1. Ino nshintu nshi shibotu bacanike baanji nshebakacikonsha kucita?

 MWAAKA uli woonse Beneklistu bacanike baanji balabombekwa. Sa amwebo muli wacanike wakabombekwa conoono? Na mbocibete kuli ndimwe, Yehova alimwi abamakwesu abenankashi balisangalete ceebo ca ndimwe! (Tus. 27:11) Amuyeeyebo shintu nshomwakacikonsha kucita. Kucakubonenaako, mpashi mwakeeya Baibo cakubikila maano kwa myaaka iinji. Nshomwakeeya shakamucafwa kushoma kwaamba ayi Baibo nga Maswi akwe Lesa. Alimwi ciinditeewo, kwiiya kwakamucafwa kushiba alimwi akusuna Yehova Mulembi wa Baibo. Lusuno lwanu pali Yehova lwakayuminaako, aboobo mwakasalawo kwaaba buumi bwanu kuli nguwe akubombekwa. Mwakasala kabotu abuumbi!

2. Ino nshiinshi nsheshi twiiye mumutwi uyu?

 ² Mpashi kamutana kubombekwa mwakeenda mumapensho akapa kwaamba ayi cibe ciyumu kushomeka kuli Yehova. Nacibi boobo, ndyemutooya cikula mulaakucana meelesho apya. Satana alaakweelesha kucita sheenga shamupa kwaamba ayi mucileeke kusuna Yehova akumusebensela. (Efe. 4:14) Amube bashinishite kwaamba ayi sha mushobo uyo shitakamucitikili. Ino nshiinshi sheenga shamucafwa kutolelela kushomeka kuli Yehova akucita kweelana ancomwakashomesha? Mulyeelete kusebensa cankusu kwaamba ayi mutolelele kuya panembo lwakumushimu. (Ebu. 6:1) Ino nshiinshi sheenga shamucafwa kucita boobo?

3. Ino Beneklistu boonse balyeelete kucita buyani pesule lyakubombekwa?

³ Pesule lyakubombekwa, soonse tulyeelete kukonkela maswi mutumwi Paulo ngaakalwiita bashominyina baku Efeso. Wakabayuminisha  ayi bakalinga kweelete kukula mbuli Beneklistu. (Efe. 4:13) Ici cilaamba ayi bakalinga kweelete kutolelela kuya panembo. Paulo wakakoshanisha kuya panembo kwa basebenshi bakwe Yehova ku kukula kwa mwaana. Na mwaana washalwa bashali balakondwa alimwi balamusuna. Nacibi boobo, mwaana uyo alyeelete kukula. Aboobo mukuya kwaciindi alyeelete kucileka “nshila sha bwanike.” (1 Koli. 13:11) Ubo mbocibete aku Beneklistu. Pesule lyakubombekwa, tulyeelete kutolelela kuya panembo lwakumushimu. Amuleke tubandike sheenga shatucafwa kucita boobo.

4. Ino ngumubo nshi weenga wamucafwa kutolelela kuya panembo lwakumushimu? Amusansulule. (Bene Filipi 1:9)

⁴ Amutolelele kusuna Yehova. Ncakutatoonsha kwaamba ayi mulimusuni abuumbi Yehova. Sombi mulyeelete kutolelela kumusuna abuumbi. Munshila nshi? Mutumwi Paulo wakaambawo nshila yomwi njotucana palilembo lya Bene Filipi 1:9. (Amubelenge.) Paulo wakapaila ayi bene Filipi “bakomene mulusuno.” Aboobo lusuno lwesu pali Yehova inga lwakomenenaako. Munshila nshi? Inga lwakomenenaako kwiinda mukuba ‘alushibo lwancinencine alimwi akunyumfwishisha koonse.’ Kumushiba kabotu abuumbi Yehova kulaakutucafwa kutolelela kumusuna abuumbi akubona kuyandika kwa mibo yakwe ambwacita shintu. Tulatalika kusunishisha kucita shimusangalasha akuleya kucita cili coonse ceenga camukalasha. Tulacita nsheenga twacikonsha kwaamba ayi tunyumfwishishe kuyanda kwakwe ambweenga twakukonkela.

5-6. Ino nciinshi ceenga catucafwa kumusuna abuumbi Yehova? Amusansulule.

