1. Ino njimiipusho nshi njeenga twaliipusha na twayeeya pashintu shoonse Yehova nshaakalenga?

 NA TWAYEEYA pashintu shoonse Yehova nshaakalenga, inga twalinyumfwa mbuli mbwaakalinyumfwa shikulumbaisha Defedi, uyo wakeepusha Yehova mumupailo ayi: “Ndimbona mwiculu umo momwakalenga, mweenshi anyenyeenshi nshimwakabika mumisena, anu muntu nciinshi ngweenga kamuyeeya? Muntubo nciinshi cakwaamba ayi kamumulama?” (Kulu. 8:3, 4) Bweenka mbuli Defedi, inga twalibona kuceya na twalyeelanya ku nyenyeenshi Yehova nshaakalenga alimwi mpashi inga twakankamana kwaamba ayi Yehova alatubikilako maano. Nacibi boobo, tutoobona ayi Yehova wakalinga kubabikila maano bantu bakutaanguna, Adamu a Efa, alimwi bakaba lubasu lwa mukwashi wakwe.

2. Ino nshiinshi Yehova nshaakalinga kusuni ayi Adamu a Efa bacite?

² Adamu a Efa bakalinga baana bakutaanguna bakwe Yehova ba pacishi capanshi, alimwi Yehova wakalinga mushali wabo wakwiculu shilusuno. Alimwi wakabapa ncito. Wakabalwiita ayi: “Amushalane mufule, akususha cishi capanshi.” (Mata. 1:28) Bakalinga kweelete kuba abaana akulama cishi. Naakwiinga bakanyumfwila Lesa akucita nshaakabalwiita, Adamu a Efa alimwi abana babo naakwiinga bakatolelela kuba mumukwashi wakwe Yehova kwamuyayaya.

3. Ino nceebonshi nceenga twaambila ayi Yehova wakapa Adamu a Efa lubasu luyandika abuumbi mumukwashi wakwe?

³ Adamu a Efa bakalinga kucite lubasu luyandika abuumbi mumukwashi wakwe Yehova. Palilembo lya Bene Ebulu 2:7 Baibo ilaamba Yehova mbwaakalenga muntu ayi: “Mwakamuceesha kwiinda baanjelo, sombi mwakamupa bulemu abwaami.” Yehova  taakwe kupa bantu nkusu, busongo alimwi alushibo mbuli baanjelo. (Kulu. 103:20) Wakabalenga bupuseneko paniini a baanjelo abo bacite nkusu. Ici cilakankamika abuumbi! Yehova ndyaakalenga bashali besu bakutaanguna, wakabapa buumi bubotu abuumbi.

4. Ino nciinshi cakacitika kuli Adamu a Efa ndyebakapondokela Yehova, alimwi ino nshiinshi nsheshi tubandike mumutwi uyu?

 ⁴ Cakabicaako ncakwaamba ayi Adamu a Efa ndyebakapondokela Yehova, tabakwe kutolelela kuba mumukwashi wakwe. Kweelana ambweshi twiiye mumutwi uyu, ici cakaleta mapensho aanji abuumbi kubana babo. Sombi luyaando lwakwe Yehova talukwe kwaaluka. Alisuni bantu bamunyumfwila kuba bana bakwe kwamuyayaya. Cakutaanguna, tutokwiiya Yehova mbwaatondesha kwaamba ayi tulayandika abuumbi kuli nguwe. Lyalo tutobandika nsheenga twaciita kwaamba ayi tutondeshe ayi tulisuni kuba mumukwashi wakwe Lesa. Mukweelaako, tutobandika pashoolwe bana bakwe Yehova bapacishi capanshi nsheshi bakatambule kwamuyayaya.

