1. Ino mbweelesho nshi Josefu mbwakacana, alimwi ino wakacita buyani?

 JOSEFU mwanaakwe Jakobo wakacana bweelesho buyumu. Muka Potifa wakamulwiita ayi: “Ona andime.” Josefu wakakaka. Ano mpashi bamwi munshiku shino inga baliipusha ayi, ‘Ino nciinshi cakapa kwaamba ayi Josefu akome bweelesho ubu?’ Potifa paciindi ici taakalingawo. Alimwi Josefu wakalinga musha muŋanda yakwe Potifa, aboobo kukaka kukonkela nshaakamulwiita mwanakashi uyu, kwakalinga kusa mukumuletela mapensho. Nacibi boobo, Josefu wakatolelela kukaka koona akwe. Ino nceebonshi? Josefu wakaamba ayi: “Ono nebo inga ndacita buyani cintu cibiibi ca mushobo uyu pameenso akwe Lesa?”​—Mata. 39:7-12.

2. Ino Josefu wakashiba buyani ayi kucita bulale nkubisha pameenso akwe Lesa?

² Ino Josefu wakashiba buyani ayi Lesa wakwe alabona bulale kuba “cintu cibiibi” abuumbi? Bene Isilaeli bakesa mukupekwa Mulawo wakwe Mose uyo wakalinga kwiilikaawo amulawo wakwaamba ayi “Utaciti bulale,” mpashi pesule lya myaaka 200. (Kulo. 20:14) Sombi Josefu wakalinga kumushi kabotu Yehova, aboobo wakalinga kucishi mbweenga walinyumfwa pamakani akucita bulale. Kucakubonenaako, cilyeelete kwaamba ayi Josefu wakalinga kucishi ayi kweelana abubaambo bwakwe Yehova cikwati cilyeelete kuba pakati ka musankwa amwanakashi beebene. Alimwi cilyeelete kwaamba ayi wakanyumfwa Yehova mbwakashitilisha bankambiyakwe ba Saala mankanda obilo kwaamba ayi batolelele kushomeka kubebaabo. Alimwi ubu bweenka Lesa mbwaakacita akuli Labeka mukaakwe Isaki. (Mata. 2:24; 12:14-20; 20:2-7; 26:6-11) Cilyeelete kwaamba ayi kuyeeya pamakani aya kwakacafwa Josefu kushiba ciluleme a citaluleme pameenso akwe Lesa. Mukwiinga Josefu wakalinga kusuni Yehova, wakalinga  kushinishite kucita nshaakalinga kucishi ayi Yehova nshaasuni ayi acite.

3. Ino nshiinshi nsheshi twiiye?

³ Ncakutatoonsha kwaamba ayi amwebo mulisuni kucita shiluleme. Ano soonse tatumaninite, alimwi na twabula kucenjela, inga twatalika kukonkela bantu bakucishi mbobabona shiluleme. (Isa. 5:20; Loma. 12:2) Aboobo tutokwiiya bululami ncocaamba alimwi akucita shiluleme mbokutucafwa. Lyalo tutoobandika shintu shotatwe sheenga shatucafwa kutolelela kusuna njiisho shakwe Yehova.

4. Ino bantu baanji balayeeya ayi muntu ululeme ngumuntu uli buyani?

⁴ Bantu balayeeya ayi muntu ululeme, ngumuntu ulisumpula, ubonabo shilubo mu bamwi, na ulibona ayi uliindite bamwi. Ano iyi mibo Lesa taisuniiwo nabibo paniini. Yesu ndyaakalinga pacishi capanshi, wakabakalalila abuumbi bamatanjili ba bupailishi ceebo ca kulibona ayi bakalinga kululeme kwiinda bamwi. (Shiku. 7:16; Luka 16:15) Muntu ucita shintu Yehova nshaamba ayi shililuleme taaliboni ayi uliluleme kwiinda bamwi.

5. Kweelana a Baibo nshoyaamba, ino bululami cilaamba nshi? Amwaambe shakubonenaako.

⁵ Bululami ngumubo ubotu abuumbi. Aboobo inga twaamba ayi nkucita shintu Yehova Lesa nshaabona ayi shililuleme. Mu Baibo, maswi akwaamba ayi bululami alasansulula kukonkela njiisho shiinditewo shakwe Yehova. Kucakubonenaako, Yehova wakapa mulawo wakwaamba ayi abo bacita makwebo balyeelete kusebensesha “shipimo shancinencine.” (Duto. 25:15) Mumushobo waci Ebulu maswi akasebenseshekwa palilembo ili inga asansululwa ayi cipimo “ciluleme.” Aboobo Mwineklistu usuni kucita shiluleme pameenso akwe Lesa, alyeelete kushomeka ndyaatocita makwebo. Muntu usuni kucita shiluleme alalinyumfwa cibiibi na bamwi kabalyatililwa. Alimwi kwaamba ayi “asangalashe [Yehova] cakumaninina,” muntu usuni kucita shiluleme alataanguna kuyeeya Yehova mbweshi abone sheesho nshaasuni kusalawo.​—Kolo. 1:10.

