1. Kweelana a 1 Bene Tesalonika 5:11, ino nkuyaka kwa mushobo nshi nkotwaabanamo lubasu?

 SA MWAKAABANAMO kale lubasu mukuyaka na kubamba cipya Ŋanda ya Bwaami momubunganina? Ncakutatoonsha kwaamba ayi na mwakabawo kale acoolwe ca mushobo uyu, mutokwiibaluka mbomwakalinyumfwa ciindi cakutaanguna kubunganina mu Ŋanda ya Bwaami ipya. Mulyeelete mwakalumba Yehova abuumbi. Mpashi mwakakondwa abuumbi cakwaamba ayi mwakalosha minsonshi akwaalilwa kwiimba lwiimbo lwakutaanguna. Maanda esu a Bwaami akayakwa kabotu, alapa kwaamba ayi Yehova alumbaishikwe. Nacibi boobo, kuli kuyaka kwa mushobo umwi kupa kwaamba ayi Yehova alumbaishikwe abuumbi. Iyi ni ncito iindite pakuyaka maanda. Nkuyaka na kuyuminisha baabo babungana mumisena iyi yakupaililaamo. Mutumwi Paulo wakalinga kuyeeya pakuyaka uku kwa cikoshanyo ndyaakalemba maswi ngotucana pa 1 Bene Tesalonika 5:11, lilembo paswa mutwi uyu.​—Amubelenge.

2. Ino nshiinshi nsheshi tubandike mumutwi uyu?

² Mutumwi Paulo ncakubonenaako cibotu abuumbi ca muntu wakalinga kucishi kabotu kuyaka bashominyina. Wakalinga kubanyumfwishisha. Mumutwi uyu tutoobandika mbwakacafwa bashominyina (1) kuliyumya mumapensho, (2) kuba muluumuno abamwi, alimwi (3) akuyumya lushomo lwabo muli Yehova. Amuleke tubone mbweenga twakonkela cakubonenaako cakwe kwiinda mukuyaka bamakwesu abenankashi.​—1 Koli. 11:1.

3. Ino Paulo wakalinga kucita buyani shintu mukweelanya?

³ Paulo wakalinga kubasuni abuumbi bashominyina. Mukwiinga alakwe wakalinga kwiinda mumapensho, wakacikonsha kubayeeyelaako akubanyumfwishisha ndyebakalinga kwiinda mumapensho. Paciindi cimwi, Paulo taakalinga kucitewo maali, aboobo  wakalangoola ncito kwaamba ayi acane shiyandika akucafwako bashominyina. (Milimo 20:34) Wakalinga kucishi ncito yakupanga matente. Ndyaakashika ku Kolinto, wakataanguna kusebensaako a Akwila alimwi a Pulisila abalo bakalinga kucishi ncito yakupanga matente. Nacibi boobo, “lyoonse pabushiku bwakookesha bwa Cibelu” wakalinga kushimikila ba Juda alimwi aba Giliki. Ono Sailasi a Timoti ndibakashika, “Paulo lakwe wakalibenga ayi unanooshimikilabo.” (Milimo 18:2-5) Paulo taakwe kulubaako ayi kusebensela Yehova njoyakalinga ncito inene mubuumi bwakwe. Alimwi mukwiinga wakatondesha cakubonenaako cibotu cakusebensa cankusu muncito yakushimikila akulilangweta shiyandika, wakacikonsha kuyuminisha bashominyina. Wakabayuminisha kutolelela kubikila maano kumbasu shoonse sha kulambila Yehova na ‘kushintu shiyandika abuumbi,’ nabi ndyebakalinga kwiinda mumapensho akweelesha kulangoola shiyandika sha mumukwashi.​—Filip. 1:10.

