1. Ino paladaiso yakumushimu nciinshi, alimwi ino nciinshi ncotweelete kuba bashinishite kucita?

 MUNSHIKU shino, pacishi pali paladaiso yacikoshanyo muli bantu baanji batoocita shintu shiinji shibotu. Bantu baanji baliimo balicite luumuno lwancinencine. Abo bali kale mu paladaiso iyi, balishinishite kutaswaamo. Alimwi balisuni kwaamba ayi bantu baanji basalewo kuba mu paladaiso iyi. Ino ni paladaiso nshi? Ni paladaiso yakumushimu! a

2. Ino nciinshi cikankamika pa paladaiso yakumushimu?

² Munshila ikankamika, Yehova wakabamba musena wacikoshanyo bantu bakwe mobekala muluumuno alimwi mulucatano, nabi kwaamba ayi bali mucishi cakwe Satana cibiibi alimwi ciloondesha, umo bantu mobatasunene. (1 Joni 5:19; Ciyu. 12:12) Lesa wesu shilusuno alabona cishi cino mbocinyonyoola bantu, sombi alacafwa basebenshi bakwe kulinyumfwa kushitilishikwa kwaamba ayi batolelele kumusebensela cakushomeka. Maswi akwe alaamba ayi paladaiso yakumushimu ili anga ‘mwakuyuba’ alimwi anga “ngumuunda utililwa kabotu.” (Isa. 4:6; 58:11) Kwiinda mukupekwa shoolwe kuswa kuli Yehova, abo bakala mu paladaiso iyi balisangalete alimwi balalinyumfwa kushitilishikwa munshiku shino shakweelaako shiyumu.—Isa. 54:14; 2 Timo. 3:1.

3. Ino bushinshimi bulembetwe mu Isaya capita 65 bwakakumanishikwa buyani muciindi ca bene Isilaeli?

³ Kwiinda mumushinshimi Isaya, Yehova wakaamba buumi mbobwakalinga kusa mukuba kubaabo bakala mu paladaiso yakumushimu. Inga mwacana maswi Yehova ngaakaamba mu Isaya capita 65, ayo akakumanishikwa ciindi cakutaanguna mu 537 B.C.E. Paciindi cilya, baJuda bakaana bakaangululwa kuswa mubusha mu Babiloni akuboolela kucishi cinemishaabo. Yehova wakapa  shoolwe bantu bakwe akubacafwa kwaamba ayi baboteshe ndabala ya Jelusalemu iyo yakalinga yanyonyoolwa akuyaka cipya tempele umo mobakalinga kulambilila Yehova mu Isilaeli.—Isa. 51:11; Seka. 8:3.

4. Ino bushinshimi bulembetwe mu Isaya capita 65 butokumanishikwa buyani munshiku shino?

⁴ Kukumanishikwa kwabili kwa bushinshimi Isaya mbwaakalemba, kwakatalika mu 1919 C.E. bantu bakwe Yehova ba munshiku shino ndyebakaangululwa kuswa mubusha mu Babiloni Munene. Lyalo paladaiso yakumushimu yakatalika kuya cikomenenaako nsengwe yoonse. Beshikushimikila sha Bwaami basebensa cankusu bakatalika mabungano aanji alimwi bakatolelela kucita nsheenga bacikonsha muncito yakushimikila. Basankwa abanakashi abo bakalinga bakali alimwi bakalinga kucita shintu shibiibi, ‘bakafwala buntu bupya bwakalengwa kweelana akuyanda kwakwe Lesa.’ (Efe. 4:24) Kwalo, shoolwe shiinji Isaya nshaakaambawo shilaakukumanishikwa cancinencine kunembo mucishi cipya. Sombi amunshiku shino kuli shoolwe shiinji nshotucite ceebo cakuba mu paladaiso yacikoshanyo. Amuleke tubandike pashoolwe shimwi nshotucite ancotweelete kutolelela kuba mu paladaiso yakumushimu.

