1. Kweelana a Bene Ebulu 12:1, ino nshiinshi nshotuyandika kucita kwaamba ayi tucikonshe kushika kumamanino alubilo lwesu lwakubuumi?

 BAIBO ilakoshanisha buumi bwesu bwa Bwineklistu kulubilo lwakupingana. Abo bacica lubilo ulu kushika kumamanino, balaakutambula buumi butamaani. (2 Timo. 4:7, 8) Tulyeelete kucita nsheenga twacikonsha kwaamba ayi tutolelele kucica, mukwiinga kwacaalabo paniini kwaamba ayi tushike kumamanino alubilo ulu. Mutumwi Paulo uyo wakaswitilila mulubilo ulu lwakubuumi, wakaamba ceenga catucafwa kwaamba ayi tucikonshe kushika kumamanino alubilo ulu. Wakatulwiita ‘kusowa shoonse shitulemena . . . alimwi akucica cakuliyumya mulubilo ulu lwakupingana ndotucite panembo lyesu.’​—Amubelenge Bene Ebulu 12:1, NWT.

2. Ino ‘kusowa shoonse shitulemena’ cilasansulula nshi?

² Sa Paulo ndyaakalemba ayi “atusowe shoonse shitulemena,” wakalinga kusansulula ayi taakuwo mukuli uli woonse Mwineklistu ngwaeelete kunyamuna? Sobwe, ico teshi ncaakalinga kusansulula. Sombi wakalinga kusansulula ayi tulyeelete kusowa mukuli uli woonse utayandiki. Mukuli wamushobo uyo inga wapa kwaamba ayi citubete ciyumu kucica, alimwi inga watulemya. Kwaamba ayi tucikonshe kuliyumya, tulyeelete kufwambaana kushiba mukuli uli woonse utayandiki lyalo akuusowa, mukwiinga inga watulemya. Nacibi boobo, tatweelete kusowa mikuli njetweelete kunyamuna. Mukwiinga na twasowa mikuli iyo, inga tatutoleleli kucica mulubilo ulu lwakubuumi. (2 Timo. 2:5) Ino njimikuli nshi njetweelete kunyamuna?

3. (a) Kweelana a Bene Galatiya 6:5, ino nciinshi ncotweelete kunyamuna? (b) Ino tutokwiiya nshi mumutwi uyu, alimwi ino nceebonshi?

³ Amubelenge Bene Galatiya 6:5. Paulo wakaamba cintu cimwi  ncotweelete kunyamuna. Wakalemba ayi ‘muntu woonse ulalinyamwita mukuli wakwe.’ Palilembo ili Paulo wakalinga kusansulula shintu Lesa nshatulangila kucita mbuli basebenshi bakwe, alimwi isho nshintu umwi nsheenga taatucitiliiko. Mumutwi uyu, tutobandika pa shiilikitwe ‘mumukuli wesu’ alimwi ambweenga twaunyamuna. Alimwi tutobandika apa mikuli imwi itayandiki mpashi njeenga katunyamwite, ansheenga twaciita kwaamba ayi twiisoowe. Kunyamuna mukuli wesu alimwi akusowa mikuli imwi ili yoonse itayandiki, kulaakutucafwa kucica kushika kumamanino alubilo lwesu lwakubuumi.

4. Ino nceebonshi teshi mukuli ulemu kukumanisha cishomesho ncotwakashomesha Yehova ayi tulaakumusebensela kwamuyayaya? (Amubone acikope.)

⁴ Cishomesho ncotwakashomesha Yehova ayi tulaakumusebensela kwamuyayaya. Ndyetwakaaba buumi bwesu kuli Yehova, twakamushomesha ayi tunanomulambila akucita kuyanda kwakwe. Tulyeelete kucita kweelana ambotwakamushomesha. Kucita shoonse nshotwakashomesha Yehova ngumukuli unene, sombi teshi mukuli ulemu. Cili boobo mukwiinga Yehova wakatulenga ayi tunoocita kuyanda kwakwe. (Ciyu. 4:11) Kwiilikaawo,  wakatulenga alusuno lwakumushiba akumulambila alimwi wakatulenga mucikoshanyo cakwe. Aboobo tulacikonsha kuba abushicibusa buyumu anguwe akusangalala kucita kuyanda kwakwe. (Kulu. 40:8) Alimwi na katucita kuyanda kwakwe Lesa akukonkela cakubonenaako ca Mwanaakwe, tulacana “kookesha.”​—Mate. 11:28-30.

