1. Ino bantu bakwe Yehova bakalinga kutanjililwa buyani muciindi ca Beneklistu bakutaanguna?

 NA YEHOVA wapa bantu bakwe ncito, alasuna kwaamba ayi baisebensa munshila ibambitwe kabotu. (1 Koli. 14:33) Kucakubonenaako, Lesa alisuni kwaamba ayi makani abotu ashimikilwe mucishi capanshi coonse. (Mate. 24:14) Yehova wakapa Yesu mukuli wakutanjilila ncito iyi. Alimwi Yesu alashinisha kwaamba ayi incito iyi yacitwa munshila ibambitwe kabotu. Muciindi ca Beneklistu bakutaanguna mabungano ndyaakatalika mumisena ipusenepusene, bamanene bakasalwa kwaamba ayi banoopa butanjilishi akutanjilila mumabungano. (Milimo 14:23) Mu Jelusalemu, likoto litanjilila umo mwakalinga batumwi alimwi abamanene, bakalinga kusalaawo shakucita mabungano oonse nshaakalinga kweelete kukonkela. (Milimo 15:2; 16:4) Ceebo cakukonkela butanjilishi mbobakalinga kutambula, ‘mabungano akatolelela kuyuma mulushomo alimwi bantu bakalinga kufulilaako bushiku abushiku.’—Milimo 16:5.

2. Ino Yehova alabatanjilila buyani bantu bakwe akubapa shakulya shakumushimu kuswabo mu 1919?

² Yehova watolelela kutanjilila bantu bakwe kushika apacecino ciindi. Kuswabo mu 1919, kwiinda mubutanjilishi bwakwe Yehova, Yesu alasebensesha kakoto kaniini ka basankwa bananikitwe kutanjilila ncito yakushimikila akwaabila shakulya shakumushimu ku bashikwiiya bakwe. a (Luka 12:42) Ncakutatoonsha kwaamba ayi Yehova atobapa shoolwe muncito yabo.—Isa. 60:22; 65:​13, 14.

3-4. (a) Amwaambe cakubonenaako citondesha mbotufubilaamo ceebo cakuba abutanjilishi buli kabotu. (b) Ino tutokwiiya nshi mumutwi uyu?

³ Naakwiinga katutacite butanjilishi buli kabotu, naakwiinga  tatukwe kusebensa ncito Yesu njaakatupa. (Mate. 28:​19, 20) Kucakubonenaako, naakwiinga tatuna kupekwa misena kwakushimikila, naakwiinga uli woonse kaashimikilabo kumusena kuli koonse nkwaasuni. Na caba boobo, beshikushimikila inga kabashimikilabo mumisena yomwi ayomwi mankanda aanji, lyalo misena imwi inga kaicalaako kwakubula kuyaako nabibo linkanda lyomwi. Amuyeeye nshila ashimwi mbotufubilaamo ceebo cakuba abutanjilishi buli kabotu.

⁴ Bweenka Yesu mbwaakalinga kutanjilila bashikwiiya bakwe ndyaakalinga pacishi, watolelela kutanjilila bantu bakwe Lesa amunshiku shino. Mumutwi uyu, tutobandika cakubonenaako Yesu ncaakatondesha alibunga lyesu mbolikonkela cakubonenaako cakwe. Alimwi tutobandika ambweenga twatondesha ayi tulashoma libunga lyakwe Yehova.

LIBUNGA LYESU LILAKONKELA CAKUBONENAAKO CAKWE YESU

5. Ino ninshila nshi yomwi libunga lyesu mbolikonkela cakubonenaako cakwe Yesu? (Joni 8:28)

⁵ Yesu wakeeya kuswa kuli Baishi bakwiculu shakucita ashakwaamba. Libunga lyakwe Yehova lilakonkela cakubonenaako cakwe Yesu kwiinda mukusebensesha Maswi akwe Lesa kutucafwa kushiba ciluleme acitaluleme akutupa butanjilishi mubuumi bwesu. (Amubelenge Joni 8:28; 2 Timo. 3:​16, 17) Liinji tuleebalushikwa kubelenga akukonkela shaamba Maswi akwe Lesa. Ino kukonkela kululika uku kulatucafwa buyani?

