1. Ino nciinshi cakapa kwaamba ayi Yesu acite caankamiko cakutaanguna?

 AMUYEEYEBO mbocakalinga kumamanino amwaaka wa 29 C.E. ciindi Yesu ndyaakatalika ncito yakwe yakushimikila. Yesu abanyina ba Maliya, pomwi abashikwiiya bakwe bamwi, bakeetwa kucanika kubwiinga bwakalinga ku Kana. Mushi uyu wakalinga kulubasu lwa kumatwa lwa ndabala ya Nasaleti, Yesu mwakalinga kwikala. Maliya wakalinga shicibusa wa mikwashi yabaabo bakalinga kweebana. Aboobo cilyeelete kwaamba ayi wakalinga kucafwilisha kulama baabo bakesa kubwiinga. Ndyebakalinga kusekelela, waini wakamana. Alimwi ici naakwiinga cakapa kwaamba ayi bamumukwashi abaabo batokweebana basebane abuumbi. b Mpashi bantu bakesa kubwiinga bakafula kwiinda mbobakalinga kulangila. Cakufwambaana Maliya wakaya ku mwanaakwe akumulwiita ayi: “Waini wabamanina.” (Joni 2:1-3) Ino nciinshi Yesu ncaakacita? Wakacita caankamiko ndyaakaalula maanshi kuba “waini ubotu.”​—Joni 2:9, 10.

2-3. (a) Ino nshaankamiko nshi Yesu nshaakacita? (b) Ino kwiiya pa shaankamiko Yesu nshaakacita inga kwatucafwa buyani?

² Yesu wakacita shaankamiko ashimwi shiinji ndyaakalinga kusebensa ncito yakwe yakushimikila. c Wakasebensesha nkusu shakwe shakucita shaankamiko kucafwa bantu baanji abuumbi. Kucakubonenaako, caankamiko cimwi Yesu ncaakacita wakasanina basankwa  bali 5,000, lyalo paciindi cimwi wakasanina basankwa bali 4,000. Aboobo mu shaankamiko shobilo ishi nshaakacita, inga twaamba ayi mpashi wakasanina bantu beendilila 27,000 na nkubelengelako banakashi abaana. (Mate. 14:15-21; 15:32-38) Alimwi paciindi Yesu ndyaakacita shaankamiko ishi, wakashilika abantu baanji bakalinga balwashi. (Mate. 14:14; 15:30, 31) Amuyeeyebo bantu mbobakakankamana Yesu ndyaakabasanina akubashilika munshila ya caankamiko!

³ Kuli shiinji nsheenga tweeya kuswa ku shaankamiko Yesu nshaakacita. Mumutwi uyu, tutobandika nsheenga tweeya kuswa ku shaankamiko shimwi Yesu nshaakacita, sheenga shayumya lushomo lwesu. Lyalo tutobandika Yesu mbwaakatondesha mubo wakuliceesha ankuumbu ndyaakalinga kucita shaankamiko ambweenga twakonkela cakubonenaako cakwe.

4. Ino shaankamiko Yesu nshaakacita shilatwiisha nshi pali nguwe a Baishi?

⁴ Shaankamiko Yesu nshaakacita shilayumya lushomo lwesu muli nguwe a muli Baishi. Inga twaamba boobo, mukwiinga Yehova ngowakapa Yesu nkusu shakucita shaankamiko. Milimo 10:38 ilatulwiita ayi: ‘Lesa wakasala Yesu akumupa mushimu usalashi ankusu. Mukwiinga Lesa wakalinga anguwe, wakeenda koonse koonse kaaya bucita shibotu kubantu akushilika baabo boonse bakalinga munkusu shakwe Satana.’ Alimwi mutaluubi kwaamba ayi Yesu wakalinga kuyeeya akulinyumfwa mbuli Baishi mushintu shoonse nshaakalinga kwaamba akucita, kwiilikaawo andyaakalinga kucita shaankamiko. (Joni 14:9) Amuleke tubandike pa shiiyo shotatwe nsheenga tweeya kuswa ku shaankamiko Yesu nshaakacita.

