1. Ino nceebonshi Yesu wakasenga Yehova ayi alame bashikwiiya bakwe?

 MASHIKU Yesu kaatana kufwa, wakasenga Yehova kwaamba ayi alame bashikwiiya bakwe. (Joni 17:15, 20) Kuswabo kale kale, Yehova alabikila maano alimwi akushitilisha bantu bakwe. Nacibi boobo, Yesu wakalinga kucishi ayi Satana alaakubapikisha abuumbi bashikwiiya bakwe. Alimwi Yesu wakalinga kucishi ayi balaakuyandika lucafwo lwakwe Yehova kwaamba ayi bakacikoonshe kulwana nshila shibiibi shakwe Satana.

2. Kweelana a Kulumbaisha 33:18-20, ino nceebonshi tatweelete kuloonda mapensho?

² Beneklistu bancine baleenda mumapensho aanji ceebo ca bantu bamucishi cino ceendeleshekwa a Satana. Tuleenda mumapensho eenga atupa kulinyumfwa kulefuka na kweelesha kushomeka kwesu kuli Yehova. Ano kweelana ambweshi twiiye mumutwi uyu, taakuwo ncotweelete kuloonda. Meenso akwe Yehova ali pali ndiswe​—nkokwaamba ayi alabona mapensho ngotwiindaamo alimwi alisuni kutucafwa. Amuleke tubandike shakubonenaako shobilo shaambwa mu Baibo shitondesha ayi ‘meenso akwe Yehova ali pabaabo bamulemeka.’​—Amubelenge Kulumbaisha 33:18-20.

3. Ino nshiinshi sheenga shatupa kulinyumfwa kuba sweenka?

³ Nabi kwaamba ayi tulicite bamakwesu abenankashi baanji mulibungano, cimwi ciindi inga twalinyumfwa kuba sweenka. Kucakubonenaako, bacanike inga balinyumfwa anga taakuwo wakubacafwa paciindi ndyebatosansulula nshobashoma kubeshicikolonyinaabo na ndyebalongela kulibungano lipya. Sobamwi inga twalinyumfwa cibiibi na kulefuka ceebo cakuyeeya ayi taakuwo weenga watucafwa. Mpashi inga twaalilwa kulwiitako bamwi mbotutolinyumfwa ceebo cakuyeeya ayi mpashi inga tabatunyumfwishishi. Alimwi cimwi ciindi mpashi inga katuyeeya ayi taakuwo utubikila maano. Kulinyumfwa kuba sweenka ceebo ca shintu shipusenepusene, cimwi ciindi inga kwatupa kulisukama akulinyumfwa  anga taakuwo weenga watucafwa. Yehova taasuniiwo ayi tunoolinyumfwa boobo. Ino nceebonshi nceenga twaambila boobo?

4. Ino nciinshi cakapa mushinshimi Elija kwaamba ayi: “Nebo ndime ndacaalaawobo neenka”?

⁴ Amuyeeye pacakubonenaako ca musankwa ushomeka Elija. Jesebelo wakamulwiita ayi atoomucaya, aboobo wakacica kwanshiku shili 40 kwaamba ayi atacaikwi. (1 Baam. 19:10) Ndyaakalinga mucimfwengo, Elija wakalilila Yehova ayi: “Nebo ndime [mushinshimi] ndacaalaawobo neenka.” (1 Baam. 19:10) Kwakalinga abamwi bashinshimi. Kucakubonenaako, Obadiya wakapulusha bashinshimi bali 100 kwaamba ayi batacaikwi kuli Jesebelo. (1 Baam. 18:7, 13) Ano ino nciinshi cakapa Elija kulinyumfwa kuba eenka? Sa wakayeeya ayi bashinshimi Obadiya mbwakapulusha bakafwa? Sa wakalinyumfwa kuba eenka ceebo cakwaamba ayi taakuwo umwi wakatalika kusebensela Yehova pomwi anguwe pesule lyakwaamba ayi Yehova wacita shakatondesha ayi ngo Lesa wancine pa Kalundu ka Kamelo? Sa wakalinyumfwa ayi taakuwo wakalinga kucishi kwaamba ayi balwani bakwe bakalinga kusuni kumucaya na mpashi taakuwo wakalinga kumubikila maano? Baibo tayaambiwo makani oonse aamba Elija mbwaakalinyumfwa. Nacibi boobo, ncetucishi ncakwaamba ayi Yehova wakanyumfwisha cakapa kwaamba ayi Elija alinyumfwe kuba eenka alimwi wakalinga kucishi kabotu bwakumucafwa.