6. Ino ninshila nshi yomwi iyandika abuumbi mbotufubilaamo na katwiiya Baibo?

⁶ Tulafubilaamo abuumbi na katwiiya Baibo kusebensesha mabuku esu. Kucakubonenaako, tulacikonsha kubona na butanjilishi mbotutambula kuswa kulibunga lyakwe Yehova butokweendelana a Baibo nshoyaamba. Na twaboona ayi butanjilishi mbotutambula butokweendelana a Baibo nshoyaamba, tulalishoma abuumbi libunga lyakwe Yehova.—Loma. 12:2.

7. Ino ngamakani nshi Yesu ngaakalinga kushimikila, alimwi ino libunga lyakwe Yehova lilacikonkela buyani cakubonenaako cakwe?

⁷ Yesu wakalinga kushimikila ‘makani abotu a Bwaami bwakwe Lesa.’ (Luka 4:​43, 44) Alimwi Yesu wakapa bashikwiiya bakwe mulawo wakushimikila pa Bwaami bwakwe Lesa. (Luka 9:​1, 2; 10:​8, 9) Munshiku shino, abo boonse bali lubasu lwa libunga lyakwe Yehova balashimikilako bamwi pa Bwaami bwakwe Lesa tacicite mulandu ankobakala na mikuli njobacite mulibunga lyesu.

8. Ino ncoolwe nshi ncotwakapekwa?

⁸ Tulabona ayi ncoolwe kushimikilako bamwi cancine caamba pa Bwaami bwakwe Lesa! Teshi boonse bacite coolwe ici. Kucakubonenaako, Yesu ndyaakalinga pacishi taakwe kusuminisha shibanda kulwiitako bamwi pali nguwe. (Luka 4:41) Munshiku shino, muntu kaatana kutalika kwaabanamo lubasu muncito yakushimikila pomwi abantu bakwe Yehova, alyeelete kunoocita shintu shisangalasha Yehova. Tulatondesha mbotulumba pacoolwe ncotucite kwiinda mukushimikilako bamwi kuli koonse nkotubete na twaba acoolwe cakucita boobo. Bweenka mbuli Yesu, ncotusuni nkushanga akutilila mbuto sha cancine ca Bwaami mumyoyo ya bantu.—Mate. 13:​3, 23; 1 Koli. 3:6.

9. Ino libunga lyesu lilacafwa buyani bantu kushiba liina lyakwe Lesa?

⁹ Yesu wakacafwa bamwi kushiba liina lyakwe Lesa. Yesu ndyaakalinga kupaila kuli Baishi bakwiculu, wakaamba ayi: ‘Ndapa kwaamba ayi bashibe liina lyanu.’ (Joni 17:26) Libunga lyakwe Yehova lilakonkela cakubonenaako cakwe kwiinda mukucita nsheenga lyacikonsha kucafwa bantu kushiba liina lyakwe Lesa. Nshila yomwi libunga mbolyakacita  boobo nkwiinda mukubamba Baibo ya New World Translation of the Holy Scriptures. Mu Baibo iyi bakaboosha liina lyakwe Lesa mu mbasu shoonse molyakalinga kucanika mu Malembo akutaanguna. Baibo iyi yoonse na lubasu, nkoili mumishobo iindilila 270. Mu lubasu lwa Makani Aayungizyidwe A4 a A5 mu Baibo yamu Chitonga, mulaakucana makani akapa kwaamba ayi babooshe liina lyakwe Lesa mu mbasu molyakalinga. Alimwi mu lubasu lwa Makani Aayungizyidwe A5, muli bumboni buunji butondesha patuba ayi liina lyakwe Lesa lilyeelete kucanika mankanda ali 237 mu Malembo a Bwineklistu amu ciGiliki.

10. Ino nshiinshi nshomweeya kuswa kumaswi ngaakaamba mwanakashi umwi ukala ku Myanmar?

¹⁰ Bweenka mbuli Yesu, tulisuni kucafwa bantu baanji kwaamba ayi bashibe liina lyakwe Lesa. Mwanakashi umwi ucite myaaka 67 ukala ku Myanmar ndyaakashiba liina lyakwe Lesa, wakalila akwaamba ayi: “Ici ncociindi cakutaanguna mubuumi bwangu kushiba ayi liina lyakwe Lesa ngu Yehova. . . . Mwanjiisha cintu ciyandika abuumbi ncondatalinga kulangilawo ayi inga ndeeya.” Kweelana ashakacitikila mwanakashi uyu, kushiba liina lyakwe Lesa inga kwaalula buumi bwa bantu basuni kwiiya.