5. Ino nciinshi cakapa kwaamba ayi Yesu acite shaankamiko? (Mateyo 20:30-34)

⁵ Cakutaanguna, Yesu a Baishi balitusuni abuumbi. Yesu ndyaakalinga pacishi capanshi, wakatondesha mbwaakalinga kubasuni bantu kwiinda mukusebensesha nkusu nshaakapekwa shakucita shaankamiko, kucafwa baabo bakalinga kwiinda mumapensho. Paciindi cimwi, basankwa bobilo boofu bakasenga Yesu kwaamba ayi abacaafwe. (Amubelenge Mateyo 20:30-34.) Amubone kwaamba ayi Yesu “wakabafwita nkumbu” lyalo akubashilika. Alimwi inkumbu nsheshakapa kwaamba ayi Yesu asanine bantu bakalinga kufwite nsala akushilika shimanata, kutondesha kwaamba ayi alisuni bantu. (Mate. 15:32; Maako 1:41) Inga twashoma cakutatoonsha kwaamba ayi Yehova Lesa “uswite nkumbu” alimwi a Mwanaakwe balitusuni abuumbi alimwi balalinyumfwa cibiibi na katupenga. (Luka 1:78; 1 Pit. 5:7) Balisunishishi abuumbi kumana mapensho oonse bantu ngobatokwiindaamo!

6. Ino Lesa wakapa Yesu nkusu shakucita buyani?

⁶ Cabili, Lesa wakapa Yesu nkusu shakumana mapensho oonse bantu ngobeendaamo. Yesu ndyaakacita shaankamiko wakatondesha ayi inga wamana mapensho oonse ngotwiindaamo swebo ngeenga tatucikoonshi kumana. Kucakubonenaako, alicite nkusu shakutulubula kuswa kububi amapensho esa ceebo ca bubi mbotwakapyana mbuli kuciswa akufwa. (Mate. 9:1-6; Loma. 5:12, 18, 19) Shaankamiko nshaakacita shakatondesha ayi inga wacikonsha ‘kushilika malwashi apusenepusene,’ kwiilikaawo akubusha bafu. (Mate. 4:23; Joni 11:43, 44) Alimwi alicite nkusu shakuumusha shipuupu shinene akukoma shibanda. (Maako 4:37-39; Luka 8:2) Cilayuminisha abuumbi kushiba kwaamba ayi Yehova wakapa Mwanaakwe nkusu shakucita shaankamiko mbuli sheeshi!

7-8. (a) Ino shaankamiko Yesu nshaakacita shilatupa kushoma nshi? (b) Ino ncaankamiko nshi ncemusuni kwaamba ayi cikakumanishikwe mucishi cipya?

⁷ Catatu, inga twashoma cakutatoonsha kwaamba ayi shishomesho nshetutoolangila mu Bwaami bwakwe Lesa shilaakukumanishikwa. Shaankamiko Yesu nshaakacita ndyaakalinga pacishi, shilatwiisha ayi alaakucita shintu shiinji shibotu kunembo mbuli Mwaami wa Bwaami bwakwe Lesa. Amuyeeye pashintu shiinji shibotu sheshi  shikacitike Yesu ndyeshi akanookweendelesha cishi. Tulaakuba abuumi buli kabotu mukwiinga alaakukushaawo malwashi oonse akulemana isho shipa kwaamba ayi bantu banoopenga. (Isa. 33:24; 35:5, 6; Ciyu. 21:3, 4) Teshi kukabeewo nsala na kupenga ceebo ca mapensho acitika cakutengashila. (Isa. 25:6; Maako 4:41) Tulaakusangalala kutambula beshikamukowa abeshicibusa besu bakafwa ndyeshi bakanobushikwa kuswa “mushuumbwe.” (Joni 5:28, 29) Ino ncaankamiko nshi ncemusunishishi kwaamba ayi cikakumanishikwe mucishi cipya?

