1-2. Ino nshiinshi nsheshi twiiye mumutwi uyu?

 INO mulalinyumfwa buyani na cintu ncemutolangila alimwi ncemusuni abuumbi cacelwa kushika? Sa mulalisukama? Tushimpi 13:12 ilaamba ayi: “Cilacisisha moyo na kolangila kapongo kafwite.” Ano ino mulalinyumfwa buyani na mwashiiba ayi kuli calengesha ayi cintu ico cicelwe kushika? Na caba boobo inga mwakalika moyo akuba balibambite kulindila.

² Mumutwi uyu tutokwiiya panjiisho shamu Baibo shimwi sheenga shatucafwa ‘kulindila.’ (Mika 7:7) Lyalo tutobandika pabukaalo bobilo ndyetweelete kulindila cakukalika moyo kwaamba ayi Yehova acitewo comwi. Mukweelaako, tutobandika pashoolwe nsheshi bakacane abo balibambite kulindila kwaamba ayi Yehova acitewo comwi.

3. Ino njiisho njetucana palilembo lya Tushimpi 13:11 ilatwiisha nshi?

³ Tushimpi 13:11 ilatulwiita ncetuyandikila kukalika moyo. Ilaamba ayi: “Bubile bwakututukila buleenda, sombi ucana maali paniini paniini, alafula.” Ino lilembo ili litootwiisha nshi? Muntu musongo ulabikilaako maano akukalika moyo ndyaatocita shintu alimwi mukucita boobo mulaswa shibotu.

4. Ino njiisho njetucana palilembo lya Tushimpi 4:18 ilatwiisha nshi?

⁴ Tushimpi 4:18 ilaamba ayi: “Nshila ya baluleme ili anga ngumumuni wa kumuyamaca uyo uya ciindaawo kutuba kushikila lisuba lyaswa.” Maswi aya alatondesha patuba kwaamba ayi Yehova alacafwa bantu bakwe kunyumfwishisha kuyanda kwakwe paniini paniini. Nacibi boobo, lilembo ili inga lyatucafwa akunyumfwishisha Mwineklistu mbwaaya panembo lwakumushimu.  Cilatola ciindi kwaamba ayi muntu ayumye bushicibusa bwakwe a Yehova. Na katwiiya akukonkela cakubikila maano kululika nkotucana mu Maswi akwe Lesa alimwi ankotutambula kuswa kulibunga, mukuya kwaciindi tulaakuba amibo mbuli yakwe Klistu alimwi tulaakumushiba kabotu Lesa. Amuleke tubandike pacikoshanyo Yesu ncaakaamba ndyaakalinga kusansulula citeente ici.

5. Ino ncikoshanyo nshi Yesu ncaakaamba citondesha ayi cilatola ciindi kwaamba ayi muntu aalule buumi bwakwe?

⁵ Yesu wakaamba cikoshanyo kusansulula ayi makani a Bwaami alaya cikomena mumyoyo yabaabo basuni shiluleme bweenka mbuli kaluseke kaniini. Wakaamba ayi: “Imbuto shilamena akuya cikula, [mulimi] kaateshi ambocicitika. Bulongo bwiine mbobukulisha mumeno akuulengesha kwaamba ayi ucate. Citaanguna ncibuba, kuboolawo njimifuko, pesule mifuko ndyeiba anseeke.” (Maako 4:27, 28) Ino Yesu wakalinga kusansulula nshi? Wakalinga kusansulula ayi bweenka cishango mbocikula paniini paniini, alakwe muntu watambula makani a Bwaami alaya panembo lwakumushimu paniini paniini. Kucakubonenaako, beshikwiiya Baibo besu ndyebatoyumya bushicibusa bwabo a Yehova, tulabona shintu nshebaalula mubuumi bwabo. (Efe. 4:22-24) Nacibi boobo, tulyeelete kwiibaluka kwaamba ayi ngu Yehova ulengesha kwaamba ayi imbuto isho shikule.—1 Koli. 3:7.

6-7. Ino nshiinshi nsheenga tweeya kuswa kuli Yehova mbwaakalenga cishi?

⁶ Mushintu shoonse Yehova nshaacita, alakalika moyo kwaamba ayi akumanishe ncito yakwe. Alacita boobo kwaamba ayi liina lyakwe lilumbaishikwe alimwi akucafwa bamwi. Kucakubonenaako, amuyeeye Yehova mbwakabamba cishi paniini paniini kwaamba ayi bantu banokalaamo.