AMUTOLELELE KUSHOMA LIBUNGA LYESU

11. Ino bamanene inga batondesha buyani ayi balashoma libunga lyakwe Yehova? (Amubone acikope.)

¹¹ Ino ninshila nshi yomwi mbweenga bamanene batondesha ayi balashoma libunga lyakwe Yehova? Na batambula butanjilishi kuswa kulibunga, balayandika kububelenga akucita nsheenga bacikonsha kubukonkela. Kucakubonenaako, tabatambulibo butanjilishi bwa mbweenga batanjilila mabungano alimwi abwa kwaamba mipailo mulibungano, sombi balatambula abutanjilishi bwa mbweenga balama mbelele shakwe Klistu. Na bamanene kabakonkela butanjilishi boonse mbobatambula kuswa ku libunga, bamakwesu abenankashi balalinyumfwa ayi Yehova alibasuni alimwi alababikilako maano.

12. (a) Ino nceebonshi tulyeelete kunoonyumfwila baabo batutanjilila? (Bene Ebulu 13:​7, 17) (b) Ino nceebonshi tulyeelete kubikila maano kushintu nshebacita kabotu abo batutanjilila?

¹² Na twatambula butanjilishi kuswa ku bamanene, tulyeelete kubukonkela amoyo woonse. Kucita boobo kulaakupa kwaamba ayi abo batotanjilila cibabete cuubu kusebensa ncito yabo. Baibo ilatuyuminisha kunyumfwila akulibombya kubaabo batanjilila. (Amubelenge Bene Ebulu 13:​7, 17.) Cimwi ciindi inga catubeta ciyumu kucita boobo. Ino nceebonshi? Nceebo cakwaamba ayi basankwa aba tabamaninite. Nacibi boobo, na katubikila maano kushintu nshebataciti kabotu muciindi cakubikila maano kushintu nshebacita kabotu, ingayi tutocafwa balwani besu. Munshila nshi? Inga twacileka kushoma libunga lyakwe Lesa, alimwi ico balwani besu ncobasuni ayi tucite. Ino nshiinshi nsheenga twaciita kwaamba ayi tushibe akukaka bubeshi balwani besu mbobaamba?

MUTASUMINISHI BAMWI KUMUPA KUCILEKA KUSHOMA LIBUNGA LYAKWE YEHOVA

13. Ino balwani bakwe Lesa baleelesha buyani kupa kwaamba ayi bamwi banoobona anga libunga lyakwe talibete kabotu?

¹³ Abo bapikisha Lesa baleelesha kupa kwaamba ayi shintu shibotu libunga lyakwe nsholicita shiboneke anga nshibiibi. Kucakubonenaako, twakeeya kuswa mu Malembo kwaamba ayi Yehova alalangila basebenshi bakwe kuba babuuya lwakumubili, kuba amibo ibotu akunoomulambila kweelana ambwaasuni. Alatulwiita ayi muntu uli woonse usuni kutolelela kucita shibiibi alimwi utasuni kwaana, taaelete kutolelela kuba mulibungano. (1 Koli. 5:​11-13; 6:​9, 10) Tulakonkela mulawo uyu  wamu Malembo. Sombi ceebo cakwaamba ayi tulakonkela mulawo uyu, abo batupikisha balaamba ayi bantu tatubasuniiwo, tulababona ayi mbeshi shibiibi alimwi ayi tatusumini kuba pomwi abantu bacita shintu munshila ipuseneeko.

14. Ino ngani upa kwaamba ayi bantu banokwaamba makani akubeca palibunga lyakwe Yehova?

¹⁴ Amushibe utolwana libunga lyesu. Satana Diabolosi ngoyuminisha makani akubeca oonse aambwa palibunga lyesu. “Ngoishi wa bubeshi.” (Joni 8:44; Mata. 3:​1-5) Aboobo inga twalangila ayi Satana alaakusebensesha balwani besu kwaamba makani akubeca palibunga lyakwe Yehova. Ishi nshoshakacitika muciindi ca Beneklistu bakutaanguna.

