1. Ino nshiinshi bamakwesu abenankashi baanji nshebatoyeeya kucita kwaamba ayi bacite shiinji muncito yakwe Yehova?

  TULICITE shakucita shiinji mamanino abweende bwa shintu ubu ndyaatosena pafwiifwi. (Mate. 24:14; Luka 10:2; 1 Pit. 5:2) Soonse tulisuni kusebensela Yehova kushika peela nkusu shesu. Baanji batoocita shiinji muncito yakushimikila. Bamwi batoyeeya kusebensa ncito ya bupainiya. Lyalo bamwi balisuni kusebensela pa Bethel na kwaabanamo lubasu mukuyaka misena njetusebensesha mukulambila Lesa. Alimwi bamakwesu baanji batosebensa cankusu kwaamba ayi beelele kusebensa mbuli musebenshi ucafwilisha na munene mulibungano. (1 Timo. 3:1, 8) Yehova alisangalete abuumbi kubona bantu bakwe nshebasuni kucita kwaamba ayi bamusebensele!—Kulu. 110:3; Isa. 6:8.

2. Ino inga twalinyumfwa buyani na twaalilwa kukumanisha shakucita shimwi muncito yakwe Yehova?

² Inga twalinyumfwa cibiibi na tatukwe kucikonsha kukumanisha shakucita shimwi muncito yakwe Yehova, pesule lya kweelesha kwa ciindi cilaamfu. Alimwi mpashi inga twalinyumfwa cibiibi na inga tatucikoonshi kucita shintu shimwi mulibunga lyakwe Yehova ceebo cakukula na ceebo ca shintu shimwi. (Tus. 13:12) Ishi nsheshakacitikila ba Melissa. * Bakalinga kusuni kuya mukusebensela ku Bethel na kuya kucikolo ca Bashimikila sha Bwaami, sombi bakaamba ayi: “Ndakuula alimwi inga nsheeleli kupekwa mikuli iyi. Cimwi ciindi ndalinyumfwa kulefuka.”

3. Ino nshiinshi bamwi nsheenga bayandika kucita kwaamba ayi beelele kupekwa mikuli imwi?

³ Abo bacili bacanike alimwi bacite buumi buli kabotu, inga bayandika kuba amibo imwi kwaamba ayi beelele kupekwa mikuli imwi. Kucakubonenaako, bamwi inga baba basongo, basala shakucita cakufwambaana, alimwi balyaabite kusebensa. Sombi inga bayandika  kwiiya kukalika moyo, kusebensa ncito cakubikila maano alimwi akutondesha bulemu kubamwi. Na mwasebensa cankusu kuba amibo njemutoyandika, bamakwesu inga bamupa mukuli ndyemutatoulangila. Amuyeeye shakacitikila ba Nick. Ndyebakalinga kucite myaaka 20, bakalinyumfwa cibiibi abuumbi ceebo cakwaamba ayi tabakwe kubasala kuba musebenshi ucafwilisha. Bakaamba ayi, “Ndakayeeya ayi kuli shimwi nshentatocita kabotu.” Nacibi boobo, ba Nick tabakwe kuboolela mwisule. Bakalinga kusebensa cankusu mulibungano alimwi amuncito yakushimikila. Pacecino ciindi batosebensa mbuli womwi wamu Komiti Yamusampi.