5. Ino inga twatondesha buyani ayi tulalumba Lesa ceebo cakutulenga mucikoshanyo cakwe?

⁵ Yehova wakatondesha ayi tulayandika, kwiinda mukutulenga mucikoshanyo cakwe. (Mata. 1:26, 27) Mukwiinga twakalengwa mucikoshanyo cakwe Lesa, inga tweeya akutondesha mibo ibotu njaacite mbuli lusuno, inkumbu, kushomeka alimwi abululami. (Kulu. 86:15; 145:17) Na twaba amibo mbuli yeeyi, tulalemeka Yehova akutondesha ayi tulamulumba. (1 Pit. 1:14-16) Na katucita shintu shisangalasha Ishiwesu wakwiculu, tulaba alusangalalo. Alimwi mukwiinga tulicite mibo mbuli Yehova njaacite, inga twaba bantu mbwaasuni mumukwashi wakwe.

6. Ino Yehova wakatondesha buyani ayi bantu balayandika ndyaakalenga cishi?

⁶ Yehova wakatubambila musena ubotu kwakukala. Yehova kaatana kulenga muntu wakutaanguna, wakabamba cishi kwaamba ayi bantu banokalaamo. (Jobo 38:4-6; Jele. 10:12) Mukwiinga Yehova alayeeyelako bamwi alimwi ngushikwaaba, wakatupa shintu shiinji shibotu kwaamba ayi tunoosangalala. (Kulu. 104:14, 15, 24) Cimwi ciindi wakalinga kuyeeya pashintu nshaakalenga alimwi “wakabona kwaamba ayi shintu ishi nshibotu.” (Mata. 1:10, 12, 31) Wakatondesha ayi bantu balayandika kwiinda mukubapa “nkusu shakweendelesha” shintu shoonse shibotu nshaakalenga. (Kulu. 8:6) Lesa alisuni kwaamba ayi bantu bamaninite bakanoolama shintu shoonse shibotu nshaakalenga, kwamuyayaya. Sa mulalumba Yehova lyoonse pacishomesho ici cibotu abuumbi?

7. Ino lilembo lya Joshuwa 24:15 lilatondesha buyani ayi muntu alicite nkusu shakulisalila?

⁷ Yehova wakatupa nkusu shakulisalila. Inga twasala nshotusuni kucita mubuumi. (Amubelenge Joshuwa 24:15.) Lesa wesu shilusuno alasangalala na twasalaawo kumusebensela. (Kulu. 84:11; Tus. 27:11) Inga twasebensesha nkusu shesu shakulisalila kusala shakucita shimwi shibotu shiinji. Amuyeeye pacakubonenaako Yesu ncaakatondesha.

8. Ino ninshila nshi yomwi Yesu mbwaakasebensesha nkusu shakwe shakulisalila?

⁸ Inga twakonkela cakubonenaako cakwe Yesu kwiinda mukubika panembo shintu shisuni bamwi. Bushiku bumwi Yesu abatumwi bakwe ndyebakalinga kulemete abuumbi, bakaya kulubasu kumwi kwaamba ayi baye bookesheeko. Nacibi boobo, tabakwe kookeshaawo. Bantu baanji bakesa kuli mbabo alimwi bakalinga kusunishishi kwiishikwa kuli Yesu. Sombi Yesu taakwe kukalala. Muciindi cakucita boobo, wakabanyumfwila nkumbu. Aboobo ino Yesu wakacita buyani? “Wakatalika kubeeisha  shintu shiinji.” (Maako 6:30-34) Na twakonkela cakubonenaako cakwe Yesu kwiinda mukwaaba ciindi ankusu shesu kucafwa bamwi, tulatondesha bulemu kuli Ishiwesu wakwiculu. (Mate. 5:14-16) Alimwi tulatondesha Yehova ayi tulisuni kuba mumukwashi wakwe.

