1. Ino nshiinshi nshotushomete cakutatoonsha?

 MBULI bantu bakwe Yehova, tulicishi kwaamba ayi alitusuni alimwi alisuni kwaamba ayi tunoosangalala kuba abuumi bubotu kwiindaawo. (Loma. 8:35-39) Alimwi tulashoma cakutatoonsha ayi kukonkela njiisho shamu Baibo kulatucafwa lyoonse. (Isa. 48:17, 18) Ano ino nshiinshi nsheenga twaciita na tutokwiinda mumapensho ngotwatalinga kulangila?

2. Ino ngamapensho nshi ngeenga tweendaamo, alimwi ino kwiinda mumapensho aya inga kwatupa kuliipusha miipusho nshi?

² Basebenshi bakwe Yehova boonse baleenda mumapensho. Kucakubonenaako, umwi mumukwashi wesu inga waamba na kucita cintu ceenga catukalasha. Mpashi tutoociswa bulwashi bunene butoopa kwaamba ayi twaalilwe kucita shiinji muncito yakwe Yehova. Mpashi tutoopenga ceebo ca mapensho acitika cakuteengashila. Na mpashi tutopenshekwa ceebo ca nshetushoma. Ndyetutokwiinda mumapensho mbuli aya mpashi inga twaliipusha ayi: ‘Ino nceebonshi ntokwiinda mulipenshi ili? Sa kuli cimwi ncendakabisha? Sa nkokwaamba ayi Yehova taatombikilaako maano?’ Sa amwebo mwakalinyumfwawo kale boobo? Na mboboobo, mutalefuki. Basebenshi baanji bakwe Yehova bashomeka abalo bakalinyumfwawo kale boobo.​—Kulu. 22:1, 2; Abaku. 1:2, 3.

3. Ino lilembo lya Kulumbaisha 34:19 lilatwiisha nshi?

³ Amubelenge Kulumbaisha 34:19. Lilembo ili lyaamba pashiteente shobilo ishi shiyandika: (1) Bantu baluleme baleenda mumapensho aanji. (2) Yehova alatufuna mumapensho esu oonse. Ino Yehova alatufuna buyani? Nshila yomwi mbwaacita boobo nkwiinda mukutucafwa kushiba ayi ndyetuli mucishi cino inga tweenda mumapensho ngotwatalinga kulangila. Yehova wakatushomesha ayi tulaakunosangalala ndyeshi tukanoomusebensela. Nacibi  boobo, taakwe kutushomesha ayi teshi tunookwiinda mumapensho pacecino ciindi. (Isa. 66:14) Alatuyuminisha kubikila maano kubuumi mbweshi bukabe kunembo, paciindi ndyeshi tukekale kwamuyayaya kweelana ambwaasuni. (2 Koli. 4:16-18) Sombi pacecino ciindi alatucafwa kutolelela kumusebensela bushiku abushiku.​—Mali. 3:22-24.

4. Ino tutokwiiya nshi mumutwi uyu?

⁴ Amuleke tubandike nsheenga tweeya kuswa kushakubonenaako sha basebenshi bakwe Yehova bashomeka bakale kale aba munshiku shino. Kweelana ambweshi twiiye, mpashi inga tweenda mumapensho ngotwatalinga kulangila. Sombi na twacinka manungo muli Yehova ananootucafwa lyoonse. (Kulu. 55:22) Ndyeshi tunoobandika pashakubonenaako ishi, munooliipusha ayi: ‘Ino naakwiinga ndime ndakalinga mubukaalo ubu naakwiinga ndakacita buyani? Ino shakubonenaako ishi shancafwa buyani kunooshoma muli Yehova abuumbi? Ino makani aya inga ancafwa buyani mubuumi bwangu?’

5. Ino ngamapensho nshi Jakobo ngakeendaamo ceebo cakutashomeka kwakwe Labani? (Amubone cikope cili papeeji yakutaanguna.)