5. Ino nshiinshi sheshi shikamucaafwe kukumanisha ncomwakashomesha Yehova? (1 Joni 5:3)

⁵ Ino nshiinshi nsheenga mwaciita kwaamba ayi munyamune mukuli uyu? Kuli shintu shobilo sheenga shamucafwa. Cakutaanguna, amutolelele kuyumya lusuno lwanu pali Yehova. Inga mwacita boobo kwiinda mukukutumana kuyeeya pashintu shibotu shoonse nshaakamucitila alimwi ansheshi akamucitile kunembo. Na kamusuni Lesa abuumbi, cilaakumubeta cuubu kunoomunyumfwila. (Amubelenge 1 Joni 5:3.) Cabili, amukonkele cakubonenaako cakwe Yesu. Wakaswitilila mukucita kuyanda kwakwe Lesa mukwiinga wakalinga kusenga lucafwo kuli Yehova alimwi wakabikila maano ku cilambu cakwe. (Ebu. 5:7; 12:2) Bweenka mbuli Yesu, amupaile kuli Yehova kwaamba ayi amupe nkusu shakuliyumya alimwi amutolelele kuyeeya pakulangila nkomucite kwakutambula buumi butamaani. Ndyemutoyumya lusuno lwanu pali Lesa akukonkela cakubonenaako ca Mwanaakwe, mulaakucikonsha kukumanisha ncomwakashomesha Yehova.

6. Ino nceebonshi tulyeelete kukumanisha mikuli njetucite mumukwashi? (Amubone acikope.)

⁶ Mikuli njetucite mumukwashi. Ndyetuli mulubilo lwesu lwakubuumi, tulyeelete kusuna Yehova a Yesu kwiinda mbotusuni beshikamukowa besu. (Mate. 10:37) Sombi ici tacaambi ayi tatweelete kukumanisha mikuli njetucite mumukwashi, kuba anga mikuli iyo itoopa kwaamba ayi twaalilwe kucita shisangalasha Lesa a Klistu. Sombi kwaamba ayi tusangalashe Lesa a Klistu, tulyeelete kukumanisha mikuli njetucite mumukwashi. (1 Timo. 5:4, 8) Na twacita boobo, tulaakuba alusangalalo abuumbi. Yehova alicishi kwaamba ayi mumikwashi mulaba lusangalalo na musankwa amwanakashi kabatondeshanya lusuno abulemu, bashali kabatondesha lusuno kubana babo akubaiisha alimwi abaana na kabanyumfwila bashali babo.​—Efe. 5:33; 6:1, 4.

7. Ino inga mwacita buyani kwaamba ayi mukumanishe mukuli ngomucite mumukwashi?

⁷ Ino nshiinshi nsheenga mwaciita kwaamba ayi munyamune mukuli uyu? Tacicite mulandu amukuli ngomucite mumukwashi, amucinke manungo mubusongo bwamu Baibo muciindi cakucitabo shintu nshemutoobona ayi shili kabotu, na shintu bantu bakumusena nkomukala nshobacita, nabi shintu bantu bakeeya abuumbi pamakani aya nshobaamba ayi nshomweelete kucita. (Tus. 24:3, 4) Amusebenseshe Mabuku esu aamba shamu Baibo. Mumabuku aya mulacanika makani eenga amucafwa kukonkela njiisho shamu Baibo. Kucakubonenaako, mu buloshuwa ya Mulakonsha Kusangalala Mumukwashi Wanu alimwi amulibuku lya Amusangalale Abuumi Kwamuyayaya! ciiyo 49 aciiyo 50, muli makani akabambilwa beebene, bashali alimwi a bacikula bwangu. b Amube bashinishite kukonkela Baibo nshoyaamba, nabi kwaamba ayi bamwi mumukwashi wanu tabatoocita boobo. Kucita boobo kulaakucafwa mukwashi wanu, alimwi Yehova alaakumupa shoolwe.​—1 Pit. 3:1, 2.