5. Ino Yehova wakacita buyani kwaamba ayi acafwe Elija kulinyumfwa ayi taakalinga eenka?

⁵ Yehova wakacita shintu shipusenepusene kwaamba ayi acafwe Elija. Wakayuminisha Elija kubandika. Wakamwiipusha mankanda obilo ayi: “Ino utoocitanshi kuno?” (1 Baam. 19:9, 13) Yehova wakakutika Elija ndyaakalinga kwaamba mbwakalinga kulinyumfwa. Yehova wakamukumbula kwiinda mukucita shakatondesha ayi wakalinga anguwe alimwi Ngushinkusu. Alimwi wakacafwa Elija kushiba kwaamba ayi kwakalinga bene Isilaeli abamwi bakalinga kulambila Yehova. (1 Baam. 19:11, 12, 18) Cilyeelete Elija wakalinyumfwa kabotu pesule lya kulwiita Yehova mbwaakalinga kulinyumfwa akubona Yehova mbwakamukumbula. Yehova wakapa Elija incito shipusenepusene shiyandika. Wakamulwiita ayi aye ananike Asayelo mafuta a bwaami akumupa bwaami bwa cishi ca Silya, akananike Jewu akumupa bwaami bwa cishi ca Isilaeli,  alimwi ayi akananike Elisha mbuli mushinshimi. (1 Baam. 19:15, 16) Yehova wakacafwa Elija kubikila maano kushintu shibotu kwiinda mukumupa ncito ishi. Kwiilikaawo, Yehova wakapa Elija mucafwi ushomeka, Elisha. Ino Yehova inga wamucafwa buyani na mwalinyumfwa kuba nweenka?

6. Ino inga mwapaila buyani na mwalinyumfwa kuba nweenka? (Kulumbaisha 62:8)

⁶ Yehova alisuni ayi munopaila kuli nguwe. Alabona mapensho ngomutokwiindaamo, alimwi washomesha ayi alaakukutika mipailo yanu paciindi cili coonse. (1 Tesa. 5:17) Alasangalala kukutika kumipailo ya basebenshi bakwe. (Tus. 15:8) Ino inga mwapaila buyani na mwalinyumfwa kuba nweenka? Bweenka mbuli Elija mbwaakacita, amumulwiite Yehova mbomutolinyumfwa. (Amubelenge Kulumbaisha 62:8.) Amumulwiite shitomusukamika amboshitoomupa kulinyumfwa. Amumusenge Yehova kwaamba ayi amucaafwe kushiba nsheenga mwaciita na mwalinyumfwa kuba nweenka na kulinyumfwa cibiibi. Kucakubonenaako, na mulalinyumfwa kuba nweenka alimwi akuloonda bamwi kucikolo ndyebamwiipusha nshemushoma, amusenge Yehova kwaamba ayi amucaafwe kwaamba cakutaloonda. Inga mwamusenga kwaamba ayi amucaafwe kusansulula nshemushoma munshila yeenga taikalashi bamwi. (Luka 21:14, 15) Na mutolinyumfwa kulefuka, amumusenge Yehova kwaamba ayi amucaafwe kulwiitako Mwineklistu ushimpite lwakumushimu palipenshi ndyemutokwiindaamo. Inga mwapaila kwaamba ayi Yehova acafwe wooyo ngomusuni kulwiitako mbomutolinyumfwa kumunyumfwishisha. Amumulwiite Yehova mbomutolinyumfwa, akubona mbweshi akakumbule mipailo yanu, alimwi amusumine lucafwo kuswa kubamwi. Na mukacite boobo, teshi mukalinyumfwe kuba nweenka.