⁵ Basebenshi bakwe Yehova bakale kale bakeenda mumapensho ngobatakalinga kulangila. Amuyeeye pacakubonenaako cakwe Jakobo. Baishi bakamulwiita kuya mukweebela mumukwashi wakwe Labani, musankwa wakalinga kulambila Lesa. Alimwi baishi bakamulwiita ayi Yehova alaakumupa shoolwe shiinji. (Mata. 28:1-4) Jakobo wakakonkela baishi nshebakamulwiita. Wakaswa ku Kenani akuya kumishaabo Labani, uyo wakalinga kucite baana banakashi bobilo—Leya alimwi a Lakelo. Jakobo wakalinga kusuni Lakelo mwanaakwe Labani mwanikebantu alimwi wakasumina kusebensela Labani kwamyaaka 7 kwaamba ayi amweebe. (Mata. 29:18) Sombi shintu tashina kweenda kweelana a Jakobo mbwaakalinga kulangila. Labani wakacenjeka Jakobo kwiinda mukumupa Leya munenebantu kwaamba ayi eebe nguwe. Labani wakasuminisha Jakobo kweeba Lakelo ndyepakeenda nsondo yomwi. Sombi Jakobo wakalinga kweelete kusebensela Labani myaaka aimwi 7. (Mata. 29:25-27) Alimwi Labani taakwe kucita shintu kweelana ambobakapangana a Jakobo. Aboobo inga twaamba ayi Labani wakacenjeka Jakobo mushintu shoonse kwamyaaka 20!​—Mata. 31:41, 42.

6. Ino ngamapensho nshi amwi Jakobo ngakeendaamo?

⁶ Kuli mapensho aamwi Jakobo ngakeendaamo. Wakalinga kucite mukwashi unene. Nacibi boobo, teshi lyoonse bana bakwe basankwa ndyebakalinga kwikala muluumuno. Alimwi bakoolisha Josefu mukwabo mubusha. Bana bakwe Jakobo basankwa bobilo, Simyoni a Lefi, bakasebaanya mukwashi akusebaanya liina lyakwe Yehova. Kwiilikaawo, Lakelo mwanakashi ngwaakalinga kusuni abuumbi, wakafwa ndyaakalinga kutumbuka mwaana wabili. Alimwi mucishi mwaakalinga kwikala ndyemwakaba nsala inene, Jakobo wakalongela ku Ijipiti, paciindi ici kaali wacembela.​—Mata. 34:30; 35:16-19; 37:28; 45:9-11, 28.

7. Ino Yehova wakatondesha buyani ayi wakalinga a Jakobo?

⁷ Nabi kwaamba ayi Jakobo wakeenda mumapensho oonse aya wakatolelela kushoma muli Yehova alimwi amushishomesho Shakwe. Yehova alakwe wakatondesha ayi wakalinga a Jakobo. Kucakubonenaako, nabi kwaamba ayi Labani wakacenjeka Jakobo, Yehova wakapa kwaamba ayi Jakobo abe ashintu shiinji lwakumubili. Alimwi amuyeeyebo mbwakasangalala akulumba Yehova ndyaakabonana a Josefu mwanaakwe musankwa—uyo ngwakalinga kuyeeya ayi wakafwa! Jakobo wakacikonsha kuliyumya mumapensho oonse aya ceebo cakwaamba ayi wakalinga kucite bushicibusa buyumu a Yehova. (Mata. 30:43; 32:9, 10; 46:28-30) Aswebo na twatolelela kuba abushicibusa buyumu a Yehova, inga twacikonsha kuliyumya ndyetutokwiinda mumapensho ngotwatalinga kulangila.

8. Ino nciinshi Mwaami Defedi ncaakalinga kusuni kucita?

 ⁸ Mwaami Defedi taakwe kucikonsha kucita shoonse nshaakalinga kusuni kucita muncito yakwe Yehova. Kucakubonenaako, Defedi wakalinga kusunishishi kuyaka tempele yakwe Lesa. Wakalwiita mushinshimi Natani nshaakalinga kusuni kucita. Natani wakakumbula Defedi ayi: “Amucite cili coonse ncemutooyeeya mukalango kanu mukwiinga mwebo Lesa ulyaanu.” (1 Maka. 17:1, 2) Amuyeeyebo maswi aya mbwakamuyuminisha Defedi. Alimwi mpashi peenkapo wakatalika kuyeeya mbweshi akayake tempele.

