1. Ino Yehova alatulangila kucita nshi?

 BUSHIKU mwaana ndyaashalwa, beebene balasangalala abuumbi. Nacibi boobo, nabi kwaamba ayi bashali balimusuni abuumbi mwanaabo uyo washalwa, tabasuni kwaamba ayi anoolibo kateta. Alimwi cancine ncakwaamba ayi inga balisukama abuumbi na mwaana uyo kaatakuli. Yehova alakwe alasangalala na twacitawo comwi akuba bashikwiiya bakwe Yesu, sombi taasuniiwo kwaamba ayi tunoolibo bakateta lwakumushimu. (1 Koli. 3:1) Alisuni kwaamba ayi tube Beneklistu “bamanene” na bashimpite lwakumushimu.—1 Koli. 14:20.

2. Ino tutokwiiya nshi mumutwi uyu?

² Ino kuba Mwineklistu ushimpite lwakumushimu cilaamba nshi? Ino nshiinshi nsheenga twaciita kwaamba ayi tube Mwineklistu ushimpite lwakumushimu? Ino shakulya shiyumuyumu shakumushimu inga shatucafwa buyani kuya panembo lwakumushimu? Alimwi ino nceebonshi tulyeelete kutolelela kweelesha kuba Mwineklistu ushimpite lwakumushimu? Tutocana shikumbulo kumiipusho iyi mumutwi uyu.

INO KUBA MWINEKLISTU USHIMPITE LWAKUMUSHIMU CILAAMBA NSHI?

3. Ino nshiinshi nsheenga twaciita kwaamba ayi tube “bamanene” na Beneklistu bashimpite lwakumushimu?

³ Mu Baibo, liswi lyamu ciGiliki lyakasansululwa ayi “bamanene,” inga lyasansulula amuntu ‘ushimpite.’ a (Efe. 4:​13, NWT) Aboobo bweenka mwaana muniini mbwaatolelela kukomena kushikila waba munene, aswebo tulyeelete kutolelela kuyumya bushicibusa bwesu a Yehova. Na twacita boobo tulaba Beneklistu  bashimpite lwakumushimu. Nacibo boobo, nabi kwaamba ayi twaba Mwineklistu ushimpite lwakumushimu, tulyeelete kutolelela kuya panembo. (1 Timo. 4:15) Alimwi soonsebo, kwiilikaawo abacanike, inga twaba Beneklistu bashimpite lwakumushimu. Ano ino inga twashiba buyani na tulishimpite lwakumushimu?

4. Ino Mwineklistu ushimpite lwakumushimu ngu muntu uli buyani?

⁴ Mwineklistu ushimpite lwakumushimu ngumuntu ukonkela milawo yakwe Lesa yoonse. Alimwi taacitibo shintu nshaasuni. Kwalo, inga wacita shilubo ceebo cakwaamba ayi taamaninite. Sombi bushiku abushiku alacita nsheenga wacikonsha kwaamba ayi anoyeeya akucita shintu Yehova nshaasuni. Wakafwala buntu bupya alimwi aleelesha cankusu kunoyeeya bweenka mbuli Yehova mbwayeeya. (Efe. 4:​22-24) Wakaliisha kunoosala kabotu shakucita sheendelana amilawo anjiisho shakwe Yehova, aboobo taayandiki kuba amulongo wa milawo njaaelete kukonkela. Na wasala shakucita, aleelesha cankusu kushikumanisha.—1 Koli. 9:​26, 27.

5. Ino nshiinshi sheenga shacitikila Mwineklistu utashimpite lwakumushimu? (Bene Efeso 4:​14, 15)

⁵ Ano mubupusano, Mwineklistu utashimpite lwakumushimu ncuubu kucenjeekwa ku “kwiisha kwa bantu babeshi” a “mumilaka ya bucenjeshi.” Inga washoma makani atashibikitwe na ngancine aambwa panyusi, akushoma makani akubeca aamba baabo bakapondoka kuswa mucancine. b (Amubelenge Bene Efeso 4:​14, 15.) Inga kaanyumfwila munyono bamwi, kwaambana abamwi na kufwambaana kukalala. Alimwi liinji inga wacita cintu citabete kabotu na weeleshekwa.—1 Koli. 3:3.