⁸ Yesu ndyaakalinga kucita shaankamiko wakatondesha kuliceesha ankumbu, mibo aswebo njetweelete kubaayo. Amuleke tubandike pashakubonenaako shobilo. Tutotaanguna kubandika pa caankamiko Yesu ncaakacita ndyaakalinga kubwiinga ku Kana.

9. Ino nciinshi Yesu ncaakacita pabwiinga? (Joni 2:6-10)

⁹ Amubelenge Joni 2:6-10. Sa Yesu wakalinga kweelete kucitawo comwi waini ndyewakamana pabwiinga? Sobwe. Taakuwo bushinshimi bwakaambila limwi ayi Yesu alaakupanga waini munshila ya caankamiko. Amuyeeyebo mbweenga mwalinyumfwa na kamucite bwiinga lyalo shakunwa shamana. Yesu alyeelete wakaunyumfwila nkumbu mukwashi, bunene bunene abo bakalinga kweebana alimwi taakalinga kusuniiwo kwaamba ayi balenshekwe nsoni. Aboobo wakacita caankamiko ncetwabandikaawo kumatalikilo amutwi uyu. Wakaalula maanshi ashika malita 390 kuba waini ubotu. Cilyeelete kwaamba ayi Yesu wakapanga waini uunji kwaamba ayi umwi bakaunwe  panembo, na kuulisha kwaamba ayi abo bakalinga kweebana babe amaali aamwi akusebensesha. Ncakutatoonsha kwaamba ayi shibwiinga a nabwiinga bakalumba abuumbi!

10. Ino ngamakani nshi amwi ayandika ngotucana mu Joni capita 2? (Amubone acikope.)

¹⁰ Amuyeeye pamakani amwi ayandika ngotucana mu Joni capita 2. Sa mwabona kwaamba ayi Yesu teshi ngowakatila maanshi munongo sha mabwe? Muciindi cakucita boobo, wakalwiita basebenshi kwaamba ayi batile maanshi munongo sha mabwe. (Vesi 6 a 7) Alimwi Yesu ndyaakaalula maanshi kuba waini, teshi ngowakatola waini umwi kumutanjilili wa bwiinga. Sombi wakalwiita basebenshi kucita boobo. (Vesi 8) Kwiilikaawo, Yesu taakwe kutekula waini umwi mukaapu akuya mukwiimikana kunembo lya bantu, lyalo akulilumbaisha ayi, ‘Amunweeko waini ngondapakanga, munyumfwe mboutoonyumfwika!’

11. Ino caankamiko Yesu ncaakacita cilatwiisha nshi?

¹¹ Ino nshiinshi nsheenga tweeya kuswa ku caankamiko Yesu ncaakacita cakwaalula maanshi kuba waini? Cilatwiisha kuba amubo wakuliceesha. Yesu taakwe kulilumbaisha pa caankamiko ncaakacita; alimwi taakalinga kulilumbaisha pashintu shili shoonse nshaakalinga kucikonsha kucita. Muciindi cakucita boobo, wakalinga kuliceesha akupa kwaamba ayi Baishi balemekwe akulumbaishikwa mushintu shoonse nshaakalinga kucita. (Joni 5:19, 30; 8:28) Na twakonkela cakubonenaako cakwe Yesu kwiinda mukutolelela kuba bantu baliceesha, teshi tukanoolilumbaisha pashintu nshetucikonsha kucita. Shintu shili shoonse nsheenga twacikonsha kucita muncito yakwe Yehova, tatweelete kulilumbaisha sombi kulumbaisha Lesa wesu uli kabotu ngotusebensela. (Jele. 9:23, 24) Tulyeelete kumulumbaisha pashintu shoonse nshetucikonsha kucita mukwiinga taakuwo nceenga twaciita kwakubula lucafwo lwakwe Yehova.​—1 Koli. 1:26-31.