9. Ino Defedi wakacita buyani ndyaakanyumfwa makani akalinga kweelete kumupa kulinyumfwa kulefuka?

⁹ Nacibi boobo, ndyepakeendabo ciindi ciniini, mushinshimi wakwe Yehova wakalwiita Defedi makani akamupa kulinyumfwa kulefuka. “Mashiku eenkaayo,” Yehova wakalwiita Natani ayi Defedi teshi ngweshi akayake tempele; sombi womwi pabana bakwe basankwa ngowakalinga kusa mukucita boobo. (1 Maka. 17:3, 4, 11, 12) Ino Defedi wakacita buyani ndyaakanyumfwa makani aya? Wakayeeya mbweenga wacafwilisha ncito iyi. Wakabikila maano kukubunganya maali ashintu shakalinga kuyandika, Solomoni nshaakalinga kusa mukusebensesha pakuyaka tempele.​—1 Maka. 29:1-5.

10. Ino Yehova wakamushomesha nshi Defedi?

¹⁰ Yehova ndyaakalwiitabo Defedi ayi teshi ngowakalinga kusa mukuyaka tempele, wakapangana cipangano anguwe. Yehova wakashomesha Defedi ayi womwi wa bamulunyungu lwakwe alaakweendelesha kwamuyayaya. (2 Samwe. 7:16) Mubuleelo bwa Myaaka 1,000, Defedi alaakusangalala abuumbi kushiba kwaamba ayi Yesu uyo weshi akanookweendelesha, ngomwi wa bamulunyungu lwakwe! Makani aya alatucafwa kushiba ayi nabi kwaamba ayi inga tatucikoonshi kucita shoonse nshetwalinga kusuni kucita muncito yakwe Yehova, Lesa wesu inga watucitila shintu shimwi shibotu nshetwatalinga kulangila.

11. Ino nshoolwe nshi Beneklistu bakutaanguna nshebakabona nabi kwaamba ayi Bwaami tabuna kusa paciindi ndyebakalinga kubulangila? (Milimo 6:7)

¹¹ Beneklistu bakutaanguna abalo bakalinga kwiinda mumapensho. Kucakubonenaako, bakalinga kusunishishi abuumbi kwaamba ayi Bwaami bwakwe Lesa buse, sombi tabakalinga kucishiiwo ndyebwakalinga kusa mukutalika kweendelesha. (Milimo 1:6, 7) Aboobo ino nshinshi nshebakacita? Bakatolelela kusebensa cankusu muncito yakushimikila. Incito yakushimikila ndyeyakatolelela kuya panembo, bakabona bumboni bwakatondesha ayi Yehova atoobacafwa.​—Amubelenge Milimo 6:7.

12. Ino nshiinshi Beneklistu bakutaanguna nshobakacita ndyekwakalinga nsala?

¹² Paciindi cimwi, kwakaba “nsala inene mucishi coonse.” (Milimo 11:28) Beneklistu bakutaanguna abalo bakakumwa ku nsala iyo. Amuyeeyebo mbobakapenga ceebo ca nsala inene yakalingaako. Ncakutatoonsha kwaamba ayi mitwi ya mikwashi, bakalisukama akuyeeya mbweenga bacanina mikwashi yabo shakulya. Alimwi ino cakaba buyani kubacanike abo bakalinga kusuni kucita shiinji muncito yakushimikila? Sa bakayeeya ayi balindileeko kushikila nsala ikamaane? Tacicite mulandu abukaalo mbobakalingaamo, Beneklistu bakutaanguna bakatolelela kushimikila munshila ili yoonse njeenga bacikonsha alimwi bakalinga kusangalete kupa bashominyinaabo baku Judeya shintu nshobakalinga kucite.​—Milimo 11:29, 30.