MBOBALINYUMFWA ABO BALI MU PALADAISO YAKUMUSHIMU

5. Kweelana a Isaya 65:​13, ino nshoolwe nshi nshotucite mu paladaiso yakumushimu?

⁵ Tulayuminishikwa akulinyumfwa ayi tutosaninwa kabotu lwakumushimu. Bushinshimi bwakwe Isaya bulatondesha patuba bupusano buliiwo pabuumi bwa baabo bali mu paladaiso yakumushimu abaabo batabeteemo. (Amubelenge Isaya 65:13.) Yehova alapa basebenshi bakwe shoonse nshebayandika lwakumushimu kwaamba ayi batolelele kuba abushicibusa buyumu anguwe. Wakatupa mushimu usalashi, Maswi akwe, alimwi alatupa shakulya shakumushimu shiinji kwaamba ayi ‘tunoolya, . . . tunoonwa, . . . [alimwi] akusangalala.’ (Amweelanye a Ciyubululo 22:17.) Ano mubupusano, abo batabete mu paladaiso yakumushimu ‘balafwabo nsala . . . , balafwabo nyotwa . . . , [alimwi] balalenshekwa nsoni.’ Tabaciteewo bushicibusa a Lesa.—Amosi 8:11.

6. Ino Jowelo 2:​21-24 ilaamba nshi pashipo shimwi Yehova nshaatupa alimwi ino inga shatucafwa buyani?

⁶ Mu bushinshimi Jowelo mbwaakalemba, wakaamba pashintu shiyandika mbuli shili anga ngamaila, waini alimwi amafuta a olifi kwaamba ayi atondeshe ayi Yehova alapa bantu shintu shoonse nshebayandika, kwiilikaawo ashakulya shakumushimu. (Jowe. 2:​21-24) Kucakubonenaako, wakatupa Baibo, mabuku aamba shamu Baibo, webusaiti yesu, kwiilikaawo akubungana kwa nsondo ansondo, kubungana kwalubasu alimwi akubungana kunene. Inga twalya shakulya shakumushimu bushiku abushiku, alimwi na twacita boobo tulayuminishikwa akulinyumfwa ayi tutosaninwa kabotu lwakumushimu.

7. Ino nshiinshi shitupa ‘kukondwa mumyoyo yesu’? (Isaya 65:14)

⁷ Tulasangalala akulinyumfwa kukwana. Bantu bakwe Lesa inga ‘basangalala’ ceebo cakulumba Yehova abuumbi. (Amubelenge Isaya 65:14.) Cancine ciyumya lushomo lwesu, shishomesho shamu Baibo shiyuminisha alimwi akulangila kwancine nkotucite ceebo ca mulambu wakwe Klistu, shilatupa ‘kukondwa mumyoyo yesu.’ Kubandika pamakani aya abashominyineesu kulatusangalasha abuumbi!—Kulu. 34:8; 133:​1-3.

8. Ino ni mibo nshi yobilo iyandika abuumbi njotutondesha mu paladaiso yakumushimu?

⁸ Lusuno alimwi alucatano luli pakati kabantu bakwe Yehova ni mibo yobilo iyandika abuumbi njotutondesha mu paladaiso yakumushimu. (Kolo. 3:14) Ici cilatupa kuyeeyela buumi mbweshi bukabe mucishi cipya, umo basebenshi bakwe Yehova mweshi bakanosunene abuumbi akuba bacatene kwiinda ambocibete pacecino ciindi. Nankashi umwi wakaamba nshaakabona pa bantu bakwe Yehova ciindi  cakutaanguna ndyaakakumanaabo. Wakaamba ayi: “Nshindakalinga kucishiiwo nsheenga ndaciita kwaamba ayi mbe alusangalalo, nabi mbweenga twasangalala mumukwashi wesu. Ciindi cakutaanguna ndyendakabona bantu kabatondeshanya lusuno lwancinencine, nciindi ndyendakabonana a Bakamboni Bakwe Yehova.” Muntu uli woonse usuni kuba alusangalalo akulinyumfwa kukwana, alyeelete kuba mu paladaiso yesu yakumushimu. Tacicite mulandu ansheenga bantu bayeeya pa basebenshi bakwe Yehova, balicite liina lya bulemu na impuwo ibotu, pomwi abaabo boonse balambila Yehova.—Isa. 65:15.