⁵ Yesu wakalinga kukonkela mibo yakwe Yehova cakumaninina. Aboobo kumushiba kabotu kulaakutucafwa kumusuna abuumbi Yehova. (Ebu. 1:3) Nshila ibotu yeenga yatucafwa kumushiba kabotu Yesu nkubelenga mabuku ali 4 Amakani Abotu. Na tamuna kutalika kubelenga Baibo bushiku abushiku, inga mwatalika kwiinda mukubelenga mabuku aya aamba pali Yesu. Ndyemutobelenga makani aamba pali Yesu, amubikile maano kumibo yakwe. Bantu bakalinga kunyumfwa kabotu kuba anguwe alimwi akubandika akwe. Wakalinga kukumbata baana baniini calusuno. (Maako 10:13-16) Yesu wakalinga kabotu abuumbi cakwaamba ayi bashikwiiya bakwe bakalinga kulinyumfwa kwaanguluka kumulwiita mbobakalinga kulinyumfwa. (Mate. 16:22) Tulishi ayi Yesu wakalinga kukonkela cakubonenaako ca Baishi, aboobo ici cilatwiisha ayi Yehova ngu Lesa ngweenga twaanguluka kubandika akwe. Inga twabandika akwe mumupailo. Ndyetutopaila inga twamulwiita cili coonse ncetutoyeeya na mbotutoolinyumfwa. Tulashoma ayi inga wakumbula mupailo wesu. Alitusuni alimwi alatubikila maano.​—1 Pit. 5:7.

⁶ Yesu wakalinga kubanyumfwila nkumbu bantu. Mutumwi Mateyo wakalemba ayi: ‘Ono ndyaakabona bantu baanji, wakabanyumfwila nkumbu mukwiinga bakalinga kulemete akupenga anga nimbelele shitacite mweembeshi.’ (Mate. 9:36) Ino Yehova alalinyumfwa buyani? Yesu wakaamba ayi: ‘Mbweeke ubo ba Ta bali kwiculu tabasuni kwaamba ayi, womwi wa baaba baana baniini alobe.’ (Mate. 18:14) Maswi aya alatupa kusangalala mukwiinga alatucafwa kushiba kwaamba ayi Yehova alitusuni abuumbi. Aboobo kumushiba kabotu Yesu, kulaakutucafwa kumusuna abuumbi Yehova.

7. Ino kuba pomwi a Beneklistu bashimpite lwakumushimu inga kwamucafwa buyani?

⁷ Amwebo inga mweeya kutondesha lusuno akukula lwakumushimu kwiinda mukucana ciindi cakuba pomwi abamakwesu abenankashi ba mulibungano lyanu bashimpite lwakumushimu. Ndyemutoocita boobo amubone mbobasangalete. Balikondetwe abuumbi kwaamba ayi bakasalawo kusebensela Yehova.  Amubeepushe nshebakeendaamo muncito yakwe Yehova. Na kuli cimwi ciyandika ncemusuni kusalawo, amubeepushe kwaamba ayi bamucaafwe. Mutaluubi kwaamba ayi ‘na kuli beshikupandako maano baanji kulaba kuswitilila.’​—Tus. 11:14.

8. Ino inga mwacita buyani na mulatoonsha Baibo nshoyaamba?

⁸ Amucileeke kutoonsha. Bweenka mbotwaambawo mu  palagilafu 2, Satana alacita sheenga shamupa kwaamba ayi mwaalilwe kuba alushomo luyumu akuyumya bushicibusa bwanu a Yehova. Nshila yomwi njeenga wasebensesha nkumupa kutalika kutoonsha na nshomwakeeya kuswa mu Baibo nshancine. Kucakubonenaako, mpashi bantu bamwi inga beelesha kumupa kutalika kushoma ayi Lesa teshi ngowakatulenga sombi twakabaako kwiinda mukusanduka. Mpashi kubwanike tamuna kwayeeyawo kale makani aya, ano mukwiinga mwakuula mpashi ngomakani ngomutokwiiya kucikolo. Mpashi nshobaamba bamatica kucikolo inga shaboneka anga nshancine kuli ndimwe. Nacibi boobo, mpashi tabana kwiiyawo kale na ncakwiila kuli Mulengi. Mutalubi njiisho njetucana pa Tushimpi 18:17 yaamba ayi: “Muntu utalikilako kukonka makani ulaboneka anga ngooluleme, kushikila shimulandunyina na watalika kumwiipusha miipusho.” Aboobo muciindi cakushoma shintu shoonse nshemwiiya kucikolo, mulyeelete kwiiya cakubikila maano Baibo nshoyaamba. Amulangoole makani kuswa mumabuku esu. Amubandike abamakwesu abenankashi abo bakalinga kushoma njiisho yakusanduka kabatana kwiiya cancine. Amubeepushe cakabapa kushoma kwaamba ayi ncakwiila kuli Mulengi utusuni. Kucita boobo inga kwamucafwa kucana bumboni butondesha ayi ncakwiila kuli Mulengi.