⁷ Baibo ilasansulula Yehova mbwakalenga cishi ayi ‘ngwakapima mboceelete kukomena,’ kubika ‘macinko ancico’ alimwi akubika ‘libwe lya ncico lya mukona.’ (Jobo 38:5, 6) Alimwi wakalinga kuba aciindi cakulanga langa nshaakalenga. (Mata. 1:10, 12) Amuyeeyebo baanjelo mbobakalinga kulinyumfwa na babona cintu cipya Yehova ncaalenga. Balyeelete  bakalinga kusangalala abuumbi! Aboobo bakatalika “koolobesha cakusangalala.” (Jobo 38:7) Ino nshiinshi nshotutokwiiyawo? Cakatola myaaka iinji kwaamba ayi Yehova amanishe kulenga shintu. Nacibi boobo, pesule lyakulanga langa shintu nshaakalenga cakubikila maano, wakaamba ayi “nshibotu abuumbi.”—Mata. 1:31.

8. Ino nshiishi nsheshi tubandike ano?

⁸ Shakubonenaako ishi shatucafwa kushiba kwaamba ayi kuli njiisho shiinji shamu Maswi akwe Lesa shitucafwa kushiba kwaamba ayi tulyeelete kukalika moyo. Amuleke ano tubandike pabukaalo bobilo mbweenga twayandika kuba balibambite kulindila kwaamba ayi Yehova acitewo comwi.

9. Ino mbukaalo nshi bomwi mbweenga twayandika kulindila kwaamba ayi Yehova acitewo comwi?

⁹ Inga twayandika kulindila kwaamba ayi Yehova akumbule mipailo yesu. Na twapaila kwaamba ayi Yehova atupe nkusu shakuliyumya mulipensho, na kwaamba ayi atucaafwe kucileka kucita cintu cimwi ncaapatite, inga twalinyumfwa anga atocelwa kukumbula mipailo yesu. Ino nceebonshi Yehova taakumbuli mipailo yesu yoonse peenkaapo?

10. Ino nceebonshi tulyeelete kulindila cakukalika moyo kwaamba ayi Yehova akumbule mipailo yesu?

¹⁰ Yehova alakutika mipailo yesu cakubikila maano. (Kulu. 65:2) Alabona mipailo yesu yakuswa panshi lya moyo ayi ncitondesho cakwaamba ayi tulashoma muli nguwe. (Ebu. 11:6) Na twapaila kwaamba ayi Yehova atucaafwe kucita shintu shimusangalasha, alasuna kubona na tulilyaabite kusebensa cankusu kucita kuyanda kwakwe. (1 Joni 3:22) Aboobo na twasenga Yehova kwaamba ayi atucaafwe kucileka kucita cintu cimwi ncaapatite, tulyeelete kukalika moyo akucita shoonse nsheenga twacikonsha kwaamba ayi tucileeke kucita cintu ico. Yesu wakatucafwa kunyumfwishisha ayi mipailo yesu imwi inga taikumbulwi peenkaapo. Wakaamba ayi: “Amutolelele kusenga, lyalo mulaakupekwa; amutolelele kulangoola, lyalo mulaakucana; amutolelele kukonkoonsha, lyalo mulaakucalwitwa; ceebo uyo woonse usenga ulapekwa, awooyo ulangoola ulacana alakwe ukonkoonsha ulacalwitwa.” (Mate. 7:7, 8) Na twakonkela kululika uku alimwi ‘akutolelela kupaila,’ inga twashoma cakutatonsha kwaamba ayi Ishiwesu wakwiculu alatukutika alimwi alaakukumbula mipailo yesu.—Kolo. 4:2.

11. Ino lilembo lya Bene Ebulu 4:16 lilatucafwa buyani na caboneka anga mipailo yesu taitokumbulwa peenkaapo?

¹¹ Nabi kwaamba ayi inga caboneka anga Yehova wacelwa kukumbula mupailo wesu, wakashomesha ayi alakumbula mipailo yesu “paciindi ceelete.” (Amubelenge Bene Ebulu 4:16.) Aboobo tatweelete kupa Yehova mulandu na taana kukumbula mupailo wesu paciindi ncetutolangila. Kucakubonenaako, bantu baanji bapaila kwamyaaka iinji kwaamba ayi Bwaami bwakwe Lesa bukusheewo bweende bwa shintu ubu. Alimwi ubu Yesu mbwaakaamba ayi tulyeelete kunoopaila. (Mate. 6:10) Sombi inga caba cintu cakubula maano na twacileka kushoma muli Lesa ceebo cakwaamba ayi mamanino taakwe kusa paciindi ndyetwalinga kwaalangila! (Abaku. 2:3; Mate. 24:44) Tulatondesha busongo kwiinda mukutolelela kulindila Yehova akupaila katushomete cakutatonsha kwaamba ayi alaakukumbula mipailo yesu. Mamanino alaakusa paciindi ceelete, mukwiinga Yehova wakasalila limwi “bushiku aciindi” ndyaeelete kushika. Alimwi ico cilaakuba ciindi cibotu kubantu boonse.—Mate. 24:36; 2 Pit. 3:15.