6. Ino nceebonshi inga twakoshanisha kukomena lwakumushimu ku mwaana mbwaakomena? (Amubone acikope.)

⁶ Kweelana ambotwaambaawo, Malembo alakoshanisha kukomena lwakumushimu ku mwaana mbwaakomena. Kuli shintu shiinji mwaana nshatacishiiwo, aboobo alayandika munene wa kumushitilisha akumutanjilila. Kucakubonenaako, mushali mwanakashi inga walwiita mwanaakwe mwanakashi muniini kwaamba ayi amucatilile kulyaansa ndyebatosotoka nshila mwiinda myotoka. Mwaana ndyaatoya cikomena, banyina inga bamuleka kusotoka nshila kwakubula kumucatilila, sombi inga bamwiibalusha ayi alyeelete kulanga koonse kobilo na takutoosa motoka pafwiifwi. Na mwaana wakomena, alashiba mbwaaelete kusotoka nshila.  Bweenka baana baniini mboyandika lucafwo kuswa ku muntu munene kwaamba ayi batalicani mumapensho, Beneklistu batashimpite lwakumushimu abalo balayandika lucafwo kuswa ku Beneklistu bashimpite lwakumushimu kwaamba ayi baleye cili coonse ceenga canyonyoola bushicibusa bwabo a Yehova akunoosala kabotu shakucita. Ano mubupusano, Beneklistu bashimpite lwakumushimu ndyebatosalawo shakucita, balayeeya cakubikila maano Baibo nshoyaamba kwaamba ayi bashibe Yehova mbwayeeya. Lyalo balasalawo kucita shintu shili kabotu.

7. Sa Beneklistu bashimpite lwakumushimu balayandika lucafwo kuswa kubamwi?

⁷ Ano sa ici cilaamba ayi Mwineklistu ushimpite lwakumushimu tayandiki lucafwo kuswa kubamwi? Sobwe. Cimwi ciindi Beneklistu bashimpite lwakumushimu abalo balayandika kusenga lucafwo. Sombi Mwineklistu utashimpite lwakumushimu alalangila bamwi kumulwiita shakucita na kumusalilako shakucita nshayandika kusalawo mwiine. Nacibi boobo, na Mwineklistu ushimpite lwakumushimu wasenga lucafwo kubamwi bacite busongo alushibo, alicishi ayi alyeelete kulisalila shakucita ‘akulinyamwita mukuli wakwe.’—Gala. 6:5.

8. Ino Beneklistu bashimpite lwakumushimu balipusene buyani?

⁸ Bweenka mbuli bantu bamanene mbobapusene mbobaboneka, Beneklistu bashimpite lwakumushimu balapusanapusana mbobatondesha mibo mbuli busongo, bwaabi alimwi akuyeeyelako bamwi. Kwiilikaawo, na Beneklistu bobilo bashimpite lwakumushimu balicana mubukaalo bukoshenye, inga basalawo kucita shintu shipusene sombi sheendelana anjiisho shamu Baibo. Ubu liinji mbociba ku Beneklistu na batosalawo shakucita kweelana anjeelacaamba yabo. Aboobo taboomboloshi bamwi na basalawo kucita shintu shipusene anshobasala. Muciindi cakucita boobo, balabikila maano ku kutolelela kuba bacatene.—Loma. 14:10; 1 Koli. 1:10.

NSHEENGA TWACIITA KWAAMBA AYI TUBE MWINEKLISTU USHIMPITE LWAKUMUSHIMU

9. Sa inga twakomena lwakumushimu kwakubula kucitawo comwi? Amusansulule.

⁹ Mukuya kwaciindi mwaana alakomena, sombi taakuwo weenga wakomena lwakumushimu kwakubula kucitawo comwi. Kucakubonenaako, Beneklistu baku Kolinto bakasumina makani abotu, bakabombekwa, bakatambula mushimu usalashi alimwi bakeeya shiinji kusheesho mutumwi Paulo nshaakabaiisha. (Milimo 18:​8-11) Nacibi boobo, nabi pesule lyakwaamba ayi peenda myaaka kuswa ndyebakabombekwa, baanji tabakalinga kushimpite lwakumushimu. (1 Koli. 3:2) Ino inga twacita buyani kwaamba ayi camushobo uyu citakatucitikili?