6. Ino nceebonshi milawo yakwe Yehova yaamba pamakani ashiluleme ashitaluleme inga twaishoma? (Isaya 55:8, 9)

⁶ Baibo ilaamba ayi bululami bulaswa kuli Yehova. Aboobo, Yehova aleetwa ayi ‘kukala bululami.’ (Jele. 50:7, NWT) Mbuli Mulengi, Yehova eenkabo ngoocite nkusu shakutulwiita ciluleme a citaluleme. Mukwiinga tatumaninite alimwi tulabisha, inga tatucikoonshi palweesu kushiba ciluleme a citaluleme. Ano mukwiinga Yehova tacite kampenda, lakwe eenkabo ngoocishi ciluleme a citaluleme. (Tus. 14:12; amubelenge Isaya 55:8, 9.) Nacibi boobo, mukwiinga twakalengwa mucikoshanyo cakwe Lesa, inga twacikonsha kukonkela nshaamba ayi shiluleme akuleya nshaamba ayi tashiluleme. (Mata. 1:27) Alimwi tulisuni kucita boobo. Mukwiinga tulimusuni Ishiwesu, tuleelesha kukonkela cakubonenaako cakwe kushika peela nkusu shesu.​—Efe. 5:1.

7. Ino nceebonshi tulayandika kukonkela milawo abubaambo bwakabikwa? Amwaambe cakubonenaako.

⁷ Kukonkela milawo yakwe Yehova pamakani ashiluleme ashitaluleme kulatucafwa. Ino nciinshi nceenga twaambila boobo? Amuyeeyebo ceenga cacitika na banki yomwi ayomwi ilicite mulawo upusene pamakani akuceya na kufula kwa maali. Inga kwaba kupilingana. Alimwi na dokota nabi naasi uli woonse alakonkelabo milawo yakwe mwiine pamakani akushilika, bantu baanji inga bafwa. Aboobo kukonkela milawo abubaambo bwakabikwa kulashitilisha. Akwalo kukonkela njiisho shakwe Lesa pamakani ashiluleme ashitaluleme kulatushitilisha.

8. Ino nshoolwe nshi nsheshi bakacane abo basuni kucita shiluleme?

⁸ Yehova alabapa shoolwe abo beelesha kukonkela njiisho shakwe. Wakashomesha ayi: ‘Balululeme balaakubwesa cishi ayi ncabo, Alimwi balaakunookalaamo kwamuyayaya.’ (Kulu.  37:29) Amuyeeyebo mbweenga bantu bekala muluumuno, kuba bacatene akuba basangalete na muntu uli woonse kaakonkela njiisho shakwe Yehova! Ubu mbobuumi Yehova mbwaasuni ayi munokala. Aboobo soonse tulicite sheebo shibotu sheelete kutupa kusuna Yehova nshaamba ayi shililuleme! Ino inga twacita buyani kwaamba ayi tutolelele kusuna bululami? Amuleke tubandike shintu shotatwe.

9. Ino nciinshi ceenga catucafwa kusuna kucita shiluleme?

⁹ Cakutaanguna: Amusune Wakabika milawo. Kwaamba ayi tusune bululami, tulyeelete kutolelela kusuna Wooyo wakabika mulawo wa nshotweelete kubona ayi shililuleme anshotweelete kubona ayi nshibiibi. Kusuna Yehova abuumbi kulaakutucafwa kusuna kukonkela njiisho shakwe shiluleme. Kucakubonenaako: Naakwiinga Adamu a Efa bakalinga kusuni Yehova abuumbi, naakwiinga bakanyumfwila mulawo wakwe ululeme.​—Mata. 3:1-6, 16-19.

