1. Ino bamwi balalinyumfwa buyani pamakani akushimikilako bamwi? (Amubone acikope.)

 MBULI bantu bakwe Yehova, tulashimikilako bamwi mukwiinga tulimusuni Ishiwesu wakwiculu alimwi tulisuni kubacafwa kumushiba. Beshikushimikila baanji balasangalala abuumbi kushimikilako bamwi. Sombi bamwi cilababeta ciyumu kusangalala kushimikilako bamwi. Ino nceebonshi? Bamwi balicite nsoni abuumbi alimwi balalinyumfwa ayi tabacishiiwo kwiisha. Bamwi tabalinyumfwi kwaanguluka kuya paŋanda ya muntu utana kubeeta. Bamwi balaloonda ayi mpashi bantu bamwi inga bakaka kukutika. Bamwi bakeeishikwa kuleya kukalasha bamwi. Nabi kwaamba ayi bamakwesu abenankashi aba balimusuni abuumbi Yehova, cilababeta ciyumu kushimikila makani abotu kubantu mbobateshi. Nacibi boobo, balicishi kuyandika kwa ncito iyi alimwi lyoonse balaabanamo lubasu. Yehova alisangalete abuumbi pali mbabo!

2. Ino nceebonshi tamweelete kulefuka na cimwi ciindi cilamubeta ciyumu kusangalala muncito yakushimikila?

² Sa amwebo cilamubeta ciyumu kusangalala muncito yakushimikila ceebo ca shintu ishi nshotwambaawo? Na ubo mbocibete, mutalefuki. Kulinyumfwa ayi tamucishiiwo kwiisha inga kwatondesha ayi mulaliceesha alimwi tamusuni kwaamba ayi bantu banoobikila maano kuli ndimwe. Alimwi kulatondesha ayi tamusuniwo kupikishanya abantu. Alimwi taakuwo weenga wasuna kukalasha bamwi, bunene bunene na atokweelesha kubacitila shibotu. Ishiwanu wakwiculu alicishi kabotu mbomulinyumfwa alimwi alisuni kumupa lucafwo ndomutoyandika. (Isa. 41:13) Mumutwi uyu, tutobandika pashintu shili 5 nsheenga mwaciita na kamulinyumfwa boobo kwaamba ayi incito yakushimikila kaimusangalasha.

 AMUSUMINISHE MASWI AKWE LESA KUMUYUMINISHA

3. Ino nciinshi cakacafwa mushinshimi Jelemiya kushimikilako bamwi?

³ Kuswabo kale kale, maswi aswa kuli Yehova akayuminisha basebenshi bakwe ndyebakalinga bapekwa ncito iyumu. Amuyeeye pacakubonenaako cakwe Jelemiya. Wakalinga kuwayawaya Yehova ndyaakamupa ncito ya kushimikilako bamwi. Jelemiya wakaamba ayi: “Nebo nshicishiiwo kwaamba alimwi ncili mwanike.” (Jele. 1:6) Ino nciinshi cakamucafwa kutaloonda kushimikilako bamwi? Maswi akwe Lesa akamuyuminisha. Wakaamba ayi: ‘Maswi akwe akababo anga ngumulilo mumoyo wangu, ee, anga ngumulilo utoonyaka wacalilwa mumafuwa angu. Ndakaalilwa kwaasunga mumoyo wangu.’ (Jele. 20:​8, 9) Nabi kwaamba ayi Jelemiya wakapekwa ncito yakushimikila bantu bakalinga kushupite, makani ngakalwiitikwa kuya mukubashimikila akamupa nkusu nshaakalinga kuyandika kwaamba ayi akumanishe ncito njaakapekwa.

4. Ino kubelenga Maswi akwe Lesa akukutumana kuyeeyawo kulatucafwa buyani? (Bene Kolose 1:​9, 10)

⁴ Makani acanika mu Maswi akwe Lesa alacafwa Beneklistu kuba ankusu nshebayandika. Munkalata mutumwi Paulo njaakalembela bene Kolose, wakaamba ayi kwiiya shiinji pakuyanda kwakwe Yehova kwakalinga kusa mukucafwa bashominyina ‘kukala buumi busuni Yehova akucita shimusangalasha lyoonse kwiinda mukucita milimo ibotu ipusenepusene.’ (Amubelenge Bene Kolose 1:​9, 10.) Milimo ibotu ileelikaawo kushimikilako bamwi makani abotu. Aboobo na katubelenga Maswi akwe Lesa akukutumana kuyeeyawo, lushomo lwesu muli Yehova lulayuminaako alimwi tulanyumfwishisha kuyandika kwa kushimikilako bamwi pa Bwaami bwakwe.