15. Ino nshiinshi bamatanjilili babupailishi nshobakacita kuli Yesu aku bashikwiiya bakwe?

¹⁵ Nabi kwaamba ayi Yesu Mwanaakwe Lesa wakalinga kumaninite alimwi wakacita shaankamiko, Satana wakasebensesha bantu bamwi kwaamba makani aanji akubeca pali nguwe. Kucakubonenaako, bamatanjilili babupailishi bakalinga kulwiita bantu ayi nkusu Yesu nshaakalinga kucite shakutanda shibanda shakalinga kuswa ku ‘mwaami wa shibanda.’ (Maako 3:22) Yesu ndyebakalinga kumoombolosha, bamatanjilili babupailishi bakamubekesha ayi alacobola Lesa alimwi bakayunga bantu kwaamba ayi bamucaaye. (Mate. 27:20) Mukuya kwaciindi, bashikwiiya bakwe Klistu ndyebakalinga kushimikila makani abotu, abo bakalinga kubapikisha ‘bakayungoola bantu’ kwaamba ayi batalike kupensha Beneklistu abo. (Milimo 14:​2, 19) Kwaamba palilembo lya Milimo 14:​2, Njashi Yamulindilishi ya December 1, 1998, yakaamba ayi: “Abo bakalinga kulubasu lwakwe Satana bakakaka makani Beneklistu ngobakalinga kushimikila alimwi bakaamba shintu shibiibi abuumbi pali mbabo kwaamba ayi bantu babapaate alimwi bacileeke kubakutika.”

16. Ino nshiinshi nshotweelete kunokwiibaluka na twanyumfwa makani akubeca?

 ¹⁶ Satana watolelela kubeca bantu kushika apacecino ciindi. ‘Atocenjeeka bantu boonse mucishi capanshi.’ (Ciyu. 12:9) Na mwanyumfwa makani akubeca aambwa palibunga lyesu apa bamakwesu batotanjilila, munokwiibaluka balwani bakwe Lesa nshobakacita kuli Yesu aku Beneklistu bamuciindi ca batumwi. Munshiku shino, bantu bakwe Yehova batopenshekwa alimwi bamwi batokwaamba makani akubeca pali mbabo bweenka Baibo mboyakaambila limwi. (Mate. 5:​11, 12) Teshi tukashome makani akubeca na twashiba kutooswa makani ayo alimwi a na twacitawo comwi cakufwambaana kwaamba ayi tulishitilishe. Ino inga twacita buyani kwaamba ayi tulishitilishe?

17. Ino inga twacita buyani kwaamba ayi tutashomi makani akubeca? (2 Timoti 1:13) (Amubone akabokosi kacite mutwi utokwaamba ayi “ Nshotweelete Kucita na Twanyumfwa Makani Akubeca.”)

¹⁷ Amukake makani akubeca. Mutumwi Paulo wakaamba cakuteenda mweela nshotweelete kucita na twanyumfwa makani akubeca. Wakalwiita Timoti ayi alwiite bamwi ‘kucileka . . . kubikila maano kumakani akubeca’ alimwi akuswaako ‘kushintu isho shili anga ntulabi shitacite ncito.’ (1 Timo. 1:​3, 4; 4:7) Amuyeeye paceeci: mwaana muniini inga wabwesa cintu camatombe panshi akucibika mukanwa, sombi muntu munene inga tacitiiwo cintu camushobo uyo mukwiinga alicishi ayi inga waciswa. Tulakaka kukutika makani akubeca mukwiinga tulicishi nkwaaswa. Muciindi cakucita boobo, tulakutikabo ku “maswi alushinisho.”—Amubelenge 2 Timoti 1:13.

18. Ino inga twatondesha buyani ayi tulashoma libunga lyakwe Yehova?

¹⁸ Twabandikabo nshila shotatwe panshila shiinji libunga lyakwe Lesa mbolikonkela cakubonenaako cakwe Yesu. Ndyemutokwiiya Baibo, amweeleshe kucana nshila ashimwi libunga lyakwe Lesa mbolikonkela cakubonenaako cakwe Yesu. Amucafwe bamwi mulibungano kunooshoma mu libunga lyakwe Yehova abuumbi. Alimwi amutolelele kutondesha ayi mulashoma libunga, kwiinda mukusebensela Yehova cakushomeka akutolelela kuba mu libunga ndyaatosebensesha kukumanisha kuyanda kwakwe. (Kulu. 37:28) Atutolelele kutondesha kulumba pacoolwe ncotucite cakuba lubasu lwa bantu bakwe Yehova batondesha lusuno alimwi bashomeka.