10. Ino Abulaamu wakacita buyani kwaamba ayi anyumfwishishe kabotu Yehova mbwabona shintu?

¹⁰ Taakuwo weenga wasuna kubisha bweenka mbuli bwakacita Adamu a Efa. Inga twacikonsha kuleya nshobakacita na twatolelela kwiiya pali Yehova, kulumba pamibo yakwe, akweelesha kunyumfwishisha mbwaabona shintu. Kucita boobo kulaakutucafwa kumusuna abuumbi Yehova. Amuyeeye pacakubonenaako cakwe Abulaamu uyo wakalinga kusuni Yehova abuumbi. Nabi paciindi ndyecakalinga ciyumu kunyumfwishisha Yehova nshaakasala, Abulaamu taakwe kupondokela Yehova. Sombi wakeelesha kumushiba kabotu Yehova. Kucakubonenaako, ndyaakashiba ayi Yehova wakalinga kusuni kunyonyoola ndabala ya Sodoma a Gomola, Abulaamu pakutaanguna wakaloonda ayi “Moomboloshi wacishi coonse” inga wanyonyoola baluleme pantu pomwi ababiibi. Kuli Abulaamu ici cakalinga ncintu Yehova nceenga taacitiwo, aboobo mukuliceesha wakeepusha Yehova miipusho ipusenepusene. Yehova wakamukalikila moyo akumukumbula. Mukweelaako, Abulaamu wakesa mukushiba kwaamba ayi Yehova alabona shili mu moyo wa muntu uli woonse alimwi alaanisha baabo bacite mulandu.​—Mata. 18:20-32.

11. Ino Abulaamu wakatondesha buyani ayi wakalinga kumusuni abuumbi Yehova akumushoma?

¹¹ Abulaamu wakakumwa abuumbi amubandi ngwakalinga kucite a Yehova pamakani andabala ya Sodoma a Gomola. Cilyeelete ici cakamupa kumusuna akumulemeka abuumbi Ishiwesu. Ano ndipakeenda myaaka, Abulaamu wakeenda mubukaalo buyumu bwakeelesha kucinka manungo kwakwe muli Yehova. Yehova wakamulwiita ayi abenge Isaki mwanaakwe musankwa ngwakalinga kusuni abuumbi. Paciindi ici Abulaamu wakalinga kumushi kabotu Lesa wakwe, aboobo taakwe kumwiipushawo miipusho. Abulaamu wakalibambila kucita nshaakamulwiita Yehova. Nacibi boobo, amuyeeyebo mbocakamucisa kumoyo ndyaakalinga kulibambila kukumanisha mukuli uyu! Cilyeelete kwaamba ayi wakayeeyawo abuumbi pamakani ngakeeya pali Yehova. Wakalinga kucishi kwaamba ayi Yehova inga taacitiwo cintu citaluleme. Kweelana ashakaamba mutumwi Paulo, Abulaamu wakayeeya ayi Yehova alaakumubusha Isaki mwanaakwe ngwakalinga kusuni abuumbi. (Ebu. 11:17-19) Alimwi Yehova mwiine ngowakashomesha ayi Isaki alaakuba mushali wacishi coonse, ano paciindi ici Isaki taakalinga kuciteewo baana. Abulaamu wakalinga kumusuni abuumbi Yehova alimwi wakalinga kushomete kwaamba ayi Baishi lyoonse balacita shiluleme. Aboobo nabi kwaamba ayi tacakalinga cuubu wakatondesha lushomo akunyumfwila.​—Mata. 22:1-12.

12. Ino cakubonenaako cakwe Abulaamu inga twacikonkela buyani? (Kulumbaisha 73:28)

¹² Ino cakubonenaako cakwe Abulaamu inga twacikonkela buyani? Citaanshi, tulyeelete kutolelela kwiiya pali Yehova. Kucita boobo, kulaakutucafwa  kuyumya bushicibusa bwesu anguwe akumusuna abuumbi. (Amubelenge Kulumbaisha 73:28.) Tulaakwiisha njeelacaamba yesu kukonkela Yehova mbwaabona shintu. (Ebu. 5:14) Aboobo na muntu umwi watweelesha ayi tucite cintu cimwi citabete kabotu, tulaakukaka. Teshi tukayeeyewo kucita cili coonse ceenga cakalasha Ishiwesu akunyonyoola bushicibusa bwesu anguwe. Ino nciinshi cimwi nceenga twaciita kwaamba ayi tutondeshe ayi tulisuni bululami?