4. Ino nshiinshi nsheshi tubandike mumutwi uyu?

⁴ Sa mutolinyumfwa cibiibi ceebo cakwaamba ayi mwaalilwa kukumanisha ncomusuni kucita muncito yakwe Yehova? Na mboboobo, amupaile kuli Yehova akumulwiita mbomutolinyumfwa. (Kulu. 37:5-7) Kwiilikaawo, inga mweepusha bamakwesu bashimpite lwakumushimu kumulwiita nsheenga mwaciita kwaamba ayi munosebensa kabotu muncito yakwe Lesa akusebenselawo pasheesho nsheenga bamulwiita. Na mwacita boobo mpashi inga mwacikonsha kukumanisha nshemusuni kucita. Sombi bweenka mbuli ba Melissa, mpashi pacecino ciindi inga tamucikoonshi kukumanisha nshemusuni kucita muncito yakwe Yehova. Aboobo ino inga mwacita buyani kwaamba ayi mutolelele kuba alusangalalo? Kwaamba ayi tucane cikumbulo kumwiipusho uyu, mumutwi uyu tutobandika (1) sheenga shamupa kuba alusangalalo, (2) nsheenga mwaciita kwaamba ayi mutolelele kuba alusangalalo alimwi (3) nsheenga mwasala kucita kwaamba ayi mutolelele kuba alusangalalo.

5. Ino nshiinshi nshotweelete kubikilaako maano kwaamba ayi tube alusangalalo? (Shikushimikila 6:9)

⁵ Lilembo lya Shikushimikila 6:9, lilaamba nsheenga twaciita kwaamba ayi tube alusangalalo. (Amubelenge.) Muntu usangalala ‘mucintu ciliiwo’ alakwana musheesho nshaacite, mbuli bukaalo mbwabeteemo paceeco ciindi. Sombi muntu ukumbwa shintu nshaatacite teshi akalinyumfwe kukwana musheesho nshaacite. Aboobo ino nshiinshi nshetutokwiiyaawo? Kwaamba ayi tube alusangalalo, tulyeelete kubikila maano pashintu nshetucite kuteshi kubikila maano kushakucita nsheenga tatucikoonshi kukumanisha.

6. Ino ncikoshanyo nshi nceshi tubandike alimwi ino citotwiisha nshi?

⁶ Sa cilakonsheka kukwana musheesho nshemucite kale? Bantu baanji balayeeya ayi inga tacikonsheki, mukwiinga tulasuna kutolelela kwiiya bwakucita shintu shipya. Sombi inga cakonsheka. Inga katusangalala abuumbi mushintu nshetucite. Ino inga twacita buyani ubo? Kwaamba ayi tushibe mbweenga twacita boobo, amuleke tubandike cikoshanyo ca matalenti Yesu ncakaamba ncetucana palilembo lya Mateyo 25:14-30. Tutokwiiya mbweenga twaba alusangalalo alimwi ambweenga twatolelela kusangalala mubukaalo mbotubeteemo.

7. Mukufwiimpya amusansulule cikoshanyo ca matalenti Yesu ncakaamba.

⁷ Mucikoshanyo Yesu ncakaamba, musankwa wakalinga kusuni kuya palweendo. Kaatana kunyamuka, wakeeta basebenshi bakwe akubapa matalenti kwaamba ayi bacite makwebo. * Mukwiinga musankwa uyu wakalinga kucishi nsheenga musebenshi womwi awomwi wacikonsha kucita, wakapa musebenshi wakutaanguna matalenti ali 5, wabili wakamupa obilo, lyalo watatu wakamupa yomwi. Basebenshi bobilo bakutaanguna bakasebensa cankusu kwaamba ayi bacanineewo maali aamwi a mwaami wabo. Sombi musebenshi watatu taana kwaasebenseshawo maali ngaakapekwa. Aboobo mwaami wakwe wakamukusha ncito.

8. Ino nciinshi cakalinga kweelete kupa musebenshi wakutaanguna waambwa mucikoshanyo kuba alusangalalo?

 ⁸ Musebenshi wakutaanguna alyeelete wakasangalala abuumbi, mwaami wakwe ndyaakamupa matalenti ali 5. Aya akalinga maali aanji abuumbi, alimwi ici cakatondesha ayi mwaami wakwe wakalinga kumushoma abuumbi! Ano ino mbuyani musebenshi wabili? Mpashi naakwiinga wakalinyumfwa cibiibi ceebo cakwaamba ayi taakwe kupekwa matalenti eelene a akapekwa musebenshi wakutaanguna. Sombi ino wakacitaawo buyani?