4. Ino Paulo a Timoti bakabayuminisha buyani bashominyinaabo ndyebakalinga kupenshekwa?

⁴ Libungano lyaku Tesalonika ndyelyakatalikabo, bamakwesu abenankashi bapya aba bakatalika kupikishikwa abuumbi. Abo bakalinga kubapikisha ndyebakaalilwa kucana Paulo a Sailasi, “bakacata bashomi bamwi akubakwelaanya kubatola ku bacinenenene ba mundabala inene,” kaboolobesha ayi: “Bantu boonse aba batosotoka milawo yakwe Sisa.” (Milimo 17:6, 7) Ano amuyeeyebo Beneklistu bapya aba mbobakaloonda ndyebakabukilwa ku bacinenenene ba mundabala! Ici naakwiinga cakabapa kuboolela mwisule muncito yakwe Yehova, sombi Paulo taakalinga kusuniiwo ca mushobo uyu kucitika. Nabi kwaamba ayi lakwe a Sailasi bakaya, bakashinisha kwaamba ayi libungano lipya ili lyalamwa kabotu. Paulo wakebalusha bene Tesalonika ayi: “Twakatuma Timoti mukwabesu muli Klistu . . . , kwaamba ayi ese amuyumyeyumye akushimpya lushomo lwanu, kwaamba ayi kubule ushi aboole pesule ceebo ca mapensho ayo ali pakati kanu.” (1 Tesa. 3:2, 3) Cilyeelete kwaamba ayi Timoti alakwe wakapenshekwawo ndyaakalinga kumishaabo ku Lisitila. Wakabona Paulo mbwakayuminisha bashominyina. Mukwiinga wakabona Yehova mbwakabacafwa, Timoti wakalinga kucikonsha kuyuminisha bashominyina kwaamba ayi shintu shoonse shilaakuba kabotu.​—Milimo 14:8, 19-22; Ebu. 12:2.

5. Ino mukwesu waliina lya Bryant wakacafwikwa buyani kumunene umwi?

⁵ Ino nshiinshi shimwi Paulo nshaakacita kwaamba ayi ayuminishe bashominyina? Ndyebakaboolela ku Lisitila, Ikoniyamu kushikila aku Antyoki, Paulo a Banabasi “bakasala bamanene mulibungano lyomwi alyomwi.” (Milimo 14:21-23) Ncakutatoonsha kwaamba ayi bweenka mbuli bamanene mbobacita munshiku shino, basankwa bakasalwa aba bakabayuminisha abuumbi bashominyinaabo. Mukwesu umwi waliina lya Bryant wakaamba ayi: “Ndyendakalinga kucite myaaka 15, bata bakaswa paŋanda abalo bama bakakushikwa mulibungano. Ndakalinyumfwa kuba neenka akulefuka.” Ano ino nciinshi cakacafwa ba Bryant kuliyumya mubukaalo buyumu ubu? Bakaamba ayi: “Munene umwi waliina lya Tony, wakalinga kubandika andime kumabungano alimwi apashiindi shimwi. Wakandwiita pabaabo bakatolelela kuba basangalete nabi ndyebakalinga kwiinda mumapensho. Wakambelengela Kulumbaisha 27:10 alimwi liinji wakalinga kundwiita pali Esekiya, uyo wakatolelela kusebensela Yehova cakushomeka nabi kwaamba ayi baishi tabakalinga cakubonenaako cibotu.” Ino ishi shakamucafwa buyani mukwesu Bryant? Wakaamba ayi: “Ceebo cakuyuminisha kwa mukwesu Tony, mukuya kwaciindi ndakatalika ncito yaciindi coonse isangalasha.” Nobamanene, amubikile maano kukucafwa batoyandika kuyuminishikwa bweenka mbocakalinga kumukwesu Bryant.​—Tus. 12:25.

6. Ino Paulo wakacita buyani kwaamba ayi ayuminishe bashominyina?

 ⁶ Paulo wakebalusha bashominyina ayi kwiinda munkusu shakwe Yehova, “bakamboni baanji” bakacikonsha kuliyumya mumapensho ceebo cakwaamba ayi Yehova wakabapa nkusu. (Ebu. 12:1) Paulo wakalinga kucishi ayi makani akeendamo basebenshi bakwe Lesa bakale kale abo bakacikonsha kuliyumya ndyebakalinga kwiinda mumapensho, inga kwapa bashominyina kutaloonda akutolelela kubikila maano “kundabala inene yakwe Lesa muumi.” (Ebu. 12:22) Ubu mbocibete amunshiku shino. Taakuwo utana kuyuminishikwawo kale ceebo cakubelenga makani atondesha Yehova mbwakacafwa Gidyoni, Balaki, Defedi, Samwelo, alimwi abamwi baanji. (Ebu. 11:32-35) Alimwi tulayuminishikwa na twabelenga shakubonenaako sha bamakwesu mbobatondesha lushomo luyumu munshiku shino. Baku maofesi esu anene lyoonse balatambula makalata kuswa kubamakwesu abenankashi bakayuminishikwa pesule lyakubelenga shakeendaamo basebenshi bakwe Yehova bashomeka ba munshiku shino.