9. Ino Isaya 65:​16, 17 ilatushomesha nshi pamapensho ngotwiindaamo ayo atupa kulinyumfwa cibiibi akupenga?

⁹ Tatulisukami alimwi tulalinyumfwa kukalikana mumoyo. Isaya 65:14 ilaamba ayi abo boonse basalawo kutaba mu paladaiso yakumushimu ‘balalila ceebo cakucisa kwa myoyo yabo akunoolila mibila ceebo ca buumba.’ Ano ino mbuyani pashintu shoonse shicitika shipa kwaamba ayi bantu bakwe Lesa banoolinyumfwa cibiibi akupenga? Mukuya kwaciindi, shintu isho ‘shilaakulubwa alimwi teshi shikabonekeewo tubili mumeenso akwe Lesa.’ (Amubelenge Isaya 65:​16, 17.) Yehova alaakukushawo mapensho oonse ngotwiindaamo, alimwi mukuya kwaciindi teshi tukanokwiibalukaawo ambotwakalinga kulinyumfwa ceebo ca mapensho ayo.

10. Ino nceebonshi mulalumba pacoolwe ncomucite cakuba pomwi abashominyinaanu? (Amubone acikope.)

¹⁰ Nabibo pacecino ciindi, tulayuminishikwa akulinyumfwa kukalikana mumoyo na tuli kumabungano, mukwiinga tatubikili maano kushintu shibiibi shitocitika mucishi isho sheenga shatupa kulisukama. Alimwi tulacafwa bamakwesu abenankashi kulinyumfwa kukalikana mumoyo na katutondesha shisepo sha mushimu usalashi mbuli lusuno, lusangalalo, luumuno, kubota moyo alimwi akulibombya. (Gala. 5:​22, 23) Tulalumba abuumbi pacoolwe ncotucite cakuba mulibunga lyakwe Lesa! Boonse batolelela kuba mu paladaiso yakumushimu balaakubonaako Lesa ndyeshi akakumanishe cakumaninina cishomesho cakwe ca kulenga “liculu lipya acishi capanshi cipya.”

11. Kweelana a Isaya 65:​18, 19, ino paladaiso yakumushimu Yehova njaakabamba ilatupa kulinyumfwa buyani?

¹¹ Tulalumba akusangalala. Isaya wakaamba sheebo ashimwi shitupa ‘kukondwa akusangalala’ mu paladaiso yakumushimu. Yehova ngowakabamba paladaiso iyi yacikoshanyo. (Amubelenge Isaya 65:​18, 19.) Aboobo tatukankamani kwaamba ayi Yehova atotusebensesha kucafwa bantu kuswa mutubunga twamucishi cino uto tutabaiishi cancine pali nguwe, alimwi akubacafwa kuba lubasu lwa paladaiso yesu ibotu yacikoshanyo! Tulasangalala abuumbi pashoolwe nshotucite ceebo cakuba mucancine, alimwi tulasunishisha  kulwiitako bamwi pashoolwe isho.—Jele. 31:12.

12. Ino shishomesho shaambwa pa Isaya 65:​20-24 shilamupa kulinyumfwa buyani alimwi ino nceebonshi?

¹² Alimwi tulalumba akusangalala pakulangila nkotucite ceebo ca bushicibusa bubotu mbotucite a Yehova. Amuyeeyebo pashintu shoonse nsheshi tukabone akunoocita mucishi cipya! Baibo ilatushomesha ayi: “Teshi mukabeewo tubili kateta weshi akekalebo nshiku shiniini akufwa, nabi mucembele weshi akafwe kaatana kumana myaaka ya buumi bwakwe.” ‘Tulaakuyaka maanda akwikalaamo sobeene. Tulaakushanga shisamu sha minyansa akulyaako minyansa sobeene. Teshi tukasebenselewo citacite mpindu’ mukwiinga ‘Yehova alaakutupa shoolwe.’ Wakatushomesha kutupa buumi bubotu, busangalasha alimwi bucite mpindu. Nabi ‘katutana kutalika kumwiita,’ alaakunocishi kale muntu womwi awomwi nshayandika alimwi ‘alaakusanina kabotu shoonse nshaakalenga.’—Isa. 65:​20-24; Kulu. 145:16.

