeya mbweshi cikabe na bafu bakabushikwe. Yehova wakatupa nkusu shakucikonsha kuyeeya ayi tuli mucishi cipya. Nankashi umwi wakaamba ayi: “Ndatola ciindi cilaamfu kuyeeya ayi ndi mucishi cipya alimwi cilababo anga ntoonyumfwa bweema bwa maluba atosapuka.” Munooyeeya mbweshi cikabe kubonana abasankwa abanakashi bashomeka baambwa mu Baibo. Ino ngani ngomusunishishi kubona? Ino njimiipusho nshi njeshi mukamwiipushe? Alimwi munooyeeya ambweshi cikabe na mukabe pomwi abeshikamukowa abeshicibusa banu bakafwa. Munooyeeya pamaswi akutaanguna ngeshi mukabalwiite, mbweshi mukabakumbate ambweshi mukasangalale kubabona alimwi.
20. Ino nciinshi ncotweelete kuba bashinishite kucita?
20 Tulalumba Yehova abuumbi pacishomesho ca kubushikwa kwa bafu! Inga twashoma cakutatonsha kwaamba ayi Yehova alaakukumanisha cishomesho ici mukwiinga alisunishishi kubusha bantu bakafwa alimwi alicite nkusu shakucita boobo. Atube bashinishite kutolelela kuyumya lushomo lwesu mucishomesho ici cibotu abuumbi. Kucita boobo kulaakutucafwa kuba abushicibusa buyumu a Lesa uyo ushomesha womwi awomwi wandiswe ayi, ‘Beshikamukowa abeshicibusa banu bakafwa, balaakubushikwa!’
LWIIMBO 147 Lesa Watushomesha Buumi Butamaani
a Na mwakafwitwa shikamukowa nabi shicibusa, ncakutatoonsha kwaamba ayi cishomesho ca kubushikwa kwa bafu cilamuyuminisha. Ano sa inga mwacikonsha kusansulwita bamwi cimupa kushoma ayi bafu balaakubushikwa? Alimwi ino inga mwacita buyani kwaamba ayi muyumye lushomo lwanu, mucishomesho ca kubushikwa kwa bafu? Mutwi uyu wakalembelwa kutucafwa soonse, kwaamba ayi tuyumye lushomo lwesu mucishomesho ca kubushikwa kwa bafu.
b Vidyo ya nyimbo ilicite mutwi waamba ayi Cakalingabo Pafwiifwi alimwi yakalinga lubasu lwa pulogilamu ya JW Broadcasting yamu mweenshi wa November 2016.
c Amubone mutwi utokwaamba ayi “Ino nceebonshi Yesu wakatola nshiku shone kwaamba ayi ashike kucuumbwe cakwe Lasalo?” mu Njashi Yamulindilishi yamu Chitonga ya January 1, 2008.
d Amubone kabokosi kacite mutwi utokwaamba ayi “Bantu Bali 8 Bakabushikwa Baambwa mu Baibo,” mu Njashi Yamulindilishi yamu Chitonga ya August 1, 2015 pe. 4.
e Amubone nyimbo shitokonkelaawo mulibuku lya ‘Amwiimbile Yehova Cakusangalala’: “Amuyeeye Ayi Muli Mucishi Cipya” (Lwiimbo 139), “Amubikile Maano Kucilambu!” (Lwiimbo 144), alimwi a lwaamba ayi “Alaakwiita” (Lwiimbo 151). Alimwi amuye pa jw.org akubona nyimbo shilibetele ishi: “Cakalingabo Pafwiifwi,” “Amuyeeye ayi Muli Mucishi Cipya,” a lwamu Chitonga lwaamba ayi “Boola Ubone.”