7. Ino nshiinshi nshomweeya pamakani akaamba Paulo pa Bene Loma 14:19-21?

⁷ Inga twayaka bamakwesu abenankashi kwiinda mukwaamba akucita shintu shiyuminisha luumuno mulibungano. Tulatolelela kunyumfwana nabi tupusane mbotubona shintu. Alimwi na umwi waamba shitokweendelana a Malembo, tatumupikishiiwo. Kucakubonenaako, mulibungano lyaku Loma mwakalinga Beneklistu ba Juda alimwi abamwi batakalinga ba Juda. Mulawo wakwe Mose ndyewakacileka kusebensa, bantu bakwe Yehova tabakalinga kuyandika kutolelela kuukonkela pamakani akutalya shakulya shimwi. (Maako 7:19) Kuswabo ciindi cilya Beneklistu ba Juda bamwi bakalinga kwaangulukite kulya shakulya sha mishobo ipusenepusene. Sombi Beneklistu ba Juda bamwi bakalinga kubona ayi tacibete kabotu kulya shakulya isho. Aboobo mulibungano mwakaba kutacatana pamakani aya. Paulo wakayuminisha kuyandika kwa kutolelela kuba muluumuno, aboobo wakaamba ayi: ‘Ncibotu kucileka kulya nyama, kunwa shibilite nabi kucita cintu cimwi cili coonse ceenga calengesha mushominyineesu kufumpulwa.’ (Amubelenge Bene Loma 14:19-21.) Aboobo Paulo wakacafwa bashominyina kushiba shintu mbuli sheeshi mbweenga shapilinganya luumuno pakati ka Beneklistu alimwi alibungano lyoonse. Alimwi alakwe wakalinga kulyaabite kuleya kucita sheenga shafumpula bamwi. (1 Koli. 9:19-22) Aswebo inga twayaka bamwi akuyuminisha luumuno na katuleya kupikishanya abamwi pamakani ngobeelete kulisalila beene.

8. Ino Paulo wakacita buyani mulibungano ndyemwakabuka makani ayandika akalinga kusuni kupilinganya luumuno lwa libungano?

⁸ Paulo wakatondesha cakubonenaako cibotu ca mbweenga twatolelela kuba muluumuno abaabo bapikisha pamakani ayandika abuumbi. Kucakubonenaako, bamwi muciindi ca batumwi bakalinga kuyuminisha ayi Beneklistu bateshi ba Juda balyeelete kupalulwa, mpashi ceebo cakuloonda kupikishikwa ku ba Juda bakunsengwe. (Gala. 6:12) Paulo taakwe kwasuminishawo makani aya napaceyi, nacibi boobo, muciindi cakutalika kupikishanya, Paulo mukuliceesha wakasenga lucafwo ku batumwi alimwi abamanene ku Jelusalemu. (Milimo 15:1, 2) Kucita boobo kwakacafwa Beneklistu kutolelela kuba alusangalalo alimwi aluumuno mulibungano.​—Milimo 15:30, 31.

9. Ino cakubonenaako cakwe Paulo inga twacikonkela buyani?

⁹ Na mulibungano mwaba kupusana kunene, tuleelesha kuyuminisha luumuno kwiinda mukusenga butanjilishi kubaabo Yehova mbwakapa mukuli wakulama libungano. Inga twacana makani acafwa mu mabuku esu na butanjilishi kuswa ku libunga. Inga twayuminisha luumuno mulibungano  kwiinda mukukonkela butanjilishi ubo muciindi cakuyuminisha miyeeyo yesu.

10. Ino nshiinshi shimwi Paulo nshaakacita kwaamba ayi ayuminishe luumuno mulibungano?

¹⁰ Paulo wakayuminisha luumuno kwiinda mukubikila maano kumibo ibotu ya bashominyina, kuteshi kushilubo shabo. Kucakubonenaako, kumamanino ankalata njaakalembela bene Loma, Paulo wakaamba pabantu baanji kwiinda mukubaamba meena alimwi shintu shibotu muntu womwi awomwi nshaakacita. Inga twakonkela cakubonenaako cakwe Paulo kwiinda mukwaamba pamibo ibotu ya bamakwesu abenankashi. Kucita boobo, kulapa kwaamba ayi bamakwesu abenankashi babe bacatene alimwi ici cilayuminisha lusuno mulibungano.