13. Ino nshoolwe nshi Beneklistu bakutaanguna nshobakacana ndyekwakalinga nsala?

¹³ Ino nshoolwe nshi Beneklistu bakutaanguna nshobakacana ndyekwakalinga nsala? Abo bakapekwa shakulya bakabona Yehova mbwakabacafwa. (Mate. 6:31-33) Balyeelete bakalinyumfwa kuba pafwiifwi abashominyinaabo abo bakabacafwa. Alimwi abo bakapa shipo na abo bakaabanamo lubasu mukupa lucafwo munshila shimwi, boonse bakaba alusangalalo ceebo cakucafwako bamwi. (Milimo 20:35) Yehova wakabapa shoolwe boonse ndyebakalinga kushibila bukaalo bupya.

14. Ino nshiinshi shakacitikila Banabasi amutumwi Paulo, alimwi ino nshiinshi shakaswaamo? (Milimo 14:21, 22)

 ¹⁴ Liinji Beneklistu bakutaanguna bakalinga kupenshekwa. Cimwi ciindi ishi mpashi shakalinga kucitika paciindi ndyebatakalinga kulangila kupenshekwa. Amuyeeye shakacitikila Banabasi alimwi amutumwi Paulo paciindi ndyebakalinga kushimikila ku Lisitila. Pakutaanguna, bantu bakabatambula kabotu akukutika kuli mbabo. Sombi ndipakeenda ciindi, beshikupikisha “bakayungoola bantu,” alimwi bamwi pabantu abo bakooma Paulo mabwe akumukwelela pansengwe lya ndabala kabayeeya ayi wafwa. (Milimo 14:19) Sombi Banabasi a Paulo bakaya kumusena kumwi akutolelela kushimikila. Ino nshiinshi shakaswaamo? Bakacafwa bantu ‘baanji kuba bashikwiiya’ alimwi cakubonenaako cabo anshebakaamba shakayuminisha bashominyinaabo. (Amubelenge Milimo 14:21, 22.) Baanji bakacafwikwa ceebo cakwaamba ayi Banabasi a Paulo bakatolelela kushimikila nabi kwaamba ayi bakalinga kupenshekwa. Aswebo na twatolelela kusebensa ncito Yehova njaakatupa, alaakutupa shoolwe.

15. Ino nshiinshi nshomweeya kuswa kucakubonenaako ca Mukwesu A. H. Macmillan?

¹⁵ Mwaaka wa 1914 kootana kushika, bantu bakwe Yehova bakalinga kulangila shintu shimwi kucitika. Amuyeeye pacakubonenaako ca Mukwesu A. H. Macmillan. Bweenka mbuli bantu bakwe Yehova baanji paciindi cilya, Mukwesu Macmillan wakalinga kulangila ayi alaakuya kwiculu mumwaaka uyu. Mulikani ndyakaamba mu September 1914, wakaamba ayi: “Mpashi lino ndyelikani lyakweelaako ndyeshi ŋambe.” Sombi cancine ncakwaamba ayi ilyo talyakalinga likani lyakweelaako ndyaakaamba. Mukuya kwaciindi, Mukwesu Macmillan wakalemba ayi: “Mpashi sobamwi twakeengana kuyeeya ayi tulaakuya kwiculu peenkapo.” Wakeelikaawo akwaamba ayi: “Ncetwakalinga kuyandika kucita nkutolelela kuba ashakucita shiinji muncito ya Mwaami.” Alimwi ncakwiila Mukwesu Macmillan wakaba ashakucita shiinji muncito ya Mwaami mukwiinga wakalinga kusebensa cankusu muncito yakushimikila, wakalinga kucite coolwe cakuyuminisha bamakwesu baanji bakaangwa ceebo cakukaka kunjila busoja alimwi wakatolelela kucanika kumabungano nabi ndyakacembela. Ino kuba ashakucita shiinji muncito yakwe Yehova kwakamucafwa buyani Mukwesu Macmillan ndyaakalinga kulindila kutambula cilambu cakwe? Mu 1966 ndyekwakacaalabo paniini kwaamba ayi afwe, wakalemba ayi: “Kushika apacecino ciindi lushomo lwangu lwatolelela kuba luyumu.” Ici ncakubonenaako cibotu ncotweelete kukonkela bunene bunene na tutoliyumya mulipenshi limwi kwaciindi cilaamfu kwiinda ambotwalinga kulangila!​—Ebu. 13:7.