5. Ino nshiinshi nsheenga twaciita kwaamba ayi tunoofubilaamo abuumbi ndyetutobelenga akwiiya Baibo?

⁵ Kwaamba ayi tunoofubilaamo abuumbi mu Maswi akwe Lesa, tatweelete kubelenga calubilo, kwiiya akukutumana kuyeeyawo. Amukalike moyo ndyemutoocita shintu ishi. Na mwabelenga lilembo ndyemutatonyumfwishisha, mutalisotokelibo. Muciindi cakucita boobo, amusebenseshe libuku lyamu Chitonga lyaamba ayi Bbuku Ligwasya Kuvwuntauzya lya Bakamboni ba Jehova na kusebensesha shisebensesho shimwi shitucafwa kulangoola makani, kwaamba ayi mushibe busansulushi bwa lilembo ilyo. Na kamukalika moyo ndyemutokwiiya, lushomo lwanu lwakwaamba ayi Baibo nshoyaamba nshancine lulaakuyuminaako.  (1 Tesa. 5:21) Kushoma cakutatoonsha pamakani ngomwiiya mu Baibo, kulaakumucafwa kunoosangalala kulwiitako bamwi nshomutokwiiya.

AMULIBAMBILE KABOTU KAMUTANA KUYA MUKUSHIMIKILA

6. Ino nceebonshi tulyeelete kulibambila kabotu katutana kuya mukushimikila?

⁶ Na mwalibambila kabotu kamutana kuya mukushimikila, teshi mukanoolonda kushimikila bamwi. Yesu wakacafwa bashikwiiya bakwe kulibambila kaatana kubatuma mukushimikila. (Luka 10:​1-11) Mukwiinga bakakonkela Yesu nshaakabaiisha, bakacikonsha kucita shintu shiinji shibotu alimwi ico cakabapa kusangalala abuumbi.—Luka 10:17.

7. Ino nshiinshi nsheenga twaciita kwaamba ayi tulibambile kuya mukushimikila? (Amubone acikope.)

⁷ Ino nshiinshi nsheenga twaciita kwaamba ayi tulibambile kuya mukushimikila? Tulyeelete kuyeeya pa nsheenga twaamba, akushaamba kweelana ambotubandika alimwi mumaswi esu. Kwiilikaawo, cilacafwa kuyeeya pa nsheenga bantu baamba na kucita, akuyeeya mbweenga twabakumbula. Lyalo ndyetutoshimikila, inga tweelesha kukalika moyo, kumweeta mweeta akubandika munshila ya bwineshi.

8. Ino nceebonshi inga twaamba ayi Beneklistu bali anga ninongo Paulo njaakaambawo mucikoshanyo?

⁸ Mutumwi Paulo wakalwiita Beneklistunyina ayi: “Tuli anga ninongo mubikitwe bubile.” (2 Koli. 4:7) Ino mbubile nshi mbwaakalinga kwaambawo? Ni ncito ipulusha bantu ya kushimikila makani a Bwaami. (2 Koli. 4:1) Lyalo nongo mubikitwe bubile shileemikaninaako basebenshi bakwe Lesa abo bashimikilako bamwi makani abotu. Muciindi cakwe Paulo, beshikuulisha shintu bakalinga kusebensesha nongo shabulongo kunyamwitamo shintu shiyandika mbuli shakulya, waini alimwi amaali. Aswebo Yehova wakatupa makani abotu ayandika. Kwiinda mulucafwo lwakwe Yehova, inga twacikonsha kutolelela kushimikilako bamwi makani abotu.

AMUPAILE KULI YEHOVA KWAAMBA AYI AMUCAAFWE KUTALOONDA

9. Ino inga twacita buyani kwaamba ayi tutanoloonda bantu? (Amubone acikope.)

⁹ Cimwi ciindi inga katuloonda bantu. Ino inga twacita buyani kwaamba ayi tukome lipenshi ili? Amuyeeye pa mupailo batumwi ngobakapaila ndyebakalwiitikwa ayi bacileeke kushimikila. Muciindi cakuloonda akucileka kushimikila, bakasenga Yehova kwaamba ayi  abacaafwe kutolelela ‘kushimikila maswi akwe cakubula boowa.’ Yehova wakakumbula mupailo wabo peenkaapo. (Milimo 4:​18, 29, 31) Na aswebo cimwi ciindi tulaloonda kushimikilako bamwi, tulyeelete kupaila kuli Yehova kwaamba ayi atucaafwe. Amusenge Yehova kwaamba ayi amucaafwe kusuna bantu abuumbi kwaamba ayi mutanoloonda kubashimikila makani abotu.