13. Ino inga twacita buyani kwaamba ayi tutolelele kucita shiluleme? (Tushimpi 15:9)

¹³ Cabili: Amweeleshe bushiku abushiku kucita shitondesha ayi mulisuni bululami. Na tulisuni kuyumya mubili, bushiku abushiku tulyeelete kucita shintu shiyumya mubili. Akwalo kusuna shintu Yehova nshaamba ayi shililuleme kulayandika kusebensa cankusu bushiku abushiku. Ici teshi cintu ciyumu abuumbi kucita. Yehova taatulangili kucita nsheenga tatucikoonshi. (Kulu. 103:14) Wakatushomesha ayi ‘alisuni muntu weelesha kukonkela bululami.’ (Amubelenge Tushimpi 15:9.) Tulatolelela kusebensa cankusu na kuli cintu cimwi ncetusuni kukumanisha muncito yakwe Yehova. Ubu mbocibete na tulisuni kutolelela kucita shiluleme. Alimwi Yehova alaakutucafwa cakukalika moyo kwaamba ayi tuye panembo mukuya kwaciindi.​—Kulu. 84:5, 7.

14. Ino “cakulishitilisha ca pacaamba cabululami” nciinshi, alimwi ino nceebonshi cilayandika?

¹⁴ Yehova mulusuno alatucafwa kwiibaluka kwaamba ayi kucita shiluleme teshi mukuli ulemya. (1 Joni 5:3) Sombi ncintu citucafwa kucana kushitilishikwa nkotuyandika bushiku abushiku. Sa mutokwiibaluka shiilikitwe pa shilwanisho shoonse shakumushimu mutumwi Paulo nshaakaamba? (Efe. 6:14-18) Ino ncilwanisho cili cakalinga kushitilisha moyo wakwe shilumamba? ‘Ncakulishitilisha ca pacaamba cabululami,’ ico ciimikaninaako njiisho shakwe Yehova shiluleme. Bweenka cakulishitilisha ca pacaamba mbocishitilisha moyo wiine, ashalo njiisho shakwe Yehova shiluleme inga shashitilisha moyo wesu wacikoshanyo, na buntu bwamukati. Aboobo amube bashinishite kwiilikaawo cakulishitilisha ca pacaamba cabululami pa shilwanisho shanu shakumushimu!​—Tus. 4:23.

15. Ino cakulishitilisha ca pacaamba cabululami inga mwacifwala buyani?

 ¹⁵ Ino cakulishitilisha ca pacaamba cabululami inga mwacifwala buyani? Inga mwacifwala kwiinda mukuyeeya Yehova nshaasuni ayi mucite ndyemutosala shakucita bushiku abushiku. Kamutana kutalika mubandi, kusala nyimbo sha kukutika, kweebela filimu, na kubelenga libuku, amuliipushe ayi: ‘Ino ishi shitoompa kunooyeeya nshi? Sa inga shasangalasha Yehova? Na sa shilayuminisha shintu Yehova nshaabona ayi tashiluleme mbuli bufuule, inkondo, bulyaabi akulisuna?’ (Filip. 4:8) Na mwasala kucita shintu shisangalasha Yehova, mulaakushitilisha moyo wanu kukuyungwa ashintu shibiibi.

16-17. Ino shaamba Isaya 48:18, inga shatucafwa buyani kushoma kwaamba ayi inga twacikonsha kutolelela kukonkela njiisho shakwe Yehova shiluleme?

¹⁶ Sa cimwi ciindi mulalisukama na inga mwacikonsha kutolelela kukonkela njiisho shakwe Yehova shiluleme bushiku abushiku alimwi mwaaka amwaaka? Amuyeeye cakubonenaako Yehova ncaakaamba ncetucana pa Isaya 48:18. (Amubelenge.) Yehova wakashomesha ayi bululami bwesu bulaakuba “anga ngamaaba a mulweenge.” Amuyeeye ayi muliimfwi kwitala lya lweenge lunene, kamweebela maaba kaapabooka. Sa inga mwalisukama ayi bushiku bumwi maaba ayo alaakucileka kupabooka? Sobwe! Mulishi kwaamba ayi maaba ayo nkwaali kuswabo kale kale, alimwi alaakutolelela kupabooka.

¹⁷ Bululami bwanu abwalo inga bwaba bweenka mbuli maaba amulweenge! Munshila nshi? Na kuli nshemusuni kusalawo, amutaangune kuyeeya nsheenga Yehova wasuna ayi mucite. Lyalo amucite ceenka ico. Nabi ca kusalawo ciyume buyani, Ishiwanu shilusuno alaakumupa nkusu akumucafwa kutolelela kucita shiluleme bushiku abushiku.​—Isa. 40:29-31.