16. Ino mbukaalo nshi ba Herbert Jennings abakaabo mbobakeendaamo ubo mbobatakalinga kulangila? (Jemusi 4:14)

¹⁶ Bantu bakwe Yehova baanji balaciswa malwashi ngobatalinga kulangila. Kucakubonenaako, mumakani aamba pashakacitika mubuumi bwakwe, Mukwesu Herbert Jennings wakasansulula mbwaakalinga kusangalala pomwi amukaakwe kusebensa mbuli bamishonali mucishi ca Ghana. Sombi mukuya kwaciindi, bakamucana abulwashi bwa kabukishi. Mukwesu Jennings wakaamba maswi ngotucana pa Jemusi 4:14, akusansulula ayi ubu mbulwashi mbwatakalinga kulangila kuciswa. (Amubelenge.) Wakalemba ayi: “Twakalinga kweelete kusumina bukaalo mbotwakalingaamo. Aboobo twakasalawo kuswaako ku Ghana akushiya beshicibusa baanji mbotwakalinga kunyumfwanabo akuya ku Canada [mukushilikwa].” Yehova wakacafwa Mukwesu Jennings amukaakwe, kutolelela kumusebensela cakushomeka nabi kwaamba ayi bakalinga kwiinda mumapensho.

17. Ino cakubonenaako ca Mukwesu Jennings cakabacafwa buyani bashominyineesu bamwi?

¹⁷ Maswi akuteenda mweela Mukwesu Jennings  ngakaamba mumakani aamba pashakacitika mubuumi bwakwe, akacafwa bamwi abuumbi. Nankashi umwi wakalemba ayi: “Nshina kuyuminishikwaawo kale mbuli mbondakayuminishikwa ndyendakabelenga makani aya. . . . Kubelenga makani aamba pa Mukwesu Jennings mbwaakasalawo kucileka ncito ya bumishonali kwaamba ayi abikile maano kukushilikwa, kwakancafwa kutanoolinyumfwa cibiibi pashintu nshendakasalawo kucita.” Mukwesu umwi alakwe wakalemba ayi: “Ndakasebensa mbuli munene kwamyaaka 10, sombi ndakacileka ceebo cakwaamba ayi ndakatalika kuciswa bulwashi bwaku boongo ubo bwakalinga kumpa kutanoyeeya kabotu. Kulinyumfwa ayi taakuwo mbombete kwakalinga kumpa kulinyumfwa cibiibi abuumbi cakwaamba ayi ndakalinga kwaalilwa akubelenga makani akalinga kwaamba pashakacitika mubuumi bwa basebenshi bakwe Yehova. . . . Sombi kubona Mukwesu Jennings mbwaakatolelela kuliyumya, kwakanjuminisha abuumbi.” Makani aya alatwiibalusha ayi na twatolelela kuliyumya ndyetutokwiinda mumapensho ngotwatalinga kulangila, inga twayuminisha bamwi. Nabi kwaamba ayi shintu tashina kuba kweelana ambotwalinga kulangila, bamwi inga bakonkela cakubonenaako cesu cakutondesha lushomo akuliyumya.​—1 Pit. 5:9.