10. Ino Yehova alatucafwa buyani kukumanisha mukuli wesu mbuli Bakamboni bakwe? (Isaya 43:​10-12)

¹⁰ Yehova wakatusala kuba Bakamboni bakwe, alimwi wakatushomesha ayi alaakutucafwa kuba bantu bataloondi. (Amubelenge Isaya 43:​10-12.) Amuyeeye panshila shili 4 mbwaacita boobo. Cakutaanguna, Yesu alaba andiswe lyoonse ndyetutoshimikilako bamwi makani abotu. (Mate. 28:​18-20) Cabili, Yehova wakasala baanjelo bamwi kwaamba ayi banootucafwa. (Ciyu. 14:6) Catatu, Yehova wakatupa mucafwi, nkokwaamba ayi mushimu usalashi uyo utucafwa kwiibaluka nshotwakeeya. (Joni 14:​25, 26) Ca namba 4, Yehova wakatupa bamakwesu abenankashi kwaamba ayi banootucafwa. Kwiinda mulucafwo lwakwe Yehova abashominyineesu abo batusuni, tulicite lucafwo ndotuyandika kwaamba ayi tube bataloondi akutolelela kushimikila.

AMUBE BALIBAMBITE KWAALUKA AKUNOOBONA SHINTU MUNSHILA YEELETE

11. Ino inga mwacita buyani kwaamba ayi munoocana bantu baanji ndyemutoshimikila? (Amubone acikope.)

¹¹ Sa mulalefuka na bantu kabatacaniki bunene paŋanda? Na cimwi ciindi mulalefuka, inga mwaliipusha ayi: ‘Ino bantu bakumusena kuno baya kuli?’ (Milimo 16:13) ‘Sa baya kuncito na baya cifwakasha?’ Na ubo mbociba, mpashi inga mwacaana bantu baanji kwiinda mukushimikila munshila. Mukwesu waliina lya Joshua wakaamba ayi, “Ndaba acoolwe cakushimikilako bamwi ndyentooya cuula shintu nabi na ndaya mumisena bantu mobokeshela.” Alimwi lakwe aba Bridget bakaakwe, balacana bantu baanji paŋanda na baya mukushimikila macolesha alimwi a Pasondo malumwi.—Efe. 5:​15, 16.

12. Ino nshiinshi nsheenga twaciita kwaamba ayi tushibe shintu bantu nshobashoma alimwi anshobatolisukama?

¹² Na muntu ngomwataanguna kushimikila taasuniiwo kukutika, amweeleshe kushiba nshaashoma alimwi ashitoomusukamika. Ba Joshua aba Bridget balasebensesha  mwiipusho ucanika pa tumatilakiti peculu ndyebatobandika abantu. Kucakubonenaako, na batosebensesha katilakiti kacite mutwi waamba ayi Ino Baibo Mulaibona Buyani? balatalika mubandi amuntu ayi: “Bantu bamwi balabona ayi Baibo ndibuku lyakaswa kuli Lesa, sombi bamwi balabona ayi ubo teshi mbocibete. Ino mwebo mulaibona buyani?” Kutalika mubandi munshila iyi kulapa kwaamba ayi bamwi basune kukutika.

13. Ino nceebonshi inga twasangalala ndyetutoshimikila nabi kwaamba ayi bantu bakaka kutukutika? (Tushimpi 27:11)

¹³ Nabi bantu bakaka kutukutika ndyetutoshimikila, swebo ingayi twakumanisha lubasu lwesu. Ino nceebonshi? Mukwiinga twacikonsha kucita Yehova a Yesu ncobasuni ayi tucite—nkokwaamba ayi kushimikilako bamwi. (Milimo 10:42) Nabi kwaamba ayi tatuna kucanawo muntu nabi womwi paŋanda ndyetwalinga kushimikila na mpashi bamwi bakaka kutukutika, inga twasangalala ceebo cakushiba ayi tutosangalasha Ishiwesu wakwiculu.—Amubelenge Tushimpi 27:11.