10. Ino nshiinshi nshotweelete kucita kwaamba ayi tube Mwineklistu ushimpite lwakumushimu? (Judi 20)

¹⁰ Kwaamba ayi tube Beneklistu bashimpite lwakumushimu, tulyeelete kutaanguna kusunishisha kucita boobo. Abo ‘basuni kubula lushibo,’ alimwi basuni kutolelela kuba bakateta lwakumushimu, balakwaalilwa kuba Beneklistu bashimpite lwakumushimu. (Tus. 1:22) Tatusuni kuba anga ngu muntu munene ucinka manungo mu bashali bakwe kwaamba ayi banoomusalila shakucita. Muciindi cakucita boobo, tulisuni kutolelela kuyumya bushicibusa bwesu a Yehova sobeene. (Amubelenge Judi 20.) Na mutokweelesha kuba Mwineklistu ushimpite lwakumushimu, amupaile kuli Yehova kwaamba ayi amupe ‘kusuna ankusu shakucita’ boobo.—Filip. 2:13.

11. Ino nshiinshi Yehova nshaatupa kwaamba ayi atucaafwe kuba Beneklistu bashimpite lwakumushimu? (Bene Efeso 4:​11-13)

¹¹ Yehova taatulangili kuba Beneklistu bashimpite lwakumushimu palweesu sobeene. Wakatupa beembeshi abashikwiisha mulibungano kwaamba ayi batucaafwe kuba “bamanene” lwakumushimu akuba “bwakalinga Klistu.” (Amubelenge Bene Efeso 4:​11-13.) Alimwi Yehova alatupa mushimu usalashi kwaamba ayi atucaafwe  kuba a “miyeeyo yakwe Klistu.” (1 Koli. 2:​14-16) Kwiilikaawo, Yehova wakatupa mabuku a Makani Abotu kwaamba ayi atucaafwe kushiba Yesu mbwaakalinga kuyeeya, kwaamba akucita shintu ndyaakalinga pacishi. Na kamuyeeya akucita shintu bweenka mbuli Yesu, mulaakuba Mwineklistu ushimpite lwakumushimu.

SHAKULYA SHIYUMUYUMU SHAKUMUSHIMU MBOSHITUCAFWA KUYA PANEMBO LWAKUMUSHIMU

12. Ino ‘njiisho shakutaanguna shapali Klistu’ nshiinshi?

¹² Cimwi ncotweelete kucita kwaamba ayi tube Beneklistu bashimpite lwakumushimu, nkuteelabo pakushiba ‘nshetwakataanguna kwiiya shapali Klistu.’ Njiisho shimwi nshetwakataanguna kwiiya shileelikawo kwaana, lushomo, kubombekwa akubushikwa kwa bafu. (Ebu. 6:​1, 2) Ishi ni njiisho shimwi shakutaanguna Beneklistu boonse nshobashoma. Aboobo Pita wakaamba panjiisho ishi ndyaakalinga kushimikila kubantu baanji pabushiku bwa Pentekositi. (Milimo 2:​32-35, 38) Tulyeelete kushoma njiisho ishi shakutaanguna kwaamba ayi tube bashikwiiya bakwe Klistu. Kucakubonenaako, Paulo wakaamba ayi na katutashomi mukubushikwa kwa bafu, inga tatubi bashikwiiya bakwe Klistu. (1 Koli. 15:​12-14) Tulyeelete kwiiiya shiinji kwaamba ayi tube Beneklistu bashimpite lwakumushimu, kuteshi kweelabo pakwiiya njiisho shakutaanguna.

13. Ino nshiinshi nshotweelete kucita kwaamba ayi tunoofubilaamo mu shakulya shiyumuyumu shakumushimu shaambwa pa Bene Ebulu 5:14? (Amubone acikope.)