12. Ino ninshila nshi imwi mbweenga twakonkela cakubonenaako cakwe Yesu cakuliceesha? Amwaambe cakubonenaako.

¹² Amuyeeye panshila aimwi mbweenga twakonkela cakubonenaako cakwe Yesu cakuliceesha. Amuyeeye pabukaalo ubu: Munene watola ciindi cilaamfu kucafwilisha musebenshi ucafwilisha wacanike kulibambila likani ndyeshi akaambe ciindi cakutaanguna. Aboobo mukwesu wacanike waamba likani lyayuminisha bamakwesu abenankashi ceebo cakucafwikwa kumunene. Pesule lya mabungano umwi waya kumunene akumulwiita ayi: ‘Mukwesu wacanike waamba kabotu abuumbi likani.’ Sa munene alyeelete kukumbula ayi: ‘Ee, sombi ndakatola ciindi cilaamfu kumucafwa’? Na mpashi inga waliceesha akwaamba ayi: ‘Ncakwiila, waamba kabotu abuumbi’? Na katuliceesha, teshi tunoolilumbaisha pashintu shibotu nshetucitila bamwi. Tulanyumfwa kabotu kushiba ayi Yehova alabona alimwi alalumba pashintu nshetucita. (Amweelanye a Mateyo 6:2-4; Ebu. 13:16) Ncakutatoonsha kwaamba ayi tulasangalasha Yehova na twakonkela cakubonenaako cakwe Yesu cakuliceesha.​—1 Pit. 5:6.

13. Ino nciinshi Yesu ncaakabona ndyaakashika pafwiifwi andabala ya Naini, alimwi ino nshiinshi nshaakacita? (Luka 7:11-15)

¹³ Amubelenge Luka 7:11-15. Amuyeeye pasheeshi shakacitika mu 31 C.E. Yesu wakaya ku Galili mundabala ya Naini iyo yakalinga pafwiifwi andabala ya Shunemu, uko Elisha nkwaakabusha mwaana musankwa wa mwanakashi umwi. (2 Baam. 4:32-37) Yesu ndyaakashika pafwiifwi amwiinjililo wa ndabala, wakabona beshicililo kabaswa mundabala. Bantu bakalinga kucite buumba abuumbi mukwiinga mukalubinje wakafwitwa mwaana musankwa womwibo ngwaakalinga kucite, alimwi alakwe mpaakalinga. Yesu wakeemika beshicililo akucita cintu cilibetele kwaamba ayi acafwe mwanakashi uyu wakalinga kucite buumba—wakabusha mwanaakwe musankwa!  Ici ncaankamiko cakutaanguna pa shaankamiko shotatwe Yesu nshaakacita sha kubusha bantu shaambwa mumabuku a Makani Abotu.

14. Ino ngamakani nshi amwi ayandika ngotucana mu Luka capita 7? (Amubone acikope.)

¹⁴ Amuyeeye pamakani amwi ayandika ngotucana mu Luka capita 7. Sa mwaboona kwaamba ayi Yesu ‘wakabona’ mukalubinje wakalinga kucite buumba, lyalo “wakamunyumfwila nkumbu”? (Vesi 13) Mpashi Yesu wakabona mukalubinje mbwaakalinga kulila ndyaakalinga kuya ceenda pafwiifwi amutuntu wa mwanaakwe. Aboobo wakamunyumfwila nkumbu. Yesu taakwe kweelabo pakunyumfwila nkumbu mukalubinje; sombi wakacitaawo comwi. Alyeelete wakamulwiita muliswi libombu alimwi liyuminisha ayi: “Cileke kulila.” Lyalo Yesu wakabusha mwaana musankwa ‘akumuboosha kuli banyina.’​—Vesi 14 a 15.

15. Ino caankamiko Yesu ncaakacita cilatwiisha nshi?

¹⁵ Ino nshiinshi nsheenga tweeya kuswa ku caankamiko Yesu ncaakacita cakubusha mwaana musankwa wa mukalubinje? Cilatwiisha kutondesha nkumbu kubaabo bacite buumba. Ncakwiila tatucitewo nkusu shakubusha bafu mbuli Yesu mbwaakacita. Sombi inga twakonkela cakubonenaako cakwe Yesu cakutondesha nkumbu kubaabo bakafwitwa shikamukowa na shicibusa kwiinda mukubikila maano kushintu nshebatoyandika. Inga twabatondesha nkumbu kwiinda mukwaamba akucita shintu sheenga shabacafwa akubayuminisha. d (Tus. 17:17; 2 Koli. 1:3, 4; 1 Pit. 3:8) Cimwi ciindi kwaambabo maswi aniini akucita tuntu tumwi tuniini, inga kwabayuminisha abuumbi.