13. Ino Isaya 65:25 ilaamba nshi pa kwaaluka bantu nkobacita mubuumi bwabo na batalika kusebensela Yehova?

¹³ Tulicite luumuno akulinyumfwa kushitilishikwa. Kwiinda mulucafwo lwa mushimu usalashi, baanji abo bakalinga beshinkondo, bakali alimwi batakalinga kushomeka munshila shimwi, bakaalula buumi bwabo. (Amubelenge Isaya 65:25.) Bakasebensa cankusu kucileka kuba amibo ibiibi. (Loma. 12:2; Efe. 4:​22-24) Kwalo, bantu bakwe Lesa tabamaninite alimwi tulaakutolelela kucita shilubo. Nacibi boobo, Yehova wakacatanya “bantu boonse” bamusuni alimwi basunene. Aboobo balicite luumuno alucatano lwancinencine. (Taita. 2:11) Lesa shinkusu shoonse eenkabo ngweenga wacita caankamiko ici!

14. Ino lilembo lya Isaya 65:25 lyakakumanishikwa buyani kumukwesu umwi?

¹⁴ Sa ncakwiila bantu inga baalula buumi bwabo? Amuyeeye pacakubonenaako ici. Musankwa wacanike uyo wakalinga waangwa mankanda aanji kusa mukushika paciindi ndyaakaba amyaaka 20, wakalinga kucita shintu shibiibi alimwi wakalinga shinkondo. Wakalinga waangwa ceebo cakwiipa motoka, kunjilila bantu muŋanda akubeepila shintu alimwi aceebo ca milandu imwi inene njaakacita. Lyoonse wakalinga kulibambite kulwana amuntu uli woonse. Ciindi cakutaanguna ndyaakanyumfwa cancine camu Baibo akutalika kucanika kumabungano a Bakamboni Bakwe Yehova, wakashoma cakutatoonsha ayi wacana buumi bucite mpindu, nkokwaamba ayi kulambila Yehova mu paladaiso yakumushimu. Pesule lya kubombekwa, liinji wakalinga kuyeeya lilembo lya Isaya 65:25 mbolyakakumanishikwa pali nguwe. Wakaaluka kuswa mukuba muntu mukali mbuli nkalamu, akuba muntu ushiluumuno mbuli mbelele.

15. Ino nceebonshi tulisuni kucafwa bamwi kwaamba ayi bese mu paladaiso yakumushimu, alimwi ino inga twabacafwa buyani?

¹⁵ Isaya 65:13 ilatalika amaswi akwaamba ayi: ‘Yehova Lesa shinkusu shoonse waamba ayi.’ Maswi akweelaako mu vesi 25 alaamba ayi ‘mbwaamba Yehova.’ Lyoonse alakumanisha shishomesho shakwe. (Isa. 55:​10, 11) Paladaiso yakumushimu nkoili pacecino ciindi. Yehova wakabamba mukwashi ulibetele wa baabo bamulambila. Mukwiinga tuli lubasu lwa mukwashi wakwe, tuliciteko luumuno kweelana abukaalo mbobubete pacecino ciindi alimwi tulalinyumfwa kushitilishikwa mucishi cino muli bantu bakali. (Kulu. 72:7) Ceebo ca sheebo ishi, tulisuni kucafwa bantu baanji kwaamba ayi babe lubasu lwa mukwashi wesu wakumushimu. Inga twacita boobo kwiinda mukubikila maano kuncito yakucafwa bantu kuba bashikwiiya.—Mate. 28:​19, 20.