9. Ino ncoolwe nshi cilibetele Yehova ncaakapa bantu?

⁹ Yehova wakapa bantu coolwe cakuba abaana alimwi amukuli wakubaiisha kumusuna alimwi akumusebensela. Na muli mushali, sa mulalumba pacoolwe ici cilibetele? Nabi kwaamba ayi baanjelo bakapekwa shabupe shiinji, Yehova taakwe kubapa coolwe cakuba abaana. Aboobo na muli bashali, munoolumba pacoolwe ncomucite cakuba abaana. Bashali bakapekwa mukuli uyandika abuumbi wakulama baana kweelana a “kululika alwiiyo lwakwe Yehova.” (Efe. 6:4, NWT; Duto. 6:5-7; Kulu. 127:3) Libunga lyakwe Yehova lyakabamba shisebensesho shiinji shaamba pamakani amu Baibo mbuli mabuku, mavidyo, inyimbo, alimwi amakani acanika pa webusaiti, kwaamba ayi licafwe bashali. Ici cilatondesha patuba kwaamba ayi Ishiwesu wakwiculu alimwi a Mwanaakwe balibasuni baana. (Luka 18:15-17) Yehova alasangalala na bashali kabacinka manungo muli nguwe akucita shoonse nsheenga bacikonsha kwaamba ayi balame bana babo. Alimwi bashali aba balacafwa bana babo kuba acoolwe cakuba mumukwashi wakwe Yehova kwamuyayaya!

10-11. Ino ncoolwe nshi Yehova ncaakatupa ceebo ca cilubula?

¹⁰ Yehova wakatupa Mwanaakwe ngwaasuni abuumbi kwaamba ayi tube acoolwe cakuba mumukwashi Wakwe alimwi. Bweenka mbotweeya mu  palagilafu 4, Adamu a Efa ndyebakabisha, bakasowa coolwe cabo cakuba mumukwashi wakwe Yehova pomwi abana babo. (Loma. 5:12) Adamu a Efa bakasalawo kupondokela Lesa aboobo tabakalinga kweelete kutolelela kuba mumukwashi wakwe. Ano ino nshiinshi shakalinga kusa mukucitika kubana babo? Mulusuno, Yehova wakabika bubaambo bwakwaamba ayi bana babo bamunyumfwila babe acoolwe cakuba mumukwashi wakwe. Wakacita boobo kwiinda mukwaaba Mwanaakwe wakashalwabo eenka, Yesu Klistu. (Joni 3:16; Loma. 5:19) Kwiinda mucilubula cakwe Yesu, Yehova wakabika bubaambo bwakusala bantu bashomeka bali 144,000 kuba bana bakwe.—Loma. 8:15-17; Ciyu. 14:1.

¹¹ Kwiilikaawo, bantu baanji batoocita kuyanda kwakwe Lesa cakushomeka. Batolangila kuba mumukwashi wakwe Lesa pesule lya kweeleshekwa kwakweelaako kumamanino a myaaka 1000. (Kulu. 25:14; Loma. 8:20, 21) Mukwiinga balicite kulangila uku, baleeta Yehova Mulengi wabo ayi “Beshiwesu.” (Mate. 6:9) Abo beshibakabushikwe abalo balaakuba acoolwe cakwiiya pashintu Yehova nshaasuni ayi banoocita. Abo beshibakasalewo kukonkela butanjilishi bwakwe Yehova, mukuya kwaciindi abalo balaakuba mumukwashi wakwe.

12. Ino ngumwiipusho nshi ngweshi tucane cikumbulo?

¹² Kweelana ambotwabona, kuli shintu shiinji Yehova nshaakacita kwaamba ayi atondeshe ayi bantu balayandika. Wakasala bananikitwe kuba bana bakwe, alimwi wakapa baabo bali ‘mulikoto linene’ coolwe cakulangila kuba bana bakwe mucishi cipya. (Ciyu. 7:9) Ano ino nshiinshi nsheenga twaciita kwaamba ayi tutondeshe Yehova ayi tulisuni kuba mumukwashi wakwe kwamuyayaya?