18. Ino nceebonshi tulyeelete kuleya koombolosha bamwi kweelana ambotubona shintu?

¹⁸ Catatu: Amushiye boomboloshi mumaansa akwe Yehova. Ndyetutokweelesha cankusu kucita shoonse Yehova nshaasuni ayi tunoocita, tatweelete kulyeelanya kubamwi akulibona ayi tuliluleme kwiinda bamwi. Tatucitewo nkusu shakusala na bamwi batoocita Yehova nshaasuni ayi banoocita. Tulyeelete kwiibaluka kwaamba ayi Yehova ngo “Moomboloshi wa cishi coonse.” (Mata. 18:25) Yehova taakwe kutupa mukuli wa koombolosha bamwi. Nceceeco Yesu ncakaambila mulawo wa kwaamba ayi: ‘Amucileeke koombolosha bamwi kwaamba ayi amwebo mutakoomboloshekwi.’​—Mate. 7:1. *

19. Ino Josefu wakatondesha buyani ayi alashoma boomboloshi bwakwe Yehova?

¹⁹ Amuyeeye cakubonenaako ca musankwa ululeme Josefu. Wakaleya koombolosha bamwi, nabi kwaamba ayi bamwi bakamucitila shibiibi. Bamakwabo bakamuuma akumuulisha mubusha, akulwiita beshiwabo ayi Josefu wafwa. Pesule lya myaaka iinji Josefu wakaba pomwi alimwi amukwashi wakwe. Alimwi mukwiinga paciindi ici Josefu wakalinga mweendeleshi ucite nkusu, naakwiinga wakayeeya kubooshesha bamakwabo cishole. Bamakwabo bakaloonda ayi mpashi atoobacita bweenka mbobakamucita, nabi kwaamba ayi bakasenga kulekelelwa pashibiibi nshebakacita. Nacibi boobo, Josefu wakabalwiita ayi: “Mutaloondi, nebo nshikoonshi kulibika mumusena wakwe Lesa.” (Mata. 37:18-20, 27, 28, 31-35; 50:15-21) Josefu wakalinga kucishi kwaamba ayi Yehova eenkabo ngowakalinga kucite nkusu sha koombolosha bamakwabo.

20-21. Ino inga twacita buyani kwaamba ayi tuleye kulibona anga tuliluleme kwiinda bamwi?

²⁰ Bweenka mbuli Josefu, aswebo tulashiya mukuli wakoombolosha mumaansaakwe Yehova. Kucakubonenaako, tatuyeeyi ayi tulishi cipa  kwaamba ayi bamakwesu abenankashi bacite shintu munshila imwi. Tatucitewo nkusu shakushiba shili mumoyo wa muntu; ‘Yehova ngoombolosha miyeeyo.’ (Tus. 16:2) Alibasuni bantu boonse, bacite nkulilo shipusenepusene alimwi amilawo. Alimwi alatuyuminisha ayi “amucalule myoyo yanu.” (2 Koli. 6:13, NWT) Tulisuni kutondesha lusuno kubamakwesu boonse mumukwashi wesu wakumushimu, kuteshi kubayeeyela shibiibi.

²¹ Ici cileelikaawo akutayeeya shibiibi pabaabo bateshi bamulibungano. (1 Timo. 2:3, 4) Sa inga moombolosha shikamukowa uteshi Kamboni kwiinda mukwaamba ayi, “Balya teshi bakesewo mucancine”? Sobwe, kucita boobo inga kwaba kulipa mukuli ngotutana kupekwa akulibona kululama. Yehova atoopa coolwe “bantu mumisena yoonse” kwaamba ayi baane. (Milimo 17:30) Mutaluubi kwaamba ayi abo balibona ayi baliluleme kwiinda bamwi, Yehova alabona ayi tabaluleme.

22. Ino nceebonshi mulishinishite kutolelela kusuna kucita shiluleme?

²² Kusuna bululami bwakwe Yehova kulaakutupa kuba basangalete akutucafwa kutondesha cakubonenaako cibotu kubamwi ico ceshi cikape kwaamba ayi batusuune akusuna Lesa abuumbi. Atutolelele ‘kufwa nyotwa ansala ya bululami.’ (Mate. 5:6) Amushome kwaamba ayi Yehova alabona kweelesha kwanu alimwi alasangalala na wabona mbomutooya panembo. Mutalisukami ceebo ca bantu bamucishi mbobatolelela kucita shitaluleme! Lyoonse amwiibaluke kwaamba ayi ‘Yehova alisuni baluleme.’​—Kulu. 146:8.