11. Ino inga twacita buyani na twapusana abamwi?

¹¹ Cimwi ciindi, nabibo Beneklistu bashimpite lwakumushimu inga bapusana na kupikishanya. Ishi nsheshakacitikila Paulo alimwi a Banabasi, shicibusa ngwakalinga kusuni abuumbi. Basankwa aba bakapikishanya abuumbi pamakani akuya a Maako na kumushiya pa lweendo lwabo lwa bumishonali. “Bakapikishanya abuumbi akupansaana,” aboobo bakacileka kweendela pomwi. (Milimo 15:37-39) Nacibi boobo, Paulo Banabasi a Maako bakatalika alimwi kunyumfwana, kutondesha ayi bakalinga kubona kuyandika kwa luumuno alucatano mulibungano. Alimwi paciindi cimwi Paulo wakaamba shibotu pali Banabasi a Maako. (1 Koli. 9:6; Kolo. 4:10) Aswebo na twapusana aumwi mulibungano tulyeelete kubandikishanya akumana makani ayo, lyalo akutolelela kubikila maano kumibo yabo ibotu. Na twacita boobo, tulaakuyuminisha luumuno alucatano.​—Efe. 4:3.

12. Ino ngamapensho nshi bamakwesu abenankashi ngobeendaamo?

¹² Tulayaka bamakwesu abenankashi kwiinda mukubacafwa kuyumya lushomo lwabo muli Yehova. Bamwi balasekwa kubeshikamukowa, bantu mbobasebensaabo na kubeshicikolonyinaabo. Bamwi batokwiinda mulipenshi lyakuciswa ciswa na mpashi kulinyumfwa cibiibi ceebo cakukalashikwa kuumwi. Bamwi bekala myaaka iinji mucancine alimwi balindila mamanino abweende bwashintu ubu kwaciindi cilaamfu. Ishi shoonse inga shapa kwaamba ayi lushomo lwa Mwineklistu lweeleshekwe. Isho nshobakalinga kwiindaamo a Beneklistu bamuciindi ca batumwi. Ino Paulo wakacita buyani kwaamba ayi ayuminishe bashominyina?

13. Ino Paulo wakacita buyani kwaamba ayi acafwe baabo bakalinga kusekwa paceebo ca nshobashoma?

¹³ Paulo wakayuminisha bashominyina kwiinda mukusebensesha Malembo. Kucakubonenaako, mpashi Beneklistu ba Juda tabakalinga kucishiwo shakwaamba kubeshikamukowa batakalinga Beneklistu abo bakalinga kuyuminisha ayi bupailishi bwa ba Juda bwakalinga kwiindite bupailishi bwa Beneklistu. Ncakutatoonsha kwaamba ayi nkalata Paulo njaakalembela bene Ebulu yakabayuminisha abuumbi Beneklistu aba. (Ebu. 1:5, 6; 2:2, 3; 9:24, 25) Nshaakalemba shakalinga kweelete kubacafwa kushiba mbobakalinga kweelete kukumbula baabo bakalinga kubapikisha. Munshiku shino, inga twacafwa bashominyineesu basekwa kubamwi kushiba mbweenga basansulula nshobashoma kwiinda mukusebensesha mabuku esu aamba shamu Baibo. Alimwi na bacanike balasekwa kubamwi ceebo ca kushoma ayi Lesa ngowakalenga shintu shoonse, inga twabacafwa kucana makani mubuloshuwa yamu Cisungu ya Was Life Created? aya The Origin of Life​—Five Questions Worth Asking, ayo eenga abacafwa kusansulula citupa kushoma ayi Lesa ngowakalenga shintu shoonse shicite buumi.