13. Ino nshiinshi nsheenga twaciita kwaamba ayi tube mumukwashi wakwe Lesa? (Maako 12:30)

¹³ Amutondeshe ayi mulisuni Yehova kwiinda mukumusebensela amoyo wanu woonse. (Amubelenge Maako 12:30.) Mulusuno, Lesa wakatupa shipo shiinji shibotu. Mpashi cipo comwi ciinditeewo pashipo isho ncoolwe  cakumulambila. Tulatondesha Yehova ayi tulimusuni kwiinda ‘mukukonkela milawo yakwe.’ (1 Joni 5:3) Mulawo womwi Yehova ngwaasuni ayi tunokonkela ngumulawo Yesu ngwaakatupa wakucafwa bantu kuba bashikwiiya, akubabombeka. (Mate. 28:19) Alimwi wakatupa amulawo wakwaamba ayi tulyeelete kusunana. (Joni 13:35) Yehova alaakupa kwaamba ayi abo bamunyumfwila bakabe mumukwashi wa baabo bamulambila nsengwe yoonse.—Kulu. 15:1, 2.

14. Ino nshiinshi nsheenga twaciita kwaamba ayi tutondeshe lusuno kubamwi? (Mateyo 9:36-38; Bene Loma 12:10)

¹⁴ Amutondeshe lusuno kubamwi. Lusuno ngumubo uyandika abuumbi Yehova ngwaacite. (1 Joni 4:8) Yehova wakatutondesha lusuno nabibo katutana kumushiba. (1 Joni 4:9, 10) Tulakonkela cakubonenaako cakwe na katutondesha lusuno kubamwi. (Efe. 5:1) Nshila yomwi ibotu mbweenga twatondesha ayi tulisuni bantu, nkwiinda mukubacafwa kwiiya pali Yehova ciindi kacitana kumana. (Amubelenge Mateyo 9:36-38.) Na twabacafwa inga beeya nsheenga bacita kwaamba ayi babe mumukwashi wakwe Lesa. Pesule lyakwaamba ayi muntu wabombekwa, tulyeelete kutolelela kumutondesha lusuno alimwi abulemu. (1 Joni 4:20, 21) Ino nshiinshi shiilikitwe mukucita boobo? Na wacita cintu cimwi, teshi tukayeeye ayi wacitila kashanga. Lyalo na twabula kunyumfwishisha ncaacitila cintu ico, teshi tukayeeye ayi wacita boobo ceebo cakulisuna. Sombi inga twatondesha bulemu ku mukwesu na nankashi uyo kwiinda mukumubona ayi alitwiinditeewo.—Amubelenge Bene Loma 12:10; Filip. 2:3.

15. Ino mbaani mbotweelete kutondesha nkumbu akucitila shintu shibotu?

¹⁵ Amutondeshe nkumbu akucita shibotu kubantu boonse. Na tulisuni kuba mumukwashi wakwe Yehova kwamuyayaya, tulyeelete kukonkela nshetwiiya mu Maswi akwe Lesa. Kucakubonenaako, Yesu wakaamba ayi tulyeelete kutondesha nkumbu akucita shibotu kubantu boonse, kwiilikaawo a kubalwani besu. (Luka 6:32-36) Cimwi ciindi inga caba ciyumu kucita boobo. Na caba boobo, tulyeelete kwiiya kuyeeya akucita shintu bweenka mbuli Yesu. Na tweelesha cankusu kunyumfwila Yehova akukonkela cakubonenaako cakwe Yesu, tulatondesha Ishiwesu wakwiculu ayi tulisuni kuba mumukwashi wakwe kwamuyayaya.

16. Ino nshiinshi nsheenga twaciita kwaamba ayi tushitilishe liina lya mukwashi wakwe Yehova?

¹⁶ Amushitilishe liina lya mukwashi wakwe Yehova. Mumukwashi, liinji mwanike alakonkela shicita munene wakwe. Na munenebantu kaakonkela njiisho shamu Baibo, alaakuba cakubonenaako cibotu ku mwanike wakwe. Na munenebantu alacita shintu shibiibi, mwanike wakwe alakwe alakonkela cakubonenaako cakwe citabete kabotu. Ubu mbocibete amumukwashi wakwe Yehova. Na Mwineklistu wakalinga kushomeka kale kale wapondoka na kutalika kucita shintu shibiibi, bamwi inga bakonkela cakubonenaako cakwe akutalika kucita shintu shibiibi. Abo bacita boobo, balabisha liina lya mukwashi wakwe Yehova wa baabo bamulambila. (1 Tesa. 4:3-8) Tulyeelete kuleya kukonkela shakubonenaako shitabete kabotu alimwi tatweelete kusuminisha cili coonse kunyonyoola bushicibusa bwesu a Ishiwesu wakwiculu.