16. Kweelana acikope catondeshekwa, ino nshiinshi nshomweeya kuswa ku shakacitikila nankashi wakafwitwa mwanaakwe mwanakashi?

¹⁶ Amuyeeye pasheeshi shakacitika. Myaaka iniini yaiinda, nankashi umwi ndyaakalinga kumabungano, wakabona nankashi umwi wakalinga pafwiifwi kaalila ndyebakalinga kwiimba. Lwiimbo ulo lwakalinga kwaamba pakulangila nkotucite kwa kubushikwa kwa bafu. Nankashi wakalinga kulila wakafwitwa mwanaakwe mwanakashi. Nankashi ndyaakabona boobo, wakaya kuli nankashi wakafwitwa mwanaakwe akumucata pacifushi, lyalo bakeembila pomwi lwiimbo kushikila lwamana. Pesule lya mabungano, nankashi wakafwitwa mwanaakwe wakaamba ayi: “Ndakalinyumfwa ayi  bamakwesu abenankashi balinsuni abuumbi.” Wakalumba abuumbi kwaamba ayi wakacanikaako kumabungano. Nankashi wakatolelela akwaamba ayi: “Kucanika ku Ŋanda ya Bwaami kulatuyuminisha.” Inga twashoma cakutatoonsha kwaamba ayi Yehova alabona alimwi alalumba pashintu shoonse nshetucita kwaamba ayi tutondeshe nkumbu kubaabo bacite buumba alimwi “batacite cakulangila.”​—Kulu. 34:18, NWT.

17. Ino nshiinshi nshotweeya mumutwi uyu?

¹⁷ Kwiiya makani amu Baibo aamba pa shaankamiko Yesu nshaakacita inga kwatuyuminisha abuumbi. Shaankamiko Yesu nshaakacita shilatwiisha ayi Yehova a Yesu balitusuni abuumbi, Yesu alicite nkusu shakumana mapensho oonse ngotwiindaamo alimwi inga twashoma cakutatoonsha kwaamba ayi shishomesho shibotu nshetutoolangila shilaakukumanishikwa conoono na Bwaami bwakwe Lesa bukatalike kweendelesha pacishi. Ndyetutokwiiya makani aya cakubikila maano, inga twakutumana kuyeeya mbweenga twaba amibo Yesu njaakatondesha. Mpashi ndyemutoocita ciiyo capalwaanu na Kulambila Kwamukwashi, inga mwabika bubaambo bwakwiiya pa shaankamiko ashimwi Yesu nshaakacita. Amubikile maano kubona nsheenga mweeya kuswa ku makani ayo lyalo akulwiitaako bamwi nshomweeya. Na mwacita boobo, mulaakunooba amibandi iyuminisha ndyemutobandika abamwi!​—Loma. 1:11, 12.

18. Ino tulaakwiiya nshi mumutwi utokonkelaawo?

¹⁸ Kumamanino ancito yakwe yakushimikila, Yesu wakacita caankamiko cakweelaako cakubusha muntu pa shaankamiko shotatwe shakubusha bantu nshaakacita shilembetwe mu Baibo. Ano caankamiko ici cakalinga kupuseneeko mukwiinga wakabusha shicibusa wakwe uyo wakalinga mucuumbwe kwanshiku 4. Ino nshiinshi nsheenga tweeya kuswa ku caankamiko ici cilembetwe mulibuku lya Makani Abotu? Alimwi ino nshiinshi nsheenga twaciita kwaamba ayi tuyumye lushomo lwesu mukulangila nkotucite kwa kubushikwa kwa bafu? Tulaakucana shikumbulo kumiipusho iyi mumutwi utokonkelaawo.