12. Ino ndilili ndyeenga catubeta ciyumu kukalika moyo?

¹² Inga twayandika kukalika moyo akuliyumya ndyetwacitilwa shintu shitabete kabotu. Liinji bantu mucishi balapensha bantu mbobapusene abo shilewa, shikanda, bakumisena kumwi,  bamishobo imwi na bakushishi shimwi. Bamwi balapenshekwa ceebo cakulemana na ceebo cakuba abulwashi bwa kubongo. Bantu bakwe Yehova baanji balaliyumya kucitilwa shintu shitabete kabotu ceebo camakani amu Baibo ngobashoma. Na twacitilwa shintu shitabete kabotu tulyeelete kwiibaluka maswi Yesu ngakaamba. Wakaamba ayi: “Uyo eshi akayuminine kushikila kumamanino, ulaakupulushikwa.” (Mate. 24:13) Ano ino nshiinshi nsheenga mwaciita na mwashiiba kwaamba ayi umwi mulibungano wacita cilubo cinene? Pesule lyakwaamba ayi bamanene bashibishikwa makani ayo, sa mulaakukalika moyo akushoma kwaamba ayi balaakusebenselaawo kweelana akuyanda kwakwe Yehova? Ino nshiinshi bamanene nsheenga bayandika kucita na umwi wacita cilubo cinene?

13. Ino nshiinshi Yehova nshaasuni kwaamba ayi bamanene banocita na umwi mulibungano wacita cilubo cinene?

¹³ Na bamanene bashiba kwaamba ayi kuli umwi mulibungano wacita cilubo cinene, balapaila akusenga Yehova kwaamba ayi abape “busongo buswa kwiculu” kwaamba ayi banyumfwishishe makani oonse akucita kweelana akuyanda kwakwe. (Jemu. 3:17) Luyaando lwabo ndwakucafwa wooyo wacita cilubo cinene kuswa “munshila shakwe sha shibiibi” na kacikonsheka. (Jemu. 5:19, 20) Alimwi balisuni kucita shoonse nsheenga bacikonsha kwaamba ayi bashitilishe libungano akuyuminisha baabo balinyumfwa cibiibi. (2 Koli. 1:3, 4) Na bamanene bashiba ayi kuli umwi wacita cilubo cinene, balyeelete kutaanguna kushiba makani oonse, alimwi kucita boobo inga kwatola ciindi. Balapaila alimwi cakubikila maano balasebensesha Malembo ‘kululika bweelete’ muntu uyo wabisha. (Jele. 30:11) Nabi kwaamba ayi bamanene tabawayiwayi kusebenselawo na muntu wacita cilubo cinene, tabashikilibo koombolosha peenkaapo. Na bamanene bakonkela butanjilishi buswa kuli Yehova, libungano lyoonse lilafubilaamo. Nacibi boobo, nabi kwaamba ayi bamanene bacita shintu munshila yeelete, abo bakakumwa acilubo cakacita umwi inga batolelela kulinyumfwa cibiibi. Na ubo mbomutolinyumfwa, ino nshiinshi nsheenga mwaciita kwaamba ayi mutanoolinyumfwa cibiibi abuumbi?

14. Ino ncakubonenaako cakwe aani camu Baibo ceenga camuyuminisha na Mwineklistunyinaanu wamukalasha abuumbi?

¹⁴ Sa mwakakalashikwaawo kale abuumbi kumuntu umwi, na kumushominyinaanu? Inga  mwacana shakubonenaako shibotu mu Maswi akwe Lesa shitucafwa kushiba mbweenga twalindila kwaamba ayi Yehova alulamike shintu. Kucakubonenaako, nabi kwaamba ayi Josefu wakacitilwa shintu shitabete kabotu kubamakwabo, taakwe kusuminisha shibiibi nshebakamucitila kumupa kuba muntu mukali. Muciindi cakucita boobo, wakatolelela kubikila maano kukusebensela Yehova. Alimwi Yehova wakamupa shoolwe shiinji ceebo cakukalika moyo akuliyumya kwakwe. (Mata. 39:21) Mukuya kwaciindi, Josefu wakacikonsha kulekelela baabo bakamucitila shibiibi alimwi wakabona Yehova mbwaakamupa shoolwe. (Mata. 45:5) Bweenka mbuli Josefu, tulayuminishikwa na twayumya bushicibusa bwesu a Yehova akulindila ayi alulamike shintu paciindi ceelete.—Kulu. 7:17; 73:28.