8. Ino shintu nshotusalawo kucita inga shatukuma buyani?

⁸ Mukuli ngotucite pashintu nshotusalawo kucita. Yehova wakatupa nkusu shakulisalila shakucita, alimwi alisuni ayi tunoosangalala ceebo cakunosala kucita shintu shili kabotu. Sombi na twasalawo kucita shintu shitabete kabotu, taatushitilishi kumapensho ngeenga twacaana. (Gala.  6:7, 8) Aboobo ngumukuli wesu na twacana mapensho ceebo cashintu shitabete kabotu nshotwakasalawo kucita na kwaamba. Mpashi cilubo nceenga twaciita inga capa kwaamba ayi njeelacaamba italike kutupensha. Nacibi boobo, kushiba ayi ngumukuli wesu pashintu nshotusalawo kucita, inga kwatupa kulyaambilila shibiibi shesu, kusebensela pashilubo shesu, alimwi akuleya kubooshawo kucita shilubo isho. Kucita boobo inga kwatucafwa kutolelela kucica mulubilo lwakubuumi.

9. Ino nshiinshi nsheenga mwaciita na mwakasalawo kucita cintu citabete kabotu? (Amubone acikope.)

⁹ Ino nshiinshi nsheenga mwaciita kwaamba ayi munyamune mukuli uyu? Ino nshiinshi nsheenga mwaciita na mwakasalawo kucita cintu citabete kabotu? Amushibe kwaamba ayi inga tamucikonshi kwaalula nshomwakacita kale. Tamweelete kusebensesha ciindi ankusu shanu kulifuninina ayi ncomwakacita cakalingabo kabotu na kupa mulandu bamwi pacilubo ncomwakacita. Muciindi cakucita boobo, amusumine shilubo nshomwakacita akweelesha cankusu kucita nsheenga mwacikonsha pacecino ciindi. Na mutolinyumfwa cibiibi pacilubo ncomwakacita, cakuliceesha amupaile kuli Yehova akusumina cilubo ncomwakacita, alimwi akumusenga kwaamba ayi amulekelele. (Kulu. 25:11; 51:3, 4) Amusenge kulekelelwa kubaabo mbomwakakalasha, alimwi na kaciyandika, amusenge lucafwo kubamanene. (Jemu. 5:14, 15) Amwiiye kuswa kushilubo shanu, alimwi akuleya kubooshawo kucita shilubo isho. Na mwacita boobo, inga mwashooma ayi Yehova alaakumutondesha nkuumbu alimwi akumupa lucafwo ndomutooyandika.​—Kulu. 103:8-13.

10. Ino nceebonshi kulilangila kucita shintu nsheenga tatucikonshi ngumukuli ulemu abuumbi? (Bene Galatiya 6:4)

¹⁰ Kulilangila kucita shintu nsheenga tatucikonshi. Kulyeelanya kubamwi inga kwatupa kulefuka. (Amubelenge Bene Galatiya 6:4.) Na lyoonse katulyeelanya kubamwi, inga twatalika kubanyumfwila munyono akuba amushimu wakupingana. (Gala. 5:26) Na katweelesha kucita shintu bamwi nshobatoocita nabi kwaamba ayi inga tatucikonshiwo kucita shintu isho, inga twaliletelabo mapensho. Alimwi Baibo ilaamba ayi: “Cilacisisha moyo na kolangila kapongo kafwite.” (Tus. 13:12) Na katulilangila kucita shintu nsheenga tatucikonshi, inga twalefuka, kulema alimwi inga twaalilwa kunocica cankusu mulubilo lwakubuumi.​—Tus. 24:10.