¹³ Mubupusano anjiisho shakutaanguna, shakulya shiyumuyumu shakumushimu teshibo milawo yakwe Yehova, sombi shileelikaawo anjiisho shakwe isho shitucafwa kunyumfwishisha mbwayeeya. Kwaamba ayi tufubileemo mu shakulya ishi, tulyeelete kunokwiya, kukutumana kuyeeyawo akukonkela nshetutokwiiya mu Maswi akwe Lesa. Na katucita boobo, tuleeya kunoosala kucita shintu shisangalasha Yehova. c—Amubelenge Bene Ebulu 5:14.

14. Ino Paulo wakabacafwa buyani Beneklistu baku Kolinto kwaamba ayi bakomene lwakumushimu?

¹⁴ Beneklistu batashimpite lwakumushimu cilababeta ciyumu kusala kabotu shakucita na taakuwo mulawo wamu Baibo ngweenga bakonkela. Na taakuwo mulawo wamu Baibo, bamwi balalinyumfwa ayi inga bacita cili coonse ncobasuni. Bamwi balasuna kupekwa mulawo, nabi kwaamba ayi mulawo tautoyandika.  Kucakubonenaako, Beneklistu baku Kolinto bakasenga Paulo kwaamba ayi abape mulawo na inga balya shakulya shakapekwa ku shibumbwabumbwa nabi sobwe. Muciindi cakubalwiita shakucita, Paulo wakabalwiita ayi shintu shimwi inga basebensesha njeelacaamba yabo alimwi muntu womwi awomwi alicite “lwaanguluko” lwakulisalila shakucita. Wakabalwiita njiisho shamu Baibo sheenga shabacafwa kusala kucita shintu sheenga shapa kwaamba ayi njeelacaamba itanobapensha akutaba mfumpu kubamwi. (1 Koli. 8:​4, 7-9) Aboobo Paulo wakalinga kucafwa Beneklistu baku Kolinto kwaamba ayi bakomene lwakumushimu akunosebensesha nkusu shabo shakuyeeya muciindi cakunocinka manungo mumuntu umwi na kusuna kunoopekwa milawo.

15. Ino Paulo wakabacafwa buyani Beneklistu bene Ebulu kwaamba ayi baye panembo lwakumushimu?

¹⁵ Tuleeya ciiyo acimwi ciyandika kuswa ku makani Paulo ngaakalembela Beneklistu bene Ebulu. Bamwi bakalinga bacileka kuya panembo lwakumushimu; bakalinga ‘baboolela mwisule akuba bantu bayandika mukupa, kuteshi shakulya shiyumuyumu’ shakumushimu. (Ebu. 5:​12, NWT) Tabakalinga kwiiya akusumina shintu shipya Yehova nshaakalinga kubaiisha kwiinda mulibungano. (Tus. 4:18) Kucakubonenaako, baJuda baanji bakalinga kukonkela Milawo yakwe Mose nabi kwaamba ayi paciindi ici kapendite myaaka pafwiifwi a 30 kuswa ciindi Milawo ndyeyakacileka kusebensa ceebo ca mulambu wakwe Klistu. (Loma. 10:4; Taita. 1:10) Myaaka 30 yakalinga iinji ku Beneklistu aba kwaamba ayi banyumfwishishe ayi tabakalinga kuyandika kunocikonkela Milawo yakwe Mose! Uli woonse wakabelengawo nkalata yakatanjililwa amushimu Paulo njaakalembela bene Ebulu, inga wasumina ayi muli shakulya shiyumuyumu shakumushimu. Nkalata njaakabalembela yakabacafwa kushiba ayi nshila ipya ya bwakulambila Yehova mwiine njaakaabika kwiinda muli Yesu, yakalinga ibotu. Alimwi yakabacafwa kuba bataloondi akutolelela kushimikila nabi ndyebakalinga kupikishikwa ku baJuda.—Ebu. 10:​19-23.