7. Ino mweeya nshi kuswa kucakubonenaako ca mukwesu Mauricio?

⁷ Yehova soonse wakatupa ncito icite mpindu. Aboobo inga mwashoma kwaamba ayi alabona alimwi alalumba pasheesho shoonse nshemucita kwaamba ayi mukumanishe lubasu lwanu mulibungano amuncito yakushimikila. (Kulu. 110:3) Ino kuba ashiinji shakucita muncito iyi inga kwamucafwa buyani kutalinyumfwa kuba nweenka? Amuyeeye cakubonenaako ca mukwesu wacanike waliina lya Mauricio. * Pesule lyakubombekwa, mubye ngobakalinga kunyumfwanaakwe abuumbi wakaswa mucancine mukuya kwaciindi. Mukwesu Mauricio wakaamba ayi: “Ndakacileka kulishoma ndyendakabona ayi waswa mucancine, ndakatalika kutoonsha na inga ndacikonsha kukumanisha nshendakashomesha Yehova alimwi akutolelela kuba lubasu lwa mukwashi wakwe. Ndakalinyumfwa kuba neenka alimwi ndakalinga kuyeeya ayi taakuwo weenga wanyumfwishisha mbondakalinga kulinyumfwa.” Ino nciinshi cakacafwa mukwesu Mauricio? Wakaamba ayi: “Ndakatalika kusebensa cankusu muncito yakushimikila. Ici cakancafwa kucileka kuyeeyabo palwaangu ambondakalinga kulinyumfwa.  Kusebensa abamwi muncito yakushimikila kwakancafwa kuba alusangalalo akucileka kulinyumfwa kuba neenka.” Nabi kwaamba ayi inga tatucikoonshi kushimikila pomwi abashominyineesu, inga twayuminishikwa kwiinda mukushimikila kusebensesha makalata alimwi apafooni. Ino nciinshi cimwi cakacafwa mukwesu Mauricio? Wakatolelela akwaamba ayi: “Alimwi ndakaba ashiinji shakucita mulibungano. Ndakalinga kusebensa cankusu kulibambila kabotu mbasu sha bashikwiiya kumabungano. Kwaabanamo lubasu mukukumanisha mbasu ishi kwakampa kulinyumfwa kuyandika kuli Yehova alimwi akubamwi.”

8. Ino kwiinda mumapensho anene inga kwatupa kulinyumfwa buyani?

⁸ Tutoolangila kwiinda mumapensho munshiku shino shakweelaako. (2 Timo. 3:1) Nacibi boobo, mpashi mapensho amwi inga tatwalangiliiwo, aboobo inga twakankamana na atucitikila. Mpashi cakuteengashila inga twaba alipenshi lyakubula maali, kucatwa bulwashi bucaya, na mpashi kufwitwa shikamukowa nabi shicibusa. Na shamushobo uyu shacitika, inga twalisukama abuumbi, bunene bunene na mapensho ayo atoboneka anga acitika mukukonkana na mpashi oonse acitika paciindi comwi. Nacibi boobo, mutaluubi kwaamba ayi Yehova alabona bukaalo mbotwiindaamo alimwi inga twacikonsha kuliyumya kwiinda mulucafwo lwakwe.

9. Ino ngamapensho nshi amwi Jobo ngakeendaamo?

⁹ Amuyeeye Yehova mbwaakacafwa musankwa ushomeka Jobo. Wakeenda mumapensho apusenepusene anene abuumbi paciindi ciniinibo. Mubushiku bomwibo Jobo wakalwiitikwa ayi shifubwa shakwe sheepwa na kucaikwa, alimwi basebenshi bakwe abana bakwe abalo bafwa. (Jobo 1:13-19) Kaacilila baana ashifubwa shakwe, Jobo wakaciswa abuumbi. (Jobo 2:7) Bukaalo bwakwe bwakabica abuumbi cakwaamba ayi wakaamba ayi: “Buumi bwangu ndabucimwa abuumbi cakwaamba ayi nshisuni akunoocili muumi.”​—Jobo 7:16.

10. Ino Yehova wakamucafwa buyani Jobo kwaamba ayi acikoonshe kuliyumya mumapensho ngaakalinga kwiindaamo? (Amubone cikope cili papeeji yakutaanguna.)