14. Ino Paulo wakacita buyani nabi kwaamba ayi wakalinga kucite shakucita shiinji muncito yakushimikila?

¹⁴ Paulo wakayuminisha bashominyina kutondesha lusuno kwiinda mukucita “shibotu.” (Ebu. 10:24) Wakacafwa bashominyina kwiinda  mushintu nshaakalinga kwaamba akucita. Kucakubonenaako, ndyekwakalinga nsala inene ku Judeya, Paulo wakacafwilisha bashominyina kwiinda mukubatolela shintu shimwi nshobakalinga kuyandika. (Milimo 11:27-30) Alimwi nabi kwaamba ayi Paulo wakalinga kucite shakucita shiinji muncito yakushimikila, lyoonse wakalinga kucana nshila mbweenga wacafwa baabo bakalinga kubulishite shintu shakumubili. (Gala. 2:10) Ici cakapa kwaamba ayi acafwe bashominyina kushoma kwaamba ayi Yehova alaakubalama. Aswebo munshiku shino, inga twayaka lushomo lwa bamakwesu abenankashi na katwaaba ciindi cesu, nkusu, alimwi alushibo lwesu kubacafwa na bapolelwa mapensho anene. Nshila imwi mbweenga twacafwilisha bashominyineesu nkwiinda mukupa shabupe shakucafwilisha ncito ya nsengwe yoonse. Munshila iyi alimwi anshila shimwi, inga twacafwa bamakwesu abenankashi kushoma kwaamba ayi Yehova teshi akabalekelesheewo.

15-16. Ino inga twacita buyani kwaamba ayi tuyuminishe baabo bakaboolela mwisule?

¹⁵ Paulo wakatolelela kuyuminisha baabo bakalinga baboolela mwisule. Wakabanyumfwila nkumbu akubandikaabo munshila iyuminisha. (Ebu. 6:9; 10:39) Kucakubonenaako, munkalata njaakalembela bene Ebulu wakasebensesha bunene maswi akalinga kutondesha ayi soonse inga twakonkela makani ngakaamba. (Ebu. 2:1, 3) Bweenka mbuli Paulo, aswebo tulatolelela kucafwa baabo bakaboolela mwisule. Tulabayuminisha kwiinda mukubatondesha ayi tulababikila maano. Aboobo tulabacafwa kushiba ayi tulibasuni. Kwaamba munshila iyuminisha inga kwabacafwa abuumbi bweenka mbuli maswi abotu mbwaayuminisha.

¹⁶ Paulo wakayuminisha bashominyina kushiba kwaamba ayi Yehova wakalinga kubona shibotu nshobakalinga kucita. (Ebu. 10:32-34) Aswebo nsheenga twaciita ndyetutoyuminisha mushominyineesu wakaboolela mwisule. Inga twamwiipusha kwaamba mbwakeeya cancine na kumuyuminisha  kuyeeya Yehova mbwakamucafwawo. Inga twamuyuminisha kushiba kwaamba ayi Yehova taakwe kuluba lusuno ndwakalinga kutondesha kale kale alimwi teshi akamulekeleshewo kunembo. (Ebu. 6:10; 13:5, 6) Mpashi kubandika abashominyineesu munshila iyi, inga kwabayuminisha kutolelela kusebensela Yehova.

17. Ino nshiinshi nsheenga twatolelela kwiiya kucita?

¹⁷ Bweenka mbuli shikuyaka mbwaya panembo muncito yakwe mukuya kwaciindi, aswebo mukuya kwaciindi inga tweeya mbweenga twaya panembo mukuyuminisha bamwi. Inga twacafwa bamwi kuliyumya ndyebatokwiinda mumapensho kwiinda mukubandikaabo shakubonenaako sha baabo bakacikonsha kuliyumya munshiku shakale kale. Inga twayuminisha luumuno kwiinda mukwaamba shibotu nshetubona mu bamwi, kuleya sheenga shapilinganya luumuno, alimwi akuboosha luumuno na twapusana abamwi. Alimwi inga twatolelela kuyumya lushomo lwa bamakwesu abenankashi kwiinda mukubandikaabo njiisho shiyandika shamu Baibo, kubacafwilisha ashintu shakumubili, alimwi akuyuminisha baabo bakaboolela mwisule.

18. Ino nciinshi ncomushinishite kucita?

¹⁸ Bamakwesu abenankashi basebensa ncito shakuyaka misena njetusebensesha muncito yakwe Lesa balisangalete akulinyumfwa ayi taakuwo ncebabulishite. Aswebo inga twalinyumfwa boobo na katucafwa bamakwesu abenankashi kuyumya lushomo lwabo. Mubupusano akuyaka maanda ayo esa mukunyonyooka mukuya kwaciindi, kuyaka na kuyuminisha bamwi kulaleta shoolwe sha muyayaya! Aboobo atube bashinishite “kuyuminishanya akuyakana.”​—1 Tesa. 5:11, NWT.