9. Ino nshiinshi Yesu nshaatakwe kwaambawo pamusebenshi wabili mucikoshanyo ca matalenti? (Mateyo 25:22, 23)

⁹ Amubelenge Mateyo 25:22, 23. Yesu taakwe kwaamba ayi musebenshi wabili wakakalala alimwi akuba amfundilishi ceebo cakwaamba ayi wakapekwabo matalenti obilo. Alimwi Yesu taakwe kwaamba ayi musebenshi uyu wakatalika kutongooka akwaamba ayi: ‘Ino nceebonshi mwaami wangu ncaampeta maali aniini? Ndasebensa cankusu bweenka mbuli musebenshi wapekwa matalenti ali 5! Na mwaami wangu atoobona ayi teshi ndime musebenshi uli kabotu, mpashi andime ndyeelete kufukila maali aya akutalika kulisebensela nemwiine.’

10. Ino nshiinshi musebenshi wabili nshaakacita a matalenti ngaakapekwa?

¹⁰ Bweenka mbuli musebenshi wakutaanguna, musebenshi wabili wakanyumfwisha kwaamba ayi mwaami wakwe wakamupa mukuli uyandika abuumbi alimwi wakasebensa cankusu muncito mwaami wakwe njaakamupa. Aboobo ici cakapa kwaamba ayi acaninewo matalenti aamwi obilo. Musebenshi uyu wakapekwa cilambu, ceebo cakusebensa cankusu kwakwe. Mwaami wakwe wakamulumbaisha akumupa mikuli aimwi!

11. Ino nshiinshi nsheenga twaciita kwaamba ayi tutolelele kuba alusangalalo?

 ¹¹ Aswebo inga twaba alusangalalo abuumbi, na katusebensa cankusu incito iliyoonse njetucite muncito yakwe Yehova. ‘Amubikile maano abuumbi’ kuncito yakushimikila alimwi akusebensa cankusu mulibungano. (Milimo 18:5; Ebu. 10:24, 25) Amulibambile kabotu mabungano kwaamba ayi mukaambe shikumbulo shiyuminisha. Munoobona lubasu luliloonse lwa shikwiiya ndweenga mwapeekwa mumabungano amukati kansondo kwaamba ayi lulayandika. Na bamusenga ayi musebenseko ncito imwi mulibungano, amukumanishe ncito iyo akwiimanisha muciindi ceelete. Tamweelete kuyeeya ayi incito njemwapekwa taiyandiki, aboobo tamweelete kusebenselawo. Amweeleshe cankusu kushiba kabotu bwakusebensa ncito iyo. (Tus. 22:29) Na kamusebensa cankusu muncito yakwe Yehova, bushicibusa bwanu anguwe bulaakuyuminaako alimwi mulaakutolelela kuba alusangalalo. (Gala. 6:4) Alimwi cilaakumubeta cuubu kusangalala na bamwi bapekwa mukuli ngomwalinga kusuni.—Loma. 12:15; Gala. 5:26.

12. Ino nshiinshi shakacafwa ba Melissa aba Nick kutolelela kuba alusangalalo?

¹² Sa mutobeebaluka ba Melissa mbotwalinga twaambawo mupalagilafu 2, abo bakalinga kusuni kuya ku Bethel na ku Cikolo ca Bashimikila sha Bwaami? Nabi kwaamba ayi tabakwe kucikonsha kucita boobo, bakaamba ayi: “Ndasebensa cankusu muncito ya bupainiya alimwi ndeelesha kusebensesha nshila shipusenepusene shakushimikila. Ici campa kuba alusangalalo abuumbi.” Alimwi ino nciinshi cakacafwa ba Nick kuliyumya ndyebatakwe kubasala kuba musebenshi ucafwilisha? Bakaamba ayi: “Ndakalinga kubikila maano kushintu nsheenga ndaciita mbuli kushimikila alimwi akwaamba shikumbulo shiyuminisha kumabungano. Alimwi ndakalemba foomu yakuya mukusebensela ku Bethel, lyalo mwaaka wakakonkelawo bakanjita.”