AMUTOLELELE KWEELESHA KUBA MWINEKLISTU USHIMPITE LWAKUMUSHIMU

16. Kwiilika pakuba Mwineklistu ushimpite lwakumushimu, ino nshiinshi nshotweelete kucita?

¹⁶ Tatweelete kweelabo pakusebensa cankusu kuba Mwineklistu ushimpite lwakumushimu, sombi tulyeelete kushinisha kwaamba ayi twatolelela kuba bashimpite lwakumushimu. Aboobo tatweelete kuyeeya ayi tulishimpite lwakumushimu  alimwi tatuyandiki kutolelela kuyumya bushicibusa bwesu a Yehova. (1 Koli. 10:12) Tulyeelete “kulyeelesha” kwaamba ayi tushinishe ayi twatolelela kuya panembo.—2 Koli. 13:5.

17. Ino nkalata Paulo njaakalembela bene Kolose ilatondesha buyani kuyandika kwa kutolelela kuba Beneklistu bashimpite lwakumushimu?

¹⁷ Munkalata njaakalembela bene Kolose, Paulo alimwi wakaamba pakuyandika kwa kutolelela kuba bashimpite lwakumushimu. Nabi kwaamba ayi bene Kolose bakalinga kale Beneklistu bashimpite lwakumushimu, Paulo wakabalwiita ayi bakalinga kweelete kucenjela abuumbi kwaamba ayi batanobecekwa a miyeeyo ya bantu bakucishi. (Kolo. 2:​6-10) Alimwi Epafulasi uyo mpashi wakalinga kubeshi kabotu bamulibungano, wakatolelela kupaila kwaamba ayi ‘bashimpe mulushomo,’ na kuba bashimpite lwakumushimu. (Kolo. 4:12) Ino nciinshi ncetutokwiiyawo? Paulo a Epafulasi boonse bakanyumfwishisha ayi na tulisuni kutolelela kuba bashimpite lwakumushimu tulayandika lucafwo lwakwe Lesa alimwi akutolelela kuyumya bushicibusa bwesu anguwe. Bakalinga kusuni kwaamba ayi bene Kolose batolelele kuba bamanene na Beneklistu bashimpite lwakumushimu, teshi mulandu amapensho ngobakalinga kwiindaamo.

18. Ino nshiinshi sheenga shacitikila Mwineklistu ushimpite lwakumushimu? (Amubone acikope.)

¹⁸ Paulo wakacenjesha bene Ebulu ayi na Mwineklistu ushimpite lwakumushimu wabula kucenjela, inga wanyonyoola bushicibusa bwakwe a Lesa kwamuyayaya. Na kaatasuniiwo kunyumfwila Yehova, inga walitalamusha kuli nguwe abuumbi cakwaamba ayi inga taani alimwi Lesa inga tamulekeleliiwo. Cakabotaako ncakwaamba ayi bene Ebulu tabakalinga mubukaalo bwamushobo uyu. (Ebu. 6:​4-9) Ino mbuyani abo bakaboolela mwisule munshiku shino na abo bakakushikwa mulibungano sombi mukuya kwaciindi bakaana? Na baliceesha akwaana, balatondesha ayi tababete anga mbaabo Paulo mbaakambaawo munkalata njaakalemba, abo beenga banyonyoola bushicibusa bwabo a Lesa kwamuyayaya. Nacibi boobo, na baboolela kuli Yehova balayandika kusumina lucafwo ndwaabapa. (Esek. 34:​15, 16) Bamanene inga balwiita mukwesu nabi nankashi ushimpite lwakumushimu kwaamba ayi abacaafwe kuyumya bushicibusa bwabo a Yehova alimwi.

19. Ino nciinshi ncotusuni kucita?

¹⁹ Na mutokweelesha kuya panembo kwaamba ayi mube Mwineklistu ushimpite lwakumushimu, inga mwacikonsha kucita boobo! Amutolelele kulya shakulya shiyumuyumu shakumushimu akunokweelesha kuyeeya bweenka mbuli Yehova mbwayeeya. Alimwi na muli kale Mwineklistu ushimpite lwakumushimu, amutolelele kuba bweenka ubo kwamuyayaya.