9. Ino mweeya nshi ku shakeendaamo ba Melissa?

⁹ Nankashi waliina lya Melissa wakacikonsha kucileka kutoonsha ceebo cakwiiya pamakani ashilengwa. * Wakaamba ayi: “Kucikolo bamatica balasansulula njiisho yakusanduka munshila ipa bantu kuyeeya ayi makani aya ngancine. Pakutaanguna nshindakalinga kusuniiwo kulangoola makani, mukwiinga ndakalinga kuloonda ayi ndaakucana ayi njiisho yakusanduka njancine. Nacibi boobo, ndakatalika kuyeeya ayi Yehova taasuniiwo ayi tunoomusebenselabo kwakubula kushiba ncetutoocitila boobo. Aboobo ndakatalika kulangoola makani. Ndakabelenga libuku lya Is There a Creator Who  Cares About You? alimwi a buloshuwa ya Was Life Created? aya The Origin of Life​—Five Questions Worth Asking. Aya ngomakani ngondakalinga kulangoola. Naakwiinga ndakafwambaana kwaashiba.”

10-11. Ino nciinshi ceenga camucafwa kutolelela kusoonoka bufuule? (1 Bene Tesalonika 4:3, 4)

¹⁰ Amukake mibo itabete kabotu. Mumyaaka ya bucikula bwangu lusuno lwakoonana lulakomena abuumbi, alimwi mpashi bamwi inga bamukakatisha kucita bufuule. Ico Satana ncaasuni ayi mucite. Ino inga mwacita buyani kwaamba ayi muleye bweelesho ubu? (Amubelenge 1 Bene Tesalonika 4:3, 4.) Amupaile kuli Yehova akumulwiita mbomutoolinyumfwa alimwi akumusenga kwaamba ayi amupe nkusu shakukoma bweelesho. (Mate. 6:13) Mutaluubi kwaamba ayi Yehova alisuni kumucafwa kuteshi kumwaanisha. (Kulu. 103:13, 14) Kubelenga Baibo akwalo inga kwamucafwa. Nankashi Melissa ngotwalinga twaambawo wakaamba cakamucafwa kwaamba ayi akome bweelesho bwakuyeeya pashintu shitabete kabotu. Wakaamba ayi: “Kubelenga Baibo bushiku abushiku kwakancafwa kutolelela kulwana miyeeyo itabete kabotu. Kwakancafwa kwiibaluka kwaamba ayi ndi wakwe Yehova alimwi ndisuni kumusebensela mubuumi bwangu.”​—Kulu. 119:9.

¹¹ Amusenge bamwi kwaamba ayi bamucaafwe ndyemucite lipenshi. Amulwiiteko bashali banu mapensho ngomutokwiindaamo. Nabi kwaamba ayi teshi cuubu kubandika makani mbuli aya, kucita boobo kulayandika abuumbi. Nankashi Melissa wakaamba ayi: “Ndakapaila kwaamba ayi Yehova ancaafwe kutaloonda, lyalo ndakalwiitaako bata palipenshi lyangu. Pesule lyakucita boobo ndakalinyumfwa kabotu. Ndakalinga kucishi kwaamba ayi Yehova alikondetwe andime.”