13. Ino nshiinshi sheshi shikasweemo na kamusebensa cankusu muncito njemucite pacecino ciindi? (Shikushimikila 2:24)

¹³ Sa mulaakupekwa mikuli aimwi kunembo, na kamusebensa cankusu muncito njemutosebensa pacecino ciindi? Ico inga cacitika bweenka mbocakaba kuli ba Nick. Sombi na mukabule kupekwa mikuli imwi bweenka mbuli ba Melissa, inga mwatolelela kuba alusangalalo muncito njemutosebensela Yehova. (Amubelenge Shikushimikila 2:24.) Alimwi mulaakuba alusangalalo abuumbi, ceebo cakushiba kwaamba ayi mutosangalasha Mwaami wesu Yesu Klistu.

14. Ino nshiinshi nshotweelete kunokwiibaluka lyoonse na twayeeya pashintu nshetwakasala kucita muncito yakwe Yehova?

¹⁴ Sa kubikila maano kuncito njetucite pacecino ciindi, cilasansulula ayi tulyeelete kucileka kucita shiinji muncito yakwe Yehova? Sobwe napaceyi! Tulyeelete kusala shakucita sheenga shatucafwa kushiba kabotu bwakushimikila akwiisha alimwi akucafwa bamakwesu abenankashi. Tulaakucikonsha kukumanisha nshetwakasala kucita, na twabikila maano kukucafwa bamwi munshila yeelete alimwi cabusongo muciindi cakubikila maano kulindiswe sobeene.—Tus. 11:2; Milimo 20:35.

15. Ino nshiinshi shimwi nsheenga mwasala kucita sheenga shamucafwa kutolelela kuba alusangalalo?

¹⁵ Ino nshiinshi nsheenga mwasala kucita? Amusenge Yehova kwaamba ayi amucaafwe kusala shakucita nsheenga mwacikonsha kukumanisha. (Tus. 16:3; Jemu. 1:5) Sa inga mweelesha kusalawo cakucita comwi pasheesho shaambwa  mupalagilafu yakutaanguna mumutwi uyu, mbuli kusebensako bupainiya bwakucafwilisha na bwaciindi coonse, kusebensela pa Bethel na kwaabanamo lubasu muncito yakuyaka misena njetusebensesha mukulambila Lesa? Na mpashi inga mwasuna kwiiyaako mushobo umwi na kuya mukushimikila kumusena kumwi. Inga mweeya shiinji pancito ishi na mwabelenga mutwi 10 mulibuku lyamu  Chitonga licite mutwi waamba ayi Bakamantene Mukucita Kuyanda kwa Jehova alimwi akwiinda mukubandika abamanene bali mulibungano linemishaanu. * Na mweelesha kukumanisha shakucita ishi, bamwi balaakubona ayi mutooya panembo alimwi mulaakutolelela kuba alusangalalo.

16. Ino nshiinshi nsheenga mwaciita na inga tamucikonshi kukumanisha cakucita cimwi pacecino ciindi?

¹⁶ Ano ino mbuyani na inga tamucikoonshi kukumanisha cakucita nabi comwi pasheesho nshetwabandikaawo? Nsheenga mwaciita, nkusala cakucita cimwi nceenga mwacikonsha kukumanisha. Amuyeeye pashakucita shitokonkelaawo mpashi nsheenga mwacikonsha kukumanisha.

17. Kweelana a lilembo lya 1 Timoti 4:13, 15, ino nshiinshi mukwesu nsheenga wacita kwaamba ayi ashibe bwakwiisha kabotu?