17. Ino nkuyeeya kuli buyani nkotweelete kuleya, alimwi ino nceebonshi?

¹⁷ Amushome muli Yehova kuteshi mushintu shakumubili. Yehova wakashomesha ayi alaakutupa shakulya, shakufwala, alimwi amwakukala, na citaanshi twayandoola Bwaami bwakwe alimwi akukonkela milawo yakwe. (Kulu. 55:22; Mate. 6:33) Na twashoma cishomesho ici, teshi tukanooyeeya ayi shintu shakumubili shamucishi ici inga shatushitilisha alimwi akutupa kuba alusangalalo. Tulishi kwaamba ayi cintu comwibo ceenga catupa kuba aluumuno lwancinencine, nkucita kuyanda kwakwe Yehova. (Filip. 4: 6, 7) Nabi kwaamba ayi inga twacikonsha kuula shintu shiinji, tulyeelete kubona na tulicite ciindi ankusu shakushisebensesha alimwi akushilama. Sa inga twatalika kusuna bunene shintu nshetucite? Tulyeelete kwiibaluka kwaamba ayi Yehova wakatupa ncito mumukwashi wakwe. Aboobo ici citosansulula ayi tatweelete kupilinganishikwa kushintu shimwi. Ncakutatoonsha kwaamba ayi tatusuniiwo kuba anga ngu musankwa wacanike uyo wakalinga kusunishi shintu nshaakalinga kucite cakwaamba ayi wakakaka kuba shikwiiya wakwe Yesu. Aboobo wakasowa coolwe cakusebensela Yehova a cakuba womwi wa bana bakwe!—Maako 10:17-22.

18. Ino ncoolwe nshi ciinditeewo alimwi ashoolwe shimwi bantu banyumfwila Lesa nsheshi bakacane kwamuyayaya?

¹⁸ Bantu banyumfwila Lesa balaakuba acoolwe ciinditeewo cakusuna alimwi akulambila Yehova kwamuyayaya! Abo batolangila kukala pacishi capanshi balaakusangalala kulama cishi Yehova ncaakabamba kabotu kwaamba ayi banokalaamo. Conoonobo, Bwaami bwakwe Lesa bulaakupa kwaamba ayi cishi capanshi ashoonse shiliimo shikabote alimwi. Yesu alaakukushawo mapensho oonse ayo akesa ceebo cakwaamba ayi Adamu a Efa bakasalawo kuswa mumukwashi wakwe Lesa. Yehova alaakubusha bantu baanji akubapa coolwe cakukala buumi butamaani kwakubula mapensho pacishi ico ceshi cikabe paladaiso. (Luka 23:42, 43) Na bantu basebensela Yehova bakabe bamaninite, boonse balaakuba “abulemu abwaami” Baibo mboyaambawo.—Ebu. 2:7.

19. Ino nshiinshi nshotweelete kunoyeeyawo?

¹⁹ Na muli bamu “likoto linene,” mulicite kulangila kubotu abuumbi. Lesa alimusuni; alimwi alisuni kwaamba ayi mube mumukwashi wakwe. Aboobo amucite shoonse nsheenga mwacikonsha kwaamba ayi munoocita shimusangalasha. Lyoonse munooyeeya pashishomesho shakwe Lesa. Munoolumba pa coolwe ncomucite cakulambila Ishiwesu wakwiculu, alimwi acakumulumbaisha kwamuyayaya!