NSHEENGA TWACIITA KWAAMBA AYI BAMWI BASUNE KUSA MU PALADAISO YAKUMUSHIMU

16. Ino nshiinshi nsheenga twaciita kwaamba ayi bantu basune kusa mu paladaiso yakumushimu?

¹⁶ Soonse kuli nsheenga twaciita kwaamba ayi bamwi basune kusa mu paladaiso yakumushimu. Kwaamba ayi tucikoonshe kucita boobo,  tulyeelete kukonkela cakubonenaako cakwe Yehova. Taakakatishi bantu kuba lubasu lwa libunga lyakwe. Muciindi cakucita boobo, ‘alasenya’ bantu kuli nguwe munshila ili kabotu. (Joni 6:44; Jele. 31:3) Bantu basuni kwiiya abo beeya palusuno Yehova ndwaacite apamibo yakwe ibotu, balasuna kuba bushicibusa anguwe. Ino kuba amibo ibotu akucita shintu shibotu inga kwacafwa buyani bantu kusuna kusa mu paladaiso yakumushimu?

17. Ino ninshila nshi aimwi mbweenga twapa kwaamba ayi bamwi basune kusa mu paladaiso yakumushimu?

¹⁷ Nshila yomwi mbweenga twapa kwaamba ayi bamwi basune kusa mu paladaiso yakumushimu, nkwiinda mukutondesha lusuno akubota moyo kubamakwesu abenankashi. Na bapya besa kumabungano ciindi cakutaanguna, tulisuni kwaamba ayi kabalinyumfwa anga mbantu batakalinga bashomi abo bakalinga kucanika kumabungano mu Kolinto. Mpashi bakaamba ayi: “Ndushinisho Lesa mpwaali pakati kanu.” (1 Koli. 14:​24, 25; Seka. 8:23) Aboobo tulyeelete kutolelela kukonkela kululika kwa ‘kukala muluumuno abamwi.’—1 Tesa. 5:13.

18. Ino nciinshi mpashi ceenga capa kwaamba ayi bantu basune kusa mu libunga lyesu?

¹⁸ Lyoonse tulyeelete kweelesha kunobona bamakwesu abenankashi bweenka Yehova mbwababona. Inga twacita boobo kwiinda mukubikila maano kumibo yabo ibotu kuteshi kushintu nshebataciti kabotu, isho mukuya kwaciindi nsheshi bakacileeke kucita. Inga katumana kutanyumfwana munshila yalusuno na lyoonse ‘katucita shibotu kubamwi, kunyumfwilana nkumbu alimwi akulekelelana camoyo woonse.’ (Efe. 4:32) Lyalo bantu abo basuni kunootondeshekwa lusuno munshila iyi, balaakusuna kuba lubasu lwa paladaiso yakumushimu. b

 AMUTOLELELE KUBA MU PALADAISO YAKUMUSHIMU

19. (a) Kweelana akabokosi katokwaamba ayi “ Bakalinga Baswaamo Alimwi Bakaboolela,” ino nshiinshi bamwi nshobakaamba pesule lya kuboolela mu paladaiso yakumushimu? (b) Ino nshiinshi nshotweelete kuba bashinishite kucita? (Amubone acikope.)

¹⁹ Tulalumba abuumbi pa paladaiso yesu yakumushimu! Yabotelaako abuumbi kwiinda mboyakalinga alimwi muli bantu baanji batolumbaisha Yehova kwiinda mbocakalinga kale kale. Tulisuni kutolelela kulumba pa paladaiso Yehova njakatubambila. Muntu uli woonse usuni kuyuminishikwa, kulinyumfwa kukwana, kukalikana mumoyo akulinyumfwa kushitilishikwa alyeelete kusa mu paladaiso yakumushimu akutaswaamo! Nacibi boobo, tulyeelete kucenjela mukwiinga Satana atokweelesha cankusu kutucenjeeka kwaamba ayi tusweemo mu paladaiso iyi. (1 Pit. 5:8; Ciyu. 12:9) Tatweelete kumupa coolwe cakutukushaamo mu paladaiso iyi. Atusebense cankusu kwaamba ayi paladaiso yesu yakumushimu itolelele kuboneka kabotu, kuba isalalite akunookala muluumuno.