11. Ino nshiinshi sheenga shamucafwa kwaamba ayi mutanolilangila kucita shintu nsheenga tamucikonshi?

¹¹ Ino nshiinshi nsheenga mwaciita kwaamba ayi musowe mukuli uyu? Mutanolilangila kucita shintu Yehova nshaatamulangili kucita. Taamulangili kumupa shintu nshemutacite. (2 Koli. 8:12) Amushibe kwaamba ayi taelanyi nshomucita kusheesho bamwi nshobacita. (Mate. 25:20-23) Alalumba pa kumusebensela camoyo woonse, kushomeka kwanu, alimwi apa kuliyumya kwanu. Amuliceeshe akushiba kwaamba ayi inga tamucikonshi kucita shintu shoonse nsheenga mwasuna kucita pacecino ciindi, ceebo ca ciimo ncemubeteewo, kuciswa ciswa na ceebo ca bukaalo mbomubeteemo. Bweenka mbuli Basilayi, amukake kutambula mikuli imwi na kuciswa ciswa nabi ciimo ncemubeteewo, inga shapa kwaamba ayi cimubete ciyumu kukumanisha mikuli iyo. (2 Samwe. 19:35, 36) Alimwi bweenka mbuli Mose, amusumine lucafwo kuswa kubamwi alimwi akupako bamwi mikuli na kaciyandika. (Kulo. 18:21, 22) Na kamuliceesha, teshi munolilangila kucita shintu sheenga shapa kwaamba ayi cimubete ciyumu kucica mulubilo lwakubuumi.

12. Sa tulyeelete kulipa mulandu pashintu shitabete kabotu bamwi nshobasalawo kucita? Amusansulule.

¹² Kulipa mulandu pashintu shitabete kabotu bamwi nshobasalawo kucita. Inga tatusaliliko bamwi shakucita na kunoobashitilisha lyoonse pamapensho ngeenga bacana ceebo ca shintu shitabete kabotu nshobasalawo kucita. Kucakubonenaako,  mwaana inga wasalawo kucileka kusebensela Yehova. Bashali inga balinyumfwa cibiibi abuumbi na mwaana wasalawo kucita boobo. Nacibi boobo, bashali balipa mulandu pacintu citabete kabotu mwaana nceenga wasalawo kucita, balalipa mukuli ulemu. Teshi mukuli Yehova ngwaabalangila kunyamuna.​—Loma. 14:12.

13. Ino mushali inga wacita buyani na mwanaakwe wasalawo kucita cintu citabete kabotu?

¹³ Ino nshiinshi nsheenga mwaciita kwaamba ayi musowe mukuli uyu? Amushibe kwaamba ayi soonse Yehova wakatupa nkusu shakulisalila. Muntu uli woonse inga wasalawo kucita cintu ncaasuni. Ici cileelikaawo akusalawo kumusebensela. Yehova alicishi kwaamba ayi muli mushali utamaninite; aboobo alamulangila kucitabo nsheenga mwacikonsha. Shintu mwanaanu nshaasalawo kucita ngu mukuli wakwe, kuteshi mukuli wanu. (Tus. 20:11) Nacibi boobo, mpashi inga mwatolelela kuyeeya pashilubo nshomwakacita mbuli mushali. Na ubo mbocibete, amumulwiite Yehova mbomutolinyumfwa alimwi akumusenga kwaamba ayi amulekelele. Alicishi kwaamba ayi inga tamwaaluli nshomwakacita kale. Alimwi taamulangili kushitilisha mwanaanu kukutebula nshaakashanga. Amushibe kwaamba ayi na mwanaanu weelesha cankusu kwaamba ayi aboolele kuli Yehova, alaakumutambula camaansa obilo.​—Luka 15:18-20.