15. Ino nciinshi cakacafwa nankashi umwi kuliyumya cakukalika moyo akuba aluumuno ndyaakacitilwa shintu shitabete kabotu?

¹⁵ Ncakwiila kwaamba ayi teshi shibiibi shoonse nsheenga twacitilwa sheenga sheelana asheesho shakacitikila Josefu. Nacibi boobo, soonse tulalinyumfwa cibiibi na umwi watucitila cintu citabete kabotu. Na twapusana aumwi nabibo muntu utalambili Yehova, kukonkela njiisho shamu Baibo inga kwatucafwa. (Filip. 2:3, 4) Amuyeeye pacakubonenaako ici. Nankashi umwi wakakalashikwa abuumbi ndyaakashiba kwaamba ayi ngwaasebensaakwe wakalinga kwaamba makani akubeca pali nguwe. Muciindi cakufwambaana kucitawo comwi, nankashi uyu wakayeeya pacakubonenaako cakwe Yesu. Ndibakalinga kumutukana, taakwe kubabooshesha. (1 Pit. 2:21, 23) Pesule lya kuyeeya pamakani aya wakasalawo kutacita cilicoonse. Mukuya kwaciindi wakesa mukushiba kwaamba ayi uyo ngwaasebensaakwe wakalinga mulwashi alimwi wakalinga kulisukama abuumbi. Nankashi wakayeeya ayi uyo ngwaasebensaakwe wakaamba makani akubeca ceebo cakuciswa alimwi akulisukama abuumbi. Aboobo nankashi wakasangalala kwaamba ayi wakaliyumya cakukalika moyo ndyaakacitilwa shintu shitabete kabotu alimwi ici cakamupa kuba aluumuno.

16. Ino nciinshi ceenga camuyuminisha na mutoliyumya ceebo cakucitikilwa cintu citabete kabotu? (1 Pita 3:12)

¹⁶ Na mutoliyumya ceebo cakucitikilwa shintu shitabete kabotu na shintu shimwi, amushibe kwaamba ayi Yehova alibo muliimfwa  kubaabo ‘balefukite.’ (Kulu. 34:18) Alimusuni ceebo cakumulwiita nshemulisukama alimwi akukalika moyo kwanu. (Kulu. 55:22) Ngomoomboloshi wacishi coonse. Alimwi alabona shoonse shicitika. (Amubelenge 1 Pita 3:12.) Aboobo na mutokwiinda mumapensho ngeenga tamucikoonshi kumana, amushibe kwaamba ayi cilayandika abuumbi kulindila kwaamba ayi Yehova acitewo comwi.

17. Kweelana a lilembo lya Isaya 30:18, ino Yehova wakashomesha kutupa nshi?

¹⁷ Conoonobo Ishiwesu wakwiculu alaakutupa shoolwe shiinji kwiinda mu Bwaami bwakwe. Isaya 30:18 ilaamba ayi: “Yehova alalindila cakukalika moyo kwaamba ayi amupe shoolwe, ulilibambite kumunyumfwila nkumbu ceebo ulacita shintu shiluleme. Balicite coolwe abo boonse bamulindila.” Abo balindila Yehova balaakutambula shoolwe shiinji pacecino ciindi alimwi amucishi cipya.

18. Ino nshoolwe nshi nshetutolangila?

¹⁸ Na bantu bakwe Lesa bakenjile mucishi cipya, teshi bakayandike kuliyumya mumapensho ngobatokwiindaamo pacecino ciindi. Teshi kukabeewo kucitikilwa shintu shitabete kabotu nabi kucisa. (Ciyu. 21:4) Mukwiinga kulaakuba shintu shiinji, teshi tukalisukameewo pamakani anshetuyandika. (Kulu. 72:16; Isa. 54:13) Cilaakubota abuumbi!

19. Ino Yehova atotucafwa kucita nshi?

¹⁹ Pacecino ciindi Yehova atotucafwa kwaamba ayi tweelele kuba balelwa ba Bwaami bwakwe, kwiinda mukutucafwa kuba amibo imusangalasha alimwi akucileka kucita shilabo shitabete kabotu. Mutalefuki nabi kucileka kusebensela Yehova. Tulaakuba abuumi bubotu abuumbi! Ndyetutolangila ciindi ici cibotu, atube basangalete ndyetutolindila cakukalika moyo kwaamba ayi Yehova akakumanishe nshaakashomesha!