12. Ino nshiinshi sheenga shamucafwa kusala kabotu?

¹² Amukonkele njiisho shamu Baibo. Ndyemutooya cikula, bashali banu balaakutalika kumuleka kwaamba ayi munoolisalila nobeene mushintu shimwi. Nacibi boobo, kuli shiinji nshemutacishiwo mubuumi. Ino inga mwacita buyani kwaamba ayi muleye kucita shintu sheenga shanyonyoola bushicibusa bwanu a Yehova? (Tus. 22:3) Nankashi waliina lya Kari wakaamba shakamucafwa kusala kabotu. Wakesa mukunyumfwishisha kwaamba ayi na uli Mwineklistu ushimpite lwakumushimu toyandiki mulongo wa milawo ya bukaalo buli boonse. Wakaamba ayi: “Ndakalinga kuyandika kunyumfwishisha Yehova mbwaabona shintu muciindi cakukonkelabo milawo.” Ndyemutobelenga Baibo amuliipushe ayi: ‘Ino makani aya atonjiisha nshi pali Yehova mbwaabona shintu? Sa atokwaamba pa njiisho sheenga shancafwa kucita shiluleme? Ino kukonkela nshentokwiiya kuswa mu Baibo inga kwancafwa buyani?’ (Kulu. 19:7; Isa. 48:17, 18) Kubelenga Baibo akukutumana kuyeeyawo kulaakupa kwaamba ayi cimubete cuubu kusalawo kucita shintu shisangalasha Yehova. Kutolelela kuya panembo lwakumushimu kulaakumucafwa kushiba kwaamba ayi tamuyandiki mulongo wa milawo njomweelete kukonkela mubukaalo buli boonse, mukwiinga mulaakushiba Yehova mbwaabona shintu.

13. Ino beshicibusa bali kabotu inga bamucafwa buyani? (Tushimpi 13:20)

¹³ Amusale beshicibusa basuni Yehova. Bweenka mbotwaambawo kale, beshicibusa mbomusala inga bamucafwa kuba Mwineklistu ushimpite. (Amubelenge Tushimpi 13:20.) Nankashi waliina lya Sara wakacileka kuba alusangalalo. Lyalo kwakacitika cintu cimwi cakapa kwaamba ayi aalule mbwaakalinga kubona shintu. Wakaamba ayi: “Ndakacana beshicibusa bali kabotu paciindi ceelete. Nsondo ansondo nebo a nankashi umwi wacanike twakatalika kwiiya Njashi Yamulindilishi. Alimwi mubyaanji umwi wakancafwa kutalika kukumbulawo kumabungano. Ceebo ca lucafwo  lwa babyaanji ndakatalika kucita ciiyo capalwaangu alimwi akupaila cakubikila maano. Bushicibusa bwangu a Yehova bwakatalika kuyuminaako, lyalo ndakatalika alimwi kuba alusangalalo.”

14. Ino ba Julien bakacita buyani kwaamba ayi babe abeshicibusa bali kabotu?

¹⁴ Ino inga mwacita buyani kwaamba ayi mube abeshicibusa beenga bamuyuminisha? Mukwesu waliina lya Julien munene mulibungano, wakaamba ayi: “Ndyendakalinga mwanike, ndakacikonsha kucana beshicibusa bali kabotu kwiinda muncito yakushimikila. Beshicibusa aba bakalinga kusebensa cankusu muncito yakushimikila alimwi bakancafwa kubona ncito yakushimikila mboisangalasha. Ndakatalika kuyeeya shakutalika ncito yaciindi coonse. Alimwi ndakesa mukushiba kwaamba ayi nshindakalinga kucite beshicibusa baanji ceebo cakusekanabo abaabo mbondakalinga kweelenaabo ciimo. Alimwi ndakaba abeshicibusa bali kabotu ku Bethel. Kukonkela cakubonenaako cabo kwakancafwa kusala shakulikondelesha shili kabotu, alimwi ici cakancafwa kuyumya bushicibusa bwangu a Yehova.”

15. Ino Paulo wakacenjesha Timoti kuleya nshi? (2 Timoti 2:20-22)

¹⁵ Ino inga mwacita buyani na mwaboona kwaamba ayi muntu umwi ngomunyumfwanaakwe mulibungano teshi shicibusa uli kabotu kuli ndimwe? Paulo wakalinga kucishi kwaamba ayi bamwi mulibungano lya muciindi ca batumwi tabakalinga kuyeeya akucita shintu mbuli Beneklistu, aboobo wakacenjesha Timoti kuleya kucanika abantu bamushobo uyo. (Amubelenge 2 Timoti 2:20-22.) Bushicibusa bwesu a Yehova bulayandika abuumbi. Twakasebensa cankusu kwaamba ayi tube abushicibusa a Yehova, aboobo tatweelete kuba abeshicibusa beenga banyonyoola bushicibusa bwesu a Ishiwesu wakwiculu.​—Kulu. 26:4.