14. Ino nceebonshi kulinyumfwa cibiibi cakwiindilila ngumukuli ngotweelete kusowa?

¹⁴ Kulinyumfwa cibiibi cakwiindilila. Na twaciita cilubo, cilibo kabotu kulinyumfwa cibiibi. Nacibi boobo, kulinyumfwa cibiibi ngu mukuli Yehova ngwaatatulangili kunyamuna. Ngu mukuli ngotweelete kusowa. Na twakalyaambilila shibiibi shesu, twakaana, alimwi tutoocita nsheenga twacikonsha kwaamba ayi tuleye kubooshawo kucita shilubo isho, inga twashooma ayi Yehova wakatulekelela. (Milimo 3:19) Pesule lyakucita shintu ishi, Yehova taasuniiwo kwaamba ayi tutolelele kunolinyumfwa cibiibi. Alicishi shibiibi sheenga shaswaamo na twatolelela kulinyumfwa cibiibi. (Kulu. 31:10) Na katulinyumfwa cibiibi cakwiindilila, inga twacileka kucica mulubilo lwesu lwakubuumi.​—2 Koli. 2:7.

15. Ino nshiinshi sheenga shamucafwa na mulalinyumfwa cibiibi cakwiindilila? (1 Joni 3:19, 20) (Amubone acikope.)

 ¹⁵ Ino nshiinshi nsheenga mwaciita kwaamba ayi musowe mukuli uyu? Na mwatalika kulinyumfwa cibiibi cakwiindilila, amubikile maano ku cancine cakwaamba ayi Lesa alatulekelela shibiibi shesu. (Kulu. 130:4) Na walekelela baabo baana cancinencine, alabashomesha ayi: “Shibiibi shabo teshi nkashiibalukeewo.” (Jele. 31:34) Ici cilaamba ayi Yehova teshi akamupe mulandu pashilubo nshaakamulekelela. Aboobo mutayeeyi ayi mapensho ngomutokwiindaamo pacecino ciindi, ncitondesho cakwaamba ayi Yehova taana kumulekelela. Alimwi mutanoolinyumfwa cibiibi ceebo cakwaamba ayi mpashi mwakanyaikwa mikuli imwi mulibungano. Yehova taatoleleli kuyeeya pashilubo shanu, alimwi amwebo mbomweelete kucita.​—Amubelenge 1 Joni 3:19, 20.

16. Ino nshiinshi nshotweelete kushiba mbuli beshikucica?

¹⁶ Ndyetutoocica mulubilo lwesu lwakubuumi, tulyeelete ‘kucica munshila yeenga yapa kwaamba ayi tukacane cilambu.’ (1 Koli. 9:24) Inga twacita boobo na twashiba bupusano buli pa mikuli njotweelete kunyamuna amikuli njotweelete kusowa. Mumutwi uyu, twabandikabo pamikuli iniini njotweelete kunyamuna alimwi anjotweelete kusowa. Sombi kuli mikuli aimwi njotweelete kushiba. Yesu wakaamba ayi ‘inga twalemenwa kubulyaabi, bucakolwa alimwi akulisukama shintu sha buumi bwa panshi pano.’ (Luka 21:34) Malembo aya obilo alimwi a Malembo amwi, inga amucafwa kushiba nsheenga mwayandika kwaalulaako ndyemutoocica mulubilo lwakubuumi.

17. Ino nceebonshi inga twashooma ayi tulaakucikonsha kucica lubilo lwakubuumi kushika kumamanino?

¹⁷ Inga twashooma ayi tulaakucikonsha kucica lubilo lwakubuumi kushika kumamanino, mukwiinga Yehova alaakutupa nkusu nshetuyandika. (Isa. 40:29-31) Aboobo amutolelele kucica! Amukonkele cakubonenaako ca mutumwi Paulo, uyo wakacica cankusu kwaamba ayi atambule cilambu cakalinga panembo lyakwe. (Filip. 3:13, 14) Taakuwo weenga wamucicilaako lubilo ulu. Sombi kwiinda mulucafwo lwakwe Yehova, inga mwacikonsha kuswitilila. Yehova inga wamucafwa kunyamuna mikuli yanu alimwi akusowa mikuli itayandiki. (Kulu. 68:19) Kwiinda mulucafwo lwakwe Yehova, mulaakucikonsha kucica mulubilo ulu cakuliyumya, akushika kumamanino!