¹⁰ Yehova wakalinga kubona shakalinga kucitika mubuumi bwakwe Jobo. Mukwiinga wakalinga kumusuni abuumbi Jobo, Yehova wakamucafwa kuliyumya mumapensho ngaakalinga kwiindaamo akutolelela kushomeka. Yehova wakabandika a Jobo, akumwiibalusha busongo mbwaacite alimwi ambwalama calusuno shilengwa shakwe. Wakaamba pashinyama shiinji shikankamika. (Jobo 38:1, 2; 39:9, 13, 19, 27; 40:15; 41:1, 2) Alimwi Yehova wakayuminisha Jobo kwiinda mu musankwa wacanike ushomeka waliina lya Eliyu. Eliyu wakayuminisha Jobo kwaamba ayi Yehova lyoonse alapa cilambu kubasebenshi bakwe ceebo cakuliyumya kwabo. Nacibi boobo, Yehova wakapa kwaamba ayi Eliyu alulike Jobo calusuno. Eliyu wakacafwa Jobo kucileka kuyeeya bunene palwaakwe kwiinda mukumwiibalusha kwaamba ayi taakuwo weenga weelana a Yehova Mulengi wa bubumbo boonse. (Jobo 37:14) Alimwi Yehova wakapa Jobo mukuli umwi. Wakamulwiita ayi apailileeko beshicibusa bakwe botatwe abo bakabisha. (Jobo 42:8-10) Ino Yehova alatucafwa buyani ndyetutokwiinda mumapensho?

11. Ino Baibo ilatucafwa buyani ndyetutokwiinda mumapensho?

¹¹ Yehova taabandiki andiswe mukutululama mbuli mbwaakacita kuli Jobo, sombi alacita boobo kwiinda mu Maswi akwe Baibo. (Loma. 15:4) Alatuyuminisha kwiinda mukutwiisha makani atupa kulangila buumi bubotu kunembo. Amuleke tubandike makani aniinibo kuswa mu Baibo eenga atucafwa ndyetutokwiinda mumapensho. Kwiinda mu Malembo, Yehova alatulwiita ayi taakuwo cintu nabi mapensho anene buyani eenga ‘atupansaanya kulusuno lwakwe.’ (Loma. 8:38, 39) Alimwi alatuyuminisha ayi ‘ali pafwiifwi kubaabo bamwiita’ mumupailo. (Kulu. 145:18)  Yehova alatulwiita ayi na twacinka manungo muli nguwe, inga twacikonsha kuliyumya mumapensho ali woonse akuba basangalete nabi ndyetutokwiinda mumapensho. (1 Koli. 10:13; Jemu. 1:2, 12) Alimwi Baibo ilatwibalusha ayi mapensho ngotutokwiindaamo teshi akatolelele alimwi ngapakaciindi kaniini na twaeelanya kucilambu camuyayaya Lesa ncaakatushomesha. (2 Koli. 4:16-18) Yehova watushomesha ayi alaakunyonyoola baabo boonse balengesha ayi tunoopenga, nkokwaamba ayi Satana alimwi abaabo bacita shibiibi bweenka mbuli nguwe. (Kulu. 37:10) Sa kuli malembo ngomwakalabililaako eenga amucafwa kuliyumya ndyemutokwiinda mumapensho?

12. Ino Yehova alisuni ayi tunoocita buyani kwaamba ayi Maswi akwe atucaafwe?

¹² Yehova alisuni kwaamba ayi bushiku abushiku tunocana ciindi ca kubelenga Baibo akukutumana kuyeeyawo abuumbi. Kukonkela nshetwiiya kulayumya lushomo lwesu alimwi abushicibusa bwesu a Yehova. Aboobo ici cilatupa nkusu shakucikonsha kuliyumya mumapensho. Alimwi Yehova alapa mushimu wakwe usalashi kubaabo bacinka manungo mu Maswi akwe. Alimwi mushimu inga watupa “nkusu shiindaawo nshetucite” kwaamba ayi tucikoonshe kuliyumya.​—2 Koli. 4:7-10.