14. Ino nceebonshi inga twasangalala na shikushimikila umwi wacana muntu usuni kwiiya kumusena nkotushimikila?

¹⁴ Alimwi inga twasangalala na shikushimikila umwi wacana muntu usuni kwiiya kumusena nkotushimikila. Njashi Yamulindilishi imwi yakakoshanisha ncito yesu kukulangoola mwaana wakasoweka. Baanji inga baabanamo lubasu kulangoola mwaana uyo mumisena ipusenepusene. Lyalo na mwaana bamucana, boonse balasangalala kuteshibo wooyo wamucana. Ubu bweenka mbocibete akuncito yakucafwa bantu kuba bashikwiiya bakwe Yesu. Boonse mulibungano balayandika kwaabanamo lubasu muncito iyi kwaamba ayi tucikoonshe kushimikila bantu boonse bakumusena nkotushimikila, alimwi boonse mulibungano balasangalala na shikwiiya watalika kucanika kumabungano.

AMUBIKILE MAANO KULUSUNO NDOMUCITE PALI YEHOVA APA BANTU

15. Ino kukonkela shaambwa pa Mateyo 22:​37-39 inga kwatucafwa buyani kunoosangalala abuumbi muncito yakushimikila? (Amubone acikope cili yakutaanguna.)

¹⁵ Inga katusangalala abuumbi muncito yakushimikila na twabikila maano kulusuno ndotucite pali Yehova apa bantu. (Amubelenge Mateyo 22:​37-39.) Amuyeeyebo Yehova mbwasangalala na watubona katusebensa ncito njaakatupa abantu mbweshi bakasangalale na bakatalike kwiiya Baibo! Alimwi munokwiibaluka  ayi abo bakutika kumakani ngotushimikila akusalawo kusebensela Yehova, inga balangila kukala kwamuyayaya.—Joni 6:40; 1 Timo. 4:16.

16. Ino inga twacita buyani kwaamba ayi tunoosangalala muncito yakushimikila na tulaalilwa kweenda kuswa paŋanda? Amwaambe shakubonenaako.

¹⁶ Sa kuli cimwi cipa kwaamba ayi munookwaalilwa kweenda kuswa paŋanda? Na ubo mbocibete, amubikile maano ku nsheenga mwaciita kwaamba ayi mutondeshe lusuno lwanu pali Yehova apa bantu bamwi. Paciindi cabulwashi bwa COVID-19, ba Samuel aba Dania tabakalinga kweendawo kuswa paŋanda. Paciindi coonse ici shintu ndyeshakalinga shiyumu, lyoonse bakalinga kushimikilako bamwi kusebensesha fooni, kulemba makalata akutanjilila shiiyo sha Baibo kusebensesha Zoom. Ba Samuel na baya kucipatela mukushilikwa kansa, bakalinga kushimikilako bamwi mbobakalinga kucana. Bakaamba ayi: “Ndyetutokwiinda mumapensho ayumu, inga twalisukama, kulinyumfwa kulema alimwi inga catubeta ciyumu kuliyumya. Tulayandika kunoosangalala ndyetutosebensela Yehova.” Beebabo ndyebakalinga kunoocili balwashi, ba Dania bakawa alimwi bakalingabo ba pabulo kwa myeenshi yotatwe. Lyalo bakalinga kuyandika kunokweendela pakacinga kabalema kwa myeenshi 6. Ba Dania bakaamba ayi: “Ndakeelesha kucita nsheenga ndacikonsha kweelana abukaalo mbondakalingaamo. Ndakalinga kushimikila naasi wakalinga kusa mukumbona abaabo bakalinga kundetelako shintu paŋanda. Alimwi ndakalinga kuba amibandi ibotu pafooni a mwanakashi umwi wakalinga kusebensa ku kampani yuulisha shintu shakucipatela.” Nabi kwaamba ayi ba Samuel aba Dania tabakalinga kucikonsha kucita shiinji kweelana ambocakalinga pakutaanguna, bakacita nsheenga bacikonsha alimwi kucita boobo kwakabapa kuba alusangalalo.

17. Ino inga mwacita buyani kwaamba ayi nshetwabandikawo mumutwi uyu shimucaafwe abuumbi?

¹⁷ Amweeleshe kukonkela shintu shoonse shili 5 nshetwabandikaawo mumutwi uyu. Comwi acomwi ncetwabandikaawo cili anga nshintu shiyandika ndyetutoteleka shakulya shimwi. Na shoonse shiyandika mwashisenkanya pomwi ndyemutoteleka, shakulya shilabota abuumbi. Kukonkela shintu shoonse nshotweeya mumutwi uyu, kulaakutucafwa kukoma cili coonse ceenga catupa kutaba alusangalalo ndyetutoshimikila.