16. Ino nshiinshi nsheenga mwasala kucita?

¹⁶ Amube anshemusuni kukumanisha kunembo sheenga shamucafwa. Amusale shakucita sheenga shayumya lushomo lwanu akumucafwa kuba Mwineklistu ushimpite. (Efe. 3:16) Kucakubonenaako, inga mwasalawo kubelenga akwiiya Baibo bushiku abushiku. (Kulu. 1:2, 3) Na mpashi inga mweelesha kunoopaila mankanda  aanji alimwi camoyo woonse. Mpashi inga mwayandika kusala kabotu pamakani ashakulikondelesha alimwi ambomusebensesha ciindi. (Efe. 5:15, 16) Yehova alaakukondwa na akabone mbomutosebensa cankusu kwaamba ayi muye panembo.

17. Ino kucafwa bamwi kulaakumuletela shoolwe nshi?

¹⁷ Kucafwa bamwi inga kwamupa kuba Mwineklistu ushimpite. Yesu wakaamba ayi: ‘Kupa kulaleta lusangalalo abuumbi kwiinda kutambula.’ (Milimo 20:35) Mulaakusangalala abuumbi na kamusebenseshako ciindi ankusu shanu kucafwa bamwi. Kucakubonenaako, inga mwasalawo kucafwilisha bacinene alimwi abaabo baciswa ciswa mulibungano lyanu. Mpashi inga mwaya mukuboolilako shintu na kubacafwa kushiba bwakusebensesha mafooni na makompyuta. Na muli mukwesu inga mwasuna kusebensa cankusu kwaamba ayi mukeelele kuba musebenshi ucafwilisha, kwaamba ayi mucafwe bamakwesu abenankashi. (Filip. 2:4) Inga mwatondesha ayi mulibasuni bantu bateshi Bakamboni kwiinda mukubashimikila makani abotu a Bwaami. (Mate. 9:36, 37) Na inga mwacikonsha, amube aluyaando lwakusebensela Yehova muncito yaciindi coonse.

18. Ino kusebensa ncito yaciindi coonse inga kwamucafwa buyani kuya panembo lwakumushimu?

¹⁸ Incito yaciindi coonse inga yamupa shoolwe shiinji sheenga shamucafwa kuya panembo lwakumushimu. Kusebensa bupainiya inga kwamupa coolwe cakucanika ku Cikolo ca Bashimikila sha Bwaami. Inga mweelela kusebensela pa Bethel na muncito yakuyaka misena njetusebensesha muncito yakwe Lesa. Nankashi wacanike waliina lya Kaitlyn usebensa mbuli painiya, wakaamba ayi: “Cintu comwi cakancafwa kuya panembo lwakumushimu pesule lyakubombekwa, nkusebensa abamakwesu abenankashi muncito yakushimikila bekala mucancine kwa myaaka iinji. Kukonkela cakubonenaako cabo kwakancafwa kwiiya Baibo abuumbi akuya panembo mukwiisha kwangu.”

19. Ino nshoolwe nshi nsheshi mukacane na mukatolelele kuya panembo lwakumushimu?

¹⁹ Mulaakucana shoolwe shiinji na mukatolelele kuya panembo lwakumushimu. Teshi mukanyonyoole nkusu shanu kucita shintu shitacite mpindu. (1 Joni 2:17) Mulaakuleya mapensho esa ceebo cakutasala kabotu, kucana lusangalalo lwancinencine alimwi akuswitilila. (Tus. 16:3) Cakubonenaako canu cibotu cilaakuyuminisha bashominyinaanu, bacanike abacinene. (1 Timo. 4:12) Alimwi ciyandika abuumbi, mulaakuba alusangalalo akulinyumfwa kukwana ceebo cakushiba ayi mutosangalasha Yehova alimwi mulicite bushicibusa buyumu anguwe.​—Tus. 23:15, 16.