¹⁷ Amubelenge 1 Timoti 4:13, 15. Na muli mukwesu wakabombekwa, inga mweelesha kucishiba kabotu bwakwaamba na kwiisha. Ino nceebonshi? Mukwiinga na mweelesha cankusu kucishiba bwakubelenga, kwaamba alimwi akwiisha kabotu cilaakuba cuubu kucafwa batookutika. Amweeleshe kubika mulongo wakwiiya alimwi akukonkela shaambwa muciiyo comwi acomwi mubuloshuwa ya Amubikile Maano Kukubelenga Akwiisha. Amwiiye ciiyo comwi acomwi, kweelesha cankusu kwiindulukaamo, alimwi akukonkela nshomweeya ndyemutokwaamba likani. Amusenge lucafwo kuli shikululika ucafwilisha na bamanene mulibungano “abo basebensa cankusu mukwaamba alimwi akwiisha.” * (1 Timo. 5:17) Mutabikilibo maano kukonkela nshomweeya mubuloshuwa, sombi amucafwe beshikukutika kuyumya lushomo lwabo  na kubayuminisha kukonkela nshobeeya. Kucita boobo kulaakumucafwa akucafwa bamwi kutolelela kuba alusangalalo.

18. Ino nshiinshi sheenga shatucafwa kukumanisha nshetwakasala kucita muncito yakushimikila?

¹⁸ Soonsebo tulicite mukuli wakushimikila akucafwa bantu kuba bashikwiiya. (Mate. 28:19, 20; Loma. 10:14) Sa inga mwasuna kushiba bwakusebensa kabotu incito iyi iyandika abuumbi? Amusale shakucita ndyemutokwiiya akukonkela makani aambwa mubuloshuwa ya Kwiisha. Inga mwashiba shimwi nsheenga mwaciita Mutubuku twa Mabungano Abuumi bwa Bwineklistu Anciito Yesu alimwi amavidyo ansheenga mwaamba ngotweebela kumabungano amukati kansondo. Amweeleshe nshila shipusenepusene kwaamba ayi mushibe yeenga yasebensa kabotu. Na mwakonkela shaambwa mumbasu shoonse ishi, mulaakushiba bwakwiisha kabotu alimwi ici cilaakumupa kutolelela kuba alusangalalo.—2 Timo. 4:5.

19. Ino inga mwacita buyani kwaamba ayi mube amibo ya Bwineklistu?

¹⁹ Ndyemutosala nsheenga mwaciita, tamweelete kulubaako kusalaawo cintu comwi ciyandika abuumbi—nkokwaamba ayi kuba amibo ya Bwineklistu. (Gala. 5:22, 23; Kolo. 3:12; 2 Pit. 1:5-8) Ino nshiinshi nsheenga mwaciita kwaamba ayi mube amibo ya Bwineklistu? Kucakubonenaako, mpashi mulisuni kuba alushomo luyumu. Mpashi inga mwabelenga mitwi yamakani mumabuku esu yaamba nsheenga mwaciita kwaamba ayi muyumye lushomo lwanu. Ncakutatoonsha kwaamba ayi mulaakufubilaamo abuumbi mukweebela mbasu sha mavidyo amu JW Bulodikasiti^® shitondesha bamakwesu abenankashi mbobatondesha lushomo luyumu ndyebatokwiinda mumeelesho apusenepusene. Lyalo amuyeeye mbweenga mwakonkela cakubonenaako calushomo lwabo.

20. Ino nshiinshi nsheenga twaciita kwaamba ayi tutolelele kuba alusangalalo akutalinyumfwa kulefuka abuumbi?

²⁰ Ncakutatoonsha kwaamba ayi soonse tulisuni kucita shiinji muncito yakwe Yehova kwiinda nshetutoocita pacecino ciindi. Mucishi cipya tulaakumusebensela kweelana ambotusuni. Kushikila ciindi ico cikashiike, na twacita shoonse nsheenga twacikonsha pacecino ciindi, tulaakutolelela kuba alusangalalo alimwi ici cilaakutucafwa kutalinyumfwa kulefuka abuumbi. Alimwi ciyandika abuumbi tulakulemeka akulumbaisha Lesa wesu “usangalete” Yehova. (1 Timo. 1:11) Aboobo amuleke tunoosangalala mumikuli njetucite!