18. Kweelana acikope catondeshekwa, ino nshiinshi nshomweeya kuswa kucakubonenaako ca mukalubinje waku Nigeria?

¹⁸ Mapensho acitika cakuteengashila mbuli bulwashi bwa COVID-19, atokuma bantu bakwe Yehova baanji. Kucakubonenaako, nankashi umwi mukalubinje ukala kucishi ca Nigeria taakalinga kuciteewo maali alimwi ashakulya shikwene. Bushiku bumwi macuunsa, mwanaakwe mwanakashi wakamwiipusha nsheshi balye, pesule lyakuteleka kaapu yomwibo ya laisi njebakalinga kucite. Nankashi wakalwiita mwanaakwe ayi tabaciteewo maali nabi shakulya shili shoonse shakacaalako. Sombi wakamulwiita ayi batokonkela cakubonenaako ca mukalubinje waku Salefati kwiinda mukuteleka shakulya shakweelaako nshobakalinga kucite, lyalo akucinka manungo muli Yehova cakumaninina. (1 Baam. 17:8-16) Kabatana kutalika  akuyeeya nsheshi balye malumwi bushiku bulya, bakatambula shakulya kuswa kubashominyinaabo. Shakalinga shiinji cakwaamba ayi shakatola nsondo shobilo na kwiindaawo. Nankashi wakaamba ayi taakwe kushiba Yehova mbwaakalinga kukutika cakubikila maano kumaswi ngaakalwiita mwanaakwe mwanakashi. Ncakwiila, na twashoma muli Yehova ndyetutokwiinda mumapensho ngotwatalinga kulangila, inga twaba abushicibusa buyumu anguwe.​—1 Pit. 5:6, 7.

19. Ino nkupenshekwa kwabuyani Mukwesu Aleksey Yershov nkwatolelela kuliyumya?

¹⁹ Mumyaaka yaconoono, bamakwesu abenankashi baanji batolelela kuliyumya ndyebatopenshekwa nabi kwaamba ayi tabakalinga kulangila kupenshekwa. Amuyeeye pacakubonenaako ca Mukwesu Aleksey Yershov, ukala ku Russia. Bakamboni Bakwe Yehova bakalinga kucite lwaanguluko lwakulambila Yehova mucishi ici, paciindi Mukwesu Yershov ndyaakabombekwa mu 1994. Nacibi boobo, ndyepakeenda myaaka shintu shakaaluka mucishi ca Russia. Mu 2020, bakapokola bakesa mukupikita muŋanda ya Mukwesu Yershov akumunyaya shintu shiinji nshaakalinga kucite. Ndipakeenda myeenshi iinji, mfulumeende yakamubekesha milandu iinji. Alimwi cakeendawo kubica ncakwaamba ayi milandu njobakabekesha mukwesu uyu, nceebo cakwaamba ayi kwamwaaka omwi na kwiindaawo, muntu umwi wakalinga kutondesha ayi alisuni kwiiya Baibo wakalinga kukopa mavidyo kwaamba ayi bape mulandu mukwesu uyu. Muntu uyo wakacita cintu cibiibi abuumbi!

20. Ino nshiinshi Mukwesu Yershov nshaakacita kwaamba ayi ayumye bushicibusa bwakwe a Yehova?

²⁰ Sa kuli shibotu shili shoonse shakaswaamo mukupenshekwa kwa Mukwesu Yershov? Ee. Bushicibusa bwakwe a Yehova bwakayuminaako. Wakaamba ayi: “Liinji tulapaila pomwi amukaangu.” Wakeelikaawo akwaamba ayi: “Inga nshicikoonshi kuliyumya mubukaalo ubu kwakubula lucafwo lwakwe Yehova. Kucita ciiyo capalwaangu kulancafwa kukoma kulefuka. Ndakutumana kuyeeya pashakubonenaako sha basebenshi bakwe Yehova bashomeka bakale kale. Mu Baibo muli makani aanji atondesha kuyandika kwa kukalika moyo akutolelela kushoma muli Yehova.”

21. Ino nshiinshi nshotweeya mumutwi uyu?

²¹ Ino nshiinshi nshotweeya mumutwi uyu? Mucishi cino, tuleenda mumapensho ngotwatalinga kulangila. Nacibi boobo, lyoonse Yehova alacafwa basebenshi bakwe na bashoma muli nguwe. Bweenka lilembo paswa mutwi uyu mbolyaamba, ‘muntu ululeme uleenda mumapensho aanji, sombi Yehova ulamufuna mumapensho akwe oonse.’ (Kulu. 34:19) Atutolelele kubikila maano kulucafwo Yehova ndwaatupa, muciindi cakubikila maano kumapensho ngotutokwiindaamo. Lyalo tulaakwaamba bweenka mbuli mutumwi Paulo uyo wakaamba ayi: ‘Ndakonsha kucita shintu shoonse kwiinda muli wooyo umpa nkusu.’​—Filip. 4:13.