13. Ino shakulya shakumushimu shitupa ‘musebenshi ushomeka alimwi ucite maano’ shilatucafwa buyani kuliyumya?

¹³ Kwiinda mulucafwo lwakwe Yehova, ‘musebenshi ushomeka alimwi ucite maano’ alatubambila makani, mavidyo, alimwi anyiimbo shitucafwa kuyumya lushomo lwesu akutolelela kuba abushicibusa buyumu anguwe. (Mate. 24:45) Tulyeelete kunooshisebensesha kabotu shintu shoonse Yehova nshaatupa paciindi ceelete. Nankashi umwi ku America conoono wakatondesha kulumba abuumbi pashakulya shakumushimu shoonse. Wakaamba ayi: “Kwa myaaka 40 njondasebensela Yehova, ndeenda mumapensho aanji eelesha kushomeka kwangu.” Wakeenda mumapensho anene abuumbi. Kucakubonenaako, bankambiyakwe basankwa bakacaikwa dilaiva wakalinga kukoletwe ndyaakabalimba motoka, bashali bakwe bakaciswa abuumbi akufwa, alimwi wakaciswa bulwashi bwa kansa mankanda obilo. Ino nciinshi cakamucafwa kuliyumya? Wakaamba ayi: “Yehova lyoonse alambikilako maano. Shakulya shakumushimu nshaatupa kwiinda mu musebenshi ushomeka alimwi ucite maano shancafwa kuliyumya. Aboobo ndalinyumfwa bweenka mbuli Jobo uyo wakaamba ayi: ‘Kushikila nkafwe, teshi nkacileke kushomeka!’”​—Jobo 27:5.

14. Ino Yehova alatucafwa buyani kwiinda mu bamakwesu abenankashi paciindi ndyetutokwiinda mumapensho? (1 Bene Tesalonika 4:9)

 ¹⁴ Yehova wakaiisha bantu bakwe kutondesha lusuno alimwi akuyuminishanya muciindi camapensho. (2 Koli. 1:3, 4; amubelenge 1 Bene Tesalonika 4:9.) Bweenka mbuli Eliyu, bamakwesu abenankashi balisunishi kutucafwa kwaamba ayi tutolelele kushomeka ndyetutokwiinda mumapensho. (Milimo 14:22) Kucakubonenaako, amuyeeye libungano kwakalinga kubungana nankashi waliina lya Diane mbolyakamucafwa kutolelela kuba abushicibusa buyumu a Yehova paciindi beebaye ndyebakaciswa abuumbi. Wakaamba ayi: “Cakalinga ciyumu. Sombi twakalinyumfwa ayi Yehova wakatuyuminisha abuumbi mumyeenshi iyumu ilya. Bamulibungano bakatucafwa munshila shiinji. Bamwi bakalinga kutufwakashila, kututuminako mafooni, alimwi akutukumbata, ishi shakatucafwa kuliyumya. Mukwiinga nshicishiiwo kweensha motoka, bamakwesu abenankashi bakalinga kushinisha kwaamba ayi ndacikonsha kucanika kumabungano alimwi akuya muncito yakushimikila na ndacikonsha.” Tulasangalala abuumbi mukwiinga tulicite mukwashi wa bamakwesu abenankashi batondesha lusuno mulibungano!

15. Ino nceebonshi tulishomete cakutatoonsha kwaamba ayi inga twacikonsha kuliyumya ndyetutokwiinda mumapensho?

¹⁵ Soonse tulaakwiindako mumapensho. Nacibi boobo, kweelana ambotweeya, teshi tukabeewo sweenka ndyeshi tukanokwiinda mumapensho. Yehova alatubikila maano lyoonse, bweenka mbuli mushali musankwa ucite lusuno. Ali pafwiifwi andiswe, alilibambite kukutika na twamusenga lucafwo alimwi alisunishishi kutucafwa. (Isa. 43:2) Tulishomete cakutatoonsha kwaamba ayi inga twacikonsha kuliyumya ndyetuli mumapensho mukwiinga watupa shoonse nshetuyandika kwaamba ayi tuliyumye. Wakatupa coolwe cakubandika akwe mumupailo, Maswi akwe Baibo, shakulya shakumushimu shiinji, alimwi amukwashi wa bamakwesu abenankashi batusuni abo batucafwa muciindi camapensho.

16. Ino inga twacita buyani kwaamba ayi Yehova atolelele kutubikila maano?

¹⁶ Tulalumba abuumbi kwaamba ayi tulicite Ishiwesu wakwiculu utubikila maano! “Myoyo yesu ilasangalala muli nguwe.” (Kulu. 33:21) Inga twatondesha Yehova ayi tulalumba mbwatulama calusuno kwiinda mukusebensesha shoonse nshaatupa kwaamba ayi atucaafwe. Alimwi tulyeelete kucita lubasu lwesu kwaamba ayi Yehova atolelele kutubikila maano. Munshila imwi inga twaamba ayi, na twatolelela kucita shoonse nsheenga twacikonsha kunyumfwila Yehova alimwi akucita shintu shiluleme, alaakutulama kwamuyayaya!​—1 Pit. 3:12.